Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17674

Click on a sentence to show its analysis
Keep the mouse pointer over a lemma to show its meanings.

niśumbhabharanamrorvīkharvitāḥ parvatā api / (1.1) Par.?

yaṃ namantīva nṛtyantaṃ namāmas taṃ vināyakam // (1.2) Par.?

evaṃ vatseśvarasutaḥ kauśāmbyāṃ bhavane pituḥ / (2.1) Par.?

vasan vidyādharādhīśair ādāv eva kṛtānatiḥ // (2.2) Par.?

naravāhanadattaḥ sa kadācin mṛgayāgataḥ / (3.1) Par.?

viveśa gomukhasakho muktasainyo mahad vanam // (3.2) Par.?

sa tatra dakṣiṇenākṣṇā sphuratoktaśubhāgamaḥ / (4.1) Par.?

divyavīṇāravonmiśram aśṛṇod gītaniḥsvanam // (4.2) Par.?

gatvā tadanusāreṇa nātidūraṃ dadarśa saḥ / (5.1) Par.?

svayaṃbhvāyatanaṃ śaivaṃ saṃyatāśvo viveśa ca // (5.2) Par.?

tatropavīṇayantīṃ ca deveśaṃ devakanyakām / (6.1) Par.?

apaśyad varakanyābhir bahvībhiḥ parivāritām // (6.2) Par.?

sā dṛṣṭā tasya hṛdayaṃ prasaratkāntinirjharā / (7.1) Par.?

indumūrtir ivāmbhodheḥ kṣobhayāmāsa tatkṣaṇam // (7.2) Par.?

sāpi taṃ sarasasnigdhamugdhenālokya cakṣuṣā / (8.1) Par.?

tad ekagatacittābhūd vismṛtasvarasāraṇā // (8.2) Par.?

naravāhanadattasya cittajño gomukhas tataḥ / (9.1) Par.?

keyaṃ kasya sutā ceti yāvat pṛcchati tatsakhīḥ // (9.2) Par.?

tāvac ca sadṛśī tasyāḥ pūrvaṃ hemāruṇaprabhā / (10.1) Par.?

paścād avatatāraikā prauḍhā vidyādharī divaḥ // (10.2) Par.?

sā cāvatīrya kanyāyās tasyāḥ pārśva upāviśat / (11.1) Par.?

kanyāpy utthāya sā tasyāḥ pādayor apatat tadā // (11.2) Par.?

sarvavidyādharādhīśaṃ nirvighnaṃ patim āpnuhi / (12.1) Par.?

iti prauḍhāpi sā tasyāḥ kanyāyā āśiṣaṃ dadau // (12.2) Par.?

naravāhanadatto 'tha tām upetya praṇamya ca / (13.1) Par.?

dattāśiṣaṃ paryapṛcchat saumyāṃ vidyādharīṃ śanaiḥ // (13.2) Par.?

keyaṃ kanyā bhavaty amba tava kā kathyatām iti / (14.1) Par.?

tato vidyādharī sā tam uvāca śṛṇu vacmy adaḥ // (14.2) Par.?

asti gaurīguroḥ śaile śrīsundarapuraṃ puram / (15.1) Par.?

āste 'laṃkāraśīlākhyas tatra vidyādhareśvaraḥ // (15.2) Par.?

tasyodāraguṇasyāsti mahiṣī kāñcanaprabhā / (16.1) Par.?

tasyāṃ tasya ca kālena rājñaḥ sūnur ajāyata // (16.2) Par.?

eṣa dharmaparo bhāvīty ādiṣṭam umayā yadā / (17.1) Par.?

svapne tadā dharmaśīlaṃ nāmnā tam akarot pitā // (17.2) Par.?

krameṇa yauvanaprāptaṃ dharmaśīlaṃ sa taṃ sutam / (18.1) Par.?

rājā saṃyojya vidyābhir yauvarājye 'bhiṣiktavān // (18.2) Par.?

tataḥ sa yauvarājyastho dharmaikaparamo vaśī / (19.1) Par.?

arañjayad dharmaśīlaḥ pitur abhyadhikaṃ prajāḥ // (19.2) Par.?

tato 'laṃkāraśīlasya rājñaḥ sā kāñcanaprabhā / (20.1) Par.?

antarvatnī satī rājñī tasya sūte sma kanyakām // (20.2) Par.?

naravāhanadattasya bhāryaiṣā cakravartinaḥ / (21.1) Par.?

kanyā bhavitrīti tadā divyā vāgudaghoṣayat // (21.2) Par.?

tato 'tra tenālaṃkāravatīti kṛtanāmikā / (22.1) Par.?

pitrā krameṇāvardhiṣṭa bālā śaśikaleva sā // (22.2) Par.?

kālena yauvanasthā ca prāptavidyā nijātpituḥ / (23.1) Par.?

tattadāyatanaṃ śaṃbhorbhaktyā bhramitumudyatā // (23.2) Par.?

tāvac ca dharmaśīlo 'sya bhrātā śānto yuvāpi san / (24.1) Par.?

raho 'laṃkāraśīlaṃ taṃ pitaraṃ svaṃ vyajijñapat // (24.2) Par.?

na māṃ bhogā ime tāta prīṇanti kṣaṇabhaṅgurāḥ / (25.1) Par.?

kiṃ tadasti hi saṃsāre paryantavirasaṃ na yat // (25.2) Par.?

tathā caitattvayā kiṃ na śrutaṃ vyāsamunervacaḥ / (26.1) Par.?

sarve kṣayāntā nicayāḥ patanāntāḥ samucchrayāḥ // (26.2) Par.?

saṃyogā viprayogāntā maraṇāntaṃ hi jīvitam / (27.1) Par.?

tadeṣu kā ratistāta naśvareṣu manasvinām // (27.2) Par.?

paratra ca sahāyānti na bhogā nārthasaṃcayāḥ / (28.1) Par.?

ekastu bāndhavo dharmo na jahāti padātpadam // (28.2) Par.?

tasmādvanāya gatvāhaṃ sādhayāmyuttamaṃ tapaḥ / (29.1) Par.?

