Texts

Help

Select a text:
Bibliography
Select a chapter:
 (no revisions)
Associated topic(s): Birth, childhood, and youth, Kaṃsa

Show parallels  Show headlines
Use dependency labeler
Chapter id: 17337
  • Click on a sentence to show its analysis
  • Keep the mouse pointer over a lemma to show its meanings.
vaiśaṃpāyana uvāca / (1.1) Par.?
kṛte garbhavidhāne tu devakī devatopamā / (1.2) Par.?
jagrāha sapta tān garbhān yathāvat samudāhṛtān // (1.3) Par.?
ṣaḍgarbhān niḥsṛtān kaṃsas tāñ jaghāna śilātale / (2.1) Par.?
āpannaṃ saptamaṃ garbhaṃ sā nināyātha rohiṇīm // (2.2) Par.?
sārdharātre sthitaṃ garbhaṃ śātayantī rajasvalā / (3.1) Par.?
nidrayā sahasāviṣṭā papāta dharaṇītale // (3.2) Par.?
sā svapnam iva taṃ dṛṣṭvā garbhaṃ niḥsṛtam ātmanaḥ / (4.1) Par.?
apaśyantī ca taṃ garbhaṃ muhūrtaṃ vyathitābhavat // (4.2) Par.?
tām āha nidrā saṃvignāṃ naiśe tamasi rohiṇīm / (5.1) Par.?
rohiṇīm iva somasya vasudevasya rohiṇīm // (5.2) Par.?
karsaṇenāsya garbhasya svagarbhe cāhitasya vai / (6.1) Par.?
saṃkarṣaṇo nāma śubhe tava putro bhaviṣyati // (6.2) Par.?
sā taṃ putram avāpyaiva hṛṣṭā kiṃcid avāṅmukhī / (7.1) Par.?
viveśa rohiṇī veśma suprabhā rohiṇī yathā // (7.2) Par.?
tasya garbhasya mārgeṇa garbham ādhatta devakī / (8.1) Par.?
yadarthaṃ sapta te garbhāḥ kaṃsena vinipātitāḥ // (8.2) Par.?
taṃ tu garbhaṃ prayatnena rarakṣus tasya rakṣiṇaḥ / (9.1) Par.?
sa tatra garbhavasatiṃ vasaty ātmecchayā hariḥ // (9.2) Par.?
yaśodāpi samādhatta garbhaṃ tadahar eva tu / (10.1) Par.?
viṣṇoḥ śarīrajāṃ nidrāṃ viṣṇor nirdeśakāriṇīm // (10.2) Par.?
garbhakāle tv asaṃpūrṇe aṣṭame māsi te striyau / (11.1) Par.?
devakī ca yaśodā ca suṣuvāte samaṃ tadā // (11.2) Par.?
yām eva rajanīṃ kṛṣṇo jajñe vṛṣṇikule prabhuḥ / (12.1) Par.?
tām eva rajanīṃ kanyāṃ yaśodāpi vyajāyata / (12.2) Par.?
nandagopasya bhāryā vai kaṃsagopasya saṃmatā // (12.3) Par.?
devaky ajanayad viṣṇuṃ yaśodā tāṃ tu kanyakām / (13.1) Par.?
muhūrte 'bhijite prāpte sārdharātre vibhūṣite // (13.2) Par.?
sāgarāḥ samakampanta celuś ca dharaṇīdharāḥ / (14.1) Par.?
jajvaluś cāgnayaḥ śāntā jāyamāne janārdane // (14.2) Par.?
śivāḥ saṃpravavur vātāḥ praśāntam abhavad rajaḥ / (15.1) Par.?
jyotīṃṣi ca prakāśanta jāyamāne janārdane // (15.2) Par.?
anāhatā dundubhayo devānāṃ prāṇadan divi / (16.1) Par.?
