Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17703

Click on a sentence to show its analysis
Keep the mouse pointer over a lemma to show its meanings.

tato 'nyedyuralaṃkāravatīpārśvasthitaṃ sakhā / (1.1) Par.?

naravāhanadattaṃ taṃ marubhūtirvyajijñapat // (1.2) Par.?

paśya paśya varāko 'yaṃ deva kārpaṭikastava / (2.1) Par.?

carmakhaṇḍaikavasano jaṭālaḥ kṛśadhūsaraḥ // (2.2) Par.?

siṃhadvārāddivārātraṃ śīte vāpyātape 'pi vā / (3.1) Par.?

na calatyeva tannāsya kimadyāpi prasīdasi // (3.2) Par.?

kāle dattaṃ varaṃ hy alpamakāle bahunāpi kim / (4.1) Par.?

tadyāvanmriyate naiṣa tāvadasya kṛpāṃ kuru // (4.2) Par.?

tac chrutvā gomukho 'vādītsādhūktaṃ marubhūtinā / (5.1) Par.?

kiṃ punarnāparādho 'sti tava devātra kaścana // (5.2) Par.?

kṣayo yāvanna vṛtto hi pāpasya paripanthinaḥ / (6.1) Par.?

tāvaddānapravṛtto 'pi dātuṃ śaknoti na prabhuḥ // (6.2) Par.?

parikṣīṇe punaḥ pāpe vāryamāṇo 'pi yatnataḥ / (7.1) Par.?

īśvaraḥ pradadātyeva karmāyattamidaṃ kila // (7.2) Par.?

tathā ca lakṣadattasya rājñaḥ kārpaṭikasya ca / (8.1) Par.?

labdhadattasya devaitāṃ kathāmākhyāmi te śṛṇu // (8.2) Par.?

abhūl lakṣaparaṃ nāma nagaraṃ vasudhātale / (9.1) Par.?

tatrāsīl lakṣadattākhyas tyāgināmagraṇīrnṛpaḥ // (9.2) Par.?

lakṣādūnaṃ na dātuṃ sa jānāti sma kilārthine / (10.1) Par.?

saṃbabhāṣe tu yaṃ tasmai dadau lakṣāṇi pañca saḥ // (10.2) Par.?

tutoṣa yasmai sa punar nirdāridryaṃ cakāra tam / (11.1) Par.?

lakṣadatta iti khyātaṃ nāma tasyāta eva tat // (11.2) Par.?

tasyaiko labdhadattākhyaḥ siṃhadvāre divāniśam / (12.1) Par.?

tasthau kārpaṭikaścarmakhaṇḍaikakaṭikarpaṭaḥ // (12.2) Par.?

sa nibaddhajaṭaḥ śītavarṣe grīṣmātape 'pi vā / (13.1) Par.?

na cacāla tataḥ kṣipraṃ sa rājā ca dadarśa tam // (13.2) Par.?

tathā tasya ciraṃ tatra tiṣṭhataḥ kleśavartinaḥ / (14.1) Par.?

na sa rājā dadau kiṃciddātāpi sakṛpo 'pi san // (14.2) Par.?

athaikadā sa nṛpatir jagāmākheṭakāṭavīm / (15.1) Par.?

sa ca taṃ laguḍaṃ bibhradanvakkārpaṭiko yayau // (15.2) Par.?

tatra tasya sasainyasya vāhanasthasya dhanvinaḥ / (16.1) Par.?

vyāghrān varāhān hariṇān bāṇavarṣeṇa nighnataḥ // (16.2) Par.?

agrataḥ pādacārī san sa kārpaṭika ekakaḥ / (17.1) Par.?

jaghāna laguḍenaiva varāhān hariṇān bahūn // (17.2) Par.?

sa dṛṣṭvā vikramaṃ tasya citraṃ śūraḥ kiyānayam / (18.1) Par.?

iti dadhyau sa rājāntarna tvasmai kiṃcidapyadāt // (18.2) Par.?

kṛtākheṭaḥ sa nagaraṃ svasukhāyāviśan nṛpaḥ / (19.1) Par.?

sa ca kārpaṭikastasthau siṃhadvāre ca pūrvavat // (19.2) Par.?

kadācid ekasīmāntagotrajāvajayāya saḥ / (20.1) Par.?

lakṣadatto yayau rājā yuddhaṃ cāsyābhavan mahat // (20.2) Par.?

tatra yuddhe sa tasyāgre rājñaḥ kārpaṭiko bahūn / (21.1) Par.?

dṛḍhakhādiradaṇḍāgraprahārair avadhītparān // (21.2) Par.?

jitaśatruḥ sa rājā ca nijaṃ pratyāyayau puram / (22.1) Par.?

na ca tasmai dadau kiṃcidapi dṛṣṭaparākramaḥ // (22.2) Par.?

evaṃ kārpaṭikasyātra labdhadattasya tiṣṭhataḥ / (23.1) Par.?

vyatīyuḥ pañca varṣāṇi tasya kāṣṭhena jīvataḥ // (23.2) Par.?

