Texts

Help

Select a text:
Bibliography

Select a chapter:
(no revisions)

Associated topic(s): Genealogies, Manu Vaivasvata

Show parallels Show headlines
Use dependency labeler

Chapter id: 16142

Click on a sentence to show its analysis
Keep the mouse pointer over a lemma to show its meanings.

vaiśampāyana uvāca / (1.1) Par.?

manor vaivasvatasyāsan putrā vai nava tatsamāḥ / (1.2) Par.?

ikṣvākuś caiva nābhāgaś ca dhṛṣṇuḥ śaryātir eva ca // (1.3) Par.?

nariṣyantas tathā prāṃśur nābhānediṣṭhasaptamaḥ / (2.1) Par.?

karūṣaś ca pṛṣadhraś ca navaite puruṣarṣabha // (2.2) Par.?

akarot putrakāmas tu manur iṣṭiṃ prajāpatiḥ / (3.1) Par.?

mitrāvaruṇayos tāta pūrvam eva viśāṃ pate / (3.2) Par.?

anutpanneṣu navasu putreṣv eteṣu bhārata // (3.3) Par.?

tasyāṃ tu vartamānāyām iṣṭyāṃ bharatasattama / (4.1) Par.?

mitrāvaruṇayor aṃśe manur āhutim ājuhot // (4.2) Par.?

tatra divyāmbaradharā divyābharaṇabhūṣitā / (5.1) Par.?

divyasaṃhananā caiva iḍā jajña iti śrutiḥ // (5.2) Par.?

tām iḍety eva hovāca manur daṇḍadharas tadā / (6.1) Par.?

anugacchasva māṃ bhadre tam iḍā pratyuvāca ha // (6.2) Par.?

mitrāvaruṇayor aṃśe jātāsmi vadatāṃ vara / (7.1) Par.?

tayoḥ sakāśaṃ yāsyāmi na māṃ dharmo hato 'hanat // (7.2) Par.?

saivam uktvā manuṃ devaṃ mitrāvaruṇayor iḍā / (8.1) Par.?

gatvāntikaṃ varārohā prāñjalir vākyam abravīt / (8.2) Par.?

aṃśe 'smi yuvayor jātā devau kiṃ karavāṇi vām // (8.3) Par.?

tāṃ tathāvādinīṃ sādhvīm iḍāṃ dharmaparāyaṇām / (9.1) Par.?

mitraś ca varuṇaś cobhāv ūcatur yan nibodha tat // (9.2) Par.?

anena tava dharmeṇa praśrayeṇa damena ca / (10.1) Par.?

satyena caiva suśroṇi prītau svo varavarṇini // (10.2) Par.?

āvayos tvaṃ mahābhāge khyātiṃ kanyeti yāsyasi / (11.1) Par.?

manor vaṃśakaraḥ putras tvam eva ca bhaviṣyasi // (11.2) Par.?

sudyumna iti vikhyātas triṣu lokeṣu śobhane / (12.1) Par.?

jagatpriyo dharmaśīlo manor vaṃśavivardhanaḥ // (12.2) Par.?

nivṛttā sā tu tac chrutvā gacchantī pitur antikam / (13.1) Par.?

budhenāntaram āsādya maithunāyopavartitā // (13.2) Par.?

somaputrād budhād rājaṃs tasyāṃ jajñe purūravāḥ / (14.1) Par.?

janayitvā tataḥ sā tam iḍā sudyumnatāṃ gatā // (14.2) Par.?

sudyumnasya tu dāyādās trayaḥ paramadhārmikāḥ / (15.1) Par.?

utkalaś ca gayaś caiva vinatāśvaś ca bhārata // (15.2) Par.?

utkalasyottarā rājan vinatāśvasya paścimā / (16.1) Par.?

dik pūrvā bharataśreṣṭha gayasya tu gayā smṛtā // (16.2) Par.?

praviṣṭe tu manau tāta divākaram ariṃdama / (17.1) Par.?

daśadhā tadgataṃ kṣatram akarot pṛthivīm imām // (17.2) Par.?

ikṣvākur jyeṣṭhadāyādo madhyadeśam avāptavān / (18.1) Par.?

kanyābhāvāc ca sudyumno nainaṃ guṇam avāptavān // (18.2) Par.?

vasiṣṭhavacanāc cāsīt pratiṣṭhānaṃ mahātmanaḥ / (19.1) Par.?

pratiṣṭhā dharmarājasya sudyumnasya kurūdvaha // (19.2) Par.?

tat purūravase prādād rājyaṃ prāpya mahāyaśāḥ / (20.1) Par.?

mānaveyo mahārāja strīpuṃsor lakṣaṇair yutaḥ // (20.2) Par.?

nariṣyantāḥ śakāḥ putrā nābhāgasya tu bhārata / (21.1) Par.?

ambarīṣo 'bhavat putraḥ pārthivarṣabhasattama // (21.2) Par.?

dhṛṣṇos tu dhārṣṇikaṃ kṣatraṃ raṇadṛṣṭaṃ babhūva ha / (22.1) Par.?