ākāśāt puṣpavarṣaṃ ca vavarṣa tridiveśvaraḥ // (16.2) Par.?
gīrbhir maṅgalayuktābhiḥ stuvanto madhusūdanam / (17.1) Par.?
maharṣayaḥ sagandharvā upatasthuḥ sahāpsarāḥ // (17.2) Par.?
vasudevas tu saṃgṛhya dārakaṃ kṣipram eva tu / (18.1) Par.?
yaśodāyā gṛhaṃ bhīto viveśa sutavatsalaḥ // (18.2) Par.?
yaśodāyās tv avijñātaṃ tatra nikṣipya dārakam / (19.1) Par.?
gṛhya tāṃ dārikāṃ cāpi devakīśayane 'nyasat // (19.2) Par.?
parivarte kṛte tābhyāṃ garbhābhyāṃ bhayaviklavaḥ / (20.1) Par.?
vasudevaḥ kṛtārtho vai nirjagāma niveśanāt // (20.2) Par.?
ugrasenasutāyātha kaṃsāyānakadundubhiḥ / (21.1) Par.?
nivedayāmāsa tadā kanyāṃ tāṃ varavarṇinīm // (21.2) Par.?
tac chrutvā tvaritaḥ kaṃso rakṣibhiḥ saha vegitaḥ / (22.1) Par.?
ājagāma gṛhadvāraṃ vasudevasya vīryavān // (22.2) Par.?
sa tatra tvarito dvāri kiṃ jātam iti cābravīt / (23.1) Par.?
dīyatāṃ śīghram ity evaṃ vāgbhiḥ samabhitarjayat // (23.2) Par.?
tato hāhākṛtāḥ sarvā devakīpramukhāḥ striyaḥ / (24.1) Par.?
dārikā putra jāteti kaṃsaṃ tūvāca devakī // (24.2) Par.?
śrīmanto me hatāḥ sapta putragarbhās tvayā vibho / (25.1) Par.?
dārikeyaṃ hataivaiṣā paśyasva yadi manyase // (25.2) Par.?
dṛṣṭvā kaṃsas tu tāṃ kanyām ahṛṣyata mudā yutaḥ / (26.1) Par.?
hataivaiṣā yadā kanyā jātety uktvā vṛthāmatiḥ // (26.2) Par.?
sā garbhaśayane kliṣṭā garbhāmbuklinnamūrdhajā / (27.1) Par.?
kaṃsasya purato nyastā pṛthivyāṃ pṛthivīsamā // (27.2) Par.?
pāde tāṃ gṛhya puruṣaḥ samāvidhyāvadhūya ca / (28.1) Par.?
udyacchann eva sahasā śilāyāṃ samapothayat / (28.2) Par.?
sāvadhūtā śilāpṛṣṭhe 'niṣpiṣṭā divam utpatat // (28.3) Par.?
hitvā garbhatanuṃ cāpi sahasā muktamūrdhajā / (29.1) Par.?
jagāmākāśam āviśya divyasraganulepanā / (29.2) Par.?
kanyaiva cābhavan nityaṃ divyā devair abhiṣṭutā // (29.3) Par.?
nīlapītāmbaradharā gajakumbhopamastanī / (30.1) Par.?
rathavistīrṇajaghanā candravaktrā caturbhujā // (30.2) Par.?
vidyudvispaṣṭavarṇābhā bālārkasadṛśekṣaṇā / (31.1) Par.?
payodharasvanavatī saṃdhyeva sapayodharā // (31.2) Par.?
sā vai niśi tamograste babhau bhūtagaṇākule / (32.1) Par.?
nṛtyatī hasatī caiva viparītena bhāsvatī // (32.2) Par.?
vihāyasagatā raudrā papau pānam anuttamam / (33.1) Par.?
jahāsa ca mahāhāsaṃ kaṃsaṃ ca ruṣitābravīt // (33.2) Par.?
kaṃsa kaṃsa vināśāya yad ahaṃ ghātitā tvayā / (34.1) Par.?
