Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17494

Click on a sentence to show its analysis
Keep the mouse pointer over a lemma to show its meanings.

tataḥ somaprabhā prātas tadvinodopapādinīm / (1.1) Par.?

nyastadārumayānekamāyāsadyantraputrikām // (1.2) Par.?

karaṇḍināṃ samādāya sā nabhastalacāriṇī / (2.1) Par.?

tasyāḥ kaliṅgasenāyā nikaṭaṃ punar āyayau // (2.2) Par.?

kaliṅgasenāpy ālokya tām ānandāśrunirbharā / (3.1) Par.?

utthāya kaṇṭhe jagrāha pārśvāsīnām uvāca ca // (3.2) Par.?

tvadīyamukhapūrṇendudarśanena vinā sakhi / (4.1) Par.?

tamomayī triyāmādya śatayāmeva me gatā // (4.2) Par.?

tajjanmāntarasaṃbandhaḥ kīdṛśaḥ syāt tvayā mama / (5.1) Par.?

yasyāyaṃ pariṇāmo 'dya tvaṃ devī vetsi ced vada // (5.2) Par.?

tac chrutvā rājaputrīṃ tām evaṃ somaprabhābravīt / (6.1) Par.?

īdṛṅ me nāsti vijñānaṃ na hi jātiṃ smarāmy aham // (6.2) Par.?

na cātra munayo 'bhijñāḥ kecit tu yadi jānate / (7.1) Par.?

taiḥ kṛtaṃ tādṛśaṃ pūrvaṃ paratattvavidaś ca te // (7.2) Par.?

evam uktavatīṃ bhūyaḥ premaviśrambhapeśalam / (8.1) Par.?

kaliṅgasenā papraccha vijane tāṃ sakautukā // (8.2) Par.?

brūhi me sakhi kasyeha devajāteḥ pitus tvayā / (9.1) Par.?

janmanālaṃkṛto vaṃśo muktayeva suvṛttayā // (9.2) Par.?

jagatkarṇāmṛtaṃ kiṃ ca tava nāma sulakṣaṇe / (10.1) Par.?

karaṇḍikā kimartheyam asyām asti ca vastu kim // (10.2) Par.?

evaṃ kaliṅgasenāyāḥ śrutvā sapraṇayaṃ vacaḥ / (11.1) Par.?

somaprabhā sā sarvaṃ tat kramād vaktuṃ pracakrame // (11.2) Par.?

asti trijagati khyāto mayo nāma mahāsuraḥ / (12.1) Par.?

āsuraṃ bhāvam utsṛjya śauriṃ sa śaraṇaṃ śritaḥ // (12.2) Par.?

tena dattābhayaś cakre sa ca vajrabhṛtaḥ sabhām / (13.1) Par.?

daityāś ca devapakṣo 'yam iti taṃ prati cukrudhuḥ // (13.2) Par.?

tadbhayāt tena vindhyādrau māyāvivaramandiram / (14.1) Par.?

agamyam asurendrāṇāṃ bahvāścaryamayaṃ kṛtam // (14.2) Par.?

tasyāvāṃ dve duhitarau mayasya brahmacāriṇī / (15.1) Par.?

jyeṣṭhā svayaṃprabhā nāma kumārī tadgṛhasthitā // (15.2) Par.?

ahaṃ somaprabhā nāma kaniṣṭhā sā tv ahaṃ sakhi / (16.1) Par.?

nalakūbarasaṃjñāya dattā dhanadasūnave // (16.2) Par.?

pitrā ca śikṣitāsmīha māyāyantrāṇy anekadhā / (17.1) Par.?

tvatprītyā ceyam ānītā pūrṇā tava karaṇḍikā // (17.2) Par.?

ity uktvādarśayat tasyāḥ prodghāṭya bahukautukāḥ / (18.1) Par.?

somaprabhā kāṣṭhamayīḥ svamāyāyantraputrikāḥ // (18.2) Par.?

kīlikāhatimātreṇa kācid gatvā vihāyasā / (19.1) Par.?

tadājñayā puṣpamālām ādāya drutam āyayau // (19.2) Par.?

kācit tathaiva pānīyam ānināya yadṛcchayā / (20.1) Par.?

kācinnanarta kācic ca kathālāpam athākarot // (20.2) Par.?

ityādibhir mahāścaryaiḥ kaṃcit kālaṃ vinodya tām / (21.1) Par.?

surakṣitāṃ sthāpayitvā tāṃ ca yantrakaraṇḍikām // (21.2) Par.?

kaliṅgasenām āmantrya sotkāṃ somaprabhā tataḥ / (22.1) Par.?

yayau bhartṛparāyattā nabhasā nijamandiram // (22.2) Par.?

kaliṅgasenāpy āścaryadarśanadhvastayā kṣudhā / (23.1) Par.?

prahṛṣṭā tad ahas tasthau sarvāhāraparāṅmukhī // (23.2) Par.?

tad dṛṣṭvā ca tatas tasyā jananī rogaśaṅkinī / (24.1) Par.?

