Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17497

Click on a sentence to show its analysis
Keep the mouse pointer over a lemma to show its meanings.

tataḥ svasadma yātāyāḥ paścān mārgam avekṣitum / (1.1) Par.?

somaprabhāyāḥ snehena mārgaharmyāgram āsthitām // (1.2) Par.?

kaliṅgasenām ārāt tāṃ dadarśa gaganāgataḥ / (2.1) Par.?

daivān madanavegākhyo yuvā vidyādharādhipaḥ // (2.2) Par.?

sa tāṃ dṛṣṭvaiva rūpeṇa jagattritayamohinīm / (3.1) Par.?

kṣobhaṃ jagāma kāmaindrajālikasyeva picchikām // (3.2) Par.?

alaṃ vidyādharastrībhiḥ kā kathāpsarasām api / (4.1) Par.?

yatredṛg etad etasyā mānuṣyā rūpam adbhutam // (4.2) Par.?

tad eṣā yadi me na syād bhāryā kiṃ jīvitena tat / (5.1) Par.?

kathaṃ ca mānuṣīsaṅgaṃ kuryāṃ vidyādharo 'pi san // (5.2) Par.?

ity ālocya sa dadhyau ca vidyāṃ prajñaptisaṃjñikām / (6.1) Par.?

sā cāvirbhūya sākārā tam evam avadattadā // (6.2) Par.?

tattvato mānuṣī neyam eṣā śāpacyutāpsarāḥ / (7.1) Par.?

jātā kaliṅgadattasya gṛhe subhaga bhūpateḥ // (7.2) Par.?

ity ukte vidyayā so 'tha hṛṣṭo gatvā svadhāmani / (8.1) Par.?

vidyādharo 'nyavimukhaḥ kāmārtaḥ samacintayat // (8.2) Par.?

haṭhād yadi harāmy etāṃ tad etan me na yujyate / (9.1) Par.?

strīṇāṃ haṭhopabhoge hi mama śāpo 'sti mṛtyudaḥ // (9.2) Par.?

tad etatprāptaye śaṃbhur ārādhyas tapasā mayā / (10.1) Par.?

tapo'dhīnāni hi śreyāṃsy upāyo 'nyo na vidyate // (10.2) Par.?

iti niścitya cānyedyur gatvā ṛṣabhaparvatam / (11.1) Par.?

ekapādasthitas tepe nirāhāras tapāṃsi saḥ // (11.2) Par.?

atha tuṣṭo 'cirāt tīvrais tapobhir dattadarśanaḥ / (12.1) Par.?

evaṃ madanavegaṃ tam ādideśāmbikāpatiḥ // (12.2) Par.?

eṣā kaliṅgasenākhyā khyātā rūpeṇa bhūtale / (13.1) Par.?

kanyā nāsyāś ca bhartāpi sadṛśo rūpasaṃpadā // (13.2) Par.?

ekas tu vatsarājo 'sti sa caitām abhivāñchati / (14.1) Par.?

kiṃtu vāsavadattāyā bhītyā nārthayate sphuṭam // (14.2) Par.?

eṣāpi rūpalubdhā taṃ śrutvā somaprabhāmukhāt / (15.1) Par.?

svayaṃvarāya vatseśaṃ rājaputry abhivāñchati // (15.2) Par.?

tatra yāvad vivāho 'syā na bhavet tāvad antarā / (16.1) Par.?

kṛtvā kālāsahasyeva rūpaṃ vatseśvarasya tat // (16.2) Par.?

gatvā gāndharvavidhinā bhāryāṃ kuryād bhavān imām / (17.1) Par.?

evaṃ kaliṅgasenāsau tava setsyati sundarī // (17.2) Par.?

ity ādiṣṭaḥ sa śarveṇa praṇipatyātha taṃ yayau / (18.1) Par.?

gṛhaṃ madanavegaḥ svaṃ kālakūṭagires taṭam // (18.2) Par.?

