Texts

Help

Select a text:
Bibliography
Select a chapter:
 (no revisions)
Associated topic(s): avatāras

Show parallels  Show headlines
Use dependency labeler
Chapter id: 16870
  • Click on a sentence to show its analysis
  • Keep the mouse pointer over a lemma to show its meanings.
praśnabhāro mahāṃs tāta tvayoktaḥ śārṅgadhanvani / (1.1) Par.?
yathāśakti tu vakṣyāmi śrūyatāṃ vaiṣṇavaṃ yaśaḥ // (1.2) Par.?
viṣṇoḥ prabhāvaśravaṇe diṣṭyā te matir utthitā / (2.1) Par.?
hanta viṣṇoḥ samastās tvaṃ śṛṇu divyāḥ pravṛttayaḥ // (2.2) Par.?
sahasrāsyaṃ sahasrākṣaṃ sahasracaraṇaṃ ca yam / (3.1) Par.?
sahasraśirasaṃ devaṃ sahasrakaram avyayam // (3.2) Par.?
sahasrajihvaṃ bhāsvantaṃ sahasramukuṭaṃ prabhum / (4.1) Par.?
sahasradaṃ sahasrādiṃ sahasrabhujam avyayam // (4.2) Par.?
savanaṃ havanaṃ caiva havyaṃ hotāram eva ca / (5.1) Par.?
pātrāṇi ca pavitrāṇi vediṃ dīkṣāṃ caruṃ sruvam // (5.2) Par.?
sruksomaśūrpam upabhṛtprokṣaṇīṃ dakṣiṇāyanam / (6.1) Par.?
adhvaryuṃ sāmagaṃ vipraṃ sadasyaṃ sadanaṃ savam // (6.2) Par.?
yūpaṃ samitsruvaṃ darvīṃ camasolūkhalāni ca / (7.1) Par.?
prāgvaṃśaṃ yajñabhūmiṃ ca hotāraṃ cayanaṃ ca yat // (7.2) Par.?
hrasvāny atipramāṇāni sthāvarāṇi carāṇi ca / (8.1) Par.?
prāyaścittāni cārghyaṃ ca sthaṇḍilāni kuśāṃs tathā // (8.2) Par.?
mantraṃ yajñavahaṃ vahniṃ bhāgaṃ bhāgavahaṃ ca yat / (9.1) Par.?
agrebhujaṃ somabhujaṃ hutārciṣam udāyudham / (9.2) Par.?
āhur vedavido viprā yaṃ yajñaṃ śāśvataṃ vibhum // (9.3) Par.?
tasya viṣṇoḥ sureśasya śrīvatsāṅkasya dhīmataḥ / (10.1) Par.?
prādurbhāvasahasrāṇi samatītāny anekaśaḥ / (10.2) Par.?
bhūyaś caiva bhaviṣyantīty evam āha pitāmahaḥ // (10.3) Par.?
yat pṛcchasi mahārāja divyāṃ puṇyāṃ kathāṃ śubhām / (11.1) Par.?
kimarthaṃ bhagavān viṣṇur vasudevakule 'bhavat // (11.2) Par.?
tat te 'haṃ sampravakṣyāmi śṛṇu sarvam aśeṣataḥ / (12.1) Par.?
vāsudevasya māhātmyaṃ caritaṃ ca mahādyuteḥ // (12.2) Par.?
hitārthaṃ suramartyānāṃ lokānāṃ prabhavāya ca / (13.1) Par.?
bahuśaḥ sarvabhūtātmā prādurbhavati kāryataḥ / (13.2) Par.?
prādurbhāvāṃś ca vakṣyāmi puṇyān devaguṇair yutān // (13.3) Par.?
suptvā yugasahasraṃ sa prādurbhavati kāryavān / (14.1) Par.?
pūrṇe yugasahasre tu devadevo jagatpatiḥ // (14.2) Par.?
brahmā ca kapilaś caiva parameṣṭhī tathaiva ca / (15.1) Par.?
devāḥ saptarṣayaś caiva tryambakaś ca mahāyaśāḥ // (15.2) Par.?
sanatkumāraś ca mahānubhāvo manur mahātmā bhagavān prajākaraḥ / (16.1) Par.?
purāṇadevo 'tha purāṇi cakre pradīptavaiśvānaratulyatejāḥ // (16.2) Par.?
yena cārṇavamadhyasthau naṣṭe sthāvarajaṃgame / (17.1) Par.?
