Texts

Help

Select a text:
Bibliography

Select a chapter:
(no revisions)

Associated topic(s): Tāraka

Show parallels Show headlines
Use dependency labeler

Chapter id: 7312

Click on a sentence to show its analysis
Keep the mouse pointer over a lemma to show its meanings.

tasmin viprakṛtāḥ kāle tārakeṇa divaukasaḥ / (1.1) Par.?

turāsāhaṃ purodhāya dhāma svāyaṃbhuvaṃ yayuḥ // (1.2) Par.?

teṣām āvirabhūd brahmā parimlānamukhaśriyām / (2.1) Par.?

sarasāṃ suptapadmānāṃ prātar dīdhitimān iva // (2.2) Par.?

atha sarvasya dhātāraṃ te sarve sarvatomukham / (3.1) Par.?

vāgīśaṃ vāgbhir arthyābhiḥ praṇipatyopatasthire // (3.2) Par.?

namas trimūrtaye tubhyaṃ prāk sṛṣṭeḥ kevalātmane / (4.1) Par.?

guṇatrayavibhāgāya paścād bhedam upeyuṣe // (4.2) Par.?

yad amogham apām antar uptaṃ bījam aja tvayā / (5.1) Par.?

ataś carācaraṃ viśvaṃ prabhavas tasya gīyase // (5.2) Par.?

tisṛbhis tvam avasthābhir mahimānam udīrayan / (6.1) Par.?

pralayasthitisargāṇām ekaḥ kāraṇatāṃ gataḥ // (6.2) Par.?

strīpuṃsāv ātmabhāgau te bhinnamūrteḥ sisṛkṣayā / (7.1) Par.?

prasūtibhājaḥ sargasya tāv eva pitarau smṛtau // (7.2) Par.?

svakālaparimāṇena vyastarātriṃdivasya te / (8.1) Par.?

yau tu svapnāvabodhau tau bhūtānāṃ pralayodayau // (8.2) Par.?

jagadyonir ayonis tvaṃ jagadanto nirantakaḥ / (9.1) Par.?

jagadādir anādis tvaṃ jagadīśo nirīśvaraḥ // (9.2) Par.?

ātmānam ātmanā vetsi sṛjasy ātmānam ātmanā / (10.1) Par.?

ātmanā kṛtinā ca tvam ātmany eva pralīyase // (10.2) Par.?

dravaḥ saṃghātakaṭhinaḥ sthūlaḥ sūkṣmo laghur guruḥ / (11.1) Par.?

vyakto vyaktetaraś cāsi prākāmyaṃ te vibhūtiṣu // (11.2) Par.?

udghātaḥ praṇavo yāsāṃ nyāyais tribhir udīraṇam / (12.1) Par.?

karma yajñaḥ phalaṃ svargas tāsāṃ tvaṃ prabhavo girām // (12.2) Par.?

tvām āmananti prakṛtiṃ puruṣārthapravartinīm / (13.1) Par.?

taddarśinam udāsīnaṃ tvām eva puruṣaṃ viduḥ // (13.2) Par.?

tvaṃ pitṝṇām api pitā devānām api devatā / (14.1) Par.?

parato 'pi paraś cāsi vidhātā vedhasām api // (14.2) Par.?

tvam eva havyaṃ hotā ca bhojyaṃ bhoktā ca śāśvataḥ / (15.1) Par.?

vedyaṃ ca veditā cāsi dhyātā dhyeyaṃ ca yat param // (15.2) Par.?

iti tebhyaḥ stutīḥ śrutvā yathārthā hṛdayaṃgamāḥ / (16.1) Par.?

prasādābhimukho vedhāḥ pratyuvāca divaukasaḥ // (16.2) Par.?

purāṇasya kaves tasya caturmukhasamīritā / (17.1) Par.?

pravṛttir āsīc chabdānāṃ caritārthā catuṣṭayī // (17.2) Par.?

svāgataṃ svān adhīkārān prabhāvair avalambya vaḥ / (18.1) Par.?

yugapad yugabāhubhyaḥ prāptebhyaḥ prājyavikramāḥ // (18.2) Par.?

kim idaṃ dyutim ātmīyāṃ na bibhrati yathā purā / (19.1) Par.?

himakliṣṭaprakāśāni jyotīṃṣīva mukhāni vaḥ // (19.2) Par.?

praśamād arciṣām etad anudgīrṇasurāyudham / (20.1) Par.?

vṛtrasya hantuḥ kuliśaṃ kuṇṭhitāśrīva lakṣyate // (20.2) Par.?

kiṃ cāyam aridurvāraḥ pāṇau pāśaḥ pracetasaḥ / (21.1) Par.?

