Texts

Help

Select a text:
Bibliography

Select a chapter:
(no revisions)

Associated topic(s): Buddha's life

Show parallels Show headlines
Use dependency labeler

Chapter id: 6780

Click on a sentence to show its analysis
Keep the mouse pointer over a lemma to show its meanings.

tato visṛjyāśrumukhaṃ rudantaṃ chandaṃ vanacchandatayā nirāsthaḥ / (1.1) Par.?

sarvārthasiddho vapuṣābhibhūya tamāśramaṃ siddha iva prapede // (1.2) Par.?

sa rājasūnurmṛgarājagāmī mṛgājiraṃ tanmṛgavatpraviṣṭaḥ / (2.1) Par.?

lakṣmīviyukto 'pi śarīralakṣmyā cakṣūṃṣi sarvāśramiṇāṃ jahāra // (2.2) Par.?

sthitā hi hastasthayugāstathaiva kautūhalāccakradharāḥ sadārāḥ / (3.1) Par.?

tamindrakalpaṃ dadṛśurna jagmurdhuryā ivārdhāvanataiḥ śirobhiḥ // (3.2) Par.?

viprāśca gatvā bahiridhmahetoḥ prāptāḥ samitpuṣpapavitrahastāḥ / (4.1) Par.?

tapaḥpradhānāḥ kṛtabuddhayo 'pi taṃ draṣṭumīyurna maṭhānabhīyuḥ // (4.2) Par.?

hṛṣṭāśca kekā mumucurmayūrā dṛṣṭvāmbudaṃ nīlamivonnamantaḥ / (5.1) Par.?

śaṣpāṇi hitvābhimukhāśca tasthurmṛgāścalākṣā mṛgacāriṇaśca // (5.2) Par.?

dṛṣṭvā tamikṣvākukulapradīpaṃ jvalantamudyantamivāṃśumantam / (6.1) Par.?

kṛte 'pi dohe janitapramodāḥ prasusruvurhomaduhaśca gāvaḥ // (6.2) Par.?

kaścidvasūnāmayamaṣṭamaḥ syātsyād aśvinor anyataraścyuto vā / (7.1) Par.?

ucceruruccairiti tatra vācastaddarśanādvismayajā munīnām // (7.2) Par.?

lekharṣabhasyeva vapurdvitīyaṃ dhāmeva lokasya carācarasya / (8.1) Par.?

sa dyotayāmāsa vanaṃ hi kṛtsnaṃ yadṛcchayā sūrya ivāvatīrṇaḥ // (8.2) Par.?

tataḥ sa tairāśramibhiryathāvadabhyarcitaścopanimantritaśca / (9.1) Par.?

pratyarcayāṃ dharmabhṛto babhūva svareṇa sāmbho'mbudharopamena // (9.2) Par.?

kīrṇaṃ tathā puṇyakṛtā janena svargābhikāmena vimokṣakāmaḥ / (10.1) Par.?

tamāśramaṃ so 'nucacāra dhīrastapāṃsi citrāṇi nirīkṣamāṇaḥ // (10.2) Par.?

tapovikārāṃśca nirīkṣya saumyastapovane tatra tapodhanānām / (11.1) Par.?

tapasvinaṃ kaṃcidanuvrajantaṃ tattvaṃ vijijñāsuridaṃ babhāṣe // (11.2) Par.?

tatpūrvamadyāśramadarśanaṃ me yasmādimaṃ dharmavidhiṃ na jāne / (12.1) Par.?

tasmādbhavānarhati bhāṣituṃ me yo niścayo yatprati vaḥ pravṛttaḥ // (12.2) Par.?

tato dvijātiḥ sa tapovihāraḥ śākyarṣabhāyarṣabhavikramāya / (13.1) Par.?

krameṇa tasmai kathayāṃcakāra tapoviśeṣāṃstapasaḥ phalaṃ ca // (13.2) Par.?

agrāmyamannaṃ salile prarūḍhaṃ parṇāni toyaṃ phalamūlameva / (14.1) Par.?

yathāgamaṃ vṛttiriyaṃ munīnāṃ bhinnāstu te te tapasāṃ vikalpāḥ // (14.2) Par.?

