Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17535

Click on a sentence to show its analysis
Keep the mouse pointer over a lemma to show its meanings.

gomukhīyakathātuṣṭaṃ dṛṣṭvā tatspardhayā kila / (1.1) Par.?

naravāhanadattaṃ taṃ marubhūtirathābravīt // (1.2) Par.?

prāyeṇa capalāḥ kāmaṃ striyo naikāntataḥ punaḥ / (2.1) Par.?

veśyā api ca dṛśyante sattvāḍhyāḥ kimutāparāḥ // (2.2) Par.?

tathā ca deva vikhyātāmimāmatra kathāṃ śṛṇu / (3.1) Par.?

vikramāditya ityāsīdrājā pāṭaliputrake // (3.2) Par.?

tasyābhūtām abhiprete mittre hayapatirnṛpaḥ / (4.1) Par.?

rājā gajapatiścobhau bahvaśvagajasādhanau // (4.2) Par.?

śatrurnarapatirbhūripādātas tasya cābhavat / (5.1) Par.?

mānino narasiṃhākhyaḥ pratiṣṭhāneśvaro balī // (5.2) Par.?

taṃ ripuṃ prati sāmarṣaḥ sa mittrabalagarvitaḥ / (6.1) Par.?

cakāra vikramādityaḥ pratijñāṃ rabhasādimām // (6.2) Par.?

tathā mayā vijetavyo rājā narapatiryathā / (7.1) Par.?

sa bandimāgadhairdvāri sevako me nivedyate // (7.2) Par.?

evaṃ kṛtapratijñaste mittre hayagajādhipau / (8.1) Par.?

samānīya samaṃ tābhyāṃ hastyaśvakṣobhitakṣitiḥ // (8.2) Par.?

abhiyoktuṃ narapatiṃ narasiṃhaṃ prasahya tam / (9.1) Par.?

sa yayau vikramādityo rājākhilabalānvitaḥ // (9.2) Par.?

prāpte tasmin pratiṣṭhānanikaṭaṃ so 'py avetya tat / (10.1) Par.?

narasiṃho narapatiḥ saṃnahyāgre 'sya niryayau // (10.2) Par.?

tatas tayorabhūd yuddhaṃ rājñorjanitavismayam / (11.1) Par.?

gajāśvena samaṃ yatra yudhyante sma padātayaḥ // (11.2) Par.?

kramāc ca narasiṃhasya koṭisaṃkhyapadātibhiḥ / (12.1) Par.?

bhagnaṃ tadvikramādityabalaṃ narapaterbalaiḥ // (12.2) Par.?

bhagnaś ca vikramādityaḥ puraṃ pāṭaliputrakam / (13.1) Par.?

yayau palāyya tanmitre svaṃ svaṃ deśaṃ ca jagmatuḥ // (13.2) Par.?

narasiṃho narapatir jitaśatrur nijaṃ puram / (14.1) Par.?

praviveśa pratiṣṭhānaṃ bandibhiḥ stutavikramaḥ // (14.2) Par.?

tataḥ sa vikramādityo 'siddhakāryo vyacintayat / (15.1) Par.?

śastrair ajeyaṃ śatruṃ taṃ jayāmi prajñayā varam // (15.2) Par.?

kāmaṃ kecidvigarhantāṃ mā pratijñānyathā tu bhūt / (16.1) Par.?

iti saṃcintya nikṣipya rājyaṃ yogyeṣu mantriṣu // (16.2) Par.?

nirgatya nagarādguptaṃ mukhyenaikena mantriṇā / (17.1) Par.?

saha buddhivarākhyeṇa rājaputravaraistathā // (17.2) Par.?

pañcabhiḥ kulajaiḥ śūraiḥ sa kārpaṭikaveṣabhṛt / (18.1) Par.?

bhūtvā puraṃ nijaripoḥ pratiṣṭhānaṃ jagāma tat // (18.2) Par.?

tatra vāravilāsinyā narendrasadanopamam / (19.1) Par.?

yayau madanamāleti khyātāyā varamandiram // (19.2) Par.?

kṛtāhvānam iva prāṃśuprākāraśikharocchritaiḥ / (20.1) Par.?

dhvajāṃśukair mṛdumarudvikṣiptākṣiptapallavaiḥ // (20.2) Par.?

pradhāne pūrvadigdvāre vividhāyudhaśālinām / (21.1) Par.?

guptaṃ sahasraviṃśatyā padātīnāṃ divāniśam // (21.2) Par.?

anyāsu dikṣu tisṛṣu dvāri dvāri madoddhataiḥ / (22.1) Par.?

daśabhirdaśabhiḥ śūrasahasrairabhirakṣitam // (22.2) Par.?

