Texts

yudhiṣṭhira uvāca / (1.1) Par.?

jalamadhye mahādevaḥ kena tiṣṭhati hetunā / (1.2) Par.?

uttaraṃ dakṣiṇaṃ kūlaṃ varjayitvā dvijottama // (1.3) Par.?

śrīmārkaṇḍeya uvāca / (2.1) Par.?

etadākhyānamatulaṃ puṇyaṃ śrutimukhāvaham / (2.2) Par.?

purāṇe yacchrutaṃ tāta tatte vakṣyāmyaśeṣataḥ // (2.3) Par.?

tretāyuge mahābhāga rāvaṇo devakaṇṭakaḥ / (3.1) Par.?

trailokyavijayī raudraḥ surāsurabhayaṃkaraḥ // (3.2) Par.?

devadānavagandharvair ṛṣibhiśca tapodhanaiḥ / (4.1) Par.?

avadhyo 'tha vimānena yāvatparyaṭate mahīm // (4.2) Par.?

tāvaddhindhyagirer madhye dānavo baladarpitaḥ / (5.1) Par.?

mayo nāmeti vikhyāto guhāvāsī tapaścaran // (5.2) Par.?

tasya pārśvagato rakṣo vinayād avaniṃ gataḥ / (6.1) Par.?

pūjito dānasanmānair idaṃ vacanam abravīt // (6.2) Par.?

kasyeyaṃ padmapatrākṣī pūrṇacandranibhānanā / (7.1) Par.?

kiṃnāmadheyā tapati tapa ugraṃ kathaṃ vibho // (7.2) Par.?

maya uvāca / (8.1) Par.?

dānavānāṃ patiḥ śreṣṭho mayo 'haṃ nāma nāmataḥ / (8.2) Par.?

bhāryā tejovatī nāma tasyāstu tanayā śubhā // (8.3) Par.?

mandodarīti vikhyātā tapate bhartṛkāraṇāt / (9.1) Par.?

ārādhayantī bhartāramumāyā dayitaṃ śubham // (9.2) Par.?

tacchrutvā vacanaṃ tasya rāvaṇo madamohitaḥ / (10.1) Par.?

prasṛtaḥ praṇato bhūtvā mayaṃ vacanam abravīt // (10.2) Par.?

paulastyānvayasaṃjāto devadānavadarpahā / (11.1) Par.?

prārthayāmi mahābhāga sutāṃ tvaṃ dātumarhasi // (11.2) Par.?

jñātvā paitāmahaṃ vṛttaṃ mayenāpi mahātmanā / (12.1) Par.?

rāvaṇāya sutā dattā pūjayitvā vidhānataḥ // (12.2) Par.?

gṛhītvā tāṃ tadā rakṣo 'bhyarcyamāno niśācaraiḥ / (13.1) Par.?

devodyāne vimānaiśca krīḍate sa tayā saha // (13.2) Par.?

kenacittvatha kālena rāvaṇo lokarāvaṇaḥ / (14.1) Par.?

putraṃ putravatāṃ śreṣṭho janayāmāsa bhārata // (14.2) Par.?

tenaiva jātamātreṇa rāvo mukto mahātmanā / (15.1) Par.?

saṃvartakasya meghasya tena lokā jaḍīkṛtāḥ // (15.2) Par.?

śrutvā tannarditaṃ ghoraṃ brahmā lokapitāmahaḥ / (16.1) Par.?

nāma cakre tadā tasya meghanādo bhaviṣyati // (16.2) Par.?

evaṃnāmā kṛtaḥ so 'pi paramaṃ vratamāsthitaḥ / (17.1) Par.?

toṣayāmāsa deveśamumayā saha śaṅkaram // (17.2) Par.?

vratairniyamadānaiśca homajāpyavidhānataḥ / (18.1) Par.?

kṛcchracāndrāyaṇairnityaṃ kṛśaṃ kurvankalevaram // (18.2) Par.?

evam anyaddine tāta kailāsaṃ dharaṇīdharam / (19.1) Par.?

gatvā liṅgadvayaṃ gṛhya prasthito dakṣiṇāmukhaḥ // (19.2) Par.?

narmadātaṭam āśritya snātukāmo mahābalaḥ / (20.1) Par.?

nikṣipya pūjayan devaṃ kṛtajāpyo nareśvara // (20.2) Par.?

tatrāyatanāvāsena snāto hutahutāśanaḥ / (21.1) Par.?

kṛtakṛtyamivātmānaṃ mānayitvā niśācaraḥ // (21.2) Par.?

gantukāmaḥ paraṃ mārgaṃ laṅkāyāṃ nṛpasattama / (22.1) Par.?

ekamuddharato liṅgaṃ praṇataḥ savyapāṇinā // (22.2) Par.?

dvitīyaṃ tu dvitīyena bhaktyā paulastyanandanaḥ / (23.1) Par.?

tāvad eva mahāliṅgaṃ patitaṃ narmadāṃbhasi // (23.2) Par.?

yāhi yāhīti cetyuktvā jalamadhye pratiṣṭhitaḥ / (24.1) Par.?

namitvā rāvaṇistasya devasya parameṣṭhinaḥ // (24.2) Par.?

jagāmākāśam āviśya pūjyamāno niśācaraiḥ / (25.1) Par.?

tadā prabhṛti tattīrthaṃ meghanādeti viśrutam // (25.2) Par.?

pūrvaṃ tu garjanaṃ nāma sarvapāpakṣayaṃkaram / (26.1) Par.?

tasmiṃstīrthe tu rājendra yastu snānaṃ samācaret // (26.2) Par.?

ahorātroṣito bhūtvā aśvamedhaphalaṃ labhet / (27.1) Par.?

piṇḍadānaṃ tu yaḥ kuryāt tasmiṃstīrthe narādhipa // (27.2) Par.?

yatphalaṃ sattrayajñena tadbhavennātra saṃśayaḥ / (28.1) Par.?

tena dvādaśavarṣāṇi pitaraḥ saṃpratarpitāḥ // (28.2) Par.?

yastu bhojayate vipraṃ ṣaḍrasātrena bhārata / (29.1) Par.?

akṣayapuṇyam āpnoti tatra tīrthe narottama // (29.2) Par.?

prāṇatyāgaṃ tu yaḥ kuryād bhāvito bhāvitātmanā / (30.1) Par.?

sa vasecchāṅkare loke yāvad ā bhūtasamplavam // (30.2) Par.?

eṣā te naraśārdūla garjanotpattiruttamā / (31.1) Par.?

kathitā snehabandhena sarvapāpakṣayakarī // (31.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe meghanādatīrthamāhātmyavarṇanaṃ nāma pañcatriṃśo 'dhyāyaḥ // (32.1) Par.?