ānandākhyena bhiṣajā nirūpyāvikaloditā // (24.2) Par.?

kuto 'pi hetor harṣeṇa naṣṭāsyāḥ kṣun na rogataḥ / (25.1) Par.?

utphullanetraṃ vakty etad asyā hasad ivānanam // (25.2) Par.?

ity uktā bhiṣajā harṣahetuṃ tajjananī ca sā / (26.1) Par.?

papraccha tāṃ yathāvṛttaṃ sāpi tasyai tad abravīt // (26.2) Par.?

tataḥ ślāghyasakhī saṅgahṛṣṭāṃ matvābhinandya ca / (27.1) Par.?

āhāraṃ kārayāmāsa jananī tāṃ yathocitam // (27.2) Par.?

athānyedyur upāgatya viditārthā krameṇa sā / (28.1) Par.?

kaliṅgasenāṃ tām eva rahaḥ somaprabhābhyadhāt // (28.2) Par.?

mayā tvatsakhyam āvedya tvatpārśvāgamane 'nvaham / (29.1) Par.?

anujñā jñānino bhartur gṛhītā viditārthataḥ // (29.2) Par.?

tasmāt tvam apy anujñātā pitṛbhyāṃ bhava sāṃpratam / (30.1) Par.?

yena svairaṃ mayā sākaṃ niḥśaṅkā vihariṣyasi // (30.2) Par.?

evam uktavatīṃ haste tāṃ gṛhītvaiva tatkṣaṇam / (31.1) Par.?

kaliṅgasenā svapitur mātuś ca nikaṭaṃ yayau // (31.2) Par.?

tatra nāmānvayākhyānapūrvaṃ caitām adarśayat / (32.1) Par.?

pitre kaliṅgadattāya rājñe somaprabhāṃ sakhīm // (32.2) Par.?

mātre ca tārādattāyai tathaivaitām adarśayat / (33.1) Par.?

tau ca dṛṣṭvā yathākhyānam enām abhinanandatuḥ // (33.2) Par.?

ūcatuś cākṛtiprītau daṃpatī tāv ubhau tataḥ / (34.1) Par.?

satkṛtya duhitṛsnehāt tāṃ mahāsurasundarīm // (34.2) Par.?

vatse kaliṅgaseneyaṃ haste tava samarpitā / (35.1) Par.?

tad idānīṃ yathākāmam ubhe viharatāṃ yuvām // (35.2) Par.?

etat tayor vaco dve cāpy abhinandya nirīyatuḥ / (36.1) Par.?

samaṃ kaliṅgasenā ca sā ca somaprabhā tataḥ // (36.2) Par.?

jagmatuś ca vihārāya vihāraṃ rājanirmitam / (37.1) Par.?

āninyatuś ca tāṃ tatra māyāyantrakaraṇḍikām // (37.2) Par.?

tato yantramayaṃ yakṣaṃ gṛhītvā prāhiṇot tadā / (38.1) Par.?

somaprabhā svaprayogād buddhārcānayanāya sā // (38.2) Par.?

sa yakṣo nabhasā gatvā dūram adhvānam āyayau / (39.1) Par.?

ādāya muktāsadratnahemāmburuhasaṃcayam // (39.2) Par.?

tenābhipūjya sugatān bhāsayāmāsa tatra sā / (40.1) Par.?

somaprabhā sanilayān sarvāścaryapradāyinā // (40.2) Par.?

tad buddhvāgatya dṛṣṭvā ca vismito mahiṣīsakhaḥ / (41.1) Par.?

rājā kaliṅgadattas tām apṛcchad yantraceṣṭitam // (41.2) Par.?

tataḥ somaprabhāvādīd rājann etāny anekadhā / (42.1) Par.?

māyāyantrādiśilpāni pitrā sṛṣṭāni me purā // (42.2) Par.?

yathā cedaṃ jagadyantraṃ pañcabhūtātmakaṃ tathā / (43.1) Par.?

yantrāṇy etāni sarvāṇi śṛṇu tāni pṛthak pṛthak // (43.2) Par.?

pṛthvīpradhānaṃ yantraṃ yad dvārādi pidadhāti tat / (44.1) Par.?

pihitaṃ tena śaknoti na codghāṭayituṃ paraḥ // (44.2) Par.?

ākāras toyayantrotthaḥ sajīva iva dṛśyate / (45.1) Par.?

tejomayaṃ tu yad yantraṃ taj jvālāḥ parimuñcati // (45.2) Par.?

vātayantraṃ ca kurute ceṣṭā gatyāgamādikāḥ / (46.1) Par.?

vyaktīkaroti cālāpaṃ yantram ākāśasaṃbhavam // (46.2) Par.?

mayā caitāny avāptāni tātāt kiṃ tv amṛtasya yat / (47.1) Par.?

rakṣakaṃ cakrayantraṃ tat tāto jānāti nāparaḥ // (47.2) Par.?

iti tasyā vadantyās tadvacaḥ śraddadhatām iva / (48.1) Par.?

madhyāhne pūryamāṇānāṃ śaṅkhānām udabhūd dhvaniḥ // (48.2) Par.?

tataḥ svocitam āhāraṃ dātuṃ vijñāpya taṃ nṛpam / (49.1) Par.?

prāpyānujñāṃ vimāne tāṃ sānugāṃ yantranirmite // (49.2) Par.?

kaliṅgasenām ādāya pratasthe gaganena sā / (50.1) Par.?

somaprabhā pitṛgṛhaṃ jyeṣṭhāyāḥ svasur antikam // (50.2) Par.?

