Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17499

Click on a sentence to show its analysis
Keep the mouse pointer over a lemma to show its meanings.

tato 'nyedyurupetāṃ tāṃ prātaḥ somaprabhāṃ sakhīm / (1.1) Par.?

kaliṅgasenā viśrambhāt kathāṃ kurvatyuvāca sā // (1.2) Par.?

māṃ prasenajite rājñe tāto dāsyati niścitam / (2.1) Par.?

etac chrutaṃ mayāmbāto dṛṣṭo vṛddhaḥ sa ca tvayā // (2.2) Par.?

vatseśastu yathā rūpe tvayaiva kathitastathā / (3.1) Par.?

śrutimārgapraviṣṭena hṛtaṃ tena yathā manaḥ // (3.2) Par.?

tatprasenajitaṃ pūrvaṃ pradarśya naya tatra mām / (4.1) Par.?

āste vatseśvaro yatra kiṃ tātena kimambayā // (4.2) Par.?

evam uktavatīṃ tāṃ ca sotkāṃ somaprabhābravīt / (5.1) Par.?

gantavyaṃ yadi tadyāmo yantreṇa vyomagāminā // (5.2) Par.?

kiṃtu sarvaṃ gṛhāṇa tvaṃ nijaṃ parikaraṃ yataḥ / (6.1) Par.?

dṛṣṭvā vatseśvaraṃ bhūyo nāgantum iha śakṣyasi // (6.2) Par.?

na ca tvaṃ drakṣyasi punaḥ pitarau na smariṣyasi / (7.1) Par.?

dūrasthāṃ prāptadayitā vismariṣyasi mām api // (7.2) Par.?

nahyevam ahameṣyāmi bhartṛveśmani te sakhi / (8.1) Par.?

tac chrutvā rājakanyā sā rudatī tām abhāṣata // (8.2) Par.?

tarhi vatseśvaraṃ taṃ tvam ihaivānaya me sakhi / (9.1) Par.?

notsahe tatra hi sthātuṃ kṣaṇam ekaṃ tvayā vinā // (9.2) Par.?

nāninye cāniruddhaḥ kimupāyāccitralekhayā / (10.1) Par.?

jānatyapi tathā caitāṃ mattastvaṃ tatkathāṃ śṛṇu // (10.2) Par.?

bāṇāsurasya tanayā babhūvoṣeti viśrutā / (11.1) Par.?

tasyāścārādhitā gaurī patiprāptyai varaṃ dadau // (11.2) Par.?

svapne prāpsyasi yatsaṅgaṃ sa te bhartā bhaved iti / (12.1) Par.?

tato devakumārābhaṃ kaṃcitsvapne dadarśa sā // (12.2) Par.?

gāndharvavidhinā tena pariṇītā tathaiva ca / (13.1) Par.?

prāptatatsatyasaṃbhogā prābudhyata niśākṣaye // (13.2) Par.?

adṛṣṭvā taṃ patiṃ dṛṣṭaṃ dṛṣṭvā saṃbhogalakṣaṇam / (14.1) Par.?

smṛtvā gaurīvaraṃ sābhūtsātaṅkabhayavismayā // (14.2) Par.?

tāmyantī ca tataḥ sā taṃ svapne dṛṣṭaṃ priyaṃ vinā / (15.1) Par.?

pṛcchantyai citralekhāyai sakhyai sarvaṃ śaśaṃsa tat // (15.2) Par.?

sāpi nāmādyabhijñānaṃ na kiṃcittasya jānatī / (16.1) Par.?

yogeśvarī citralekhā tāmuṣām evam abravīt // (16.2) Par.?

sakhi devīvarasyāyaṃ prabhāvo 'tra kimucyate / (17.1) Par.?

kiṃtv abhijñānaśūnyas te so 'nveṣṭavyaḥ priyaḥ katham // (17.2) Par.?

parijānāsi cettaṃ te sasurāsuramānuṣam / (18.1) Par.?

jagallikhāmi tanmadhye taṃ me darśaya yena saḥ // (18.2) Par.?

