Texts

avidyādayaḥ kleśāḥ kuśalākuśalāni karmāṇi tatphalaṃ vipākaḥ tadanuguṇā vāsanā āśayāḥ / (1.1) Par.?

te ca manasi vartamānāḥ puruṣe vyapadiśyante sa hi tatphalasya bhokteti / (1.2) Par.?

yathā jayaḥ parājayo vā yoddhṛṣu vartamānaḥ svāmini vyapadiśyate / (1.3) Par.?

yo hy anena bhogenāparāmṛṣṭaḥ sa puruṣaviśeṣa īśvaraḥ / (1.4) Par.?

kaivalyaṃ prāptās tarhi santi ca bahavaḥ kevalinaḥ te hi trīṇi bandhanāni chittvā kaivalyaṃ prāptāḥ / (1.5) Par.?

īśvarasya ca tatsaṃbandho na bhūto na bhāvī / (1.6) Par.?

yathā muktasya pūrvā bandhakoṭiḥ prajñāyate naivam īśvarasya / (1.7) Par.?

yathā vā prakṛtilīnasyottarā bandhakoṭiḥ saṃbhāvyate naivam īśvarasya / (1.8) Par.?

sa tu sadaiva muktaḥ sadaiveśvara iti / (1.9) Par.?

yo 'sau prakṛṣṭasattvopādānād īśvarasya śāśvatika utkarṣaḥ sa kiṃ sanimitta āhosvin nirnimitta iti / (1.10) Par.?

tasya śāstraṃ nimittam / (1.11) Par.?

śāstraṃ punaḥ kiṃnimittam / (1.12) Par.?

prakṛṣṭasattvanimittam / (1.13) Par.?

etayoḥ śāstrotkarṣayor īśvarasattve vartamānayor anādiḥ saṃbandhaḥ / (1.14) Par.?

etasmād etad bhavati sadaiveśvaraḥ sadaiva mukta iti / (1.15) Par.?

tac ca tasyaiśvaryaṃ sāmyātiśayavinirmuktam na tāvad aiśvaryāntareṇa tad atiśayyate / (1.16) Par.?

yad evātiśayi syāt tad eva tat syāt / (1.17) Par.?

tasmād yatra kāṣṭhāprāptir aiśvaryasya sa īśvaraḥ / (1.18) Par.?

na ca tatsamānam aiśvaryam asti / (1.19) Par.?

kasmāt / (1.20) Par.?

dvayos tulyayor ekasmin yugapat kāmite 'rthe navam idam astu purāṇam idam astv ity ekasya siddhāv itarasya prākāmyavidhātād ūnatvaṃ prasaktam / (1.21) Par.?

dvayośca tulyayor yugapat kāmitārthaprāptir nāsti arthasya viruddhatvāt / (1.22) Par.?

tasmād yasya sāmyātiśayair nivirmuktam aiśvaryaṃ sa eveśvaraḥ sa puruṣaviśeṣa iti // (1.23) Par.?

kiṃca // (2.1) Par.?