āsādayeyaṃ tad yena śāśvataṃ paramaṃ padam // (29.2) Par.?

ity uktavantaṃ taṃ putraṃ dharmaśīlaṃ samākulaḥ / (30.1) Par.?

rājālaṃkāraśīlo 'tha vakti smodaśrulocanaḥ // (30.2) Par.?

bālasyaiva tavākāṇḍe ko 'yaṃ putra matibhramaḥ / (31.1) Par.?

upayukte hi tāruṇye praśamaḥ sadbhir iṣyate // (31.2) Par.?

kṛtadārasya dharmeṇa rājyaṃ pālayatastava / (32.1) Par.?

bhogān bhoktum ayaṃ kālo na vairāgyasya sāṃpratam // (32.2) Par.?

etatpiturvacaḥ śrutvā dharmaśīlo 'bhyadhātpunaḥ / (33.1) Par.?

na śamāśamayor atra niyamo 'sti vayaḥkṛtaḥ // (33.2) Par.?

īśvarānugṛhīto hi kaścidbālo 'pi śāmyati / (34.1) Par.?

vṛddho 'pi na śamaṃ yāti kaścit kāpuruṣaḥ punaḥ // (34.2) Par.?

na ca rājye ratirme 'sti na vā dāraparigrahe / (35.1) Par.?

mamaitaj jīvitaphalaṃ yacchivārādhanaṃ tapaḥ // (35.2) Par.?

iti bruvāṇaṃ yatnenāpy anivāryam avekṣya tam / (36.1) Par.?

pitālaṃkāraśīlo 'sau vimucyāśrūṇyabhāṣata // (36.2) Par.?

yadi yūno 'pi te putra vairāgyam idamīdṛśam / (37.1) Par.?

nāsti vṛddhasya me tatkimaham apy āśraye vanam // (37.2) Par.?

ity uktvā martyalokaṃ ca gatvā bhārāyutaṃ dadau / (38.1) Par.?

brāhmaṇebhyo daridrebhyo ratnānāṃ kāñcanasya ca // (38.2) Par.?

etya ca svapuraṃ bhāryām avocat kāñcanaprabhām / (39.1) Par.?

tvayā madājñayehaiva sthātavyaṃ nagare nije // (39.2) Par.?

rakṣālaṃkāravaty eṣā kanyā pūrṇe ca vatsare / (40.1) Par.?

asti vaivāhalagno 'syās tithāv adyatane śubhaḥ // (40.2) Par.?

naravāhanadattāya dāsyāmyetāmahaṃ tadā / (41.1) Par.?

sa cakravartī jāmātā pāsyatīdaṃ puraṃ ca naḥ // (41.2) Par.?

ity uktvā dattaśapathāṃ bhāryāṃ rājā nivartya saḥ / (42.1) Par.?

sasutāṃ vilapantīṃ tāṃ saputraḥ śiśriye vanam // (42.2) Par.?

sā tu svapuramadhyāsta tadbhāryā kāñcanaprabhā / (43.1) Par.?

duhitrā saha sādhvī strī bhartrājñāṃ kā hi laṅghayet // (43.2) Par.?

tatsutātha tayā mātrā saha snehānuyātayā / (44.1) Par.?

alaṃkāravatī bhrāntā bahūnyāyatanāni ca // (44.2) Par.?

ekadā tāṃ ca vakti sma vidyā prajñaptisaṃjñikā / (45.1) Par.?

kaśmīreṣu svayaṃbhūni gatvā kṣetrāṇi pūjaya // (45.2) Par.?

naravāhanadattaṃ hi nirvighnaṃ taṃ patiṃ tataḥ / (46.1) Par.?

sarvavidyādharendraikacakravartinamāpsyasi // (46.2) Par.?

ity uktā vidyayā gatvā kaśmīrānsā samātṛkā / (47.1) Par.?

alaṃkāravatī śaṃbhuṃ puṇyakṣetreṣv apūjayat // (47.2) Par.?

nandikṣetre mahādevagirāvamaraparvate / (48.1) Par.?

sureśvaryādriṣu tathā vijaye kapaṭeśvare // (48.2) Par.?

evamādiṣu sampūjya kṣetreṣu girijāpatim / (49.1) Par.?

vidyādharendrakanyā sā tanmātā cāgate gṛhān // (49.2) Par.?

tāmetāṃ viddhyalaṃkāravatīṃ subhaga kanyakām / (50.1) Par.?

tāṃ ca mātarametasyā viddhi māṃ kāñcanaprabhām // (50.2) Par.?

adya caiṣā mamānuktvaivāgatemaṃ śivālayam / (51.1) Par.?

tataḥ prajñaptividyāto vijñāyāhamihāgatā // (51.2) Par.?

tanmukhādeva ca jñātastvamapīhāgato mayā / (52.1) Par.?

tadetāṃ devatādiṣṭām upayacchasva me sutām // (52.2) Par.?

prātaś ca so 'syāḥ pitroktaḥ prāpto vaivāhavāsaraḥ / (53.1) Par.?

tadadya putra kauśāmbīṃ svām eva nagarīṃ vraja // (53.2) Par.?

āvāmitaś ca gacchāvaḥ prātaretya tapovanāt / (54.1) Par.?

rājālaṃkāraśīlas te dāsyatyetāṃ sutāṃ svayam // (54.2) Par.?

evaṃ tayokte 'laṃkāravatyās tasyāś ca tasya ca / (55.1) Par.?

naravāhanadattasya kāpyavasthā dvayor abhūt // (55.2) Par.?

anyonyarajanīmātraviśleṣāsahanātmanoḥ / (56.1) Par.?

cakrāhvayor ivāsanne dinānte sāśrunetrayoḥ // (56.2) Par.?

dṛṣṭvā tau tādṛśau dvāv apy avādīt kāñcanaprabhā / (57.1) Par.?

kimekarātriviśleṣe hy adhairyaṃ yuvayor idam // (57.2) Par.?

aniścitāvadhiṃ dhīrāḥ sahante virahaṃ ciram / (58.1) Par.?

