Texts

uttānapāda uvāca / (1.1) Par.?

māhātmyaṃ tīrthajaṃ dṛṣṭvā citraseno nareśvaraḥ / (1.2) Par.?

kiṃ cakāra kva vā vāsaṃ kimāhāro babhūva ha // (1.3) Par.?

īśvara uvāca / (2.1) Par.?

bhṛgutuṅgaṃ samāruhya aiśānīṃ diśamāśritaḥ / (2.2) Par.?

tapaścacāra vipulaṃ kuṇḍe tatra nṛpottamaḥ // (2.3) Par.?

sarvān devān hṛdi dhyātvā brahmaviṣṇumaheśvarān / (3.1) Par.?

vicikṣepa yadātmānaṃ pratyakṣau rudrakeśavau / (3.2) Par.?

kare gṛhītvā rājānaṃ rudro vacanam abravīt // (3.3) Par.?

īśvara uvāca / (4.1) Par.?

prāṇatyāgaṃ mahārāja mā kāle tvaṃ kṛthā vṛthā / (4.2) Par.?

adyāpyasi yuvā tvaṃ vai na yuktaṃ maraṇaṃ tava // (4.3) Par.?

svasthānaṃ gaccha śīghraṃ tvaṃ bhuktvā bhogānyathepsitān / (5.1) Par.?

kuru niṣkaṇṭakaṃ rājyaṃ nāke śakra ivāparaḥ // (5.2) Par.?

citrasena uvāca / (6.1) Par.?

na rājyaṃ kāmaye deva na putrān na ca bāndhavān / (6.2) Par.?

na bhāryāṃ na ca kośaṃ ca na gajān na turaṃgamān // (6.3) Par.?

muñca muñca mahādeva mā vighnaḥ kriyatāṃ mama / (7.1) Par.?

svargaprāptir mamādyaiva tvatprasādānmaheśvara // (7.2) Par.?

īśvara uvāca / (8.1) Par.?

yasyāgrato bhaved brahmā viṣṇuḥ śambhus tathaiva ca / (8.2) Par.?

svargeṇa tasya kiṃ kāryaṃ sa gataḥ kiṃ kariṣyati // (8.3) Par.?

tuṣṭā vayaṃ trayo devā vṛṇīṣva varamuttamam / (9.1) Par.?

yathepsitaṃ mahārāja satyam etad asaṃśayam // (9.2) Par.?

citrasena uvāca / (10.1) Par.?

yadi tuṣṭāstrayo devā brahmaviṣṇumaheśvarāḥ / (10.2) Par.?

adyaprabhṛti yuṣmābhiḥ sthātavyam iha sarvadā // (10.3) Par.?

gayāśiro yathā puṇyaṃ kṛtaṃ yuṣmābhir eva ca / (11.1) Par.?

tathaivedaṃ prakartavyaṃ śūlabhedaṃ ca pāvanam // (11.2) Par.?

yatrayatra sthitā yūyaṃ tatratatra vasāmyaham / (12.1) Par.?

gaṇānāṃ caiva sarveṣām ādhipatyam athāstu me // (12.2) Par.?

īśvara uvāca / (13.1) Par.?

adyaprabhṛti tiṣṭhāmaḥ śūlabhede nareśvara / (13.2) Par.?

trikālāṃ hi trayo devāḥ kalāṃśena vasāmahe // (13.3) Par.?

nandisaṃjño gaṇādhīśo bhaviṣyati bhavāndhruvam / (14.1) Par.?

matsamīpe tu bhavata ādau pūjā bhaviṣyati // (14.2) Par.?

prakṣipya tāni cāsthīni yatra dīrghatapā yayau / (15.1) Par.?

sakuṭumbo vimānasthaḥ svargatas tvaṃ tathā kuru // (15.2) Par.?

evaṃ devā varaṃ dattvā citrasenāya pārthiva / (16.1) Par.?

kuṇḍamūrdhani yāmyāyāṃ trayo devās tadā sthitāḥ // (16.2) Par.?

parasparaṃ vadantyevaṃ puṇyatīrthamidaṃ param / (17.1) Par.?

yathā hi gayāśiraḥ puṇyaṃ pūrvameva paṭhyate / (17.2) Par.?

tathā revātaṭe puṇyaṃ śūlabhedaṃ na saṃśayaḥ // (17.3) Par.?

īśvara uvāca / (18.1) Par.?

idaṃ tīrthaṃ tathā puṇyaṃ yathā puṇyaṃ gayāśiraḥ / (18.2) Par.?

sakṛtpiṇḍodakenaiva naro nirmalatāṃ vrajet // (18.3) Par.?

ekaṃ gayāśiro muktvā sarvatīrthāni bhūpate / (19.1) Par.?

