Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17552

Click on a sentence to show its analysis
Keep the mouse pointer over a lemma to show its meanings.

tataḥ prātaḥ punā ratnaprabhāsadmani taṃ sthitam / (1.1) Par.?

naravāhanadattaṃ te gomukhādyā upāgaman // (1.2) Par.?

marubhūtiḥ sa tu manākpītāsavamadālasaḥ / (2.1) Par.?

baddhapuṣpo 'nuliptaś ca vilambita upāyayau // (2.2) Par.?

praskhalatpadayā gatyā hāsayaṃstaṃ girā tadā / (3.1) Par.?

tannītirañjitamukho narmaṇovāca gomukhaḥ // (3.2) Par.?

yaugandharāyaṇasuto bhūtvā nītiṃ na vetsi kim / (4.1) Par.?

prātaḥ pibasi madyaṃ yanmattaḥ prabhumupaiṣi ca // (4.2) Par.?

tac chrutvā taṃ krudhā kṣībo marubhūtir jagāda saḥ / (5.1) Par.?

etan me prabhuṇā vācyamamunā guruṇāpi vā // (5.2) Par.?

tvaṃ tu kaḥ śikṣayasi mām ityakātmaja re vada / (6.1) Par.?

ity uktavantaṃ taṃ bhūyo hasannāha sa gomukhaḥ // (6.2) Par.?

bhartsayanty avinītaṃ kiṃ svavācā prabhaviṣṇavaḥ / (7.1) Par.?

avaśyaṃ tasya vaktavyaṃ tatpārśvasthair yathocitam // (7.2) Par.?

satyaṃ cetyakaputro 'haṃ tvaṃ mantrivṛṣabhaḥ punaḥ / (8.1) Par.?

vakti te jāḍyam evaitadviṣāṇe staḥ paraṃ na te // (8.2) Par.?

ity ukto gomukhenātra marubhūtirabhāṣata / (9.1) Par.?

tavaiva vṛṣabhatvaṃ hi gomukhasyopapadyate // (9.2) Par.?

tathāpi yad adānto 'si so 'yaṃ te jātisaṃkaraḥ / (10.1) Par.?

etac chrutvātra sarveṣu hasatsūvāca gomukhaḥ // (10.2) Par.?

marubhūtirayaṃ ratnaṃ jātu yatnaśatairapi / (11.1) Par.?

avedhyaṃ vajrametasmin guṇaṃ ko hi praveśayet // (11.2) Par.?

anyatpuruṣaratnaṃ tad yad ayatnena vedhyate / (12.1) Par.?

sikatāsetuvṛttāntaṃ śṛṇu cātra nidarśanam // (12.2) Par.?

āsīt ko'pi pratiṣṭhāne tapodatta iti dvijaḥ / (13.1) Par.?

sa pitrā kleśyamāno 'pi vidyā nādhyaita śaiśave // (13.2) Par.?

anantaraṃ garhyamāṇaḥ sarvairanuśayānvitaḥ / (14.1) Par.?

sa vidyāsiddhaye taptuṃ tapo gaṅgātaṭaṃ yayau // (14.2) Par.?

tatrāśritogratapasas tasya taṃ vīkṣya vismitaḥ / (15.1) Par.?

vārayiṣyandvijacchadmā śakro nikaṭamāyayau // (15.2) Par.?

āgatya ca sa gaṅgāyāstaṭāccikṣepa vāriṇi / (16.1) Par.?

uddhṛtyoddhṛtya sikatāḥ paśyatas tasya sormiṇi // (16.2) Par.?

tad dṛṣṭvā muktamaunas taṃ tapodattaḥ sa pṛṣṭavān / (17.1) Par.?

aśrāntaḥ kim idaṃ brahman karoṣīti sakautukam // (17.2) Par.?

nirbandhapṛṣṭaḥ sa ca taṃ śakro 'vādīddvijākṛtiḥ / (18.1) Par.?

setuṃ badhnāmi gaṅgāyāṃ tārāya prāṇināmiti // (18.2) Par.?

tato 'bravīt tapodattaḥ setuḥ kiṃ mūrkha badhyate / (19.1) Par.?

gaṅgāyāmoghahāryābhiḥ sikatābhiḥ kadācana // (19.2) Par.?

