Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 1067

Click on a sentence to show its analysis
Keep the mouse pointer over a lemma to show its meanings.

tapaḥsvādhyāyanirataṃ tapasvī vāgvidāṃ varam / (1.1) Par.?

nāradaṃ paripapraccha vālmīkir munipuṃgavam // (1.2) Par.?

ko nv asmin sāmprataṃ loke guṇavān kaś ca vīryavān / (2.1) Par.?

dharmajñaś ca kṛtajñaś ca satyavākyo dṛḍhavrataḥ // (2.2) Par.?

cāritreṇa ca ko yuktaḥ sarvabhūteṣu ko hitaḥ / (3.1) Par.?

vidvān kaḥ kaḥ samarthaś ca kaś caikapriyadarśanaḥ // (3.2) Par.?

ātmavān ko jitakrodho matimān ko 'nasūyakaḥ / (4.1) Par.?

kasya bibhyati devāś ca jātaroṣasya saṃyuge // (4.2) Par.?

etad icchāmy ahaṃ śrotuṃ paraṃ kautūhalaṃ hi me / (5.1) Par.?

maharṣe tvaṃ samartho 'si jñātum evaṃvidhaṃ naram // (5.2) Par.?

śrutvā caitat trilokajño vālmīker nārado vacaḥ / (6.1) Par.?

śrūyatām iti cāmantrya prahṛṣṭo vākyam abravīt // (6.2) Par.?

bahavo durlabhāś caiva ye tvayā kīrtitā guṇāḥ / (7.1) Par.?

mune vakṣyāmy ahaṃ buddhvā tair yuktaḥ śrūyatāṃ naraḥ // (7.2) Par.?

ikṣvākuvaṃśaprabhavo rāmo nāma janaiḥ śrutaḥ / (8.1) Par.?

niyatātmā mahāvīryo dyutimān dhṛtimān vaśī // (8.2) Par.?

buddhimān nītimān vāgmī śrīmāñ śatrunibarhaṇaḥ / (9.1) Par.?

vipulāṃso mahābāhuḥ kambugrīvo mahāhanuḥ // (9.2) Par.?

mahorasko maheṣvāso gūḍhajatrur ariṃdamaḥ / (10.1) Par.?

ājānubāhuḥ suśirāḥ sulalāṭaḥ suvikramaḥ // (10.2) Par.?

samaḥ samavibhaktāṅgaḥ snigdhavarṇaḥ pratāpavān / (11.1) Par.?

pīnavakṣā viśālākṣo lakṣmīvāñ śubhalakṣaṇaḥ // (11.2) Par.?

dharmajñaḥ satyasaṃdhaś ca prajānāṃ ca hite rataḥ / (12.1) Par.?

yaśasvī jñānasampannaḥ śucir vaśyaḥ samādhimān // (12.2) Par.?

rakṣitā jīvalokasya dharmasya parirakṣitā / (13.1) Par.?

vedavedāṅgatattvajño dhanurvede ca niṣṭhitaḥ // (13.2) Par.?

sarvaśāstrārthatattvajñaḥ smṛtimān pratibhānavān / (14.1) Par.?

sarvalokapriyaḥ sādhur adīnātmā vicakṣaṇaḥ // (14.2) Par.?

sarvadābhigataḥ sadbhiḥ samudra iva sindhubhiḥ / (15.1) Par.?

āryaḥ sarvasamaś caiva sadaikapriyadarśanaḥ // (15.2) Par.?

sa ca sarvaguṇopetaḥ kausalyānandavardhanaḥ / (16.1) Par.?

samudra iva gāmbhīrye dhairyeṇa himavān iva // (16.2) Par.?

viṣṇunā sadṛśo vīrye somavat priyadarśanaḥ / (17.1) Par.?

kālāgnisadṛśaḥ krodhe kṣamayā pṛthivīsamaḥ // (17.2) Par.?

dhanadena samas tyāge satye dharma ivāparaḥ / (18.1) Par.?

tam evaṃguṇasampannaṃ rāmaṃ satyaparākramam // (18.2) Par.?

jyeṣṭhaṃ śreṣṭhaguṇair yuktaṃ priyaṃ daśarathaḥ sutam / (19.1) Par.?

yauvarājyena saṃyoktum aicchat prītyā mahīpatiḥ // (19.2) Par.?

tasyābhiṣekasambhārān dṛṣṭvā bhāryātha kaikayī / (20.1) Par.?

