Texts

tad asmai navyam aṅgirasvad arcata śuṣmā yad asya pratnathodīrate / (1.1) Par.?

viśvā yad gotrā sahasā parīvṛtā made somasya dṛṃhitāny airayat // (1.2) Par.?

sa bhūtu yo ha prathamāya dhāyasa ojo mimāno mahimānam ātirat / (2.1) Par.?

śūro yo yutsu tanvam parivyata śīrṣaṇi dyām mahinā praty amuñcata // (2.2) Par.?

adhākṛṇoḥ prathamaṃ vīryam mahad yad asyāgre brahmaṇā śuṣmam airayaḥ / (3.1) Par.?

ratheṣṭhena haryaśvena vicyutāḥ pra jīrayaḥ sisrate sadhryak pṛthak // (3.2) Par.?

adhā yo viśvā bhuvanābhi majmaneśānakṛt pravayā abhy avardhata / (4.1) Par.?

ād rodasī jyotiṣā vahnir ātanot sīvyan tamāṃsi dudhitā sam avyayat // (4.2) Par.?

sa prācīnān parvatān dṛṃhad ojasādharācīnam akṛṇod apām apaḥ / (5.1) Par.?

adhārayat pṛthivīṃ viśvadhāyasam astabhnān māyayā dyām avasrasaḥ // (5.2) Par.?

sāsmā aram bāhubhyāṃ yam pitākṛṇod viśvasmād ā januṣo vedasas pari / (6.1) Par.?

yenā pṛthivyāṃ ni kriviṃ śayadhyai vajreṇa hatvy avṛṇak tuviṣvaṇiḥ // (6.2) Par.?

amājūr iva pitroḥ sacā satī samānād ā sadasas tvām iye bhagam / (7.1) Par.?

kṛdhi praketam upa māsy ā bhara daddhi bhāgaṃ tanvo yena māmahaḥ // (7.2) Par.?

bhojaṃ tvām indra vayaṃ huvema dadiṣ ṭvam indrāpāṃsi vājān / (8.1) Par.?

aviḍḍhīndra citrayā na ūtī kṛdhi vṛṣann indra vasyaso naḥ // (8.2) Par.?

nūnaṃ sā te prati varaṃ jaritre duhīyad indra dakṣiṇā maghonī / (9.1) Par.?

śikṣā stotṛbhyo māti dhag bhago no bṛhad vadema vidathe suvīrāḥ // (9.2) Par.?