āveditaḥ pratīhāraistathābhūtaḥ praviśya ca / (23.1) Par.?

kvacitpravitatānekavarāśvaśreṇiśobhitam // (23.2) Par.?

kvacidābaddhamātaṅgaghaṭāsaṃghaṭṭasaṃcaram / (24.1) Par.?

kvacid āyudhasaṃdarbhagambhīrākāragumphitam // (24.2) Par.?

kvacid ratnaprabhābhāsvadbahukoṣagṛhojjvalam / (25.1) Par.?

kvacit sevakasaṃghātasaṃtatābaddhamaṇḍalam // (25.2) Par.?

kvaciduccaiḥ paṭhadbandivṛndakolāhalākulam / (26.1) Par.?

kvacinnibaddhasaṃgītamṛdaṅgadhvanināditam // (26.2) Par.?

saptakakṣyāvibhaktaṃ tatsa paśyansaparicchadaḥ / (27.1) Par.?

prāpan madanamālāyā vāsaprāsādamunnatam // (27.2) Par.?

sā taṃ kakṣyāsu sākūtanirvarṇitahayādikam / (28.1) Par.?

śrutvā parijanānmatvā pracchannaṃ kaṃciduttamam // (28.2) Par.?

pratyudgamya praṇamyātha sābhilāṣaṃ sakautukam / (29.1) Par.?

rājocite praveśyāntar upāveśayad āsane // (29.2) Par.?

so 'pi tadrūpalāvaṇyavinayāhṛtacetanaḥ / (30.1) Par.?

tām abhyanandadātmānam aprakāśyaiva bhūpatiḥ // (30.2) Par.?

tato madanamālā sā snānapuṣpānulepanaiḥ / (31.1) Par.?

vastrairābharaṇairbhūpaṃ mahārhaistamamānayat // (31.2) Par.?

dattvā divasavṛttiṃ ca teṣāṃ tadanuyāyinām / (32.1) Par.?

āhāraistaṃ sasacivaṃ nānārūpairupācarat // (32.2) Par.?

nināya ca samaṃ tena dinaṃ pānādilīlayā / (33.1) Par.?

ātmānaṃ cārpayattasmai sā darśanavaśīkṛtā // (33.2) Par.?

tathaivārādhyamāno 'tha channo 'py aharahastayā / (34.1) Par.?

sa tasthau vikramādityaścakravartyucitaiḥ kramaiḥ // (34.2) Par.?

yācakebhyo dadau nityaṃ vittaṃ yāvac ca yac ca saḥ / (35.1) Par.?

dṛṣṭā madanamālā sā tattasmai svamupānayat // (35.2) Par.?

tenopabhujyamānaṃ ca sā śarīraṃ dhanaṃ tathā / (36.1) Par.?

mene kṛtārtham anyasmin puṃsyarthe ca parāṅmukhī // (36.2) Par.?

tatpremṇā hy api tatratyam anuraktaṃ narādhipam / (37.1) Par.?

āyāntaṃ narasiṃhaṃ taṃ vārayāmāsa yuktibhiḥ // (37.2) Par.?

evaṃ tayā sevyamānaḥ kadācinmantriṇaṃ rahaḥ / (38.1) Par.?

rājā sahacaraṃ so 'tra taṃ buddhivaramabhyadhāt // (38.2) Par.?

arthārthinī na kāme 'pi veśyā rajyati taṃ vinā / (39.1) Par.?

tāsāṃ lobho hi vidhinā datto nirmāya yācakān // (39.2) Par.?

iyaṃ madanamālā tu bhujyamāne dhane mayā / (40.1) Par.?

na virajyaty atisnehān mayi pratyuta tuṣyati // (40.2) Par.?

tadasyāḥ saṃprati kathaṃ karomi pratyupakriyām / (41.1) Par.?

yena kāmaṃ pratijñāpi krameṇa mama setsyati // (41.2) Par.?

tac chrutvā taṃ bravīti sma mantrī buddhivaro nṛpam / (42.1) Par.?

