Texts

Help

Select a text:
Bibliography

Select a chapter:
(no revisions)

Associated topic(s): Mahābhārata

Show parallels Show headlines
Use dependency labeler

Chapter id: 9723

Click on a sentence to show its analysis
Keep the mouse pointer over a lemma to show its meanings.

nārāyaṇaṃ namaskṛtya naraṃ caiva narottamam / (1.1) Par.?

devīṃ sarasvatīṃ vyāsaṃ tato jayamudīrayet // (1.2) Par.?

hate droṇe kurukṣetre punarabhyetya saṃjayaḥ / (2.1) Par.?

rājñe nyavedayadyuddhamāścaryaṃ karṇapārthayoḥ // (2.2) Par.?

tato duryodhanaḥ karṇaṃ cittasaṃkalpaśālinam / (3.1) Par.?

cakre drauṇigirā hṛṣṭaḥ śūraṃ senāsu nāyakam // (3.2) Par.?

abhiṣikto maṇimayaiḥ kalaśairyaśasāṃ nidhiḥ / (4.1) Par.?

manorathasudhāvarṣī so 'bhavatkurubhūpateḥ // (4.2) Par.?

vidhāya makaravyūhaṃ sthito vairikuleṣu saḥ / (5.1) Par.?

cakrire pāṇḍavā vyūhamardhacandramatandritam // (5.2) Par.?

tataḥ śastrāstrasaṃgharṣakīrṇavahnikaṇākule / (6.1) Par.?

ghore pravṛtte samare nirghoṣastumulo 'bhavat // (6.2) Par.?

bhīmo 'tha kuñjarārūḍho mattamātaṅgamāsthitam / (7.1) Par.?

caturdantaṃ jaghānograṃ kulūtanṛpatiṃ raṇe // (7.2) Par.?

tataḥ karṇāntanirmuktaiḥ karṇacāpacyutaiḥ śaraiḥ / (8.1) Par.?

nirbhinnāḥ kuñjarāḥ petuśchinnapakṣā ivācalāḥ // (8.2) Par.?

pārthasātyakipāñcāladraupadeyaśikhaṇḍinaḥ / (9.1) Par.?

kṛpadrauṇimukhaiścakruḥ paraṃ navamivāharam // (9.2) Par.?

pārthaḥ saṃśaptakānhatvā nināya bhrātarau nṛpau / (10.1) Par.?

daṇḍādhāraṃ sadaṇḍaṃ ca daṇḍādhārapuraṃ śaraiḥ // (10.2) Par.?

atha pāṇḍyaḥ kurucamūṃ dārayañjagatībhujām / (11.1) Par.?

bhallaiḥ śirāṃsi cicheda labdhalakṣyaḥ prahāriṇām // (11.2) Par.?

bhīṣmadroṇārjunaspardhāṃ darpajvarabhavāṃ nayaḥ / (12.1) Par.?

sahate nityamātmānaṃ manyamāno balādhikam // (12.2) Par.?

dakṣiṇāpathanāthena karṇāṭīsmitakīrtinā / (13.1) Par.?

lāṭīnetraśitāstreṇa tena bāṇairnipīḍitā // (13.2) Par.?

drauṇinā sūtaputreṇa saubalena kṛpeṇa ca / (14.1) Par.?

vāryamāṇāpi dudrāva kururājavarūthinī // (14.2) Par.?

tamabhyetya javāddrauṇirviśikhāśanivarṣiṇam / (15.1) Par.?

ayodhayadasaṃbhrānto jambhāririva śambaram // (15.2) Par.?

tasya līlāvatīlolalocanabhramarāmbujam / (16.1) Par.?

drauṇiḥ śiro jahārātha bhallenāndolikuṇḍalam // (16.2) Par.?

pāṇḍyasaṃjñe hate vīre mauliratne mahībhujām / (17.1) Par.?

pāṇḍusenā na śuśubhe śaśihīneva śarvarī // (17.2) Par.?

pāṇḍyavadhaḥ || 1 ||

tato gāḍhaniṣakteṣu śastravṛṣṭiṃ pibatsviva / (18.1) Par.?

āviṣṭeṣviva vīreṣu yudhi māneṣv avāritam // (18.2) Par.?

miśrībhūteṣu bhūpānāṃ ratheṣu ca gajeṣu ca / (19.1) Par.?

naṣṭālokeṣu lokeṣu vapurgāḍhena pāṃsunā // (19.2) Par.?

mleccharājaṃ mahānīkaṃ nakulaḥ krūrayodhinam / (20.1) Par.?

jaghāna rākṣasācāraṃ sarvāyudhaviśāradam // (20.2) Par.?

vimarde nibiḍe tasminnakulaṃ vadhagocaram / (21.1) Par.?

smarankuntīvacaḥ karṇo nāvadhītsatyavikramaḥ // (21.2) Par.?

tataḥ karṇamukhairvīraiḥ kīrṇāḥ pāñcālasṛñjayāḥ / (22.1) Par.?

na lebhire paritrāṇaṃ kuravaścārjunādibhiḥ // (22.2) Par.?

hatavīreṣu bhagneṣu chinnadhvajaratheṣu ca / (23.1) Par.?

gāḍhaviddhasravaddantighaṭāniṣpiṣṭapattiṣu // (23.2) Par.?

akāṇḍatāṇḍavāviddhakabandhākulavartmasu / (24.1) Par.?

viśālaśoṇitanadīmañjatkuñjaravājiṣu // (24.2) Par.?

hataśeṣeṣu sainyeṣu śrānteṣu kurupāṇḍavāḥ / (25.1) Par.?

avahāraṃ dināpāye cakruḥ śithilakārmukāḥ // (25.2) Par.?

prathamo yuddhadivasaḥ || 2 ||

atha prabhāte saṃnaddhe saṃnikṛṣṭe baladvaye / (26.1) Par.?