śrūyatāṃ rāmabhadrasya sītādevyās tathā kathā // (58.2) Par.?

rājño daśarathasyāsīdayodhyādhipateḥ sutaḥ / (59.1) Par.?

rāmo bharataśatrughnalakṣmaṇānāṃ purāgrajaḥ // (59.2) Par.?

viṣṇoravatatārāṃśo rāvaṇocchedanāya yaḥ / (60.1) Par.?

sītā tasyābhavadbhāryā prāṇeśā janakātmajā // (60.2) Par.?

sa pitrā bharatanyastarājyena vidhiyogataḥ / (61.1) Par.?

preṣito 'bhūdvanaṃ sākaṃ sītayā lakṣmaṇena ca // (61.2) Par.?

tatra tasyāharatsītāṃ māyayā rāvaṇaḥ priyām / (62.1) Par.?

nināya ca purīṃ laṅkāṃ pathi hatvā jaṭāyuṣam // (62.2) Par.?

tataḥ sa rāmo virahī sugrīvaṃ vālino vadhāt / (63.1) Par.?

svīkṛtya mārutiṃ preṣya tatpravṛttimabudhyata // (63.2) Par.?

gatvā ca sāgare setuṃ baddhvā hatvā ca rāvaṇam / (64.1) Par.?

laṅkāṃ vibhīṣaṇe nyasya sītāṃ pratyājahāra saḥ // (64.2) Par.?

athāvṛttasya vanataḥ śāsato bharatārpitam / (65.1) Par.?

tasya rājyamayodhyāyāṃ sītā garbhamadhatta sā // (65.2) Par.?

tāvac cātra prajāceṣṭāṃ jñātumalpaparicchadaḥ / (66.1) Par.?

svairaṃ paribhramannekaṃ so 'paśyatpuruṣaṃ prabhuḥ // (66.2) Par.?

haste gṛhītvā gṛhiṇīṃ nirasyantaṃ nijād gṛhāt / (67.1) Par.?

parasyeyaṃ gṛhamagāditi doṣānukīrtanāt // (67.2) Par.?

rakṣogṛhoṣitā sītā rāmadevena nojjhitā / (68.1) Par.?

ayam abhyadhiko yo mām ujhati jñātiveśmagām // (68.2) Par.?

iti tadgṛhiṇīṃ tāṃ ca bruvatīṃ taṃ nijaṃ patim / (69.1) Par.?

rāmo rājā sa śuśrāva khinnaścābhyantaraṃ yayau // (69.2) Par.?

lokāpavādabhītaś ca sītāṃ tatyāja tāṃ vane / (70.1) Par.?

sahate virahakleśaṃ yaśasvī nāyaśaḥ punaḥ // (70.2) Par.?

sā ca garbhālasā daivādvālmīkeḥ prāpadāśramam / (71.1) Par.?

tenarṣiṇā samāśvāsya tatraiva grāhitā sthitim // (71.2) Par.?

nūnaṃ sītā sadoṣeyaṃ tyaktā bhartrānyathā katham / (72.1) Par.?

tadetaddarśanānnityaṃ pāpaṃ saṃkrāmatīha naḥ // (72.2) Par.?

vālmīkaḥ kṛpayā caināṃ nirvāsayati nāśramāt / (73.1) Par.?

etaddarśanajaṃ pāpaṃ tapasā ca vyapohati // (73.2) Par.?

tad eta yāvad gacchāmo dvitīyaṃ kaṃcid āśramam / (74.1) Par.?

iti saṃmantrayāmāsustatrānye munayastadā // (74.2) Par.?

tadbuddhvā tānsa vālmīkirabravīnnātra saṃśayaḥ / (75.1) Par.?

śuddhaiṣā praṇidhānena mayā dṛṣṭā dvijā iti // (75.2) Par.?

tathāpy apratyayas teṣāṃ yadā sītā tadābhyadhāt / (76.1) Par.?

bhagavanto yathā vittha tathā śodhayateha mām // (76.2) Par.?

aśuddhāyāḥ śiraśchedanigrahaḥ kriyatāṃ mama / (77.1) Par.?

tac chrutvā jātakaruṇā jagadurmunayo 'tra te // (77.2) Par.?

astyatra ṭīṭibhasaronāma tīrthaṃ mahadvane / (78.1) Par.?

ṭīṭibhī hi purā kāpi bhartrānyāsaṅgaśaṅkinā // (78.2) Par.?

mithyaiva dūṣitā sādhvī cakrandāśaraṇā bhuvam / (79.1) Par.?

lokapālāṃś ca taistasyāḥ śuddhyarthaṃ tadvinirmitam // (79.2) Par.?

tatraiṣā rāghavavadhūḥ pariśuddhiṃ karotu naḥ / (80.1) Par.?

ity uktavadbhis taiḥ sākaṃ jānakī tatsaro yayau // (80.2) Par.?

yady āryaputrād anyatra na svapne 'pi mano mama / (81.1) Par.?

taduttareyaṃ sarasaḥ pāramamba vasuṃdhare // (81.2) Par.?

ity uktvaiva praviṣṭā ca tasminsarasi sā satī / (82.1) Par.?

nītā ca pāramutsaṅge kṛtvāvirbhūtayā bhuvā // (82.2) Par.?

tatastāṃ te mahāsādhvīṃ praṇemurmunayo 'khilāḥ / (83.1) Par.?

rāghavaṃ śaptum aicchaṃś ca tatparityāgamanyunā // (83.2) Par.?

yuṣmābhir āryaputrasya na dhyātavyam amaṅgalam / (84.1) Par.?