pūrvaṃ dattavarā devī varam enam ayācata / (20.2) Par.?

vivāsanaṃ ca rāmasya bharatasyābhiṣecanam // (20.3) Par.?

sa satyavacanād rājā dharmapāśena saṃyataḥ / (21.1) Par.?

vivāsayāmāsa sutaṃ rāmaṃ daśarathaḥ priyam // (21.2) Par.?

sa jagāma vanaṃ vīraḥ pratijñām anupālayan / (22.1) Par.?

pitur vacananirdeśāt kaikeyyāḥ priyakāraṇāt // (22.2) Par.?

taṃ vrajantaṃ priyo bhrātā lakṣmaṇo 'nujagāma ha / (23.1) Par.?

snehād vinayasampannaḥ sumitrānandavardhanaḥ // (23.2) Par.?

sarvalakṣaṇasampannā nārīṇām uttamā vadhūḥ / (24.1) Par.?

sītāpy anugatā rāmaṃ śaśinaṃ rohiṇī yathā // (24.2) Par.?

paurair anugato dūraṃ pitrā daśarathena ca / (25.1) Par.?

śṛṅgaverapure sūtaṃ gaṅgākūle vyasarjayat // (25.2) Par.?

te vanena vanaṃ gatvā nadīs tīrtvā bahūdakāḥ / (26.1) Par.?

citrakūṭam anuprāpya bharadvājasya śāsanāt // (26.2) Par.?

ramyam āvasathaṃ kṛtvā ramamāṇā vane trayaḥ / (27.1) Par.?

devagandharvasaṃkāśās tatra te nyavasan sukham // (27.2) Par.?

citrakūṭaṃ gate rāme putraśokāturas tadā / (28.1) Par.?

rājā daśarathaḥ svargaṃ jagāma vilapan sutam // (28.2) Par.?

mṛte tu tasmin bharato vasiṣṭhapramukhair dvijaiḥ / (29.1) Par.?

niyujyamāno rājyāya naicchad rājyaṃ mahābalaḥ / (29.2) Par.?

sa jagāma vanaṃ vīro rāmapādaprasādakaḥ // (29.3) Par.?

pāduke cāsya rājyāya nyāsaṃ dattvā punaḥ punaḥ / (30.1) Par.?

nivartayāmāsa tato bharataṃ bharatāgrajaḥ // (30.2) Par.?

sa kāmam anavāpyaiva rāmapādāv upaspṛśan / (31.1) Par.?

nandigrāme 'karod rājyaṃ rāmāgamanakāṅkṣayā // (31.2) Par.?

rāmas tu punar ālakṣya nāgarasya janasya ca / (32.1) Par.?

tatrāgamanam ekāgre daṇḍakān praviveśa ha // (32.2) Par.?

virādhaṃ rākṣasaṃ hatvā śarabhaṅgaṃ dadarśa ha / (33.1) Par.?

sutīkṣṇaṃ cāpy agastyaṃ ca agastyabhrātaraṃ tathā // (33.2) Par.?

agastyavacanāc caiva jagrāhaindraṃ śarāsanam / (34.1) Par.?

khaḍgaṃ ca paramaprītas tūṇī cākṣayasāyakau // (34.2) Par.?

vasatas tasya rāmasya vane vanacaraiḥ saha / (35.1) Par.?

ṛṣayo 'bhyāgaman sarve vadhāyāsurarakṣasām // (35.2) Par.?

tena tatraiva vasatā janasthānanivāsinī / (36.1) Par.?

virūpitā śūrpaṇakhā rākṣasī kāmarūpiṇī // (36.2) Par.?

tataḥ śūrpaṇakhāvākyād udyuktān sarvarākṣasān / (37.1) Par.?

kharaṃ triśirasaṃ caiva dūṣaṇaṃ caiva rākṣasam // (37.2) Par.?

nijaghāna raṇe rāmas teṣāṃ caiva padānugān / (38.1) Par.?

rakṣasāṃ nihatāny āsan sahasrāṇi caturdaśa // (38.2) Par.?

tato jñātivadhaṃ śrutvā rāvaṇaḥ krodhamūrchitaḥ / (39.1) Par.?

sahāyaṃ varayāmāsa mārīcaṃ nāma rākṣasam // (39.2) Par.?

vāryamāṇaḥ subahuśo mārīcena sa rāvaṇaḥ / (40.1) Par.?

