Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 5018

Click on a sentence to show its analysis
Keep the mouse pointer over a lemma to show its meanings.

athāto vājīkaraṇavidhim adhyāyaṃ vyākhyāsyāmaḥ / (1.1) Par.?

iti ha smāhur ātreyādayo maharṣayaḥ / (1.2) Par.?

vājīkaraṇam anvicchet satataṃ viṣayī pumān / (1.3) Par.?

tuṣṭiḥ puṣṭirapatyaṃ ca guṇavat tatra saṃśritam // (1.4) Par.?

apatyasaṃtānakaraṃ yat sadyaḥ saṃpraharṣaṇam / (2.1) Par.?

vājīvātibalo yena yātyapratihato 'ṅganāḥ // (2.2) Par.?

bhavatyatipriyaḥ strīṇāṃ yena yenopacīyate / (3.1) Par.?

tad vājīkaraṇaṃ taddhi dehasyorjaskaraṃ param // (3.2) Par.?

dharmyaṃ yaśasyam āyuṣyaṃ lokadvayarasāyanam / (4.1) Par.?

anumodāmahe brahmacaryam ekāntanirmalam // (4.2) Par.?

alpasattvasya tu kleśair bādhyamānasya rāgiṇaḥ / (5.1) Par.?

śarīrakṣayarakṣārthaṃ vājīkaraṇam ucyate // (5.2) Par.?

kalyasyodagravayaso vājīkaraṇasevinaḥ / (6.1) Par.?

sarveṣvṛtuṣvaharahar vyavāyo na nivāryate // (6.2) Par.?

atha snigdhaviśuddhānāṃ nirūhān sānuvāsanān / (7.1) Par.?

ghṛtatailarasakṣīraśarkarākṣaudrasaṃyutān // (7.2) Par.?

yogavid yojayet pūrvaṃ kṣīramāṃsarasāśinām / (8.1) Par.?

tato vājīkarān yogān śukrāpatyabalapradān // (8.2) Par.?

acchāyaḥ pūtikusumaḥ phalena rahito drumaḥ / (9.1) Par.?

yathaikaścaikaśākhaśca nirapatyastathā naraḥ // (9.2) Par.?

skhaladgamanam avyaktavacanaṃ dhūlidhūsaram / (10.1) Par.?

api lālāvilamukhaṃ hṛdayāhlādakārakam // (10.2) Par.?

apatyaṃ tulyatāṃ kena darśanasparśanādiṣu / (11.1) Par.?

kiṃ punar yad yaśodharmamānaśrīkulavardhanam // (11.2) Par.?

śuddhakāye yathāśakti vṛṣyayogān prayojayet / (12.1) Par.?

śarekṣukuśakāśānāṃ vidāryā vīraṇasya ca // (12.2) Par.?

mūlāni kaṇṭakāryāśca jīvakarṣabhakau balām / (13.1) Par.?

mede dve dve ca kākolyau śūrpaparṇyau śatāvarīm // (13.2) Par.?

aśvagandhām atibalāṃ ātmaguptāṃ punarnavām / (14.1) Par.?

vīrāṃ payasyāṃ jīvantīm ṛddhiṃ rāsnāṃ trikaṇṭakam // (14.2) Par.?

madhukaṃ śāliparṇīṃ ca bhāgāṃstripalikān pṛthak / (15.1) Par.?

māṣāṇām āḍhakaṃ caitad dvidroṇe sādhayed apām // (15.2) Par.?

rasenāḍhakaśeṣeṇa pacet tena ghṛtāḍhakam / (16.1) Par.?

dattvā vidārīdhātrīkṣurasānām āḍhakāḍhakam // (16.2) Par.?

ghṛtāccaturguṇaṃ kṣīraṃ peṣyāṇīmāni cāvapet / (17.1) Par.?

vīrāṃ svaguptāṃ kākolyau yaṣṭīṃ phalgūni pippalīm // (17.2) Par.?

drākṣāṃ vidārīṃ kharjūraṃ madhukāni śatāvarīm / (18.1) Par.?

tat siddhapūtaṃ cūrṇasya pṛthak prasthena yojayet // (18.2) Par.?