yadyevaṃ tadanarghāṇi yāni ratnānyupāharat // (42.2) Par.?

prapañcabuddhir bhikṣus te tebhyo 'syai dehi kānicit / (43.1) Par.?

ity ukto mantriṇā tena rājā taṃ pratyabhāṣata // (43.2) Par.?

dattaiḥ samagrair api tair nāsyāḥ kiṃcit kṛtaṃ bhavet / (44.1) Par.?

etadvṛttāntasaṃśliṣṭā kiṃ tvasyānyatra niṣkṛtiḥ // (44.2) Par.?

tac chrutvā so 'bravīn mantrī deva kiṃ tena bhikṣuṇā / (45.1) Par.?

tvatsevā sā kṛtetyeṣa tadvṛttāntas tvayocyatām // (45.2) Par.?

ity ukto mantriṇā tena rājā buddhivareṇa saḥ / (46.1) Par.?

jagāda śṛṇu tatraitāṃ tatkathāṃ varṇayāmi te // (46.2) Par.?

pūrvaṃ pāṭaliputre me praviśyāsthānamanvaham / (47.1) Par.?

bhikṣuḥ prapañcabuddhyākhyaḥ samudgakam upānayat // (47.2) Par.?

ahaṃ tathaiva satataṃ varṣamātraṃ samarpayam / (48.1) Par.?

bhāṇḍāgārikahaste tad anudghāṭitam eva sat // (48.2) Par.?

ekadā bhikṣuṇā tena ḍhaukitaṃ tatsamudgakam / (49.1) Par.?

daivātpāṇermama pataddvidhābhūtam abhūd bhuvi // (49.2) Par.?

niragāc ca mahāratnaṃ tasmādanalabhāsuram / (50.1) Par.?

prāṅ mayevāparijñātaṃ hṛdayaṃ tena darśitam // (50.2) Par.?

tad dṛṣṭvādāya cānyāni tānyānāyya vibhajya ca / (51.1) Par.?

samudgakāni sarvebhyo ratnānyahamavāptavān // (51.2) Par.?

tataḥ prapañcabuddhiṃ tamaprākṣaṃ vismayādaham / (52.1) Par.?

kimaho sevase ratnair evaṃ māmīdṛśairiti // (52.2) Par.?

athātra vijanaṃ kṛtvā sa bhikṣurmāmavocata / (53.1) Par.?

asyāṃ kṛṣṇacaturdaśyāmāgāminyāṃ niśāgame // (53.2) Par.?

śmaśāne sādhanīyā me vidyā kācittato bahiḥ / (54.1) Par.?

tatra sāhāyake vīra tvadāgamanamarthaye // (54.2) Par.?

vīrasāhāyyanirvighnāḥ sukhalabhyā hi siddhayaḥ / (55.1) Par.?

ity ukto bhikṣuṇā tena tadahaṃ pratipannavān // (55.2) Par.?

atha hṛṣṭe gate tasmin dinaiḥ kṛṣṇacaturdaśī / (56.1) Par.?

āgāt sā śramaṇasyāsya tasyāsmārṣamahaṃ vacaḥ // (56.2) Par.?

tataḥ kṛtāhniko bhūtvā pradoṣaṃ pratipālayan / (57.1) Par.?

kṛtasaṃdhyāvidhirdaivātkṣipraṃ nidrāmagāmaham // (57.2) Par.?

tatkṣaṇaṃ garuḍārūḍho bhagavān bhaktavatsalaḥ / (58.1) Par.?

hariḥ padmāṅkitotsaṅgaḥ svapne mām evam ādiśat // (58.2) Par.?

prapañcabuddhir anvarthanāmāyaṃ maṇḍalārcane / (59.1) Par.?

putra śmaśāne nītvā tvāmupahārīkariṣyati // (59.2) Par.?

ato vakṣyati yatsa tvāṃ jighāṃsurmā sma tatkṛthāḥ / (60.1) Par.?

tvaṃ pūrvaṃ kuru śikṣitvā kariṣyāmīti taṃ vadeḥ // (60.2) Par.?

tatas tathā taṃ kurvāṇaṃ tacchidreṇaiva tatkṣaṇam / (61.1) Par.?

hanyās tvaṃ tadabhipretā siddhis tava bhaviṣyati // (61.2) Par.?

ity uktvāntarhite viṣṇau prabuddho 'hamacintayam / (62.1) Par.?