sahasā ca samutkṣipya śilāyāṃ vinipātitā // (34.2) Par.?
tasmāt tavāntakāle 'haṃ kṛṣyamāṇasya śatruṇā / (35.1) Par.?
pāṭayitvā karair deham uṣṇaṃ pāsyāmi śoṇitam // (35.2) Par.?
evam uktvā vaco ghoraṃ sā yatheṣṭena vartmanā / (36.1) Par.?
khaṃ sā devālayaṃ devī sagaṇā vicacāra ha // (36.2) Par.?
tasyāṃ gatāyāṃ kaṃsas tu tāṃ mene mṛtyum ātmanaḥ / (37.1) Par.?
vivikte devakīṃ caiva vrīḍitaḥ pratyabhāṣata // (37.2) Par.?
pitṛṣvasaḥ kṛto yatnas tava garbhā hatā mayā / (38.1) Par.?
anyathaivānyato devi mama mṛtyuḥ samutthitaḥ // (38.2) Par.?
nairāśyena kṛto yatnaḥ svajane prahṛtaṃ mayā / (39.1) Par.?
daivaṃ puruṣakāreṇa na cātikrāntavān aham // (39.2) Par.?
tyaja garbhakṛtāṃ cintāṃ tvam imāṃ śokakārikām / (40.1) Par.?
hetubhūtas tv ahaṃ teṣāṃ sati kālaviparyaye // (40.2) Par.?
kāla eva nṛṇāṃ śatruḥ kālaś ca pariṇāmakaḥ / (41.1) Par.?
kālo nayati sarvaṃ vai hetubhūtaś ca madvidhaḥ // (41.2) Par.?
mā kārṣīḥ putrajāṃ cintāṃ vilāpaṃ śokajaṃ tyaja / (42.1) Par.?
evaṃprāyā nṛṇāṃ yonir nāsti kālasya saṃsthitiḥ // (42.2) Par.?
patāmi pādayor mūrdhnā putravat tava devaki / (43.1) Par.?
madgatas tyajyatāṃ roṣo jānāmy apakṛtaṃ svayam // (43.2) Par.?
sāśrupūrṇamukhī dīnā bhartāram abhivīkṣatī / (44.1) Par.?
uttiṣṭhottiṣṭha vatseti kaṃsaṃ māteva jalpatī // (44.2) Par.?
devaky uvāca / (45.1) Par.?
mamāgrato hatā garbhā ye tvayā kālarūpiṇā / (45.2) Par.?
kāraṇaṃ tvaṃ na vai putra kṛtānto hy atra kāraṇam // (45.3) Par.?
garbhakṛntanam etan me sahanīyaṃ tvayā kṛtam / (46.1) Par.?
mūrdhnā padbhyāṃ nipatatā svaṃ ca karma jugupsatā // (46.2) Par.?
garbhe 'pi niyato mṛtyur bālye 'pi na nivartate / (47.1) Par.?
yuvāpi mṛtyor vaśagaḥ sthaviro mṛta eva tu // (47.2) Par.?
ajāte darśanaṃ nāsti yathā nāsti tathaiva saḥ / (48.1) Par.?
jāto 'py ajātatāṃ yāti vidhātrā yatra nīyate // (48.2) Par.?
tad gaccha putra mā te bhūn madgataṃ manyukāraṇam / (49.1) Par.?
mṛtyunāpahṛte pūrvaṃ śeṣo hetuḥ pravartate // (49.2) Par.?
vidhinā pūrvadṛṣṭena prajāsargeṇa tattvataḥ / (50.1) Par.?
mātāpitros tu kāryeṇa janmatas tūpapadyate // (50.2) Par.?
niśamya devakīvākyaṃ sa kaṃsaḥ svam niveśanam / (51.1) Par.?
kṛtye pratihate dīno jagāma vimanā bhṛśam // (51.2) Par.?
Duration=0.38186597824097 secs.