atrāntare pratiniśaṃ gacchantyā nijamandiram / (19.1) Par.?

pratiprabhātam āyāntyā yantreṇa vyomagāminā // (19.2) Par.?

tayā takṣaśilāpuryāṃ sā somaprabhayā saha / (20.1) Par.?

kaliṅgasenā krīḍantī tāṃ jagādaikadā rahaḥ // (20.2) Par.?

sakhi vācyaṃ na kasyāpi tvayā yat te bravīmy aham / (21.1) Par.?

vivāho mama samprāpta iti jāne yataḥ śṛṇu // (21.2) Par.?

iha māṃ yācituṃ dūtāḥ preṣitā bahubhir nṛpaiḥ / (22.1) Par.?

te ca tātena saṃvṛtya tathaiva preṣitā itaḥ // (22.2) Par.?

yas tu prasenajinnāma śrāvastyām asti bhūpatiḥ / (23.1) Par.?

tadīyaḥ kevalaṃ dūtaḥ sādaraṃ tena satkṛtaḥ // (23.2) Par.?

mantritaṃ cāmbayāpy etat tan manye madvaro nṛpaḥ / (24.1) Par.?

sa tātasya tathāmbāyāḥ kulīna iti saṃmataḥ // (24.2) Par.?

sa hi tatra kule jāto yatrāmbāmbālikādikāḥ / (25.1) Par.?

pitāmahyaḥ kurūṇāṃ ca pāṇḍavānāṃ ca jajñire // (25.2) Par.?

tat prasenajite tasmai sakhi dattāsmi sāṃpratam / (26.1) Par.?

tātena rājñe śrāvastyāṃ nagaryām iti niścayaḥ // (26.2) Par.?

etat kaliṅgasenātaḥ śrutvā somaprabhā śucā / (27.1) Par.?

sṛjantīvāparaṃ hāraṃ sadyo dhārāśruṇārudat // (27.2) Par.?

jagāda caitāṃ pṛcchantīṃ vayasyām aśrukāraṇam / (28.1) Par.?

dṛṣṭaniḥśeṣabhūlokā sā mayāsuraputrikā // (28.2) Par.?

vayo rūpaṃ kulaṃ śīlaṃ vittaṃ ceti varasya yat / (29.1) Par.?

mṛgyate sakhi tatrādyaṃ vayo vaṃśādikaṃ tataḥ // (29.2) Par.?

prasenajic ca pravayāḥ sa dṛṣṭo nṛpatir mayā / (30.1) Par.?

jātīpuṣpasya jātyeva jīrṇasyāsya kulena kim // (30.2) Par.?

himaśubhreṇa tena tvaṃ hemanteneva padminī / (31.1) Par.?

parimlānāmbujamukhī yuktā śocyā bhaviṣyasi // (31.2) Par.?

ato jāto viṣādo me praharṣas tu bhaven mama / (32.1) Par.?

yadi syād vatsarājas te kalyāṇy udayanaḥ patiḥ // (32.2) Par.?

tasya nāsti hi rūpeṇa lāvaṇyena kulena ca / (33.1) Par.?

śauryeṇa ca vibhūtyā ca tulyo 'nyo nṛpatir bhuvi // (33.2) Par.?

tena ced yujyase bhartrā sadṛśena kṛśodari / (34.1) Par.?

dhātuḥ phalati lāvaṇyanirmāṇaṃ tad idaṃ tvayi // (34.2) Par.?

iti somaprabhākﾱptair vākyair yantrair iveritam / (35.1) Par.?

yayau kaliṅgasenāyā mano vatseśvaraṃ prati // (35.2) Par.?

tataś ca sā tāṃ papraccha rājakanyā mayātmajām / (36.1) Par.?

kathaṃ sa vatsarājākhyaḥ sakhi kiṃvaṃśasaṃbhavaḥ // (36.2) Par.?