ūce duryodhanaṃ karṇaḥ pāṇḍusenāṃ vyalokayan // (26.2) Par.?

tvatprasādapraṇayino mānasya vibhavasya ca / (27.1) Par.?

adyāhamanṛṇo bhūtvā raṇe gacchāmi nirvṛtim // (27.2) Par.?

adya gāṇḍīvadhanvānaṃ hatvā sāraṃ bhavaddviṣām / (28.1) Par.?

saphalaṃ te karomyeṣa saṃkalpaṃ cirasaṃbhṛtam // (28.2) Par.?

nindyaṃ sarvātmanā loke satāṃ svaguṇakīrtanam / (29.1) Par.?

kiṃtu kartavyakāleṣu na praśaṃsanti mūkatām // (29.2) Par.?

ahamabhyadhikaḥ pārthādvidyayā vikrameṇa ca / (30.1) Par.?

etāvadadhikaṃ kṛṣṇo yadanargho 'sya sārathiḥ // (30.2) Par.?

kṛṣṇādabhyadhikaḥ śalyo viditaḥ sarvabhūbhujām / (31.1) Par.?

tena sārathinā jiṣṇuṃ vijetumahamutsahe // (31.2) Par.?

iti vaikartanenokte hṛṣṭo rājā suyodhanaḥ / (32.1) Par.?

tadevābhyetya vinayānmadrarājamabhāṣata // (32.2) Par.?

tato madrādhipaḥ kruddhaḥ saṃrambhalulitāṃśukaḥ / (33.1) Par.?

sāsūyaṃ vīkṣya rādheyaṃ kauravādhipamabhyadhāt // (33.2) Par.?

aho saralatā rājannavamānāya kevalam / (34.1) Par.?

yadahaṃ dīrghasaṃghābhyāṃ sārathye gaditastvayā // (34.2) Par.?

kimahaṃ pāṇḍavānsarvānhantuṃ śakto na saṃgare / (35.1) Par.?

nṛpaṃ māṃ sūtaputrasya sūtaṃ kartuṃ yadicchasi // (35.2) Par.?

uktveti sahasā śalye sānuge hantumudyate / (36.1) Par.?

prasādya taṃ kurupatirvaktuṃ samupacakrame // (36.2) Par.?

madrarāja na saṃrambhamasthāne kartumarhasi / (37.1) Par.?

adhikastvaṃ hi govindādato 'smābhirihārthyate // (37.2) Par.?

arjunādadhikaḥ kṛṣṇaḥ sārathirvihitaḥ paraiḥ / (38.1) Par.?

tvaṃ karṇādadhikastasmātsārathye mā haṭhaṃ kṛthāḥ // (38.2) Par.?

trailokyopaplave daityaiḥ prajāpativarorjitaiḥ / (39.1) Par.?

rājatāyasasauvarṇasvacchandapuravāsibhiḥ // (39.2) Par.?

vadhyamāneṣu lokeṣu devāḥ śakrapurogamāḥ / (40.1) Par.?

purā pinākinaṃ devaṃ śaṃkaraṃ śaraṇaṃ yayuḥ // (40.2) Par.?

viśvatrāṇāya viśveśastridaśairarthitastataḥ / (41.1) Par.?

sarvadevamayaṃ kṛtvā rathaṃ viṣṇuṃ ca sāyakam // (41.2) Par.?

uvāca devānsaṃnaddhaḥ sārathiḥ kalpyatāṃ mama / (42.1) Par.?

matprabhāvādhikaḥ kaścidyena hantāsmi dānavān // (42.2) Par.?

tataḥ śakramukhā devā vicārya suciraṃ dhiyā / (43.1) Par.?

brahmāṇaṃ viśvakartāraṃ sārathye paryakalpayan // (43.2) Par.?

tenoṅkārapratodena gṛhīte syandane haraḥ / (44.1) Par.?

ekībhūtānpure daityāndadāha viśikhāgninā // (44.2) Par.?

tripuravadhopākhyānam || 3 ||

iti rudrasya dhātāpi svayaṃ sūto 'bhavatpurā / (45.1) Par.?

tathā tvamapi karṇasya nāvajñāṃ kartumarhasi // (45.2) Par.?

aiśvaryasyābhijanyasya guṇānāṃ vikramasya ca / (46.1) Par.?

santaḥ phalaṃ hi manyante mitrapraṇayapūraṇam // (46.2) Par.?

ukte duryodhaneneti madrarājaḥ smitānanaḥ / (47.1) Par.?

svacchandavādī sūto 'haṃ bhaviṣyāmītyabhāṣata // (47.2) Par.?

śalyasārathyasvīkāraḥ || 4 ||

tataḥ svakalpitaiḥ śvetaisturaṅgairiva mātaliḥ / (48.1) Par.?

taptakāñcanasaṃnāhe karṇasya rucire rathe // (48.2) Par.?

jagrāha helayā śalyo raśmimālāṃ suśikṣitām / (49.1) Par.?

pratāpadhāmnaḥ sūryasya divīva garuḍāgrajaḥ // (49.2) Par.?

yuyutsuṃ karṇamālokya dhanvinaṃ śalyasārathim / (50.1) Par.?

jayaṃ hastagataṃ mene kururājaḥ sahānugaḥ // (50.2) Par.?

nadatsu kurusainyeṣu śaṅkhadundubhiniḥsvanaiḥ / (51.1) Par.?

maurvīmāsphālayankarṇo madrarājamabhāṣata // (51.2) Par.?

adya śakraḥ sutaṃ dṛṣṭvā mayā nihatamarjunam / (52.1) Par.?

divyāstreṣu dṛśaḥ śaṅke sāsūyaṃ kṣipati kṣaṇāt // (52.2) Par.?

adya madbāṇadalitaṃ pārthaṃ vīkṣya yudhiṣṭhiraḥ / (53.1) Par.?

bhīṣmadroṇavadhāyāsavaiphalyāt paritapyatām // (53.2) Par.?

iti bruvāṇaṃ rādheyaṃ karṇaṃ madrādhipo 'bravīt / (54.1) Par.?

mā sūtaputra mithyaiva pralāpaṃ śiśuvatkṛthāḥ // (54.2) Par.?

gandharvasamare pūrvaṃ tvayi dhīmati vidrute / (55.1) Par.?

yena trailokyavīreṇa kauravāḥ parirakṣitāḥ // (55.2) Par.?

mānināmāttaśastrāṇāṃ tasmingograhavigrahe / (56.1) Par.?

yuṣmadvidhānāṃ sahasā hṛtā yenāṃśukāvalī // (56.2) Par.?

