Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17545

Click on a sentence to show its analysis
Keep the mouse pointer over a lemma to show its meanings.

evaṃ kathitavatyatra marubhūtau camūpatiḥ / (1.1) Par.?

naravāhanadattasya puro hariśikho 'bravīt // (1.2) Par.?

satyam eva na sustrīṇāṃ bharturanyatparāyaṇam / (2.1) Par.?

tathā ca śrūyatāmeṣāpyatra citratarā kathā // (2.2) Par.?

vardhamānapuraṃ nāma yadasti nagaraṃ bhuvi / (3.1) Par.?

tatra vīrabhujākhyo 'bhūd rājā dharmabhṛtāṃ varaḥ // (3.2) Par.?

antaḥpuraśate tasya vidyamāne 'py abhūtprabhoḥ / (4.1) Par.?

ekā guṇavarā nāma rājñī prāṇādhikapriyā // (4.2) Par.?

patnīśatasya madhye ca na tāvad daivayogataḥ / (5.1) Par.?

ekasyām api kasyāṃcit putras tasyodapadyata // (5.2) Par.?

tena vaidyaṃ sa papraccha śrutavardhanasaṃjñakam / (6.1) Par.?

kaccidastyauṣadhaṃ tādṛgyena syātputrasaṃbhavaḥ // (6.2) Par.?

tac chrutvā so 'bravīdvaidyo devaitatsādhayāmy aham / (7.1) Par.?

vanyacchagalakaḥ kiṃtu devenānāyyatāṃ mama // (7.2) Par.?

ity ākarṇya bhiṣagvākyaṃ pratīhāraṃ sa bhūpatiḥ / (8.1) Par.?

ādiśyānāyayāmāsa tasya chagalakaṃ vanāt // (8.2) Par.?

taṃ chāgaṃ rājasūdebhyaḥ samarpya sa bhiṣaktataḥ / (9.1) Par.?

tanmāṃsaiḥ sādhayāmāsa rājñyarthaṃ rasakottamam // (9.2) Par.?

ādiśyaikatra rājñīnāṃ melakaṃ devam arcitum / (10.1) Par.?

gate rājñi milanti sma devya ekatra tatra tāḥ // (10.2) Par.?

ekā tu militā nāsīdrājño guṇavarātra sā / (11.1) Par.?

rājño devārcanasthasya tatkālaṃ nikaṭe sthitā // (11.2) Par.?

militābhyaś ca tābhyastatpānārthaṃ cūrṇamiśritam / (12.1) Par.?

avibhāvyaiva rasakaṃ niḥśeṣaṃ sa dadau bhiṣak // (12.2) Par.?

kṣaṇātkṛtārcanaḥ so 'tra rājāgatya priyāyutaḥ / (13.1) Par.?

vīkṣyāśeṣopayuktaṃ tad dravyaṃ vaidyaṃ tam abhyadhāt // (13.2) Par.?

aho na sthāpitaṃ kiṃcittvayā guṇavarākṛte / (14.1) Par.?

yatpradhāno 'yamārambhastadeva tava vismṛtam // (14.2) Par.?

ity uktvā sa vilakṣaṃ taṃ vaidyaṃ sūdānnṛpo 'bravīt / (15.1) Par.?

kiṃ tasya chagalasyāsti māṃsaśeṣo 'tra kaścana // (15.2) Par.?

śṛṅge pare sta ity ukte sūdair vaidyo 'tha so 'bravīt / (16.1) Par.?

sādhu tarhyuttamaṃ hi syādrasakaṃ śṛṅgagarbhajam // (16.2) Par.?

ity uktvā kārayitvaiva tat tataḥ śṛṅgamāṃsataḥ / (17.1) Par.?

tasyai guṇavarāyai sa cūrṇamiśraṃ bhiṣagdadau // (17.2) Par.?

tatas tasyātha navatirdevyo rājño navādhikāḥ / (18.1) Par.?

āsansagarbhāḥ kāle ca sarvāḥ suṣuvire sutān // (18.2) Par.?

arvāgupāttagarbhā ca sā sarvottamalakṣaṇam / (19.1) Par.?

prāsūta sma mahādevī paścād guṇavarā sutam // (19.2) Par.?

śṛṅgamāṃsarasotpannaṃ nāmnā śṛṅgabhujaṃ ca tam / (20.1) Par.?

pitā vīrabhujaścakre rājā kṛtamahotsavaḥ // (20.2) Par.?

vardhamānaḥ sahānyaistairbhrātṛbhirvayasā param / (21.1) Par.?

kaniṣṭhaḥ so 'bhavatteṣāṃ guṇair jyeṣṭhatamas tv abhūt // (21.2) Par.?

kramātsa rājaputraś ca rūpe kāmasamo 'bhavat / (22.1) Par.?

dhanurvede 'rjunasamo bhīmasenasamo bale // (22.2) Par.?

tataḥ saputrāṃ sutarāṃ dṛṣṭvā vīrabhujasya tām / (23.1) Par.?

priyāṃ guṇavarāṃ rājño devyo 'nyā matsaraṃ yayuḥ // (23.2) Par.?

atha tāsv ayaśolekhā nāma rājñī durāśayā / (24.1) Par.?

saṃmantrya tābhiranyābhiḥ saha kṛtvā ca saṃvidam // (24.2) Par.?

samastābhiḥ sapatnībhistaṃ rājānaṃ gṛhāgatam / (25.1) Par.?

mṛṣādhṛtamukhaglāniḥ pṛcchantaṃ kṛcchrato 'bravīt // (25.2) Par.?

āryaputra kathaṃ nāma sahase gṛhadūṣaṇam / (26.1) Par.?

parasya rakṣitāvadyaṃ na rakṣasyātmanaḥ katham // (26.2) Par.?

yaḥ surakṣitanāmāyam antaḥpurapatir yuvā / (27.1) Par.?

tatsaktā hi tvadīyaiṣā rājñī guṇavarā kila // (27.2) Par.?

tadanyasya na lābho 'sti sauvidallābhirakṣite / (28.1) Par.?

antaḥpure 'tra puṃso yad ato 'sau tena saṃgatā // (28.2) Par.?

sarvatrāntaḥpure caitatprasiddham iha gīyate / (29.1) Par.?

ity uktaḥ sa tayā rājā dadhyau ca vimamarśa ca // (29.2) Par.?

gatvā caikaikaśo rājñīranyāḥ papraccha tāḥ kramāt / (30.1) Par.?

tāś ca tasmai tathaivocuḥ sarvā racitakaitavāḥ // (30.2) Par.?

tataḥ sa matimānrājā jitakrodho vyacintayat / (31.1) Par.?

tayoḥ saṃbhāvyate naitat pravādaś cāyam īdṛśaḥ // (31.2) Par.?

