Texts

Help

Select a text:
Bibliography
Select a chapter:
 (no revisions)
Associated topic(s): Kaṃsa, Kṛṣṇa, avatāras

Show parallels  Show headlines
Use dependency labeler
Chapter id: 17331
  • Click on a sentence to show its analysis
  • Keep the mouse pointer over a lemma to show its meanings.
vaiśaṃpāyana uvāca / (1.1) Par.?
so ājñāpayata saṃrabdhaḥ sacivān ātmano hitān / (1.2) Par.?
yattā bhavata sarve vai devakyā garbhakṛntane // (1.3) Par.?
prathamād eva hantavyā garbhās te sarva eva hi / (2.1) Par.?
mūlād eva hi hantavyaḥ so 'nartho yatra saṃśayaḥ // (2.2) Par.?
devakī ca gṛhe guptā pracchannair abhirakṣitā / (3.1) Par.?
svairaṃ caratu visrabdhā madbalair yatnam āsthitaiḥ // (3.2) Par.?
māsān vai puṣpamāsādīn gaṇayantu mama striyaḥ / (4.1) Par.?
pariṇāme tu garbhasya śeṣaṃ jñāsyāmahe vayam // (4.2) Par.?
vasudevaś ca saṃrakṣyaḥ strīsanāthāstu bhūmiṣu / (5.1) Par.?
apramattair mama hitai rātrāv ahani caiva ha / (5.2) Par.?
strībhir varṣavaraiś caiva vaktavyaṃ na ca kāraṇam // (5.3) Par.?
eṣa mānuṣako yatno mānuṣair eva sādhyate / (6.1) Par.?
śrūyatāṃ yena daivaṃ hi madvidhaiḥ pratihanyate // (6.2) Par.?
mantragrāmaiḥ suvihitair auṣadhaiś ca suyojitaiḥ / (7.1) Par.?
yatnena cānukūlena daivam apy anuvartate // (7.2) Par.?
evaṃ sa yatnavān kaṃso devakīgarbhakṛntane / (8.1) Par.?
bhayena mantrayāmāsa śrutārtho nāradāt sa vai // (8.2) Par.?
evaṃ śrutvā prayatnaṃ vai kaṃsasyāriṣṭasaṃjñitam / (9.1) Par.?
antardhānaṃ gato viṣṇuś cintayāmāsa vīryavān // (9.2) Par.?
saptemān devakīgarbhān bhojaputro vadhiṣyati / (10.1) Par.?
aṣṭame ca mayā garbhe kāryam ādhānam ātmanaḥ // (10.2) Par.?
tasya cintayatas tv evaṃ pātālam agaman manaḥ / (11.1) Par.?
yatra te garbhaśayanāḥ ṣaḍgarbhā nāma dānavāḥ // (11.2) Par.?
vikrāntavapuṣo dīptās te 'mṛtaprāśanopamāḥ / (12.1) Par.?
amarapratimā yuddhe putrā vai kālaneminaḥ // (12.2) Par.?
upāsāṃcakrire daityāḥ purā lokapitāmaham / (13.1) Par.?
tapyamānās tapas tīvraṃ jaṭāmaṇḍaladhāriṇaḥ // (13.2) Par.?
teṣāṃ prīto 'bhavad brahmā ṣaḍgarbhāṇāṃ varaṃ dadau / (14.1) Par.?
brūta vo yasya yaḥ kāmaḥ ko varo vaḥ pradīyatāṃ // (14.2) Par.?
te tu sarve samānārthā daityā brahmāṇam abruvan / (15.1) Par.?
yadi no bhagavān prītaḥ śrūyatāṃ no varo varaḥ // (15.2) Par.?
avadhyāḥ syāma bhagavan daivataiḥ samahoragaiḥ / (16.1) Par.?
śāpapraharaṇaiś cāpi niyataiḥ paramarṣibhiḥ // (16.2) Par.?
yakṣagandharvapatibhiḥ siddhacāraṇamānavaiḥ / (17.1) Par.?
mā bhūd vadho no bhagavan dadāsi yadi no varam // (17.2) Par.?
tān uvāca tato brahmā suprītenāntarātmanā / (18.1) Par.?
bhavadbhir yad idaṃ proktaṃ sarvam etad bhaviṣyati // (18.2) Par.?