ākhaṇḍalaḥ sānucaraḥ khāṇḍave yena nirjitaḥ / (57.1) Par.?

taṃ samutsahase jetuṃ karṇa karṇo 'si kiṃ na vā // (57.2) Par.?

iti śalyena sahasā śalyenevārdito muhuḥ / (58.1) Par.?

saṃstambhya kopaṃ rādheyo drakṣyasīti tamabhyadhāt // (58.2) Par.?

tato vyūheṣvanīkeṣu savyasāciraṇotsukaḥ / (59.1) Par.?

agresaro rathāgryāṇāṃ karṇaḥ papraccha sainikān // (59.2) Par.?

kvāsau jayadrathārātirvīro vānaraketanaḥ / (60.1) Par.?

taṃ vinā rabhasādete tāmyantyeva mameṣavaḥ // (60.2) Par.?

vidhatte locanapathaṃ mama yastūrṇamarjunam / (61.1) Par.?

dadāmi tasmai vāsāṃsi citrāṇyābharaṇāni ca // (61.2) Par.?

rathānsamattamātaṅgān gāḥ suvarṇaṃ purāṇi ca / (62.1) Par.?

kāntāśca vividhaṃ cānyaddraviṇaṃ yāvadicchati // (62.2) Par.?

etadākarṇya sotprāsaṃ babhāṣe madrabhūpatiḥ / (63.1) Par.?

hāso duḥkhāya jāyeta rādheya tvadviceṣṭitaiḥ // (63.2) Par.?

mumūrṣuriva niṣputro draviṇaṃ cirasaṃbhṛtam / (64.1) Par.?

avicāryaiva kiṃ mohātpareṣu tyaktumicchasi // (64.2) Par.?

svayamarjunamāyāntaṃ vaśaḥ sitasaṭābharam / (65.1) Par.?

draṣṭāsi bāṇanakharaiḥ kuraṅga iva kātaraḥ // (65.2) Par.?

śrutvaitatkupitaḥ karṇo jagāda bhrukuṭīmukhaḥ / (66.1) Par.?

nirguṇastvaṃ na jānīṣe na māṃ na ca dhanaṃjayam // (66.2) Par.?

ahamevārjunaṃ jāne pratimallaṃ pinākinaḥ / (67.1) Par.?

sa ca māṃ vetti tattvena tvaṃ mithyā tu pragalbhase // (67.2) Par.?

ayaṃ mitropadhiḥ śatruḥ kenāpi preṣito 'si naḥ / (68.1) Par.?

kudeśajasya vā naitattava kauṭilyamadbhutam // (68.2) Par.?

madrakāḥ kutsitācārāḥ satyaśīlārjavojjhitāḥ / (69.1) Par.?

mānaṃ pracakṣate loke sarvavedavido janāḥ // (69.2) Par.?

nirlajjāḥ sarvagāminyo lobhamohamadākulāḥ / (70.1) Par.?

anāryā madrikāyāstāḥ svasāro mātaraśca te // (70.2) Par.?

rādheyeneti saṃrambhādbhāṣito madrabhūpatiḥ / (71.1) Par.?

uvāca mūḍha bahuśo hitamuktaṃ na budhyase // (71.2) Par.?

smartāsi vigaladdarpo nirjitaḥ savyasācinā / (72.1) Par.?

hitopadeśavākyānāṃ śocannanuśayākulaḥ // (72.2) Par.?

samudrakūlanilayaḥ purā vaiśyo mahādhanaḥ / (73.1) Par.?

bahvapatyo 'bhavadrājñā rakṣito nirupadravaḥ // (73.2) Par.?

tatputrāṇāmabhūtkākaḥ satatocchiṣṭabhojanaḥ / (74.1) Par.?

puṣṭāṅgo yo dhanāḍhyānāṃ praṇayī putravatpriyaḥ // (74.2) Par.?

tataḥ kadācidāyātā haṃsā mānasagāminaḥ / (75.1) Par.?

so 'vadajjātasaṃgharṣastulyā yūyaṃ na me jave // (75.2) Par.?

jāne pātaśataṃ pūrṇaṃ viḍīnoḍḍīnabhedataḥ / (76.1) Par.?

jñāyate tulyapātānme yuṣmākaṃ ca tarasvitā // (76.2) Par.?

ityucchiṣṭabhujā tena rājahaṃsā vivalgitāḥ / (77.1) Par.?

āhūtā vihasanto 'ntarvīrā no kiṃcidūcire // (77.2) Par.?

ekastu haṃso jaladhau vrajāva iti saṃvidā / (78.1) Par.?

kākena sārdhaṃ śaravannipapāta smitānanaḥ // (78.2) Par.?

tena vātajavenābdhau vāyasaḥ khe vrajansamam / (79.1) Par.?

sa ca krośārdhamātre 'bhūddhastapakṣo 'tivihvalaḥ // (79.2) Par.?

tenaiva bhagnadarpo 'tha tīre nyastaḥ kṛpāvatā / (80.1) Par.?

raktaṣṭhīvī cirātprāpa saṃjñāṃ jñātakhagāntaraḥ // (80.2) Par.?

haṃsakākīyam || 5 ||

evaṃ tvamapi rādheya kauravaiḥ parivāritaḥ / (81.1) Par.?

arjunaṃ samare prāpya hīnadarpo bhaviṣyasi // (81.2) Par.?

śrutvaitanmadrarājena kathitaṃ marmadāraṇam / (82.1) Par.?