kathaṃ codayano nāmnā tvayā me kathyatām iti / (37.1) Par.?

sātha somaprabhāvādīc chṛṇu tat sakhi vacmi te // (37.2) Par.?

vatsa ity asti vikhyāto deśo bhūmer vibhūṣaṇam / (38.1) Par.?

purī tatrāsti kauśāmbī dvitīyevāmarāvatī // (38.2) Par.?

tasyāṃ sa kurute rājyaṃ yato vatseśvaras tataḥ / (39.1) Par.?

vaṃśaṃ ca tasya kalyāṇi kīrtyamānaṃ mayā śṛṇu // (39.2) Par.?

pāṇḍavasyārjunasyābhūd abhimanyuḥ kilātmajaḥ / (40.1) Par.?

cakravyūhabhidā yena nītā kurucamūḥ kṣayam // (40.2) Par.?

tasmāt parīkṣid abhavad rājā bharatavaṃśabhṛt / (41.1) Par.?

sarpasattrapraṇetābhūt tato 'pi janamejayaḥ // (41.2) Par.?

tato 'bhavac chatānīkaḥ kauśāmbīm adhyuvāsa yaḥ / (42.1) Par.?

yaś ca devāsuraraṇe daityān hatvā vyapadyata // (42.2) Par.?

tasmād rājā jagacchlāghyaḥ sahasrānīka ity abhūt / (43.1) Par.?

yaḥ śakrapreṣitaratho divi cakre gatāgatam // (43.2) Par.?

tasya devyāṃ mṛgāvatyām asāv udayano 'jani / (44.1) Par.?

bhūṣaṇaṃ śaśino vaṃśe jagannetrotsavo nṛpaḥ // (44.2) Par.?

nāmno nimittam apy asya śṛṇu sā hi mṛgāvatī / (45.1) Par.?

antarvatnī satī rājño janany asya sujanmanaḥ // (45.2) Par.?

utpannarudhirasnānadohadā pāpabhīruṇā / (46.1) Par.?

bhartrā racitalākṣādirasavāpīkṛtāplavā // (46.2) Par.?

pakṣiṇā tārkṣyavaṃśyena nipatyāmiṣaśaṅkayā / (47.1) Par.?

nītvā vidhivaśāt tyaktā jīvantyevodayācale // (47.2) Par.?

tatra cāśvāsitā bhūyo bhartṛsaṃgamavādinā / (48.1) Par.?

jamadagnyarṣiṇā dṛṣṭā sthitāsau tatra cāśrame // (48.2) Par.?

avajñājaniterṣyāyāḥ kaṃcit kālaṃ hi tādṛśaḥ / (49.1) Par.?

śāpas tilottamāto 'bhūt tadbhartus tadviyogadaḥ // (49.2) Par.?

divasaiḥ sā ca tatraiva jamadagnyāśrame sutam / (50.1) Par.?

udayādrau prasūte sma dyaur indum iva nūtanam // (50.2) Par.?

asāv udayano jātaḥ sārvabhaumo mahīpatiḥ / (51.1) Par.?

janiṣyate ca putro 'sya sarvavidyādharādhipaḥ // (51.2) Par.?

ity uccāryāmbarād vāṇīm aśarīrāṃ tadā kṛtam / (52.1) Par.?

nāmodayana ity asya devair udayajanmataḥ // (52.2) Par.?

so 'pi śāpāntabaddhāśaḥ kālaṃ mātalibodhitaḥ / (53.1) Par.?

kṛcchrāt sahasrānīkas tāṃ vinānaiṣīn mṛgāvatīm // (53.2) Par.?

prāpte śāpāvasāne tu śabarād vidhiyogataḥ / (54.1) Par.?

udayādrer upāyātāt prāpyābhijñānam ātmanaḥ // (54.2) Par.?

āveditārthas tatkālaṃ gaganodgatayā girā / (55.1) Par.?