śaryāter mithunaṃ cāsīd ānarto nāma viśrutaḥ / (22.2) Par.?

putraḥ kanyā sukanyā ca yā patnī cyavanasya ha // (22.3) Par.?

ānartasya tu dāyādo revo nāma mahādyutiḥ / (23.1) Par.?

ānartaviṣayaś cāsīt purī cāsīt kuśasthalī // (23.2) Par.?

revasya raivataḥ putraḥ kakudmī nāma dhārmikaḥ / (24.1) Par.?

jyeṣṭhaḥ putraśatasyāsīd rājyaṃ prāpya kuśasthalīm // (24.2) Par.?

sa kanyāsahitaḥ śrutvā gāndharvaṃ brahmaṇo 'ntike / (25.1) Par.?

muhūrtabhūtaṃ devasya martyaṃ bahuyugaṃ prabho // (25.2) Par.?

ājagāma yuvaivātha svāṃ purīṃ yādavair vṛtām / (26.1) Par.?

kṛtāṃ dvāravatīṃ nāmnā bahudvārāṃ manoramām / (26.2) Par.?

bhojavṛṣṇyandhakair guptāṃ vāsudevapurogamaiḥ // (26.3) Par.?

tatas tad raivato jñātvā yathātattvam ariṃdama / (27.1) Par.?

kanyāṃ tāṃ baladevāya suvratāṃ nāma revatīm // (27.2) Par.?

dattvā jagāma śikharaṃ meros tapasi saṃśritaḥ / (28.1) Par.?

reme rāmo 'pi dharmātmā revatyā sahitaḥ sukhī // (28.2) Par.?

janamejaya uvāca / (29.1) Par.?

kathaṃ bahuyuge kāle samatīte dvijarṣabha / (29.2) Par.?

na jarā revatīṃ prāptā raivataṃ ca kakudminam // (29.3) Par.?

meruṃ gatasya vā tasya śāryāteḥ saṃtatiḥ katham / (30.1) Par.?

sthitā pṛthivyām adyāpi śrotum icchāmi tattvataḥ // (30.2) Par.?

vaiśampāyana uvāca / (31.1) Par.?

na jarā kṣutpipāse vā na mṛtyur bharatarṣabha / (31.2) Par.?

ṛtucakraṃ prabhavati brahmaloke sadānagha // (31.3) Par.?

kakudminas tu taṃ lokaṃ raivatasya gatasya ha / (32.1) Par.?

hatā puṇyajanais tāta rākṣasaiḥ sā kuśasthalī // (32.2) Par.?

tasya bhrātṛśataṃ tv āsīd dhārmikasya mahātmanaḥ / (33.1) Par.?

tad vadhyamānaṃ rakṣobhir diśaḥ prākramad acyuta // (33.2) Par.?

anvavāyas tu sumahāṃs tatra tatra viśāṃ pate / (34.1) Par.?

teṣāṃ ye te mahārāja śāryātā iti viśrutāḥ // (34.2) Par.?

kṣatriyā bharataśreṣṭha dikṣu sarvāsu dhārmikāḥ / (35.1) Par.?

sarvaśaḥ sarvagahanaṃ praviṣṭāḥ kurunandana // (35.2) Par.?

nābhāgasya tu putrau dvau vaiśyau brāhmaṇatāṃ gatau / (36.1) Par.?

karūṣasya tu kārūṣāḥ kṣatriyā yuddhadurmadāḥ // (36.2) Par.?

pṛṣadhro hiṃsayitvā tu guror gāṃ janamejaya / (37.1) Par.?

śāpāc chūdratvam āpanno navaite parikīrtitāḥ // (37.2) Par.?

kṣuvatas tu manos tāta ikṣvākur abhavat sutaḥ / (38.1) Par.?

tasya putraśataṃ tv āsīd ikṣvākor bhūridakṣiṇam // (38.2) Par.?

teṣāṃ vikukṣir jyeṣṭhas tu vikukṣitvād ayodhatām / (39.1) Par.?

prāptaḥ paramadharmajña so 'yodhyādhipatiḥ prabhuḥ // (39.2) Par.?