tad aniścitya kāryo me pratibhedo na kasyacit / (32.1) Par.?

yuktyā tu parihāryau tau saṃpratyantamavekṣitum // (32.2) Par.?

iti niścitya so 'nyedyur āsthāne 'ntaḥpurādhipam / (33.1) Par.?

surakṣitaṃ tam āhūya kṛtakopaḥ samabhyadhāt // (33.2) Par.?

brahmahatyā tvayā pāpa kṛtetyavagataṃ mayā / (34.1) Par.?

tat tvām akṛtasattīrthayātraṃ na draṣṭumutsahe // (34.2) Par.?

tac chrutvā taṃ samudbhrāntaṃ brahmahatyā kuto mayā / (35.1) Par.?

kṛtā deveti jalpantaṃ sa rājā punarabravīt // (35.2) Par.?

mā sma dhārṣṭyaṃ kṛthā gaccha kāśmīrān pāpanāśanān / (36.1) Par.?

yatra tadvijayakṣetraṃ nandikṣetraṃ ca pāvanam // (36.2) Par.?

vārāhaṃ yatra ca kṣetraṃ ye pūtāścakrapāṇinā / (37.1) Par.?

dhatte nāma vitasteti vahantī yatra jāhnavī // (37.2) Par.?

yatra tan maḍavakṣetraṃ yatra cottaramānasam / (38.1) Par.?

tattīrthayātrāpūto māṃ punar drakṣyasi nānyathā // (38.2) Par.?

evam uktvā tamavaśaṃ visasarja surakṣitam / (39.1) Par.?

sa yuktyā tīrthayātrāyāṃ dūraṃ vīrabhujo nṛpaḥ // (39.2) Par.?

tato guṇavarādevyāḥ pūrvaṃ tasyā jagāma saḥ / (40.1) Par.?

sasnehaś ca sakopaś ca savimarśaś ca bhūpatiḥ // (40.2) Par.?

tatra sā khinnamanasaṃ taṃ dṛṣṭvāpṛcchadākulā / (41.1) Par.?

āryaputra kim adyaivam akasmād durmanāyase // (41.2) Par.?

tac chrutvā sa mahībhṛtām evaṃ kṛtakamabhyadhāt / (42.1) Par.?

adyāgatya mahājñānī devi māṃ ko 'py abhāṣata // (42.2) Par.?

rājan guṇavarā devī kālaṃ kaṃcana bhūgṛhe / (43.1) Par.?

sthāpanīyā tvayā bhāvyaṃ svayaṃ ca brahmacāriṇā // (43.2) Par.?

rājyabhraṃśo 'nyathā te syānmṛtyus tasyāś ca niścitam / (44.1) Par.?

ity uktvā sa gato jñānī viṣādo 'yaṃ tato mama // (44.2) Par.?

evaṃ tenodite rājñā rājñī guṇavarā tu sā / (45.1) Par.?

bhayānurāgavibhrāntā taṃ jagāda pativratā // (45.2) Par.?

tarhy āryaputra nādyaiva kiṃ māṃ kṣipasi bhūgṛhe / (46.1) Par.?

dhanyā hy asmi yadi prāṇair api syān me hitaṃ tava // (46.2) Par.?

mama vā mṛtyurastveva tava mā bhūd anirvṛtiḥ / (47.1) Par.?

ihāmutra ca nārīṇāṃ paramā hi gatiḥ patiḥ // (47.2) Par.?

iti tasyā vacaḥ śrutvā sāśruḥ so 'cintayatprabhuḥ / (48.1) Par.?

śaṅke na pāpam etasyāṃ na ca tasmin surakṣite // (48.2) Par.?

sa hy amlānamukhacchāyo nirāśaṅko mayekṣitaḥ / (49.1) Par.?

kaṣṭaṃ tathāpi jijñāse pravādasyāsya niścayam // (49.2) Par.?

ity ālocya sa tāṃ rājā rājñīmāha sma duḥkhitaḥ / (50.1) Par.?

tadihaiva varaṃ dehi bhūgṛhaṃ kriyatāmiti // (50.2) Par.?

tatheti ca tayā proktas tatraivāntaḥpure sugam / (51.1) Par.?

vidhāya bhūgṛhaṃ rājā devīṃ tāṃ nidadhe 'tha saḥ // (51.2) Par.?

putraṃ śṛṅgabhujaṃ tasyā viṣaṇṇaṃ pṛṣṭakāraṇam / (52.1) Par.?

āśvāsayat tad evoktvā rājñīṃ tāṃ sa yad uktavān // (52.2) Par.?

sāpi rājño hitamiti svargaṃ mene dharāgṛham / (53.1) Par.?

svasukhaṃ nāsti sādhvīnāṃ tāsāṃ bhartṛsukhaṃ sukham // (53.2) Par.?

evaṃ kṛte 'yaśolekhā tasya rājñyaparātha sā / (54.1) Par.?

nirvāsabhujanāmānaṃ svairaṃ svasutam abhyadhāt // (54.2) Par.?

rājñāsmadvidhurā tāvatkhāte guṇavarārpitā / (55.1) Par.?

etatputraś ca deśāc ced ito gacchetsukhaṃ bhavet // (55.2) Par.?

tat sa śṛṅgabhujo deśān nirvāsyetācirād yathā / (56.1) Par.?

tāṃ putra cintayer yuktiṃ tvam anyair bhrātṛbhiḥ saha // (56.2) Par.?

iti mātroditaḥ so 'nyān bhrātṝn uktvā samatsaraḥ / (57.1) Par.?

āste sma nirvāsabhujas tatropāyaṃ vicintayan // (57.2) Par.?

ekadā te mahāstrāṇi prayuñjānā nṛpātmajāḥ / (58.1) Par.?

prāsādāgre mahākāyaṃ sarve 'pi dadṛśurbakam // (58.2) Par.?

vikṛtaṃ pakṣiṇaṃ taṃ ca paśyatas tān savismayān / (59.1) Par.?

jñānī kṣapaṇakaḥ ko'pi pathā tenāgato 'bravīt // (59.2) Par.?

rājaputrā bako nāyaṃ rūpeṇānena rākṣasaḥ / (60.1) Par.?

bhramatyagniśikhākhyo 'yaṃ nagarāṇi vināśayan // (60.2) Par.?

tadvidhyatainaṃ kāṇḍena yāvadgacchatvito hataḥ / (61.1) Par.?

etatkṣapaṇakāc chrutvā navatis te navādhikāḥ // (61.2) Par.?

kāṇḍāni cikṣipur jyeṣṭhā naiko 'py āhatavān bakam / (62.1) Par.?

tato nagnakṣapaṇakaḥ punas tān abravīc ca saḥ // (62.2) Par.?

ayaṃ kanīyān yuṣmākaṃ bhrātā śṛṅgabhujo bakam / (63.1) Par.?

