Texts

śrīśuka uvāca / (1.1) Par.?

evam etan nigaditaṃ pṛṣṭavān yadbhavān mama / (1.2) Par.?

nṛṇāṃ yan mriyamāṇānāṃ manuṣyeṣu manīṣiṇām // (1.3) Par.?

brahmavarcasakāmastu yajeta brahmaṇaḥ patim / (2.1) Par.?

indram indriyakāmastu prajākāmaḥ prajāpatīn // (2.2) Par.?

devīṃ māyāṃ tu śrīkāmastejaskāmo vibhāvasum / (3.1) Par.?

vasukāmo vasūn rudrān vīryakāmo 'tha vīryavān // (3.2) Par.?

annādyakāmastvaditiṃ svargakāmo 'diteḥ sutān / (4.1) Par.?

viśvān devān rājyakāmaḥ sādhyān saṃsādhako viśām // (4.2) Par.?

āyuṣkāmo 'śvinau devau puṣṭikāma ilāṃ yajet / (5.1) Par.?

pratiṣṭhākāmaḥ puruṣo rodasī lokamātarau // (5.2) Par.?

rūpābhikāmo gandharvān strīkāmo 'psara urvaśīm / (6.1) Par.?

ādhipatyakāmaḥ sarveṣāṃ yajeta parameṣṭhinam // (6.2) Par.?

yajñaṃ yajedyaśaskāmaḥ kośakāmaḥ pracetasam / (7.1) Par.?

vidyākāmastu giriśaṃ dāmpatyārtha umāṃ satīm // (7.2) Par.?

dharmārtha uttamaślokaṃ tantuḥ tanvan pitṝn yajet / (8.1) Par.?

rakṣākāmaḥ puṇyajanān ojaskāmo marudgaṇān // (8.2) Par.?

rājyakāmo manūn devān nirṛtiṃ tvabhicaran yajet / (9.1) Par.?

kāmakāmo yajet somam akāmaḥ puruṣaṃ param // (9.2) Par.?

akāmaḥ sarvakāmo vā mokṣakāma udāradhīḥ / (10.1) Par.?

tīvreṇa bhaktiyogena yajeta puruṣaṃ param // (10.2) Par.?

etāvān eva yajatām iha niḥśreyasodayaḥ / (11.1) Par.?

bhagavatyacalo bhāvo yadbhāgavatasaṅgataḥ // (11.2) Par.?

jñānaṃ yad āpratinivṛttaguṇormicakram ātmaprasāda uta yatra guṇeṣvasaṅgaḥ / (12.1) Par.?

kaivalyasaṃmatapathastvatha bhaktiyogaḥ ko nirvṛto harikathāsu ratiṃ na kuryāt // (12.2) Par.?

śaunaka uvāca / (13.1) Par.?

ityabhivyāhṛtaṃ rājā niśamya bharatarṣabhaḥ / (13.2) Par.?

kim anyat pṛṣṭavān bhūyo vaiyāsakim ṛṣiṃ kavim // (13.3) Par.?

etacchuśrūṣatāṃ vidvan sūta no 'rhasi bhāṣitum / (14.1) Par.?

kathā harikathodarkāḥ satāṃ syuḥ sadasi dhruvam // (14.2) Par.?

sa vai bhāgavato rājā pāṇḍaveyo mahārathaḥ / (15.1) Par.?

bālakrīḍanakaiḥ krīḍan kṛṣṇakrīḍāṃ ya ādade // (15.2) Par.?

vaiyāsakiśca bhagavān vāsudevaparāyaṇaḥ / (16.1) Par.?

urugāyaguṇodārāḥ satāṃ syurhi samāgame // (16.2) Par.?

āyurharati vai puṃsām udyann astaṃ ca yann asau / (17.1) Par.?

tasyarte yatkṣaṇo nīta uttamaślokavārtayā // (17.2) Par.?

taravaḥ kiṃ na jīvanti bhastrāḥ kiṃ na śvasantyuta / (18.1) Par.?

na khādanti na mehanti kiṃ grāme paśavo 'pare // (18.2) Par.?

śvaviḍvarāhoṣṭrakharaiḥ saṃstutaḥ puruṣaḥ paśuḥ / (19.1) Par.?

na yatkarṇapathopeto jātu nāma gadāgrajaḥ // (19.2) Par.?

bile batorukramavikramān ye na śṛṇvataḥ karṇapuṭe narasya / (20.1) Par.?

jihvāsatī dārdurikeva sūta na copagāyatyurugāyagāthāḥ // (20.2) Par.?

bhāraḥ paraṃ paṭṭakirīṭajuṣṭam apyuttamāṅgaṃ na namen mukundam / (21.1) Par.?

śāvau karau no kurute saparyāṃ harerlasatkāñcanakaṅkaṇau vā // (21.2) Par.?

barhāyite te nayane narāṇāṃ liṅgāni viṣṇorna nirīkṣato ye / (22.1) Par.?

pādau nṛṇāṃ tau drumajanmabhājau kṣetrāṇi nānuvrajato hareryau // (22.2) Par.?

jīvañchavo bhāgavatāṅghrireṇuṃ na jātu martyo 'bhilabheta yastu / (23.1) Par.?

śrīviṣṇupadyā manujastulasyāḥ śvasañchavo yastu na veda gandham // (23.2) Par.?

tadaśmasāraṃ hṛdayaṃ batedaṃ yadgṛhyamāṇairharināmadheyaiḥ / (24.1) Par.?

na vikriyetātha yadā vikāro netre jalaṃ gātraruheṣu harṣaḥ // (24.2) Par.?

athābhidhehyaṅga mano'nukūlaṃ prabhāṣase bhāgavatapradhānaḥ / (25.1) Par.?

yadāha vaiyāsakirātmavidyāviśārado nṛpatiṃ sādhu pṛṣṭaḥ // (25.2) Par.?