ūce vaikartano vīraḥ pṛthukopo 'pyavikriyaḥ // (82.2) Par.?

yuṣmadvidhānāṃ vacasā jāyate na bhayaṃ mama / (83.1) Par.?

paśyārjunaṃ mayā śalya samare vinipātitam // (83.2) Par.?

lakṣyābhyāse mayā vatsaḥ purā bāṇena dāritaḥ / (84.1) Par.?

pracchannastarukhaṇḍena homadhenordvijanmanaḥ // (84.2) Par.?

tacchāpādrathacakraṃ me paryantaṃ sādhayiṣyati / (85.1) Par.?

ityetacchidramekaṃ me durjayo 'hamato 'nyathā // (85.2) Par.?

tvaṃ tu kevalayānena nṛpeṇa vāhinā vṛtaḥ / (86.1) Par.?

mayā svayaṃ saṃnikarṣe dvijihvaḥ kuṭilo vṛtaḥ // (86.2) Par.?

madrakāṇāṃ kuvṛttānāṃ pāpadeśanivāsinām / (87.1) Par.?

tīrthācāravihīnānāmadhipo 'si kimucyate // (87.2) Par.?

abhakṣyaṃ bhuñjate nityam apātavyaṃ pibanti ye / (88.1) Par.?

agamyāsu ramante ca te madrāstava bāndhavāḥ // (88.2) Par.?

sarvasādhāraṇā yoṣāḥ sarvabhakṣyā dvijātayaḥ / (89.1) Par.?

sarvapātakasaṃpṛktā madrā yeṣu bhavānnṛpaḥ // (89.2) Par.?

madrakutsanam || 6 ||

iti karṇena gadite madrarājo 'pyabhāṣata / (90.1) Par.?

karṇa rājā tvamaṅgānāṃ mātulyatyāgapāpinām // (90.2) Par.?

vikrīyante sadā yatra dārāḥ putrāśca mānavaiḥ / (91.1) Par.?

tasminpraṇetā viṣaye naivaṃ me vaktumarhasi // (91.2) Par.?

aṅgakutsanam || 7 ||

ityukte madrarājena coditāste turaṅgamāḥ / (92.1) Par.?

dārayanta iva kṣoṇīṃ jātapakṣā ivodyayuḥ // (92.2) Par.?

athādṛśyata śubhrāśvo jiṣṇuracyutasārathiḥ / (93.1) Par.?

agre samagrasainyānāṃ vyagraḥ śatrunibarhaṇe // (93.2) Par.?

tataḥ pravṛtte vīrāṇāṃ samare prāṇahāriṇi / (94.1) Par.?

dhanuṣāṃ kūjatāṃ śabde chādite tūryaniḥsvanaiḥ // (94.2) Par.?

uvāca śalyo rādheyaṃ dhanaṃjayaraṇotsukam / (95.1) Par.?

paśya gāṇḍīvadhanvānaṃ bhindānaṃ kuruvāhinīm // (95.2) Par.?

ete saṃśaptakāḥ pārthaśaraśreṇīśatārditāḥ / (96.1) Par.?

hatadvipaghaṭākūṭakuṭīṣu nibhṛtaṃ sthitāḥ // (96.2) Par.?

paśyārjunaśarotkṛttakaṇṭhānāṃ mauktikāvalī / (97.1) Par.?

patitā bhūmipālānāmaśrumālā iva śriyaḥ // (97.2) Par.?

iti madrādhipenokte kva yāsyati dhanaṃjayaḥ / (98.1) Par.?

madbāṇagocaraṃ yāto harṣādityavadannṛpaḥ // (98.2) Par.?

tato vaikartanaśaraiḥ pūrite bhuvanodare / (99.1) Par.?

cakampe pāṇḍavānīkaṃ vātairiva mahadvanam // (99.2) Par.?

dhṛṣṭadyumnamukhānvīrānkurvāṇo virathānmuhuḥ / (100.1) Par.?

ayutāni kṣaṇātkarṇo vīrāṇāmavadhīddaśa // (100.2) Par.?

cedimāgadhapāñcālasainye bhagne yudhiṣṭhiraḥ / (101.1) Par.?

mahārathairanugataḥ svayaṃ rādheyamādravat // (101.2) Par.?

rājavallabha vāgyuddhaṃ nedaṃ yatra pragalbhase / (102.1) Par.?

ityuktvā dharmatanayaḥ śaraiḥ karṇamapūrayat // (102.2) Par.?

atha karṇo narapateścakrarakṣau mahārathau / (103.1) Par.?

hatvā śarairunmamātha dhvajaṃ cāpaṃ cakarta ca // (103.2) Par.?

tataḥ śaktiṃ niśātāgrāṃ kāladaṃṣṭrāmivotkaṭām / (104.1) Par.?

prāhiṇotsūtavṛtrāya sa nirhrādāṃ yudhiṣṭhiraḥ // (104.2) Par.?

bhittvā vaikartanaḥ śaktiṃ tāṃ ghaṇṭākrandinīṃ muhuḥ / (105.1) Par.?

jātarūpamayaṃ varma cakarta nṛpateḥ śaraiḥ // (105.2) Par.?

muhūrtaṃ taṃ samāpūrya chinnavarmāṇamāśugaiḥ / (106.1) Par.?

dantavarṇāñjaghānāsya kṛṣṇavālāṃsturaṅgamān // (106.2) Par.?

vidrutaṃ dharmatanayaṃ dṛṣṭvā krodhī vṛkodaraḥ / (107.1) Par.?

karṇaṃ parāṅmukhaṃ cakre śarairaśanidāruṇaiḥ // (107.2) Par.?

duryodhanānujānvīrānāyātānbhrāturajñayā / (108.1) Par.?

vidadhe vipulairbāṇairbhīmaḥ pretapurāśrayān // (108.2) Par.?

nandopanandau durdharṣaṃ dhanurgrāhaṃ mahābhujam / (109.1) Par.?

jarāsaṃdhaṃ śrutarvāṇaṃ durdinaṃ saniṣaṅgiṇam // (109.2) Par.?

pāśahastaṃ kavacinaṃ krodhaṃ ca sa mahābhujam / (110.1) Par.?

hatvā praviśya pṛtanāṃ nāgānīkamapothayat // (110.2) Par.?

tataḥ sātyakipāñcālamādrīsutayudhiṣṭhirāḥ / (111.1) Par.?

ayodhayankarṇamukhyāṃstasminsubhaṭasaṃkṣaye // (111.2) Par.?

vṛṣasenamukhairvīrairbhidyamāne balārṇave / (112.1) Par.?

udabhūccaṇḍagāṇḍīvadhvanirāghaṭṭitāmbaraḥ // (112.2) Par.?

hatvā saṃśaptakānsarvānpratyāvṛtte dhanaṃjaye / (113.1) Par.?