ṣaṣṭhe pravṛtte dṛṣṭvā tamekadā daivayogataḥ / (24.1) Par.?

sa rājā jātakaruṇo lakṣadatto vyacintayat // (24.2) Par.?

nādyāpy asya mayā dattaṃ cirakliṣṭasya kiṃcana / (25.1) Par.?

tadyuktyā kiṃcidetasmai dattvā paśyāmyahaṃ na kim // (25.2) Par.?

kiṃ nāmāsya varākasya vṛttaḥ pāpakṣayo na vā / (26.1) Par.?

kiṃ dadāti na vādyāpi lakṣmīrasya ca darśanam // (26.2) Par.?

ityālocya nṛpaḥ svairaṃ bhāṇḍāgāraṃ praviśya saḥ / (27.1) Par.?

ratnair bhṛtaṃ mātuluṅgaṃ samudgakam iva vyadhāt // (27.2) Par.?

cakāra sarvāsthānaṃ ca sa vidhāya bahiḥ sabhām / (28.1) Par.?

tatra ca prāviśansarve paurasāmantamantriṇaḥ // (28.2) Par.?

tanmadhye ca praviṣṭaṃ taṃ rājā kārpaṭikaṃ svayam / (29.1) Par.?

ito nikaṭamehīti jagāda snigdhayā girā // (29.2) Par.?

tataḥ kārpaṭikaḥ śrutvā labdhadattaḥ praharṣavān / (30.1) Par.?

agre savidhamāgatya rājñas tasyopaviṣṭavān // (30.2) Par.?

tatas tamavadadrājā brūhi kiṃcitsubhāṣitam / (31.1) Par.?

tad ākarṇya papāṭhaitām āryāṃ kārpaṭiko 'tha saḥ // (31.2) Par.?

pūrayati pūrṇam eṣā taraṅgiṇīsaṃhatiḥ samudram iva / (32.1) Par.?

lakṣmīr adhanasya punar locanamārge 'pi nāyāti // (32.2) Par.?

śrutvaitat pāṭhayitvā ca bhūyas tuṣṭaḥ sa bhūpatiḥ / (33.1) Par.?

sadratnapūrṇaṃ tasmai tan mātuluṅgaphalaṃ dadau // (33.2) Par.?

yasya tuṣyati rājāyaṃ dāridryaṃ tasya kṛntati / (34.1) Par.?

śocyaḥ kārpaṭikas tv eṣa yam āhūyaivam ādarāt // (34.2) Par.?

mātuluṅgam idaṃ dattaṃ tuṣṭenānena bhūbhṛtā / (35.1) Par.?

kalpavṛkṣo 'py abhavyānāṃ prāyo yāti palāśatām // (35.2) Par.?

iti sarve 'pi tad dṛṣṭvā tatrāsthāne viṣādinaḥ / (36.1) Par.?

ajñātaparamārthatvāt svairam ūcuḥ parasparam // (36.2) Par.?

sa tu kārpaṭiko mātuluṅgamādāya niryayau / (37.1) Par.?

āyayau cāgratas tasya bhikṣureko viṣīdataḥ // (37.2) Par.?

sa rājabandināmā taddattvā śāṭakamagrahīt / (38.1) Par.?

tasmātkārpaṭikānmātuluṅgaṃ dṛṣṭvā manoramam // (38.2) Par.?

praviśya ca sa bhikṣustadrājñe phalamaḍhaukayat / (39.1) Par.?

rājā ca tatparijñāya śramaṇaṃ pṛcchati sma tam // (39.2) Par.?

mātuluṅgaṃ kuta idaṃ bhadanta bhavatāmiti / (40.1) Par.?

tataḥ kārpaṭikaṃ so 'smai taddātāraṃ śaśaṃsa tam // (40.2) Par.?

atha rājā viṣaṇṇaś ca vismitaś ca babhūva saḥ / (41.1) Par.?

aho adyāpi na kṣīṇaṃ pāpaṃ tasyeti cintayan // (41.2) Par.?

svīkṛtya mātuluṅgaṃ tadutthāyāsthānataḥ kṣaṇāt / (42.1) Par.?

cakāra dinakartavyaṃ lakṣadattaḥ sa bhūpatiḥ // (42.2) Par.?

so 'pi kārpaṭiko gatvā siṃhadvāre yathāsthitaḥ / (43.1) Par.?

kṛtabhojanapānādirāsīdvikrītaśāṭakaḥ // (43.2) Par.?

dvitīye 'hni sa rājā sa sarvāsthānaṃ tathaiva tat / (44.1) Par.?

vidadhe tatra sarve ca sapaurāḥ prāviśan punaḥ // (44.2) Par.?

dṛṣṭvā kārpaṭikaṃ taṃ ca praviṣṭaṃ so 'tha bhūmibhṛt / (45.1) Par.?

tathaivāhūya punarapy upāveśayadantike // (45.2) Par.?

pāṭhayitvā ca bhūyo 'pi tāmevāryāṃ prasādataḥ / (46.1) Par.?

gūḍharatnaṃ dadau tasmai mātuluṅgaṃ tad eva saḥ // (46.2) Par.?

aho dvitīye divase tuṣṭo 'syāyaṃ vṛthā prabhuḥ / (47.1) Par.?

kiṃ tāvadetadityatra sarve dadhyuḥ savismayāḥ // (47.2) Par.?

sa ca kārpaṭiko vigno haste kṛtvā tu tatphalam / (48.1) Par.?

rājaprasādaṃ saphalaṃ manvāno niryayau bahiḥ // (48.2) Par.?

tāvattasyāyayau ko'pi viṣayādhikṛto 'grataḥ / (49.1) Par.?

pravivikṣus tad āsthānaṃ draṣṭukāmo mahīkṣitam // (49.2) Par.?

sa dṛṣṭvā mātuluṅgaṃ tadvavre kārpaṭikāttataḥ / (50.1) Par.?