na virodho balavatā kṣamo rāvaṇa tena te // (40.2) Par.?

anādṛtya tu tad vākyaṃ rāvaṇaḥ kālacoditaḥ / (41.1) Par.?

jagāma sahamarīcas tasyāśramapadaṃ tadā // (41.2) Par.?

tena māyāvinā dūram apavāhya nṛpātmajau / (42.1) Par.?

jahāra bhāryāṃ rāmasya gṛdhraṃ hatvā jaṭāyuṣam // (42.2) Par.?

gṛdhraṃ ca nihataṃ dṛṣṭvā hṛtāṃ śrutvā ca maithilīm / (43.1) Par.?

rāghavaḥ śokasaṃtapto vilalāpākulendriyaḥ // (43.2) Par.?

tatas tenaiva śokena gṛdhraṃ dagdhvā jaṭāyuṣam / (44.1) Par.?

mārgamāṇo vane sītāṃ rākṣasaṃ saṃdadarśa ha // (44.2) Par.?

kabandhaṃ nāma rūpeṇa vikṛtaṃ ghoradarśanam / (45.1) Par.?

taṃ nihatya mahābāhur dadāha svargataś ca saḥ // (45.2) Par.?

sa cāsya kathayāmāsa śabarīṃ dharmacāriṇīm / (46.1) Par.?

śramaṇīṃ dharmanipuṇām abhigaccheti rāghava / (46.2) Par.?

so 'bhyagacchan mahātejāḥ śabarīṃ śatrusūdanaḥ // (46.3) Par.?

śabaryā pūjitaḥ samyag rāmo daśarathātmajaḥ / (47.1) Par.?

pampātīre hanumatā saṃgato vānareṇa ha // (47.2) Par.?

hanumadvacanāc caiva sugrīveṇa samāgataḥ / (48.1) Par.?

sugrīvāya ca tat sarvaṃ śaṃsad rāmo mahābalaḥ // (48.2) Par.?

tato vānararājena vairānukathanaṃ prati / (49.1) Par.?

rāmāyāveditaṃ sarvaṃ praṇayād duḥkhitena ca / (49.2) Par.?

vālinaś ca balaṃ tatra kathayāmāsa vānaraḥ // (49.3) Par.?

pratijñātaṃ ca rāmeṇa tadā vālivadhaṃ prati / (50.1) Par.?

sugrīvaḥ śaṅkitaś cāsīn nityaṃ vīryeṇa rāghave // (50.2) Par.?

rāghavaḥ pratyayārthaṃ tu dundubheḥ kāyam uttamam / (51.1) Par.?

pādāṅguṣṭhena cikṣepa sampūrṇaṃ daśayojanam // (51.2) Par.?

bibheda ca punaḥ sālān saptaikena maheṣuṇā / (52.1) Par.?

giriṃ rasātalaṃ caiva janayan pratyayaṃ tadā // (52.2) Par.?

tataḥ prītamanās tena viśvastaḥ sa mahākapiḥ / (53.1) Par.?

kiṣkindhāṃ rāmasahito jagāma ca guhāṃ tadā // (53.2) Par.?

tato 'garjaddharivaraḥ sugrīvo hemapiṅgalaḥ / (54.1) Par.?

tena nādena mahatā nirjagāma harīśvaraḥ // (54.2) Par.?

tataḥ sugrīvavacanāddhatvā vālinam āhave / (55.1) Par.?

sugrīvam eva tad rājye rāghavaḥ pratyapādayat // (55.2) Par.?

sa ca sarvān samānīya vānarān vānararṣabhaḥ / (56.1) Par.?

diśaḥ prasthāpayāmāsa didṛkṣur janakātmajām // (56.2) Par.?

tato gṛdhrasya vacanāt sampāter hanumān balī / (57.1) Par.?

śatayojanavistīrṇaṃ pupluve lavaṇārṇavam // (57.2) Par.?

tatra laṅkāṃ samāsādya purīṃ rāvaṇapālitām / (58.1) Par.?

dadarśa sītāṃ dhyāyantīm aśokavanikāṃ gatām // (58.2) Par.?

nivedayitvābhijñānaṃ pravṛttiṃ ca nivedya ca / (59.1) Par.?

samāśvāsya ca vaidehīṃ mardayāmāsa toraṇam // (59.2) Par.?

pañca senāgragān hatvā sapta mantrisutān api / (60.1) Par.?