śaknoti hantumetaṃ tadgṛhṇātveṣa kṣamaṃ dhanuḥ // (63.2) Par.?

tac chrutvaiva smaran mātus tallabdhāvasaraṃ vacaḥ / (64.1) Par.?

sa nirvāsabhujo jālmastatkṣaṇaṃ samacintayat // (64.2) Par.?

so 'yaṃ śṛṅgabhujasyāsya syādupāyaḥ pravāsane / (65.1) Par.?

tad arpayāmas tātasya saṃbandhyasmai dhanuḥśaram // (65.2) Par.?

sauvarṇaṃ taccharaṃ hṛtvā viddho yāsyati cedbakaḥ / (66.1) Par.?

paścādeṣo 'pi gantāsya mārgastvasmāsu taṃ śaram // (66.2) Par.?

yadā ca lapsyate naitaṃ cinvanrakṣobakaṃ tadā / (67.1) Par.?

sthāsyatītastato bhrāmyannaiṣyatīha śaraṃ vinā // (67.2) Par.?

ity ālocya dadau tasmai pāpaḥ śṛṅgabhujāya saḥ / (68.1) Par.?

bakaghātāya saśaraṃ pitṛsaṃbandhi kārmukam // (68.2) Par.?

sa gṛhītvā tadākṛṣya tena svarṇaśareṇa tam / (69.1) Par.?

ratnapuṅkhena vivyādha bakaṃ śṛṅgabhujo balī // (69.2) Par.?

sa viddhamātras taṃ kāyalagnamādāya sāyakam / (70.1) Par.?

bakaḥ sravadasṛgdhāraḥ palāyyaiva tato yayau // (70.2) Par.?

tataḥ śṛṅgabhujaṃ vīraṃ sa nirvāsabhujaḥ śaṭhaḥ / (71.1) Par.?

tatsaṃjñāpreritāste ca bhrātaro 'nye tamabruvan // (71.2) Par.?

dehi hemamayaṃ taṃ nas tātasaṃbandhinaṃ śaram / (72.1) Par.?

anyathādya śarīrāṇi tyakṣyāmaḥ puratastava // (72.2) Par.?

tātas tena vinā hy asmān ito nirvāsayiṣyati / (73.1) Par.?

na ca kartuṃ grahītuṃ vā śakyaṃ tatpratirūpakam // (73.2) Par.?

tac chrutvaiva sa jihmāṃstānvīraḥ śṛṅgabhujo 'bravīt / (74.1) Par.?

dhīrā bhavata mā bhūd vo bhayaṃ kārpaṇyam ujjhata // (74.2) Par.?

āneṣyāmi śaraṃ gatvā hatvā taṃ rākṣasādhamam / (75.1) Par.?

ity uktvā saśaraṃ cāpaṃ nijaṃ śṛṅgabhujo 'grahīt // (75.2) Par.?

yayau ca tāṃ samuddiśya diśaṃ yāṃ sa bako gataḥ / (76.1) Par.?

patitāṃ tadasṛgdhārāṃ bhūmāvanusarañjavāt // (76.2) Par.?

hṛṣṭeṣu teṣu cānyeṣu mātṛpārśvaṃ gateṣv atha / (77.1) Par.?

gacchansa kramaśaḥ prāpa dūrāṃ śṛṅgabhujo 'ṭavīm // (77.2) Par.?

tasyāṃ dadarśa cinvāno vanasyāntarmahatpuram / (78.1) Par.?

bhogāyopanataṃ kāle phalaṃ puṇyataror iva // (78.2) Par.?

tatrodyānatarormūle sa viśrāntaḥ kṣaṇād iva / (79.1) Par.?

āścaryarūpām āyāntīm atra kanyāmavaikṣata // (79.2) Par.?

virahe jīvitaharāṃ saṃgame prāṇadāyinīm / (80.1) Par.?

vicitrāṃ nirmitāṃ dhātrā viṣāmṛtamayīm iva // (80.2) Par.?

śanairupagatāṃ tāṃ ca cakṣuṣā premavarṣiṇā / (81.1) Par.?

paśyantīṃ tadgatamanāḥ sa papraccha nṛpātmajaḥ // (81.2) Par.?

kiṃnāmadheyaṃ kasyedaṃ puraṃ hariṇalocane / (82.1) Par.?

tvaṃ ca kā kiṃ tavehāyamāgamaḥ kathyatām iti // (82.2) Par.?

tataḥ sācīkṛtamukhī nyastadṛṣṭir mahītale / (83.1) Par.?

sā taṃ jagāda sudatī madhurasnigdhayā girā // (83.2) Par.?

idaṃ dhūmapuraṃ nāma sarvasaṃpadgṛhaṃ puram / (84.1) Par.?

asminvasatyagniśikho nāma rākṣasapuṃgavaḥ // (84.2) Par.?

tasya rūpaśikhāṃ nāma sadṛśīṃ viddhi māṃ sutām / (85.1) Par.?

ihāgatām asāmānyatvadrūpāhṛtamānasām // (85.2) Par.?

tvaṃ brūhi me 'dhunā ko 'si kim ihābhyāgato 'si ca / (86.1) Par.?

evam ukte tayā tasyai sarvaṃ śṛṅgabhujo 'bravīt // (86.2) Par.?

yo 'sau yannāmadheyaś ca yasya putro mahīpateḥ / (87.1) Par.?

yayā śaranimittena tad dhūmapuram āgataḥ // (87.2) Par.?

tato viditavṛttāntā sā taṃ rūpaśikhābhyadhāt / (88.1) Par.?

na tvayā sudṛganyo 'sti trailokye 'pi dhanurdharaḥ // (88.2) Par.?

yena tāto 'py asau viddho bakarūpo maheṣunā / (89.1) Par.?

sa ca hemamayo bāṇaḥ svīkṛtaḥ krīḍayā mayā // (89.2) Par.?

tātastu nirvraṇaḥ sadyo mahādaṃṣṭreṇa mantriṇā / (90.1) Par.?

viśalyakaraṇīmukhyamahauṣadhividā kṛtaḥ // (90.2) Par.?

tadyāmi tātaṃ saṃbodhya nayāmyabhyantaraṃ drutam / (91.1) Par.?

tvāmāryaputra nyasto hi tvayyātmāyaṃ mayādhunā // (91.2) Par.?

ity uktvā tamavasthāpya tatra śṛṅgabhujaṃ kṣaṇam / (92.1) Par.?

yayau rūpaśikhā pārśvaṃ pituragniśikhasya sā // (92.2) Par.?

tāta śṛṅgabhujo nāma rājasūnurihāgataḥ / (93.1) Par.?

ko 'py ananyasamo rūpakulaśīlavayoguṇaiḥ // (93.2) Par.?

jāne ko 'py avatīrṇo 'tra devāṃśo na sa mānuṣaḥ / (94.1) Par.?

