Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 3885

Click on a sentence to show its analysis
Keep the mouse pointer over a lemma to show its meanings.

yudhiṣṭhira uvāca / (1.1) Par.?

āścaryametadakhilaṃ kathitaṃ bho dvijottama / (1.2) Par.?

vismayaṃ paramāpannā ṛṣisaṃghā mayā saha // (1.3) Par.?

aho bhagavatī puṇyā narmadeyamayonijā / (2.1) Par.?

rudradehādviniṣkrāntā mahāpāpakṣayaṃkarī // (2.2) Par.?

saptakalpakṣaye prāpte tvayeyaṃ saha suvrata / (3.1) Par.?

na mṛtā ca mahābhāgā kimataḥ puṇyamuttamam // (3.2) Par.?

ke te kalpāḥ samuddiṣṭāḥ sapta kalpakṣayaṃkarāḥ / (4.1) Par.?

na mṛtā cediyaṃ devī tvaṃ caiva ṛṣipuṃgava // (4.2) Par.?

apakṣigaṇasaṃghāte jagatyekārṇavīkṛte / (5.1) Par.?

kīdṛgrūpaḥ samabhavanmahādevo yugakṣaye // (5.2) Par.?

kathaṃ saṃharate viśvaṃ kathaṃ cāste mahārṇave / (6.1) Par.?

kathaṃ ca sṛjate viśvaṃ kathaṃ dhārayate prajāḥ // (6.2) Par.?

kīdṛgrūpā bhaveddevī sarid ekārṇavīkṛte / (7.1) Par.?

kimarthaṃ narmadā proktā revatī ca kathaṃ smṛtā // (7.2) Par.?

añjaneti kimarthaṃ vā kimarthaṃ suraseti ca / (8.1) Par.?

mandākinī kimarthaṃ ca śoṇaśceti kathaṃ bhavet // (8.2) Par.?

trikūṭeti kimarthaṃ vā kimarthaṃ vāluvāhinī / (9.1) Par.?

koṭikoṭyo hi tīrthānāṃ praviṣṭā yā mahārṇavam // (9.2) Par.?

kiyatyaḥ saritāṃ koṭyo narmadāṃ samupāsate / (10.1) Par.?

yajñopavītairṛṣibhir devatābhis tathaiva ca // (10.2) Par.?

vibhakteyaṃ kimarthaṃ ca śrūyate munisattama / (11.1) Par.?

vaiṣṇavīti purāṇajñaiḥ kimarthamiha cocyate // (11.2) Par.?

keṣu sthāneṣu tīrtheṣu pūjanīyā saridvarā / (12.1) Par.?

tīrthāni ca pṛthagbrūhi yatra saṃnihito haraḥ // (12.2) Par.?

yatpramāṇā ca sā devī yā rudreṇa vinirmitā / (13.1) Par.?

kīdṛśāni ca karmāṇi rudreṇa kathitāni te // (13.2) Par.?

kathaṃ mlecchasamākīrṇo deśo 'yaṃ dvijasattama / (14.1) Par.?

etadācakṣva māṃ brahmanmārkaṇḍeya mahāmate // (14.2) Par.?

śrīmārkaṇḍeya uvāca / (15.1) Par.?

śṛṇvantu ṛṣayaḥ sarve tvaṃ ca tāta yudhiṣṭhira / (15.2) Par.?

purāṇaṃ narmadāyāṃ tu kathitaṃ ca triśūlinā // (15.3) Par.?

vāyoḥ sakāśācca mayā tenāpi ca maheśvarāt / (16.1) Par.?

aśakyatvānmanuṣyāṇāṃ saṃkṣiptam ṛṣibhiḥ purā // (16.2) Par.?

māyūraṃ prathamaṃ tāta kaurmyaṃ ca tadanantaram / (17.1) Par.?

puraṃ tathā kauśikaṃ ca mātsyaṃ dviradameva ca // (17.2) Par.?

vārāhaṃ yanmayā dṛṣṭaṃ vaiṣṇavaṃ cāṣṭamaṃ param / (18.1) Par.?

nyagrodhākhyam ataścāsīdākāṅkṣaṃ punaruttamam // (18.2) Par.?

padmaṃ ca tāmasaṃ caiva saṃvartodvartameva ca / (19.1) Par.?

mahāpralayamityāhuḥ purāṇe vedacintakāḥ // (19.2) Par.?

etatsaṃkṣepataḥ sarvaṃ saṃkṣiptaṃ tairmahātmabhiḥ / (20.1) Par.?

vibhaktaṃ ca caturbhāgair brahmādyaiśca maharṣibhiḥ // (20.2) Par.?

tadahaṃ sampravakṣyāmi purāṇārthaviśārada / (21.1) Par.?

sapta kalpā mahāghorā yair iyaṃ na mṛtā sarit // (21.2) Par.?

ā jaṅgamaṃ tamobhūtam aprajñātamalakṣaṇam / (22.1) Par.?

naṣṭacandrārkakiraṇam āsīd bhūtavivarjitam // (22.2) Par.?

tamaso 'to mahānāmnā puruṣaḥ sa jagadguruḥ / (23.1) Par.?

cacāra tasminnekākī vyaktāvyaktaḥ sanātanaḥ // (23.2) Par.?

sa cauṃkāramayo 'tīto gāyatrīmasṛjaddvijaḥ / (24.1) Par.?

sa tayā sārddham īśānaścikrīḍa puruṣo virāṭ // (24.2) Par.?

svadehādasṛjad viśvaṃ pañcabhūtātmasaṃjñitam / (25.1) Par.?

krīḍansamasṛjadviśvaṃ pañcabhūtātmasaṃjñitam // (25.2) Par.?