naṣṭe devāsuranare pranaṣṭoragarākṣase // (17.2) Par.?
yoddhukāmau sudurdharṣau dānavau madhukaiṭabhau / (18.1) Par.?
hatau prabhavatā tena tayor dattvāmitaṃ varam // (18.2) Par.?
purā kamalanābhasya svapataḥ sāgarāmbhasi / (19.1) Par.?
puṣkare yatra sambhūtā devāḥ sarṣigaṇāḥ purā // (19.2) Par.?
eṣa pauṣkarako nāma prādurbhāvaḥ prakīrtitaḥ / (20.1) Par.?
purāṇaṃ kathyate yatra vedaśrutisamāhitam // (20.2) Par.?
vārāhas tu śrutisukhaḥ prādurbhāvo mahātmanaḥ / (21.1) Par.?
yatra viṣṇuḥ suraśreṣṭho vārāhaṃ rūpam āsthitaḥ // (21.2) Par.?
vedapādo yūpadaṃṣṭraḥ kratudantaś citīmukhaḥ / (22.1) Par.?
agnijihvo darbhalomā brahmaśīrṣo mahātapāḥ // (22.2) Par.?
ahorātrekṣaṇo divyo vedāṅgaśrutibhūṣaṇaḥ / (23.1) Par.?
ājyanāsaḥ sruvas tuṇḍaḥ sāmaghoṣasvano mahān // (23.2) Par.?
dharmasatyamayaḥ śrīmān kramavikramasatkṛtaḥ / (24.1) Par.?
prāyaścittanakho dhīraḥ paśujānur mahāvṛṣaḥ // (24.2) Par.?
udgātrāntro homaliṅgaḥ phalabījamahauṣadhiḥ / (25.1) Par.?
vāyvantarātmā mantrasphig vikṛtaḥ somaśoṇitaḥ // (25.2) Par.?
vediskandho havirgandho havyakavyātivegavān / (26.1) Par.?
prāgvaṃśakāyo dyutimān nānādīkṣābhir ācitaḥ // (26.2) Par.?
dakṣiṇāhṛdayo yogī mahāsatramayo mahān / (27.1) Par.?
upākarmoṣṭharucakaḥ pravargyāvartabhūṣaṇaḥ / (27.2) Par.?
chāyāpatnīsahāyo vai maṇiśṛṅga ivocchritaḥ // (27.3) Par.?
mahīṃ sāgaraparyantāṃ saśailavanakānanām / (28.1) Par.?
ekārṇavajale bhraṣṭām ekārṇavagatiḥ prabhuḥ // (28.2) Par.?
daṃṣṭrayā yaḥ samuddhṛtya lokānāṃ hitakāmyayā / (29.1) Par.?
sahasraśīrṣo devādiś cakāra jagatīṃ punaḥ // (29.2) Par.?
evaṃ yajñavarāheṇa bhūtvā bhūtahitārthinā / (30.1) Par.?
uddhṛtā pṛthivī devī sāgarāmbudharā purā // (30.2) Par.?
vārāha eṣa kathito nārasiṃham ataḥ śṛṇu / (31.1) Par.?
yatra bhūtvā mṛgendreṇa hiraṇyakaśipur hataḥ // (31.2) Par.?
purā kṛtayuge rājan surārir baladarpitaḥ / (32.1) Par.?
daityānām ādipuruṣaś cakāra tapa uttamam // (32.2) Par.?
daśa varṣasahasrāṇi śatāni daśa pañca ca / (33.1) Par.?
jalopavāsas tasyāsīt sthānamaunadṛḍhavrataḥ // (33.2) Par.?
tataḥ śamadamābhyāṃ ca brahmacaryeṇa cānagha / (34.1) Par.?
brahmā prītamanās tasya tapasā niyamena ca // (34.2) Par.?
taṃ vai svayaṃbhūr bhagavān svayam āgamya bhūpate / (35.1) Par.?
vimānenārkavarṇena haṃsayuktena bhāsvatā // (35.2) Par.?