āvartanartitevābhūtsahasā kuruvāhinī // (113.2) Par.?

bhagne suśarmapramukhe pārthāstrairnṛpamaṇḍale / (114.1) Par.?

karṇaḥ pāṇḍavasainyeṣu kālalīlāyitaṃ vyadhāt // (114.2) Par.?

ayutāni gajendrāṇāṃ sapta hatvā tarasvinām / (115.1) Par.?

tāvantyeva rathānāṃ ca cakre bhūmibhujāṃ kṣayam // (115.2) Par.?

vyāghraketuṃ jayaṃ śaṅkuṃ rudramugrāyudhaṃ param / (116.1) Par.?

siṃhasenaṃ rocamānaṃ śuktaṃ citrāyudhaṃ harim // (116.2) Par.?

devāpiṃ jiṣṇukarmāṇaṃ śalabhaṃ citradaṇḍakau / (117.1) Par.?

anyāṃśca bhūmipānhatvā pāñcālakadanaṃ vyadhāt // (117.2) Par.?

vadhyamāne 'tha karṇena vidīrṇe ca sahasradhā / (118.1) Par.?

babhūva pāṇḍave sainye ghoro vyatikaro navaḥ // (118.2) Par.?

karṇena droṇaputreṇa kṛpeṇa kṛtavarmaṇā / (119.1) Par.?

kirīṭinā pārṣatena śaineyena śikhaṇḍinā // (119.2) Par.?

kupitena ca bhīmena te sene pravidārite / (120.1) Par.?

babhūvaturviprakīrṇe vidhvastakavacāyudhe // (120.2) Par.?

divyāstravarṣiṇaṃ drauṇiṃ divyāstreṇaiva phalguṇaḥ / (121.1) Par.?

jitvā dadarśa karṇena vadhyamānānmahārathān // (121.2) Par.?

tamabravīnmadhuripurvismitaḥ karṇavikramāt / (122.1) Par.?

paśya kaunteya karṇāstravahnidagdhāṃ varūthinīm // (122.2) Par.?

paśya kālakaṭākṣeṇa lakṣitaḥ sūtanandanaḥ / (123.1) Par.?

kaṭākṣeṇa madādhmātaḥ sārathye māṃ yadaikṣata // (123.2) Par.?

kṣaṇena nikhilāṃ syūtāṃ tāṃ senāṃ kurute nṛpaḥ / (124.1) Par.?

paśyāsya śarajālena nīrandhreṇāvṛtā diśaḥ // (124.2) Par.?

ityuktvā keśavastūrṇaṃ rathena ghananādinā / (125.1) Par.?

nināya śakratanayaṃ bhīmasenarathāntikam // (125.2) Par.?

tato bhīmagirā dhyātvā dharmarājaṃ dhanaṃjayaḥ / (126.1) Par.?

karṇasāyakanirbhinnaṃ prayātaṃ śibiraṃ śanaiḥ // (126.2) Par.?

niḥśvasanbhṛśasaṃtaptaḥ kesarīva talāhataḥ / (127.1) Par.?

prayayau bhrātaraṃ draṣṭuṃ saha kāliyavidviṣā // (127.2) Par.?

sa hemapuṅkhairnirbhinnaṃ karṇanāmāṅkitaiḥ śaraiḥ / (128.1) Par.?

śayānaṃ dharmatanayaṃ dadarśa chinnakaṅkaṭam // (128.2) Par.?

tasyābhivādya caraṇau niṣaṇṇau keśavārjunau / (129.1) Par.?

cintāsaṃtāpitatanū tasthatuḥ kṣaṇamākulau // (129.2) Par.?

yudhiṣṭhirastaṃ vijñāya karṇaṃ hatvā samāgatam / (130.1) Par.?

utthāya nirvyatho harṣājjayād apṛthuvismayaḥ // (130.2) Par.?

prāyo niḥśeṣitāḥ senā yenāstradahanena naḥ / (131.1) Par.?

sa diṣṭyā samare pārtha tvayā karṇo nipātitaḥ // (131.2) Par.?

vīrāḥ sa vidviṣāṃ hantā dhaureyaḥ sarvadhanvinām / (132.1) Par.?

rāmaśiṣyastvayā brūhi kathaṃ vaikartano hataḥ // (132.2) Par.?

iti pṛṣṭo nṛpatinā babhāṣe śvetavāhanaḥ / (133.1) Par.?

yudhyamānasya suciraṃ drauṇinā rudratejasā // (133.2) Par.?

saṃśaptakaiśca vighno 'bhūnmama karṇanipātane / (134.1) Par.?

bhīmasenamavasthāpya pratyanīke mahābhujam // (134.2) Par.?

prahāravikṣataṃ deva tvāmahaṃ draṣṭumāgataḥ / (135.1) Par.?

adhunā tvadanujñātaḥ kauravāṇāṃ parāyaṇam // (135.2) Par.?

kathāśeṣaṃ karomyeṣa karṇaṃ karṇāyataiḥ śaraiḥ / (136.1) Par.?

iti bruvāṇaṃ bībhatsuṃ moghasaṃkalpaduḥkhitaḥ // (136.2) Par.?

