Texts

Help

Select a text:
Bibliography

Select a chapter:
(no revisions)

Associated topic(s): Zoology, hunting

Show parallels Show headlines
Use dependency labeler

Chapter id: 9076

Click on a sentence to show its analysis
Keep the mouse pointer over a lemma to show its meanings.

athaivamagadādyaiśca pūrvoktair bṛṃhaṇīyakaiḥ / (1.1) Par.?

hṛṣṭān puṣṭān samālakṣya nūtanacchadaśobhitān // (1.2) Par.?

nīlendramaṇisaṃkāśapakṣatibhyāṃ virājitān / (2.1) Par.?

muktājālairivorusthapakṣarājibhirañjitān // (2.2) Par.?

nirmuktoragasaṃkāśān paṭṭapāśopayojitān / (3.1) Par.?

grīvikāratnapadikāmañjarīpiñjarīkṛtān // (3.2) Par.?

kiṅkiṇīrāvamukharān kṛtvā tu sudine punaḥ / (4.1) Par.?

pūrvoktavidhinā raktān vidhāyāhvāyayet punaḥ // (4.2) Par.?

pūrvasaṃskārabodhāya rajjuyantritapatriṣu / (5.1) Par.?

paripātaṃ śikṣayīta pakṣarakṣāviśāradaḥ // (5.2) Par.?

ye śyenā nīḍanilayā labdhāḥ prāgbandhapoṣitāḥ / (6.1) Par.?

tān anabhyastasaṃskārān patatriparipātane // (6.2) Par.?

bahudhā śikṣayet prājñaḥ pāṭavakramavardhanaiḥ / (7.1) Par.?

suśiṣyā iva te śyenāḥ śikṣāṃ gṛhṇanti satvaram // (7.2) Par.?

samyak suśikṣitānāṃ tu śyenānāṃ marutāmiva / (8.1) Par.?

nākāryaṃ vidyate kiṃcit nāsādhyaṃ yogyavastuṣu // (8.2) Par.?

saṃdhārayeyustān hastairyuvāno mṛṣṭakuṇḍalāḥ / (9.1) Par.?

suveśāścāruvasanāḥ śikṣitā bahudhānvaham // (9.2) Par.?

śikṣāvaiśadyamālakṣya tadaiṣāṃ svayamīśvaraḥ / (10.1) Par.?

draṣṭuṃ vinodaṃ nirgacchet ākheṭoditavāsare // (10.2) Par.?

yāminyāḥ prathamādeva yāmādudayaśālibhiḥ / (11.1) Par.?

prātareva śaranmeghairyāyādruddhe divākare // (11.2) Par.?

dūrasaṃcāritānekaseno ruddhānyasaṃcaraḥ / (12.1) Par.?

svayaṃ viralavikhyātavīrāptaprāyasaṃvṛtaḥ // (12.2) Par.?

kavikārajjuvinyastasamastagatipāṭavaiḥ / (13.1) Par.?

surajadhvānavinyāsacaraṇanyāsaśālibhiḥ // (13.2) Par.?

vāhyamānaḥ svayaṃ svaśvaiḥ śyenavāhaiśca saṃyutaḥ / (14.1) Par.?

pracchāye bhūdharendrāṇāṃ yathākālam atandritaḥ // (14.2) Par.?

athavā yāmaśeṣe tu vāsare mṛgayāmiyāt / (15.1) Par.?

śaratkāle pṛṣṭhato'rkaṃ kṛtvā dūre tu no hitam // (15.2) Par.?

upatyakāyāṃ mṛgayāṃ yadyupeyāstadābhitaḥ / (16.1) Par.?

pracārayet padātīṃśca giridroṇyantarādiṣu // (16.2) Par.?

tatrasthāste ca paśyeran pakṣiṇāmapi sarvataḥ / (17.1) Par.?

uḍḍīyānyatra patanaṃ nilīyānantarāḥ sthalīḥ // (17.2) Par.?

samāyāṃ bhuvi vistāro mārgaṇe sādināṃ bhavet / (18.1) Par.?

viṣamāyāṃ tu pattīnāṃ girikūṭe śunāṃ punaḥ // (18.2) Par.?

madhye śyenadharo netā pārśvayordvau ca sainikau / (19.1) Par.?

ekaviṃśatyaśvavārair maṇḍalaṃ parikīrtitam // (19.2) Par.?

netṛdattekṣaṇaḥ savyo vyāmamātrāvakāśataḥ / (20.1) Par.?

pārśvayoḥ samabhāgena maṇḍalasthaścarejjanaḥ // (20.2) Par.?