śarkarāyāstugāyāśca pippalyāḥ kuḍavena ca / (19.1) Par.?

maricasya prakuñcena pṛthag ardhapalonmitaiḥ // (19.2) Par.?

tvagelākesaraiḥ ślakṣṇaiḥ kṣaudradvikuḍavena ca / (20.1) Par.?

palamātraṃ tataḥ khādet pratyahaṃ rasadugdhabhuk // (20.2) Par.?

tenārohati vājīva kuliṅga iva hṛṣyati / (21.1) Par.?

vidārīpippalīśālipriyālekṣurakād rajaḥ // (21.2) Par.?

pṛthak svaguptāmūlācca kuḍavāṃśaṃ tathā madhu / (22.1) Par.?

tulārdhaṃ śarkarācūrṇāt prasthārdhaṃ navasarpiṣaḥ // (22.2) Par.?

so 'kṣamātram ataḥ khādet yasya rāmāśataṃ gṛhe / (23.1) Par.?

sātmaguptāphalān kṣīre godhūmān sādhitān himān // (23.2) Par.?

māṣān vā saghṛtakṣaudrān khādan gṛṣṭipayo'nupaḥ / (24.1) Par.?

jāgarti rātriṃ sakalām akhinnaḥ khedayan striyaḥ // (24.2) Par.?

bastāṇḍasiddhe payasi bhāvitān asakṛt tilān / (25.1) Par.?

yaḥ khādet sasitān gacchet sa strīśatam apūrvavat // (25.2) Par.?

cūrṇaṃ vidāryā bahuśaḥ svarasenaiva bhāvitam / (26.1) Par.?

kṣaudrasarpiryutaṃ līḍhvā pramadāśatam ṛcchati // (26.2) Par.?

kṛṣṇādhātrīphalarajaḥ svarasena subhāvitam / (27.1) Par.?

śarkarāmadhusarpirbhir līḍhvā yo 'nu payaḥ pibet // (27.2) Par.?

sa naro 'śītivarṣo 'pi yuveva parihṛṣyati / (28.1) Par.?

karṣaṃ madhukacūrṇasya ghṛtakṣaudrasamanvitam // (28.2) Par.?

payo'nupānaṃ yo lihyān nityavegaḥ sa nā bhavet / (29.1) Par.?

kulīraśṛṅgyā yaḥ kalkam āloḍya payasā pibet // (29.2) Par.?

sitāghṛtapayo'nnāśī sa nārīṣu vṛṣāyate / (30.1) Par.?

yaḥ payasyāṃ payaḥsiddhāṃ khāden madhughṛtānvitām // (30.2) Par.?

pibed bāṣkayaṇaṃ cānu kṣīraṃ na kṣayam eti saḥ / (31.1) Par.?

svayaṅguptekṣurakayor bījacūrṇaṃ saśarkaram // (31.2) Par.?

dhāroṣṇena naraḥ pītvā payasā rāsabhāyate / (32.1) Par.?

uccaṭācūrṇam apyevaṃ śatāvaryāśca yojayet // (32.2) Par.?

candraśubhraṃ dadhisaraṃ sasitāṣaṣṭikaudanam / (33.1) Par.?

paṭe sumārjitaṃ bhuktvā vṛddho 'pi taruṇāyate // (33.2) Par.?

śvadaṃṣṭrekṣuramāṣātmaguptābījaśatāvarīḥ / (34.1) Par.?

piban kṣīreṇa jīrṇo 'pi gacchati pramadāśatam // (34.2) Par.?

yat kiṃcin madhuraṃ snigdhaṃ bṛṃhaṇaṃ balavardhanam / (35.1) Par.?

manaso harṣaṇaṃ yacca tat sarvaṃ vṛṣyam ucyate // (35.2) Par.?

dravyairevaṃvidhaistasmād darpitaḥ pramadāṃ vrajet / (36.1) Par.?

