Texts

athātaḥ saṃyogaśaramūlīyaṃ vājīkaraṇapādaṃ vyākhyāsyāmaḥ // (1) Par.?

iti ha smāha bhagavānātreyaḥ // (2) Par.?

vājīkaraṇam anvicchet puruṣo nityamātmavān / (3.1) Par.?

tadāyattau hi dharmārthau prītiśca yaśa eva ca // (3.2) Par.?

putrasyāyatanaṃ hy etadguṇāścaite sutāśrayāḥ / (4.1) Par.?

vājīkaraṇam agryaṃ ca kṣetraṃ strī yā praharṣiṇī // (4.2) Par.?

iṣṭā hy ekaikaśo 'py arthāḥ paraṃ prītikarāḥ smṛtāḥ / (5.1) Par.?

kiṃ punaḥ strīśarīre ye saṃghātena pratiṣṭhitāḥ // (5.2) Par.?

saṃghāto hīndriyārthānāṃ strīṣu nānyatra vidyate / (6.1) Par.?

stryāśrayo hīndriyārtho yaḥ sa prītijanano'dhikam / (6.2) Par.?

strīṣu prītirviśeṣeṇa strīṣv apatyaṃ pratiṣṭhitam // (6.3) Par.?

dharmārthau strīṣu lakṣmīśca strīṣu lokāḥ pratiṣṭhitāḥ / (7.1) Par.?

surūpā yauvanasthā yā lakṣaṇairyā vibhūṣitā // (7.2) Par.?

yā vaśyā śikṣitā yā ca sā strī vṛṣyatamā matā / (8.1) Par.?

nānābhaktyā tu lokasya daivayogācca yoṣitām // (8.2) Par.?

taṃ taṃ prāpya vivardhante naraṃ rūpādayo guṇāḥ / (9.1) Par.?

vayorūpavacohāvair yā yasya paramāṅganā // (9.2) Par.?

praviśatyāśu hṛdayaṃ daivād vā karmaṇo 'pi vā / (10.1) Par.?

hṛdayotsavarūpā yā yā samānamanaḥśayā // (10.2) Par.?

samānasattvā yā vaśyā yā yasya prīyate priyaiḥ / (11.1) Par.?

yā pāśabhūtā sarveṣām indriyāṇāṃ parairguṇaiḥ // (11.2) Par.?

yayā viyukto nistrīkam aratir manyate jagat / (12.1) Par.?

yasyā ṛte śarīraṃ nā dhatte śūnyam ivendriyaiḥ // (12.2) Par.?

śokodvegāratibhayair yāṃ dṛṣṭvā nābhibhūyate / (13.1) Par.?

yāti yāṃ prāpya visrambhaṃ dṛṣṭvā hṛṣyatyatīva yām // (13.2) Par.?

apūrvāmiva yāṃ yāti nityaṃ harṣātivegataḥ / (14.1) Par.?

gatvā gatvāpi bahuśo yāṃ tṛptiṃ naiva gacchati // (14.2) Par.?

sā strī vṛṣyatamā tasya nānābhāvā hi mānavāḥ / (15.1) Par.?

atulyagotrāṃ vṛṣyāṃ ca prahṛṣṭāṃ nirupadravām // (15.2) Par.?

śuddhasnātāṃ vrajennārīmapatyārthī nirāmayaḥ / (16.1) Par.?

acchāyaś caikaśākhaś ca niṣphalaśca yathā drumaḥ // (16.2) Par.?

aniṣṭagandhaścaikaśca nirapatyastathā naraḥ / (17.1) Par.?

citradīpaḥ saraḥ śuṣkam adhātur dhātusaṃnibhaḥ // (17.2) Par.?

niṣprajas tṛṇapūlīti mantavyaḥ puruṣākṛtiḥ / (18.1) Par.?

apratiṣṭhaśca nagnaśca śūnyaścaikendriyaśca nā // (18.2) Par.?

mantavyo niṣkriyaścaiva yasyāpatyaṃ na vidyate / (19.1) Par.?

bahumūrtir bahumukho bahuvyūho bahukriyaḥ // (19.2) Par.?

