Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 4640

Click on a sentence to show its analysis
Keep the mouse pointer over a lemma to show its meanings.

śrīmārkaṇḍeya uvāca / (1.1) Par.?

tato gacchettu rājendra maṇināgeśvaraṃ śubham / (1.2) Par.?

uttare narmadākūle sarvapāpakṣayaṃkaram / (1.3) Par.?

sthāpitaṃ maṇināgena lokānāṃ hitakāmyayā // (1.4) Par.?

yudhiṣṭhira uvāca / (2.1) Par.?

āśīviṣeṇa sarpeṇa īśvarastoṣitaḥ katham / (2.2) Par.?

kṣudrāḥ sarvasya lokasya bhayadā viṣaśālinaḥ // (2.3) Par.?

kathyatāṃ tāta me sarvaṃ pātakasyopaśāntidam / (3.1) Par.?

mama santāpajaṃ duḥkhaṃ duryodhanasamudbhavam // (3.2) Par.?

karṇabhīṣmodbhavaṃ raudraṃ duḥkhaṃ pāñcālisambhavam / (4.1) Par.?

tava vaktrāmbujaughena plāvitaṃ nirvṛtiṃ gataḥ // (4.2) Par.?

śrutvā tava mukhodgītāṃ kathāṃ vai pāpanāśinīm / (5.1) Par.?

ayuktamidamasmākaṃ dvija kleśo na śāmyati // (5.2) Par.?

athavā prāpsyate tāta vidyādānasya yatphalam / (6.1) Par.?

tatphalaṃ prāpyate nityaṃ kathāśravaṇato hareḥ // (6.2) Par.?

śrīmārkaṇḍeya uvāca / (7.1) Par.?

yathāyathā tvaṃ nṛpa bhāṣase ca tathātathā me sukhameti bhāratī / (7.2) Par.?

śaithilyatā vā jarayānvitasya tvatsauhṛdaṃ naśyati naiva tāta / (7.3) Par.?

śṛṇuṣva tasmātsaha bāndhavaiśca kathāmimāṃ pāpaharāṃ praśastām // (7.4) Par.?

kathayāmi yathāvṛttamitihāsaṃ purātanam // (8.1) Par.?

kathitaṃ pūrvato vṛttaiḥ pāramparyeṇa bhārata // (9.1) Par.?

dve bhārye kaśyapasyāstāṃ sarvalokeṣvanuttame / (10.1) Par.?

garutmantaṃ ca vinatāsūta kadrūr ahīnatha // (10.2) Par.?

saṃtoṣeṇa ca te tāta tiṣṭhataḥ kāśyape gṛhe / (11.1) Par.?

kadrūśca vinatā nāma hṛṣṭe ca vanite sadā // (11.2) Par.?

tābhyāṃ sārddhaṃ krīḍate ca kaśyapo 'pi prajāpatiḥ / (12.1) Par.?

tatastvekadine prāpte āśramasthā śubhānanā // (12.2) Par.?

uccaiḥśravaṃ hayaṃ dṛṣṭvā manovegasamanvitam / (13.1) Par.?

paśya paśya hi tanvaṅgī hayaṃ sarvatra pāṇḍuram // (13.2) Par.?

dhāvamānamaviśrāntaṃ javena manasopamam / (14.1) Par.?

taṃ dṛṣṭvā sahasā cāśvamīrṣyābhāvena cābravīt // (14.2) Par.?

kadrūr uvāca / (15.1) Par.?

brūhi bhadre sahasrāṃśor aśvaḥ kiṃvarṇako bhavet / (15.2) Par.?

ahaṃ bravīmi kṛṣṇo 'yaṃ tvaṃ kiṃ vadasi tadvada // (15.3) Par.?

vinatovāca / (16.1) Par.?

paśyase nanu netraiśca kṛṣṇaṃ śvetaṃ na paśyasi / (16.2) Par.?

asatyabhāṣaṇādbhadre yamalokaṃ gamiṣyasi // (16.3) Par.?

satyānṛte tu vacane paṇastava mamaiva tu / (17.1) Par.?

sahasraṃ caiva varṣāṇāṃ dāsyahaṃ tava mandire // (17.2) Par.?

asatyā yadi me vāṇī kṛṣṇa uccaiḥśravā yadi / (18.1) Par.?

tadāhaṃ tvadgṛhe dāsī bhavāmi sarpamātṛke // (18.2) Par.?

yadi uccaiḥśravāḥ śveto 'haṃ dāsī ca tavaiva tu / (19.1) Par.?

evaṃ parasparaṃ dvābhyāṃ saṃvādo 'yaṃ vyavardhata // (19.2) Par.?