ātmavegena codīrṇaḥ strīguṇaiśca praharṣitaḥ // (36.2) Par.?

sevyāḥ sarvendriyasukhā dharmakalpadrumāṅkurāḥ / (37.1) Par.?

viṣayātiśayāḥ pañca śarāḥ kusumadhanvanaḥ // (37.2) Par.?

iṣṭā hyekaikaśo 'pyarthā harṣaprītikarāḥ param / (38.1) Par.?

kiṃ punaḥ strīśarīre ye saṃghātena pratiṣṭhitāḥ // (38.2) Par.?

nāmāpi yasyā hṛdayotsavāya yāṃ paśyatāṃ tṛptiranāptapūrvā / (39.1) Par.?

sarvendriyākarṣaṇapāśabhūtā kāntānuvṛttivratadīkṣitā yā // (39.2) Par.?

kalāvilāsāṅgavayovibhūṣā śuciḥ salajjā rahasi pragalbhā / (40.1) Par.?

priyaṃvadā tulyamanaḥśayā yā sā strī vṛṣyatvāya paraṃ narasya // (40.2) Par.?

ācarecca sakalāṃ raticaryāṃ kāmasūtravihitām anavadyām / (41.1) Par.?

deśakālabalaśaktyanurodhād vaidyatantrasamayoktyaviruddhām // (41.2) Par.?

abhyañjanodvartanasekagandhasrakcitravastrābharaṇaprakārāḥ / (42.1) Par.?

gāndharvakāvyādikathāpravīṇāḥ samasvabhāvā vaśagā vayasyāḥ // (42.2) Par.?

dīrghikā svabhavanāntaniviṣṭā padmareṇumadhumattavihaṅgā / (43.1) Par.?

nīlasānugirikūṭanitambe kānanāni purakaṇṭhagatāni // (43.2) Par.?

dṛṣṭisukhā vividhā tarujātiḥ śrotrasukhaḥ kalakokilanādaḥ / (44.1) Par.?

aṅgasukhartuvaśena vibhūṣā cittasukhaḥ sakalaḥ parivāraḥ // (44.2) Par.?

tāmbūlam acchamadirā kāntā kāntā niśā śaśāṅkāṅkā / (45.1) Par.?

yad yacca kiṃcid iṣṭaṃ manaso vājīkaraṃ tat tat // (45.2) Par.?

madhu mukham iva sotpalaṃ priyāyāḥ kalaraṇanā parivādinī priyeva / (46.1) Par.?

kusumacayamanoramā ca śayyā kisalayinī latikeva puṣpitāgrā // (46.2) Par.?

deśe śarīre ca na kācid artirartheṣu nālpo 'pi manovidhānaḥ / (47.1) Par.?

vājīkarāḥ saṃnihitāśca yogāḥ kāmasya kāmaṃ paripūrayanti // (47.2) Par.?

mustā parpaṭakaṃ jvare tṛṣi jalaṃ mṛdbhṛṣṭaloṣṭodbhavaṃ lājāśchardiṣu vastijeṣu girijaṃ meheṣu dhātrīniśe / (48.1) Par.?

pāṇḍau śreṣṭham ayo 'bhayānilakaphe plīhāmaye pippalī saṃdhāne kṛmijā viṣe śukatarur medo'nile gugguluḥ // (48.2) Par.?

vṛṣo 'srapitte kuṭajo 'tisāre bhallātako 'rśaḥsu gareṣu hema / (49.1) Par.?

sthūleṣu tārkṣyaṃ kṛmiṣu kṛmighnaṃ śoṣe surā chāgapayo 'tha māṃsam // (49.2) Par.?

akṣyāmayeṣu triphalā guḍūcī vātāsraroge mathitaṃ grahaṇyām / (50.1) Par.?

kuṣṭheṣu sevyaḥ khadirasya sāraḥ sarveṣu rogeṣu śilāhvayaṃ ca // (50.2) Par.?

unmādaṃ ghṛtam anavaṃ śokaṃ madyaṃ vyapasmṛtiṃ brāhmī / (51.1) Par.?

nidrānāśaṃ kṣīraṃ jayati rasālā pratiśyāyam // (51.2) Par.?

māṃsaṃ kārśyaṃ laśunaḥ prabhañjanaṃ stabdhagātratāṃ svedaḥ / (52.1) Par.?

guḍamañjaryāḥ khapuro nasyāt skandhāṃsabāhurujam // (52.2) Par.?

navanītakhaṇḍamarditam auṣṭraṃ mūtraṃ payaśca hantyudaram / (53.1) Par.?