tac chrutvā tam uvācaivaṃ śakro 'tha dvijarūpadhṛk / (20.1) Par.?

yadyevaṃ vetsi tadvidyāṃ vinā pāṭhaṃ vinā śrutam // (20.2) Par.?

kasmād vratopavāsādyais tvaṃ sādhayitumudyataḥ / (21.1) Par.?

iyaṃ śaśaviṣāṇecchā vyomni vā citrakalpanā // (21.2) Par.?

anakṣaro lipinyāso yad vidyādhyayanaṃ vinā / (22.1) Par.?

evaṃ yadi bhavedetannahyadhīyīta kaścana // (22.2) Par.?

ity uktaḥ sa tapodattaḥ śakreṇa dvijarūpiṇā / (23.1) Par.?

vicārya tattathā matvā tapastyaktvā gṛhaṃ yayau // (23.2) Par.?

evaṃ sudhīḥ sukhaṃ bodhyo marubhūtistu durmatiḥ / (24.1) Par.?

na śakyate bodhayituṃ bodhyamānaś ca kupyati // (24.2) Par.?

ity ukte gomukhenātra madhye hariśikho 'bhyadhāt / (25.1) Par.?

bhavanti sukhasaṃbodhyāḥ satyaṃ deva sumedhasaḥ // (25.2) Par.?

tathā ca pūrvamabhavad vārāṇasyāṃ dvijottamaḥ / (26.1) Par.?

kaścid virūpaśarmākhyo virūpo nirdhanastathā // (26.2) Par.?

sa ca vairūpyadaurgatyanirviṇṇas tat tapovanam / (27.1) Par.?

gatvā tīvraṃ tapaścakre rūpadraviṇakāṅkṣayā // (27.2) Par.?

tataḥ surapatiḥ kṛtvā vikṛtavyādhitākṛteḥ / (28.1) Par.?

jambukasyādhamaṃ rūpametyāgre tasya tasthivān // (28.2) Par.?

taṃ vilokya parītāṅgamakṣikābhir alakṣaṇam / (29.1) Par.?

virūpaśarmā śanakairmanasā vimamarśa saḥ // (29.2) Par.?

īdṛśā api jāyante saṃsāre pūrvakarmabhiḥ / (30.1) Par.?

tanmamālpamidaṃ dhātrā kṛtaṃ yannedṛśaḥ kṛtaḥ // (30.2) Par.?

ko daivalikhitaṃ bhogaṃ laṅghayed ity avetya saḥ / (31.1) Par.?

virūpaśarmā śanakais tapaḥsthānād yayau gṛham // (31.2) Par.?

itthaṃ subuddhiralpena deva yatnena bodhyate / (32.1) Par.?

na kṛcchreṇāpi mahatā nirvicāramatiḥ punaḥ // (32.2) Par.?

evaṃ hariśikhenokte śraddadhāne ca gomukhe / (33.1) Par.?

marubhūtir anātmajñaḥ kṣībo 'tikupito 'bravīt // (33.2) Par.?

balaṃ gomukha vācy eva na tu bāhvorbhavādṛśām / (34.1) Par.?

vācālaiḥ kalahaḥ klībais trapākṛd bāhuśālinām // (34.2) Par.?

iti bruvāṇaṃ yuddhecchuṃ marubhūtiṃ smitānanaḥ / (35.1) Par.?

naravāhanadatto 'tha prabhuḥ svayamasāntvayat // (35.2) Par.?

visṛjya taṃ ca svagṛhaṃ taṃ bālasakhivatsalaḥ / (36.1) Par.?

kurvandivasakāryāṇi nināya tadahaḥ sukham // (36.2) Par.?

prātaś ca sarveṣv āyāteṣv eṣu mantriṣu taṃ priyā / (37.1) Par.?

ratnaprabhā jagādaivaṃ marubhūtau trapānate // (37.2) Par.?

tvamāryaputra sukṛtī yasya te sacivā ime / (38.1) Par.?

