Texts

surāpaḥ sarvakarmavarjitaḥ kaṇān varṣam aśnīyāt // (1.1) Par.?

malānāṃ madyānāṃ cānyatamasya prāśane cāndrāyaṇaṃ kuryāt // (2.1) Par.?

laśunapalāṇḍugṛñjanaitadgandhiviḍvarāhagrāmakukkuṭavānaragomāṃsabhakṣaṇe ca // (3.1) Par.?

sarveṣv eteṣu dvijānāṃ prāyaścittānte bhūyaḥ saṃskāraṃ kuryāt // (4.1) Par.?

vapanamekhalādaṇḍabhaikṣyacaryāvratāni punaḥsaṃskārakarmaṇi varjanīyāni // (5.1) Par.?

śaśakaśalyakagodhākhaḍgakūrmavarjaṃ pañcanakhamāṃsāśane saptarātram upavaset // (6.1) Par.?

gaṇagaṇikāstenagāyanānnāni bhuktvā saptarātraṃ payasā varteta // (7.1) Par.?

takṣakānnaṃ carmakartuś ca // (8.1) Par.?

vārddhuṣikakadaryadīkṣitabaddhanigaḍābhiśastaṣaṇḍhānāṃ ca // (9.1) Par.?

puṃścalīdāmbhikacikitsakalubdhakakrūrogrocchiṣṭabhojināṃ ca // (10.1) Par.?

avīrastrī suvarṇakārasapatnapatitānāṃ ca // (11.1) Par.?

piśunānṛtavādikṣatadharmātmarasavikrayiṇāṃ ca // (12.1) Par.?

śailūṣatantuvāyakṛtaghnarajakānāṃ ca // (13.1) Par.?

karmakāraniṣādaraṅgāvatārivaiṇaśastravikrayiṇāṃ ca // (14.1) Par.?

śvajīviśauṇḍikatailikacailanirṇejakānāṃ ca // (15.1) Par.?

rajasvalāsahopapativeśmanāṃ ca // (16.1) Par.?

bhrūṇaghnāvekṣitam udakyāsaṃspṛṣṭaṃ patatriṇāvalīḍhaṃ śunā saṃspṛṣṭaṃ gavāghrātaṃ ca // (17.1) Par.?

kāmataḥ padā spṛṣṭam avakṣutam // (18.1) Par.?

mattakruddhāturāṇāṃ ca // (19.1) Par.?

anarcitaṃ vṛthā māṃsaṃ ca // (20.1) Par.?

pāṭhīnarohitarājīvasiṃhatuṇḍaśakulavarjaṃ sarvamatsyamāṃsāśane trirātram upavaset // (21.1) Par.?

sarvajalajamāṃsāśane ca // (22.1) Par.?

āpaḥ surābhāṇḍasthāḥ pītvā saptarātraṃ śaṅkhapuṣpīśṛtaṃ payaḥ pibet // (23.1) Par.?

madyabhāṇḍasthāś ca pañcarātram // (24.1) Par.?

somapaḥ surāpasyāghrāya gandham udakamagnas trir aghamarṣaṇaṃ japtvā ghṛtaprāśanam ācaret // (25.1) Par.?

kharoṣṭrakākamāṃsāśane cāndrāyaṇaṃ kuryāt // (26.1) Par.?

prāśyājñātaṃ sūnāsthaṃ śuṣkamāṃsaṃ ca // (27.1) Par.?

kravyādamṛgapakṣimāṃsāśane taptakṛcchram // (28.1) Par.?

kalaviṅkaplavacakravākahaṃsarajjudālasārasadātyūhaśukasārikābakabalākākokilakhañjarīṭāśane trirātram upavaset // (29.1) Par.?

ekaśaphobhayadantāśane ca // (30.1) Par.?

tittirikapiñjalalāvakavarttikāmayūravarjaṃ sarvapakṣimāṃsāśane cāhorātram // (31.1) Par.?

kīṭāśane dinam ekaṃ brahmasuvarcalāṃ pibet // (32.1) Par.?

śunāṃ māṃsāśane ca // (33.1) Par.?

chattrākakavakāśane sāṃtapanam // (34.1) Par.?

yavagodhūmapayovikāraṃ snehāktaṃ śuktaṃ khāṇḍavaṃ ca varjayitvā yat paryuṣitaṃ tat prāśyopavaset // (35.1) Par.?

vraścanāmedhyaprabhavān lohitāṃś ca vṛkṣaniryāsān // (36.1) Par.?

śālūkavṛthākṛsarasaṃyāvapāyasāpūpaśaṣkulīdevānnāni havīṃṣi ca // (37.1) Par.?

go'jāmahiṣīvarjaṃ sarvapayāṃsi ca // (38.1) Par.?

anirdaśāhāni tāny api // (39.1) Par.?

syandinīsaṃdhinīvivatsākṣīraṃ ca // (40.1) Par.?

amedhyabhujaś ca // (41.1) Par.?

dadhivarjaṃ kevalāni ca śuktāni // (42.1) Par.?

brahmacaryāśramī śrāddhabhojane trirātram upavaset // (43.1) Par.?

dinam ekaṃ codake vaset // (44.1) Par.?

madhumāṃsāśane prājāpatyam // (45.1) Par.?

biḍālakākanakulākhūcchiṣṭabhakṣaṇe brahmasuvarcalāṃ pibet // (46.1) Par.?