śakunipramukhās tasya putrāḥ pañcaśataṃ smṛtāḥ / (40.1) Par.?

uttarāpathadeśasya rakṣitāro viśāṃ pate // (40.2) Par.?

catvāriṃśad athāṣṭau ca dakṣiṇasyāṃ tathā diśi / (41.1) Par.?

vasātipramukhāś cānye rakṣitāro viśāṃ pate // (41.2) Par.?

śrāddhakarmaṇi coddiṣṭe akṛte śrāddhakarmaṇi / (42.1) Par.?

bhakṣayitvā śaśaṃ tāta śaśādo mṛgayāṃ gataḥ // (42.2) Par.?

ikṣvākuṇā parityakto vasiṣṭhavacanāt prabhuḥ / (43.1) Par.?

ikṣvākau saṃsthite tāta śaśādaḥ puram āvasat // (43.2) Par.?

ayodhasya tu dāyādaḥ kakutstho nāma vīryavān / (44.1) Par.?

anenās tu kakutsthasya pṛthur ānenasaḥ smṛtaḥ // (44.2) Par.?

viṣṭarāśvaḥ pṛthoḥ putras tasmād ārdras tv ajāyata / (45.1) Par.?

ārdrasya yuvanāśvas tu śrāvastas tasya cātmajaḥ // (45.2) Par.?

jajñe śrāvastako rājā śrāvastī yena nirmitā / (46.1) Par.?

śrāvastasya tu dāyādo bṛhadaśvo mahīpatiḥ // (46.2) Par.?

kuvalāśvaḥ sutas tasya rājā paramadhārmikaḥ / (47.1) Par.?

yaḥ sa dhundhuvadhād rājā dhundhumāratvam āgataḥ // (47.2) Par.?

janamejaya uvāca / (48.1) Par.?

dhundhor vadham ahaṃ brahmañ śrotum icchāmi tattvataḥ / (48.2) Par.?

yadarthaṃ kuvalāśvaḥ san dhundhumāratvam āgataḥ // (48.3) Par.?

vaiśampāyana uvāca / (49.1) Par.?

bṛhadaśvasya putrāṇāṃ śatam uttamadhanvinām / (49.2) Par.?

babhūvātha pitā rājye kuvalāśvaṃ nyayojayat // (49.3) Par.?

putrasaṃkrāmitaśrīs tu vanaṃ rājā samāviśat / (50.1) Par.?

tam uttaṅko 'tha viprarṣiḥ prayāntaṃ pratyavārayat // (50.2) Par.?

uttaṅka uvāca / (51.1) Par.?

bhavatā rakṣaṇaṃ kāryaṃ tat tāvat kartum arhasi / (51.2) Par.?

nirudvignas tapaś cartuṃ na hi śaknomi pārthiva // (51.3) Par.?

mamāśramasamīpe vai sameṣu marudhanvasu / (52.1) Par.?

samudro vālukāpūrṇa ujjānaka iti smṛtaḥ // (52.2) Par.?

devatānām avadhyaś ca mahākāyo mahābalaḥ / (53.1) Par.?

antarbhūmigatas tatra vālukāntarhito mahān // (53.2) Par.?

rākṣasasya madhoḥ putro dhundhur nāma sudāruṇaḥ / (54.1) Par.?

śete lokavināśāya tapa āsthāya dāruṇam // (54.2) Par.?

saṃvatsarasya paryante sa niḥśvāsaṃ vimuñcati / (55.1) Par.?

yadā tadā mahī tāta calati sma sakānanā // (55.2) Par.?

tasya niḥśvāsavātena raja uddhūyate mahat / (56.1) Par.?

ādityapatham āvṛtya saptāhaṃ bhūmikampanam // (56.2) Par.?

savisphuliṅgaṃ sāṅgāraṃ sadhūmam atidāruṇam / (57.1) Par.?

tena tāta na śaknomi tasmin sthātuṃ sva āśrame // (57.2) Par.?

taṃ vāraya mahākāyaṃ lokānāṃ hitakāmyayā / (58.1) Par.?

lokāḥ svasthā bhavantv adya tasmin vinihate tvayā // (58.2) Par.?

tvaṃ hi tasya vadhāyaikaḥ samarthaḥ pṛthivīpate / (59.1) Par.?

viṣṇunā ca varo datto mahyaṃ pūrvaṃ tato 'nagha / (59.2) Par.?

tejasā svena te viṣṇus teja āpyāyayiṣyati // (59.3) Par.?