śabaraṃ taṃ puraskṛtya jagāmaivodayācalam // (55.2) Par.?

tatra vāñchitasaṃsiddhim iva prāpya mṛgāvatīm / (56.1) Par.?

bhāryām udayanaṃ taṃ ca manorājyam ivātmajam // (56.2) Par.?

tau gṛhītvātha kauśāmbīm āgatyaivābhiṣiktavān / (57.1) Par.?

yauvarājye tanūjaṃ taṃ tadguṇotkarṣatoṣitaḥ // (57.2) Par.?

yaugandharāyaṇādīṃś ca tasmai mantrisutān dadau / (58.1) Par.?

tenāttabhāro bubhuje bhogān bhāryāsakhaś ciram // (58.2) Par.?

kālenāropya rājye ca tam evodayanaṃ sutam / (59.1) Par.?

vṛddhaḥ sabhāryāsacivo yayau rājā mahāpatham // (59.2) Par.?

evaṃ sa pitryaṃ rājyaṃ tat prāpya jitvā tato 'khilām / (60.1) Par.?

yaugandharāyaṇasakhaḥ praśāsty udayano mahīm // (60.2) Par.?

ity āśu kathayitvā sā kathāṃ somaprabhā rahaḥ / (61.1) Par.?

sakhīṃ kaliṅgasenāṃ tāṃ punar evam abhāṣata // (61.2) Par.?

evaṃ vatseṣu rājatvād vatsarājaḥ sugātri saḥ / (62.1) Par.?

pāṇḍavānvayasaṃbhūtyā somavaṃśodbhavas tathā // (62.2) Par.?

nāmnāpy udayanaḥ prokto devair udayajanmanā / (63.1) Par.?

rūpeṇa cātra saṃsāre kaṃdarpo 'pi na tādṛśaḥ // (63.2) Par.?

sa ekas tava tulyo 'sti patis trailokyasundari / (64.1) Par.?

sa ca vāñchati lāvaṇyalubdhas tvāṃ prārthitāṃ dhruvam // (64.2) Par.?

kiṃtu caṇḍamahāsenamahīpatitanūdbhavā / (65.1) Par.?

asti vāsavadattākhyā tasyāgryamahiṣī sakhi // (65.2) Par.?

tathā sa ca vṛtas tyaktvā bāndhavān atiraktayā / (66.1) Par.?

uṣāśakuntalādīnāṃ kanyānāṃ hṛtalajjayā // (66.2) Par.?

naravāhanadattākhyas tasyāṃ jāto 'sya cātmajaḥ / (67.1) Par.?

ādiṣṭaḥ kila devair yo bhāvī vidyādharādhipaḥ // (67.2) Par.?

atas tasyāḥ sa vatseśo bibhyat tvāṃ neha yācate / (68.1) Par.?

sā ca dṛṣṭā mayā na tvāṃ spardhate rūpasaṃpadā // (68.2) Par.?

evam uktavatīṃ tāṃ ca sakhīṃ somaprabhāṃ tadā / (69.1) Par.?

kaliṅgasenā vatseśasotsukā nijagāda sā // (69.2) Par.?

jāne 'ham etadvaśyāyāḥ pitroḥ śakyaṃ tu kiṃ mama / (70.1) Par.?

sarvajñā saprabhāvā ca tattvam evātra me gatiḥ // (70.2) Par.?

daivāyattam idaṃ kāryaṃ tathā cātra kathāṃ śṛṇu / (71.1) Par.?

somaprabhā tām ity uktvā śaśaṃsāsyai kathām imām // (71.2) Par.?

rājā vikramasenākhya ujjayinyām abhūt purā / (72.1) Par.?

tasya tejasvatīty āsīd rūpeṇāpratimā sutā // (72.2) Par.?

tasyāś cābhimataḥ kaścit prāyo nābhūd varo nṛpaḥ / (73.1) Par.?

ekadā ca dadarśaikaṃ puruṣaṃ sā svaharmyagā // (73.2) Par.?