nasyaṃ mūrdhavikārān vidradhim acirotthitam asravisrāvaḥ // (53.2) Par.?

nasyaṃ kavaḍo mukhajān nasyāñjanatarpaṇāni netrarujaḥ / (54.1) Par.?

vṛddhasya kṣīraghṛte mūrchāṃ śītāmbumārutacchāyāḥ // (54.2) Par.?

samaśuktārdrakamātrā mande vahnau śrame surā snānam / (55.1) Par.?

duḥkhasahatve sthairye vyāyāmo gokṣurur hitaḥ kṛcchre // (55.2) Par.?

kāse nidigdhikā pārśvaśūle puṣkarajā jaṭā / (56.1) Par.?

vayasaḥ sthāpane dhātrī triphalā guggulur vraṇe // (56.2) Par.?

vastir vātavikārān paittān rekaḥ kaphodbhavān vamanam / (57.1) Par.?

kṣaudraṃ jayati balāsaṃ sarpiḥ pittaṃ samīraṇaṃ tailam // (57.2) Par.?

ityagryaṃ yat proktaṃ rogāṇām auṣadhaṃ śamāyālam / (58.1) Par.?

tad deśakālabalato vikalpanīyaṃ yathāyogam // (58.2) Par.?

ityātreyād āgamayyārthasūtraṃ tatsūktānāṃ peśalānām atṛptaḥ / (59.1) Par.?

bheḍādīnāṃ saṃmato bhaktinamraḥ papracchedaṃ saṃśayāno 'gniveśaḥ // (59.2) Par.?

dṛśyante bhagavan kecid ātmavanto 'pi rogiṇaḥ / (60.1) Par.?

dravyopasthātṛsampannā vṛddhavaidyamatānugāḥ // (60.2) Par.?

kṣīyamāṇāmayaprāṇā viparītāstathāpare / (61.1) Par.?

hitāhitavibhāgasya phalaṃ tasmād aniścitam // (61.2) Par.?

kiṃ śāsti śāstram asmin iti kalpayato 'gniveśamukhyasya / (62.1) Par.?

śiṣyagaṇasya punarvasurācakhyau kārtsnyatastattvam // (62.2) Par.?

na cikitsācikitsā ca tulyā bhavitum arhati / (63.1) Par.?

vināpi kriyayā svāsthyaṃ gacchatāṃ ṣoḍaśāṃśayā // (63.2) Par.?

ātaṅkapaṅkamagnānāṃ hastālambo bhiṣagjitam / (64.1) Par.?

jīvitaṃ mriyamāṇānāṃ sarveṣām eva nauṣadhāt // (64.2) Par.?

na hyupāyam apekṣante sarve rogā na cānyathā / (65.1) Par.?

upāyasādhyāḥ sidhyanti nāhetur hetumān yataḥ // (65.2) Par.?

yad uktaṃ sarvasaṃpattiyuktayāpi cikitsayā / (66.1) Par.?

mṛtyur bhavati tan naivaṃ nopāye 'styanupāyatā // (66.2) Par.?

api copāyayuktasya dhīmato jātucit kriyā / (67.1) Par.?

na sidhyed daivavaiguṇyān na tviyaṃ ṣoḍaśātmikā // (67.2) Par.?

kasyāsiddho 'gnitoyādiḥ svedastambhādikarmaṇi / (68.1) Par.?

na prīṇanaṃ karṣaṇaṃ vā kasya kṣīraṃ gavedhukam // (68.2) Par.?

kasya māṣātmaguptādau vṛṣyatve nāsti niścayaḥ / (69.1) Par.?

viṇmūtrakaraṇākṣepau kasya saṃśayitau yave // (69.2) Par.?

viṣaṃ kasya jarāṃ yāti mantratantravivarjitam / (70.1) Par.?

kaḥ prāptaḥ kalyatāṃ pathyād ṛte rohiṇikādiṣu // (70.2) Par.?

api cākālamaraṇaṃ sarvasiddhāntaniścitam / (71.1) Par.?

mahatāpi prayatnena vāryatāṃ katham anyathā // (71.2) Par.?

candanādyapi dāhādau rūḍham āgamapūrvakam / (72.1) Par.?