bahucakṣur bahujñāno bahvātmā ca bahuprajaḥ / (20.1) Par.?

maṅgalyo'yaṃ praśasyo'yaṃ dhanyo'yaṃ vīryavān ayam // (20.2) Par.?

bahuśākho'yamiti ca stūyate nā bahuprajaḥ / (21.1) Par.?

prītirbalaṃ sukhaṃ vṛttir vistāro vipulaṃ kulam // (21.2) Par.?

yaśo lokāḥ sukhodarkāstuṣṭiś cāpatyasaṃśritāḥ / (22.1) Par.?

tasmādapatyamanvicchan guṇāṃścāpatyasaṃśritān // (22.2) Par.?

vājīkaraṇanityaḥ syādicchan kāmasukhāni ca / (23.1) Par.?

upabhogasukhān siddhān vīryāpatyavivardhanān // (23.2) Par.?

vājīkaraṇasaṃyogān pravakṣyāmyata uttaram / (24.1) Par.?

śaramūlekṣumūlāni kāṇḍekṣuḥ sekṣubālikā // (24.2) Par.?

śatāvarī payasyā ca vidārī kaṇṭakārikā / (25.1) Par.?

jīvantī jīvako medā vīrā carṣabhako balā // (25.2) Par.?

ṛddhir gokṣurakaṃ rāsnā sātmaguptā punarnavā / (26.1) Par.?

eṣāṃ tripalikān bhāgān māṣāṇām āḍhakaṃ navam // (26.2) Par.?

vipācayejjaladroṇe caturbhāgaṃ ca śeṣayet / (27.1) Par.?

tatra peṣyāṇi madhukaṃ drākṣā phalgūni pippalī // (27.2) Par.?

ātmaguptā madhūkāni kharjūrāṇi śatāvarī / (28.1) Par.?

vidāryāmalakekṣūṇāṃ rasasya ca pṛthak pṛthak // (28.2) Par.?

sarpiṣaś cāḍhakaṃ dadyāt kṣīradroṇaṃ ca tadbhiṣak / (29.1) Par.?

sādhayedghṛtaśeṣaṃ ca supūtaṃ yojayet punaḥ // (29.2) Par.?

śarkarāyāstugākṣīryāś cūrṇaiḥ prasthonmitaiḥ pṛthak / (30.1) Par.?

palaiś caturbhir māgadhyāḥ palena maricasya ca // (30.2) Par.?

tvagelākesarāṇāṃ ca cūrṇair ardhapalonmitaiḥ / (31.1) Par.?

madhunaḥ kuḍavābhyāṃ ca dvābhyāṃ tatkārayedbhiṣak // (31.2) Par.?

palikā gulikāstyānāstā yathāgni prayojayet / (32.1) Par.?

eṣa vṛṣyaḥ paraṃ yogo bṛṃhaṇo balavardhanaḥ // (32.2) Par.?

anenāśva ivodīrṇo balī liṅgaṃ samarpayet / (33.1) Par.?

māṣāṇāmātmaguptāyā bījānāmāḍhakaṃ navam // (33.2) Par.?

jīvakarṣabhakau vīrāṃ medām ṛddhiṃ śatāvarīm / (34.1) Par.?

madhukaṃ cāśvagandhāṃ ca sādhayet kuḍavonmitām // (34.2) Par.?

rase tasmin ghṛtaprasthaṃ gavyaṃ daśaguṇaṃ payaḥ / (35.1) Par.?

vidārīṇāṃ rasaprasthaṃ prasthamikṣurasasya ca // (35.2) Par.?

dattvā mṛdvagninā sādhyaṃ siddhaṃ sarpirnidhāpayet / (36.1) Par.?

śarkarāyāstugākṣīryāḥ kṣaudrasya ca pṛthak pṛthak // (36.2) Par.?

bhāgāṃścatuṣpalāṃs tatra pippalyāścāvapet palam / (37.1) Par.?

palaṃ pūrvamato līḍhvā tato'nnam upayojayet // (37.2) Par.?

ya icchedakṣayaṃ śukraṃ śephasaś cottamaṃ balam / (38.1) Par.?

