Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 9743

Click on a sentence to show its analysis
Keep the mouse pointer over a lemma to show its meanings.

parokṣasaṃsthitasyātha dīkṣākarma nigadyate // (1.1) Par.?

bhuktimuktiprasiddhyarthaṃ nīyate sadguruṃ prati / (2.1) Par.?

ityasminmālinīvākye pratiḥ sāṃmukhyavācakaḥ // (2.2) Par.?

sāṃmukhyaṃ cāsya śiṣyasya tatkṛpāspadatātmakam / (3.1) Par.?

tamārādhyeti vacanaṃ kṛpāhetūpalakṣaṇam // (3.2) Par.?

tatsaṃbandhāttataḥ kaścittatkṣaṇādapavṛjyate / (4.1) Par.?

ityasyāyamapi hyartho mālinīvākyasanmaṇeḥ // (4.2) Par.?

tatkṣaṇāditi nāsyāsti yiyāsādikṣaṇāntaram / (5.1) Par.?

kiṃtvevameva karuṇānighnastaṃ gururuddharet // (5.2) Par.?

gurusevākṣīṇatanordīkṣām aprāpya pañcatām / (6.1) Par.?

gatasyātha svayaṃ mṛtyukṣaṇoditatathāruceḥ // (6.2) Par.?

athavādharatantrādidīkṣāsaṃskārabhāginaḥ / (7.1) Par.?

prāptasāmayikasyātha parāṃ dīkṣām avindataḥ // (7.2) Par.?

ḍimbāhatasya yogeśībhakṣitasyābhicārataḥ / (8.1) Par.?

mṛtasya guruṇā yantratantrādinihatasya vā // (8.2) Par.?

bhraṣṭasvasamayasyātha dīkṣāṃ prāptavato 'pyalam / (9.1) Par.?

bandhubhāryāsuhṛtputragāḍhābhyarthanayogataḥ // (9.2) Par.?

svayaṃ tadviṣayotpannakaruṇābalato 'pi vā / (10.1) Par.?

vijñātatanmukhāyātaśaktipātāṃśadharmaṇaḥ // (10.2) Par.?

gururdīkṣāṃ mṛtoddhārīṃ kurvīta śivadāyinīm / (11.1) Par.?

śrīmṛtyuñjayasiddhādau taduktaṃ parameśinā // (11.2) Par.?

adīkṣite nṛpatyādāvalase patite mṛte / (12.1) Par.?

bālāturastrīvṛddhe ca mṛtoddhāraṃ prakalpayet // (12.2) Par.?

vidhiḥ sarvaḥ pūrvamuktaḥ sa tu saṃkṣipta iṣyate / (13.1) Par.?

gurvādipūjārahito bāhye bhogāya sā yataḥ // (13.2) Par.?

adhivāsacarukṣetraṃ śayyāmaṇḍalakalpane / (14.1) Par.?

nopayogyatra tacchiṣyasaṃskriyāsvapnadṛṣṭaye // (14.2) Par.?

mantrasaṃnidhisaṃtṛptiyogāyātra tu maṇḍalam / (15.1) Par.?

bhūyodine ca devārcā sākṣānnāsyopakāri tat // (15.2) Par.?

kriyopakaraṇasthānamaṇḍalākṛtimantrataḥ / (16.1) Par.?

dhyānayogaikatadbhaktijñānatanmayabhāvataḥ // (16.2) Par.?

tatpraviṣṭasya kasyāpi śiṣyāṇāṃ ca gurostathā / (17.1) Par.?

ekādaśaite kathitāḥ saṃnidhānāya hetavaḥ // (17.2) Par.?

uttarottaramutkṛṣṭāstathā vyāmiśraṇāvaśāt / (18.1) Par.?

kriyātibhūyasī puṣpādyuttamaṃ lakṣaṇānvitam // (18.2) Par.?

ekaliṅgādi ca sthānaṃ yatrātmā samprasīdati / (19.1) Par.?

maṇḍalaṃ tritriśūlābjacakraṃ yanmantramaṇḍale // (19.2) Par.?

anāhūte 'pi dṛṣṭaṃ satsamayitvaprasādhanam / (20.1) Par.?

taduktaṃ mālinītantre siddhaṃ samayamaṇḍalam // (20.2) Par.?

yena saṃdṛṣṭamātreti siddhamātrapadadvayāt / (21.1) Par.?

ākṛtirdīptarūpā yā mantrastadvatsudīptikaḥ // (21.2) Par.?