ādade śakunāpekṣī dattvāsmai vastrayor yugam // (50.2) Par.?

praviśya ca nṛpāsthānaṃ pādanamro nṛpāya tat / (51.1) Par.?

mātuluṅgaṃ dadāvādau tato 'nyatprābhṛtaṃ nijam // (51.2) Par.?

parijñāya ca tadrājñā phalaṃ sa viṣayādhipaḥ / (52.1) Par.?

kuta etattavety ukto 'vocatkārpaṭikāditi // (52.2) Par.?

aho dadāti nādyāpi lakṣmīstasyeha darśanam / (53.1) Par.?

ity antaś cintayan so 'tha rājābhūdvimanā bhṛśam // (53.2) Par.?

uttasthau mātuluṅgaṃ tadgṛhītvāsthānataś ca saḥ / (54.1) Par.?

so 'tha kārpaṭiko vastrayugmaṃ prāpyāpaṇaṃ yayau // (54.2) Par.?

cakre bhojanapānādi vikrīyaikaṃ ca śāṭakam / (55.1) Par.?

dvitīyaṃ ca dvidhā kṛtvā vāsasī dve vyadhatta saḥ // (55.2) Par.?

tatastṛtīye 'pi dine sarvāsthānaṃ sa pārthivaḥ / (56.1) Par.?

vyadhāttathaiva sarvaś ca praviveśa punarjanaḥ // (56.2) Par.?

tasmai praviṣṭāya ca tanmātuluṅgaṃ tathaiva saḥ / (57.1) Par.?

bhūyo 'pyāhūya tāmāryāṃ pāṭhayitvā nṛpo dadau // (57.2) Par.?

vismiteṣv atha sarveṣu so 'pi kārpaṭiko bahiḥ / (58.1) Par.?

gatvā rājavilāsinyai tadadādbījapūrakam // (58.2) Par.?

sā tasmai rājasaṃmānataruvallīva jaṅgamā / (59.1) Par.?

jātarūpaṃ dadau puṣpamivāgraphalasūcakam // (59.2) Par.?

tatsa vikrīya tadahastasthau kārpaṭikaḥ sukham / (60.1) Par.?

vilāsiny api sā rājñaḥ praviveśāntikaṃ tadā // (60.2) Par.?

tasmai ca sthūlaramyaṃ tanmātuluṅgamaḍhaukayat / (61.1) Par.?

so 'pi tatpratyabhijñāya tāṃ papraccha tadāgamam // (61.2) Par.?

tato jagāda sā dattamidaṃ kārpaṭikena me / (62.1) Par.?

tac chrutvā sa nṛpo dadhyau lakṣmyā so 'dyāpi nekṣitaḥ // (62.2) Par.?

mandapuṇyo na yo vetti matprasādam aniṣphalam / (63.1) Par.?

mām eva caitānyāyānti mahāratnāny aho muhuḥ // (63.2) Par.?

iti dhyātvā gṛhītvā tatsthāpayitvā ca rakṣitam / (64.1) Par.?

mātuluṅgaṃ sa utthāya cakre bhūpatirāhnikam // (64.2) Par.?

caturthe 'hni ca so 'kārṣīd rājāsthānaṃ tathaiva tat / (65.1) Par.?

pūryate sma ca tatsarvaiḥ sāmantasacivādibhiḥ // (65.2) Par.?

tatas tatra tamāyātaṃ bhūyaḥ kārpaṭikaṃ nṛpaḥ / (66.1) Par.?

upaveśyāgrataḥ prāgvatsa tām āryām apāṭhayat // (66.2) Par.?

dadau ca mātuluṅgaṃ tattasmai tac ca drutojjhitam / (67.1) Par.?

tasya hastārdhasamprāptaṃ dvidhābhūtpatitaṃ bhuvi // (67.2) Par.?

pidhānasaṃdhibhagnāc ca tasmādratnāni niryayuḥ / (68.1) Par.?

bhāsayanti tadāsthānaṃ mahārghāṇi bahūni ca // (68.2) Par.?

tāni dṛṣṭvābruvan sarve paramārtham ajānatām / (69.1) Par.?

tryahaṃ mṛṣā bhramo 'bhūn naḥ prasādas tv īdṛśaḥ prabhoḥ // (69.2) Par.?

etac chrutvābravīd rājā mayā yuktyānayā hy ayam / (70.1) Par.?

darśanaṃ śrīrdadātyasya kiṃ na veti parīkṣitaḥ // (70.2) Par.?

pāpāntaś ca tryahaṃ nāsya prāptaḥ prāpto 'sya so 'dya tu / (71.1) Par.?

tenaiva darśanaṃ lakṣmyā dattametasya sāṃpratam // (71.2) Par.?

ity uktvā tāni ratnāni grāmān hastyaśvakāñcanam / (72.1) Par.?

dattvā cakāra sāmantaṃ sa taṃ kārpaṭikaṃ prabhuḥ // (72.2) Par.?

uttasthau ca tataḥ snātumāsthānātsaṃstuvajjanāt / (73.1) Par.?

yayau kārpaṭikaḥ so 'pi kṛtārtho vasatiṃ nijām // (73.2) Par.?

evaṃ yāvanna pāpānto vṛttastāvanna labhyate / (74.1) Par.?

prabhuprasādo bhṛtyena kṛtaiḥ kaṣṭaśatair api // (74.2) Par.?

ityākhyāya kathāmetāṃ mantrimukhyaḥ sa gomukhaḥ / (75.1) Par.?

naravāhanadattaṃ taṃ jagāda svaprabhuṃ punaḥ // (75.2) Par.?

taddeva jāne naitasya nūnaṃ kārpaṭikasya te / (76.1) Par.?

vṛttaḥ pāpakṣayo 'dyāpi yena nāsya prasīdasi // (76.2) Par.?