sa cedbhartā na me syāttattyajeyaṃ jīvitaṃ dhruvam // (94.2) Par.?

ity uktaḥ sa tayā tatra pitā tāṃ rākṣaso 'bravīt / (95.1) Par.?

mānuṣāḥ putri bhakṣyā nas tathāpi yadi te grahaḥ // (95.2) Par.?

tadastu rājaputraṃ tam ihaivānāyya darśaya / (96.1) Par.?

tac chrutvā sā yayau rūpaśikhā śṛṅgabhujāntikam // (96.2) Par.?

uktvā yathā kṛtaṃ tac ca taṃ nināyāntikaṃ pituḥ / (97.1) Par.?

so 'pi taṃ namram ādṛtya tatpitāgniśikho 'bravīt // (97.2) Par.?

dadāmi rājaputraitāṃ tubhyaṃ rūpaśikhāmaham / (98.1) Par.?

yadi madvacanaṃ kiṃcinnātikrāmasi jātucit // (98.2) Par.?

ity uktavantaṃ taṃ so 'pi prahvaḥ śṛṅgabhujo 'bravīt / (99.1) Par.?

bāḍham ullaṅghayiṣyāmi naivājñāvacanaṃ tava // (99.2) Par.?

iti śṛṅgabhujenoktastuṣṭaḥ so 'gniśikho 'bhyadhāt / (100.1) Par.?

uttiṣṭha tarhi snātvā tvamāgaccha snānaveśmanaḥ // (100.2) Par.?

tam evam uktvāvādīt tāṃ sutāṃ rūpaśikhāṃ ca saḥ / (101.1) Par.?

tvaṃ gaccha sarvā bhaginīrādāyāgaccha satvaram // (101.2) Par.?

evam agniśikhenoktau tena nirjagmatus tataḥ / (102.1) Par.?

tatheti tāvubhau śṛṅgabhujo rūpaśikhā ca sā // (102.2) Par.?

tatas taṃ sā sudhīḥ śṛṅgabhujaṃ rūpaśikhābhyadhāt / (103.1) Par.?

āryaputra kumārīṇāṃ svasṝṇāmasti me śatam // (103.2) Par.?

sarvā vayaṃ sadṛśyaś ca tulyābharaṇavāsasaḥ / (104.1) Par.?

sarvāsāṃ santi kaṇṭheṣu tulyā hāralatāś ca naḥ // (104.2) Par.?

tattāto melayitvāsmāṃs tvāṃ vimohayituṃ priya / (105.1) Par.?

āsāṃ madhyādabhīṣṭāṃ tvaṃ vṛṇīṣveti vadiṣyati // (105.2) Par.?

jānāmy etam ahaṃ tasya vyājābhiprāyam īdṛśam / (106.1) Par.?

sarvāḥ saṃghaṭayaty asmān kimartham ayam anyathā // (106.2) Par.?

tadā mūrdhni kariṣye ca kaṇṭhāddhāralatām aham / (107.1) Par.?

tadabhijñānalabdhāyāṃ vanamālāṃ mayi kṣipeḥ // (107.2) Par.?

bhautaprāyaś ca tāto 'yaṃ buddhirnāsya vivekinī / (108.1) Par.?

tathā mayyapi mārgo 'sya jātisiddhaḥ kva gacchati // (108.2) Par.?

tadeṣa vañcanārthaṃ te yadyatkiṃcidvadiṣyati / (109.1) Par.?

aṅgīkṛtya tvayā tattadvācyaṃ me vedmy ahaṃ param // (109.2) Par.?

ity uktvā bhaginīnāṃ sā pārśvaṃ rūpaśikhā yayau / (110.1) Par.?

tathety uktvā ca gatavānsnātuṃ śṛṅgabhujo 'pi saḥ // (110.2) Par.?

athāgāt svasṛbhiḥ sākaṃ pārśvaṃ rūpaśikhā pituḥ / (111.1) Par.?

so 'pi śṛṅgabhujaśceṭīsnapito 'trāyayau punaḥ // (111.2) Par.?

āsāṃ madhyānnijeṣṭāyāḥ prayacchaitāmiti bruvan / (112.1) Par.?

vanamālāṃ dadau śṛṅgabhujāyāgniśikho 'tha saḥ // (112.2) Par.?

so 'py ādāyaiva tāṃ rūpaśikhāyāḥ kṣiptavān gale / (113.1) Par.?

prāṅmūrdhanyastasaṃketahārayaṣṭer nṛpātmajaḥ // (113.2) Par.?

tataḥ so 'gniśikho rūpaśikhāṃ śṛṅgabhujānvitām / (114.1) Par.?

nijagāda vidhāsye vāṃ prātar udvāhamaṅgalam // (114.2) Par.?

ity uktvā tau ca tāścānyā visasarja sutā gṛham / (115.1) Par.?

kṣaṇāc ca taṃ śṛṅgabhujaṃ samāhūyaivam abravīt // (115.2) Par.?

gacchedaṃ dāntayugalaṃ samādāya purādbahiḥ / (116.1) Par.?

rāśisthaṃ bhuvi tatrādya tilakhārīśataṃ vapa // (116.2) Par.?

tac chrutvā sa tathety uktvā gatvā śṛṅgabhujo 'bravīt / (117.1) Par.?

vigno rūpaśikhāyās tat sāpy evaṃ nijagāda tam // (117.2) Par.?

āryaputra na kāryaste viṣādo 'tra manāgapi / (118.1) Par.?

gaccha tvaṃ sādhayāmyetadahaṃ kṣipraṃ svamāyayā // (118.2) Par.?

tac chrutvā tatra gatvā sa dṛṣṭvā rājasutastilān / (119.1) Par.?

rāśisthānvihvalo yāvad vaptuṃ prakramate kṛṣan // (119.2) Par.?

tāvad dadarśa bhūmiṃ tāṃ kṛṣṭām uptāṃś ca tāṃs tilān / (120.1) Par.?

priyāmāyābalāt sarvān krameṇaiva suvismitaḥ // (120.2) Par.?

gatvā cāgniśikhāyaitat kṛtaṃ kāryaṃ nyavedayat / (121.1) Par.?

tataḥ sa vañcako bhūyastam abhāṣata rākṣasaḥ // (121.2) Par.?

na mamoptaistilaiḥ kāryaṃ gaccha rāśīkuruṣva tān / (122.1) Par.?

tac chrutvopetya tadrūpaśikhāyai so 'bravītpunaḥ // (122.2) Par.?

sā taṃ visṛjya bhūmiṃ tāṃ sṛṣṭvāsaṃkhyāḥ pipīlikāḥ / (123.1) Par.?

tābhiḥ saṃghaṭayāmāsa tilāṃstānnijamāyayā // (123.2) Par.?