ā pūrvād aiśvarīm āśām adhimoktum athārhati / (21.1) Par.?

śyainiko yena no lakṣyakṛtodvego bhaveddvayoḥ // (21.2) Par.?

śyenā yasyātha bahavastathaiva hayasādinaḥ / (22.1) Par.?

saṃcārayet sa parito maṇḍalāni pṛthak pṛthak // (22.2) Par.?

īśamaṇḍalamadhyasthaḥ sainiko hi vinājñayā / (23.1) Par.?

moktuṃ nārhati nediṣṭhe lakṣye 'pyaskhalitasthitiḥ // (23.2) Par.?

maṇḍale baharī tvekā kuhyapyekā trivājikā / (24.1) Par.?

vāsādyāḥ pañcaṣāḥ śastāḥ kramo moke puroditaḥ // (24.2) Par.?

krośārddhāddhārayet svīyān maṇḍalānmaṇḍalaṃ pṛthak / (25.1) Par.?

yathā bhavenna kuhyādervāsādermiśraṇādbhayam // (25.2) Par.?

vanyānāṃ tu śaśādīnāṃ trāsanāya puraiva hi / (26.1) Par.?

vikoṣāścāsayaḥ kāryā dhāryā vā śaktayo'bhitaḥ // (26.2) Par.?

bahavaḥ patriṇo dhāryā vinītaiḥ kālavedibhiḥ / (27.1) Par.?

śyainikasya prabhavataḥ paritaḥ paricārakaiḥ // (27.2) Par.?

mārgaṇe mandasañcāro maṇḍalasya sadeṣyate / (28.1) Par.?

nipātānantarānveṣe sutarāṃ manda iṣyate // (28.2) Par.?

sādināmagragā ye ca vetriṇaste'pi dhūtikāḥ / (29.1) Par.?

ṭonādīn muṣṭimokena kṣiperan varttikādiṣu // (29.2) Par.?

śaighryād alakṣyayātayas te'pi tiryaṅnipātiṣu / (30.1) Par.?

cīcīkucīravonneyagrahaṇād rasapuṣṭidā // (30.2) Par.?

tadrasākṣiptahṛdayastāneva yadi ceśvaraḥ / (31.1) Par.?

prakrīḍayettadā tajjñairbhāvyaṃ vetribhirādarāt // (31.2) Par.?

vetraprahārānabhitaḥ kurvadbhirmandacāriṇaḥ / (32.1) Par.?

utthāpayeyurlāvādīn ḍhokayeyuśca tadgatīḥ // (32.2) Par.?

yatraikavāraṃ patitaḥ pakṣī kuryānna cotplutim / (33.1) Par.?

sarajjunā śunā tatra mārgayitvā visarjayet // (33.2) Par.?

sāvadhānena devena bhāvyamutpatate hyasau / (34.1) Par.?

ityādi madhurālāpairbodhayeyustatheśvaram // (34.2) Par.?

kuhyā mokaḥ sārase'tha krauñce raudrarasāvahaḥ / (35.1) Par.?

sapakṣayoḥ parvatayoriva yatrānudhāvanam // (35.2) Par.?

nipatya nakharākṣepakrūrakreṅkārakūjitam / (36.1) Par.?

parāvṛttyogracañcvā ca prahāro raudrasaṃgaraḥ // (36.2) Par.?

atidūragatānāṃ tu kaṅkadātyūhapakṣiṇām / (37.1) Par.?

lakṣye moko baharyā hi janayatyadbhutaṃ rasam // (37.2) Par.?

yatra vegānilasvānabhīṣitāḥ khātpatanti ca / (38.1) Par.?

chinnapakṣanagākārāḥ khagāstasmāt kimadbhutam // (38.2) Par.?

hāriṇaṃ śiśumādāya sāntrāṇyaṅgāni bhakṣayan / (39.1) Par.?

anivāryo hi bībhatsaṃ carakho janayatyalam // (39.2) Par.?

ṭonādīnāṃ pakṣavegāt nilīnāḥ kecukādayaḥ / (40.1) Par.?

nirudyamāḥ kuñjamadhye darśayanti bhayānakam // (40.2) Par.?

atilīno bharadvājaḥ punaruccāvacaṃ bahu / (41.1) Par.?

pralapaṃllakṣyatāmeṣyan svairaṃ hāsarasāyate // (41.2) Par.?

bhayārteṣu pralīneṣu vācā lakṣyeṣu teṣvatha / (42.1) Par.?

gulikāstraprayogo hi kartavyaḥ kautukārthinā // (42.2) Par.?

dūrāllakṣyeṣu nipatan sthāne grahaṇamācaran / (43.1) Par.?

parāsukaraṇe dakṣo vājī vīrarasāyate // (43.2) Par.?