śaptumarhatha mām eva pāpāmañjalireṣa vaḥ // (84.2) Par.?

iti yad vārayāmāsa sītā tānsā pativratā / (85.1) Par.?

tena te munayas tuṣṭās tasyāḥ putrāśiṣaṃ daduḥ // (85.2) Par.?

tataḥ sā tatra tiṣṭhantī samaye suṣuve sutam / (86.1) Par.?

taṃ ca nāmnā lavaṃ cakre sa vālmīkimuniḥ śiśum // (86.2) Par.?

bālam ādāya taṃ tasyāṃ gatāyāṃ snātum ekadā / (87.1) Par.?

tena śūnyaṃ taduṭajaṃ dṛṣṭvā so 'cintayanmuniḥ // (87.2) Par.?

sthāpayitvārbhakaṃ yāti snātuṃ sā tat kva so 'rbhakaḥ / (88.1) Par.?

nītaḥ sa śvāpadeneha nūnam anyaṃ sṛjāmi tat // (88.2) Par.?

snātvāgatānyathā sītā na prāṇāndhārayediha / (89.1) Par.?

iti dhyātvā kuśaiḥ kṛtvā pavitraṃ nirmame 'rbhakam // (89.2) Par.?

lavasya sadṛśaṃ taṃ ca sa tathāsthāpayanmuniḥ / (90.1) Par.?

āgatā taṃ ca sā dṛṣṭvā muniṃ sītā vyajijñapat // (90.2) Par.?

svako 'yaṃ me sthito bālastadeṣo 'nyaḥ kuto mune / (91.1) Par.?

tac chrutvā sa yathāvṛttamuktvā munir uvāca tām // (91.2) Par.?

bhavitavyaṃ gṛhāṇaitaṃ dvitīyamanaghe sutam / (92.1) Par.?

kuśasaṃjñaṃ mayāyaṃ yatsvaprabhāvātkuśaiḥ kṛtaḥ // (92.2) Par.?

ity uktā tena muninā sītā lavakuśau sutau / (93.1) Par.?

tenaiva kṛtasaṃskārau vardhayāmāsa tatra tau // (93.2) Par.?

bālāveva ca tau divyamastragrāmamavāpatuḥ / (94.1) Par.?

vidyāś ca sarvā vālmīkamuneḥ kṣatrakumārakau // (94.2) Par.?

ekadā āśramamṛgaṃ hatvā tanmāṃsamādatuḥ / (95.1) Par.?

arcāliṅgaṃ ca vālmīkeścakratuḥ krīḍanīyakam // (95.2) Par.?

tena khinno muniḥ so 'tha sītādevyānunāthitaḥ / (96.1) Par.?

prāyaścittaṃ tayor evamādideśa kumārayoḥ // (96.2) Par.?

gatvā kuberasarasaḥ svarṇapadmānyayaṃ lavaḥ / (97.1) Par.?

tadudyānāc ca mandārapuṣpāṇyānayatu drutam // (97.2) Par.?

tair etau bhrātarāv etalliṅgam arcayatām ubhau / (98.1) Par.?

tenaitayor idaṃ pāpam upaśāntiṃ gamiṣyati // (98.2) Par.?

etac chrutvaiva kailāsaṃ sa bālo 'pi lavo yayau / (99.1) Par.?

ācaskanda kuberasya saraścopavanaṃ ca tat // (99.2) Par.?

nihatya yakṣān ādāya padmāni kusumāni ca / (100.1) Par.?

āgacchan pathi sa śrānto viśaśrāma tarostale // (100.2) Par.?

atrāntare ca rāmasya naramedhe sulakṣaṇam / (101.1) Par.?

cinvan puruṣam āgacchat tena mārgeṇa lakṣmaṇaḥ // (101.2) Par.?

sa lavaṃ samarāhūtaṃ mohanāstreṇa mohitam / (102.1) Par.?

kṣatradharmeṇa baddhvā tamayodhyāmanayatpurīm // (102.2) Par.?

tāvac ca sītām āśvāsya lavāgamanaduḥsthitām / (103.1) Par.?

vālmīkaḥ svāśrame tatra jñānī kuśam abhāṣata // (103.2) Par.?

nīto 'yodhyāmavaṣṭabhya lakṣmaṇena suto lavaḥ / (104.1) Par.?

gaccha mocaya taṃ tasmādebhir astrair vinirjitāt // (104.2) Par.?

ity uktvā dattadivyāstras tena gatvā kuśas tataḥ / (105.1) Par.?

rodhyamānāmayodhyāyāṃ yajñabhūmiṃ rurodha saḥ // (105.2) Par.?

jigāya lakṣmaṇaṃ cātra tannimittaṃ pradhāvitam / (106.1) Par.?

yuddhe divyair mahāstraistaistato rāmastamabhyagāt // (106.2) Par.?

so 'pi prabhāvād vālmīker jetuṃ nāstraiḥ śaśāka tam / (107.1) Par.?

kuśaṃ yattena papraccha ko 'rthas te ko bhavāniti // (107.2) Par.?

kuśas tato 'bravīd baddhvā lakṣmaṇenāgrajo mama / (108.1) Par.?

ānīta iha tasyāhaṃ mocanārthamihāgataḥ // (108.2) Par.?

āvāṃ lavakuśau rāmatanayāviti jānakī / (109.1) Par.?

mātā nau vakti cety uktvā tadvṛttāntaṃ śaśaṃsa saḥ // (109.2) Par.?

tataḥ sabāṣpo rāmastaṃ lavamānāyya tāvubhau / (110.1) Par.?

kaṇṭhe jagrāha saiṣo 'haṃ pāpo rāma iti bruvan // (110.2) Par.?

atha sītāṃ praśaṃsatsu vīrau paśyatsu tau śiśū / (111.1) Par.?

paureṣu militeṣv atra sa tau rāmo 'grahītsutau // (111.2) Par.?