uñchena jīvanti khagā ivānye tṛṇāni kecinmṛgavaccaranti / (15.1) Par.?

kecidbhujaṅgaiḥ saha vartayanti valmīkabhūtā vanamārutena // (15.2) Par.?

aśmaprayatnārjitavṛttayo 'nye kecitsvadantāpahatānnabhakṣāḥ / (16.1) Par.?

kṛtvā parārthaṃ śrapaṇaṃ tathānye kurvanti kāryaṃ yadi śeṣamasti // (16.2) Par.?

kecijjalaklinnajaṭākalāpā dviḥ pāvakaṃ juhvati mantrapūrvam / (17.1) Par.?

mīnaiḥ samaṃ kecid apo vigāhya vasanti kūrmollikhitaiḥ śarīraiḥ // (17.2) Par.?

evaṃvidhaiḥ kālacitaistapobhiḥ parairdivaṃ yāntyaparairnṛlokam / (18.1) Par.?

duḥkhena mārgeṇa sukhaṃ hyupaiti sukhaṃ hi dharmasya vadanti mūlam // (18.2) Par.?

ityevamādi dvipadendravatsaḥ śrutvā vacastasya tapodhanasya / (19.1) Par.?

adṛṣṭatattvo 'pi na saṃtutoṣa śanairidaṃ cātmagataṃ babhāṣe // (19.2) Par.?

duḥkhātmakaṃ naikavidhaṃ tapaśca svargapradhānaṃ tapasaḥ phalaṃ ca / (20.1) Par.?

lokāśca sarve pariṇāmavantaḥ svalpe śramaḥ khalvayamāśramāṇām // (20.2) Par.?

priyāṃśca bandhūnviṣayāṃśca hitvā ye svargahetorniyamaṃ caranti / (21.1) Par.?

te viprayuktāḥ khalu gantukāmā mahattaraṃ bandhanameva bhūyaḥ // (21.2) Par.?

kāyaklamairyaśca tapo'bhidhānaiḥ pravṛttim ākāṅkṣati kāmahetoḥ / (22.1) Par.?

saṃsāradoṣān aparīkṣamāṇo duḥkhena so 'nvicchati duḥkhameva // (22.2) Par.?

trāsaśca nityaṃ maraṇātprajānāṃ yatnena cecchanti punaḥprasūtim / (23.1) Par.?

satyāṃ pravṛttau niyataśca mṛtyustatraiva magnā yata eva bhītāḥ // (23.2) Par.?

ihārthameke praviśanti khedaṃ svargārthamanye śramamāpnuvanti / (24.1) Par.?

sukhārthamāśākṛpaṇo 'kṛtārthaḥ patatyanarthe khalu jīvalokaḥ // (24.2) Par.?

na khalvayaṃ garhita eva yatno yo hīnam utsṛjya viśeṣagāmī / (25.1) Par.?

prājñaiḥ samānena pariśrameṇa kāryaṃ tu tadyatra punarna kāryam // (25.2) Par.?

śarīrapīḍā tu yadīha dharmaḥ sukhaṃ śarīrasya bhavatyadharmaḥ / (26.1) Par.?

dharmeṇa cāpnoti sukhaṃ paratra tasmādadharmaṃ phalatīha dharmaḥ // (26.2) Par.?

yataḥ śarīraṃ manaso vaśena pravartate cāpi nivartate ca / (27.1) Par.?

yukto damaścetasa eva tasmāccittādṛte kāṣṭhasamaṃ śarīram // (27.2) Par.?