ūrddhvākrāntiḥ samākrāntirnīcākrāntiriti tridhā / (44.1) Par.?

varajagrahaṇe proktā vājānāṃ rasabhūmayaḥ // (44.2) Par.?

chāyākāraḥ nilīyādho haṭhāllakṣye tathorddhvage / (45.1) Par.?

utplutya śaravatpātamūrddhvākrāntī rasāvahā // (45.2) Par.?

samamevānusaraṇāt lakṣyālakṣyeṇa vā punaḥ / (46.1) Par.?

daṇḍavat patanaṃ lakṣye samākrāntiḥ samā matā // (46.2) Par.?

nīcānusāriṇi bhayādupariṣṭācca vajravat / (47.1) Par.?

saṃrambhāt patanaṃ lakṣye nīcākrāntiḥ suduṣkarā // (47.2) Par.?

evaṃ lakṣyānusaraṇāt bahuśaḥ paridhāvanāt / (48.1) Par.?

ativiśrambhaṇāt vājā gatāḥ śraiṣṭhyaṃ patatriṣu // (48.2) Par.?

utplutyotplutya patanaiḥ parigṛhyāvapātanaiḥ / (49.1) Par.?

mallā iva vidagdhānāṃ haranti prasabhaṃ manaḥ // (49.2) Par.?

dvandvasaṃcāriṇām ekanigrahe 'nyasya kūjitam / (50.1) Par.?

yatrābhitastatra rasaḥ karuṇastaruṇāyate // (50.2) Par.?

śṛṅgāraḥ puṣkalastatra dṛśyate nāyake dvidhā / (51.1) Par.?

lakṣyaprāptau bhogarūpastadaprāptau tathetaraḥ // (51.2) Par.?

yathāvakāśaromāñcaharṣāśrustambhagadgadaiḥ / (52.1) Par.?

cintāpralāpavaivarṇyabhāvaiḥ sattvaṃ vyanakti ca // (52.2) Par.?

strīsambhogādapi raso mṛgavyāyāṃ viśiṣyate / (53.1) Par.?

yena trasyatkuraṅgākṣyāḥ patiṃ sā vaśayatyalam // (53.2) Par.?

kaṇṭhalagnāṃ priyāṃ hitvā haimanīṣu niśāsvapi / (54.1) Par.?

nābhisāraṃ narāḥ kuryuryadi neṣṭā ca sā bhavet // (54.2) Par.?

atha vāsādimoko'pi śritāpaśritakādibhiḥ / (55.1) Par.?

rabhasā vihitāśleṣaḥ śṛṅgāram anusajati // (55.2) Par.?

tanūruhāṇi grahaṇe khātpatanti patatriṇām / (56.1) Par.?

janayanti prasannendramuktapuṣpotkarabhramam // (56.2) Par.?

ye vimuktā nije lakṣye dūre dūre skhalanti na / (57.1) Par.?

te sādhuvādapātrāṇi śikārā netare punaḥ // (57.2) Par.?

śīghratā pratisandhānaṃ śikārāṇāṃ dviśastriśaḥ / (58.1) Par.?

grahaṇe tittirādīnāṃ tat kena pratidiśyatām // (58.2) Par.?

jālapādeṣvapi tathā sarasīṣu saraḥsu ca / (59.1) Par.?

pūrvacārairanugataḥ kuhyādīn parimocayet // (59.2) Par.?

tatra sambhūya mokṣo'pi viśrambhaṃ ye gatā mithaḥ / (60.1) Par.?

teṣāṃ praśasyate dikṣu kavīnāṃ viplavāya tu // (60.2) Par.?

dundubhyāstāḍanaṃ kāryaṃ vārityāgāya patriṇām / (61.1) Par.?

yathā sukhena gṛhṇīyuḥ śyenāḥ svasthānavicyutān // (61.2) Par.?

ye nāṭyabandhakuśalairvitataprapañcaiḥ saṃdarśitāḥ kila rasāḥ samayaṃ vibhajya / (62.1) Par.?

ekatra te samakameva rasā anūnā dṛśyanta eva kṛtibhirmṛgayāvihāre // (62.2) Par.?

iti śrīrudradevaviracite śyainike śāstre śyenapāteti kartavyatā paricchedaḥ ṣaṣṭhaḥ // (63.1) Par.?

Duration=0.24499607086182 secs.