śrutvaitad gomukhavaco hanta sādhvity udīrya ca / (77.1) Par.?

tasmai kārpaṭikākhyāya nijakārpaṭikāya saḥ // (77.2) Par.?

vatseśvarasutaḥ sadyaḥ pradadau grāmasaṃcayam / (78.1) Par.?

hastyaśvaṃ hemakoṭiṃ ca sadvastrābharaṇāni ca // (78.2) Par.?

tadaiva rājasadṛśaḥ so 'bhūtkārpaṭikaḥ kṛtī / (79.1) Par.?

kṛtajñe satparīvāre prabhau sevāphalā kutaḥ // (79.2) Par.?

evam sthitasya tasyātra jātu sevārtham āyayau / (80.1) Par.?

naravāhanadattasya dākṣiṇātyo yuvā dvijaḥ // (80.2) Par.?

pralambabāhunāmā ca sa vīrastaṃ vyajijñapat / (81.1) Par.?

kīrtyākṛṣṭastavaiṣo 'haṃ pādau deva samāśritaḥ // (81.2) Par.?

padātpadaṃ ca devasya padātirna calāmy aham / (82.1) Par.?

gajavājirathair bhūmau gacchato nāmbare punaḥ // (82.2) Par.?

vidyādharendratā yasmācchrūyate bhāvinī prabhoḥ / (83.1) Par.?

dine dine svarṇaśataṃ dīyatāṃ vṛttaye mama // (83.2) Par.?

evam uktavate tasmai tatkilātulatejase / (84.1) Par.?

naravāhanadattas tāṃ dadau vṛttiṃ dvijātaye // (84.2) Par.?

tatprasaṅgāc ca vakti sma gomukho deva sevakāḥ / (85.1) Par.?

bhavantyevaṃvidhā rājñāṃ tathā ca śrūyatāṃ kathā // (85.2) Par.?

astīha vikramapuraṃ nāmnā puravaraṃ mahat / (86.1) Par.?

tatra vikramatuṅgākhyo babhūva nṛpatiḥ purā // (86.2) Par.?

taikṣṇyaṃ kṛpāṇe yasyābhūnna daṇḍe nayaśālinaḥ / (87.1) Par.?

dharme ca satatāsaktirna tu strīmṛgayādiṣu // (87.2) Par.?

tasmiṃś ca rājñi kulayo rajaḥsu guṇavicyutiḥ / (88.1) Par.?

sāyakeṣv avicāraś ca goṣṭheṣu paśurakṣinām // (88.2) Par.?

tasya vīravaro nāma śūro mālavadeśajaḥ / (89.1) Par.?

svākṛtiścāyayau rājño vipraḥ sevārthamekadā // (89.2) Par.?

yasya dharmavatī nāma bhāryā vīravatī sutā / (90.1) Par.?

putraḥ sattvavaraśceti trayaṃ parikaro gṛhe // (90.2) Par.?

sevāparikaraścānyattrayaṃ kaṭyāṃ kṛpāṇikā / (91.1) Par.?

pāṇau karatalaikasmiṃś carmāny asmin sudarpaṇam // (91.2) Par.?

iyanmātre parikare vṛttaye 'rthayate sma saḥ / (92.1) Par.?

pratyahaṃ nṛpatestasmāddīnāraśatapañcakam // (92.2) Par.?

rājā ca sa dadau tasmai vṛttiṃ tāṃ lakṣitaujase / (93.1) Par.?

paśyāmi tāvadetasya prakarṣamiti cintayan // (93.2) Par.?

dadau ca tasya cārānsa paścājjijñāsituṃ nṛpaḥ / (94.1) Par.?

kuryādiyadbhir dīnāraiḥ kiṃ dvibāhurasāviti // (94.2) Par.?

sa ca vīravarasteṣāṃ dīnārāṇāṃ dine dine / (95.1) Par.?

śataṃ haste svabhāryāyā bhojanādikṛte dadau // (95.2) Par.?

śatena vastramālyādi krīṇāti sma śataṃ punaḥ / (96.1) Par.?

snātvā hariharādīnām arcanārtham akalpayat // (96.2) Par.?

dvijātikṛpaṇādibhyo dadāvanyacchatadvayam / (97.1) Par.?

evaṃ sa viniyuṅkte sma nityaṃ pañcaśatīmapi // (97.2) Par.?

tasthau ca pūrvamadhyāhnaṃ siṃhadvāre 'sya bhūpateḥ / (98.1) Par.?

kṛtvāhnikādi cāgatya tatraivāsīn niśāṃ punaḥ // (98.2) Par.?

etāṃ taddinacaryāṃ ca nityaṃ cārā nyavedayan / (99.1) Par.?

rājñe tasmai tatastuṣṭaḥ sa tāṃścārānnyavartayat // (99.2) Par.?

so 'pi vīravaras tasya rājñastasthau divāniśam / (100.1) Par.?

snānādisamayaṃ muktvā siṃhadvāre dhṛtāyudhaḥ // (100.2) Par.?

athātra taṃ vīravaraṃ jetumicchannivāyayau / (101.1) Par.?