ādityair vasubhiḥ sādhyair marudbhir daivataiḥ saha / (36.1) Par.?
rudrair viśvasahāyaiś ca yakṣarākṣasakiṃnaraiḥ // (36.2) Par.?
diśābhir vidiśābhiś ca nadībhiḥ sāgarais tathā / (37.1) Par.?
nakṣatraiś ca muhūrtaiś ca khecaraiś ca mahāgrahaiḥ // (37.2) Par.?
devarṣibhis tapovṛddhaiḥ siddhaiḥ saptarṣibhis tathā / (38.1) Par.?
rājarṣibhiḥ puṇyatamair gandharvair apsarogaṇaiḥ // (38.2) Par.?
carācaraguruḥ śrīmān vṛtaḥ sarvaiḥ surais tathā / (39.1) Par.?
brahmā brahmavidāṃ śreṣṭho daityaṃ vacanam abravīt // (39.2) Par.?
prīto 'smi tava bhaktasya tapasānena suvrata / (40.1) Par.?
varaṃ varaya bhadraṃ te yatheṣṭaṃ kāmam āpnuhi // (40.2) Par.?
na devāsuragandharvā na yakṣoragarākṣasāḥ / (41.1) Par.?
na mānuṣāḥ piśācā vā hanyur māṃ devasattama // (41.2) Par.?
ṛṣayo vā na māṃ śāpaiḥ kruddhā lokapitāmaha / (42.1) Par.?
śapeyus tapasā yuktā varam etaṃ vṛṇomy aham // (42.2) Par.?
na śastreṇa na cāstreṇa giriṇā pādapena vā / (43.1) Par.?
na śuṣkeṇa na cārdreṇa syān na cānyena me vadhaḥ // (43.2) Par.?
bhaveyam aham evārkaḥ somo vāyur hutāśanaḥ / (44.1) Par.?
salilaṃ cāntarikṣaṃ ca nakṣatrāṇi diśo daśa // (44.2) Par.?
ahaṃ krodhaś ca kāmaś ca varuṇo vāsavo yamaḥ / (45.1) Par.?
dhanadaś ca dhanādhyakṣo yakṣaḥ kiṃpuruṣādhipaḥ // (45.2) Par.?
ete divyā varās tāta mayā dattās tavādbhutāḥ / (46.1) Par.?
sarvān kāmān imāṃs tāta prāpsyasi tvaṃ na saṃśayaḥ // (46.2) Par.?
evam uktvā tu bhagavāñ jagāmākāśam eva ha / (47.1) Par.?
vairājaṃ brahmasadanaṃ brahmarṣigaṇasevitam // (47.2) Par.?
tato devāś ca nāgāś ca gandharvā munayas tathā / (48.1) Par.?
varapradānaṃ śrutvaiva pitāmaham upasthitāḥ // (48.2) Par.?
varadānena bhagavan vadhiṣyati sa no 'suraḥ / (49.1) Par.?
tat prasīdasva bhagavan vadho 'sya pravicintyatām // (49.2) Par.?
bhagavān sarvabhūtānāṃ svayaṃbhūr ādikṛd vibhuḥ / (50.1) Par.?
sraṣṭā ca havyakavyānām avyaktaḥ prakṛtir dhruvaḥ // (50.2) Par.?
tato lokahitaṃ vākyaṃ śrutvā devaḥ prajāpatiḥ / (51.1) Par.?
provāca bhagavān vākyaṃ sarvān devagaṇāṃs tadā // (51.2) Par.?
avaśyaṃ tridaśās tena prāptavyaṃ tapasaḥ phalam / (52.1) Par.?
tapaso 'nte 'sya bhagavān vadhaṃ viṣṇuḥ kariṣyati // (52.2) Par.?
etac chrutvā surāḥ sarve vākyaṃ paṅkajajanmanaḥ / (53.1) Par.?
svāni sthānāni divyāni jagmus te vai mudā yutāḥ // (53.2) Par.?
labdhamātre vare cāpi sarvāḥ so 'bādhata prajāḥ / (54.1) Par.?
hiraṇyakaśipur daityo varadānena darpitaḥ // (54.2) Par.?
āśrameṣu mahābhāgān munīn vai saṃśitavratān / (55.1) Par.?
satyadharmaratān dāntān purā dharṣitavāṃs tu saḥ // (55.2) Par.?
devāṃs tribhuvanasthāṃś ca parājitya mahāsuraḥ / (56.1) Par.?
trailokyaṃ vaśam ānīya svarge vasati dānavaḥ // (56.2) Par.?
yadā varamadonmatto nyavasad dānavo bhuvi / (57.1) Par.?
yajñiyān akarod daityān ayajñīyāś ca devatāḥ // (57.2) Par.?
ādityāś ca tataḥ sādhyā viśve 'tha vasavas tathā / (58.1) Par.?