āśrameṣu gatā bālā rātrau cintāparā sthitā / (20.1) Par.?

bandhuvargasya kathitaṃ samastaṃ tadviceṣṭitam // (20.2) Par.?

putrāṇāṃ kathitaṃ pārtha paṇaṃ caiva mayā kṛtam / (21.1) Par.?

hāhākāraḥ kṛtaḥ sarpaiḥ śrutvā mātrā paṇaṃ kṛtam // (21.2) Par.?

jātā dāsī na sandehaḥ śveto bhāskaravāhanaḥ / (22.1) Par.?

uccaiḥśravā hayaḥ śveto na kṛṣṇo vidyate kvacit // (22.2) Par.?

kadrūr uvāca / (23.1) Par.?

yathāhaṃ na bhave dāsī tatkāryaṃ ca vicintyatām / (23.2) Par.?

viśadhvaṃ romakūpeṣu hyuccaiḥśravahayasya tu // (23.3) Par.?

ekaṃ muhūrtamātraṃ tu yāvat kṛṣṇaḥ sa dṛśyate / (24.1) Par.?

kṣaṇamātreṇa caikena dāsī sā bhavate mama // (24.2) Par.?

dāsīṃ kṛtvā tu tāṃ tanvīṃ vinatāṃ satyagarvitām / (25.1) Par.?

tataḥ svasthānagāḥ sarve bhaviṣyatha yathāsukham // (25.2) Par.?

sarpā ūcuḥ / (26.1) Par.?

yathā tvaṃ jananī cāmba sarveṣāṃ bhuvi pūjitā / (26.2) Par.?

tathā sāpi viśeṣeṇa vañcitavyā na mātaraḥ // (26.3) Par.?

mātā ca pitṛbhāryā ca mātṛmātā pitāmahī / (27.1) Par.?

karmaṇā manasā vācā hitaṃ tāsāṃ samācaret // (27.2) Par.?

sā tatastena vākyena kruddhā kālānalopamā / (28.1) Par.?

mama vākyam akurvāṇā ye kecidbhuvi pannagāḥ // (28.2) Par.?

havyavāhamukhe sarve te yāsyanty avicāritam / (29.1) Par.?

mātustadvacanaṃ śrutvā sarve caiva bhujaṅgamāḥ // (29.2) Par.?

kecitpraviṣṭā romeṣu uccaiḥśravahayasya ca / (30.1) Par.?

naṣṭāḥ kecid daśadiśaṃ kadrūśāpabhayāt tataḥ // (30.2) Par.?

kecidgaṅgājale naṣṭāḥ kecin naṣṭāḥ sarasvatīm / (31.1) Par.?

kecinmahodadhau līnāḥ praviṣṭā vindhyakandare // (31.2) Par.?

āśritya narmadātoye maṇināgottamo nṛpa / (32.1) Par.?

tapaścacāra vipulamuttare narmadātaṭe // (32.2) Par.?

mātṛśāpabhayātpārtha dhyāyate kāmanāśanam / (33.1) Par.?

acchedyamapratarkyaṃ ca vināśotpattivarjitam // (33.2) Par.?

vāyubhakṣaḥ śataṃ sāgraṃ tadardhaṃ ravivīkṣakaḥ / (34.1) Par.?

evaṃ dhyānaratasyaiva pratyakṣastripurāntakaḥ // (34.2) Par.?

sādhu sādhu mahābhāga sattvavāṃstu bhujaṃgama / (35.1) Par.?

tvayā bhaktyā gṛhīto 'haṃ prītaste hyurageśvara / (35.2) Par.?

varaṃ yācaya me kṣipraṃ yaste manasi vartate // (35.3) Par.?

maṇināga uvāca / (36.1) Par.?

mātṛśāpabhayānnātha kliṣṭo 'haṃ narmadātaṭe / (36.2) Par.?

tvatprasādena me nātha mātṛśāpo bhavedvṛthā // (36.3) Par.?

īśvara uvāca / (37.1) Par.?

havyavāhamukhaṃ vatsa na prāpsyasi mamājñayā / (37.2) Par.?

mama loke nivāsaśca tava putra bhaviṣyati // (37.3) Par.?

maṇināga uvāca / (38.1) Par.?

atra sthāne mahādeva sthīyatāmaṃśabhāgataḥ / (38.2) Par.?

sahasrāṃśena bhāgena sthīyatāṃ narmadājale / (38.3) Par.?

upakārāya lokānāṃ mama nāmnaiva śaṅkara // (38.4) Par.?

īśvara uvāca / (39.1) Par.?

sthāpayasva paraṃ liṅgam ājñayā mama pannaga / (39.2) Par.?

ityuktvāntarhito devo jagāma hyumayā saha // (39.3) Par.?

mārkaṇḍeya uvāca / (40.1) Par.?

tatra tīrthe tu ye gatvā śuciprayatamānasāḥ / (40.2) Par.?

pañcamyāṃ vā caturdaśyāmaṣṭamyāṃ śuklakṛṣṇayoḥ // (40.3) Par.?

arcayanti sadā pārtha nopasarpanti te yamam / (41.1) Par.?

dadhnā ca madhunā caiva ghṛtena kṣīrayogataḥ // (41.2) Par.?

snāpayanti virūpākṣamumādehārdhadhāriṇam / (42.1) Par.?

kāmāṅgadahanaṃ devamaghāsuraniṣūdanam // (42.2) Par.?

snāpyamānaṃ ca ye bhaktvā paśyanti parameśvaram / (43.1) Par.?

te yānti ca pare loke sarvapāpavivarjitaiḥ // (43.2) Par.?