ānāyya sītādevīṃ ca vālmīker āśramāt tataḥ / (112.1) Par.?

tayā saha sukhaṃ tasthau putranyastabharo 'tha saḥ // (112.2) Par.?

evaṃ sahante virahaṃ dhīrāściramapīdṛśam / (113.1) Par.?

na sahethe yuvāṃ putrau kathamekām api kṣapām // (113.2) Par.?

ityātmajāmalaṃkāravatīṃ pariṇayotsukām / (114.1) Par.?

naravāhanadattaṃ ca tamuktvā kāñcanaprabhā // (114.2) Par.?

nabhasā prātar āgantum agād ādāya tāṃ sutām / (115.1) Par.?

naravāhanadatto 'pi kauśāmbīṃ vimanā yayau // (115.2) Par.?

tatrānidraṃ niśi smāha gomukhastaṃ vinodayan / (116.1) Par.?

pṛthvīrūpakathāṃ deva śṛṇvimāṃ kathayāmi te // (116.2) Par.?

asti nāmnā pratiṣṭhānaṃ nagaraṃ dakṣiṇāpathe / (117.1) Par.?

pṛthvīrūpābhidhāno 'bhūdrājā tatrātirūpavān // (117.2) Par.?

taṃ parijñāninau jātu śramaṇau dvāvupeyatuḥ / (118.1) Par.?

vilokyādbhutarūpaṃ ca tāvevaṃ nṛpamūcatuḥ // (118.2) Par.?

devāvāṃ pṛthivīṃ bhrāntau na ca rūpeṇa te samam / (119.1) Par.?

anyaṃ pumāṃsaṃ nārīṃ vā dṛṣṭavantau kvacit prabho // (119.2) Par.?

kiṃtu muktipuradvīpe rājño rūpadharasya yā / (120.1) Par.?

asti hemalatādevyāṃ jātā rūpalatā sutā // (120.2) Par.?

saikā te sadṛśī kanyā tasyāścaiko bhavānapi / (121.1) Par.?

yuvayor yadi saṃyogo bhavetsyātsukṛtaṃ tataḥ // (121.2) Par.?

iti śramaṇavākyena samaṃ madanasāyakāḥ / (122.1) Par.?

praviśya śrutimārgeṇa rājñas tasyālagan hṛdi // (122.2) Par.?

tataḥ samutsuko rājā nijaṃ citrakarottamam / (123.1) Par.?

kumāridattanāmānaṃ pṛthvīrūpaḥ samādiśat // (123.2) Par.?

paṭe yathāvallikhitāṃ samādāya madākṛtim / (124.1) Par.?

etābhyāṃ saha bhikṣubhyāṃ dvīpaṃ muktipuraṃ vraja // (124.2) Par.?

tatra rūpadharākhyasya rājñas tadduhitus tathā / (125.1) Par.?

yuktyā rūpalatāyāstvaṃ madākāraṃ pradarśaya // (125.2) Par.?

paśya kiṃ sa nṛpastāṃ me dadāti tanayāṃ na vā / (126.1) Par.?

tāṃ ca rūpalatāṃ citre likhitvā tvamihānaya // (126.2) Par.?

evam uktvābhilekhyaṃ svaṃ rūpaṃ citrapaṭe sa tam / (127.1) Par.?

sabhikṣukaṃ citrakaraṃ dvīpaṃ taṃ prāhiṇonnṛpaḥ // (127.2) Par.?

te ca kramāccitrakaraśramaṇāḥ prasthitās tataḥ / (128.1) Par.?

prāpuḥ patrapuraṃ nāma nagaraṃ vāridhestaṭe // (128.2) Par.?

tataḥ pravahaṇārūḍhā gatvaivāmbudhivartmanā / (129.1) Par.?

te taṃ muktipuradvīpamavāpuḥ pañcabhir dinaiḥ // (129.2) Par.?

tatra citrakaro gatvā rājadvāri sa cīrikām / (130.1) Par.?

mama citrakarastulyo nānyo 'stītyudalambayat // (130.2) Par.?

tadbuddhvaiva samāhūto rājñā rūpadhareṇa saḥ / (131.1) Par.?

praviśya rājabhavanaṃ taṃ praṇamya vyajijñapat // (131.2) Par.?

pṛthvīṃ bhrāntvā mayā deva na dṛṣṭaścitrakṛtsamaḥ / (132.1) Par.?

tad devāsuramartyānām ālikhāmi kamādiśa // (132.2) Par.?

tac chrutvānāyya nṛpatiḥ sa tāṃ rūpalatāṃ puraḥ / (133.1) Par.?

imāmālikhya matputrīṃ darśayetyādideśa tam // (133.2) Par.?

tataḥ kumāridattaḥ sa citrakṛdrājakanyakām / (134.1) Par.?

ālikhya darśayāmāsa tadrūpām eva tāṃ paṭe // (134.2) Par.?

atha rūpadharo rājā tuṣṭo matvā vicakṣaṇam / (135.1) Par.?

pṛcchati sma sa taṃ citrakaraṃ jāmātṛlipsayā // (135.2) Par.?

bhadra pṛthvī tvayā bhrāntā tadbrūhi yadi kutracit / (136.1) Par.?

rūpe madduhitustulyā dṛṣṭā strī puruṣo 'pi vā // (136.2) Par.?

ity uktastena rājñā sa citrakṛtpratyuvāca tam / (137.1) Par.?

naitattulyā mayā dṛṣṭā nārī kāpyathavā pumān // (137.2) Par.?

ekas tu pṛthvīrūpākhyaḥ pratiṣṭhāne mahīpatiḥ / (138.1) Par.?

dṛṣṭaḥ samo 'syās tenaiṣā yujyate yadi sādhu tat // (138.2) Par.?

tulyarūpā yadā tena na prāptā rājakanyakā / (139.1) Par.?

tadā nave 'pi tāruṇye sa tiṣṭhaty aparigrahaḥ // (139.2) Par.?

mayā ca deva dṛṣṭvaiva sa rājā locanapriyaḥ / (140.1) Par.?

abhilikhya paṭe samyag gṛhīto rūpakautukāt // (140.2) Par.?

tac chrutvā kiṃ paṭaḥ so 'stīty uktastena sa bhūbhṛtā / (141.1) Par.?

astīty uktvā ca taṃ citrakaraḥ paṭamadarśayat // (141.2) Par.?

tatra dṛṣṭvā sa tadrūpaṃ pṛthvīrūpasya bhūpateḥ / (142.1) Par.?

