Texts

śrīmārkaṇḍeya uvāca / (1.1) Par.?

atraivodāharantīmam itihāsaṃ purātanam / (1.2) Par.?

kailāse pṛcchate bhaktyā ṣaṇmukhāya śivoditam // (1.3) Par.?

īśvara uvāca / (2.1) Par.?

pūrvaṃ tretāyuge skanda hato rāmeṇa rāvaṇaḥ / (2.2) Par.?

caturdaśa tadā koṭyo nihatā brahmarakṣasām // (2.3) Par.?

hateṣu teṣu vai tatra rakṣaṇāya divaukasām / (3.1) Par.?

mahānandas tadā jātastriṣu lokeṣu putraka // (3.2) Par.?

tataḥ sītāṃ samāsādya samaṃ vānarapuṃgavaiḥ / (4.1) Par.?

rāmo'pyayodhyām āyāto bharatena kṛtotsavaḥ / (4.2) Par.?

tasmai samarpayāmāsa sa rājyaṃ lakṣmaṇāgrajaḥ // (4.3) Par.?

tasminpraśāsati tato rājyaṃ nihatakaṇṭakam / (5.1) Par.?

kṛtakāryo 'tha hanumānkailāsam agāt purā // (5.2) Par.?

tato nandī pratīhāro rudrāṃśam api taṃ kapim / (6.1) Par.?

na ca saṃgamayāmāsa rudreṇāghaughahāriṇā // (6.2) Par.?

tena pṛṣṭastadā nandī kiṃ mayā pātakaṃ kṛtam / (7.1) Par.?

yena rudravapuḥ puṇyaṃ na paśyāmyambikānvitam // (7.2) Par.?

nandyuvāca / (8.1) Par.?

tvayāvataraṇaṃ cakre kapīndrāmarahetunā / (8.2) Par.?

tathāpi hi kṛtaṃ pāpam upabhogena śāmyati // (8.3) Par.?

hanumān uvāca / (9.1) Par.?

kiṃ mayākāri tatpāpaṃ nandindevārthakāriṇā / (9.2) Par.?

rākṣasāśca hatā duṣṭā viprayajñāṅgaghātinaḥ // (9.3) Par.?

tatas tadālāpakutūhalī haro nijāṃśabhājaṃ kapim ugratejasam / (10.1) Par.?

uvāca dvārāntaradattadṛṣṭiḥ puraḥsthitaṃ prekṣya kapīśvaraṃ punaḥ // (10.2) Par.?

īśvara uvāca / (11.1) Par.?

gaṅgā gayā kape revā yamunā ca sarasvatī / (11.2) Par.?

sarvapāpaharā nadyastāsu snānaṃ samācara // (11.3) Par.?

narmadādakṣiṇe kūle tīrthaṃ paramaśobhanam / (12.1) Par.?

somanāthasamīpasthaṃ tatra tvaṃ gaccha vānara // (12.2) Par.?

tatra snātvā mahāpāpaṃ gamiṣyati mamājñayā / (13.1) Par.?

utpatya vegāddhanumāñchrīrevādakṣiṇe taṭe // (13.2) Par.?

jagāma sumahānādastapaścakre suduṣkaram / (14.1) Par.?

tasya vai tapyamānasya rakṣovadhakṛtaṃ tamaḥ // (14.2) Par.?

vilīnaṃ pārtha kālena kiyateśaprasādataḥ / (15.1) Par.?

tato devaiḥ samaṃ devastattīrthamagamaddharaḥ // (15.2) Par.?

kapim āliṅgayāmāsa varaṃ tasmai pradattavān / (16.1) Par.?

adyaprabhṛti te tīrthaṃ bhaviṣyati na saṃśayaḥ // (16.2) Par.?

kapitīrthaṃ tato jātaṃ tasthau tatra svayaṃ haraḥ / (17.1) Par.?

hanūmanteśvaro nāmnā sarvahatyāharastadā // (17.2) Par.?

tatra tīrthe tu yaḥ snātvā bhaktyā liṅgaṃ prapūjayet / (18.1) Par.?

sarvapāpāni naśyanti harasya vacanaṃ yathā // (18.2) Par.?

tatrāsthīni vilīyante piṇḍadāne 'kṣayā gatiḥ / (19.1) Par.?

yat kiṃcid dīyate tatra taddhi koṭiguṇaṃ bhavet // (19.2) Par.?

hanumān apy ayodhyāyāṃ rāmaṃ draṣṭumathāgamat / (20.1) Par.?

cakāra kuśalapraśnaṃ svasvarūpaṃ nyavedayat // (20.2) Par.?

śrīrāma uvāca / (21.1) Par.?

kurvato devakāryaṃ te mama kāryaṃ ca kurvataḥ / (21.2) Par.?

tato 'ham api pāpīyāṃstapas tapsyāmyasaṃśayam // (21.3) Par.?

tatraiva dakṣiṇe kūle revāyāḥ pāpahāriṇi / (22.1) Par.?

caturviṃśativarṣāṇi tapastepe 'tha rāghavaḥ // (22.2) Par.?

jyotiṣmatīpurīsaṃsthaḥ śrīrevāsnānamācaran / (23.1) Par.?

tasya śuśrūṣaṇaṃ cakre lakṣmaṇo 'pi tadājñayā // (23.2) Par.?

sthāpayāmāsaturliṅge tau tadā rāmalakṣmaṇau / (24.1) Par.?

prabhāvāt satyatapaso revātīre mahāmatī / (24.2) Par.?

niṣpāpatāṃ tadā vīrau jagmatū rāmalakṣmaṇau // (24.3) Par.?

tatastadā devapurogamo haro gato hi vai puṇyamunīśvaraiḥ saha / (25.1) Par.?