hareranugrahājjñāto vadhyo māyī mayādya saḥ // (62.2) Par.?

evaṃ vicintya yāminyāḥ prathame prahare gate / (63.1) Par.?

kṛpāṇapāṇir ekākī tacchmaśānam agām aham // (63.2) Par.?

tatra dṛṣṭvā tam abhyāgāṃ bhikṣumarcitamaṇḍalam / (64.1) Par.?

so 'pi vīkṣyābhyanandanmām abravīc ca tadā śaṭhaḥ // (64.2) Par.?

mīlitākṣaḥ prasāryāṅgaṃ pata bhūmāv avāṅmukhaḥ / (65.1) Par.?

rājannevaṃ bhavetsiddhirdvayorapyāvayoriti // (65.2) Par.?

tato 'haṃ pratyavocaṃ taṃ tvam evaṃ prathamaṃ kuru / (66.1) Par.?

mahyaṃ darśaya śikṣitvā vidhāsyāmi tathaiva tat // (66.2) Par.?

tac chrutvā śramaṇo mūḍhastathā bhuvi sa cāpatat / (67.1) Par.?

chinnaṃ tasya ca nistriṃśaprahāreṇa mayā śiraḥ // (67.2) Par.?

athāntarikṣādudabhūd bhāratī sādhu bhūpate / (68.1) Par.?

tvayā hi bhikṣuḥ pāpo 'yam upahārīkṛto 'dya yat // (68.2) Par.?

yāsya sādhyā bhavetsā te siddhādya gagane gatiḥ / (69.1) Par.?

ahaṃ dhairyeṇa tuṣṭaste kāmacārī dhanādhipaḥ // (69.2) Par.?

tadasmatto vṛṇīṣvānyaṃ varaṃ yamabhivāñchasi / (70.1) Par.?

ity uktvā prakaṭībhūtaṃ praṇamyāhaṃ tam abravam // (70.2) Par.?

yadā tvām arthayiṣye 'hamupayuktaṃ tadā varam / (71.1) Par.?

saṃsmṛtopasthito bhūtvā bhagavanme pradāsyasi // (71.2) Par.?

evam astviti māmuktvā tiro 'bhūtsa dhanādhipaḥ / (72.1) Par.?

labdhasiddhiś ca rabhasātsvamandiramagāmaham // (72.2) Par.?

ity uktaste svavṛttāntas tat kuberavareṇa me / (73.1) Par.?

kāryā madanamālāyās tenāsyāḥ pratyupakriyā // (73.2) Par.?

tadbuddhivara gaccha tvaṃ tāvatpāṭaliputrakam / (74.1) Par.?

veṣacchannaṃ samādāya rājaputraparicchadam // (74.2) Par.?

ahaṃ ca kṛtvā pratyagrāṃ priyāyāḥ pratyupakriyām / (75.1) Par.?

punarāgamanāyeha tatraivaiṣyāmi saṃprati // (75.2) Par.?

evam uktvā sa sacivaṃ vikramādityabhūpatiḥ / (76.1) Par.?

dinakṛtyaṃ sa kṛtvā taṃ vyasṛjatsaparicchadam // (76.2) Par.?

tatheti ca gate tasmiṃstāṃ nināya niśāṃ nṛpaḥ / (77.1) Par.?

bhāviviśleṣasotkaṇṭhaḥ samaṃ madanamālayā // (77.2) Par.?

sāpi dūrībhavantaṃ taṃ śaṃsatevāntarātmanā / (78.1) Par.?

āliṅgatī muhuḥ sotkā nāsyāṃ nidrāmagānniśi // (78.2) Par.?

tataḥ prātaḥ sa rājā tu vihitāvaśyakakriyaḥ / (79.1) Par.?

nityadevārcanāgāraṃ viveśaiko japacchalāt // (79.2) Par.?

tatra vaiśravaṇaṃ devaṃ saṃsmṛtopasthitaṃ ca saḥ / (80.1) Par.?

varaṃ prākpratipannaṃ taṃ praṇamyaivam ayācata // (80.2) Par.?

prayaccha deva tenādya vareṇāṅgīkṛtena me / (81.1) Par.?

sauvarṇān pañca mahataḥ puruṣāṃs tān ihākṣayān // (81.2) Par.?