kṣaṇāc ca prāpya vindhyādrivarti tatpitṛmandiram / (51.1) Par.?

tasyāḥ svayaṃprabhāyāś ca pārśvaṃ tām anayat svasuḥ // (51.2) Par.?

tatrāpaśyaj jaṭājūṭamālinīṃ tāṃ svayaṃprabhām / (52.1) Par.?

kaliṅgasenā lambākṣamālāṃ sā brahmacāriṇīm // (52.2) Par.?

susitāmbarasaṃvītāṃ hasantīm iva pārvatīm / (53.1) Par.?

kāmabhogamahābhogagṛhītogratapaḥkriyām // (53.2) Par.?

sāpi somaprabhākhyātāṃ praṇatāṃ tāṃ nṛpātmajām / (54.1) Par.?

svayaṃprabhā kṛtātithyā saṃvibheje phalāśanaiḥ // (54.2) Par.?

sakhi bhuktaiḥ phalair etair jarā te na bhaviṣyati / (55.1) Par.?

vināśiny asya rūpasya padmasyeva himāhatiḥ // (55.2) Par.?

etadartham iha snehād ānītā bhavatī mayā / (56.1) Par.?

iti somaprabhā caitāṃ rājaputrīm abhāṣata // (56.2) Par.?

tataḥ kaliṅgasenātra tāny abhuṅkta phalāni sā / (57.1) Par.?

sadyo 'mṛtarasāsārasiktāṅgīva babhūva ca // (57.2) Par.?

dadarśa ca purodyānaṃ bhramantī tatra kautukāt / (58.1) Par.?

sasuvarṇābjavāpīkaṃ sudhāsvāduphaladrumam // (58.2) Par.?

haimacitrakhagākīrṇaṃ san maṇistambhavibhramam / (59.1) Par.?

bhittibuddhikaraṃ śūnye bhittau śūnyapratītidam // (59.2) Par.?

jale sthaladhiyaṃ kurvat sthale ca jalabuddhikṛt / (60.1) Par.?

lokāntaram ivāpūrvaṃ mayamāyāvinirmitam // (60.2) Par.?

praviṣṭapūrvaṃ plavagaiḥ purā sītāgaveṣibhiḥ / (61.1) Par.?

svayaṃprabhāprasādena cirāt samprāptanirgamaiḥ // (61.2) Par.?

tatas tadadbhutapuraprakāmālokavismitām / (62.1) Par.?

ajarābhājanībhūtāṃ tām āpṛcchya svayaṃprabhām // (62.2) Par.?

kaliṅgasenām āropya yantre bhūyo vihāyasā / (63.1) Par.?

somaprabhā takṣaśilām ānināya svamandiram // (63.2) Par.?

tatra sā tad yathāvastu pitroḥ sarvam avarṇayat / (64.1) Par.?

kaliṅgasenā tau cāpi paraṃ saṃtoṣam īyatuḥ // (64.2) Par.?

itthaṃ tayor dvayoḥ sakhyor gacchatsu divaseṣv atha / (65.1) Par.?

ūce kaliṅgasenāṃ tām evaṃ somaprabhaikadā // (65.2) Par.?

yāvan na pariṇītā tvaṃ tāvat sakhyaṃ mama tvayā / (66.1) Par.?

tvadbhartṛbhavane paścān mama syād āgamaḥ kutaḥ // (66.2) Par.?

na dṛśyo hi sakhībhartā nāṅgīkāryaḥ kathaṃcana / (67.1) Par.?

aver vṛkīva snuṣāyāḥ śvaśrūr māṃsāni khādati // (67.2) Par.?

tathā ca śṛṇu vacmy etāṃ kīrtisenākathāṃ tava // (68) Par.?

pure pāṭaliputrākhye dhuryo dhanavatāṃ vaṇik / (69.1) Par.?

nāmnā yathārthena purā dhanapālita ity abhūt // (69.2) Par.?

kīrtisenābhidhānā ca tasyājāyata kanyakā / (70.1) Par.?

rūpeṇānanyasadṛśī prāṇebhyo 'py adhikapriyā // (70.2) Par.?

sā ca tena samānāya magadheṣu maharddhaye / (71.1) Par.?

devasenābhidhānāya dattābhūd vaṇije sutā // (71.2) Par.?

tasya cātisuvṛttasya devasenasya durjanī / (72.1) Par.?

vipannajanakasyāsīj jananī svāminī gṛhe // (72.2) Par.?

sā snuṣāṃ kīrtisenāṃ tāṃ paśyantī patisaṃmatām / (73.1) Par.?

krudhā jvalantī putrasya parokṣam akadarthayat // (73.2) Par.?

kīrtisenā ca sā patyur vaktuṃ naiva śaśāka tat / (74.1) Par.?

kaṣṭā hi kuṭilaśvaśrūparatantravadhūsthitiḥ // (74.2) Par.?

ekadā sa patis tasyā devaseno vaṇijyayā / (75.1) Par.?

gantuṃ pravavṛte bandhuprerito valabhīṃ purīm // (75.2) Par.?

tataḥ sā kīrtisenā taṃ patim evam abhāṣata / (76.1) Par.?

iyac ciraṃ mayā naitad āryaputra tavoditam // (76.2) Par.?

kadarthayati mām eṣā tavāmbā tvayy api sthite / (77.1) Par.?