śvocchiṣṭāśane dinam ekam upoṣitaḥ pañcagavyaṃ pibet // (47.1) Par.?

pañcanakhaviṇmūtrāśane saptarātram // (48.1) Par.?

āmaśrāddhāśane trirātraṃ payasā varteta // (49.1) Par.?

brāhmaṇaḥ śūdrocchiṣṭāśane saptarātram // (50.1) Par.?

vaiśyocchiṣṭāśane pañcarātram // (51.1) Par.?

rājanyocchiṣṭāśane trirātram // (52.1) Par.?

brāhmaṇocchiṣṭāśane tvekāham // (53.1) Par.?

rājanyaḥ śūdrocchiṣṭāśī pañcarātram // (54.1) Par.?

vaiśyocchiṣṭāśī trirātram // (55.1) Par.?

vaiśyaḥ śūdrocchiṣṭāśī ca // (56.1) Par.?

caṇḍālānnaṃ bhuktvā trirātram upavaset // (57.1) Par.?

siddhaṃ bhuktvā parākaḥ // (58.1) Par.?

asaṃskṛtān paśūn mantrair nādyād vipraḥ kathaṃcana / (59.1) Par.?

mantrais tu saṃskṛtān adyācchāśvataṃ vidhim āsthitaḥ // (59.2) Par.?

yāvanti paśuromāṇi tāvat kṛtveha māraṇam / (60.1) Par.?

vṛthā paśughnaḥ prāpnoti pretya ceha ca niṣkṛtim // (60.2) Par.?

yajñārthaṃ paśavaḥ sṛṣṭāḥ svayam eva svayaṃbhuvā / (61.1) Par.?

yajño hi bhūtyai sarvasya tasmād yajñe vadho 'vadhaḥ // (61.2) Par.?

na tādṛśaṃ bhavaty eno mṛgahantur dhanārthinaḥ / (62.1) Par.?

yādṛśaṃ bhavati pretya vṛthā māṃsāni khādataḥ // (62.2) Par.?

oṣadhyaḥ paśavo vṛkṣās tiryañcaḥ pakṣiṇas tathā / (63.1) Par.?

yajñārthaṃ nidhanam prāptāḥ prāpnuvanty ucchritīḥ punaḥ // (63.2) Par.?

madhuparke ca yajñe ca pitṛdaivatakarmaṇi / (64.1) Par.?

atraiva paśavo hiṃsyā nānyatreti kathaṃcana // (64.2) Par.?

yajñārtheṣu paśūn hiṃsan vedatattvārthavid dvijaḥ / (65.1) Par.?

ātmānaṃ ca paśūṃś caiva gamayatyuttamāṃ gatim // (65.2) Par.?

gṛhe gurāvaraṇye vā nivasann ātmavān dvijaḥ / (66.1) Par.?

nāvedavihitāṃ hiṃsām āpady api samācaret // (66.2) Par.?

yā vedavihitā hiṃsā niyatāsmiṃś carācare / (67.1) Par.?

ahiṃsām eva tāṃ vidyād vedād dharmo hi nirbabhau // (67.2) Par.?

yo 'hiṃsakāni bhūtāni hinastyātmasukhecchayā / (68.1) Par.?

sa jīvaṃś ca mṛtaś caiva na kvacit sukham edhate // (68.2) Par.?

yo bandhanavadhakleśān prāṇināṃ na cikīrṣati / (69.1) Par.?

sa sarvasya hitaprepsuḥ sukham atyantam aśnute // (69.2) Par.?

yad dhyāyati yat kurute ratiṃ badhnāti yatra ca / (70.1) Par.?

tad evāpnoty ayatnena yo hinasti na kiṃcana // (70.2) Par.?

nākṛtvā prāṇināṃ hiṃsāṃ māṃsam utpadyate kvacit / (71.1) Par.?

na ca prāṇivadhaḥ svargyas tasmān māṃsaṃ vivarjayet // (71.2) Par.?

samutpattiṃ ca māṃsasya vadhabandhau ca dehinām / (72.1) Par.?

prasamīkṣya nivarteta sarvamāṃsasya bhakṣaṇāt // (72.2) Par.?

na bhakṣayati yo māṃsaṃ vidhiṃ hitvā piśācavat / (73.1) Par.?

sa loke priyatāṃ yāti vyādhibhiś ca na pīḍyate // (73.2) Par.?

anumantā viśasitā nihantā krayavikrayī / (74.1) Par.?

saṃskartā copahartā ca khādakaś ceti ghātakāḥ // (74.2) Par.?

svamāṃsaṃ paramāṃsena yo vardhayitum icchati / (75.1) Par.?

anabhyarcya pitṝn devān na tato 'nyo 'styapuṇyakṛt // (75.2) Par.?

varṣe varṣe 'śvamedhena yo yajeta śataṃ samāḥ / (76.1) Par.?

māṃsāni ca na khāded yas tayoḥ puṇyaphalaṃ samam // (76.2) Par.?

phalamūlāśanair divyair munyannānāṃ ca bhojanaiḥ / (77.1) Par.?

na tat phalam avāpnoti yan māṃsaparivarjanāt // (77.2) Par.?

māṃ sa bhakṣayitāmutra yasya māṃsam ihādmyaham / (78.1) Par.?

etanmāṃsasya māṃsatvaṃ pravadanti manīṣiṇaḥ // (78.2) Par.?