śūrapratāpāsahano garjitogro ghanāgamaḥ // (101.2) Par.?

tadā ca varṣati ghane ghorā dhārāśarāvalīḥ / (102.1) Par.?

na sa vīravaraḥ siṃhadvārātstambha ivācalat // (102.2) Par.?

rājā vikramatuṅgaś ca prāsādādvīkṣya taṃ sadā / (103.1) Par.?

āruroha sa jijñāsuḥ prāsādaṃ taṃ punarniśi // (103.2) Par.?

siṃhadvāre sthitaḥ ko 'tretyupariṣṭājjagāda saḥ / (104.1) Par.?

tac chrutvāhaṃ sthito 'treti so 'pi vīravaro 'bhyadhāt // (104.2) Par.?

aho ayaṃ mahāsattvaḥ sumahatpadamarhati / (105.1) Par.?

siṃhadvāraṃ na yo muñcatyambude varṣatīdṛśe // (105.2) Par.?

iti yāvac ca sa śrutvā vicintayati bhūmibhṛt / (106.1) Par.?

tāvaddūrātsakaruṇaṃ rudatīmaśṛṇotstriyam // (106.2) Par.?

duḥkhito me na rāṣṭre 'sti tadeṣā kā nu roditi / (107.1) Par.?

ity ālocyābravīd rājā sa taṃ vīravaraṃ tadā // (107.2) Par.?

bho vīravara kāpi strī dūre rodity asau śṛṇu / (108.1) Par.?

kaiṣā kiṃ duḥkhamasyāścetyatra gatvā nirūpaya // (108.2) Par.?

tac chrutvā sa tathety uktvā gantuṃ pravavṛte tataḥ / (109.1) Par.?

dhunvan karatalaṃ vīravaro baddhāsidhenukaḥ // (109.2) Par.?

dṛṣṭvā taṃ prasthitaṃ meghe jvaladvidyuti tādṛśe / (110.1) Par.?

dhārānipātasaṃruddharodorandhre sakautukaḥ // (110.2) Par.?

sakṛpaś cāvatīryaiva prāsādāttasya pṛṣṭhataḥ / (111.1) Par.?

alakṣitaḥ khaḍgapāṇiḥ pratasthe so 'pi bhūmipaḥ // (111.2) Par.?

sa cānusarpanruditaṃ guptānvāgatabhūpatiḥ / (112.1) Par.?

gatvā bahiḥ purādekaṃ prāpa vīravaraḥ saraḥ // (112.2) Par.?

hā nātha hā kṛpālo hā śūra tyaktā tvayā katham / (113.1) Par.?

vatsyāmīti ca tanmadhye rudatīṃ strīṃ dadarśa tām // (113.2) Par.?

kā tvaṃ śocasi kaṃ nāthamiti pṛṣṭā ca tena sā / (114.1) Par.?

uvāca putra māmetāṃ viddhi vīravara kṣitim // (114.2) Par.?

tasyā vikramatuṅgo me rājā nātho 'dya dhārmikaḥ / (115.1) Par.?

mṛtyuś ca bhavitā tasya tṛtīye 'hani niścitam // (115.2) Par.?

etādṛśaś ca bhūyo 'pi patiḥ syātputra me kutaḥ / (116.1) Par.?

tenaitamanuśocāmi svātmānaṃ ca suduḥkhitā // (116.2) Par.?

ahaṃ hi bhāvi paśyāmi divyadṛṣṭyā śubhāśubham / (117.1) Par.?

tridivastho yathādrākṣītsuprabho devaputrakaḥ // (117.2) Par.?

sa hi puṇyakṣayātsvargātpatanaṃ bhāvi divyadṛk / (118.1) Par.?

saptāhāt sūkarīgarbhe saṃbhavaṃ caikṣatātmanaḥ // (118.2) Par.?

tataḥ sa sūkarīgarbhavāsakleśaṃ vibhāvayan / (119.1) Par.?

devaputro 'nvaśocat tān divyān bhogān sahātmanā // (119.2) Par.?

hā svarga hā hāpsaraso hā nandanalatāgṛhāḥ / (120.1) Par.?

hā vatsyāmi kathaṃ kroḍīgarbhe tadanu kardame // (120.2) Par.?

ityādi vilapantaṃ taṃ śrutvābhyetya surādhipaḥ / (121.1) Par.?

papraccha so 'pi svaṃ tasmai duḥkhahetumavarṇayat // (121.2) Par.?

tataḥ śakro jagādainam asty upāyo 'tra te śṛṇu / (122.1) Par.?

vrajoṃ namaḥ śivāyeti japañ śaraṇam īśvaram // (122.2) Par.?

taṃ gatvā śaraṇaṃ hitvā pāpaṃ puṇyamavāpsyasi / (123.1) Par.?

yena prāpsyasi na kroḍayoniṃ svargān na ca cyutim // (123.2) Par.?

ity ukto devarājena suprabho 'tha tatheti saḥ / (124.1) Par.?