tad dṛṣṭvaiva punargatvā tasmai so 'gniśikhāya tān / (124.1) Par.?

nyavedayacchṛṅgabhujas tilān rāśīkṛtān api // (124.2) Par.?

tataḥ so 'gniśikho mūrkhaḥ śaṭho bhūyo 'py uvāca tam / (125.1) Par.?

ito dakṣiṇato gatvā yojanadvayamātrakam // (125.2) Par.?

asti devakulaṃ śūnyamaraṇye bhadra śāṃbhavam / (126.1) Par.?

tasmin dhūmaśikho nāma bhrātā vasati me priyaḥ // (126.2) Par.?

tatredānīṃ vrajaivaṃ ca veder devakulāgrataḥ / (127.1) Par.?

bho dhūmaśikha dūtas te sānugasya nimantraṇe // (127.2) Par.?

prahito 'gniśikhenāhaṃ śīghramāgamyatāṃ tvayā / (128.1) Par.?

bhāvī rūpaśikhāyā hi prātaḥ pariṇayotsavaḥ // (128.2) Par.?

etāvad uktvaivātra tvam ihāyāhyadya satvaram / (129.1) Par.?

prātaḥ pariṇayasvaitāṃ sutāṃ rūpaśikhāṃ mama // (129.2) Par.?

ity uktas tena pāpena tathety uktvā tathaiva ca / (130.1) Par.?

gatvā rūpaśikhāyāstatsarvaṃ śṛṅgabhujo 'bravīt // (130.2) Par.?

sā sādhvī mṛttikāṃ toyaṃ kaṇṭakānagnim eva ca / (131.1) Par.?

dattvā tasmai varāśvaṃ ca nijam evaṃ jagāda tam // (131.2) Par.?

etamāruhya turagaṃ natvā devakulaṃ ca tat / (132.1) Par.?

drutaṃ dhūmaśikhasyoktvā tat tātoktaṃ nimantraṇam // (132.2) Par.?

āgantavyaṃ tvayā śīghramaśvenānena dhāvatā / (133.1) Par.?

pṛṣṭhato vīkṣitavyaṃ ca muhur valitakaṃdharam // (133.2) Par.?

paścāttam āgataṃ dhūmaśikhaṃ drakṣyasi cet tataḥ / (134.1) Par.?

tanmārge mṛttikaiṣā te prakṣeptavyātmapṛṣṭhataḥ // (134.2) Par.?

tato 'pi paścād āgacchet sa te dhūmaśikho yadi / (135.1) Par.?

tathaiva pṛṣṭhatastyājyaṃ toyam evaṃ tvayāntarā // (135.2) Par.?

tad apy eṣyati cetkṣepyāstadvadete 'sya kaṇṭakāḥ / (136.1) Par.?

tathāpi cetso 'nupatettanmadhye 'gnimimaṃ kṣipeḥ // (136.2) Par.?

evaṃ kṛte hi nirdainyastvam ihaiṣyasi mā ca te / (137.1) Par.?

vikalpo bhūd vraja drakṣyasyadya vidyābalaṃ mama // (137.2) Par.?

ity uktaḥ sa tayā śṛṅgabhujo dhṛtamṛdādikaḥ / (138.1) Par.?

tatheti taddhayārūḍho 'raṇye devakulaṃ yayau // (138.2) Par.?

tatra vāmasthagaurīkaṃ dakṣiṇasthavināyakam / (139.1) Par.?

dṛṣṭvā natvā ca viśveśam uktvaivāgniśikhoditam // (139.2) Par.?

nimantraṇavacas tasya tūrṇaṃ dhūmaśikhasya tat / (140.1) Par.?

tataś cacāla caturaṃ pradhāvitaturaṃgamaḥ // (140.2) Par.?

kṣaṇāc ca pṛṣṭhato yāvadvīkṣate valitānanaḥ / (141.1) Par.?

tāvad dhūmaśikhaṃ paścādāgataṃ taṃ dadarśa saḥ // (141.2) Par.?

cikṣepa cāśu mārge 'sya mṛttikāṃ tāṃ svapṛṣṭhataḥ / (142.1) Par.?

kṣiptayātra tayā madhye sadyo 'bhūt parvato mahān // (142.2) Par.?

tamullaṅghya kathaṃcittam āgataṃ vīkṣya rākṣasam / (143.1) Par.?

tathaiva pṛṣṭhatastoyaṃ tatsa rājasuto 'kṣipat // (143.2) Par.?

tena tatrāntarā jajñe velladvīcir mahānadī / (144.1) Par.?

tām apy uttīrya katham apy āgate 'sminniśācare // (144.2) Par.?

śīghraṃ śṛṅgabhujaḥ paścātkaṇṭakāṃstānavākirat / (145.1) Par.?

tair udbabhūva gahanaṃ vanaṃ madhye sakaṇṭakam // (145.2) Par.?

tato 'pi nirgate tasmin rakṣasyagniṃ svapṛṣṭhataḥ / (146.1) Par.?

jahau tena sa jajvāla mārgaḥ satṛṇakānanaḥ // (146.2) Par.?

taṃ vīkṣya khāṇḍavam iva jvalitaṃ duratikramam / (147.1) Par.?

yayau dhūmaśikhaḥ khinno bhītaś ca sa yathāgatam // (147.2) Par.?

tadā rūpaśikhāmāyāmohitaḥ sa hi rākṣasaḥ / (148.1) Par.?

padbhyām āgād agāc caiva na sasmāra nabhogatim // (148.2) Par.?

atha praśaṃsann antas tat priyāmāyāvijṛmbhitam / (149.1) Par.?

gatabhīr āyayau dhūmapuraṃ śṛṅgabhujaḥ sa tat // (149.2) Par.?

tato rūpaśikhāyai taṃ samarpyāśvaṃ nivedya ca / (150.1) Par.?

yathā kṛtaṃ sa hṛṣṭāyai jagāmāgniśikhāntikam // (150.2) Par.?

nimantrito mayā gatvā bhrātā dhūmaśikhas tava / (151.1) Par.?

ity uktavantaṃ taṃ so 'tra saṃbhrānto 'gniśikho 'bravīt // (151.2) Par.?

yadi tatra gato 'bhūs tvam abhijñānaṃ tad ucyatām / (152.1) Par.?

iti tenoditaḥ śṛṅgabhujo jihmaṃ jagāda tam // (152.2) Par.?