ṣaḍgarbhāṇāṃ varaṃ dattvā svayaṃbhūs tridivaṃ gataḥ / (19.1) Par.?
tato hiraṇyakaśipuḥ saroṣo vākyam abravīt // (19.2) Par.?
mām utsṛjya varo yasmād vṛto vaḥ padmasaṃbhavāt / (20.1) Par.?
tasmād vas tyājitaḥ snehaḥ śatrubhūtāṃs tyajāmy aham // (20.2) Par.?
ṣaḍgarbhā iti yo 'yaṃ vaḥ śabdaḥ pitrābhivardhitaḥ / (21.1) Par.?
sa eva vo garbhagatān pitā sarvān vadhiṣyati // (21.2) Par.?
ṣaḍ eva devakīgarbhāḥ ṣaḍgarbhā vai mahāsurāḥ / (22.1) Par.?
bhaviṣyanti tataḥ kaṃso garbhasthān vo vadhiṣyati // (22.2) Par.?
jagāmātha tato viṣṇuḥ pātālaṃ yatra te 'surāḥ / (23.1) Par.?
ṣaḍgarbhāḥ saṃyatāḥ santi jalagarbhagṛheśayāḥ // (23.2) Par.?
sa dadarśa jale suptān ṣaḍgarbhān garbhasaṃsthitān / (24.1) Par.?
nidrayā kālarūpiṇyā sarvān antarhitān iva // (24.2) Par.?
svapnarūpeṇa teṣāṃ vai viṣṇur dehān athāviśat / (25.1) Par.?
prāṇeśvarāṃś ca niṣkṛṣya nidrāyai pradadau tadā // (25.2) Par.?
tāṃ covāca tadā nidrāṃ viṣṇuḥ satyaparākramaḥ / (26.1) Par.?
gaccha nidre mayotsṛṣṭā devakībhavanāntikam // (26.2) Par.?
imān prāṇeśvarān gṛhya ṣaḍgarbhān nāma dehinaḥ / (27.1) Par.?
ṣaṭsu garbheṣu devakyā yojayasva yathākramam // (27.2) Par.?
jāteṣv eteṣu garbheṣu nīteṣu ca yamakṣayam / (28.1) Par.?
kaṃsasya viphale yatne devakyāḥ saphale śrame // (28.2) Par.?
prasādaṃ te kariṣyāmi matprasādasamaṃ bhuvi / (29.1) Par.?
yena sarvasya lokasya devi devī bhaviṣyasi // (29.2) Par.?
saptamo devakīgarbho yo 'ṃśaḥ saumyo mamāgrajaḥ / (30.1) Par.?
sa saṃkrāmayitavyas te saptame māsi rohiṇīm // (30.2) Par.?
saṃkarṣaṇāt tu garbhasya sa tu saṃkarṣaṇo yuvā / (31.1) Par.?
bhaviṣyaty agrajo bhrātā mama śītāṃśudarśanaḥ // (31.2) Par.?
patito devakīgarbhaḥ saptamo 'yaṃ bhayād iti / (32.1) Par.?
aṣṭame mayi garbhasthe kaṃso yatnaṃ kariṣyati // (32.2) Par.?
yā tu sā nandagopasya dayitā kaṃsagopateḥ / (33.1) Par.?
yaśodā nāma bhadraṃ te bhāryā gopakulodvahā // (33.2) Par.?
tasyās tvaṃ navamo 'smākaṃ kule garbho bhaviṣyasi / (34.1) Par.?
navamyām eva saṃjātā kṛṣṇapakṣasya vai tithau // (34.2) Par.?
ahaṃ tv abhijito yoge niśāyā yauvane gate / (35.1) Par.?
ardharātre kariṣyāmi garbhamokṣaṃ yathāsukham // (35.2) Par.?
aṣṭamasya tu māsasya jātāv āvāṃ tataḥ samam / (36.1) Par.?
prāpsyāvo garbhavyatyāsaṃ prāpte kaṃsasya śāsane // (36.2) Par.?
ahaṃ yaśodāṃ yāsyāmi tvaṃ devi bhaja devakīm / (37.1) Par.?