krīḍan sṛjad virāṭsaṃjñaḥ sabījaṃ ca hiraṇmayam / (26.1) Par.?

taccāṇḍam abhavad divyaṃ dvādaśādityasannibham // (26.2) Par.?

tadbhittvā puruṣo jajñe caturvaktraḥ pitāmahaḥ / (27.1) Par.?

so 'sṛjadviśvam evaṃ tu sadevāsuramānuṣam // (27.2) Par.?

satiryakpaśupakṣīkaṃ svedāṇḍajajarāyujam / (28.1) Par.?

etadaṇḍaṃ purāṇeṣu prathamaṃ parikīrtitam // (28.2) Par.?

pūrvakalpe nṛpaśreṣṭha krīḍantyā parameṣṭhinā / (29.1) Par.?

umayā saha rudrasya krīḍataścārṇavīkṛtaḥ // (29.2) Par.?

harṣājjajñe śubhā kanyā umāyāḥ svedasaṃbhavā / (30.1) Par.?

śarvasyoraḥsthalājjajñe umā kucavimardanāt // (30.2) Par.?

svedādvijajñe mahatī kanyā rājīvalocanā / (31.1) Par.?

dvitīyaḥ saṃbhavo yasyā rudradehād yudhiṣṭhira // (31.2) Par.?

sā paribhramate lokān sadevāsuramānavān / (32.1) Par.?

trailokyonmādajananī rūpeṇa 'pratimā tadā // (32.2) Par.?

tāṃ dṛṣṭvā devadaityendrā mohitā labhate katham / (33.1) Par.?

mṛgayanti sma tāṃ kanyām itaścetaśca bhārata // (33.2) Par.?

hāvabhāvavilāsaiśca mohayatyakhilaṃ jagat / (34.1) Par.?

bhramate divyarūpā sā vidyutsaudāminī yathā // (34.2) Par.?

meghamadhye sthitā bhābhiḥ sarvayoṣidanuttamā / (35.1) Par.?

tato rudraṃ surāḥ sarve daityāśca saha dānavaiḥ // (35.2) Par.?

varayanti sma tāṃ kanyāṃ kāmenākulitā bhṛśam / (36.1) Par.?

tato 'bravīnmahādevo devadānavayordvayoḥ // (36.2) Par.?

balena tejasā caiva hyadhiko yo bhaviṣyati / (37.1) Par.?

sa imāṃ prāpsyate kanyāṃ nānyathā vai surottamāḥ // (37.2) Par.?

tato devāsurāḥ sarve kanyāṃ vai samupāgaman / (38.1) Par.?

ahamenāṃ grahīṣyāmi ahamenāmiti bruvan // (38.2) Par.?

paśyatāmeva sarveṣāṃ sā kanyāntaradhīyata / (39.1) Par.?

punastāṃ dadṛśuḥ sarve yojanāntaradhiṣṭhitām // (39.2) Par.?

jagmuste tvaritāḥ sarve yatra sā samadṛśyata / (40.1) Par.?

tribhiścaturbhiśca tathā yojanairdaśabhiḥ punaḥ // (40.2) Par.?

dhiṣṭhitāṃ samapaśyaṃste sarve mātaṃgagāminīm / (41.1) Par.?

yojanānāṃ śatairbhūyaḥ sahasraiścāpyadhiṣṭhitām // (41.2) Par.?

tathā śatasahasreṇa laghutvāt samadṛśyata / (42.1) Par.?

agrataḥ pṛṣṭhataścaiva diśāsu vidiśāsu ca // (42.2) Par.?

tāṃ paśyanti varārohām ekadhā bahudhā punaḥ / (43.1) Par.?

divyavarṣasahasraṃ tu bhrāmitāste tayā purā // (43.2) Par.?

na cāvāptā tu sā kanyā mahādevāṅgasaṃbhavā / (44.1) Par.?

sahomayā tato devo jahāsoccaiḥ punaḥpunaḥ // (44.2) Par.?

gaṇāstālakasaṃpātair nṛtyanti ca mudānvitāḥ / (45.1) Par.?

akasmāddṛśyate kanyā śaṃkarasya samīpagā // (45.2) Par.?

tāṃ dṛṣṭvā vismayāpannā devā yānti parāṅmukhāḥ / (46.1) Par.?

tasyāś cakre tato nāma svayameva pinākadhṛk // (46.2) Par.?

narma caibhyo dade yasmāt tatkṛtaiś ceṣṭitaiḥ pṛthak / (47.1) Par.?

bhaviṣyasi varārohe saricchreṣṭhā tu narmadā // (47.2) Par.?

svarūpamāsthito devaḥ prāpa hāsyaṃ yato bhuvi / (48.1) Par.?

narmadā tena cokteyaṃ suśītalajalā śivā // (48.2) Par.?

saptakalpakṣaye jāte yaduktaṃ śaṃbhunā purā / (49.1) Par.?

na mṛtā tena rājendra narmadā khyātimāgatā // (49.2) Par.?

tatastāmadadātkanyāṃ śīlavatīṃ suśobhanām / (50.1) Par.?

mahārṇavāya deveśaḥ sarvabhūtapatiḥ prabhuḥ // (50.2) Par.?

tataḥ sā ṛkṣaśailendrāt phenapuñjāṭṭahāsinī / (51.1) Par.?

viveśa narmadā devī samudraṃ saritāṃ patim // (51.2) Par.?

evaṃ brāhme purā kalpe samudbhūteyamīśvarāt / (52.1) Par.?

mātsye kalpe mayā dṛṣṭā samākhyātā mayā śṛṇu // (52.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe pañcamo 'dhyāyaḥ // (53.1) Par.?

Duration=0.18713092803955 secs.