ānīyate mayety uktā sā tathety udite tayā / (19.1) Par.?

citralekhā kramād viśvam alikhad varṇavartibhiḥ // (19.2) Par.?

tatroṣā so 'yamityasyā hṛṣṭāṅgulyā sakampayā / (20.1) Par.?

dvāravatyāṃ yadukulādaniruddhamadarśayat // (20.2) Par.?

citralekhā tato 'vādītsakhi dhanyāsi yattvayā / (21.1) Par.?

bhartāniruddhaḥ prāpto 'yaṃ pautro bhagavato hareḥ // (21.2) Par.?

yojanānāṃ sahasreṣu ṣaṣṭau vasati sa tvitaḥ / (22.1) Par.?

tacchrutvā sādhikautsukyavaśāttām abravīd uṣā // (22.2) Par.?

nādya cetsakhi tasyāṅkaṃ śraye śrīkhaṇḍaśītalam / (23.1) Par.?

tadatyuddāmakāmāgninirdagdhāṃ viddhi māṃ mṛtām // (23.2) Par.?

śrutvaitaccitralekhā sā tāmāśvāsya priyāṃ sakhīm / (24.1) Par.?

tadaivotpatya nabhasā yayau dvāravatīṃ purīm // (24.2) Par.?

dadarśa ca pṛthūttuṅgair mandirair abdhimadhyagām / (25.1) Par.?

kurvatī taṃ punaḥ kṣiptamanthādriśikharabhramam // (25.2) Par.?

tasyāṃ suptaṃ niśi prāpya sāniruddhaṃ vibodhya ca / (26.1) Par.?

uṣānurāgaṃ taṃ tasmai śaśaṃsa svapnadarśanāt // (26.2) Par.?

ādāya cāttatadrūpasvapnavṛttāntam eva tam / (27.1) Par.?

sotkaṃ siddhiprabhāveṇa kṣaṇenaivāyayau tataḥ // (27.2) Par.?

etya cāvekṣamāṇāyās tasyāḥ sakhyāḥ svavartmanā / (28.1) Par.?

prāveśayaduṣāyāstaṃ guptamantaḥpuraṃ priyam // (28.2) Par.?

sā dṛṣṭvaivāniruddhaṃ tamuṣā sākṣādupāgatam / (29.1) Par.?

amṛtāṃśumivāmbhodhivelā nāṅgeṣv avartata // (29.2) Par.?

tatas tena samaṃ tasthau sakhīdattena tatra sā / (30.1) Par.?

jīviteneva mūrtena vallabhena yathāsukham // (30.2) Par.?

tajjñānātpitaraṃ cāsyāḥ kruddhaṃ bāṇaṃ jigāya saḥ / (31.1) Par.?

aniruddhaḥ svavīryeṇa pitāmahabalena ca // (31.2) Par.?

tato dvāravatīṃ gatvā tāv abhinnatanū ubhau / (32.1) Par.?

uṣāniruddhau jajñāte girijāśaṃkarāviva // (32.2) Par.?

ity uṣāyāḥ priyo 'hnaiva melitaścitralekhayā / (33.1) Par.?

tvaṃ saprabhāvāpyadhikā tato 'pi sakhi me matā // (33.2) Par.?

tanmamānaya vatseśam iha mā sma ciraṃ kṛthāḥ / (34.1) Par.?

evaṃ kaliṅgasenātaḥ śrutvā somaprabhābravīt // (34.2) Par.?

citralekhā surastrī sā samutkṣipyānayatparam / (35.1) Par.?

mādṛśī kiṃ vidadhyāttu parasparśādyakurvatī // (35.2) Par.?

tattvāṃ nayāmi tatraiva yatra vatseśvaraḥ sakhi / (36.1) Par.?

prākprasenajitaṃ taṃ te darśayitvā tvadarthinam // (36.2) Par.?

iti somaprabhoktā sā tathety uktvā tayā saha / (37.1) Par.?

kaliṅgasenā tatkﾱptaṃ māyāyantravimānakam // (37.2) Par.?

tadaivāruhya nabhasā sakoṣā saparicchadā / (38.1) Par.?

kṛtaprāsthānikā prāyāt pitror aviditā tataḥ // (38.2) Par.?

na hi paśyati tuṅgaṃ vā śvabhraṃ vā strījano 'grataḥ / (39.1) Par.?

smareṇa nītaḥ paramāṃ dhārāṃ vājīva sādinā // (39.2) Par.?