āgatya tīrthaṃ ca varaṃ dadau tadā nijāṃ kalāṃ tatra vimucya tīrthe // (25.2) Par.?

munibhiḥ sarvatīrthānāṃ kṣiptaṃ kumbhodakaṃ bhuvi / (26.1) Par.?

ekasthaṃ liṅganāmātha kalākumbhastathābhavat // (26.2) Par.?

kumbheśvara iti khyātastadā devagaṇārcitaḥ / (27.1) Par.?

rāmo 'pi pūjayāmāsa talliṅgaṃ devasevivatam // (27.2) Par.?

tato varaṃ dadau devo rāmakīrtyabhivṛddhaye / (28.1) Par.?

caturviṃśatime varṣe rāmo niṣpāpatāṃ gataḥ // (28.2) Par.?

yadā kanyāgataḥ paṅgurguruṇā sahito bhavet / (29.1) Par.?

tadeva devayātreyam iti devā jagurmudā // (29.2) Par.?

yathā godāvarītīrthe sarvatīrthaphalaṃ bhavet / (30.1) Par.?

tathātra revāsnānena liṅgānāṃ darśanairnṝṇām // (30.2) Par.?

kariṣyanty atra ye śrāddhaṃ pitṝṇāṃ narmadātaṭe / (31.1) Par.?

kumbheśvarasamīpasthās tatphalaṃ śṛṇu ṣaṇmukha // (31.2) Par.?

yāvanto romakūpāḥ syuḥ śarīre sarvadehinām / (32.1) Par.?

tāvad varṣapramāṇena pitṝṇām akṣayā gatiḥ // (32.2) Par.?

pṛthivyāṃ devatāḥ sarvāḥ sarvatīrthāni yāni tu / (33.1) Par.?

labhante tatphalaṃ martyā liṅgatrayavilokanāt // (33.2) Par.?

aputro labhate putraṃ nirdhano dhanamāpnuyāt / (34.1) Par.?

sarogo mucyate rogānnātra kāryā vicāraṇā // (34.2) Par.?

siṃharāśiṃ gate jīve yat syād godāvarīphalam / (35.1) Par.?

tad dvādaśaguṇaṃ skanda kumbheśvarasamīpataḥ // (35.2) Par.?

ye jānanti na paśyanti kumbhaśambhumumāpatim / (36.1) Par.?

narmadādakṣiṇe kūle teṣāṃ janma nirarthakam // (36.2) Par.?

yathā godāvarīyātrā kartavyā muniśāsanāt / (37.1) Par.?

caturviṃśatime varṣe tatheyaṃ devabhāṣitam // (37.2) Par.?

yāvaccandraśca sūryaśca yāvad vai divi tārakaḥ / (38.1) Par.?

tāvat tad akṣayaṃ dānaṃ revākumbheśvarāntike // (38.2) Par.?

mahādānāni deyāni tatra laukair vicakṣaṇaiḥ / (39.1) Par.?

godānamatra śaṃsanti sauvarṇaṃ rājataṃ tathā // (39.2) Par.?

yasyāḥ smaraṇamātreṇa naśyate pāpasañcayaḥ / (40.1) Par.?

snānena kiṃ punaḥ skanda brahmahatyāṃ vyapohati // (40.2) Par.?

tatra tīrthe tu yaḥ snātvā śrāddhaṃ kuryād yudhiṣṭhira / (41.1) Par.?

ekottaraṃ kulaśatam uddharecchivaśāsanāt // (41.2) Par.?

yāni kāni ca tīrthāni cāsamudrasarāṃsi ca / (42.1) Par.?

śivaliṅgārcanasyeha kalāṃ nārhanti ṣoḍaśīm // (42.2) Par.?

evaṃ devā varaṃ dattvā harīśvarapurogamāḥ / (43.1) Par.?

svasthānam agaman pūrvaṃ muktvā tannāma cottamam // (43.2) Par.?

tīrthasyāsya varaṃ dattvā sa rāmo lakṣmaṇāgrajaḥ / (44.1) Par.?

ayodhyāṃ praviveśāsau niṣpāpo narmadājalāt // (44.2) Par.?

sauvarṇīṃ ca tataḥ kṛtvā sītāṃ yajñaṃ cakāra saḥ / (45.1) Par.?

anumantrya munīṃllokāndevatāśca nijaṃ kulam // (45.2) Par.?

purā tretāyuge jātaṃ tattīrthaṃ skandanāmakam / (46.1) Par.?

niyamena tato lokaiḥ kartavyaṃ liṅgadarśanam // (46.2) Par.?

tāvat pāpāni deheṣu mahāpātakajānyapi / (47.1) Par.?

yāvanna prekṣate jantustattīrthaṃ devasevitam // (47.2) Par.?

te dhanyāste mahātmānas teṣāṃ janma sujīvitam / (48.1) Par.?

jyotiṣmatīpurīsaṃsthaṃ ye drakṣyanti haraṃ param // (48.2) Par.?

tasmānmohaṃ parityajya janair gantavyamādarāt / (49.1) Par.?

tīrthāśeṣaphalāvāptyai tīrthaṃ kumbheśvarāhvayam // (49.2) Par.?

mārkaṇḍeya uvāca / (50.1) Par.?

śrutveti śambhuvacasā sa ṣaḍānano 'tha natvā pituḥ padayugāmbujamādareṇa / (50.2) Par.?

samprāpya dakṣiṇataṭaṃ giriśasravantyāḥ kīśāgryarāmakalaśākhyaśivān dadarśa // (50.3) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kapitīrtharāmeśvaralakṣmaṇeśvarakumbheśvaramāhātmyavarṇanaṃ nāma caturaśītitamo 'dhyāyaḥ // (51.1) Par.?