mantreṇa hatavīryasya phaṇino dainyam āśritaḥ // (21.2) Par.?

kuberasya manaḥśalyaṃ śaṃsatīva parābhavam / (22.1) Par.?

apaviddhagado bāhur bhagnaśākha iva drumaḥ // (22.2) Par.?

yamo 'pi vilikhan bhūmiṃ daṇḍenāstamitatviṣā / (23.1) Par.?

kurute 'sminn amoghe 'pi nirvāṇālātalāghavam // (23.2) Par.?

amī ca katham ādityāḥ pratāpakṣatiśītalāḥ / (24.1) Par.?

citranyastā iva gatāḥ prakāmālokanīyatām // (24.2) Par.?

paryākulatvān marutāṃ vegabhaṅgo 'numīyate / (25.1) Par.?

ambhasām oghasaṃrodhaḥ pratīpagamanād iva // (25.2) Par.?

āvarjitajaṭāmaulivilambiśaśikoṭayaḥ / (26.1) Par.?

rudrāṇām api mūrdhānaḥ kṣatahuṃkāraśaṃsinaḥ // (26.2) Par.?

labdhapratiṣṭhāḥ prathamaṃ yūyaṃ kiṃ balavattaraiḥ / (27.1) Par.?

apavādair ivotsargāḥ kṛtavyāvṛttayaḥ paraiḥ // (27.2) Par.?

tad brūta vatsāḥ kim itaḥ prārthayadhve samāgatāḥ / (28.1) Par.?

mayi sṛṣṭir hi lokānāṃ rakṣā yuṣmāsv avasthitā // (28.2) Par.?

tato mandāniloddhūtakamalākaraśobhinā / (29.1) Par.?

guruṃ netrasahasreṇa codayāmāsa vāsavaḥ // (29.2) Par.?

sa dvinetro hareś cakṣuḥ sahasranayanādhikam / (30.1) Par.?

vācaspatir uvācedaṃ prāñjalir jalajāsanam // (30.2) Par.?

evaṃ yad āttha bhagavann āmṛṣṭaṃ naḥ paraiḥ padam / (31.1) Par.?

pratyekaṃ viniyuktātmā kathaṃ na jñāsyasi prabho // (31.2) Par.?

bhavallabdhavarodīrṇas tārakākhyo mahāsuraḥ / (32.1) Par.?

upaplavāya lokānāṃ dhūmaketur ivotthitaḥ // (32.2) Par.?

pure tāvantam evāsya tanoti ravir ātapam / (33.1) Par.?

dīrghikākamalonmeṣo yāvanmātreṇa sādhyate // (33.2) Par.?

sarvābhiḥ sarvadā candras taṃ kalābhir niṣevate / (34.1) Par.?

nādatte kevalāṃ lekhāṃ haracūḍāmaṇīkṛtām // (34.2) Par.?

vyāvṛttagatir udyāne kusumasteyasādhvasāt / (35.1) Par.?

na vāti vāyus tatpārśve tālavṛntānilādhikam // (35.2) Par.?

paryāyasevām utsṛjya puṣpasaṃbhāratatparāḥ / (36.1) Par.?

udyānapālasāmānyam ṛtavas tam upāsate // (36.2) Par.?

tasyopāyanayogyāni ratnāni saritāṃ patiḥ / (37.1) Par.?

katham apy ambhasām antar ā niṣpatteḥ pratīkṣate // (37.2) Par.?

jvalanmaṇiśikhāś cainaṃ vāsukipramukhā niśi / (38.1) Par.?

sthirapradīpatām etya bhujaṃgāḥ paryupāsate // (38.2) Par.?

tatkṛtānugrahāpekṣī taṃ muhur dūtahāritaiḥ / (39.1) Par.?

anukūlayatīndro 'pi kalpadrumavibhūṣaṇaiḥ // (39.2) Par.?

ittham ārādhyamāno 'pi kliśnāti bhuvanatrayam / (40.1) Par.?

śāmyet pratyapakāreṇa nopakāreṇa durjanaḥ // (40.2) Par.?

tenāmaravadhūhastaiḥ sadayālūnapallavāḥ / (41.1) Par.?

abhijñāś chedapātānāṃ kriyante nandanadrumāḥ // (41.2) Par.?

vījyate sa hi saṃsuptaḥ śvāsasādhāraṇānilaiḥ / (42.1) Par.?

cāmaraiḥ surabandīnāṃ bāṣpaśīkaravarṣibhiḥ // (42.2) Par.?

utpāṭya meruśṛṅgāṇi kṣuṇṇāni haritāṃ khuraiḥ / (43.1) Par.?