uktvā namaḥ śivāyeti śaṃbhuṃ śaraṇam agrahīt // (124.2) Par.?

tanmayaḥ sa dinaiḥ ṣaḍbhis tatprasādān na kevalam / (125.1) Par.?

nikṣiptaḥ sūkarīgarbhe yāvat svargād uparyagāt // (125.2) Par.?

saptame 'hni ca taṃ svarge tatrāpaśyañ śatakratuḥ / (126.1) Par.?

vīkṣate yāvad adhikaṃ lokāntaram asau gataḥ // (126.2) Par.?

itthaṃ śuśoca sa yathā dṛṣṭvāghaṃ bhāvi suprabhaḥ / (127.1) Par.?

tathaiva bhāvinaṃ mṛtyuṃ dṛṣṭvā śocāmi bhūbhṛtaḥ // (127.2) Par.?

evam uktavatīṃ bhūmiṃ tāṃ sa vīravaro 'bravīt / (128.1) Par.?

yathāmba suprabhasyābhūdupāyaḥ śakravākyataḥ // (128.2) Par.?

tathā yadyasti rājño 'sya rakṣopāyastad ucyatām / (129.1) Par.?

iti vīravareṇokte pṛthivī tam uvāca sā // (129.2) Par.?

eka evāstyupāyo 'tra svādhīnaḥ sa tavaiva ca / (130.1) Par.?

tac chrutvaiva ca so 'vādīddhṛṣṭo vīravaro dvijaḥ // (130.2) Par.?

tarhi brūhi drutaṃ devi yadi śreyo bhavetprabhoḥ / (131.1) Par.?

prāṇair me putradārair vā tajjanma saphalaṃ mama // (131.2) Par.?

ity uktavantamavadatsā taṃ vīravaraṃ kṣitiḥ / (132.1) Par.?

astyatra caṇḍikādevī yaiṣā rājakulāntike // (132.2) Par.?

tasyai sattvavaraṃ putram upahārīkaroṣi cet / (133.1) Par.?

tato jīvati rājāsau nāstyupāyo 'paraḥ punaḥ // (133.2) Par.?

śrutvaitadvasudhāvākyaṃ dhīro vīravarastadā / (134.1) Par.?

yāmi devi karomyetadadhunaivetyuvāca saḥ // (134.2) Par.?

ko 'nyaḥ svāmihitas tvādṛgbhadraṃ te 'stu vrajeti bhūḥ / (135.1) Par.?

uktvā tiro 'bhūt sarvaṃ ca rājā so 'nvāgato 'śṛṇot // (135.2) Par.?

tato vikramatuṅge 'sminrājñi channe 'nugacchati / (136.1) Par.?

drutaṃ vīravarastasyāṃ rātrau sa svagṛhaṃ yayau // (136.2) Par.?

tatra prabodhya bhāryāyai dharmavatyai śaśaṃsa saḥ / (137.1) Par.?

svaputram upahartavyaṃ rājārthe vacanādbhuvaḥ // (137.2) Par.?

sā tac chrutvābravīt kāryam avaśyaṃ svāmino hitam / (138.1) Par.?

tat putraś cādya bhavatā pratibodhyocyatāmiti // (138.2) Par.?

tataḥ prabodhya bālāya tasmai vīravareṇa tat / (139.1) Par.?

ūce tadupahārāntaṃ rājārthe yadbhuvoditam // (139.2) Par.?

tac chrutvā sa yathārthākhyo bālaḥ sattvavaro 'bhyadhāt / (140.1) Par.?

prabhukāryopayuktāsuḥ puṇyavāṃstāta nāsmi kim // (140.2) Par.?

bhuktaṃ mayā tadannaṃ yacchodhanīyaṃ mayāpi tat / (141.1) Par.?

tannītvā tatkṛte devyā upahārīkuruṣva mām // (141.2) Par.?

ity ūcivāṃsaṃ taṃ sattvavaraṃ vīravaraḥ śiśum / (142.1) Par.?

satyaṃ bhavasi majjāta ity avocad aviklavam // (142.2) Par.?

etadvikramatuṅgaḥ sa rājā śrutvā bahiḥ sthitaḥ / (143.1) Par.?

acintayadaho sarve samasattvā amī iti // (143.2) Par.?

tato vīravaraḥ skandhe sutaṃ sattvavaraṃ sa tam / (144.1) Par.?

bhāryā dharmavatī cāsya pṛṣṭhe vīravatīṃ sutām // (144.2) Par.?

gṛhītvā jagmatustau dvau rātrau taccaṇḍikāgṛham / (145.1) Par.?

rājā vikramatuṅgaś ca paścācchanno yayau tayoḥ // (145.2) Par.?

tatrāvatāritaḥ skandhātpitrā sattvavaro 'tha saḥ / (146.1) Par.?

bālo 'pi dhairyarāśis tāṃ natvā devīṃ vyajijñapat // (146.2) Par.?

devi mūrdhopahāreṇa mama jīvatu naḥ prabhuḥ / (147.1) Par.?

nṛpo vikramatuṅgo 'tra śāstu ca kṣmām akaṇṭakām // (147.2) Par.?

evam uktavatas tasya sādhu putretyudīrya saḥ / (148.1) Par.?

kṛṣṭvā karatalāṃ sūnośchittvā vīravaraḥ śiraḥ // (148.2) Par.?