yeṣāmiṣṭopabhogāya chidyamānāny anāratam / (82.1) Par.?

tādṛśānyeva jāyante tānyaṅgāni punaḥ punaḥ // (82.2) Par.?

evaṃ bhavantu tadrūpāḥ puruṣāste yathecchasi / (83.1) Par.?

ity uktvā sa dhanādhyakṣo jagāmādarśanaṃ kṣaṇāt // (83.2) Par.?

rājāpi tatkṣaṇaṃ so 'tra devāgāre dadarśa tān / (84.1) Par.?

sthitān akasmāt sauvarṇānmahataḥ pañca pūruṣān // (84.2) Par.?

tataḥ praviṣṭo niragāt svāṃ pratijñām avismaran / (85.1) Par.?

dyām utpatya yayau tāvatpuraṃ pāṭaliputrakam // (85.2) Par.?

tatrābhinandito 'mātyaiḥ paurairantaḥpuraiś ca saḥ / (86.1) Par.?

tasthau kāryāṇi kurvāṇaḥ pratiṣṭhānasthayā dhiyā // (86.2) Par.?

tāvac cātra pratiṣṭhāne prāviśattasya sā priyā / (87.1) Par.?

cirapraviṣṭaṃ taṃ kāntaṃ vīkṣituṃ devasadma tat // (87.2) Par.?

praviṣṭā tatra nādrākṣīt priyaṃ taṃ nṛpatiṃ kvacit / (88.1) Par.?

adrākṣīt tu mahocchrāyān sauvarṇān pañca pūruṣān // (88.2) Par.?

tāndṛṣṭvā tam anāsādya duḥkhitā sā vyacintayat / (89.1) Par.?

nūnaṃ vidyādharaḥ ko'pi gandharvo vā sa me priyaḥ // (89.2) Par.?

yaḥ saṃvibhajya māmebhiḥ puṃbhir utpatya khaṃ gataḥ / (90.1) Par.?

tadetairbhāratulyaiḥ kiṃ tadviyuktā karomy aham // (90.2) Par.?

iti saṃcintya pṛcchantī nijaṃ parijanaṃ muhuḥ / (91.1) Par.?

tatpravṛttiṃ vinirgatya tatra babhrāma sarvataḥ // (91.2) Par.?

na ca lebhe ratiṃ kvāpi harmyodyānagṛhādiṣu / (92.1) Par.?

vilapantī viyogārtā śarīratyāgasaṃmukhī // (92.2) Par.?

mā viṣādaṃ kṛthā devi ko'pi kāmacaro hi saḥ / (93.1) Par.?

devo yadṛcchayā bhūyo bhavyāṃ tvāmabhyupaiṣyati // (93.2) Par.?

ityādibhiḥ pradattāsthair vākyaiḥ parijanena sā / (94.1) Par.?

āśvāsitā katham api pratijñāmakarodimām // (94.2) Par.?

ṣaṇmāsamadhye yadi me na sa dāsyati darśanam / (95.1) Par.?

dattasarvasvayā vahnau praveṣṭavyaṃ tato mayā // (95.2) Par.?

iti pratijñayātmānaṃ saṃstabhyābhūt tataś ca sā / (96.1) Par.?

anvahaṃ dadatī dānaṃ dhyāyantī taṃ svavallabham // (96.2) Par.?

ekadā svarṇapuṃsāṃ ca teṣām ekasya sā bhujau / (97.1) Par.?

chedayitvā dvijātibhyo dadau dānaikatatparā // (97.2) Par.?

dvitīye 'hni ca sādrākṣīttādṛśāveva tasya tau / (98.1) Par.?

rātrimadhye samutpannau bhujau saṃjātavismayā // (98.2) Par.?

tataḥ krameṇa sānyeṣāṃ bhujau dānārtham achinat / (99.1) Par.?

utpedire ca sarveṣāṃ punasteṣāṃ tathaiva te // (99.2) Par.?

atha tānakṣayāndṛṣṭvā viprebhyo vedasaṃkhyayā / (100.1) Par.?

adhyetṛbhyo dadau chittvā tadbhujānsā śubhānvaham // (100.2) Par.?

dinaiś cālpair gatāṃ dikṣu śrutvā tāṃ khyātimāyayau / (101.1) Par.?

tatra saṃgrāmadattākhyo vipraḥ pāṭaliputrakāt // (101.2) Par.?