śṛṇvidaṃ vacmyabhijñānaṃ tatra devakule vibhoḥ / (153.1) Par.?

vāme 'sti pārvatī pārśve dakṣiṇe ca vināyakaḥ // (153.2) Par.?

tac chrutvā vismitaḥ so 'gniśikhaḥ kṣaṇam acintayat / (154.1) Par.?

kathaṃ gato 'pi madbhrātrā śakito naiṣa khāditum // (154.2) Par.?

tajjāne mānuṣo nāyaṃ devo 'yaṃ ko'pi niścitam / (155.1) Par.?

anurūpas tad eṣo 'stu bhartāsyā duhiturmama // (155.2) Par.?

iti saṃcintya taṃ śṛṅgabhujaṃ rūpaśikhāntikam / (156.1) Par.?

kṛtārthaṃ vyasṛjatsvaṃ tu nāṅgabhedaṃ viveda saḥ // (156.2) Par.?

sa ca śṛṅgabhujas tatra gatvā pariṇayotsukaḥ / (157.1) Par.?

bhuktapītastayā sākaṃ kathaṃcidanayanniśām // (157.2) Par.?

prātaś cāgniśikhas tasmai tāṃ sa rūpaśikhāṃ dadau / (158.1) Par.?

ṛddhyā svasiddhyucitayā vidhivad vahnisākṣikam // (158.2) Par.?

kva rākṣasasutā kutra rājaputraḥ kva caitayoḥ / (159.1) Par.?

vivāho bata citraiva gatiḥ prāktanakarmaṇām // (159.2) Par.?

sa reje rājasūnustāṃ prāpya rakṣaḥsutāṃ priyām / (160.1) Par.?

peśalāṃ paṅkasambhūtāṃ rājahaṃso 'bjinīm iva // (160.2) Par.?

tasthau ca sa tayā tatra tad ekamanasā saha / (161.1) Par.?

bhuñjāno vividhān bhogān rakṣaḥsiddhyupakalpitān // (161.2) Par.?

gateṣv atha dineṣv atra tāṃ sa rūpaśikhāṃ rahaḥ / (162.1) Par.?

avādīdehi gacchāvo vardhamānapuraṃ priye // (162.2) Par.?

sā hi svā rājadhānī nas tasyāścaivaṃ pravāsanam / (163.1) Par.?

paraiḥ soḍhuṃ na śaknomi mānaprāṇā hi mādṛśāḥ // (163.2) Par.?

tanmuñca janmabhūmiṃ tvam atyājyām api matkṛte / (164.1) Par.?

āvedaya pitustaṃ ca haste hemaśaraṃ kuru // (164.2) Par.?

iti śṛṅgabhujenoktā sā taṃ rūpaśikhābravīt / (165.1) Par.?

yad ādiśasi tat kāryam āryaputra mayādhunā // (165.2) Par.?

kā janmabhūḥ kaḥ svajanaḥ sarvam etad bhavān mama / (166.1) Par.?

na pativyatirekeṇa sustrīṇāmaparā gatiḥ // (166.2) Par.?

tātasyāvedanīyaṃ tu naitatso 'smān hi na tyajet / (167.1) Par.?

tasmād aviditaṃ tasya gantavyaṃ krodhanasya naḥ // (167.2) Par.?

āgamiṣyati cetpaścādbuddhvā parijanāt tataḥ / (168.1) Par.?

mohayiṣyāmy abuddhiṃ taṃ bhautatulyaṃ svavidyayā // (168.2) Par.?

iti tasyā vacaḥ śrutvā prahṛṣṭaḥ so 'pare 'hani / (169.1) Par.?

dattarājyārdhayānargharatnapūrṇasamudgayā // (169.2) Par.?

tayaivānītataccārusuvarṇaśarayā saha / (170.1) Par.?

āruhya śaravegākhyaṃ tadīyaṃ turagottamam // (170.2) Par.?

vañcayitvā parijanaṃ svairodyānabhramacchalāt / (171.1) Par.?

tataḥ śṛṅgabhujaḥ prāyād vardhamānapuraṃ prati // (171.2) Par.?

gatayor dūram adhvānaṃ buddhvā so 'gniśikhastayoḥ / (172.1) Par.?

daṃpatyorāyayau paścānnabhasā rākṣasaḥ krudhā // (172.2) Par.?

tasyāgamanavegotthaṃ śabdaṃ śrutvā ca dūrataḥ / (173.1) Par.?

mārge rūpaśikhā sātha taṃ śṛṅgabhujam abravīt // (173.2) Par.?

āryaputrāgatastāto nivartayitumeṣa naḥ / (174.1) Par.?

tat tvam āsveha niḥśaṅkaḥ paśyainaṃ vañcaye katham // (174.2) Par.?

naiṣa drakṣyati sāśvaṃ tvāṃ vidyayācchāditaṃ mayā / (175.1) Par.?

ity uktvāśvāvatīrṇā sā puṃrūpaṃ māyayākarot // (175.2) Par.?

ihāyāti mahad rakṣas tat tvaṃ tūṣṇīṃ kṣaṇaṃ bhava / (176.1) Par.?

ity uktvā kāṣṭhikaṃ cātra dārvarthaṃ vanam āgatam // (176.2) Par.?

tatkuṭhāreṇa kāṣṭhāni pāṭayantī kilāsta sā / (177.1) Par.?

tadā rūpaśikhā śṛṅgabhuje paśyati sasmite // (177.2) Par.?

tāvatso 'gniśikhas tatra prāpyaitāṃ kāṣṭhikākṛtim / (178.1) Par.?

dṛṣṭvāvatīrya gaganānmūḍhaḥ papraccha rākṣasaḥ // (178.2) Par.?

kiṃ bho dṛṣṭau pathānena yāntau strīpuruṣāviti / (179.1) Par.?

tataḥ kathaṃcit khinneva puṃveṣā sā tam abravīt // (179.2) Par.?

na dṛṣṭau kaucidāvābhyāṃ svinnadṛgbhyāṃ pariśramāt / (180.1) Par.?

rakṣaḥpater mṛtasyādya dāhāyāgniśikhasya hi // (180.2) Par.?

āvāṃ kāṣṭhāni bhūyāṃsi pāṭayantāv iha sthitau / (181.1) Par.?

tac chrutvā rākṣasaḥ so 'tra mūḍhabuddhirvyacintayat // (181.2) Par.?

aho kathaṃ vipanno 'haṃ tatkiṃ me sutayā tayā / (182.1) Par.?

gacchāmi tāvat pṛcchāmi gṛhe parijanaṃ nijam // (182.2) Par.?

iti saṃcintya sa gṛhaṃ tūrṇam agniśikho yayau / (183.1) Par.?

bhartrā samaṃ hasantī sā prāgvat prāsthita tatsutā // (183.2) Par.?

kṣaṇāc ca punarapyāgāt sāntarhāsātparicchadāt / (184.1) Par.?

pṛṣṭājjīvantamātmānaṃ śrutvā hṛṣṭaḥ sa rākṣasaḥ // (184.2) Par.?

buddhvā ghoreṇa śabdena dūrāttaṃ punarāgatam / (185.1) Par.?

hayāvatīrṇā pracchādya māyayā pūrvavatpatim // (185.2) Par.?

mārgāgatasya kasyāpi lekhahārasya hastataḥ / (186.1) Par.?

lekhamādāya puṃrūpaṃ cakre rūpaśikhā punaḥ // (186.2) Par.?

tāvac ca pūrvavatprāptatadrūpāṃ tāṃ sa rākṣasaḥ / (187.1) Par.?

papraccha pathi sastrīkastvayā dṛṣṭaḥ pumāniti // (187.2) Par.?

tataḥ puruṣarūpā sā śvasantī nijagāda tam / (188.1) Par.?

na tvarāhṛtacittena tādṛk ko 'pīkṣito mayā // (188.2) Par.?

ahamagniśikhenādya raṇe śatruhatena hi / (189.1) Par.?

kiṃciccheṣāsunā rājyaṃ svamarpayitumicchatā // (189.2) Par.?