śrāvastīṃ prāpya pūrvaṃ ca taṃ prasenajitaṃ nṛpam / (40.1) Par.?

mṛgayānirgataṃ dūrājjarāpāṇḍuṃ dadarśa sā // (40.2) Par.?

vṛddhād vrajāsmād iti tāṃ dūrādiva niṣedhatā / (41.1) Par.?

uddhūyamānena muhuścāmareṇopalakṣitam // (41.2) Par.?

so 'yaṃ prasenajidrājā pitrāsmai tvaṃ praditsitā / (42.1) Par.?

paśyeti somaprabhayā darśitaṃ sopahāsayā // (42.2) Par.?

jarayāyaṃ vṛto rājā kā vṛṇīte 'parā tvamum / (43.1) Par.?

taditaḥ sakhi śīghraṃ māṃ naya vatseśvaraṃ prati // (43.2) Par.?

iti somaprabhāṃ coktvā tatkṣaṇaṃ sā tayā saha / (44.1) Par.?

kaliṅgasenā vyomnaiva kauśāmbīṃ nagarīṃ yayau // (44.2) Par.?

tatrodyānagataṃ sā taṃ vatseśaṃ sakhyudīritam / (45.1) Par.?

dadarśa dūrāt sotkaṇṭhā cakorīvāmṛtatviṣam // (45.2) Par.?

sā tadutphullayā dṛṣṭyā hṛnnyastena ca pāṇinā / (46.1) Par.?

praviṣṭo 'yaṃ pathānena māmatretyabravīd iva // (46.2) Par.?

sakhi saṃgamayādyaiva vatsarājena mām iha / (47.1) Par.?

enaṃ vilokya hi sthātuṃ na śaktā kṣaṇam apy aham // (47.2) Par.?

iti coktavatīṃ tāṃ sā sakhī somaprabhābravīt / (48.1) Par.?

adyāśubhaṃ mayā kiṃcinnimittamupalakṣitam // (48.2) Par.?

tadidaṃ divasaṃ tūṣṇīmudyāne 'sminn alakṣitā / (49.1) Par.?

adhitiṣṭhasva mā kārṣīḥ sakhi dūraṃ gatāgatam // (49.2) Par.?

prātarāgatya yuktiṃ vā ghaṭayiṣyāmi saṃgame / (50.1) Par.?

adhunā gantumicchāmi bhartuścittagṛhe gṛham // (50.2) Par.?

ity uktvā tām avasthāpya yayau somaprabhā tataḥ / (51.1) Par.?

vatsarājo 'pi codyānātsvamandiramathāviśat // (51.2) Par.?

tataḥ kaliṅgasenā sā tatrasthā svamahattaram / (52.1) Par.?

yathātattvaṃ svasaṃdeśaṃ dattvā vatseśvaraṃ prati // (52.2) Par.?

prāhiṇotprāṅniṣiddhāpi svasakhyā śakunajñayā / (53.1) Par.?

svatantro 'bhinavārūḍho yuvatīnāṃ manobhavaḥ // (53.2) Par.?

sa ca gatvā pratīhāramukhenāvedya tatkṣaṇam / (54.1) Par.?

mahattaraḥ praviśyaivaṃ vatsarājaṃ vyajijñapat // (54.2) Par.?

rājan kaliṅgadattasya rājñas takṣaśilāpateḥ / (55.1) Par.?

sutā kaliṅgasenākhyā śrutvā tvāṃ rūpavattaram // (55.2) Par.?

svayaṃvarārtham iha te samprāptā tyaktabāndhavā / (56.1) Par.?

māyāyantravimānena sānugā vyomagāminā // (56.2) Par.?

ānītā guhyacāriṇyā sakhyā somaprabhākhyayā / (57.1) Par.?

mayāsurasyātmajayā nalakūbarabhāryayā // (57.2) Par.?

tayā vijñāpanāyāhaṃ preṣitaḥ svīkuruṣva tām / (58.1) Par.?

yuvayorastu yogo 'yaṃ kaumudīcandrayor iva // (58.2) Par.?

evaṃ mahattarāc chrutvā taṃ tathety abhinandya ca / (59.1) Par.?

prahṛṣṭo hemavastrādyair vatsarājo 'bhyapūjayat // (59.2) Par.?