rājā rūpadharo dadhre vismayāghūrṇitaṃ śiraḥ // (142.2) Par.?

jagāda ca vayaṃ dhanyā yair atra likhito 'py ayam / (143.1) Par.?

dṛṣṭo rājā namastebhyaḥ sākṣātpaśyanti ye tvamum // (143.2) Par.?

etatpitṛvacaḥ śrutvā dṛṣṭvā citre ca taṃ nṛpam / (144.1) Par.?

sotkā rūpalatā nānyacchuśrāva na dadarśa ca // (144.2) Par.?

tāṃ māramohitāṃ dṛṣṭvā sutāṃ sa nṛpatistadā / (145.1) Par.?

kumāridattaṃ taṃ citrakaraṃ rūpadharo 'bhyadhāt // (145.2) Par.?

nāstyālekhyavisaṃvādastava tadduhiturmama / (146.1) Par.?

etasyāḥ pratirūpaḥ sa pṛthvīrūpanṛpaḥ patiḥ // (146.2) Par.?

tadetaṃ matsutācitrapaṭaṃ nītvādya satvaram / (147.1) Par.?

pṛthvīrūpanṛpāyaitāṃ matsutāṃ gaccha darśaya // (147.2) Par.?

ākhyāya ca yathāvṛttaṃ tattasmai yadi rocate / (148.1) Par.?

tadiha drutamāyātu pariṇetuṃ madātmajām // (148.2) Par.?

ity uktvā pūjayitvārthaiḥ sa sahasthitabhikṣukam / (149.1) Par.?

rājā citrakaraṃ taṃ ca svadūtaṃ ca visṛṣṭavān // (149.2) Par.?

te gatvāmbudhimuttīrya citrakṛddūtabhikṣukāḥ / (150.1) Par.?

sarve prāpuḥ pratiṣṭhānaṃ pṛthvīrūpanṛpāntikam // (150.2) Par.?

tatra prābhṛtakaṃ dattvā kāryaṃ tatte yathākṛtam / (151.1) Par.?

sarūpadharasaṃdeśaṃ rājñe tasmai nyavedayan // (151.2) Par.?

sa ca citrakṛdetasmai bhūbhṛte tām adarśayat / (152.1) Par.?

kumāridattaś citrasthāṃ priyāṃ rūpalatāṃ tataḥ // (152.2) Par.?

rājñas tasya vapuṣyasyā lāvaṇyasarasīkṣataḥ / (153.1) Par.?

magnā dṛṣṭis tathā naitāmuddhartumaśakadyathā // (153.2) Par.?

sa hi kāntisudhāsyandamayīṃ tāṃ carvayan nṛpaḥ / (154.1) Par.?

nātṛpyad adhikotkaṇṭhyaś cakoraś candrikām iva // (154.2) Par.?

prāha citrakaraṃ taṃ ca vandyo vedhāḥ karaś ca te / (155.1) Par.?

yenedaṃ nirmitaṃ rūpaṃ yena cālikhitaṃ sakhe // (155.2) Par.?

tadrūpadharabhūpasya pratipannaṃ vaco mayā / (156.1) Par.?

yāmi muktipuradvīpam upayacche ca tatsutām // (156.2) Par.?

ity uktvā citrakṛddūtabhikṣūn saṃmānya tāndhanaiḥ / (157.1) Par.?

āsīccitrapaṭaṃ paśyan pṛthvīrūpanṛpo 'tra saḥ // (157.2) Par.?

udyānādiṣu nītvā ca taddinaṃ virahāturaḥ / (158.1) Par.?

lagnaṃ niścitya so 'nyedyuścakre rājā prayāṇakam // (158.2) Par.?

yukto vividhahastyaśvaiḥ sāmantai rājasūnubhiḥ / (159.1) Par.?

sarūpadharadūtais taiś citrakṛcchramaṇaiś ca saḥ // (159.2) Par.?

gajendraṃ maṅgalaghaṭaṃ rājāruhya vrajandinaiḥ / (160.1) Par.?

prāpya vindhyāṭavīdvāraṃ sāyaṃ tatra sthito 'bhavat // (160.2) Par.?

dvitīye 'hni samāruhya śatrumardanasaṃjñakam / (161.1) Par.?

gajaṃ tāmaṭavīṃ rājā pṛthvīrūpo viveśa saḥ // (161.2) Par.?

yāvadyāti puras tāvad agrayāyi nijaṃ balam / (162.1) Par.?

palāyamānamāvṛttamakasmātsa vyalokayat // (162.2) Par.?

kimetaditi saṃbhrāntaṃ taṃ cābhyetyaiva tatkṣaṇam / (163.1) Par.?

rājaputro gajārūḍho nirbhayākhyo vyajijñapat // (163.2) Par.?

devāgrato 'timahatī bhillasenābhidhāvitā / (164.1) Par.?

tair vāraṇā naḥ pañcāśanmātrā bhillai raṇe hatāḥ // (164.2) Par.?

sahasraṃ ca padātīnām aśvānāṃ ca śatatrayam / (165.1) Par.?

asmadīyaiś ca bhillānāṃ dve sahasre nipātite // (165.2) Par.?

eko hy asmadbale dṛṣṭaḥ kabandho dvau ca tadbale / (166.1) Par.?

tato 'smatsainikā bhagnāstadbāṇāśanipīḍitāḥ // (166.2) Par.?

tac chrutvā kupito rājā pṛthvīrūpaḥ pradhāvya saḥ / (167.1) Par.?

jaghāna senāṃ bhillānāṃ kauravāṇāmivārjunaḥ // (167.2) Par.?

nirbhayādibhir anyeṣu nihateṣv atha dasyuṣu / (168.1) Par.?

sa cichedaikabhallena bhillasenāpateḥ śiraḥ // (168.2) Par.?

bāṇavraṇagaladraktastasyebhaḥ śatrumardanaḥ / (169.1) Par.?

sadhātunirjharodgāramañjanādriṃ vyaḍambayat // (169.2) Par.?

tato labdhajayāvṛtte tatsainye milite 'khile / (170.1) Par.?