tena svākṛtinā daivāt saṃgatiṃ vāñchati sma sā / (74.1) Par.?

svābhiprāyaṃ ca saṃdiśya tasmai svāṃ vyasṛjat sakhīm // (74.2) Par.?

sā gatvā tatsakhī tasya puṃsaḥ sāhasaśaṅkinaḥ / (75.1) Par.?

anicchato 'pi prārthyaivaṃ yatnāt saṃketakaṃ vyadhāt // (75.2) Par.?

etad devakulaṃ bhadra viviktaṃ paśyasīha yam / (76.1) Par.?

atra rātrau pratīkṣethā rājaputryās tvam āgamam // (76.2) Par.?

ity uktvā sā tam āmantrya gatvā tasyai tad abhyadhāt / (77.1) Par.?

tejasvatyai tataḥ sāpi tasthau sūryāvalokinī // (77.2) Par.?

pumāṃś ca so 'numānyāpi bhayāt kvāpy anyato yayau / (78.1) Par.?

na bhekaḥ kokanadinīkiṃjalkāsvādakovidaḥ // (78.2) Par.?

atrāntare ca ko 'py atra rājaputraḥ kulodgataḥ / (79.1) Par.?

mṛte pitari tanmittraṃ rājānaṃ draṣṭum āyayau // (79.2) Par.?

sa cātra sāyaṃ samprāptaḥ somadattābhidho yuvā / (80.1) Par.?

dāyādahṛtarājyādir ekākī kāntadarśanaḥ // (80.2) Par.?

viveśa daivāt tatraiva netuṃ devakule niśām / (81.1) Par.?

rājaputryāḥ sakhī yatra puṃsaḥ saṃketam ādiśat // (81.2) Par.?

taṃ tatra sthitam abhyetya rājaputry avibhāvya sā / (82.1) Par.?

niśāyām anurāgāndhā svayaṃvarapatiṃ vyadhāt // (82.2) Par.?

so 'py abhyanandat tūṣṇīṃ tāṃ prājño vidhisamarpitām / (83.1) Par.?

saṃsūcayantīṃ bhāvinyā rājalakṣmyā samāgamam // (83.2) Par.?

tataḥ kṣaṇād rājasutā sā vilokyaivam eva tam / (84.1) Par.?

kamanīyatamaṃ mene dhātrātmānam avañcitam // (84.2) Par.?

anantaraṃ kathāṃ kṛtvā yathāsvaṃ saṃvidā tayoḥ / (85.1) Par.?

ekā svamandiram agād anyas tatrānayan niśām // (85.2) Par.?

prātar gatvā pratīhāramukhenāvedya nāma saḥ / (86.1) Par.?

rājaputraḥ parijñāto rājñaḥ prāviśad antikam // (86.2) Par.?

tatroktarājyahārādiduḥkhasya sa kṛtādaraḥ / (87.1) Par.?

aṅgīcakre sahāyatvaṃ rājā tasyārimardane // (87.2) Par.?

matiṃ cakre ca tāṃ tasmai dātuṃ prāgditsitāṃ sutām / (88.1) Par.?

mantribhyaś ca tadaivaitam abhiprāyaṃ śaśaṃsa saḥ // (88.2) Par.?

athaitasmai ca rājñe taṃ sutāvṛttāntam abhyadhāt / (89.1) Par.?

devī svā bodhitā pūrvaṃ tayaivāptasakhīmukhaiḥ // (89.2) Par.?

asiddhāniṣṭasiddheṣṭakākatālīyavismitam / (90.1) Par.?

tatas taṃ tatra rājānam eko mantrī tadābravīt // (90.2) Par.?

vidhir eva hi jāgarti bhavyānām arthasiddhiṣu / (91.1) Par.?

asaṃcetayamānānāṃ sadbhṛtyaḥ svāminām iva // (91.2) Par.?

tathā ca kathayāmy etāṃ rājann atra kathāṃ śṛṇu / (92.1) Par.?

babhūva hariśarmākhyaḥ ko'pi grāme kvacid dvijaḥ // (92.2) Par.?

sa daridraś ca mūrkhaś ca vṛttyabhāvena duḥsthitaḥ / (93.1) Par.?

pūrvaduṣkṛtabhogāya jāto 'tibahubālakaḥ // (93.2) Par.?

sakuṭumbo bhraman bhikṣāṃ prāpyaikaṃ nagaraṃ kramāt / (94.1) Par.?