śūram akṣaṃ ca niṣpiṣya grahaṇaṃ samupāgamat // (60.2) Par.?

astreṇonmuham ātmānaṃ jñātvā paitāmahād varāt / (61.1) Par.?

marṣayan rākṣasān vīro yantriṇas tān yadṛcchayā // (61.2) Par.?

tato dagdhvā purīṃ laṅkām ṛte sītāṃ ca maithilīm / (62.1) Par.?

rāmāya priyam ākhyātuṃ punar āyān mahākapiḥ // (62.2) Par.?

so 'bhigamya mahātmānaṃ kṛtvā rāmaṃ pradakṣiṇam / (63.1) Par.?

nyavedayad ameyātmā dṛṣṭā sīteti tattvataḥ // (63.2) Par.?

tataḥ sugrīvasahito gatvā tīraṃ mahodadheḥ / (64.1) Par.?

samudraṃ kṣobhayāmāsa śarair ādityasaṃnibhaiḥ // (64.2) Par.?

darśayāmāsa cātmānaṃ samudraḥ saritāṃ patiḥ / (65.1) Par.?

samudravacanāc caiva nalaṃ setum akārayat // (65.2) Par.?

tena gatvā purīṃ laṅkāṃ hatvā rāvaṇam āhave / (66.1) Par.?

abhyaṣiñcat sa laṅkāyāṃ rākṣasendraṃ vibhīṣaṇam // (66.2) Par.?

karmaṇā tena mahatā trailokyaṃ sacarācaram / (67.1) Par.?

sadevarṣigaṇaṃ tuṣṭaṃ rāghavasya mahātmanaḥ // (67.2) Par.?

tathā paramasaṃtuṣṭaiḥ pūjitaḥ sarvadaivataiḥ / (68.1) Par.?

kṛtakṛtyas tadā rāmo vijvaraḥ pramumoda ha // (68.2) Par.?

devatābhyo varān prāpya samutthāpya ca vānarān / (69.1) Par.?

puṣpakaṃ tat samāruhya nandigrāmaṃ yayau tadā // (69.2) Par.?

nandigrāme jaṭāṃ hitvā bhrātṛbhiḥ sahito 'naghaḥ / (70.1) Par.?

rāmaḥ sītām anuprāpya rājyaṃ punar avāptavān // (70.2) Par.?

prahṛṣṭamudito lokas tuṣṭaḥ puṣṭaḥ sudhārmikaḥ / (71.1) Par.?

nirāyamo arogaś ca durbhikṣabhayavarjitaḥ // (71.2) Par.?

na putramaraṇaṃ kecid drakṣyanti puruṣāḥ kvacit / (72.1) Par.?

nāryaś cāvidhavā nityaṃ bhaviṣyanti pativratāḥ // (72.2) Par.?

na vātajaṃ bhayaṃ kiṃcin nāpsu majjanti jantavaḥ / (73.1) Par.?

na cāgrijaṃ bhayaṃ kiṃcid yathā kṛtayuge tathā // (73.2) Par.?

aśvamedhaśatair iṣṭvā tathā bahusuvarṇakaiḥ / (74.1) Par.?

gavāṃ koṭyayutaṃ dattvā vidvadbhyo vidhipūrvakam // (74.2) Par.?

rājavaṃśāñ śataguṇān sthāpayiṣyati rāghavaḥ / (75.1) Par.?

cāturvarṇyaṃ ca loke 'smin sve sve dharme niyokṣyati // (75.2) Par.?

daśavarṣasahasrāṇi daśavarṣaśatāni ca / (76.1) Par.?

rāmo rājyam upāsitvā brahmalokaṃ gamiṣyati // (76.2) Par.?

idaṃ pavitraṃ pāpaghnaṃ puṇyaṃ vedaiś ca saṃmitam / (77.1) Par.?

yaḥ paṭhed rāmacaritaṃ sarvapāpaiḥ pramucyate // (77.2) Par.?

etad ākhyānam āyuṣyaṃ paṭhan rāmāyaṇaṃ naraḥ / (78.1) Par.?

saputrapautraḥ sagaṇaḥ pretya svarge mahīyate // (78.2) Par.?

paṭhan dvijo vāgṛṣabhatvam īyāt syāt kṣatriyo bhūmipatitvam īyāt / (79.1) Par.?

vaṇigjanaḥ paṇyaphalatvam īyāj janaś ca śūdro 'pi mahattvam īyāt // (79.2) Par.?

Duration=1.1996319293976 secs.