śarkarā māṣavidalāstugākṣīrī payo ghṛtam // (38.2) Par.?

godhūmacūrṇaṣaṣṭhāni sarpiṣy utkārikāṃ pacet / (39.1) Par.?

tāṃ nātipakvāṃ mṛditāṃ kaukkuṭe madhure rase // (39.2) Par.?

sugandhe prakṣiped uṣṇe yathā sāndrībhaved rasaḥ / (40.1) Par.?

eṣa piṇḍaraso vṛṣyaḥ pauṣṭiko balavardhanaḥ // (40.2) Par.?

anenāśva ivodīrṇo balī liṅgaṃ samarpayet / (41.1) Par.?

śikhitittirihaṃsānāmevaṃ piṇḍaraso mataḥ / (41.2) Par.?

balavarṇasvarakaraḥ pumāṃstena vṛṣāyate // (41.3) Par.?

ghṛtaṃ māṣān sabastāṇḍān sādhayenmāhiṣe rase / (42.1) Par.?

bharjayettaṃ rasaṃ pūtaṃ phalāmlaṃ navasarpiṣi // (42.2) Par.?

īṣat salavaṇaṃ yuktaṃ dhānyajīrakanāgaraiḥ / (43.1) Par.?

eṣa vṛṣyaśca balyaśca bṛṃhaṇaśca rasottamaḥ // (43.2) Par.?

caṭakāṃstittirirase tittirīn kaukkuṭe rase / (44.1) Par.?

kukkuṭān bārhiṇarase hāṃse bārhiṇameva ca // (44.2) Par.?

navasarpiṣi saṃtaptān phalāmlān kārayed rasān / (45.1) Par.?

madhurānvā yathāsātmyaṃ gandhāḍhyān balavardhanān // (45.2) Par.?

tṛptiṃ caṭakamāṃsānāṃ gatvā yo 'nupibet payaḥ / (46.1) Par.?

na tasya liṅgaśaithilyaṃ syānna śukrakṣayo niśi // (46.2) Par.?

māṣasūpeṇa yo bhuktvā ghṛtāḍhyaṃ ṣaṣṭikaudanam / (47.1) Par.?

payaḥ pibati rātriṃ sa kṛtsnāṃ jāgarti vegavān / (47.2) Par.?

na nā svapiti rātriṣu nityastabdhena śephasā / (47.3) Par.?

tṛptaḥ kukkuṭamāṃsānāṃ bhṛṣṭānāṃ nakraretasi // (47.4) Par.?

niḥsrāvya matsyāṇḍarasaṃ bhṛṣṭaṃ sarpiṣi bhakṣayet // (48) Par.?

haṃsabarhiṇadakṣāṇām evamaṇḍāni bhakṣayet // (49) Par.?

srotaḥsu śuddheṣvamale śarīre vṛṣyaṃ yadā nā mitamatti kāle / (50.1) Par.?

vṛṣāyate tena paraṃ manuṣyas tadbṛṃhaṇaṃ caiva balapradaṃ ca // (50.2) Par.?

tasmāt purā śodhanameva kāryaṃ balānurūpaṃ na hi vṛṣyayogāḥ / (51.1) Par.?

sidhyanti dehe maline prayuktāḥ kliṣṭe yathā vāsasi rāgayogāḥ // (51.2) Par.?

vājīkaraṇasāmarthyaṃ kṣetraṃ strī yasya caiva yā / (52.1) Par.?

ye doṣā nirapatyānāṃ guṇāḥ putravatāṃ ca ye // (52.2) Par.?

daśa pañca ca saṃyogā vīryāpatyavivardhanāḥ / (53.1) Par.?

uktāste śaramūlīye pāde puṣṭibalapradāḥ // (53.2) Par.?

ityagniveśakṛte tantre carakapratisaṃskṛte cikitsāsthāne vājīkaraṇādhyāye saṃyogaśaramūlīyo nāma vājīkaraṇapādaḥ prathamaḥ // (54) Par.?