ābālyasnehanigaḍanibaddhāḥ śuddhacetasaḥ // (38.2) Par.?

ete ca dhanyā yeṣāṃ tvam īdṛk snehaparaḥ prabhuḥ / (39.1) Par.?

prākkarmopārjitā yūyamanyonyasya na saṃśayaḥ // (39.2) Par.?

evam ukte tayā rājñyā vasantakasuto 'bravīt / (40.1) Par.?

naravāhanadattasya narmamittraṃ tapantakaḥ // (40.2) Par.?

satyaṃ pūrvārjito 'yaṃ naḥ svāmī sarvaṃ hi tiṣṭhati / (41.1) Par.?

pūrvakarmavaśādeva tathā ca śrūyatāṃ kathā // (41.2) Par.?

abhūcchrīkaṇṭhanilaye vilāsapuranāmani / (42.1) Par.?

pure vinayaśīlākhyo nāmnānvarthena bhūpatiḥ // (42.2) Par.?

tasya prāṇasamā devī babhūva kamalaprabhā / (43.1) Par.?

tayā sākaṃ ca bhogaikasaktas tasthau cirāya saḥ // (43.2) Par.?

atha kālena bhūpasya jarā saundaryahāriṇī / (44.1) Par.?

tasyāvirāsīt tāṃ dṛṣṭvā sa cāsīdatiduḥkhitaḥ // (44.2) Par.?

himāhatamivāmbhojaṃ palitamlānam ānanam / (45.1) Par.?

darśayāmi kathaṃ devyai hā dhiṅme maraṇaṃ varam // (45.2) Par.?

ityādi cintayan so 'tha sadasy āhūya bhūpatiḥ / (46.1) Par.?

vaidyaṃ taruṇacandrākhyaṃ nijagāda kṛtādaraḥ // (46.2) Par.?

bhadra bhaktastvamasmāsu kuśalaś ceti pṛcchyase / (47.1) Par.?

apy asti kācid yuktiḥ sā yayeyaṃ vāryate jarā // (47.2) Par.?

tac chrutvaiva kalāmātrasāro vāñchansa pūrṇatām / (48.1) Par.?

vakras taruṇacandro 'ntaḥ satyanāmā vyacintayat // (48.2) Par.?

mūrkho 'yaṃ nṛpatirbhojyo mayā vetsyāmi ca kramāt / (49.1) Par.?

iti saṃcintya sa bhiṣaktam evam avadannṛpam // (49.2) Par.?

ekastvaṃ bhūgṛhe māsānaṣṭau yadidamauṣadham / (50.1) Par.?

upayuṅkṣe tato deva jarāmapanayāmi te // (50.2) Par.?

etac chrutvaiva sa nṛpastadbhūgṛhamakārayat / (51.1) Par.?

kṣamante na vicāraṃ hi mūrkhā viṣayalolupāḥ // (51.2) Par.?

rājansattvena pūrveṣāṃ tapasā ca damena ca / (52.1) Par.?

rasāyanāni siddhāni prabhāveṇa yugasya ca // (52.2) Par.?

adyatve ca śrutānyeva rasānyetāni bhūpate / (53.1) Par.?

sāmagryabhāvāt kurvanti yatpratyuta viparyayam // (53.2) Par.?

tanna yuktamidaṃ dhūrtāḥ krīḍantyeva hi bāliśaiḥ / (54.1) Par.?

kiṃ deva samatikrāntamāgacchati punarvayaḥ // (54.2) Par.?

ityādi mantriṇāṃ vākyaṃ na lebhe tasya cāntaram / (55.1) Par.?

āvṛte hṛdaye rājño gāḍhayā bhogatṛṣṇayā // (55.2) Par.?

viveśa ca girā tasya bhiṣajastatsa bhūgṛham / (56.1) Par.?

ekākī vāritāśeṣarājocitaparicchadaḥ // (56.2) Par.?

eko vaidyaḥ svabhṛtyena sahaikenaiva tasya saḥ / (57.1) Par.?

tatrauṣadhādicaryāyāṃ babhūva paricārakaḥ // (57.2) Par.?

tasthau ca tatra sa nṛpo bhūmigarbhe tamomaye / (58.1) Par.?

ajñāna iva bhūyastvāt prasṛte hṛdayādbahiḥ // (58.2) Par.?

gateṣu cātra māseṣu ṣaṇmātreṣv asya bhūpateḥ / (59.1) Par.?

vilokyābhyadhikībhūtāṃ tāṃ jarāṃ sa śaṭho bhiṣak // (59.2) Par.?