palāyya hataśeṣāste bhillā daśa diśo yayuḥ // (170.2) Par.?

tato nivṛttasaṅgrāmaḥ pṛthvīrūpo mahīpatiḥ / (171.1) Par.?

sa rūpadharadūtena stūyamānaparākramaḥ // (171.2) Par.?

vraṇitānīkaviśrāntyai tasyāmevāṭavībhuvi / (172.1) Par.?

vijayī sarasītīre divasaṃ vasati sma tam // (172.2) Par.?

prātas tataḥ prayātaś ca sa rājā kramaśo vrajan / (173.1) Par.?

tatprāpa nagaraṃ patrapuraṃ tīrasthamambudheḥ // (173.2) Par.?

tatraikāhaṃ viśaśrāma tatratyena mahībhṛtā / (174.1) Par.?

udāracaritākhyena racitocitasatkriyaḥ // (174.2) Par.?

tenaivopahṛtair yānapātraistīrtvā ca sāgaram / (175.1) Par.?

aṣṭabhir divasaiḥ prāpa dvīpaṃ muktipuraṃ sa tat // (175.2) Par.?

buddhvā rūpadharastac ca rājā hṛṣṭastamabhyagāt / (176.1) Par.?

milataḥ sma ca tau bhūpau kṛtakaṇṭhagrahau mithaḥ // (176.2) Par.?

tatastena samaṃ pṛthvīrūpo rājā sa tatpuram / (177.1) Par.?

viveśa pauranārīṇāṃ pīyamāna ivekṣaṇaiḥ // (177.2) Par.?

tatra hemalatā rājñī sa ca rūpadharo nṛpaḥ / (178.1) Par.?

dṛṣṭvānurūpaṃ duhiturbhartāraṃ taṃ nanandatuḥ // (178.2) Par.?

atha svasaṃpaducitai rājñā rūpadhareṇa saḥ / (179.1) Par.?

ācārair arcitastasthau pṛthvīrūpo 'tra pārthivaḥ // (179.2) Par.?

anyedyuś ca cirotkāyā vedīmāruhya śobhane / (180.1) Par.?

lagne rūpalatāyāḥ sa sotsavaḥ pāṇimagrahīt // (180.2) Par.?

satyaṃ śrutaṃ tvayā pūrvam iti vaktum iva śrutim / (181.1) Par.?

prāpotphullā tayor dṛṣṭir anyonyarūpadarśinoḥ // (181.2) Par.?

ratnāni lājamokṣeṣu dvayo rūpadharastayoḥ / (182.1) Par.?

dadau tathā yathā saiṣa mene ratnākaro janaiḥ // (182.2) Par.?

nirvṛtte ca sutodvāhe citrakṛcchramaṇānsa tān / (183.1) Par.?

sampūjya vastrābharaṇaiḥ sarvānanyānapūjayat // (183.2) Par.?

tataḥ pure sthitas tasmin pṛthvīrūpanṛpo 'tra saḥ / (184.1) Par.?

taddvīpocitam āhāraṃ bheje pānaṃ ca sānugaḥ // (184.2) Par.?

nṛttagītādibhir yāte dine naktaṃ viveśa ca / (185.1) Par.?

sūtko rūpalatāvāsabhavanaṃ so 'vanīpatiḥ // (185.2) Par.?

āstīrṇaratnaparyaṅkaṃ ratnakuṭṭimaśobhitam / (186.1) Par.?

ratnastambhombhitābhogaṃ ratnadīpaprakāśitam // (186.2) Par.?

tatra bheje tayā sākaṃ sa rūpalatayā yuvā / (187.1) Par.?

cirasaṃkalpaguṇitaṃ yathecchaṃ suratotsavam // (187.2) Par.?

surataśramasuptaś ca paṭhadbhir bandimāgadhaiḥ / (188.1) Par.?

bodhitaḥ prātar utthāya tasthāvindro yathā divi // (188.2) Par.?

evaṃ daśa dināny atra pṛthvīrūpanṛpo 'vasat / (189.1) Par.?

dvīpe navanavair bhogair vilasañ śvaśurāhṛtaiḥ // (189.2) Par.?

ekādaśe dine yuktaḥ sa rūpalatayā tataḥ / (190.1) Par.?

gaṇakānumato rājā pratasthe kṛtamaṅgalaḥ // (190.2) Par.?

kṛtānuyātraḥ śvaśureṇā samudrataṭaṃ ca saḥ / (191.1) Par.?

vadhvā saha pravahaṇānyārurohānugānvitaḥ // (191.2) Par.?

dināṣṭakena tīrtvābdhiṃ tīrasthe milite bale / (192.1) Par.?

udāracarite cāgraprāpte patrapuraṃ yayau // (192.2) Par.?

tatropacaritastena rājñā viśramya kānicit / (193.1) Par.?

dināni sa tataḥ prāyātpṛthvīrūpo nareśvaraḥ // (193.2) Par.?

priyāṃ rūpalatāṃ hastinyāropya jayamaṅgale / (194.1) Par.?

kalyāṇagirināmānam ātmanāruhya ca dvipam // (194.2) Par.?

gacchan kramād avirataiḥ so 'tha rājā prayāṇakaiḥ / (195.1) Par.?

utpatākadhvajaṃ prāpa pratiṣṭhānaṃ nijaṃ puram // (195.2) Par.?

tatra rūpalatāṃ dṛṣṭvā rūpadarpaṃ purāṅganāḥ / (196.1) Par.?

jahus tatkālam āścaryanirnimeṣavilocanāḥ // (196.2) Par.?

rājadhānīṃ praviśyātha pṛthvīrūpaḥ kṛtotsavaḥ / (197.1) Par.?

dadau citrakṛte tasmai grāmān rājā dhanaṃ ca saḥ // (197.2) Par.?