āhūya cābravīnmantrimukhyaṃ yaugandharāyaṇam / (60.1) Par.?

rājñaḥ kaliṅgadattasya khyātarūpā kṣitau sutā // (60.2) Par.?

svayaṃ kaliṅgasenākhyā varaṇāya mamāgatā / (61.1) Par.?

tadbrūhi śīghram atyājyāṃ kadā pariṇayāmi tām // (61.2) Par.?

ity ukto vatsarājena mantrī yaugandharāyaṇaḥ / (62.1) Par.?

asyāyatihitāpekṣī kṣaṇam evam acintayat // (62.2) Par.?

kaliṅgasenā sā tāvatkhyātarūpā jagattraye / (63.1) Par.?

nāstyanyā tādṛśī tasyai spṛhayanti surā api // (63.2) Par.?

tāṃ labdhvā vatsarājo 'yaṃ sarvam anyat parityajet / (64.1) Par.?

devī vāsavadattā ca tataḥ prāṇair viyujyate // (64.2) Par.?

naravāhanadatto 'pi naśyedrājasutas tataḥ / (65.1) Par.?

padmāvatyapi tatsnehāddevī jīvati duṣkaram // (65.2) Par.?

tataś caṇḍamahāsenapradyotau pitarau dvayoḥ / (66.1) Par.?

devyorvimuñcataḥ prāṇān vikṛtiṃ vāpi gacchataḥ // (66.2) Par.?

evaṃ ca sarvanāśaḥ syānna ca yuktaṃ niṣedhanam / (67.1) Par.?

rājño 'sya vyasanaṃ yasmādvāritasyādhikībhavet // (67.2) Par.?

tasmādanupraveśasya siddhyai kālaṃ harāmy aham / (68.1) Par.?

ity ālocya sa vatseśaṃ prāha yaugandharāyaṇaḥ // (68.2) Par.?

deva dhanyo 'si yasyaiṣā svayaṃ te gṛham āgatā / (69.1) Par.?

kaliṅgasenā bhṛtyatvaṃ prāptaścaitatpitā nṛpaḥ // (69.2) Par.?

tat tvayā gaṇakān pṛṣṭvā sulagne 'syā yathāvidhi / (70.1) Par.?

kāryaḥ pāṇigraho rājño bṛhato duhitā hy asau // (70.2) Par.?

adyāsyā dīyatāṃ tāvadyogyaṃ vāsagṛhaṃ pṛthak / (71.1) Par.?

dāsīdāsā visṛjyantāṃ vastrāṇyābharaṇāni ca // (71.2) Par.?

ity ukto mantrimukhyena vatsarājastatheti tat / (72.1) Par.?

prahṛṣṭahṛdayaḥ sarvaṃ saviśeṣaṃ cakāra saḥ // (72.2) Par.?

kaliṅgasenā ca tataḥ praviṣṭā vāsaveśma tat / (73.1) Par.?

svamanorathamāsannaṃ matvā prāpa parāṃ mudam // (73.2) Par.?

yaugandharāyaṇaḥ so 'pi kṣaṇād rājakulāt tataḥ / (74.1) Par.?

nirgatya svagṛhaṃ gatvā dhīmānevam acintayat // (74.2) Par.?

prāyo 'śubhasya kāryasya kālahāraḥ pratikriyā / (75.1) Par.?

tathā ca vṛtraśatrau prāgbrahmahatyāpalāyite // (75.2) Par.?

devarājyamavāptena nahuṣeṇābhivāñchitā / (76.1) Par.?

rakṣitā devaguruṇā śacī śaraṇamāśritā // (76.2) Par.?

adya prātar upaiti tvāmity uktvā kālahārataḥ / (77.1) Par.?

yāvatsa naṣṭo nahuṣo huṃkārādbrahmaśāpataḥ // (77.2) Par.?

prāptaś ca pūrvavacchakraḥ sa punardevarājatām / (78.1) Par.?

evaṃ kaliṅgasenārthe kālaḥ kṣepyo mayā prabhoḥ // (78.2) Par.?

iti saṃcintya sarveṣāṃ gaṇakānāṃ sa saṃvidam / (79.1) Par.?

dūralagnapradānāya mantrī guptaṃ vyadhāttadā // (79.2) Par.?

atha vijñāya vṛttāntaṃ devyā vāsavadattayā / (80.1) Par.?