uvāca sāyakākīrṇaḥ kopatapto yudhiṣṭhiraḥ / (137.1) Par.?

bhāraṃ vinyasya vipulaṃ bhīmasene dhanurdharaḥ // (137.2) Par.?

apayāto 'si karṇasya satyaṃ dṛṣṭvā parākramam / (138.1) Par.?

mithyaiva kuntyā garbhe tvaṃ kṣatriyavyañjano dhṛtaḥ // (138.2) Par.?

pūrakaḥ putrasaṃkhyāyāṃ bāṇastṛṇamayo yathā / (139.1) Par.?

trayodaśa samāste te saṃkalpā vihitāstvayi // (139.2) Par.?

sarve prayātā vaiphalyamupakārā ivādhame / (140.1) Par.?

ka eva nāma jānīte karṇādbhīto dhanaṃjayaḥ // (140.2) Par.?

apayāsyati saṃgrāmādyo varteta tathā vidhim / (141.1) Par.?

etatprayaccha kasmaicidgāṇḍīvaṃ śauryaśāline // (141.2) Par.?

samare karṇasaṃtrāsaṃ yo 'smākamapaneṣyati / (142.1) Par.?

etadākarṇya bībhatsurmarmaṇīva samāhataḥ // (142.2) Par.?

etadgirā dadau khaḍge kruddhaḥ sāśrulavā dṛśaḥ / (143.1) Par.?

taṃ kopasaṃkaṭo ghore duḥkhāgnau ca nirantare // (143.2) Par.?

patitaṃ vīkṣya govindaḥ sarvavyāpī tamabhyadhāt / (144.1) Par.?

jāne te hṛdgataṃ pārtha yena dolāyase muhuḥ // (144.2) Par.?

gāṇḍīvaṃ vitarānyasmai tvāṃ brūyādyaḥ sa te dhruvam / (145.1) Par.?

vadhya ityucitācāra pratijñā tava viśrutā // (145.2) Par.?

tadarthamasi kopāndho nihantuṃ kiṃ svid agrajam / (146.1) Par.?

ātmānaṃ vā vratabhraṃśabhayātkhaḍgaṃ nirīkṣase // (146.2) Par.?

śrūyatāmatra satyena kevalena vimuhyase / (147.1) Par.?

dharmādharmau na jānīṣe satyamātradṛḍhavrataḥ // (147.2) Par.?

asatyaṃ dharmatāṃ yāti satyamāyātyadharmatām / (148.1) Par.?

kadācitkarmabhedena tadvicāryaṃ dhiyā budhaiḥ // (148.2) Par.?

dharmo 'pi gahanaḥ sūkṣmo jñāyate na yathā tathā / (149.1) Par.?

purā babhūva vipine balāko nāma lubdhakaḥ // (149.2) Par.?

ghorasattvaṃ kadācitsa gobrāhmaṇagaṇāntakam / (150.1) Par.?

hatvā śareṇa sahasā śakralokamavāptavān // (150.2) Par.?

kauśiko nāma vipraḥ prāksatyavākyakṛtavrataḥ / (151.1) Par.?

vidrutāndhanikānpṛṣṭo dasyubhiḥ kva gatā iti // (151.2) Par.?

adarśayatsatyavādī sa tānguṇadayāśrayān / (152.1) Par.?

dṛṣṭāṃśca dasyavo jaghnustūrṇaṃ tāndraviṇāśayā // (152.2) Par.?

kauśiko 'pyatha kālena patito narakaṃ yayau / (153.1) Par.?

ityevaṃ gahanā pārtha pravṛttiḥ satyadharmayoḥ // (153.2) Par.?

tasmāttvamagraje rājñi dharmaniṣṭhe yudhiṣṭhire / (154.1) Par.?

mohādasāṃprataṃ kiṃcinna cintayitumarhasi // (154.2) Par.?

śrutvaitatkhaḍgamākṛṣya hantumātmānamudyatam / (155.1) Par.?

pratijñābhaṅganirbhinnaṃ pārthaṃ kṛṣṇo 'bravītpunaḥ // (155.2) Par.?

avamānena nihato gururbhavati sarvathā / (156.1) Par.?

bhavatyātmā ca nihataḥ ślāghayā gurusaṃsadi // (156.2) Par.?

rakṣanpratijñāmajñānaṃ nirasya krodhasaṃbhavam / (157.1) Par.?

tasmādetadvadhāyādya nivṛtto bhava phalguṇa // (157.2) Par.?

ityuktavati dāśārhe tathetyuktvā dhanaṃjayaḥ / (158.1) Par.?

bhīruḥ pramādī krūrastvamityuvāca yudhiṣṭhiram // (158.2) Par.?

mayaikena hatāḥ sarve saṃhatā daityadānavāḥ / (159.1) Par.?

dhuryo 'haṃ kārmukabhṛtāmityātmānamuvāca ca // (159.2) Par.?

tato dharmasutaṃ duḥkhātkānanaṃ gantumudyatam / (160.1) Par.?

yatnātprasādayāmāsa gṛhītvā caraṇau hariḥ // (160.2) Par.?

pārthaṃ ca pādapatitaṃ sāśrunetraṃ yudhiṣṭhiraḥ / (161.1) Par.?

rurodha gāḍhamāliṅgya vigalanmanyuviplavaḥ // (161.2) Par.?

kṛtaśaucau tato vīrau dharmarājadhanaṃjayau / (162.1) Par.?

rathāvāruhya saṃnaddhau jagmatuḥ samarāṅgaṇam // (162.2) Par.?

athārjunaśaravrātakṛttavaktrairnareśvaraiḥ / (163.1) Par.?

kṣaṇaṃ babhūva patitaiḥ sā kabandhamayīva bhūḥ // (163.2) Par.?

atrāntare bhīmaseno hatvā duryodhanānujān / (164.1) Par.?

duḥśāsanaṃ yudhyamānamāsasādebhavikramam // (164.2) Par.?

niṣpiṣya gadayā tasya rathaṃ sāśvāyudhadhvajam / (165.1) Par.?