tvayi tu proṣite kiṃ me kuryād iti na vedmy aham // (77.2) Par.?

tac chrutvā sa samudbhrāntas tatsnehāt sabhayaḥ śanaiḥ / (78.1) Par.?

devasenas tadā gatvā mātaraṃ praṇato 'bravīt // (78.2) Par.?

kīrtisenādhunā haste tavāmba prasthitasya me / (79.1) Par.?

nāsyā niḥsnehatā kāryā kulīnatanayā hy asau // (79.2) Par.?

tac chrutvā kīrtisenāṃ tām āhūyodvartitekṣaṇā / (80.1) Par.?

taṃ devasenaṃ mātā sā tatkālaṃ samabhāṣata // (80.2) Par.?

kṛtaṃ mayā kiṃ pṛcchaitām evaṃ tvāṃ prerayatyasau / (81.1) Par.?

gṛhabhedakarī putra mama tu dvau yuvāṃ samau // (81.2) Par.?

śrutvaitac chāntacitto 'bhūt tatkṛte sa vaṇigvaraḥ / (82.1) Par.?

vyājasapraṇayair vākyair jananyā yo na vañcyate // (82.2) Par.?

kīrtisenā tu sā tūṣṇīm āsīd udvegasasmitā / (83.1) Par.?

devasenas tu so 'nyedyuḥ pratasthe valabhīṃ vaṇik // (83.2) Par.?

tatas tadvirahakleśajuṣas tasyāḥ krameṇa sā / (84.1) Par.?

tanmātā kīrtisenāyā dāsīḥ pārśvān nyavārayat // (84.2) Par.?

kṛtvā ca gṛhacāriṇyā svaceṭyā saha saṃvidam / (85.1) Par.?

ānāyyābhyantaraṃ guptaṃ tāṃ vivastrāṃ cakāra sā // (85.2) Par.?

pāpe harasi me putram ity uktvā sakacagraham / (86.1) Par.?

pādair dantair nakhaiś caitāṃ ceṭyā samam apāṭayat // (86.2) Par.?

cikṣepa caināṃ bhūgehe sapidhāne dṛḍhārgale / (87.1) Par.?

tatratye 'bhyuddhṛtāśeṣapūrvajātārthasaṃcaye // (87.2) Par.?

nyadhāc ca tasyās tatrāntaḥ pratyahaṃ sā dinātyaye / (88.1) Par.?

pāpā tādṛgavasthāyā bhaktasyārdhaśarāvakam // (88.2) Par.?

acintayac ca dūrasthe patyāv evaṃ mṛtā svayam / (89.1) Par.?

imāṃ vyutthāpya yāteti vakṣyāmi divasair iti // (89.2) Par.?

itthaṃ bhūmigṛhe kṣiptā śvaśrvā pāpakṛtā tayā / (90.1) Par.?

sukhārhā rudatī tatra kīrtisenā vyacintayat // (90.2) Par.?

āḍhyaḥ patiḥ kule janma saubhāgyaṃ sādhuvṛttatā / (91.1) Par.?

tad apy aho mama śvaśrūprasādād īdṛśī vipat // (91.2) Par.?

etadarthaṃ ca nindanti kanyānāṃ janma bāndhavāḥ / (92.1) Par.?

śvaśrūnanandṛsaṃtrāsam asaubhāgyādidūṣitam // (92.2) Par.?

iti śocanty akasmāt sā kīrtisenā khanitrakam / (93.1) Par.?

lebhe 'smād bhūgṛhād dhātrā manaḥśalyam ivoddhṛtam // (93.2) Par.?

ayomayena tenātra suruṅgāṃ nicakhāna sā / (94.1) Par.?

tāvad yāvat tayottasthe daivāt svād vāsaveśmanaḥ // (94.2) Par.?

dadarśa ca pradīpena prāktanenātha tadgṛham / (95.1) Par.?

akṣīṇena kṛtālokā dharmeṇaiva nijena sā // (95.2) Par.?

ādāyātaś ca vastrāṇi svaṃ svarṇaṃ ca niśākṣaye / (96.1) Par.?

nirgatyaiva tato guptaṃ jagāma nagarād bahiḥ // (96.2) Par.?

evaṃvidhāyā gantuṃ me na yuktaṃ pitṛveśmani / (97.1) Par.?

kiṃ vakṣye tatra lokaś ca pratyeṣyati kathaṃ mama // (97.2) Par.?

ataḥ svayuktyā gantavyaṃ patyur evāntikaṃ mayā / (98.1) Par.?

ihāmutra ca sādhvīnāṃ patir ekā gatir yataḥ // (98.2) Par.?

ity ālocya cakārātra taḍāgāmbukṛtāplavā / (99.1) Par.?

rājaputrasya veṣaṃ sā kīrtisenā subṛṃhitam // (99.2) Par.?

tato gatvāpaṇe dattvā kiṃcin mūlyena kāñcanam / (100.1) Par.?

kasyāpi vaṇijo gehe dine tasminn uvāsa sā // (100.2) Par.?

anyedyus tatra cakre ca valabhīṃ gantum icchatā / (101.1) Par.?

samudrasenanāmnā sā vaṇijā saha saṃstavam // (101.2) Par.?

tena sākaṃ sabhṛtyena prāptuṃ prākprasthitaṃ patim / (102.1) Par.?