śaraṇyaṃ śaraṇaṃ viṣṇum upatasthur mahābalam // (58.2) Par.?
devaṃ brahmamayaṃ yajñaṃ brahmadevaṃ sanātanam / (59.1) Par.?
bhūtabhavyabhaviṣyasya prabhuṃ lokanamaskṛtam / (59.2) Par.?
nārāyaṇaṃ vibhuṃ devāḥ śaraṇyaṃ śaraṇaṃ gatāḥ // (59.3) Par.?
trāyasva no 'dya deveśa hiraṇyakaśipor vadhāt / (60.1) Par.?
tvaṃ hi na paramo devas tvaṃ hi na paramo guruḥ / (60.2) Par.?
tvaṃ hi naḥ paramo dhātā brahmādīnāṃ surottama // (60.3) Par.?
utphullāmbujapatrākṣa śatrupakṣabhayāvaha / (61.1) Par.?
kṣayāya ditivaṃśasya śaraṇaṃ tvaṃ bhavasva naḥ // (61.2) Par.?
bhayaṃ tyajadhvam amarā abhayaṃ vo dadāmy aham / (62.1) Par.?
tathaiva tridivaṃ devāḥ pratipadyata māciram // (62.2) Par.?
eṣo 'haṃ sagaṇaṃ daityaṃ varadānena darpitam / (63.1) Par.?
avadhyam amarendrāṇāṃ dānavendraṃ nihanmi tam // (63.2) Par.?
evam uktvā sa bhagavān visṛjya tridaśeśvarān / (64.1) Par.?
hiraṇyakaśipo rājann ājagāma hariḥ sabhām // (64.2) Par.?
narasya kṛtvārdhatanuṃ siṃhasyārdhatanuṃ tathā / (65.1) Par.?
nārasiṃhena vapuṣā pāṇiṃ saṃspṛśya pāṇinā // (65.2) Par.?
jīmūtaghanasaṃkāśo jīmūtaghananisvanaḥ / (66.1) Par.?
jīmūtaghanadīptaujā jīmūta iva vegavān // (66.2) Par.?
daityaṃ so 'tibalaṃ dṛptaṃ dṛptaśārdūlavikramam / (67.1) Par.?
dṛptair daityagaṇair guptaṃ hatavān ekapāṇinā // (67.2) Par.?
nṛsiṃha eṣa kathito bhūyo 'yaṃ vāmano 'paraḥ / (68.1) Par.?
yatra vāmanam āśritya rūpaṃ daityavināśanam // (68.2) Par.?
baler balavato yajñe balinā viṣṇunā purā / (69.1) Par.?
vikramais tribhir akṣobhyāḥ kṣobhitās te mahāsurāḥ // (69.2) Par.?
vipracittiḥ śibiḥ śaṅkur ayaḥśaṅkus tathaiva ca / (70.1) Par.?
ayaḥśirā aśvaśirā hayagrīvaś ca vīryavān / (70.2) Par.?
vegavān ketumān ugraḥ sogravyagro mahāsuraḥ // (70.3) Par.?
puṣkaraḥ puṣkalaś caiva sāśvo 'śvapatir eva ca / (71.1) Par.?
prahrādo 'śvaśirāḥ kumbhaḥ saṃhrādo gaganapriyaḥ // (71.2) Par.?
anuhrādo hariharau varāhaḥ saṃharo rujaḥ / (72.1) Par.?
śarabhaḥ śalabhaś caiva kupanaḥ kopanaḥ krathaḥ // (72.2) Par.?
bṛhatkīrtir mahājihvaḥ śaṅkukarṇo mahāsvanaḥ / (73.1) Par.?
dīrghajihvo 'rkanayano mṛdupādo mṛdupriyaḥ // (73.2) Par.?
vāyur gaviṣṭho namuciḥ śambaro vikṣaro mahān / (74.1) Par.?
candrahantā krodhahantā krodhavardhana eva ca // (74.2) Par.?
kālakaḥ kālakeyaś ca vṛtraḥ krodho virocanaḥ / (75.1) Par.?
gariṣṭhaś ca variṣṭhaś ca pralambanarakāv ubhau // (75.2) Par.?
indratāpanavātāpī ketumān baladarpitaḥ / (76.1) Par.?
asilomā pulomā ca bāṣkalaḥ pramado madaḥ // (76.2) Par.?
khasṛmaḥ kālavadanaḥ karālaḥ keśir eva ca / (77.1) Par.?
ekākṣaś candrahā rāhuḥ saṃhrādaḥ sṛmaraḥ svanaḥ // (77.2) Par.?