pradadau caṇḍikādevyai rājñaḥ śreyo 'stviti bruvan / (149.1) Par.?

nāstyaho svāmibhaktānāṃ putre vātmani vā spṛhā // (149.2) Par.?

sādhu vīravara prattaṃ svāmino jīvitaṃ tvayā / (150.1) Par.?

api prāṇaiḥ sutasyeti śuśruve vāktadā divaḥ // (150.2) Par.?

tac cātivismite rājñi sarvam paśyati śṛṇvati / (151.1) Par.?

bālā vīravatī tasya bhrātur vīravarātmajā // (151.2) Par.?

hatasyopetya mūrdhānamāśliṣya paricumbya ca / (152.1) Par.?

hā bhrātariti cākrandya hṛtsphoṭena vyapādi sā // (152.2) Par.?

dṛṣṭvā sutām api mṛtāṃ sā taṃ vīravaraṃ tadā / (153.1) Par.?

bhāryā dharmavatī dainyenābravīdracitāñjaliḥ // (153.2) Par.?

rājñaḥ śivaṃ kṛtaṃ tāvattadanujñāṃ prayaccha me / (154.1) Par.?

yāvad āttamṛtāpatyadvayāgniṃ praviśāmy aham // (154.2) Par.?

bālā yatreyam ajñānāpy evaṃ bhrātṛśucā mṛtā / (155.1) Par.?

kā śobhā jīvitenātra naṣṭe 'patyadvaye 'pi me // (155.2) Par.?

niścayeneti jalpantīṃ tāṃ sa vīravaro 'bravīt / (156.1) Par.?

evaṃ kuruṣva kim vacmi na hīdānīm anindite // (156.2) Par.?

apatyaśokaikamaye saṃsāre 'sti sukhaṃ tava / (157.1) Par.?

tatpratīkṣasva yāvatte racayāmi citāmaham // (157.2) Par.?

ity uktvātra sthitair devīkṣetranirmāṇadārubhiḥ / (158.1) Par.?

nyastāpatyaśavāṃ cakre dīpāgnijvalitāṃ citām // (158.2) Par.?

tato dharmavatī bhāryā pādau tasya praṇamya sā / (159.1) Par.?

janmāntare 'pi me bhūyādaryaputra patirbhavān // (159.2) Par.?

śivaṃ rājño 'stu cety uktvā sādhvī tasmiṃścitānale / (160.1) Par.?

jvālājaṭāle nyapatacchītalahradalīlayā // (160.2) Par.?

tatsa vikramatuṅgaś ca dṛṣṭvā guptasthito nṛpaḥ / (161.1) Par.?

kenaiṣāmanṛṇo 'haṃ syāmityāsīddhyānamohitaḥ // (161.2) Par.?

tato vīravaraḥ so 'pi dhīracetā vyacintayat / (162.1) Par.?

sampannaṃ svāmikāryaṃ me sākṣād divyā hi vāk chrutā // (162.2) Par.?

bhuktānnapiṇḍaḥ saṃśuddhaḥ prabhostadadhunā mayā / (163.1) Par.?

sarvamiṣṭaṃ vyayīkṛtya bharaṇīyaṃ kuṭumbakam // (163.2) Par.?

ekasyātmabharitvena ca cakāstyeva jīvitam / (164.1) Par.?

tat kiṃ nātmopahāreṇāpy arcayāmy ambikām imām // (164.2) Par.?

iti vīravaraḥ sattvaniṣṭhaḥ saṃkalpya caṇḍikām / (165.1) Par.?

devīṃ tāṃ varadāṃ pūrvaṃ sa stotreṇopatasthivān // (165.2) Par.?

maheśvari namastubhyaṃ praṇatābhayadāyini / (166.1) Par.?

saṃsārapaṅkamagnaṃ māṃ śaraṇāgatamuddhara // (166.2) Par.?

tvaṃ prāṇaśaktir bhūtānāṃ tvayedaṃ ceṣṭate jagat / (167.1) Par.?

sṛṣṭer ādau svasambhūtā svayaṃ dṛṣṭāsi śaṃbhunā // (167.2) Par.?

jvalantī viśvamudbhāsya durnirīkṣyeṇa tejasā / (168.1) Par.?

uccaṇḍākāṇḍabālārkakoṭipaṅktirivoditā // (168.2) Par.?

bhujānāṃ cakravālena saṃchāditadigantarā / (169.1) Par.?

khaḍgakheṭakakodaṇḍaśaraśūlādidhāriṇā // (169.2) Par.?

saṃstutāsi ca tenaiva devenaivaṃ triśūlinā / (170.1) Par.?

namas te caṇḍi cāmuṇḍe maṅgale tripure jaye // (170.2) Par.?

ekānaṃśe śive durge nārāyaṇi sarasvati / (171.1) Par.?

bhadrakāli mahālakṣmi siddhe ruruvidāriṇi // (171.2) Par.?

tvaṃ gāyatrī mahārājñī revatī vindhyavāsinī / (172.1) Par.?

umā kātyāyanī ca tvaṃ śarvaparvatavāsinī // (172.2) Par.?

ityādibhir nāmabhis tvām devi stutiparaṃ haram / (173.1) Par.?

śrutvā skando vasiṣṭhaś ca brahmādyās tvāṃ ca tuṣṭuvuḥ // (173.2) Par.?

stuvantas tvāṃ ca bhagavaty amarā ṛṣayo narāḥ / (174.1) Par.?