sa daridraścaturvedo guṇairyuktastadantikam / (102.1) Par.?

pratigrahārthī prāvikṣattadā dvāḥsthaniveditaḥ // (102.2) Par.?

sā tasmai vedasaṃkhyākāndadau sauvarṇapuṃbhujān / (103.1) Par.?

arcitāya vratakṣāmairaṅgair virahapāṇḍuraiḥ // (103.2) Par.?

tataḥ sa vipro duḥkhārtāc chrutvā tatparivāritaḥ / (104.1) Par.?

tadvṛttāntaṃ mahāghorapratijñāntam aśeṣataḥ // (104.2) Par.?

hṛṣṭo viṣaṇṇaś cāropya sauvarṇānuṣṭrayordvayoḥ / (105.1) Par.?

bhujānetānnivāsaṃ svaṃ yayau pāṭaliputrakam // (105.2) Par.?

arājarakṣite kṣemaṃ nāsminme kāñcane bhavet / (106.1) Par.?

iti tatra sa saṃcintya praviśyāsthānavartinam // (106.2) Par.?

nṛpatiṃ vikramādityaṃ brāhmaṇaḥ sa vyajijñapat / (107.1) Par.?

ihaivāsmi mahārāja vāstavyo nagare dvijaḥ // (107.2) Par.?

so 'haṃ daridro vittārthī prayāto dakṣiṇāpatham / (108.1) Par.?

prāptaḥ puraṃ pratiṣṭhānaṃ narasiṃhasya bhūpateḥ // (108.2) Par.?

tatra pratigrahārthī san prakhyātayaśaso gṛham / (109.1) Par.?

ahaṃ madanamālāyā gaṇikāyā gato 'bhavam // (109.2) Par.?

tasyāḥ sakāśe divyo hi ko 'py uṣitvā ciraṃ pumān / (110.1) Par.?

gataḥ kvāpy akṣayān dattvā puruṣān pañca kāñcanān // (110.2) Par.?

tatas tadviprayogārtā jīvitaṃ viṣavedanām / (111.1) Par.?

dehaṃ niṣphalamāyāsamāhāraṃ caurayātanām // (111.2) Par.?

manyamānā gatadhṛtiḥ kathaṃcidanujīvibhiḥ / (112.1) Par.?

āśvāsyamānā vyadhita pratijñāṃ sā manasvinī // (112.2) Par.?

yadi ṣaṇmāsamadhye māṃ na sa saṃbhāvayiṣyati / (113.1) Par.?

tanmayāgnau praveṣṭavyaṃ daurbhāgyopahatātmanā // (113.2) Par.?

iti baddhapratijñā sā maraṇādhyavasāyinī / (114.1) Par.?

dadātyanudinaṃ dānaṃ sumahatsukṛtaiṣiṇī // (114.2) Par.?

sā ca dṛṣṭā mayā deva viśṛṅkhalapadasthitiḥ / (115.1) Par.?

anāhārakṛśenāpi śarīreṇātiśobhitā // (115.2) Par.?

dānatoyārdritakarā militālikulākulā / (116.1) Par.?

duḥsthitā kāmakariṇo madāvastheva dehinī // (116.2) Par.?

manye nindyaś ca vandyaś ca sa kāmī yo jahāti tām / (117.1) Par.?

kānto yena vinā sā ca tanuṃ tyajati sundarī // (117.2) Par.?

tayātra mahyaṃ catvāraḥ svarṇāḥ puruṣabāhavaḥ / (118.1) Par.?

caturvedāya vidhivatpradattā vedasaṃkhyayā // (118.2) Par.?

tatsusattragṛhaṃ kṛtvā svadharmam iha sevitum / (119.1) Par.?

icchāmi tatra devena sānāthyaṃ me vidhīyatām // (119.2) Par.?

iti tasya mukhāc chrutvā priyāvārtāṃ dvijasya saḥ / (120.1) Par.?

sadyo 'bhūd vikramādityas tadākṣiptamanā nṛpaḥ // (120.2) Par.?