ākrīḍaparvatās tena kalpitāḥ sveṣu veśmasu // (43.2) Par.?

mandākinyāḥ payaḥśeṣaṃ digvāraṇamadāvilam / (44.1) Par.?

hemāmbhoruhasasyānāṃ tadvāpyo dhāma sāṃpratam // (44.2) Par.?

bhuvanālokanaprītiḥ svargibhir nānubhūyate / (45.1) Par.?

khilībhūte vimānānāṃ tadāpātabhayāt pathi // (45.2) Par.?

yajvabhiḥ saṃbhṛtaṃ havyaṃ vitateṣv adhvareṣu saḥ / (46.1) Par.?

jātavedomukhān māyī miṣatām ācchinatti naḥ // (46.2) Par.?

uccair uccaiḥśravās tena hayaratnam ahāri ca / (47.1) Par.?

dehabaddham ivendrasya cirakālārjitaṃ yaśaḥ // (47.2) Par.?

tasminn upāyāḥ sarve naḥ krūre pratihatakriyāḥ / (48.1) Par.?

vīryavaty auṣadhānīva vikāre sāṃnipātike // (48.2) Par.?

jayāśā yatra cāsmākaṃ pratighātotthitārciṣā / (49.1) Par.?

haricakreṇa tenāsya kaṇṭhe niṣka ivārpitaḥ // (49.2) Par.?

tadīyās toyadeṣv adya puṣkarāvartakādiṣu / (50.1) Par.?

abhyasyanti taṭāghātaṃ nirjitairāvatā gajāḥ // (50.2) Par.?

tad icchāmo vibho sṛṣṭaṃ senānyaṃ tasya śāntaye / (51.1) Par.?

karmabandhacchidaṃ dharmaṃ bhavasyeva mumukṣavaḥ // (51.2) Par.?

goptāraṃ surasainyānāṃ yaṃ puraskṛtya gotrabhit / (52.1) Par.?

pratyāneṣyati śatrubhyo bandīm iva jayaśriyam // (52.2) Par.?

vacasy avasite tasmin sasarja giram ātmabhūḥ / (53.1) Par.?

garjitānantarāṃ vṛṣṭiṃ saubhāgyena jigāya yā // (53.2) Par.?

sampatsyate vaḥ kāmo yaṃ kālaḥ kaścit pratīkṣyatām / (54.1) Par.?

na tv asya siddhau yāsyāmi sargavyāpāram ātmanā // (54.2) Par.?

itaḥ sa daityaḥ prāptaśrīr neta evārhati kṣayam / (55.1) Par.?

viṣavṛkṣo 'pi saṃvardhya svayaṃ chettum asāṃpratam // (55.2) Par.?

vṛtaṃ tenedam eva prāṅ mayā cāsmai pratiśrutam / (56.1) Par.?

vareṇa śamitaṃ lokān alaṃ dagdhuṃ hi tattapaḥ // (56.2) Par.?

saṃyuge sāṃyugīnaṃ tam udyataṃ prasaheta kaḥ / (57.1) Par.?

aṃśād ṛte niṣiktasya nīlalohitaretasaḥ // (57.2) Par.?

sa hi devaḥ paraṃ jyotis tamaḥpāre vyavasthitam / (58.1) Par.?

paricchinnaprabhāvarddhir na mayā na ca viṣṇunā // (58.2) Par.?

umārūpeṇa te yūyaṃ saṃyamastimitaṃ manaḥ / (59.1) Par.?

śaṃbhor yatadhvam ākraṣṭum ayaskāntena lohavat // (59.2) Par.?

ubhe eva kṣame voḍhum ubhayor vīryam āhitam / (60.1) Par.?

sā vā śaṃbhos tadīyā vā mūrtir jalamayī mama // (60.2) Par.?

tasyātmā śitikaṇṭhasya saināpatyam upetya vaḥ / (61.1) Par.?

mokṣyate surabandīnāṃ veṇīr vīryavibhūtibhiḥ // (61.2) Par.?

iti vyāhṛtya vibudhān viśvayonis tirodadhe / (62.1) Par.?

manasy āhitakartavyās te 'pi pratiyayur divam // (62.2) Par.?

tatra niścitya kandarpam agamat pākaśāsanaḥ / (63.1) Par.?

manasā kāryasaṃsiddhitvarādviguṇaraṃhasā // (63.2) Par.?

atha sa lalitayoṣidbhrūlatācāruśṛṅgaṃ rativalayapadāṅke cāpam āsajya kaṇṭhe / (64.1) Par.?

sahacaramadhuhastanyastacūtāṅkurāstraḥ śatamakham upatasthe prāñjaliḥ puṣpadhanvā // (64.2) Par.?

Duration=0.37861204147339 secs.