sadrājaputraveṣā sā pratasthe valabhīṃ prati // (102.2) Par.?

jagāda taṃ ca vaṇijaṃ gotrajair asmi bādhitaḥ / (103.1) Par.?

tat tvayā saha gacchāmi valabhīṃ svajanāntikam // (103.2) Par.?

tac chrutvā sa vaṇikputro mārge paryacarac ca tām / (104.1) Par.?

rājaputro dhruvaṃ bhavyaḥ ko 'py asāv iti gauravāt // (104.2) Par.?

yayau ca sa vaṇiksārthaḥ puraskṛtyāṭavīpatham / (105.1) Par.?

bahuśulkabhayatyaktamārgāntarajanāśritam // (105.2) Par.?

dinaiḥ prāpyāṭavīdvāraṃ sāyaṃ sārthe kṛtasthitau / (106.1) Par.?

cakre kṛtāntadūtīva śabdaṃ bhayakaraṃ śivā // (106.2) Par.?

tadabhijñe vaṇigloke caurādyāpātaśaṅkini / (107.1) Par.?

haste gṛhītaśastreṣu sarvato ripurakṣiṣu // (107.2) Par.?

dhvānte dhāvati dasyūnām agrayāyibalopame / (108.1) Par.?

kīrtisenā tad ālokya puṃveṣā sā vyacintayat // (108.2) Par.?

aho duṣkṛtināṃ karma saṃtānenaiva vardhate / (109.1) Par.?

paśya śvaśrūkṛtā vyāpad ihāpi phalitā mama // (109.2) Par.?

prathamaṃ mṛtyunevāhaṃ śvaśrūkopena bhakṣitā / (110.1) Par.?

praviṣṭā bhūgṛhaṃ paścād garbhavāsam ivāparam // (110.2) Par.?

daivāt tato 'pi niṣkrāntā jāteva punar apy aham / (111.1) Par.?

ihādyāgatya samprāptā bhūyo jīvitasaṃśayam // (111.2) Par.?

caurair yadi hatāsmīha tacchvaśrūr mama vairiṇī / (112.1) Par.?

anyāsaktā gatā kvāpīty abhidhāsyati me patim // (112.2) Par.?

strīti jñātāsmi kenāpi hṛtavastrāntarā yadi / (113.1) Par.?

tato mṛtyur mama śreyān na punaḥ śīlaviplavaḥ // (113.2) Par.?

tena cātmaiva me rakṣyo nāpekṣyo 'yaṃ suhṛdvaṇik / (114.1) Par.?

satīdharmo hi sustrīṇāṃ cintyo na suhṛdādayaḥ // (114.2) Par.?

iti niścitya sā prāpa cinvatī tarumadhyagam / (115.1) Par.?

gartaṃ gṛhākṛtiṃ dattaṃ kṛpayevāntaraṃ bhuvā // (115.2) Par.?

tatra praviśya cācchādya tṛṇaparṇādibhis tanum / (116.1) Par.?

tasthau saṃdhāryamāṇā sā patisaṃgamavāñchayā // (116.2) Par.?

tato niśīthe sahasā nipatyaivodyatāyudhā / (117.1) Par.?

caurasenā sumahatī sārthaṃ veṣṭayati sma tam // (117.2) Par.?

ninadaddasyukālābhraṃ śastrajvālāciraprabham / (118.1) Par.?

tataḥ sarudhirāsāraṃ tatrābhūd yuddhadurdinam // (118.2) Par.?

hatvā samudrasenaṃ ca sānugaṃ taṃ vaṇikpatim / (119.1) Par.?

balino 'tha yayuś caurā gṛhītadhanasaṃcayāḥ // (119.2) Par.?

tadā ca kīrtisenā sā śrutakolāhalā balāt / (120.1) Par.?

yan na muktāsubhis tatra kāraṇaṃ kevalo vidhiḥ // (120.2) Par.?

tato niśāyāṃ yātāyām udite tigmatejasi / (121.1) Par.?

nirjagāma ca sā tasmād gartād viṭapamadhyataḥ // (121.2) Par.?

kāmaṃ bhartrekabhaktānām aviskhalitatejasām / (122.1) Par.?

devatā eva sādhvīnāṃ trāṇam āpadi kurvate // (122.2) Par.?

yat tatra nirjane 'raṇye siṃho dṛṣṭvāpi tāṃ jahau / (123.1) Par.?

na paraṃ yāvad abhyetya kutaścit ko'pi tāpasaḥ // (123.2) Par.?

pṛṣṭodantāṃ samāśvāsya jalapānaṃ kamaṇḍaloḥ / (124.1) Par.?

dattvopadiśya panthānaṃ tasyāḥ kvāpi tirodadhe // (124.2) Par.?

tatas tṛptāmṛteneva kṣutpipāsāvinākṛtā / (125.1) Par.?

tāpasoktena mārgeṇa pratasthe sā pativratā // (125.2) Par.?

athāstaśikharārūḍhaṃ prasāritakaraṃ ravim / (126.1) Par.?

rātrim ekāṃ kṣamasveti vadantam iva vīkṣya sā // (126.2) Par.?

mahato 'raṇyavṛkṣasya gṛhābhaṃ mūlakoṭaram / (127.1) Par.?

viveśa pidadhe cāsya dvāram anyena dāruṇā // (127.2) Par.?