āhvānāya svanagare sthitenocchṛṅkhalasthiteḥ / (190.1) Par.?

bhrātur dhūmaśikhasyeha prahito lekhahārakaḥ // (190.2) Par.?

tac chrutvāgniśikhaḥ so 'tra kiṃ hato 'haṃ parairiti / (191.1) Par.?

saṃbhrāntaḥ prayayau bhūyaḥ svagṛhaṃ tadavekṣitum // (191.2) Par.?

ko hataḥ svastha eṣo 'ham ity abodhi tu naiva saḥ / (192.1) Par.?

ko 'py aho tāmasaś citro mūḍhasargaḥ prajāpateḥ // (192.2) Par.?

gṛhaṃ prāptaśca tadbuddhvāpyasatyaṃ lokahāsanam / (193.1) Par.?

punaḥ sa nāyayau mohaśrānto vismṛtya tāṃ sutām // (193.2) Par.?

sāpi saṃmohya pitaraṃ prāgvad rūpaśikhā patim / (194.1) Par.?

tam abhyagāt patihitād anyat sādhvyo na jānate // (194.2) Par.?

tatas tayā samaṃ śṛṅgabhujaḥ patnyā sa satvaram / (195.1) Par.?

āścaryaturagārūḍho vardhamānapuraṃ yayau // (195.2) Par.?

tatra buddhvā tamāyāntaṃ yuktaṃ śṛṅgabhujaṃ tayā / (196.1) Par.?

pitā vīrabhujas tasya hṛṣṭo 'gre niryayau nṛpaḥ // (196.2) Par.?

sa dṛṣṭvā śobhitaṃ vadhvā taṃ śaurim iva bhāmayā / (197.1) Par.?

prāptāṃ tadā navāṃ mene narendro rājyasaṃpadam // (197.2) Par.?

aśvāvatīrṇamenaṃ ca pādalagnaṃ savallabham / (198.1) Par.?

utthāpyāliṅgya tanayaṃ harṣabāṣpāmbu bibhratā // (198.2) Par.?

cakṣuṣeva kṛtodāranirvicchamanamaṅgalaḥ / (199.1) Par.?

prāveśayad rājadhānīṃ sa tato vihitotsavaḥ // (199.2) Par.?

kva gato 'bhūstvamityatra tena pṛṣṭaḥ suto 'tha saḥ / (200.1) Par.?

nijamāmūlataḥ śṛṅgabhujo vṛttāntam abravīt // (200.2) Par.?

āhūya tatsamakṣaṃ ca bhrātṛbhyastatsamarpayat / (201.1) Par.?

sa nirvāsabhujādibhyastebhyo hemamayaṃ śaram // (201.2) Par.?

tatsa buddhvā ca pṛṣṭvā ca teṣu vīrabhujo nṛpaḥ / (202.1) Par.?

vyarajyadanyeṣu suteṣvekaṃ mene ca taṃ sutam // (202.2) Par.?

tataḥ sa rājā matimān samyag evam acintayat / (203.1) Par.?

jāne yathaiṣa vidveṣād abhūd ebhiḥ pravāsitaḥ // (203.2) Par.?

pāpairniraparādho 'pi śatrubhirbhrātṛnāmabhiḥ / (204.1) Par.?

tathaiva nūnameteṣāṃ jananībhirmama priyā // (204.2) Par.?

mātāsya sā guṇavarā nirdoṣā dūṣitā mṛṣā / (205.1) Par.?

tatkiṃ cireṇa paśyāmi yāvad adyaiva niścayam // (205.2) Par.?

ity ālocya yathāvat tad dinaṃ nītvābhyagānniśi / (206.1) Par.?

jijñāsurayaśolekhāṃ rājñīṃ tāṃ sa nṛpo 'parām // (206.2) Par.?

tadabhyāgamahṛṣṭā sā madyaṃ tenātipāyitā / (207.1) Par.?

ratāntasuptā vyalapadrājñi tasmin sajāgare // (207.2) Par.?

mithyā guṇavarāyāś cen nāvadiṣyāma dūṣaṇam / (208.1) Par.?

tatkim evam upāyāsyad ayaṃ rājādya mām iha // (208.2) Par.?

iti tasyā vacaḥ śrutvā suptāyā duṣṭacetasaḥ / (209.1) Par.?

utpannaniścayo rājā krodhādutthāya niryayau // (209.2) Par.?

gatvā svāvāsamānāyya sa jagāda mahattarān / (210.1) Par.?

uddhṛtya tāṃ guṇavarāṃ snātāmānayata drutam // (210.2) Par.?

ayaṃ kṣaṇo hy adyatano jñānināniṣṭaśāntaye / (211.1) Par.?

tasyā bhūgṛhavāsasya kathito 'bhūtkilāvadhiḥ // (211.2) Par.?

tac chrutvā taistathety uktvā gatvā snātā vibhūṣitā / (212.1) Par.?

rājñī guṇavarā kṣipramāninye sā tadantikam // (212.2) Par.?

tatas tau daṃpatī tīrṇavirahārṇavanirvṛtau / (213.1) Par.?

anyonyāliṅganātṛptau ninyatustāṃ vibhāvarīm // (213.2) Par.?

avarṇayatsa rājātra devyai tasyai mudā tadā / (214.1) Par.?

taṃ śṛṅgabhujavṛttāntaṃ tadeva nijasūnave // (214.2) Par.?

sātha prabuddhā rājānaṃ gataṃ buddhvā savākchalam / (215.1) Par.?

saṃbhāvyaivāyaśolekhā viṣādam agamat param // (215.2) Par.?

prātaś ca sa nṛpo vīrabhujo guṇavarāntikam / (216.1) Par.?