śrāddhaṃ preteṣu ye pārtha cāṣṭamyāṃ pañcamīṣu ca / (44.1) Par.?

brāhmaṇaiśca sadā yogyair vedapāṭhakacintakaiḥ // (44.2) Par.?

svadāranirataiḥ ślakṣṇaiḥ paradāravivarjitaiḥ / (45.1) Par.?

ṣaṭkarmaniratais tāta śūdrapreṣaṇavarjitaiḥ // (45.2) Par.?

khañjāśca dardurāḥ ṣaṇḍhā vārddhuṣyāśca kṛṣīvalāḥ / (46.1) Par.?

bhinnavṛttikarāḥ putra niyojyā na kadācana // (46.2) Par.?

vṛṣalīmandire yasya mahiṣīṃ yastu pālayet / (47.1) Par.?

sa vipro dūratastyājyo vrate śrāddhe narādhipa // (47.2) Par.?

kāṇāṣṭuṃṭāśca maṇṭāśca vedapāṭhavivarjitāḥ / (48.1) Par.?

na te pūjyā dvijāḥ pārtha maṇināgeśvare śubhe // (48.2) Par.?

yadīcchedūrdhvagamanamātmanaḥ pitṛbhiḥ saha / (49.1) Par.?

sarvāṅgarucirāṃ dhenuṃ yo dadyādagrajanmane // (49.2) Par.?

sa yāti paramaṃ lokaṃ yāvadābhūtasamplavam / (50.1) Par.?

tataḥ svargāccyutaḥ so 'pi jāyate vimale kule // (50.2) Par.?

ye paśyanti paraṃ bhaktyā maṇināgeśvaraṃ nṛpa / (51.1) Par.?

na teṣāṃ jāyate vaṃśe pannagānāṃ bhayaṃ nṛpa // (51.2) Par.?

pannagaḥ śaṅkate teṣāṃ maṇināgapradarśanāt / (52.1) Par.?

sauparṇarūpiṇaste vai dṛśyante nāgamaṇḍale // (52.2) Par.?

phalāni caiva dānānāṃ śṛṇuṣvātha nṛpottama / (53.1) Par.?

annaṃ saṃskārasaṃyuktaṃ ye dadante narottamāḥ // (53.2) Par.?

toyaṃ śayyāṃ tathā chatraṃ kanyāṃ dāsīṃ subhāṣiṇīm / (54.1) Par.?

pātre deyaṃ yato rājan yadīcchecchreya ātmanaḥ // (54.2) Par.?

surabhīṇi ca puṣpāṇi gandhavastrāṇi dāpayet / (55.1) Par.?

dīpaṃ dhānyaṃ gṛhaṃ śubhraṃ sarvopaskarasaṃyutam // (55.2) Par.?

ye dadante paraṃ bhaktyā te vrajanti triviṣṭapam / (56.1) Par.?

maṇināge nṛpaśreṣṭha yacca dānaṃ pradīyate // (56.2) Par.?

tasya dānasya bhāvena svarge vāso bhaveddhruvam / (57.1) Par.?

pātakāni pralīyante āmapātre yathā jalam // (57.2) Par.?

narmadātoyasaṃsiddhaṃ bhojyaṃ vipre dadāti yaḥ / (58.1) Par.?

so 'pi pāpairvinirmuktaḥ krīḍate daivataiḥ saha // (58.2) Par.?

tataḥ svargacyutānāṃ hi lakṣaṇaṃ pravadāmyaham / (59.1) Par.?

dīrghāyuṣo jīvaputrā dhanavantaḥ suśobhanāḥ // (59.2) Par.?

sarvavyādhivinirmuktāḥ sutabhṛtyaiḥ samanvitāḥ / (60.1) Par.?

tyāgino bhogasaṃyuktā dharmākhyānaratāḥ sadā // (60.2) Par.?

devadvijagurorbhaktās tīrthasevāparāyaṇāḥ / (61.1) Par.?

mātāpitṛvaśā nityaṃ drohakrodhavivarjitāḥ // (61.2) Par.?

ebhireva guṇair yuktā ye narāḥ pāṇḍunandana / (62.1) Par.?

satyaṃ te svargādāyātāḥ svarge vāsaṃ vrajanti te // (62.2) Par.?

sarvatīrthavaraṃ tīrthaṃ maṇināgaṃ nṛpottama / (63.1) Par.?

tīrthākhyānamidaṃ puṇyaṃ yaḥ paṭhecchṛṇuyād api // (63.2) Par.?

so'pi pāpairvinirmuktaḥ śivaloke mahīyate / (64.1) Par.?

na viṣaṃ kramate teṣāṃ vicaranti yathecchayā // (64.2) Par.?

bhādrapadyāṃ ca yatṣaṣṭhyāṃ puṇyaṃ sūryasya darśane / (65.1) Par.?

tatphalaṃ samavāpnoti ākhyānaśravaṇena tu // (65.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe maṇināgeśvaratīrthamāhātmyavarṇanaṃ nāma dvisaptatitamo 'dhyāyaḥ // (66.1) Par.?

Duration=0.67324686050415 secs.