ācakarṣa raṇe dhvastaṃ taṃ hiḍimbāpatirbalāt // (165.2) Par.?

priyāparibhavaṃ ghoraṃ smarannatha vṛkodaraḥ / (166.1) Par.?

prakoparākṣasāviṣṭaḥ koṣṇaṃ śoṇitamāpapau // (166.2) Par.?

ghoraṃ tatkarma bhīmasya dṛṣṭvā srastāsikārmukāḥ / (167.1) Par.?

trastā mahārathāḥ sarve mīlitākṣāścakampire // (167.2) Par.?

asṛkprasaragarvitaḥ pulakadaṇḍagaṇḍānano madādativiśṛṅkhalaḥ skhalitapādacārakramaḥ / (168.1) Par.?

babhau bhayadavibhramabhramitabhīmabhāsvadgadaḥ priyācikurasaṃyamodyatamatiḥ samīrātmajaḥ // (168.2) Par.?

apūrveṇaiva vidhinā hate duḥśāsane tathā / (169.1) Par.?

mahatāmapi bhūtānāmabhūtkaṇṭakitā tanuḥ // (169.2) Par.?

duḥśāsanavadhaḥ || 8 ||

atrāntare pāṇḍavānāṃ vṛṣasenaśarārdite / (170.1) Par.?

sainye babhūva nirghoṣaḥ patatāṃ gajavājinām // (170.2) Par.?

saṃhatā api bhūpālā bhīmasātyakirakṣitāḥ / (171.1) Par.?

na sehire raṇe dīptaṃ karṇasūnoḥ parākramam // (171.2) Par.?

sa sātyakiṃ bhīmasenaṃ mādrīputrau kirīṭinam / (172.1) Par.?

dhṛṣṭadyumnaṃ nṛpāṃścānyānvīrastulyamayodhayat // (172.2) Par.?

āścaryayodhinastasya smayamāna ivārjunaḥ / (173.1) Par.?

bhujau śiraśca cicheda kamalākamalopamam // (173.2) Par.?

vṛṣasenavadhaḥ || 9 ||

vṛṣasene hate karṇaḥ puro gāṇḍīvadhanvanā / (174.1) Par.?

sasmāra sāśrunayanaḥ saubhadraṃ bahubhirhatam // (174.2) Par.?

athāmarṣājyasiktena bhrukuṭīdhūmaketunā / (175.1) Par.?

krodhāgninā dahyamānaḥ karṇo 'dhāvaddhanaṃjayam // (175.2) Par.?

manorathaśatābhyaste pravṛtte samare tayoḥ / (176.1) Par.?

babhūva kautukāyātasurasiddhākulaṃ nabhaḥ // (176.2) Par.?

karṇārjunaraṇe tasminsvaputrajayaśaṃsinoḥ / (177.1) Par.?

jāte vivāde sahasā divi sūryasurendrayoḥ // (177.2) Par.?

pṛṣṭo dvidhā sthitairdevairvṛṣāṅkakamalodbhavau / (178.1) Par.?

kṛṣṇo yatra jayastatretyūcaturniścitaṃ purā // (178.2) Par.?

atha gambhīranirghoṣau śaṅkhau karṇakirīṭinau / (179.1) Par.?

dadhmatuḥ śauriśalyau ca yaiścakampe jagattrayī // (179.2) Par.?

tato dhavalapakṣāgrāḥ svayaśobhirivāṅkitāḥ / (180.1) Par.?

vaikartanaḥ pāṇḍavāya prāhiṇodviśikhāvalīḥ // (180.2) Par.?

pārthadhvajenābhihataḥ karṇaketurakampata / (181.1) Par.?

kṛṣṇasya dṛktribhāgaśca śalyaṃ śalyamivāviśat // (181.2) Par.?

athārjunaśarairdikṣu pūryamāṇāsu saṃtatam / (182.1) Par.?

bāṇapātamatikramya tasthuḥ kauravasainikāḥ // (182.2) Par.?

duryodhanaprayuktānāṃ rādheyaratharakṣiṇām / (183.1) Par.?

mahārathānāṃ vaktrāṇi jahārātha kapidhvajaḥ // (183.2) Par.?

asaṃbhrāntastataḥ karṇo muṣṭimūle kirīṭinaḥ / (184.1) Par.?

prayujyamānamasakṛccicheda śaramaṇḍalam // (184.2) Par.?

tato bhīmo 'bravītpārthamacyutaścātivismitaḥ / (185.1) Par.?

durjayaḥ samare karṇaḥ sthiro yudhyasva phalguṇa // (185.2) Par.?

kairāte khāṇḍave vīra kālakeyavadhe 'pi vā / (186.1) Par.?

yo 'bhavattava saṃrambho gṛhāṇābhyadhikaṃ tataḥ // (186.2) Par.?

etadākarṇya vijayo vellanmukharakaṅkaṇaḥ / (187.1) Par.?

gāḍhamākṛṣya gāṇḍīvaṃ divyāstrair dyām apūrayat // (187.2) Par.?

bhārgavāstreṇa hatvā tāmastravṛṣṭiṃ kirīṭinaḥ / (188.1) Par.?

taṃ ca bhīmaṃ ca kṛṣṇaṃ ca karṇo bāṇairapūrayat // (188.2) Par.?

tataḥ karṇaśarāsārairarjunāstraiśca sarvataḥ / (189.1) Par.?

pāṇḍukauravasenāsu babhūva vipulaḥ kṣayaḥ // (189.2) Par.?

atha sarpamukhaṃ dīptaṃ kīrṇacandanaśālinam / (190.1) Par.?

astraṃ karṇo mahābhogaṃ prāhiṇotsavyasācinaḥ // (190.2) Par.?

visṛṣṭe bhujage tasminśalyo 'ṅgapatimabhyadhāt / (191.1) Par.?

nāyaṃ prāpnoti pārthasya kaṇṭhaṃ nāgastvayeritaḥ // (191.2) Par.?

