Texts

buddho bhagavān satkṛto gurukṛto mānitaḥ pūjito rājabhī rājamātrair dhanibhiḥ pauraiḥ śreṣṭhibhiḥ sārthavāhair devair nāgair yakṣair asurair garuḍaiḥ kinnarair mahoragair iti devanāgayakṣāsuragaruḍakinnaramahoragābhyarcito buddho bhagavān jñāto mahāpuṇyo lābhī cīvarapiṇḍapātaśayanāsanaglānapratyayabhaiṣajyapariṣkārāṇāṃ saśrāvakasaṃgho magadheṣu janapadeṣu cārikāṃ caran gaṅgātīram anuprāptaḥ / (1.1) Par.?

tena khalu punaḥ samayena gaṅgātīrasya nātidūre stūpam avarugṇaṃ vātātapābhyāṃ pariśīrṇam bhikṣubhir dṛṣṭvā bhagavān pṛṣṭaḥ kasya bhagavann ayaṃ stūpa iti / (1.2) Par.?

bhagavān āha candano nāma pratyekabuddho babhūva tasyeti / (1.3) Par.?

bhikṣava ūcuḥ kuto bhagavaṃś candanasya pratyekabuddhasyotpattir nāmābhinirvṛttiś ceti / (1.4) Par.?

bhagavān āha icchatha yūyaṃ bhikṣavaḥ śrotuṃ yathā candanasya pratyekabuddhasyotpattir nāmābhinirvṛttiś ca evaṃ bhadanta / (1.5) Par.?

tena hi bhikṣavaḥ śṛṇuta sādhu ca suṣṭhu ca manasi kuruta bhāṣiṣye // (1.6) Par.?

bhūtapūrvaṃ bhikṣavo 'tīte 'dhvani vārāṇasyāṃ nagaryāṃ brahmadatto nāma rājā rājyaṃ kārayati ṛddhaṃ ca sphītaṃ ca kṣemaṃ ca subhikṣaṃ ca ākīrṇabahujanamanuṣyaṃ ca praśāntakalikalahaḍimbaḍamaraṃ taskararogāpagataṃ śālīkṣugomahiṣīsampannam / (2.1) Par.?

dhārmiko dharmarājo dharmeṇa rājyaṃ kārayati / (2.2) Par.?

so 'putraḥ putrābhinandī śivavaruṇakuberaśakrabrahmādīn anyāṃś ca devatāviśeṣān āyācate tadyathā ārāmadevatā vanadevatāś catvaradevatāḥ śṛṅgāṭakadevatā balipratigrāhikā devatāḥ / (2.3) Par.?

sahajāḥ sahadhārmikā nityānubaddhā api devatā āyācate / (2.4) Par.?

asti caiṣa loke pravādo yadāyācanahetoḥ putrā jāyante duhitaraś ca / (2.5) Par.?

tac ca naivam / (2.6) Par.?

yady evam abhaviṣyad ekaikasya putrasahasram abhaviṣyat tadyathā rājñaś cakravartinaḥ / (2.7) Par.?

api tu trayāṇāṃ sthānānāṃ saṃmukhībhāvāt putrā jāyante duhitaraś ca / (2.8) Par.?

katameṣāṃ trayāṇām / (2.9) Par.?

mātāpitarau raktau bhavataḥ saṃnipatitau mātā ca kalyā bhavati ṛtumatī gandharvaś ca pratyupasthito bhavati / (2.10) Par.?

eṣāṃ trayāṇāṃ sthānānāṃ saṃmukhībhāvāt putrā jāyante duhitaraś ca / (2.11) Par.?

sa caivam āyācanaparas tiṣṭhati / (2.12) Par.?

tasya codyāne mahāpadmini tatra padmam atipramāṇaṃ jātam / (2.13) Par.?

tad divase divase vardhate na tu phullati / (2.14) Par.?

tata ārāmikeṇa rājñe niveditam / (2.15) Par.?

rājñā uktaḥ parīkṣyatām etat padmam iti / (2.16) Par.?

yāvad apareṇa samayena sūryodaye tat padmaṃ vikasitam / (2.17) Par.?

tasya ca padmasya karṇikāyāṃ dārakaḥ paryaṅkaṃ baddhvāvasthitaḥ abhirūpo darśanīyaḥ prāsādiko gauraḥ kanakavarṇaś chatrākāraśirāḥ pralambabāhur vistīrṇalalāṭaḥ uccaghoṣaḥ saṃgatabhrūs tuṅganāsaḥ dvātriṃśatā mahāpuruṣalakṣaṇaiḥ samalaṃkṛtagātro 'śītyānuvyañjanair virājitagātraḥ / (2.18) Par.?