āhāraśuddhyā yadi puṇyamiṣṭaṃ tasmānmṛgānāmapi puṇyamasti / (28.1) Par.?

ye cāpi bāhyāḥ puruṣāḥ phalebhyo bhāgyāparādhena parāṅmukhārthāḥ // (28.2) Par.?

duḥkhe 'bhisaṃdhistvatha puṇyahetuḥ sukhe 'pi kāryo nanu so 'bhisaṃdhiḥ / (29.1) Par.?

atha pramāṇaṃ na sukhe 'bhisaṃdhirduḥkhe pramāṇaṃ nanu nābhisaṃdhiḥ // (29.2) Par.?

tathaiva ye karmaviśuddhihetoḥ spṛśanty apas tīrthamiti pravṛttāḥ / (30.1) Par.?

tatrāpi toṣo hṛdi kevalo 'yaṃ na pāvayiṣyanti hi pāpamāpaḥ // (30.2) Par.?

spṛṣṭaṃ hi yadyadguṇavadbhirambhastattatpṛthivyāṃ yadi tīrthamiṣṭam / (31.1) Par.?

tasmādguṇāneva paraimi tīrthamāpastu niḥsaṃśayamāpa eva // (31.2) Par.?

iti sma tattadbahuyuktiyuktaṃ jagāda cāstaṃ ca yayau vivasvān / (32.1) Par.?

tato havirdhūmavivarṇavṛkṣaṃ tapaḥpraśāntaṃ sa vanaṃ viveśa // (32.2) Par.?

abhyuddhṛtaprajvalitāgnihotraṃ kṛtābhiṣekarṣijanāvakīrṇam / (33.1) Par.?

jāpyasvanākūjitadevakoṣṭhaṃ dharmasya karmāntamiva pravṛttam // (33.2) Par.?

kāścinniśāstatra niśākarābhaḥ parīkṣamāṇaśca tapāṃsyuvāsa / (34.1) Par.?

sarvaṃ parikṣepya tapaśca matvā tasmāttapaḥkṣetratalājjagāma // (34.2) Par.?

anvavrajannāśramiṇastatastaṃ tadrūpamāhātmyagatairmanobhiḥ / (35.1) Par.?

deśādanāryair abhibhūyamānānmaharṣayo dharmam ivāpayāntam // (35.2) Par.?

tato jaṭāvalkalacīrakhelāṃstapodhanāṃścaiva sa tāndadarśa / (36.1) Par.?

tapāṃsi caiṣāmanurudhyamānastasthau śive śrīmati vṛkṣamūle // (36.2) Par.?

athopasṛtyāśramavāsinastaṃ manuṣyavaryaṃ parivārya tasthuḥ / (37.1) Par.?

vṛddhaśca teṣāṃ bahumānapūrvaṃ kalena sāmnā giramityuvāca // (37.2) Par.?

tvayyāgate pūrṇa ivāśramo 'bhūt sampadyate śūnya eva prayāte / (38.1) Par.?

tasmādimaṃ nārhasi tāta hātuṃ jijīviṣordehamiveṣṭamāyuḥ // (38.2) Par.?

brahmarṣirājarṣisurarṣijuṣṭaḥ puṇyaḥ samīpe himavān hi śailaḥ / (39.1) Par.?

tapāṃsi tānyeva tapodhanānāṃ yatsaṃnikarṣādbahulībhavanti // (39.2) Par.?

tīrthāni puṇyānyabhitastathaiva sopānabhūtāni nabhastalasya / (40.1) Par.?

juṣṭāni dharmātmabhirātmavadbhirdevarṣibhiścaiva maharṣibhiśca // (40.2) Par.?

itaśca bhūyaḥ kṣamamuttaraiva diksevituṃ dharmaviśeṣahetoḥ / (41.1) Par.?

na tu kṣamaṃ dakṣiṇato budhena padaṃ bhavedekamapi prayātum // (41.2) Par.?

tapovane 'sminnatha niṣkriyo vā saṃkīrṇadharmāpatito 'śucirvā / (42.1) Par.?

dṛṣṭastvayā yena na te vivatsā tadbrūhi yāvadrucito 'stu vāsaḥ // (42.2) Par.?

ime hi vāñchanti tapaḥsahāyaṃ taponidhānapratimaṃ bhavantam / (43.1) Par.?

vāsastvayā hīndrasamena sārdhaṃ bṛhaspaterabhyudayāvahaḥ syāt // (43.2) Par.?

ityevamukte sa tapasvimadhye tapasvimukhyena manīṣimukhyaḥ / (44.1) Par.?

bhavapraṇāśāya kṛtapratijñaḥ svaṃ bhāvam antargatam ācacakṣe // (44.2) Par.?