āhūya sa mahāmantrī svamandiramanīyata // (80.2) Par.?

tatra praviṣṭaṃ praṇataṃ rudatī sā jagāda tam / (81.1) Par.?

ārya pūrvaṃ tvayoktaṃ me yathā devi mayi sthite // (81.2) Par.?

padmāvatyā ṛte nānyā sapatnī te bhaviṣyati / (82.1) Par.?

kaliṅgasenāpy adyaiṣā paśyeha pariṇeṣyate // (82.2) Par.?

sā ca rūpavatī tasyāmāryaputraś ca rajyati / (83.1) Par.?

ato vitathavādī tvaṃ jāto 'haṃ ca mṛtādhunā // (83.2) Par.?

tac chrutvā tām avocatsa mantrī yaugandharāyaṇaḥ / (84.1) Par.?

dhīrā bhava kathaṃ hy etaddevi syānmama jīvataḥ // (84.2) Par.?

tvayā tu nātra kartavyā rājño 'sya pratikūlatā / (85.1) Par.?

pratyutālambya dhīratvaṃ darśanīyānukūlatā // (85.2) Par.?

nāturaḥ pratikūloktair vaśe vaidyasya vartate / (86.1) Par.?

vartate tvanukūloktaiḥ sāmnaivācarataḥ kriyām // (86.2) Par.?

pratīpaṃ kṛṣyamāṇo hi nottareduttarennaraḥ / (87.1) Par.?

vāhyamāno 'nukūlaṃ tu nodyogādvyasanāttathā // (87.2) Par.?

ataḥ samīpamāyāntaṃ rājānaṃ tvam avikriyā / (88.1) Par.?

upacārairupacareḥ saṃvṛtyākāramātmanaḥ // (88.2) Par.?

kaliṅgasenāsvīkāraṃ śraddadhyās tasya sāṃpratam / (89.1) Par.?

vṛddhiṃ bruvāṇā rājyasya sahāye tatpitaryapi // (89.2) Par.?

evaṃ kṛte ca māhātmyaguṇaṃ dṛṣṭvā paraṃ tava / (90.1) Par.?

pravṛddhasnehadākṣiṇyo rājāsau bhavati tvayi // (90.2) Par.?

matvā kaliṅgasenāṃ ca svādhīnāṃ notsuko bhavet / (91.1) Par.?

vāryamāṇasya vāñchā hi viṣayeṣv abhivardhate // (91.2) Par.?

devī padmāvatī caitacchikṣaṇīyā tvayānaghe / (92.1) Par.?

evaṃ sa rājā kārye 'smin kālakṣepaṃ saheta naḥ // (92.2) Par.?

ataḥ paraṃ ca jāne 'haṃ paśyeryuktibalaṃ mama / (93.1) Par.?

saṃkaṭe hi parīkṣyante prājñāḥ śūrāś ca saṃgare // (93.2) Par.?

taddevi mā viṣaṇṇā bhūriti devīṃ prabodhya tām / (94.1) Par.?

tayādṛtoktiḥ sa yayau tato yaugandharāyaṇaḥ // (94.2) Par.?

vatseśvaraś ca tadahar na divā na rātrau devyordvayor api sa vāsagṛhaṃ jagāma / (95.1) Par.?

tādṛk svayaṃvararasopanamatkaliṅgasenāsamānanavasaṃgamasotkacetāḥ // (95.2) Par.?

rātriṃ ca durlabharasotsukatātigāḍhacintāmahotsavamayīm iva tāṃ tatas te / (96.1) Par.?

ninyuḥ svasadmasu pṛthakpṛthageva devīvatseśatatsacivamukhyakaliṅgasenāḥ // (96.2) Par.?

Duration=0.47962284088135 secs.