tasya mukhāt padmagandho vāti śarīrācca candanagandhaḥ / (2.19) Par.?

tata ārāmikeṇa rājñe niveditam / (2.20) Par.?

tato rājā sāmātyaḥ sāntaḥpuraś ca tad udyānaṃ gataḥ / (2.21) Par.?

sahadarśanāt tena dārakeṇa rājā saṃbhāṣitaḥ ehi tāta ahaṃ te 'putrasya putra iti / (2.22) Par.?

tato rājā hṛṣṭatuṣṭapramudita uvāca evam eva putra yathā vadasīti / (2.23) Par.?

tato rājā padminīm avagāhya taṃ dārakaṃ padmakarṇikāyāṃ gṛhītvā pāṇitale sthāpitavān / (2.24) Par.?

yatra yatra sa dārakaḥ pādau sthāpayati tatra tatra padmāni prādurbhavanti / (2.25) Par.?

tatas tasya candana iti nāma kṛtam // (2.26) Par.?

yadā candano dārako 'nupūrveṇa mahān saṃvṛttaḥ tadā nāgarai rājā vijñaptaḥ ihāsmākaṃ deva nagaraparva pratyupasthitam / (3.1) Par.?

tad arhati devaś candanaṃ kumāram utsraṣṭum / (3.2) Par.?

rājāha evam astv iti / (3.3) Par.?

tataś candanaḥ sarvālaṃkāravibhūṣito 'mātyaputraparivṛto vividhair vādyair vādyamānai rājakulād bahir upayāti nagaraparva pratyanubhavitum / (3.4) Par.?

tatra tasya gacchataḥ padavinyāse padavinyāse padmāni prādurbhavanti darśanīyāni manoramāṇi ca / (3.5) Par.?

tāny arkaraśmibhiḥ spṛṣṭamātrāṇi mlāyanti śuṣyanti // (3.6) Par.?

atha tasya śuddhasattvasya kalyāṇāśayasya pūrvabuddhāvaropitakuśalamūlasya taddarśanād yoniśo manasikāra utpannaḥ yathemāni padmāni utpannamātrāṇi śobhante arkaraśmiparitāpitāni mlāyanti śuṣyanti evam etad api śarīram iti / (4.1) Par.?

tasyaivaṃ cintayatas tulayata uparīkṣamāṇasya saptatriṃśad bodhipakṣyadharmā abhimukhībhūtāḥ / (4.2) Par.?

tena tasyaiva janakāyasya madhye sthitena pratyekabodhiḥ sākṣātkṛtā / (4.3) Par.?

yāvacchuddhāvāsakāyikair devais tasmai kāṣāyāṇy upanāmitāni / (4.4) Par.?

tāni ca prāvṛtya gaganatalam utpatitaḥ vicitrāṇi ca prātihāryāṇi kartuṃ pravṛttaḥ yaddarśanād rājñāmātyanaigamasahāyena mahān prasādaḥ pratilabdho vicitrāṇi ca kuśalamūlāny avaropitāni / (4.5) Par.?

bhagavān āha ataś candanasya pratyekabuddhasyotpattirnāmābhinirvṛttiś ceti // (4.6) Par.?

bhikṣavo bhagavantaṃ papracchuḥ kāni bhadanta candanena pratyekabuddhena karmāṇi kṛtāni yenāsya śarīraṃ sugandhi tīkṣṇendriyaś ceti / (5.1) Par.?

bhagavān āha kāśyape bhagavati pravrajito babhūva tatrānena keśanakhastūpe gandhāvasekaḥ kṛtaḥ puṣpāṇi cāvaropitāni pratyekabodhau cānena mārgo bhāvitaḥ / (5.2) Par.?

tasmāt tarhi bhikṣava evaṃ śikṣitavyam yacchāstāraṃ satkariṣyāmo gurukariṣyāmo mānayiṣyāmaḥ pūjayiṣyāmaḥ / (5.3) Par.?

śāstāraṃ satkṛtya gurukṛtya mānayitvā pūjayitvopaniśritya vihariṣyāmaḥ / (5.4) Par.?

ity evaṃ vo bhikṣavaḥ śikṣitavyam // (5.5) Par.?

idam avocad bhagavān / (6.1) Par.?

āttamanasas te bhikṣavo bhagavato bhāṣitam abhyanandan // (6.2) Par.?