śiṣṭaṃ spaṣṭamato neha kathitaṃ vistarātpunaḥ / (22.1) Par.?

kṛtvā maṇḍalamabhyarcya tatra devaṃ kuśairatha // (22.2) Par.?

gomayenākṛtiṃ kuryācchiṣyavattāṃ nidhāpayet / (23.1) Par.?

tatastasyāṃ śodhyamekamadhvānaṃ vyāptibhāvanāt // (23.2) Par.?

prakṛtyantaṃ vinikṣipya punarenaṃ vidhiṃ caret / (24.1) Par.?

mahājālaprayogeṇa sarvasmādadhvamadhyataḥ // (24.2) Par.?

cittamākṛṣya tatrasthaṃ kuryāttadvidhirucyate / (25.1) Par.?

mūlādhārādudetya prasṛtasuvitatānantanāḍyadhvadaṇḍaṃ vīryeṇākramya nāsāgaganaparigataṃ vikṣipan vyāptumīṣṭe / (25.2) Par.?

yāvad dhūmābhirāmapracitataraśikhājālakenādhvacakraṃ saṃchādyābhīṣṭajīvānayanamiti mahājālanāmā prayogaḥ // (25.3) Par.?

etenācchādanīyaṃ vrajati paravaśaṃ saṃmukhīnatvamādau paścād ānīyate cetsakalamatha tato 'pyadhvamadhyādyatheṣṭam / (26.1) Par.?

ākṛṣṭāvuddhṛtau vā mṛtajanaviṣaye karṣaṇīye 'tha jīve yogaḥ śrīśaṃbhunāthāgamaparigamito jālanāmā mayoktaḥ // (26.2) Par.?

ciravighaṭite senāyugme yathāmilite punarhayagajanaraṃ svāṃ svāṃ jātiṃ rasādabhidhāvati / (27.1) Par.?

karaṇapavanairnāḍīcakraistathaiva samāgatairnijanijarasād ekībhāvyaṃ svajālavaśīkṛtaiḥ // (27.2) Par.?

mahājālasamākṛṣṭo jīvo vijñānaśālinā / (28.1) Par.?

svaḥpretatiryaṅnirayāṃs tadaivaiṣa vimuñcati // (28.2) Par.?

tajjñānamantrayogāptaḥ puruṣaścaiṣa kṛtrimam / (29.1) Par.?

yogīva sādhyahṛdayāttadā tādātmyamujhati // (29.2) Par.?

sthāvarādidaśāś citrās tatsalokasamīpatāḥ / (30.1) Par.?

tyajecceti na citraṃ sa evaṃ yaḥ karmaṇāpi vā // (30.2) Par.?

adhikāriśarīratvānmānuṣye tu śarīragaḥ / (31.1) Par.?

na tadā mucyate dehāddehānte tu śivaṃ vrajet // (31.2) Par.?

tasmindehe tu kāpy asya jāyate śāṅkarī parā / (32.1) Par.?

bhaktirūhācca vijñānādācāryādvāpyasevitāt // (32.2) Par.?

taddehasaṃsthito 'pyeṣa jīvo jālabalādimam / (33.1) Par.?

dārbhādidehaṃ vyāpnoti svādhiṣṭhityāpyacetayan // (33.2) Par.?

yogamantrakriyājñānabhūyobalavaśātpunaḥ / (34.1) Par.?

manuṣyadehamapyeṣa tadaivāśu vimuñcati // (34.2) Par.?

suptakalpo 'pyadeho 'pi yo jīvaḥ so 'pi jālataḥ / (35.1) Par.?

ākṛṣṭo dārbhamāyāti dehaṃ phalamayaṃ ca vā // (35.2) Par.?

jātīphalādi yatkiṃcittena vā dehakalpanā / (36.1) Par.?

antarbahirdvayaucityāttadatrotkṛṣṭamucyate // (36.2) Par.?

tato jālakramānītaḥ sa jīvaḥ suptavatsthitaḥ / (37.1) Par.?

manoviśiṣṭadehādisāmagrīprāptyabhāvataḥ // (37.2) Par.?

na spandate na jānāti na vakti na kilecchati / (38.1) Par.?

tādṛśasyaiva saṃskārān sarvān prāgvatprakalpayet // (38.2) Par.?

nirbījadīkṣāyogena sarvaṃ kṛtvā puroditam / (39.1) Par.?

vidhiṃ yojanikāṃ pūrṇāhutyā sākaṃ kṣipecca tam // (39.2) Par.?

dārbhādidehe mantrāgnāvarpite pūrṇayā saha / (40.1) Par.?

muktapāśaḥ śivaṃ yāti punarāvṛttivarjitaḥ // (40.2) Par.?