ādiśya ca pratīhāraṃ dvijasyāsyeṣṭasiddhaye / (121.1) Par.?

vicintya dṛḍharāgāṃ ca tāṃ tṛṇīkṛtajīvitām // (121.2) Par.?

pratijñāsiddhisāhāyye sahasotkaḥ svakāminīm / (122.1) Par.?

gaṇayitvālpaśeṣaṃ ca tasyā dehavyayāvadhim // (122.2) Par.?

satvaraṃ mantrinikṣiptarājyo gatvā vihāyasā / (123.1) Par.?

pratiṣṭhānaṃ sa nṛpatiḥ priyāveśma viveśa tat // (123.2) Par.?

tatra jyotsnācchavasanāṃ vibudhārpitavaibhavām / (124.1) Par.?

kṛśām apaśyat kāntāṃ tāṃ parvaṇīndukalām iva // (124.2) Par.?

sāpi netrasudhāsāram atarkitam upasthitam / (125.1) Par.?

dṛṣṭvā madanamālā tamudbhrāntevābhavatkṣaṇam // (125.2) Par.?

āliṅgantī tato bhūyaḥ palāyanabhayād iva / (126.1) Par.?

kaṇṭhe bhujalatāpāśam arpayāmāsa tasya sā // (126.2) Par.?

kiṃ māmanāgasaṃ tyaktvā gatavānasi niṣkṛpa / (127.1) Par.?

ity uvāca ca taṃ bāṣpaghargharākṣarayā girā // (127.2) Par.?

ehi vakṣyāmi rahasīty uktvā so 'bhyantaraṃ rahaḥ / (128.1) Par.?

tayā saha yayau rājā parivārābhinanditaḥ // (128.2) Par.?

tatrātmānaṃ prakāśyāsyai svavṛttāntamavarṇayat / (129.1) Par.?

narasiṃhanṛpaṃ yuktyā jetum atrāgamad yathā // (129.2) Par.?

yathā prapañcabuddhiṃ ca hatvā khecaratāṃ yayau / (130.1) Par.?

yathā varaṃ dhanādhyakṣātprāpya saṃvyabhajac ca tām // (130.2) Par.?

yathā ca brāhmaṇādvārtāṃ śrutvā tatrāgataḥ punaḥ / (131.1) Par.?

tat sarvam ā pratijñārthāduktvā bhūyo jagāda tām // (131.2) Par.?

tatpriye narasiṃho 'yam ajeyo 'tibalī balaiḥ / (132.1) Par.?

dvandvayuddhena ca mayā sākameṣa niyudhyate // (132.2) Par.?

bhūcaraṃ dyucaro bhūtvā na cainaṃ hatavānaham / (133.1) Par.?

adharmayuddhena jayaṃ ko hīcchetkṣattriyo bhavan // (133.2) Par.?

tan me pratijñāsādhyaṃ yad bandibhir dvāravartinaḥ / (134.1) Par.?

āvedanaṃ nṛpasyāsya tatra sāhāyakaṃ kuru // (134.2) Par.?

etac chrutvaiva dhanyāsmīty uktvā rājñāmunā saha / (135.1) Par.?

saṃmantrya gaṇikātha svānāhūyovāca bandinaḥ // (135.2) Par.?

narasiṃho yadā rājā gṛhameṣyati me tadā / (136.1) Par.?

dvārasaṃnihitairbhāvyaṃ bhavadbhirdattadṛṣṭibhiḥ // (136.2) Par.?

deva bhakto 'nuraktaś ca narasiṃhanṛpastvayi / (137.1) Par.?

iti vācyaṃ ca yuṣmābhis tasya praviśato muhuḥ // (137.2) Par.?

kaḥ sthito 'treti yadi ca prakṣyatyutprekṣya tatkṣaṇam / (138.1) Par.?

sthito 'tra vikramāditya iti vaktavya eva saḥ // (138.2) Par.?

ity uktvā tānvisṛjyātha pratīhārīṃ jagāda sā / (139.1) Par.?

narasiṃho na rājātra niṣedhyaḥ praviśanniti // (139.2) Par.?

evaṃ kṛtvā punaḥ prāptaprāṇanāthā yathāsukham / (140.1) Par.?

tasthau madanamālā sā niḥsaṃkhyaṃ dadatī vasu // (140.2) Par.?

tataḥ śrutvātidānaṃ tatsauvarṇapuruṣodbhavam / (141.1) Par.?

narasiṃhanṛpo hitvāpy āgād draṣṭuṃ sa tadgṛham // (141.2) Par.?

pratīhārāniṣiddhasya tasya praviśato 'tra ca / (142.1) Par.?