ājahāra kam apy ekaṃ puruṣaṃ tādṛśākṛtim / (60.1) Par.?

rājānaṃ tvāṃ karomīti yuvānaṃ kṛtasaṃvidam // (60.2) Par.?

tataḥ suraṅgāṃ bhūgehe dūrād dattvātra taṃ nṛpam / (61.1) Par.?

suptaṃ hatvā tayā nītvā so 'ndhakūpe 'kṣipanniśi // (61.2) Par.?

tayaiva puruṣaṃ taṃ ca taruṇaṃ tatra bhūgṛhe / (62.1) Par.?

praveśya sthāpayāmāsa suraṅgāṃ pidadhe ca tām // (62.2) Par.?

samprāpya mūḍhabuddhīnām avakāśaṃ nirargalam / (63.1) Par.?

ucchṛṅkhalamatiḥ kuryātprākṛtaḥ kiṃ na sāhasam // (63.2) Par.?

tataḥ sa sarvāḥ prakṛtīr vaidyo 'nyedyur abhāṣata / (64.1) Par.?

ajaro 'yaṃ kṛtas tāvat ṣaḍbhir māsair mayā nṛpaḥ // (64.2) Par.?

māsadvayena caitasya rūpamanyadbhaviṣyati / (65.1) Par.?

tad dūrāt kiṃcid ātmānam asmai darśayatādhunā // (65.2) Par.?

ity uktvā bhūgṛhadvāri sarvānānīya darśayan / (66.1) Par.?

tasmai nyavedayadyūne sa teṣāṃ nāmakarmaṇī // (66.2) Par.?

ity antaḥpuraparyantaṃ māsadvitayamanvaham / (67.1) Par.?

bhūgṛhe 'bodhayadyuktyā yuvānaṃ puruṣaṃ sa tam // (67.2) Par.?

prāpte ca samaye taṃ sa bhogapuṣṭaṃ dharāgṛhāt / (68.1) Par.?

ujjahārājaraḥ so 'yaṃ jāto rājetyudāharan // (68.2) Par.?

tataś cauṣadhisaṃsiddhiḥ saiṣa rājeti tatra saḥ / (69.1) Par.?

paryavāryata hṛṣṭābhiḥ pumān prakṛtibhir yuvā // (69.2) Par.?

atha snātastathā labdharājyo rājocitāḥ kriyāḥ / (70.1) Par.?

cakāra sa sahāmātyaiḥ sotsavastaruṇaḥ pumān // (70.2) Par.?

tadāprabhṛti tasthau ca kurvanrājyaṃ sukhena saḥ / (71.1) Par.?

nāmājara iti prāpya krīḍannantaḥpuraiḥ saha // (71.2) Par.?

sarve caitam asaṃbhāvyavaidyavṛttāviśaṅkinaḥ / (72.1) Par.?

rasāyanaparāvṛttarūpaṃ svaṃ menire prabhum // (72.2) Par.?

prītyānurañjya prakṛtīrdevīṃ ca kamalaprabhām / (73.1) Par.?

so 'tha svamitrair ajaro rājābhuṅkta saha śriyam // (73.2) Par.?

mittraṃ bheṣajacandrākhyaṃ tathānyaṃ padmadarśanam / (74.1) Par.?

ubhe ātmasame cakre hastyaśvagrāmapūrite // (74.2) Par.?

vaidyaṃ taruṇacandraṃ tu prakriyārtham amānayat / (75.1) Par.?

na tu tasmin viśaśvāsa satyadharmacyutātmani // (75.2) Par.?

ekadā ca sa vaidyastaṃ svairaṃ rājānam abravīt / (76.1) Par.?

kiṃ mām agaṇayitvaiva svātantryeṇa viceṣṭase // (76.2) Par.?

tadvismṛtaṃ yadā rājā bhavāniha mayā kṛtaḥ / (77.1) Par.?

tac chrutvaiva sa rājā tam ajaro vaidyamabhyadhāt // (77.2) Par.?

aho mūrkho 'si kaḥ kasya kartā dātāpi vā pumān / (78.1) Par.?

prāktanaṃ karma hi sakhe karoti ca dadāti ca // (78.2) Par.?

atastvaṃ mā kṛthā darpaṃ tapaḥsiddhamidaṃ hi me / (79.1) Par.?