śiśriye sthūladattākhyaṃ gṛhasthaṃ sa mahādhanam // (94.2) Par.?

gavādirakṣakān putrān bhāryāṃ karmakarīṃ nijām / (95.1) Par.?

tasya kṛtvā gṛhābhyarṇe praiṣyaṃ kurvann uvāsa saḥ // (95.2) Par.?

ekadā sthūladattasya sutāpariṇayotsavaḥ / (96.1) Par.?

tasyābhūd āgatān ekajanyayātrājanākulaḥ // (96.2) Par.?

tadā ca hariśarmātra tadgṛhe sakuṭumbakaḥ / (97.1) Par.?

ākaṇṭhaghṛtamāṃsādibhojanāsthāṃ babandha saḥ // (97.2) Par.?

tadvelāṃ vīkṣamāṇo 'tha smṛtaḥ kenāpi nātra saḥ / (98.1) Par.?

tato 'nāhāranirviṇṇo bhāryām ity abravīn niśi // (98.2) Par.?

dāridryād iha maurkhyāc ca mamedṛśam agauravam / (99.1) Par.?

tad atra kṛtrimaṃ yuktyā vijñānaṃ prayunajmy aham // (99.2) Par.?

yenāsya sthūladattasya bhaveyaṃ gauravāspadam / (100.1) Par.?

tvaṃ prāpte 'vasare cāsmai jñāninaṃ māṃ nivedaya // (100.2) Par.?

ity uktvā tāṃ vicintyātra dhiyā supte jane hayaḥ / (101.1) Par.?

sthūladattagṛhāt tena jahre jāmātṛvāhanaḥ // (101.2) Par.?

dūre pracchannam etena sthāpitaṃ prātar atra tam / (102.1) Par.?

itas tato vicinvanto 'py aśvaṃ janyā na lebhire // (102.2) Par.?

athāmaṅgalavitrastaṃ hayacauragaveṣiṇam / (103.1) Par.?

hariśarmavadhūr etya sthūladattam uvāca sā // (103.2) Par.?

bhartā madīyo vijñānī jyotirvidyādikovidaḥ / (104.1) Par.?

aśvaṃ vo lambhayaty enaṃ kimarthaṃ sa na pṛcchyate // (104.2) Par.?

tac chrutvā sthūladattas taṃ hariśarmāṇam āhvayat / (105.1) Par.?

hyo vismṛto hṛte 'śve tu smṛto 'smy adyeti vādinam // (105.2) Par.?

vismṛtaṃ naḥ kṣamasveti prārthitaṃ brāhmaṇaṃ ca saḥ / (106.1) Par.?

papraccha kenāpahṛto hayo naḥ kathyatām iti // (106.2) Par.?

hariśarmā tato mithyā rekhāḥ kurvann uvāca saḥ / (107.1) Par.?

ito dakṣiṇasīmānte cauraiḥ saṃsthāpito hayaḥ // (107.2) Par.?

pracchannastho dinānte ca dūraṃ yāvan na nīyate / (108.1) Par.?

tāvad ānīyatāṃ gatvā tvaritaṃ sa turaṃgamaḥ // (108.2) Par.?

tac chrutvā dhāvitaiḥ prāpya kṣaṇāt sa bahubhir naraiḥ / (109.1) Par.?