āvayor garbhavyatyāse kaṃso gacchatu mūḍhatām // (37.2) Par.?
tatas tvāṃ gṛhya caraṇe śilāyāṃ nirasiṣyati / (38.1) Par.?
nirasyamānā gagane sthānaṃ prāpsyasi śāśvatam // (38.2) Par.?
macchavīsadṛśī kṛṣṇā saṃkarṣaṇasamānanā / (39.1) Par.?
bibhratī vipulān bāhūn mama bāhūpamān bhuvi // (39.2) Par.?
triśikhaṃ śūlam udyamya khaḍgaṃ ca kanakatsarum / (40.1) Par.?
pātrīṃ ca pūrṇāṃ madhunaḥ paṅkajaṃ ca sunirmalam // (40.2) Par.?
vasānā mecakaṃ kṣaumaṃ pītenottaravāsasā / (41.1) Par.?
śaśiraśmiprakāśena hāreṇorasi rājatā // (41.2) Par.?
divyakuṇḍalapūrṇābhyāṃ śravaṇābhyāṃ vibhūṣitā / (42.1) Par.?
candrasāpatnyabhūtena tvaṃ mukhena virājitā // (42.2) Par.?
mukuṭena tricakreṇa keśabandhena śobhitā / (43.1) Par.?
bhujagābhoganirghoṣair bāhubhiḥ parighopamaiḥ // (43.2) Par.?
dhvajena śikhibarhāṇām ucchritena samīpataḥ / (44.1) Par.?
aṅgajena mayūrāṇām aṅgadena ca bhāsvatā // (44.2) Par.?
kīrṇā bhūtagaṇair ghorair mannideśānuvartinī / (45.1) Par.?
kaumāraṃ vratam āsthāya tridivaṃ tvaṃ gamiṣyasi // (45.2) Par.?
tatra tvāṃ śatadṛk śakro matpradiṣṭena karmaṇā / (46.1) Par.?
abhiṣekeṇa divyena daivataiḥ saha yokṣyate // (46.2) Par.?
tatraiva tvāṃ bhaginyarthe grahīṣyati sa vāsavaḥ / (47.1) Par.?
kuśikasya tu gotreṇa kauśikī tvaṃ bhaviṣyasi // (47.2) Par.?
sa te vindhye nagaśreṣṭhe sthānaṃ dāsyati śāśvatam / (48.1) Par.?
tataḥ sthānasahasrais tvaṃ pṛthivīṃ śobhayiṣyasi // (48.2) Par.?
tataḥ sumbhanisumbhau ca dānavau nagacāriṇau / (49.1) Par.?
tau ca kṛtvā manasi māṃ sānugau nāśayiṣyasi // (49.2) Par.?
trailokyacāriṇī sā tvaṃ bhuvi satyopayācitā / (50.1) Par.?
bhaviṣyasi mahābhāge varadā kāmarūpiṇī // (50.2) Par.?
kṛtānuyātrā bhūtais tvaṃ nityaṃ māṃsabalipriyā / (51.1) Par.?
tithau navamyāṃ pūjāṃ ca prāpsyase sapaśukriyām // (51.2) Par.?
ye ca tvāṃ matprabhāvajñāḥ praṇamiṣyanti mānavāḥ / (52.1) Par.?
na teṣāṃ durlabhaṃ kiṃcit putrato dhanato 'pi vā // (52.2) Par.?
kāntāreṣv avasannānāṃ magnānāṃ ca mahārṇave / (53.1) Par.?
dasyubhir vā niruddhānāṃ tvaṃ gatiḥ paramā nṛṇām // (53.2) Par.?
tvaṃ siddhiḥ śrīr dhṛtiḥ kīrtir hrīr vidyā saṃnatir matiḥ / (54.1) Par.?
saṃdhyā rātriḥ prabhā nidrā kālarātris tathaiva ca // (54.2) Par.?
nṛṇāṃ bandhaṃ vadhaṃ ghoraṃ putranāśaṃ dhanakṣayam / (55.1) Par.?
vyādhimṛtyubhayaṃ caiva pūjitā śamayiṣyasi // (55.2) Par.?
mohayitvā ca taṃ kaṃsam ekā tvaṃ bhokṣyase jagat / (56.1) Par.?
svavṛddhyartham ahaṃ caiva kariṣye kaṃsaghātanam // (56.2) Par.?
evaṃ tu tāṃ samādiśya gato 'ntardhānam īśvaraḥ / (57.1) Par.?
sā cāpi taṃ namaskṛtya tathāstv iti vinirgatā // (57.2) Par.?
Duration=0.64218807220459 secs.