na hi dhundhur mahātejās tejasālpena śakyate / (60.1) Par.?

nirdagdhuṃ pṛthivīpāla ciraṃ yugaśatair api / (60.2) Par.?

vīryaṃ hi sumahat tasya devair api durāsadam // (60.3) Par.?

sa evam ukto rājarṣir uttaṅkena mahātmanā / (61.1) Par.?

kuvalāśvaṃ sutaṃ prādāt tasmai dhundhunibarhaṇe // (61.2) Par.?

bṛhadaśva uvāca / (62.1) Par.?

bhagavan nyastaśastro 'ham ayaṃ tu tanayo mama / (62.2) Par.?

bhaviṣyati dvijaśreṣṭha dhundhumāro na saṃśayaḥ // (62.3) Par.?

sa taṃ vyādiśya tanayaṃ rājarṣir dhundhunigrahe / (63.1) Par.?

jagāma parvatāyaiva tapase saṃśitavrataḥ // (63.2) Par.?

kuvalāśvas tu putrāṇāṃ śatena saha pārthivaḥ / (64.1) Par.?

prāyād uttaṅkasahito dhundhos tasya nibarhaṇe // (64.2) Par.?

tam āviśat tadā viṣṇur bhagavāṃs tejasā prabhuḥ / (65.1) Par.?

uttaṅkasya niyogād vai lokānāṃ hitakāmyayā // (65.2) Par.?

tasmin prayāte durdharṣe divi śabdo mahān abhūt / (66.1) Par.?

eṣa śrīmān nṛpasuto dhundhumāro bhaviṣyati // (66.2) Par.?

divyair mālyaiś ca taṃ devāḥ samantāt samavākiran / (67.1) Par.?

devadundubhayaś caiva praṇedur bharatarṣabha // (67.2) Par.?

sa gatvā jayatāṃ śreṣṭhas tanayaiḥ saha vīryavān / (68.1) Par.?

samudraṃ khānayāmāsa vālukārṇavam avyayam // (68.2) Par.?

nārāyaṇena kauravya tejasāpyāyitas tadā / (69.1) Par.?

babhūva sa mahātejā bhūyo balasamanvitaḥ // (69.2) Par.?

tasya putraiḥ khanadbhis tu vālukāntarhitas tadā / (70.1) Par.?

dhundhur āsādito rājan diśam āvṛtya paścimām // (70.2) Par.?

mukhajenāgninā krodhāl lokān udvartayann iva / (71.1) Par.?

vāri susrāva vegena mahodadhir ivodaye / (71.2) Par.?

somasya bharataśreṣṭha dhārormikalilo mahān // (71.3) Par.?

tasya putraśataṃ dagdhaṃ tribhir ūnaṃ tu rakṣasā // (72.1) Par.?

tataḥ sa rājā kauravya rākṣasaṃ taṃ mahābalam / (73.1) Par.?

āsasāda mahātejā dhundhuṃ dhundhuvināśanaḥ // (73.2) Par.?

tasya vārimayaṃ vegam āpīya sa narādhipaḥ / (74.1) Par.?

yogī yogena vahniṃ ca śamayāmāsa vāriṇā // (74.2) Par.?

nihatya taṃ mahākāyaṃ balenodakarākṣasam / (75.1) Par.?

uttaṅkaṃ darśayāmāsa kṛtakarmā narādhipaḥ // (75.2) Par.?

uttaṅkas tu varaṃ prādāt tasmai rājñe mahātmane / (76.1) Par.?

dadataś cākṣayaṃ vittaṃ śatrubhiś cāparājayam // (76.2) Par.?

dharme ratiṃ ca satataṃ svarge vāsaṃ tathākṣayam / (77.1) Par.?

putrāṇāṃ cākṣayāṃl lokān svarge ye rakṣasā hatāḥ // (77.2) Par.?

tasya putrās trayaḥ śiṣṭā dṛḍhāśvo jyeṣṭha ucyate / (78.1) Par.?

daṇḍāśvakapilāśvau tu kumārau tu kanīyasau // (78.2) Par.?

dhaundhumārir dṛḍhāśvas tu haryaśvas tasya cātmajaḥ / (79.1) Par.?

haryaśvasya nikumbho 'bhūt kṣatradharmarataḥ sadā // (79.2) Par.?

saṃhatāśvo nikumbhasya suto raṇaviśāradaḥ / (80.1) Par.?

akṛśāśvaḥ kṛśāśvaś ca saṃhatāśvasutau nṛpa // (80.2) Par.?