etac ca darśayiṣyāmi pratyakṣamacireṇa te // (79.2) Par.?

ity uktas tena sa trasta iva vaidyo vyacintayat / (80.1) Par.?

aho kim apy adhṛṣṭo 'yaṃ dhīro jñānīva bhāṣate // (80.2) Par.?

yadrahasyāntaraṅgatvaṃ svāmisaṃvananaṃ param / (81.1) Par.?

tad api kṣamate nāsminnanuvartyastadeṣa me // (81.2) Par.?

paśyāmi tāvatkimayaṃ sākṣānme darśayiṣyati / (82.1) Par.?

ity ālocya tathety evaṃ bhiṣaktūṣṇīṃ babhūva saḥ // (82.2) Par.?

anyedyuścājaro rājā paribhrāntuṃ sa niryayau / (83.1) Par.?

krīḍaṃstaruṇacandrādyaiḥ sevyamānaḥ suhṛtsakhaḥ // (83.2) Par.?

bhrāmyan prāpto nadītīraṃ yasyā madhye dadarśa saḥ / (84.1) Par.?

pravāhe vahadāyātaṃ sauvarṇaṃ padmapañcakam // (84.2) Par.?

ānāyayac ca bhṛtyaistadgṛhītvā pravilokya ca / (85.1) Par.?

vaidyaṃ taruṇacandraṃ taṃ jagāda nikaṭasthitam // (85.2) Par.?

nadītīreṇa gaccha tvamupariṣṭādito 'munā / (86.1) Par.?

utpattisthānam eteṣāṃ paṅkajānāṃ gaveṣaya // (86.2) Par.?

tac ca dṛṣṭvā tvamāgaccheḥ sumahatkautukaṃ hi me / (87.1) Par.?

adbhuteṣveṣu padmeṣu tvaṃ ca dakṣaḥ suhṛnmama // (87.2) Par.?

ity uktvā preṣitas tena rājñā sa vivaśo bhiṣak / (88.1) Par.?

yathādiṣṭena mārgeṇa tatheti prayayau tataḥ // (88.2) Par.?

rājāpyayāsīt svapuraṃ sa ca gacchan bhiṣak kramāt / (89.1) Par.?

prāpad āyatanaṃ śaivaṃ nadyās tasyās taṭasthitam // (89.2) Par.?

tadagre tatsarittīrthataṭe vaṭamahātarum / (90.1) Par.?

apaśyal lambamānaṃ ca tasmin narakaraṅkakam // (90.2) Par.?

tataḥ śrāntaḥ kṛtasnāno devam abhyarcya tatra saḥ / (91.1) Par.?

yāvattiṣṭhati megho 'tra tāvadāgatya vṛṣṭavān // (91.2) Par.?

meghābhivṛṣṭāt tasmāc ca vaṭaśākhāvalambinaḥ / (92.1) Par.?

mānuṣāsthikaraṅkādye nyapataṃstoyabindavaḥ // (92.2) Par.?

nadyāstīrthajale tasyāstebhyastāni dadarśa saḥ / (93.1) Par.?

jāyamānāni padmāni sauvarṇāni kṣaṇādbhiṣak // (93.2) Par.?

aho kimidamāścaryaṃ kaṃ pṛcchāmy ajane vane / (94.1) Par.?

yadi vā veda kaḥ sargaṃ bahvāścaryamayaṃ vidheḥ // (94.2) Par.?

dṛṣṭastāvanmayā so 'yaṃ kanakāmbhoruhākaraḥ / (95.1) Par.?

tadetatprakṣipāmyatra tīrthe narakalevaram // (95.2) Par.?

dharmo 'stu vaitatpṛṣṭhe ca jāyantām ambujāni vā / (96.1) Par.?

ity ālocya sa vṛkṣāgrāt tataḥ kaṅkālamakṣipat // (96.2) Par.?

nītvā ca taddinaṃ tatra siddhakāryo 'pare 'hani / (97.1) Par.?

pratyāvartiṣṭa sa tato bhiṣagdeśaṃ nijaṃ prati // (97.2) Par.?

dinaiḥ katipayaiḥ prāpa tadvilāsapuraṃ ca saḥ / (98.1) Par.?