sapratyayā tviyaṃ yatra spandate darbhajā tanuḥ / (41.1) Par.?

tatra prāṇamanomantrārpaṇayogāttathā bhavet // (41.2) Par.?

sābhyāsasya tadapyuktaṃ balāśvāsi na tatkṛte / (42.1) Par.?

mṛtoddhāroditaireva yathāsaṃbhūti hetubhiḥ // (42.2) Par.?

jīvatparokṣadīkṣāpi kāryā nirbījikā tu sā / (43.1) Par.?

tasyāṃ darbhākṛtiprāyakalpane jālayogataḥ // (43.2) Par.?

saṃkalpamātreṇākarṣo jīvasya mṛtibhītitaḥ / (44.1) Par.?

śiṣṭaṃ prāgvat kuśādyutthākāraviploṣavarjitam // (44.2) Par.?

pārimityādanaiśvaryātsādhye niyatiyantraṇāt / (45.1) Par.?

jālākṛṣṭirvinābhyāsaṃ rāgadveṣānna jāyate // (45.2) Par.?

parokṣa evātulyābhirdīkṣābhiryadi dīkṣitaḥ / (46.1) Par.?

tatrottaraṃ syādbalavatsaṃskārāya tvadhastanam // (46.2) Par.?

bhuktiyojanikāyāṃ tu bhūyobhirgurubhistathā / (47.1) Par.?

kṛtāyāṃ bhogavaicitryaṃ hetuvaicitryayogataḥ // (47.2) Par.?

parokṣadīkṣaṇe māyottīrṇe bhogāya yojayet / (48.1) Par.?

bhogānīpsā durlabhā hi satī vā bhogahānaye // (48.2) Par.?

uktaṃ hi svānyasaṃvittyoḥ svasaṃvidbalavattarā / (49.1) Par.?

bādhakatve bādhikāsau sāmyaudāsīnyayostathā // (49.2) Par.?

śrīmān dharmaśivo 'pyāha pārokṣyāṃ karmapaddhatau / (50.1) Par.?

parokṣadīkṣaṇe samyak pūrṇāhutividhau yadi // (50.2) Par.?

agniś ciṭiciṭāśabdaṃ sadhūmaṃ pratimuñcati / (51.1) Par.?

dhatte nīlāmbudacchāyāṃ muhurjvalati śāmyati // (51.2) Par.?

vistaro ghorarūpaśca mahīṃ dhāvati cāpyadhaḥ / (52.1) Par.?

dhvāṃkṣādyaśravyaśabdo vā tadā taṃ lakṣayedguruḥ // (52.2) Par.?

brahmahatyādibhiḥ pāpaistatsaṅgaiścopapātakaiḥ / (53.1) Par.?

tadā tasya na kartavyā dīkṣāsmin akṛte vidhau // (53.2) Par.?

navātmā phaṭpuṭāntaḥsthaḥ punaḥ pañcaphaḍanvitaḥ / (54.1) Par.?

amukasyeti pāpāni dahāmyanu phaḍaṣṭakam // (54.2) Par.?

iti sāhasriko homaḥ kartavyastilataṇḍulaiḥ / (55.1) Par.?

ante pūrṇā ca dātavyā tato 'smai dīkṣayā guruḥ // (55.2) Par.?

parayojanaparyantaṃ kuryāttattvaviśodhanam / (56.1) Par.?

pratyakṣe 'pi sthitasyāṇoḥ pāpino bhagavanmayīm // (56.2) Par.?

śaktiṃ prāptavato jyeṣṭhāmevameva vidhiṃ caret / (57.1) Par.?

yadi vā daiśikaḥ samyaṅ na dīptastasya tatpurā // (57.2) Par.?

prāyaścittaistathā dānaiḥ prāṇāyāmaiśca śodhanam / (58.1) Par.?

kṛtvā vidhimimāṃ cāpi dīkṣāṃ kuryādaśaṅkitaḥ // (58.2) Par.?

sarvathā vartamāno 'pi tattvavinmocayetpaśūn / (59.1) Par.?

icchayaiva śivaḥ sākṣāttasmāttaṃ pūjayetsadā // (59.2) Par.?

śāṭhyaṃ tatra na kāryaṃ ca tatkṛtvādho vrajecchiśuḥ / (60.1) Par.?

na punaḥ kīrtayettasya pāpaṃ kīrtayitā vrajet // (60.2) Par.?

nirayaṃ varjayettasmāditi dīkṣottare vidhiḥ / (61.1) Par.?

eṣā parokṣadīkṣā dvidhoditā jīvaditarabhedena // (61.2) Par.?

Duration=0.25570011138916 secs.