śramaṇau pūjayitvā ca vasubhistau yathocitam / (198.1) Par.?

sāmantānsacivānrājaputrāṃś ca samamānayat // (198.2) Par.?

tataḥ sa rūpalatayā priyayā sahitastayā / (199.1) Par.?

jīvalokasukhaṃ tatra bheje pṛthvīpatiḥ kṛtī // (199.2) Par.?

ityākhyāya kathāṃ mantrī gomukhastatsukhonmukhaḥ / (200.1) Par.?

naravāhanadattāya tam uvācotsukaṃ punaḥ // (200.2) Par.?

evaṃ viṣahyate dhīraiḥ sakleśo virahaściram / (201.1) Par.?

tvaṃ punaḥ sahase naikām api deva niśāṃ katham // (201.2) Par.?

prātar bhavān alaṃkāravatīṃ hi pariṇeṣyati / (202.1) Par.?

gomukhenaivamukte ca tatra tatsamayāgataḥ // (202.2) Par.?

yaugandharāyaṇasuto marubhūtirabhāṣata / (203.1) Par.?

adṛṣṭasmarasaṃtāpaḥ svasthastvaṃ kiṃ na jalpasi // (203.2) Par.?

tāvaddhate pumāndhairyaṃ vivekaṃ śīlam eva ca / (204.1) Par.?

yāvat patati kāmasya sāyakānāṃ na gocare // (204.2) Par.?

dhanyāḥ sarasvatī skando jinaś ca jagati trayaḥ / (205.1) Par.?

paṭāntalagnatṛṇavat kṣipto vyādhūya yaiḥ smaraḥ // (205.2) Par.?

marubhūtau vadatyevamudvignaṃ vīkṣya gomukham / (206.1) Par.?

naravāhanadattas taṃ samarthayitum abhyadhāt // (206.2) Par.?

vinodanārthametanme gomukho yuktamuktavān / (207.1) Par.?

snigdho hi virahāyāse sādhuvādaṃ dadāti kim // (207.2) Par.?

samāśvāso yathāśakti svajanair virahāturaḥ / (208.1) Par.?

ataḥ paraṃ sa jānāti devaścāsamasāyakaḥ // (208.2) Par.?

ityādi jalpañchṛṇvaṃś ca tāstāḥ parijanātkathāḥ / (209.1) Par.?

naravāhanadattas tāṃ triyāmāmatyavāhayat // (209.2) Par.?

atha sa prātar utthāya vihitāvaśyakakriyaḥ / (210.1) Par.?

gaganād avarohantīm apaśyat kāñcanaprabhām // (210.2) Par.?

bhartrālaṃkāraśīlena dharmaśīlena sūnunā / (211.1) Par.?

tayālaṃkāravatyā ca svaduhitrā samanvitām // (211.2) Par.?

te cāvatīrya sarve 'pi tatsamīpam upāgaman / (212.1) Par.?

abhyanandac ca tānso 'pi taṃ ca te 'pi yathocitam // (212.2) Par.?

tāvac ca hemaratnādibhāravāhāḥ sahasraśaḥ / (213.1) Par.?

anye 'py avataranti sma tatra vidyādharā divaḥ // (213.2) Par.?

vijñāyaitaṃ ca vṛttāntaṃ vatsarājaḥ samantrikaḥ / (214.1) Par.?

sapatnīkaś ca tatrāgāt tanayotkarṣaharṣitaḥ // (214.2) Par.?

yathārhavihitātithye tasmin vatseśvare 'tha saḥ / (215.1) Par.?

rājālaṃkāraśīlas tam uvāca praṇayānataḥ // (215.2) Par.?

rājannalaṃkāravatī kanyeyaṃ tanayā mama / (216.1) Par.?

jātaiva caiṣā vyādiṣṭā gaganodgatayā girā // (216.2) Par.?

naravāhanadattasya bhāryāmuṣya sutasya te / (217.1) Par.?

sarvavidyādharendrāṇāṃ bhāvinaścakravartinaḥ // (217.2) Par.?

tadetasmai dadāmyenāṃ lagno hy adyānayoḥ śubhaḥ / (218.1) Par.?

etadarthaṃ militvāhametaiḥ sarvair ihāgataḥ // (218.2) Par.?

etadvidyādharendrasya tasya vatseśvaro vacaḥ / (219.1) Par.?

mahānanugraha iti bruvann abhinananda saḥ // (219.2) Par.?

atha nijavidyāvibhavāt pāṇitalotpāditena toyena / (220.1) Par.?

abhyukṣati sma so 'ṅganabhūmiṃ vidyādharādhīśaḥ // (220.2) Par.?

tatrotpede vedī kanakamayī divyavastrasaṃchannā / (221.1) Par.?

nānāratnamayaṃ cāpy akṛtrimaṃ kautukāgāram // (221.2) Par.?

uttiṣṭha lagnavelā prāptā snāhītyuvāca tadanu kṛtī / (222.1) Par.?

taṃ naravāhanadattaṃ rājālaṃkāraśīlo 'sau // (222.2) Par.?

snātāya kautukabhṛte vedīmānīya dhṛtavadhūveṣām / (223.1) Par.?

hṛṣṭo 'laṃkāravatīṃ sa dadau manasātmajāṃ tasmai // (223.2) Par.?

maṇikanakavastrabhūṣaṇabhārasahasrāṇi divyanārīśca / (224.1) Par.?

agnau lājavisargeṣv adadāc ca sa sātmajo duhituḥ // (224.2) Par.?

nirvṛtte ca vivāhe sarvān saṃmānya tadanu cāmantrya / (225.1) Par.?

saha patnyā putreṇa ca nabhasaiva yathāgataṃ sa yayau // (225.2) Par.?

atha vīkṣya tathopacaryamāṇaṃ praṇataiḥ khecararājabhis tanūjam / (226.1) Par.?

udayonmukham atra vatsarājo muditas taṃ ciram utsavaṃ tatāna // (226.2) Par.?

sa ca naravāhanadattaḥ sadvṛttamanoramām udāraguṇām / (227.1) Par.?

prāpyālaṃkāravatīṃ vāṇīm iva sukavir āsta tadrasikaḥ // (227.2) Par.?

Duration=1.3389229774475 secs.