śataghnīcakrahastāś ca tathā parighapāṇayaḥ / (78.1) Par.?
aśmayantrāyudhopetā bhiṇḍipālāyudhās tathā // (78.2) Par.?
śūlolūkhalahastāś ca paraśvadhadharās tathā / (79.1) Par.?
pāśamudgarahastā vai tathā laguḍapāṇayaḥ // (79.2) Par.?
mahāśilāpraharaṇāḥ śūlahastāś ca dānavāḥ / (80.1) Par.?
nānāpraharaṇā ghorā nānāveṣā mahājavāḥ // (80.2) Par.?
kūrmakukkuṭavaktrāś ca śaśolūkamukhās tathā / (81.1) Par.?
kharoṣṭravadanāś caiva varāhavadanās tathā // (81.2) Par.?
bhīmā makaravaktrāś ca kroṣṭuvaktrāś ca dānavāḥ / (82.1) Par.?
ākhudarduravaktrāś ca ghorā vṛkamukhās tathā // (82.2) Par.?
mārjāraśaśavaktrāś ca mahāvaktrās tathāpare / (83.1) Par.?
nakrameṣānanāḥ śūrā go'jāvimahiṣānanāḥ // (83.2) Par.?
godhāśalyakavaktrāś ca krauñcavaktrās tathāpare / (84.1) Par.?
garuḍānanāḥ khaḍgamukhā mayūravadanās tathā // (84.2) Par.?
gajendracarmavasanās tathā kṛṣṇājināmbarāḥ / (85.1) Par.?
cīrasaṃvṛtagātrāś ca tathā valkalavāsasaḥ // (85.2) Par.?
uṣṇīṣiṇo mukuṭinas tathā kuṇḍalino 'surāḥ / (86.1) Par.?
kirīṭino lambaśikhāḥ kambugrīvāḥ suvarcasaḥ / (86.2) Par.?
nānāveṣadharā daityā nānāmālyānulepanāḥ // (86.3) Par.?
svāny āyudhāni saṃgṛhya pradīptānīva tejasā / (87.1) Par.?
kramamāṇaṃ hṛṣīkeśam upāvartanta sarvaśaḥ // (87.2) Par.?
pramathya sarvāndaiteyān pādahastatalais tataḥ / (88.1) Par.?
rūpaṃ kṛtvā mahābhīmaṃ jahārāśu sa medinīm // (88.2) Par.?
tasya vikramato bhūmiṃ candrādityau stanāntare / (89.1) Par.?
nabhaḥ prakramamāṇasya nābhyāṃ kila samāsthitau // (89.2) Par.?
paramākramamāṇasya jānubhyāṃ tau vyavasthitau / (90.1) Par.?
viṣṇor amitavīryasya vadanty evaṃ dvijātayaḥ // (90.2) Par.?
hṛtvā sa medinīṃ kṛtsnāṃ hatvā cāsurapuṃgavān / (91.1) Par.?
dadau śakrāya vasudhāṃ viṣṇur balavatāṃ varaḥ // (91.2) Par.?
eṣa te vāmano nāma prādurbhāvo mahātmanaḥ / (92.1) Par.?
vedavidbhir dvijair etat kathyate vaiṣṇavaṃ yaśaḥ // (92.2) Par.?
bhūyo bhūtātmano viṣṇoḥ prādurbhāvo mahātmanaḥ / (93.1) Par.?
dattātreya iti khyātaḥ kṣamayā parayā yutaḥ // (93.2) Par.?
tena naṣṭeṣu deveṣu prakriyāsu makheṣu ca / (94.1) Par.?
cāturvarṇye ca saṃkīrṇe dharme śithilatāṃ gate // (94.2) Par.?
abhivardhati cādharme satye naṣṭe 'nṛte sthite / (95.1) Par.?
prajāsu śīryamāṇāsu dharme cākulatāṃ gate // (95.2) Par.?
sayajñāḥ sakriyā vedāḥ pratyānītā hi tena vai / (96.1) Par.?
cāturvarṇyam asaṃkīrṇaṃ kṛtaṃ tena mahātmanā // (96.2) Par.?
tena hehayarājasya kārtavīryasya dhīmataḥ / (97.1) Par.?
varadena varo datto dattātreyeṇa dhīmatā // (97.2) Par.?
etad bāhudvayaṃ yat te tat te mama kṛte nṛpa / (98.1) Par.?