ā bahirdvāratas tāram ūcuḥ sarve 'pi bandinaḥ // (142.2) Par.?

narasiṃho nṛpo deva praṇato bhaktimāniti / (143.1) Par.?

tac ca śṛṇvansa sāmarṣaḥ saśaṅkaścābhavannṛpaḥ // (143.2) Par.?

pṛṣṭvā ca kaḥ sthito 'treti buddhvā tatra sthitaṃ ca tam / (144.1) Par.?

rājānaṃ vikramādityaṃ kṣaṇam evam acintayat // (144.2) Par.?

tadidaṃ prākpratijñātaṃ dvāri madvinivedanam / (145.1) Par.?

nirvyūḍhamamunā rājñā prasahyāntaḥ praviśya me // (145.2) Par.?

aho rājāyamojasvī yenādyaivam ahaṃ jitaḥ / (146.1) Par.?

na ca vadhyo balenāsāvekākī me gṛhāgataḥ // (146.2) Par.?

tattāvatpraviśāmīti narasiṃho vicintya saḥ / (147.1) Par.?

viveśābhyantaraṃ rājā bandivṛndaniveditaḥ // (147.2) Par.?

praviṣṭaṃ taṃ ca dṛṣṭvaiva sasmitaṃ sasmitānanaḥ / (148.1) Par.?

utthāya vikramādityaḥ kaṇṭhe jagrāha bhūpatim // (148.2) Par.?

athopaviṣṭau tau dvāvapyanyonyakuśalaṃ nṛpau / (149.1) Par.?

tasyāṃ madanamālāyāṃ pārśvasthāyāmapṛcchatām // (149.2) Par.?

kathākramāc ca papraccha vikramādityam atra saḥ / (150.1) Par.?

narasiṃhaḥ kuto 'treme suvarṇapuruṣā iti // (150.2) Par.?

tato 'tra vikramādityo nihataśramaṇādhamam / (151.1) Par.?

sādhitākāśagamanaṃ vitteśvaravareṇa ca // (151.2) Par.?

samprāptākṣayasauvarṇamahāpuruṣapañcakam / (152.1) Par.?

kṛtsnaṃ kathitavānasmai svavṛttāntaṃ tamadbhutam // (152.2) Par.?

narasiṃho 'tha matvā taṃ mahāśaktiṃ nabhaścaram / (153.1) Par.?

apāpabuddhiṃ vṛtavān mitratvāya nṛpo nṛpam // (153.2) Par.?

pratipannasuhṛttvaṃ ca kṛtācāravidhiṃ tadā / (154.1) Par.?

rājadhānīṃ nijāṃ nītvā svopacārairupācarat // (154.2) Par.?

saṃmānya prahitas tena rājñā ca sa nṛpaḥ punaḥ / (155.1) Par.?

gṛhaṃ madanamālāyā vikramāditya āyayau // (155.2) Par.?

atha sa nijaujaḥpratimāsampāditadustarapratijñārthaḥ / (156.1) Par.?

gantuṃ cakāra ceto nijanagaraṃ vikramādityaḥ // (156.2) Par.?

tena samaṃ sā jigamiṣur asahā virahasya madanamālāpi / (157.1) Par.?

tyakṣyantī taṃ deśaṃ brāhmaṇasādakṛtavasatiṃ svām // (157.2) Par.?

tatas tayā sākam ananyacittayā tadīyahastyaśvapadātyanudrutaḥ / (158.1) Par.?

sa vikramādityanarendracandramā nijaṃ puraṃ pāṭaliputrakaṃ yayau // (158.2) Par.?

tatra tena saha baddhasauhṛdas tasthivānsa narasiṃhabhūbhṛtā / (159.1) Par.?

anvito madanamālayā tayā premamuktanijadeśayā sukham // (159.2) Par.?

iti deva bhavatyudārasattvo dṛḍharaktaś ca vilāsinījano 'pi / (160.1) Par.?

avarodhasamo mahīpatīnāṃ kimutānyaḥ kulajaḥ puraṃdhrilokaḥ // (160.2) Par.?

itthaṃ niśamya marubhūtimukhād udārām etāṃ kathāṃ sa naravāhanadattabhūpaḥ / (161.1) Par.?

vidyādharottamakulaprabhavā ca sāsya ratnaprabhā navavadhūr vyadhita pramodam // (161.2) Par.?

Duration=1.3745949268341 secs.