āninye 'śvaḥ praśaṃsadbhir vijñānaṃ hariśarmaṇaḥ // (109.2) Par.?

tato jñānīti sarveṇa pūjyamāno janena saḥ / (110.1) Par.?

uvāsa hariśarmātra sthūladattārcitaḥ sukham // (110.2) Par.?

atha gacchatsu divaseṣv atra rājagṛhāntarāt / (111.1) Par.?

hemaratnādi caureṇa bhūri kenāpy anīyata // (111.2) Par.?

nājñāyata yadā cauras tadā jñāniprasiddhitaḥ / (112.1) Par.?

ānāyayāmāsa nṛpo hariśarmāṇam āśu tam // (112.2) Par.?

sa cānītaḥ kṣipan kālaṃ vakṣye prātar iti bruvan / (113.1) Par.?

vāsake sthāpito jñānavigno rājñāsurakṣitaḥ // (113.2) Par.?

tatra rājakule cāsīn nāmnā jihveti ceṭikā / (114.1) Par.?

yayā bhrātrā samaṃ tac ca nītam abhyantarād dhanam // (114.2) Par.?

sā gatvā niśi tatrāsya vāsake hariśarmaṇaḥ / (115.1) Par.?

jijñāsayā dadau dvāri karṇaṃ tajjñānaśaṅkitā // (115.2) Par.?

hariśarmā ca tatkālam ekako 'bhyantare sthitaḥ / (116.1) Par.?

nijāṃ jihvāṃ ninindaivaṃ mṛṣāvijñānavādinīm // (116.2) Par.?

bhogalampaṭayā jihve kim idaṃ vihitaṃ tvayā / (117.1) Par.?

durācāre sahasva tvam idānīm iha nigraham // (117.2) Par.?

tac chrutvā jñāninānena jñātāsmīti bhayena sā / (118.1) Par.?

jihvākhyā ceṭikā yuktyā praviveśa tadantikam // (118.2) Par.?

patitvā pādayos tasya jñānivyañjanam abravīt / (119.1) Par.?

brahmann iyaṃ sā jihvāhaṃ tvayā jñātārthahāriṇī // (119.2) Par.?

nītvā tac ca mayāsyaiva mandirasyeha pṛṣṭhataḥ / (120.1) Par.?

udyāne dāḍimasyādho nikhātaṃ bhūtale dhanam // (120.2) Par.?

tad rakṣa māṃ gṛhāṇemaṃ kiṃcin me hema hastagam / (121.1) Par.?

etac chrutvā sagarvaṃ sa hariśarmā jagāda tām // (121.2) Par.?

gaccha jānāmy ahaṃ sarvaṃ bhūtaṃ bhavyaṃ bhavat tathā / (122.1) Par.?

tvāṃ tu nodghāṭayiṣyāmi kṛpaṇāṃ śaraṇāgatām // (122.2) Par.?

yac ca hastagataṃ te 'sti tad dāsyasi punar mama / (123.1) Par.?

ity uktā tena sā ceṭī tathety āśu tato yayau // (123.2) Par.?

hariśarmā ca sa tato vismayād ity acintayat / (124.1) Par.?

asādhyaṃ sādhayaty arthaṃ helayābhimukho vidhiḥ // (124.2) Par.?

yad ihopasthite 'narthe siddho 'rtho 'śaṅkitaṃ mama / (125.1) Par.?

svajihvāṃ nindato jihvā caurī me patitā puraḥ // (125.2) Par.?