śāstrād eva gataṃ siddhiṃ jvare laṅghanabṛṃhaṇam // (72.2) Par.?

catuṣpādguṇasampanne samyag ālocya yojite / (73.1) Par.?

mā kṛthā vyādhinirghātaṃ vicikitsāṃ cikitsite // (73.2) Par.?

etaddhi mṛtyupāśānām akāṇḍe chedanaṃ dṛḍham / (74.1) Par.?

rogottrāsitabhītānāṃ rakṣāsūtram asūtrakam // (74.2) Par.?

etat tad amṛtaṃ sākṣājjagadāyāsavarjitam / (75.1) Par.?

yāti hālāhalatvaṃ tu sadyo durbhājanasthitam // (75.2) Par.?

ajñātaśāstrasadbhāvāñchāstramātraparāyaṇān / (76.1) Par.?

tyajed dūrād bhiṣakpāśān pāśān vaivasvatān iva // (76.2) Par.?

bhiṣajāṃ sādhuvṛttānāṃ bhadram āgamaśālinām / (77.1) Par.?

abhyastakarmaṇāṃ bhadraṃ bhadraṃ bhadrābhilāṣiṇām // (77.2) Par.?

iti tantraguṇair yuktaṃ tantradoṣair vivarjitam / (78.1) Par.?

cikitsāśāstram akhilaṃ vyāpya yat paritaḥ sthitam // (78.2) Par.?

vipulāmalavijñānamahāmunimatānugam / (79.1) Par.?

mahāsāgaragambhīrasaṃgrahārthopalakṣaṇam // (79.2) Par.?

aṣṭāṅgavaidyakamahodadhimanthanena yo 'ṣṭāṅgasaṃgrahamahāmṛtarāśirāptaḥ / (80.1) Par.?

tasmād analpaphalam alpasamudyamānāṃ prītyartham etad uditaṃ pṛthag eva tantram // (80.2) Par.?

idam āgamasiddhatvāt pratyakṣaphaladarśanāt / (81.1) Par.?

mantravat samprayoktavyaṃ na mīmāṃsyaṃ kathañcana // (81.2) Par.?

dīrghajīvitam ārogyaṃ dharmam arthaṃ sukhaṃ yaśaḥ / (82.1) Par.?

pāṭhāvabodhānuṣṭhānairadhigacchatyato dhruvam // (82.2) Par.?

etat paṭhan saṃgrahabodhaśaktaḥ svabhyastakarmā bhiṣag aprakampyaḥ / (83.1) Par.?

ākampayatyanyaviśālatantrakṛtābhiyogān yadi tan na citram // (83.2) Par.?

yadi carakam adhīte taddhruvaṃ suśrutādipraṇigaditagadānāṃ nāmamātre 'pi bāhyaḥ / (84.1) Par.?

atha carakavihīnaḥ prakriyāyām aklinnaḥ kim iva khalu karotu vyādhitānāṃ varākaḥ // (84.2) Par.?

abhiniveśavaśād abhiyujyate subhaṇite 'pi na yo dṛḍhamūḍhakaḥ / (85.1) Par.?

paṭhatu yatnaparaḥ puruṣāyuṣaṃ sa khalu vaidyakam ādyam anirvidaḥ // (85.2) Par.?

vāte pitte śleṣmaśāntau ca pathyaṃ tailaṃ sarpir mākṣikaṃ ca krameṇa / (86.1) Par.?

etad brahmā bhāṣatāṃ brahmajo vā kā nirmantre vaktṛbhedoktiśaktiḥ // (86.2) Par.?

abhidhātṛvaśāt kiṃ vā dravyaśaktir viśiṣyate / (87.1) Par.?

ato matsaram utsṛjya mādhyasthyam avalambyatām // (87.2) Par.?

ṛṣipraṇīte prītiścen muktvā carakasuśrutau / (88.1) Par.?

bheḍādyāḥ kiṃ na paṭhyante tasmād grāhyaṃ subhāṣitam // (88.2) Par.?

hṛdayam iva hṛdayam etat sarvāyurvedavāṅmayapayodheḥ / (89.1) Par.?

kṛtvā yacchubham āptaṃ śubham astu paraṃ tato jagataḥ // (89.2) Par.?

Duration=0.27734804153442 secs.