pradoṣe ca dadarśātra dvāracchidrāntareṇa sā / (128.1) Par.?

rākṣasīm āgatāṃ ghorāṃ bālakair anvitāṃ sutaiḥ // (128.2) Par.?

tīrṇānyavipad adyāham anayā bhakṣiteti sā / (129.1) Par.?

trastā yāvat tarau tāvad ārūḍhā tatra rākṣasī // (129.2) Par.?

anvārūḍhāś ca tatputrās tatra tāṃ kila rākṣasīm / (130.1) Par.?

abruvann amba naḥ kiṃcid bhakṣyaṃ dehīti tatkṣaṇam // (130.2) Par.?

tataḥ sā rākṣasī bālāṃs tān uvācādya putrakāḥ / (131.1) Par.?

mahāśmaśānaṃ gatvāpi bhakṣyaṃ nāsāditaṃ mayā // (131.2) Par.?

yācito ḍākinīsaṃgho 'py atra bhāgam adān na me / (132.1) Par.?

tatkhedād atha vijñapya yācito bhairavo mayā // (132.2) Par.?

sa ca nāmānvayau pṛṣṭvā devo mām evam ādiśat / (133.1) Par.?

bhayaṃkari kulīnāsi kharadūṣaṇavaṃśajā // (133.2) Par.?

tad ito nātidūrasthaṃ vasudattapuraṃ vraja / (134.1) Par.?

tatrāste vasudattākhyo rājā dharmaparo mahān // (134.2) Par.?

yaḥ kṛtsnām aṭavīm etāṃ paryantastho 'bhirakṣati / (135.1) Par.?

svayaṃ gṛhṇāti śulkaṃ ca nigṛhṇāti ca taskarān // (135.2) Par.?

tasyāṭavyāṃ ca mṛgayāśramasuptasya bhūpateḥ / (136.1) Par.?

ajñātaiva praviṣṭāntaḥ karṇe śatapadī laghu // (136.2) Par.?

sā ca kālena bahuśaḥ prasūtāsya śirontare / (137.1) Par.?

tena rogeṇa rājāsau snāyuśeṣo 'dya vartate // (137.2) Par.?

vaidyāś cāsya na taṃ vyādhiṃ vidanty anyo 'pi ko'pi cet / (138.1) Par.?

na jñāsyati tataś caiṣa dinair alpair vipatsyate // (138.2) Par.?

tasya māṃsāni bhuñjīthā vipannasya svamāyayā / (139.1) Par.?

bhakṣitais tarhi ṣaṇmāsān paritṛptā bhaviṣyasi // (139.2) Par.?

itthaṃ me bhairaveṇāpi saṃvibhāgaḥ sasaṃśayaḥ / (140.1) Par.?

kālavāṃś cādya vihitas tatputrāḥ kiṃ karomy aham // (140.2) Par.?

evaṃ tayoktā rākṣasyā putrās te tām athābruvan / (141.1) Par.?

jñātāpanīte roge 'smin kiṃ sa rājāmba jīvati // (141.2) Par.?

kathaṃ ca tādṛśo rogo vada tasyāpanīyate / (142.1) Par.?

evam uktavatas tān sā tanayān rākṣasī jagau // (142.2) Par.?

jñātāpanīte roge 'smiñ jīvaty eva sa bhūpatiḥ / (143.1) Par.?

śrūyatāṃ ca yathā so 'sya mahārogo 'panīyate // (143.2) Par.?

śiraḥ pūrvaṃ ghṛtābhyaktaṃ tasya nyastoṣṇasarpiṣā / (144.1) Par.?

kṛtvā madhyāhnakaṭhine sthāpitasyātape ciram // (144.2) Par.?

niveśya karṇakuhare suṣirāṃ vaṃśanāḍikām / (145.1) Par.?

śītāmbughaṭapṛṣṭhasthaśarāvacchidrasaṅginīm // (145.2) Par.?

tena svedātapaklāntā nirgatyāsya śiro'ntarāt / (146.1) Par.?

karṇarandhreṇa tenaiva vaṃśanāḍīṃ praviśya tām // (146.2) Par.?

ghaṭe śītābhilāṣiṇyaḥ śatapadyaḥ patanti tāḥ / (147.1) Par.?

evaṃ sa nṛpatis tasmān mahārogād vimucyate // (147.2) Par.?

ity uktvā rākṣasī putrān vṛkṣasthān virarāma sā / (148.1) Par.?

kīrtisenā ca tat sarvam aśṛṇot koṭarasthitā // (148.2) Par.?