ṛjvātmanāṃ dharmabhṛtāṃ munīnām iṣṭātithitvāt svajanopamānām / (45.1) Par.?

evaṃvidhairmā prati bhāvajātaiḥ prītiḥ parā me janitaśca mānaḥ // (45.2) Par.?

snigdhābhirābhirhṛdayaṃgamābhiḥ samāsataḥ snāta ivāsmi vāgbhiḥ / (46.1) Par.?

ratiśca me dharmanavagrahasya vispanditā saṃprati bhūya eva // (46.2) Par.?

evaṃ pravṛttān bhavataḥ śaraṇyānatīva saṃdarśitapakṣapātān / (47.1) Par.?

yāsyāmi hitveti mamāpi duḥkhaṃ yathaiva bandhūṃstyajatastathaiva // (47.2) Par.?

svargāya yuṣmākamayaṃ tu dharmo mamābhilāṣastvapunarbhavāya / (48.1) Par.?

asminvane yena na me vivatsā bhinnaḥ pravṛttyā hi nivṛttidharmaḥ // (48.2) Par.?

tannāratirme na parāpacāro vanādito yena parivrajāmi / (49.1) Par.?

dharme sthitāḥ pūrvayugānurūpe sarve bhavanto hi maharṣikalpāḥ // (49.2) Par.?

tato vacaḥ sūnṛtamarthavacca suślakṣṇam ojasvi ca garvitaṃ ca / (50.1) Par.?

śrutvā kumārasya tapasvinaste viśeṣayuktaṃ bahumānamīyuḥ // (50.2) Par.?

kaściddvijastatra tu bhasmaśāyī prāṃśuḥ śikhī dāravacīravāsāḥ / (51.1) Par.?

āpiṅgalākṣastanudīrghaghoṇaḥ kuṇḍaikahasto giramityuvāca // (51.2) Par.?

dhīmannudāraḥ khalu niścayaste yastvaṃ yuvā janmani dṛṣṭadoṣaḥ / (52.1) Par.?

svargāpavargau hi vicārya samyagyasyāpavarge matirasti so 'sti // (52.2) Par.?

yajñaistapobhirniyamaiśca taistaiḥ svargaṃ yiyāsanti hi rāgavantaḥ / (53.1) Par.?

rāgeṇa sārdhaṃ ripuṇeva yuddhvā mokṣaṃ parīpsanti tu sattvavantaḥ // (53.2) Par.?

tadbuddhireṣā yadi niścitā te tūrṇaṃ bhavān gacchatu vindhyakoṣṭham / (54.1) Par.?

asau munistatra vasatyarāḍo yo naiṣṭhike śreyasi labdhacakṣuḥ // (54.2) Par.?

tasmādbhavāñchroṣyati tattvamārgaṃ satyāṃ rucau sampratipatsyate ca / (55.1) Par.?

yathā tu paśyāmi matistathaiṣā tasyāpi yāsyatyavadhūya buddhim // (55.2) Par.?

spaṣṭoccaghoṇaṃ vipulāyatākṣaṃ tāmrādharauṣṭhaṃ sitatīkṣṇadaṃṣṭram / (56.1) Par.?

idaṃ hi vaktuṃ tanuraktajihvaṃ jñeyārṇavaṃ pāsyati kṛtsnameva // (56.2) Par.?

gambhīratā yā bhavatastvagādhā yā dīptatā yāni ca lakṣaṇāni / (57.1) Par.?

ācāryakaṃ prāpsyasi tatpṛthivyāṃ yannarṣibhiḥ pūrvayuge 'pyavāptam // (57.2) Par.?

paramamiti tato nṛpātmajastamṛṣijanaṃ pratinandya niryayau / (58.1) Par.?

vidhivadanuvidhāya te 'pi taṃ praviviśurāśramiṇastapovanam // (58.2) Par.?

iti buddhacarite mahākāvye tapovanapraveśo nāma saptamaḥ sargaḥ // (59.1) Par.?

Duration=0.30102896690369 secs.