īpsitābhyadhikān kāmān prāptāś ca prāpnuvanti ca // (174.2) Par.?

tanme prasīda varade gṛhāṇa tvamimāmapi / (175.1) Par.?

maccharīropahārārcāṃ śreyo rājño 'stu matprabhoḥ // (175.2) Par.?

ity udīrya śiraśchettuṃ yāvadicchati sa svakam / (176.1) Par.?

udabhūdbhāratī tāvadaśarīrā nabhastalāt // (176.2) Par.?

mā kārṣīḥ sāhasaṃ putra sattvenaivāmunā hy aham / (177.1) Par.?

suprītā tava tanmattaḥ prārthayasvepsitaṃ varam // (177.2) Par.?

tac chrutvā so 'bravīdvīravarastuṣṭāsi devi cet / (178.1) Par.?

rājā vikramatuṅgas taj jīvatv anyat samāśatam // (178.2) Par.?

bhāryāpatyāni jīvantu mama ceti vare 'rthite / (179.1) Par.?

tena bhūyaḥ samudabhūdevamastviti vāgdivaḥ // (179.2) Par.?

tatkṣaṇaṃ te ca jīvantas trayo 'py uttasthur akṣataiḥ / (180.1) Par.?

dehair dharmavatī sattvavaro vīravatī ca sā // (180.2) Par.?

tato vīravaro hṛṣṭo bodhitāndevyanugrahāt / (181.1) Par.?

nītvā tānsvagṛhaṃ sarvānrājño dvāramagātpunaḥ // (181.2) Par.?

nṛpo vikramatuṅgaś ca taddṛṣṭvā hṛṣṭavismitaḥ / (182.1) Par.?

gatvā punastaṃ prāsādam ārohat svam alakṣitaḥ // (182.2) Par.?

siṃhadvāre sthitaḥ ko 'tretyupariṣṭāduvāca ca / (183.1) Par.?

tac chrutvādhaḥsthito vīravarastaṃ pratyuvāca saḥ // (183.2) Par.?

ahaṃ sthito 'tra tāṃ ca strīṃ vīkṣituṃ gatavāhanam / (184.1) Par.?

devateva ca sā kvāpi dṛṣṭanaṣṭeva me gatā // (184.2) Par.?

śrutvaitatkṛtsnavṛttāntaṃ dṛṣṭvā so 'tyantamadbhutam / (185.1) Par.?

bhūbhṛdvikramatuṅgo 'tra rātrāveko vyacintayat // (185.2) Par.?

aho apūrvaḥ ko 'pyeṣa puruṣātiśayo bata / (186.1) Par.?

yaḥ karotīdṛśaṃ ślāghyamullekhaṃ na ca śaṃsati // (186.2) Par.?

gambhīro 'pi viśālo 'pi mahāsattvo 'pi nāmbudhiḥ / (187.1) Par.?

acalena mahāvātasparśe 'pi spardhate 'munā // (187.2) Par.?

parokṣaṃ niśi yenaivaṃ putradāravyayena me / (188.1) Par.?

prāṇāḥ pradattās tasyāsya kuryāṃ kāṃ pratyupakriyām // (188.2) Par.?

ityādyākalayanrājā prāsādādavatīrya saḥ / (189.1) Par.?

praviśyābhyantaraṃ rātriṃ smayamāno nināya tām // (189.2) Par.?

prātaś ca sa mahāsthāne tasminvīravare sthite / (190.1) Par.?

tadīyaṃ kathayāmāsa tadrātricaritādbhutam // (190.2) Par.?

tataḥ saṃstūyamānasya sarvair vīravarasya saḥ / (191.1) Par.?

babandha tasya sasutasyāpi paṭṭaṃ narādhipaḥ // (191.2) Par.?

prādādbahūṃś ca viṣayānaśvānratnāni vāraṇān / (192.1) Par.?

daśa kāñcanakoṭīś ca vṛttiṃ ṣaṣṭiguṇāmapi // (192.2) Par.?

tatkṣaṇādrājatulyaś ca so 'bhūdvīravaro dvijaḥ / (193.1) Par.?

ucchritenātapatreṇa kṛtārthaḥ sakuṭumbakaḥ // (193.2) Par.?

iti sa kathāṃ kathayitvā vidadhānaḥ prastutopasaṃhāram / (194.1) Par.?

naravāhanadattaṃ taṃ punaravadadgomukho mantrī // (194.2) Par.?

evaṃ deva kṣmābhṛtām ekavīrā bhṛtyāḥ kecit puṇyayogān milanti / (195.1) Par.?

ye svāmyarthe tyaktadehādyapekṣāḥ samyag lokau dvau susattvā jayanti // (195.2) Par.?

tadeṣa tādṛgvidha eva dṛśyate dvijapravīrastava deva sevakaḥ / (196.1) Par.?

navāgataḥ sattvaguṇādhikādhikaḥ pralambabāhuḥ sthirasauṣṭhavākṛtiḥ // (196.2) Par.?

iti nijasacivādudārasattvo vipulamater avadhārya gomukhāt saḥ / (197.1) Par.?

naravāhanadattarājaputro hṛdi paritoṣamanuttamaṃ babhāra // (197.2) Par.?

Duration=1.1421768665314 secs.