tasyājarasya nikaṭaṃ rājño 'dhvakṛśadhūsaraḥ // (98.2) Par.?

dvāḥsthenāvedito yāvatpraviśya caraṇānataḥ / (99.1) Par.?

sa pṛṣṭakuśalo rājñā vṛttāntaṃ vakti taṃ bhiṣak // (99.2) Par.?

tāvat sa vijanaṃ kṛtvā rājā taṃ svayam abhyadhāt / (100.1) Par.?

dṛṣṭaṃ hemāmbujotpattisthānaṃ tadbhavatā sakhe // (100.2) Par.?

tatkṣetramuttamaṃ caivaṃ tatra dṛṣṭastvayā ca saḥ / (101.1) Par.?

karaṅko vaṭavṛkṣe tāṃ prāktanīṃ viddhi me tanum // (101.2) Par.?

tadūrdhvapādena mayā lambamānena kurvatā / (102.1) Par.?

tapas tatra purā tyaktam upaśoṣya kalevaram // (102.2) Par.?

tapasas tasya māhātmyātkaraṅkātpracyutais tataḥ / (103.1) Par.?

meghāmbubhis te jāyante padmās tatra hiraṇmayāḥ // (103.2) Par.?

sa karaṅkaś ca yatkṣiptastīrthe tatra mama tvayā / (104.1) Par.?

yuktaṃ tadvihitaṃ tvaṃ hi mittraṃ me pūrvajanmani // (104.2) Par.?

eṣa bheṣajacandraś ca tathāsau padmadarśanaḥ / (105.1) Par.?

etāvapi ca tajjanmasaṃgatau suhṛdau mama // (105.2) Par.?

tattasya tapaso mittra prāktanasya prabhāvataḥ / (106.1) Par.?

jātismaratvaṃ jñānaṃ ca rājyaṃ copanataṃ mama // (106.2) Par.?

tadetaddarśitaṃ tubhyaṃ yuktyā pratyakṣato mayā / (107.1) Par.?

bhavatkṣiptāsthisaṃghātaṃ sābhijñānaṃ ca varṇitam // (107.2) Par.?

tasmāttubhyaṃ mayā rājyamadāyīti mama tvayā / (108.1) Par.?

ahaṃkāro na kartavyaḥ sthāpyaṃ ceto na duḥsthitam // (108.2) Par.?

vinā hi prāktanaṃ karma na dātā ko'pi kasyacit / (109.1) Par.?

āgarbhāj jantur aśnāti pūrvakarmataroḥ phalam // (109.2) Par.?

ity uktaḥ sa bhiṣaktena rājñā dṛṣṭvā tathaiva tat / (110.1) Par.?

asaṃtoṣaṃ punarnaiva tatsevāsukhito 'bhyagāt // (110.2) Par.?

so 'pi rājājaro jātismarastaṃ bhiṣajaṃ tataḥ / (111.1) Par.?

saṃmānyārthapradānena yathocitam udāradhīḥ // (111.2) Par.?

antaḥpuraiḥ suhṛdbhiś ca sākaṃ nayajitāṃ mahīm / (112.1) Par.?

bhuñjānaḥ sukṛtaprāptāṃ sukham āstāpakaṇṭakām // (112.2) Par.?

evaṃ bhavati loke 'smin deva sarvasya sarvadā / (113.1) Par.?

prākkarmopārjitaṃ jantoḥ sarvam eva śubhāśubham // (113.2) Par.?

tasmāttvam api naḥ svāmī manye janmāntarārjitaḥ / (114.1) Par.?

satsv anyeṣv evam asmākaṃ prasanno 'sy anyathā katham // (114.2) Par.?

ity apūrvaramaṇīyavicitrāṃ kāntayā saha tapantakavaktrāt / (115.1) Par.?

saṃniśamya sa kathām udatiṣṭhat snātum atra naravāhanadattaḥ // (115.2) Par.?

kṛtasnāno gatvā nikaṭamatha vatseśanṛpateḥ pitur muñcan mātur muhur amṛtavarṣaṃ nayanayoḥ / (116.1) Par.?

kṛtāhāras tābhyāṃ saha sadayito mantrisahitaḥ sukhair āpānādyair dinam anayad etāṃ ca rajanīm // (116.2) Par.?

Duration=0.87719011306763 secs.