śatāni daśa bāhūnāṃ bhaviṣyati na saṃśayaḥ // (98.2) Par.?
pālayiṣyasi kṛtsnāṃ ca vasudhāṃ vasudheśvara / (99.1) Par.?
durnirīkṣyo 'rivṛndānāṃ yuddhasthaś ca bhaviṣyasi // (99.2) Par.?
eṣa te vaiṣṇavaḥ śrīmān prādurbhāvo 'dbhutaḥ śubhaḥ / (100.1) Par.?
bhūyaś ca jāmadagnyo 'yaṃ prādurbhāvo mahātmanaḥ // (100.2) Par.?
yatra bāhusahasreṇa vismitaṃ durjayaṃ raṇe / (101.1) Par.?
rāmo 'rjunam anīkasthaṃ jaghāna nṛpatiṃ prabhuḥ // (101.2) Par.?
rathasthaṃ pārthivaṃ rāmaḥ pātayitvārjunaṃ bhuvi / (102.1) Par.?
dharṣayitvā yathākāmaṃ krośamānaṃ ca meghavat // (102.2) Par.?
kṛtsnaṃ bāhusahasraṃ ca cicheda bhṛgunandanaḥ / (103.1) Par.?
paraśvadhena dīptena jñātibhiḥ sahitasya vai // (103.2) Par.?
kīrṇā kṣatriyakoṭībhir merumandarabhūṣaṇā / (104.1) Par.?
triḥsaptakṛtvaḥ pṛthivī tena niḥkṣatriyā kṛtā // (104.2) Par.?
kṛtvā niḥkṣatriyāṃ caiva bhārgavaḥ sumahātapāḥ / (105.1) Par.?
sarvapāpavināśāya vājimedhena ceṣṭavān // (105.2) Par.?
tasmin yajñe mahādāne dakṣiṇāṃ bhṛgunandanaḥ / (106.1) Par.?
mārīcāya dadau prītaḥ kaśyapāya vasuṃdharām // (106.2) Par.?
vāruṇāṃs turagāñ śubhrān rathaṃ ca rathināṃ varaḥ / (107.1) Par.?
hiraṇyam akṣayaṃ dhenūr gajendrāṃś ca mahāmatiḥ / (107.2) Par.?
dadau tasmin mahāyajñe vājimedhe mahāyaśāḥ // (107.3) Par.?
adyāpi ca hitārthāya lokānāṃ bhṛgunandanaḥ / (108.1) Par.?
caramāṇas tapo dīptaṃ jāmadagnyaḥ punaḥ punaḥ / (108.2) Par.?
tiṣṭhate devavac chrīmān mahendre parvatottame // (108.3) Par.?
eṣa viṣṇoḥ sureśasya śāśvatasyāvyayasya ca / (109.1) Par.?
jāmadagnya iti khyātaḥ prādurbhāvo mahātmanaḥ // (109.2) Par.?
caturviṃśe yuge cāpi viśvāmitrapuraḥsaraḥ / (110.1) Par.?
jajñe daśarathasyātha putraḥ padmāyatekṣaṇaḥ // (110.2) Par.?
kṛtvātmānaṃ mahābāhuś caturdhā prabhur īśvaraḥ / (111.1) Par.?
loke rāma iti khyātas tejasā bhāskaropamaḥ // (111.2) Par.?
prasādanārthaṃ lokasya rakṣasāṃ nigrahāya ca / (112.1) Par.?
dharmasya ca vivṛddhyarthaṃ jajñe tatra mahāyaśāḥ / (112.2) Par.?
tam apy āhur manuṣyendraṃ sarvabhūtapates tanum // (112.3) Par.?
tasmai dattāni cāstrāṇi viśvāmitreṇa dhīmatā / (113.1) Par.?
vadhārthaṃ devaśatrūṇāṃ durdharāṇi surair api // (113.2) Par.?
yajñavighnakarau yena munīnāṃ bhāvitātmanām / (114.1) Par.?
mārīcaś ca subāhuś ca balena balināṃ varau / (114.2) Par.?
nihatau ca nirāśau ca kṛtau tena mahātmanā // (114.3) Par.?
vartamāne makhe yena janakasya mahātmanaḥ / (115.1) Par.?