śrutvā ca cintayāmāsa nistariṣyāmi ced itaḥ / (149.1) Par.?

tad gatvaivaitayā yuktyā jīvayiṣyāmi taṃ nṛpam // (149.2) Par.?

etām evāṭavīṃ so 'lpaśulkaḥ prāntasthito 'vati / (150.1) Par.?

tatsaukaryāc ca vaṇijaḥ sarve yānty amunā pathā // (150.2) Par.?

etat samudraseno 'pi svargāmī so 'bravīd vaṇik / (151.1) Par.?

tad etenaiva mārgeṇa sa me bhartāgamiṣyati // (151.2) Par.?

ato gatvāṭavīprānte vasudattapure nṛpam / (152.1) Par.?

rogād uttārya tatrasthā pratīkṣe bhartur āgamam // (152.2) Par.?

evaṃ vicintayantī sā kṛcchrāt tām anayan niśām / (153.1) Par.?

prātar naṣṭeṣu rakṣaḥsu niragāt koṭarāt tataḥ // (153.2) Par.?

kramāt tato 'ṭavīmadhye yāntī puruṣaveṣabhṛt / (154.1) Par.?

prāpte 'parāhṇe gopālam ekaṃ sādhuṃ dadarśa sā // (154.2) Par.?

tatsaukumāryadūrādhvadarśanārdrīkṛtaṃ ca tam / (155.1) Par.?

papracchopetya sā ko 'yaṃ pradeśaḥ kathyatām iti // (155.2) Par.?

so 'pi gopālako 'vādīd vasudattasya bhūpateḥ / (156.1) Par.?

vasudattapuraṃ nāma puram etatpuraḥ sthitam // (156.2) Par.?

rājāpi sa mahātmātra mumūrṣur vyādhitaḥ sthitaḥ / (157.1) Par.?

tac chrutvā kīrtisenā taṃ gopālakam abhāṣata // (157.2) Par.?

yadi māṃ nayate kaścid rājñas tasyāntikaṃ tataḥ / (158.1) Par.?

ahaṃ taṃ tasya jānāmi nivārayitum āmayam // (158.2) Par.?

tac chrutvaivāvadad gopaḥ pure 'traiva vrajāmy aham / (159.1) Par.?

tad āyāhi mayā sākaṃ yāvadyatnaṃ karomi te // (159.2) Par.?

tathety uktavatīṃ tāṃ ca kīrtisenāṃ tadaiva saḥ / (160.1) Par.?

vasudattapuraṃ gopaḥ puṃveṣāṃ nayati sma tām // (160.2) Par.?

tac ca tatra tathā vastu nivedyātārya tatkṣaṇāt / (161.1) Par.?

pratīhārāya kalyāṇalakṣaṇāṃ tāṃ samarpayat // (161.2) Par.?

pratīhāro 'pi rājānaṃ vijñapyaiva tadājñayā / (162.1) Par.?

praveśayāmāsa sa tāṃ tasyāntikam aninditām // (162.2) Par.?

rājā ca so 'tra rogārtas tāṃ dṛṣṭvaivādbhutākṛtim / (163.1) Par.?

āśvasto vasudatto 'bhūd vetty ātmaiva hitāhitam // (163.2) Par.?

uvāca caitāṃ puṃveṣāṃ yadīmām apaneṣyasi / (164.1) Par.?

rujam etat pradāsyāmi rājyārdhaṃ te sulakṣaṇa // (164.2) Par.?

jāne jahāra pṛṣṭhān me svapne strī kṛṣṇakambalam / (165.1) Par.?

tan niścitam imaṃ rogaṃ hariṣyati bhavān mama // (165.2) Par.?

tac chrutvā kīrtisenā taṃ jagādādya dinaṃ gatam / (166.1) Par.?

deva śvaste 'paneṣyāmi rogaṃ mā smādhṛtiṃ kṛthāḥ // (166.2) Par.?

ity uktvā mūrdhni rājño 'sya gavyaṃ ghṛtam adāpayat / (167.1) Par.?

tena tasyāyayau nidrā yayau sā cātivedanā // (167.2) Par.?

bhiṣagrūpeṇa devo 'yaṃ puṇyair naḥ ko 'py upāgataḥ / (168.1) Par.?

iti tatra ca tāṃ sarve kīrtisenāṃ tato 'stuvan // (168.2) Par.?

mahādevī ca tais tais tām upacārair upācarat / (169.1) Par.?

naktaṃ veśma pṛthak cāsyāḥ sadāsīkam akalpayat // (169.2) Par.?

athāparedyur madhyāhne mantriṣv antaḥpureṣu ca / (170.1) Par.?

paśyatsu tasya bhūpasya kīrtisenā cakarṣa sā // (170.2) Par.?

śirasaḥ karṇamārgeṇa sārdhaṃ śatapadīśatam / (171.1) Par.?

rākṣasyuditayā pūrvaṃ yuktyātyadbhutayā tayā // (171.2) Par.?

sthāpayitvā ca ghaṭake sā tāḥ śatapadīs tataḥ / (172.1) Par.?

ghṛtakṣīrādisekena taṃ nṛpaṃ samatarpayat // (172.2) Par.?

kramāt tasmin samāśvaste rogamukte mahīpatau / (173.1) Par.?

ghaṭe tān prāṇino dṛṣṭvā ko na tatra visismiye // (173.2) Par.?

rājā ca sa vilokyaitān kukīṭān mūrdhanirgatān / (174.1) Par.?

tatrāsa dadhyau mumude mene janma nijaṃ punaḥ // (174.2) Par.?

kṛtotsavaś ca sa snātaḥ kīrtisenām apūjayat / (175.1) Par.?

tām anādṛtarājyārdhāṃ grāmahastyaśvakāñcanaiḥ // (175.2) Par.?

devī ca mantriṇaś caitāṃ hemnā vastrair apūrayan / (176.1) Par.?

prabhuprāṇaprado 'smākaṃ pūjyo bhiṣag asāv iti // (176.2) Par.?