śaṅkayaiva prakāśante bata pracchannapātakāḥ / (126.1) Par.?

ityādy ākalayan so 'tra hṛṣṭo rātriṃ nināya tām // (126.2) Par.?

prāyaś cālīkavijñānayuktyā nītvā sa taṃ nṛpam / (127.1) Par.?

tatrodyāne nikhātasthaṃ prāpayāmāsa tad dhanam // (127.2) Par.?

cauraṃ cāpy apanītāṃśaṃ śaśaṃsa prapalāyitam / (128.1) Par.?

tatas tuṣṭo nṛpas tasmai grāmān dātuṃ pracakrame // (128.2) Par.?

kathaṃ syān mānuṣāgamyaṃ jñānaṃ śāstraṃ vinedṛśam / (129.1) Par.?

tan nūnaṃ caurasaṃketakṛteyaṃ dhūrtajīvikā // (129.2) Par.?

tasmād eṣo 'nyayā yuktyā vāram ekaṃ parīkṣyatām / (130.1) Par.?

deva jñānīti karṇe taṃ mantrī rājānam abhyadhāt // (130.2) Par.?

tato 'ntaḥkṣiptamaṇḍūkaṃ sapidhānaṃ navaṃ ghaṭam / (131.1) Par.?

svairam ānāyya rājā taṃ hariśarmāṇam abravīt // (131.2) Par.?

brahman yad asmin ghaṭake sthitaṃ jānāsi tad yadi / (132.1) Par.?

tad adya te kariṣyāmi pūjāṃ sumahatīm aham // (132.2) Par.?

tac chrutvā nāśakālaṃ taṃ matvā smṛtvā tato nijam / (133.1) Par.?

pitrā krīḍākṛtaṃ bālye maṇḍūka iti nāma saḥ // (133.2) Par.?

vidhātṛpreritaḥ kurvaṃs tenātra paridevanam / (134.1) Par.?

brāhmaṇo hariśarmātra sahasaivaivam abravīt // (134.2) Par.?

sādhor eva tu maṇḍūka tavākāṇḍe ghaṭo 'dhunā / (135.1) Par.?

avaśasya vināśāya saṃjāto 'yaṃ haṭhād iha // (135.2) Par.?

tac chrutvāho mahājñānī bheko 'pi vidito 'munā / (136.1) Par.?

iti jalpan nanandātra prastutārthānvayāj janaḥ // (136.2) Par.?

tatas tatprātibhajñānaṃ manvāno hariśarmaṇe / (137.1) Par.?

tuṣṭo rājā dadau grāmān sahemacchatravāhanān // (137.2) Par.?

kṣaṇāc ca hariśarmā sa jajñe sāmantasaṃnibhaḥ / (138.1) Par.?

itthaṃ daivena sādhyante sadarthāḥ śubhakarmaṇām // (138.2) Par.?

tat somadattaṃ sadṛśaṃ daivenaivābhisāritā / (139.1) Par.?

nivāryāsadṛśaṃ rājaṃs tava tejasvatī sutā // (139.2) Par.?

iti mantrimukhāc chrutvā tasmai rājasutāya tām / (140.1) Par.?

rājā vikramaseno 'tha dadau lakṣmīm ivātmajām // (140.2) Par.?

tataḥ śvaśurasainyena gatvā jitvā ripūṃś ca saḥ / (141.1) Par.?

somadattaḥ svarājyasthas tasthau bhāryāsakhaḥ sukham // (141.2) Par.?

evaṃ vidher bhavati sarvam idaṃ viśeṣāt tvām īdṛśīṃ ghaṭayituṃ ka iha kṣameta / (142.1) Par.?

vatseśvareṇa sadṛśena vinaiva daivaṃ kuryām ahaṃ sakhi kim atra kaliṅgasene // (142.2) Par.?

itthaṃ kathāṃ rahasi rājasutā niśamya somaprabhāvadanato 'tra kaliṅgasenā / (143.1) Par.?

tatprārthinī śithilabandhubhayatrapā sā vatseśasaṃgamasamutkamanā babhūva // (143.2) Par.?

athāstam upayāsyati tribhuvanaikadīpe ravau prabhātasamayāgamāvadhi kathaṃcid āmantrya tām / (144.1) Par.?

sakhīm abhimatodyamasthitamatiṃ khamārgeṇa sā mayāsurasutā yayau nijagṛhāya somaprabhā // (144.2) Par.?

Duration=0.54476189613342 secs.