punaḥ saṃdhānayogyaste rādheya yadi manyase / (192.1) Par.?

akarṇo 'syatha vā karṇahitavākyeṣu sarvadā // (192.2) Par.?

iti tejovadhāyoktaḥ śalyena tapanātmajaḥ / (193.1) Par.?

uvāca dvirna saṃdhatte karṇa ityamalāśayaḥ // (193.2) Par.?

karṇacyutaṃ mahāghoramāpatantaṃ viṣolbaṇam / (194.1) Par.?

vyālaṃ dṛṣṭvā hariścakre vapurmandaragauravam // (194.2) Par.?

jānubhirvasudhāṃ yāte tato hayacatuṣṭaye / (195.1) Par.?

phaṇī jagrāha namrasya kirīṭāgraṃ kirīṭinaḥ // (195.2) Par.?

kirīṭakhaṇḍe patite muktāratnāṭṭahāsini / (196.1) Par.?

so 'viśadvasudhāṃ sarpo vipralabdho viniḥśvasan // (196.2) Par.?

tataḥ kṛṣṇārjunau vidhyankāladaṇḍopamaiḥ śaraiḥ / (197.1) Par.?

karṇaḥ karṇāyatotsṛṣṭairunnanāda hasanmuhuḥ // (197.2) Par.?

atha śakrasutaḥ kopāddivyaratnavirājitam / (198.1) Par.?

varma cicheda karṇasya śaraiścāpūrayadvapuḥ // (198.2) Par.?

khāṇḍave kṛtavairaṃ taṃ khaṃ vrajantaṃ mahoragam / (199.1) Par.?

chittvā ṣaḍbhiḥ śaraiḥ pārthaḥ karṇaṃ punaratāḍayat // (199.2) Par.?

vaikartanena nihate brahmāstre śākramarjunaḥ / (200.1) Par.?

prāduścakre vighātāya vajrāśaniśatākulam // (200.2) Par.?

hatvā tamastraṃ rādheyo jyāṃ cicheda kirīṭinaḥ / (201.1) Par.?

kṣaṇādabhinavāṃ maurvīṃ vidadhe ca dhanaṃjayaḥ // (201.2) Par.?

tato raudraṃ sphurajjvālājaṭālaṃ saṃdadhe 'rjunaḥ / (202.1) Par.?

astraṃ yenābhavadvyoma ghoradigdāhabhīṣaṇam // (202.2) Par.?

atrāntare mahī svayaṃ rathacakraṃ vidhervaśāt / (203.1) Par.?

jagrāha samaye tasmin aṅgarājasya saṃgare // (203.2) Par.?

tatastaccakramuddhartumudyato viṣamasthitaḥ / (204.1) Par.?

uvāca karṇaḥ kaunteyaṃ muhūrtaṃ kṣamatāṃ bhavān // (204.2) Par.?

uddhṛte 'sminmayā cakre mahāstraṃ muñca phalguṇa / (205.1) Par.?

vyasanasthe viśastre ca nahi śūrā bhavādṛśaḥ // (205.2) Par.?

etacchrutvāvadatkarṇaṃ hasankāliyasūdanaḥ / (206.1) Par.?

diṣṭyādya karṇa jānīṣe dharmaṃ vīravrate sthitaḥ // (206.2) Par.?

bahubhirnihato bālaḥ saubhadraḥ kiṃ nu vismṛtaḥ / (207.1) Par.?

gaṇyatāṃ tacca yatkṛṣṇāṃ sabhāyāmuktavānasi // (207.2) Par.?

viṣavahnipradāneṣu chinnadharmaḥ smṛtastvayā / (208.1) Par.?

nūnaṃ vipadi nīcānāṃ nṛpāṇāṃ dharmavṛttayaḥ // (208.2) Par.?

ukte janārdaneneti manyunā prajvalanniva / (209.1) Par.?

brahmāstraṃ karṇavihitaṃ brāhmeṇa vijayo 'vadhīt // (209.2) Par.?

āgneyamarjunotsṛṣṭaṃ vāruṇenāṅgabhūpatiḥ / (210.1) Par.?

astreṇāstraṃ samāhṛtya grastacakro vyalambata // (210.2) Par.?

athonmamātha bāṇena dhvajaṃ kanakabhāsvaram / (211.1) Par.?

karṇasyākhaṇḍalasuto manorathamivonnatam // (211.2) Par.?

tato 'ñjalikamādāya śaraṃ kāñcanabhūṣitam / (212.1) Par.?

abhimantrya samākṛṣya mṛtyudaṃṣṭrāsitānanam // (212.2) Par.?

rudrādayo 'straguravastuṣṭā me tapasā yadi / (213.1) Par.?

tadanena ripuṃ hanyāmityuktvāsṛjadarjunaḥ // (213.2) Par.?

nirbhinnastena sahasā kaṇṭhe hārapariṣkṛte / (214.1) Par.?

rādheyaḥ krakacotkṛttahematāla ivāpatat // (214.2) Par.?

hate dhanuṣmatāṃ dhurye kauravānīkanāyake / (215.1) Par.?

karṇe drutaṃ yayau śalyaḥ śalyayanhṛdayānanam // (215.2) Par.?

prāptaṃ rathena śūnyena dṛṣṭvā madranareśvaram / (216.1) Par.?

hato duryodhanaḥ karṇo jīvatītyūcire nṛpāḥ // (216.2) Par.?

duryodhano 'rjunaśarairaṅgarāje nipātite / (217.1) Par.?

uttamāṅga ivājñāsīnna kiṃcidvihatendriyaḥ // (217.2) Par.?

tejastatastaraladīdhitikarṇadehādabhyudgataṃ taraṇimaṇḍalamāviveśa / (218.1) Par.?

yenāvakāśaviśarāruvimānamāsījjvālākalāpajaṭilaṃ kṣaṇamantarikṣam // (218.2) Par.?

Duration=0.72737908363342 secs.