ānāyayacchṛṅgabhujaṃ sutaṃ rūpaśikhāyutam // (216.2) Par.?

so 'bhyetya mātaraṃ dṛṣṭvā hṛṣṭo bhūgṛhanirgatām / (217.1) Par.?

tayorvavande caraṇau pitrornavavadhūyutaḥ // (217.2) Par.?

adhvottīrṇaṃ tamāśliṣya putraṃ guṇavarāpi sā / (218.1) Par.?

tāṃ ca snuṣāṃ tathā prāptām utsavād utsavaṃ yayau // (218.2) Par.?

tataḥ pitur nideśāt sa tasyai śṛṅgabhujo 'bravīt / (219.1) Par.?

vistareṇa svavṛttāntaṃ yac ca rūpaśikhākṛtam // (219.2) Par.?

tato guṇavarā rājñī sā prahṛṣṭā jagāda tam / (220.1) Par.?

kiṃ kiṃ na rūpaśikhayā kṛtaṃ putra tavānayā // (220.2) Par.?

hitvā svajīvitaṃ bandhūn deśaṃ ceha yadetayā / (221.1) Par.?

trīṇyetāni pradattāni tubhyaṃ citracaritrayā // (221.2) Par.?

tvadarthamavatīrṇaiṣā kāpi devī vidhervaśāt / (222.1) Par.?

pativratānāṃ sarvāsāṃ yayā mūrdhni padaṃ kṛtam // (222.2) Par.?

evam ukte tayā rājñā tadvākyamabhinandati / (223.1) Par.?

rājñi rūpaśikhāyāṃ ca vinayānatamūrdhani // (223.2) Par.?

āyayau sa tayaiva prāg ayaśolekhayā mṛṣā / (224.1) Par.?

dūṣito 'ntaḥpurādhyakṣo bhrāntatīrthaḥ surakṣitaḥ // (224.2) Par.?

kṣatrā niveditaṃ taṃ ca prahṛṣṭaṃ caraṇānatam / (225.1) Par.?

jñātārtho 'pūjayad rājā bhṛśaṃ vīrabhujo 'tha saḥ // (225.2) Par.?

tenaivānāyya cānyāstā rājñīratraiva durjanīḥ / (226.1) Par.?

tamevovāca gacchaitā bhūgṛhe nikhilāḥ kṣipa // (226.2) Par.?

tac chrutvā tāsu bhītāsu kṣiptāsu kṛpayā nṛpam / (227.1) Par.?

taṃ sā guṇavarā devī pādalagnā vyajijñapat // (227.2) Par.?

deva mām eva bhūyo 'pi ciraṃ sthāpaya bhūgṛhe / (228.1) Par.?

prasīda naivametā hi bhītāḥ śaknomi vīkṣitum // (228.2) Par.?

iti prārthya nṛpaṃ tāsāṃ bandhanaṃ sā nyavārayat / (229.1) Par.?

mahatāmanukampā hi viruddheṣu pratikriyā // (229.2) Par.?

tatas tāḥ preṣitā rājñā lajjitāḥ svagṛhān yayuḥ / (230.1) Par.?

aniṣṭam api vāñchantyo dīyamānaṃ bhujāntaram // (230.2) Par.?

tāṃ ca rājā guṇavarāṃ bahu mene mahāśayām / (231.1) Par.?

ātmānaṃ ca tayā patnyā kṛtapuṇyamamanyata // (231.2) Par.?

athānāyya sutānanyānsa nirvāsabhujādikān / (232.1) Par.?

nirvāsayiṣyan yuktyā tān rājā kṛtakamabhyadhāt // (232.2) Par.?

śrutaṃ mayā vaṇikpāpairbhavadbhiḥ pathiko hataḥ / (233.1) Par.?

tadbhrāntuṃ sarvatīrthāni yāta mā smeha tiṣṭhata // (233.2) Par.?

tac chrutvā taṃ na śekuste nṛpaṃ bodhayituṃ nṛpāḥ / (234.1) Par.?

prabhau haṭhapravṛtte hi kasya pratyāyanā bhavet // (234.2) Par.?

tatas tān gacchato dṛṣṭvā bhrātṝñ śṛṅgabhujo 'tha saḥ / (235.1) Par.?

kṛpodbhūtāśrupūrṇākṣaḥ pitaraṃ taṃ vyajijñapat // (235.2) Par.?

tātāparādham ekaṃ tvaṃ kṣamasvaiṣāṃ kṛpāṃ kuru / (236.1) Par.?

ity uktvā pādayos tasya nipapāta sa bhūpateḥ // (236.2) Par.?

so 'pi matvā narendras taṃ bhūbhṛtbhārasahaṃ sutam / (237.1) Par.?

yaśodayāśritaṃ bālye 'py avatāraṃ harer iva // (237.2) Par.?

gūḍhāśayo vairarakṣī vacas tasya tathākarot / (238.1) Par.?

te 'pi taṃ bhrātaraṃ sarve prāṇadaṃ menire nijam // (238.2) Par.?

sarvāḥ prakṛtayo 'py atra tasya śṛṅgabhujasya tam / (239.1) Par.?

guṇātiśayamālokya dadhustadanurāgitām // (239.2) Par.?

tato 'nyedyurguṇajyeṣṭhaṃ tajjyeṣṭheṣv api satsu saḥ / (240.1) Par.?

pitā vīrabhujo rājā yauvarājye 'bhiṣiktavān // (240.2) Par.?

sa ca prāptābhiṣekaḥ san digjayāya yayau tataḥ / (241.1) Par.?

vijñapya pitaraṃ sarvair balaiḥ śṛṅgabhujaḥ saha // (241.2) Par.?

bāhuvīryajitāśeṣavasudhādhipamaṇḍalam / (242.1) Par.?

ādāya cāyayau dikṣu pravikīrya yaśaḥśriyam // (242.2) Par.?

tato vahan rājyabhāraṃ praṇatair bhrātṛbhiḥ saha / (243.1) Par.?

niścintabhogasukhitau rañjayan pitarau kṛtī // (243.2) Par.?

dānaṃ dadad brāhmaṇebhyas tasthau śṛṅgabhujaḥ sukhī / (244.1) Par.?

rūpavatyārthasiddhyeva sa rūpaśikhayā saha // (244.2) Par.?

ity ananyāḥ patiṃ sādhvyaḥ sarvākāram upāsate / (245.1) Par.?

ete guṇavarārūpaśikhe śvaśrūsnuṣe yathā // (245.2) Par.?

iti naravāhanadatto hariśikhamukhataḥ kathāmimāṃ śrutvā / (246.1) Par.?

ratnaprabhāsametaḥ sādhviti jalpaṃstutoṣa param // (246.2) Par.?

utthāya cāhnikamathāśu vidhāya gatvā vatseśvarasya nikaṭaṃ sa pituḥ sabhāryaḥ / (247.1) Par.?

bhuktvāparāhṇamativāhya ca gītavādyaiḥ svāntaḥpure sadayito rajanīṃ nināya // (247.2) Par.?

Duration=1.117858171463 secs.