tasya haimavatī kanyā satāṃ matā dṛṣadvatī / (81.1) Par.?

vikhyātā triṣu lokeṣu putraś cāpi prasenajit // (81.2) Par.?

lebhe prasenajid bhāryāṃ gaurīṃ nāma pativratām / (82.1) Par.?

abhiśaptā tu sā bhartrā nadī sā bāhudā kṛtā // (82.2) Par.?

tasyāḥ putro mahān āsīd yuvanāśvo narādhipaḥ / (83.1) Par.?

māndhātā yuvanāśvasya trilokavijayī nṛpaḥ // (83.2) Par.?

tasya caitrarathī bhāryā śaśabindoḥ sutābhavat / (84.1) Par.?

sādhvī bindumatī nāma rūpeṇāsadṛśī bhuvi / (84.2) Par.?

pativratā ca jyeṣṭhā ca bhrātṝṇām ayutasya sā // (84.3) Par.?

tasyām utpādayāmāsa māndhātā dvau sutau nṛpa / (85.1) Par.?

purukutsaṃ ca dharmajñaṃ mucukundaṃ ca pārthivam // (85.2) Par.?

purukutsasutas tv āsīt trasaddasyur mahīpatiḥ / (86.1) Par.?

narmadāyām athotpannaḥ sambhūtas tasya cātmajaḥ // (86.2) Par.?

sambhūtasya tu dāyādaḥ sudhanvā ripumardanaḥ / (87.1) Par.?

sudhanvanaḥ sutaś cāpi tridhanvā nāma pārthivaḥ // (87.2) Par.?

rājñas tridhanvanas tv āsīd vidvāṃs trayyāruṇaḥ prabhuḥ / (88.1) Par.?

tasya satyavrato nāma kumāro 'bhūn mahābalaḥ // (88.2) Par.?

pāṇigrahaṇamantrāṇāṃ vighnaṃ cakre sudurmatiḥ / (89.1) Par.?

yena bhāryā hṛtā pūrvaṃ kṛtodvāhā parasya vai // (89.2) Par.?

bālyāt kāmāc ca mohāc ca saṃharṣāc cāpalena ca / (90.1) Par.?

jahāra kanyāṃ kāmāt sa kasyacit puravāsinaḥ // (90.2) Par.?

adharmaśaṅkunā tena rājā trayyāruṇo 'tyajat / (91.1) Par.?

apadhvaṃseti bahuśo vadan krodhasamanvitaḥ // (91.2) Par.?

pitaraṃ so 'bravīt tyaktaḥ kva gacchāmīti vai muhuḥ / (92.1) Par.?

pitā tv enam athovāca śvapākaiḥ saha vartaya / (92.2) Par.?

nāhaṃ putreṇa putrārthī tvayādya kulapāṃsana // (92.3) Par.?

ity uktaḥ sa nirākrāman nagarād vacanāt pituḥ / (93.1) Par.?

na ca taṃ vārayāmāsa vasiṣṭho bhagavān ṛṣiḥ // (93.2) Par.?

sa tu satyavratas tāta śvapākāvasathāntike / (94.1) Par.?

pitrā tyakto 'vasad vīraḥ pitāpy asya vanaṃ yayau // (94.2) Par.?

tatas tasmiṃs tu viṣaye nāvarṣat pākaśāsanaḥ / (95.1) Par.?

samā dvādaśa rājendra tenādharmeṇa vai tadā // (95.2) Par.?

dārāṃs tu tasya viṣaye viśvāmitro mahātapāḥ / (96.1) Par.?

saṃnyasya sāgarānūpe cacāra vipulaṃ tapaḥ // (96.2) Par.?

tasya patnī gale baddhvā madhyamaṃ putram aurasam / (97.1) Par.?

śeṣasya bharaṇārthāya vyakrīṇād gośatena vai // (97.2) Par.?

taṃ tu baddhaṃ gale dṛṣṭvā vikrīyantaṃ nṛpātmajaḥ / (98.1) Par.?

maharṣiputraṃ dharmātmā mokṣayāmāsa bhārata // (98.2) Par.?

satyavrato mahābāhur bharaṇaṃ tasya cākarot / (99.1) Par.?

viśvāmitrasya tuṣṭyartham anukampārtham eva ca // (99.2) Par.?

so 'bhavad gālavo nāma galabandhān mahātapāḥ / (100.1) Par.?

maharṣiḥ kauśikas tāta tena vīreṇa mokṣitaḥ // (100.2) Par.?

Duration=0.38326787948608 secs.