bhagnaṃ māheśvaraṃ cāpaṃ krīḍatā līlayā purā // (115.2) Par.?
yaḥ samāḥ sarvadharmajñaś caturdaśa vane 'vasat / (116.1) Par.?
lakṣmaṇānucaro rāmaḥ sarvabhūtahite rataḥ // (116.2) Par.?
rūpiṇī yasya pārśvasthā sīteti prathitā janaiḥ / (117.1) Par.?
pūrvocitatvād yā lakṣmīr bhartāram anugacchati // (117.2) Par.?
caturdaśa vane taptvā tapo varṣāṇi rāghavaḥ / (118.1) Par.?
janasthāne vasan kāryaṃ tridaśānāṃ cakāra saḥ // (118.2) Par.?
sītāyāḥ padam anvicchan nijaghāna mahāmanāḥ / (119.1) Par.?
virādhaṃ ca kabandhaṃ ca rākṣasau bhīmavikramau / (119.2) Par.?
jaghāna puruṣavyāghrau gandharvau śāpavikṣatau // (119.3) Par.?
hutāśanārkāṃśutaḍitprakāśaiḥ prataptajāmbūnadacitrapuṅkhaiḥ / (120.1) Par.?
surendravajrāśanitulyasāraiḥ śaraiḥ śarīreṣu viyojitau balāt // (120.2) Par.?
sugrīvasya kṛte yena vānarendro mahābalaḥ / (121.1) Par.?
vālī vinihataḥ saṃkhye sugrīvaś cābhiṣecitaḥ // (121.2) Par.?
devāsuragaṇānāṃ hi yakṣarākṣasapakṣiṇām / (122.1) Par.?
yatrāvadhyaṃ rākṣasendraṃ rāvaṇaṃ yudhi durjayam // (122.2) Par.?
guptaṃ rākṣasakoṭībhir nīlāñjanacayopamam / (123.1) Par.?
trailokyarāvaṇaṃ krūraṃ rākṣasaṃ rākṣaseśvaram // (123.2) Par.?
durjaraṃ durdharaṃ dṛptaṃ śārdūlasamavikramam / (124.1) Par.?
durnirīkṣyaṃ suragaṇair varadānena darpitam // (124.2) Par.?
jaghāna sacivaiḥ sārdhaṃ sasainyaṃ rāvaṇaṃ yudhi / (125.1) Par.?
mahābhraghanasaṃkāśaṃ mahākāyaṃ mahābalam // (125.2) Par.?
tam āgaskāriṇaṃ krūraṃ paulastyaṃ puruṣarṣabhaḥ / (126.1) Par.?
rāvaṇaṃ nijaghānāśu rāmo bhūtapatiḥ purā // (126.2) Par.?
madhoś ca tanayo dṛpto lavaṇo nāma dānavaḥ / (127.1) Par.?
hato madhuvane bhīmo varadatto mahāsuraḥ / (127.2) Par.?
samare yuddhaśauṇḍena tathānye cāpi rākṣasāḥ // (127.3) Par.?
etāni kṛtvā karmāṇi rāmo dharmabhṛtāṃ varaḥ / (128.1) Par.?
daśāśvamedhāñ jārūthyān ājahāra nirargalān // (128.2) Par.?
nāśrūyantāśubhā vāco nākulaṃ māruto vavau / (129.1) Par.?
na vittaharaṇaṃ cāsīd rāme rājyaṃ praśāsati // (129.2) Par.?
paryadevan na vidhavā nānarthaś cābhavat tadā / (130.1) Par.?
sarvam āsīj jagaddāntaṃ rāme rājyaṃ praśāsati // (130.2) Par.?
na prāṇināṃ bhayaṃ cāsīj jalānalavighātajam / (131.1) Par.?
na ca sma vṛddhā bālānāṃ pretakāryāṇi kurvate // (131.2) Par.?
brahma paryacarat kṣatraṃ viśaḥ kṣatram anuvratāḥ / (132.1) Par.?
śūdrāś caiva hi varṇāṃs trīñ śuśrūṣanty anahaṃkṛtāḥ // (132.2) Par.?
nāryo nātyacaran bhartṝn bhāryāṃ nātyacarat patiḥ / (133.1) Par.?
sarvam āsīj jagaddāntaṃ nirdasyur abhavan mahī / (133.2) Par.?
rāma eko 'bhavad bhartā rāmaḥ pālayitābhavat // (133.3) Par.?