śūlabhedasya tīrthasya kalāṃ nārhanti ṣoḍaśīm // (19.2) Par.?

kuṇḍam udīcyāṃ yāmyāyāṃ daśahastapramāṇataḥ / (20.1) Par.?

raudravāruṇakāṣṭhāyāṃ pramāṇaṃ caikaviṃśati // (20.2) Par.?

etatpramāṇaṃ tattīrthaṃ piṇḍadānādikarmasu / (21.1) Par.?

nādharmaniratā dātuṃ labhante dānamatra hi // (21.2) Par.?

viṣṇustu pitṛrūpeṇa brahmarūpī pitāmahaḥ / (22.1) Par.?

prapitāmaho rudro 'bhūdevaṃ tripuruṣāḥ sthitāḥ // (22.2) Par.?

kadā paśyati tīrthaṃ vai kadā nastārayiṣyati / (23.1) Par.?

iti pratīkṣāṃ kurvanti putrāṇāṃ satataṃ nṛpa / (23.2) Par.?

śūlabhede naraḥ snātvā dṛṣṭvā śūladharaṃ sakṛt // (23.3) Par.?

nāputro nādhano rogī saptajanmasu jāyate / (24.1) Par.?

ekaviṃśatiṃ pituḥ pakṣe mātuśvaivekaviṃśatim // (24.2) Par.?

bhāryāpakṣe daśaiveha kulānyetāni tārayet / (25.1) Par.?

śūlabhedavane rājañchākamūlaphalairapi // (25.2) Par.?

ekasminbhojite vipre koṭīr bhavati bhojitā / (26.1) Par.?

pañcasthāneṣu yaḥ śrāddhaṃ kurute bhaktimān naraḥ // (26.2) Par.?

kulāni pretabhūtāni sarvāṇyapi hi tārayet / (27.1) Par.?

dvijadevaprasādena pitṝṇāṃ ca prasādataḥ // (27.2) Par.?

śrāddhado nivaset tatra yatra devo maheśvaraḥ / (28.1) Par.?

syurātmaghātino ye ca gobrāhmaṇahanāśca ye // (28.2) Par.?

daṃṣṭribhir jalapāte ca vidyutpāteṣu ye mṛtāḥ / (29.1) Par.?

na yeṣām agnisaṃskāro nāśaucaṃ nodakakriyā // (29.2) Par.?

tatra tīrthe tu yasteṣāṃ śrāddhaṃ kurvīta bhaktitaḥ / (30.1) Par.?

mokṣāvāptir bhavet teṣāṃ yugamekaṃ na saṃśayaḥ // (30.2) Par.?

ajñānād yatkṛtaṃ pāpaṃ bālabhāvācca yatkṛtam / (31.1) Par.?

tatsarvaṃ nāśayet pāpaṃ snānamātreṇa bhūpate // (31.2) Par.?

rajakena yathā dhautaṃ vastraṃ bhavati nirmalam / (32.1) Par.?

tathā pāpo 'pi tattīrthe snāto bhavati nirmalaḥ // (32.2) Par.?

saṃnyāsaṃ kurute yo 'tra tīrthe vidhisamanvitam / (33.1) Par.?

dhyāyan nityaṃ mahādevaṃ sa gacchet paramaṃ padam // (33.2) Par.?

krīḍitvā sa yathākāmaṃ svecchayā śivamandire / (34.1) Par.?

vedavedāṅgatattvajño jāyate 'sau śubhe kule // (34.2) Par.?

rūpavānsubhagaścaiva sarvavyādhivivarjitaḥ / (35.1) Par.?

rājā vā rājaputro vācārasamanvitaḥ // (35.2) Par.?

etatte kathitaṃ rājaṃstīrthasya phalamuttamam / (36.1) Par.?

yacchrutvā mānavo nityaṃ mucyate sarvakilbiṣaiḥ // (36.2) Par.?

ya idaṃ śrāvayen nityamākhyānaṃ dvijapuṃgavān / (37.1) Par.?

śrāddhe devakule vāpi paṭhetparvṇi parvṇi // (37.2) Par.?

gīrvāṇāstasya tuṣyanti manuṣyāḥ pitṛbhiḥ saha / (38.1) Par.?

paṭhatāṃ śṛṇvatāṃ caiva naśyate sarvapātakam // (38.2) Par.?

likhitvā tīrthamāhātmyaṃ brāhmaṇebhyo dadāti yaḥ / (39.1) Par.?

jātismaratvaṃ labhate prāpnotyabhimataṃ phalam // (39.2) Par.?

rudraloke vaset tāvad yāvad akṣaram anvitam // (40.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe śūlabhedamāhātmye kāśīrājamokṣagamanaṃ nāma pañcapañcāśattamo 'dhyāyaḥ // (41.1) Par.?