sā ca tasyaiva rājñas tān haste 'rthān saṃprati nyadhāt / (177.1) Par.?

kaṃcit kālaṃ vratastho 'ham ity uktvā bhartrapekṣiṇī // (177.2) Par.?

tataḥ saṃmānyamānātra sarvaiḥ kāny apy ahāni sā / (178.1) Par.?

yāvat puruṣaveṣeṇa kīrtisenāvatiṣṭhate // (178.2) Par.?

tāvacchuśrāva lokāt taṃ valabhītaḥ samāgatam / (179.1) Par.?

sārthavāhaṃ pathā tena devasenaṃ nijaṃ patim // (179.2) Par.?

puri tatrātha taṃ sārthaṃ prāptaṃ buddhvaiva sābhyagāt / (180.1) Par.?

bhartāraṃ tam apaśyac ca mayūrīva navāmbudam // (180.2) Par.?

citteneva cirautsukyasaṃtāpapravilāyinā / (181.1) Par.?

dattārghānandabāṣpeṇa pādayos tasya cāpatat // (181.2) Par.?

so 'pi pratyabhyajānāc ca veṣacchannāṃ nirūpya tām / (182.1) Par.?

bhartā bhāsvatkarālakṣmyāṃ divā mūrtim ivaindavīm // (182.2) Par.?

tasya tadvadanenduṃ ca candrakāntasya paśyataḥ / (183.1) Par.?

devasenasya hṛdayaṃ citraṃ na galati sma yat // (183.2) Par.?

athāsyāṃ kīrtisenāyām evaṃ prakaṭitātmani / (184.1) Par.?

kim etad iti sāścaryaṃ sthite tasmiṃś ca tatpatau // (184.2) Par.?

vismite ca vaṇiggrāme tad buddhvaiva savismayaḥ / (185.1) Par.?

sa rājā vasudatto 'tra svayam eva kilāyayau // (185.2) Par.?

tena pṛṣṭā ca sā kīrtisenā patyuḥ puro 'khilam / (186.1) Par.?

śvaśrūduścaritotpannaṃ svavṛttāntam avarṇayat // (186.2) Par.?

devasenaś ca tac chrutvā tadbhartā sa svamātari / (187.1) Par.?

parāṅmukho 'bhavat kopakṣamāvismayaharṣavān // (187.2) Par.?

bhartṛbhaktirathārūḍhāḥ śīlasaṃnāharakṣitāḥ / (188.1) Par.?

dharmasārathayaḥ sādhvyo jayanti matihetayaḥ // (188.2) Par.?

iti tatra sthito 'vādīd ākarṇyaiva tad adbhutam / (189.1) Par.?

caritaṃ kīrtisenāyāḥ sānandaḥ sakalo janaḥ // (189.2) Par.?

rājāpy uvāca patyartham āśritakleśayānayā / (190.1) Par.?

sītādevy api rāmasya parikleśavahā jitā // (190.2) Par.?

tad eṣā dharmabhaginī mama prāṇapradāyinī / (191.1) Par.?

ity uktavantaṃ taṃ bhūpaṃ kīrtisenātha sābravīt // (191.2) Par.?

deva tvatprītidāyo yas tava haste mama sthitaḥ / (192.1) Par.?

grāmahastyaśvaratnādiḥ sa me bhartre samarpyatām // (192.2) Par.?

evam uktas tayā rājā dattvā grāmādi tasya tat / (193.1) Par.?

tadbhartur devasenasya prītaḥ paṭṭaṃ babandha saḥ // (193.2) Par.?

atha narapatidattais tair vaṇijyārjitaiś ca prasabhabharitakoṣo devaseno dhanaughaiḥ / (194.1) Par.?

parihṛtajananīkaḥ saṃstuvan kīrtisenāṃ kṛtavasatir amuṣminn eva tasthau pure saḥ // (194.2) Par.?

sukham apagatapāpaśvaśrukaṃ kīrtisenāpy asamacaritalabdhakhyātir āsādya tatra / (195.1) Par.?

nyavasad akhilabhogaiśvaryabhāgāntikasthā sukṛtaphalasamṛddhir dehabaddheva bhartuḥ // (195.2) Par.?

evaṃ viṣahya vidhurasya vidher niyogam āpatsu rakṣitacaritradhanā hi sādhvyaḥ / (196.1) Par.?

guptāḥ svasattvavibhavena mahattamena kalyāṇam ādadhati patyur athātmanaś ca // (196.2) Par.?

itthaṃ ca pārthivakumāri bhavanti doṣāḥ śvaśrūnanāndṛvihitā bahavo vadhūnām / (197.1) Par.?

tadbhartṛveśma tava tādṛśam arthaye 'haṃ śvaśrūr na yatra na ca yatra śaṭhā nanāndā // (197.2) Par.?

itīdam ānandikathādbhutaṃ sā mukhān niśamyāsurarājaputryāḥ / (198.1) Par.?

somaprabhāyā manujendraputrī kaliṅgasenā parituṣyati sma // (198.2) Par.?

tato vicitrārthakathāvasānaṃ dṛṣṭveva gantuṃ mihire pravṛtte / (199.1) Par.?

sotkāṃ samāliṅgya kaliṅgasenāṃ somaprabhā svaṃ bhavanaṃ jagāma // (199.2) Par.?

Duration=1.3113520145416 secs.