āsan varṣasahasrāṇi tathā putrasahasriṇaḥ / (134.1) Par.?
arogāḥ prāṇinaś cāsan rāme rājyaṃ praśāsati // (134.2) Par.?
devatānām ṛṣīṇāṃ ca manuṣyāṇāṃ ca sarvaśaḥ / (135.1) Par.?
pṛthivyāṃ sahavāso 'bhūd rāme rājyaṃ praśāsati // (135.2) Par.?
gāthā apy atra gāyanti ye purāṇavido janāḥ / (136.1) Par.?
rāme nibaddhās tattvārthā māhātmyaṃ tasya dhīmataḥ // (136.2) Par.?
śyāmo yuvā lohitākṣo dīptāsyo mitabhāṣitā / (137.1) Par.?
ājānabāhuḥ sumukhaḥ siṃhaskandho mahābhujaḥ // (137.2) Par.?
daśa varṣasahasrāṇi daśa varṣaśatāni ca / (138.1) Par.?
ayodhyādhipatir bhūtvā rāmo rājyam akārayat // (138.2) Par.?
ṛksāmayajuṣāṃ ghoṣo jyāghoṣaś ca mahātmanaḥ / (139.1) Par.?
avyucchinno 'bhavad rāṣṭre dīyatāṃ bhujyatām iti // (139.2) Par.?
sattvavān guṇasampanno dīpyamānaḥ svatejasā / (140.1) Par.?
ati sūryaṃ ca candraṃ ca rāmo dāśarathir babhau // (140.2) Par.?
īje kratuśataiḥ puṇyaiḥ samāptavaradakṣiṇaiḥ / (141.1) Par.?
hitvāyodhyāṃ divaṃ yāto rāghavo 'sau mahābalaḥ // (141.2) Par.?
evam eṣa mahābāhur ikṣvākukulanandanaḥ / (142.1) Par.?
rāvaṇaṃ sagaṇaṃ hatvā divam ācakrame prabhuḥ // (142.2) Par.?
aparaḥ keśavasyāyaṃ prādurbhāvo mahātmanaḥ / (143.1) Par.?
vikhyāto māthure kalpe sarvalokahitāya vai // (143.2) Par.?
yatra sālvaṃ ca kaṃsaṃ ca maindaṃ dvividam eva ca / (144.1) Par.?
ariṣṭaṃ vṛṣabhaṃ keśiṃ pūtanāṃ daityadārikām // (144.2) Par.?
nāgaṃ kuvalayāpīḍaṃ cāṇūraṃ muṣṭikaṃ tathā / (145.1) Par.?
daityān mānuṣadehasthān sūdayāmāsa vīryavān // (145.2) Par.?
chinnaṃ bāhusahasraṃ ca bāṇasyādbhutakarmaṇaḥ / (146.1) Par.?
narakaś ca hataḥ saṃkhye yavanaś ca mahābalaḥ // (146.2) Par.?
hṛtāni ca mahīpānāṃ sarvaratnāni tejasā / (147.1) Par.?
durācārāś ca nihatāḥ pārthivā ye mahītale // (147.2) Par.?
ete lokahitārthāya prādurbhāvā mahātmanaḥ / (148.1) Par.?
kalkī viṣṇuyaśā nāma bhūyaś cotpatsyate prabhuḥ // (148.2) Par.?
ete cānye ca bahavo divyā devaguṇair yutāḥ / (149.1) Par.?
prādurbhāvāḥ purāṇeṣu gīyante brahmavādibhiḥ // (149.2) Par.?
yatra devā vimuhyanti prādurbhāvānukīrtane / (150.1) Par.?
purāṇaṃ vartate yatra vedaśrutisamāhitam // (150.2) Par.?
etaduddeśamātreṇa prādurbhāvānukīrtanam / (151.1) Par.?
kīrtitaṃ kīrtanīyasya sarvalokaguroḥ prabhoḥ // (151.2) Par.?
prīyante pitaras tasya prādurbhāvānukīrtanāt / (152.1) Par.?
viṣṇor amitavīryasya yaḥ śṛṇoti kṛtāñjaliḥ // (152.2) Par.?
etās tu yogeśvarayogamāyāḥ śrutvā naro mucyati sarvapāpaiḥ / (153.1) Par.?
ṛddhiṃ samṛddhiṃ vipulāṃś ca bhogān prāpnoti śīghraṃ bhagavatprasādāt // (153.2) Par.?
Duration=0.85516381263733 secs.