Texts

rāvaṇagrahaṇaṃ tat tu vāyugrahaṇasaṃnibham / (1.1) Par.?

ṛṣiḥ pulastyaḥ śuśrāva kathitaṃ divi daivataiḥ // (1.2) Par.?

tataḥ putrasutasnehāt kampyamāno mahādhṛtiḥ / (2.1) Par.?

māhiṣmatīpatiṃ draṣṭum ājagāma mahān ṛṣiḥ // (2.2) Par.?

sa vāyumārgam āsthāya vāyutulyagatir dvijaḥ / (3.1) Par.?

purīṃ māhiṣmatīṃ prāpto manaḥsaṃtāpavikramaḥ // (3.2) Par.?

so 'marāvatisaṃkāśāṃ hṛṣṭapuṣṭajanāvṛtām / (4.1) Par.?

praviveśa purīṃ brahmā indrasyevāmarāvatīm // (4.2) Par.?

pādacāram ivādityaṃ niṣpatantaṃ sudurdṛśam / (5.1) Par.?

tataste pratyabhijñāya arjunāya nyavedayan // (5.2) Par.?

pulastya iti taṃ śrutvā vacanaṃ haihayādhipaḥ / (6.1) Par.?

śirasyañjalim uddhṛtya pratyudgacchad dvijottamam // (6.2) Par.?

purohito 'sya gṛhyārghyaṃ madhuparkaṃ tathaiva ca / (7.1) Par.?

purastāt prayayau rājña indrasyeva bṛhaspatiḥ // (7.2) Par.?

tatastam ṛṣim āyāntam udyantam iva bhāskaram / (8.1) Par.?

arjuno dṛśya samprāptaṃ vavandendra iveśvaram // (8.2) Par.?

sa tasya madhuparkaṃ ca pādyam arghyaṃ ca dāpayan / (9.1) Par.?

pulastyam āha rājendro harṣagadgadayā girā // (9.2) Par.?

adyeyam amarāvatyā tulyā māhiṣmatī kṛtā / (10.1) Par.?

adyāhaṃ tu dvijendrendra yasmāt paśyāmi durdṛśam // (10.2) Par.?

adya me kuśalaṃ deva adya me kulam uddhṛtam / (11.1) Par.?

yat te devagaṇair vandyau vande 'haṃ caraṇāvimau // (11.2) Par.?

idaṃ rājyam ime putrā ime dārā ime vayam / (12.1) Par.?

brahman kiṃ kurma kiṃ kāryam ājñāpayatu no bhavān // (12.2) Par.?

taṃ dharme 'gniṣu bhṛtyeṣu śivaṃ pṛṣṭvātha pārthivam / (13.1) Par.?

pulastyovāca rājānaṃ haihayānāṃ tadārjunam // (13.2) Par.?

rājendrāmalapadmākṣapūrṇacandranibhānana / (14.1) Par.?

atulaṃ te balaṃ yena daśagrīvastvayā jitaḥ // (14.2) Par.?

bhayād yasyāvatiṣṭhetāṃ niṣpandau sāgarānilau / (15.1) Par.?

so 'yam adya tvayā baddhaḥ pautro me 'tīvadurjayaḥ // (15.2) Par.?

tat putraka yaśaḥ sphītaṃ nāma viśrāvitaṃ tvayā / (16.1) Par.?

madvākyād yācyamāno 'dya muñca vatsa daśānanam // (16.2) Par.?

pulastyājñāṃ sa gṛhyātha akiṃcanavaco 'rjunaḥ / (17.1) Par.?

mumoca pārthivendrendro rākṣasendraṃ prahṛṣṭavat // (17.2) Par.?

sa taṃ pramuktvā tridaśārim arjunaḥ prapūjya divyābharaṇasragambaraiḥ / (18.1) Par.?

ahiṃsakaṃ sakhyam upetya sāgnikaṃ praṇamya sa brahmasutaṃ gṛhaṃ yayau // (18.2) Par.?

pulastyenāpi saṃgamya rākṣasendraḥ pratāpavān / (19.1) Par.?

pariṣvaṅgakṛtātithyo lajjamāno visarjitaḥ // (19.2) Par.?

pitāmahasutaścāpi pulastyo munisattamaḥ / (20.1) Par.?

mocayitvā daśagrīvaṃ brahmalokaṃ jagāma saḥ // (20.2) Par.?

evaṃ sa rāvaṇaḥ prāptaḥ kārtavīryāt tu dharṣaṇāt / (21.1) Par.?

pulastyavacanāccāpi punar mokṣam avāptavān // (21.2) Par.?

evaṃ balibhyo balinaḥ santi rāghavanandana / (22.1) Par.?

nāvajñā parataḥ kāryā ya icchecchreya ātmanaḥ // (22.2) Par.?

tataḥ sa rājā piśitāśanānāṃ sahasrabāhor upalabhya maitrīm / (23.1) Par.?

punar narāṇāṃ kadanaṃ cakāra cacāra sarvāṃ pṛthivīṃ ca darpāt // (23.2) Par.?