Texts

lomaśa uvāca / (1.1) Par.?

samudraṃ sa samāsādya vāruṇir bhagavān ṛṣiḥ / (1.2) Par.?

uvāca sahitān devān ṛṣīṃś caiva samāgatān // (1.3) Par.?

eṣa lokahitārthaṃ vai pibāmi varuṇālayam / (2.1) Par.?

bhavadbhir yad anuṣṭheyaṃ tacchīghraṃ saṃvidhīyatām // (2.2) Par.?

etāvad uktvā vacanaṃ maitrāvaruṇir acyutaḥ / (3.1) Par.?

samudram apibat kruddhaḥ sarvalokasya paśyataḥ // (3.2) Par.?

pīyamānaṃ samudraṃ tu dṛṣṭvā devāḥ savāsavāḥ / (4.1) Par.?

vismayaṃ paramaṃ jagmuḥ stutibhiś cāpyapūjayan // (4.2) Par.?

tvaṃ nas trātā vidhātā ca lokānāṃ lokabhāvanaḥ / (5.1) Par.?

tvatprasādāt samucchedaṃ na gacchet sāmaraṃ jagat // (5.2) Par.?

sampūjyamānas tridaśair mahātmā gandharvatūryeṣu nadatsu sarvaśaḥ / (6.1) Par.?

divyaiś ca puṣpair avakīryamāṇo mahārṇavaṃ niḥsalilaṃ cakāra // (6.2) Par.?

dṛṣṭvā kṛtaṃ niḥsalilaṃ mahārṇavaṃ surāḥ samastāḥ paramaprahṛṣṭāḥ / (7.1) Par.?

pragṛhya divyāni varāyudhāni tān dānavāñjaghnur adīnasattvāḥ // (7.2) Par.?

te vadhyamānās tridaśair mahātmabhir mahābalair vegibhir unnadadbhiḥ / (8.1) Par.?

na sehire vegavatāṃ mahātmanāṃ vegaṃ tadā dhārayituṃ divaukasām // (8.2) Par.?

te vadhyamānās tridaśair dānavā bhīmanisvanāḥ / (9.1) Par.?

cakruḥ sutumulaṃ yuddhaṃ muhūrtam iva bhārata // (9.2) Par.?

te pūrvaṃ tapasā dagdhā munibhir bhāvitātmabhiḥ / (10.1) Par.?

yatamānāḥ paraṃ śaktyā tridaśair viniṣūditāḥ // (10.2) Par.?

te hemaniṣkābharaṇāḥ kuṇḍalāṅgadadhāriṇaḥ / (11.1) Par.?

nihatya bahvaśobhanta puṣpitā iva kiṃśukāḥ // (11.2) Par.?

hataśeṣās tataḥ kecit kāleyā manujottama / (12.1) Par.?

vidārya vasudhāṃ devīṃ pātālatalam āśritāḥ // (12.2) Par.?

nihatān dānavān dṛṣṭvā tridaśā munipuṃgavam / (13.1) Par.?

tuṣṭuvur vividhair vākyair idaṃ caivābruvan vacaḥ // (13.2) Par.?

tvatprasādān mahābhāga lokaiḥ prāptaṃ mahat sukham / (14.1) Par.?

tvattejasā ca nihatāḥ kāleyāḥ krūravikramāḥ // (14.2) Par.?

pūrayasva mahābāho samudraṃ lokabhāvana / (15.1) Par.?

yat tvayā salilaṃ pītaṃ tad asmin punar utsṛja // (15.2) Par.?

evam uktaḥ pratyuvāca bhagavān munipuṃgavaḥ / (16.1) Par.?

jīrṇaṃ taddhi mayā toyam upāyo 'nyaḥ pracintyatām / (16.2) Par.?

pūraṇārthaṃ samudrasya bhavadbhir yatnam āsthitaiḥ // (16.3) Par.?

etacchrutvā tu vacanaṃ maharṣer bhāvitātmanaḥ / (17.1) Par.?

vismitāśca viṣaṇṇāśca babhūvuḥ sahitāḥ surāḥ // (17.2) Par.?

parasparam anujñāpya praṇamya munipuṃgavam / (18.1) Par.?

prajāḥ sarvā mahārāja viprajagmur yathāgatam // (18.2) Par.?

tridaśā viṣṇunā sārdham upajagmuḥ pitāmaham / (19.1) Par.?

pūraṇārthaṃ samudrasya mantrayitvā punaḥ punaḥ / (19.2) Par.?

ūcuḥ prāñjalayaḥ sarve sāgarasyābhipūraṇam // (19.3) Par.?