Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17501

Click on a sentence to show its analysis
Keep the mouse pointer over a lemma to show its meanings.

tataḥ somaprabhāṃ yātāṃ smarantī tāṃ priyāṃ sakhīm / (1.1) Par.?

kaliṅgasenā saṃtyaktanijadeśasvabāndhavā // (1.2) Par.?

sā vilambitavatseśapāṇigrahamahotsavā / (2.1) Par.?

narendrakanyā kauśāmbyāṃ mṛgīvāsīdvanacyutā // (2.2) Par.?

kaliṅgasenāvivāhavilambanavicakṣaṇān / (3.1) Par.?

gaṇakān prati sāsūya iva vatseśvaro 'pi ca // (3.2) Par.?

autsukyavimanāstasmin dine ceto vinodayan / (4.1) Par.?

devyā vāsavadattāyā nivāsabhavanaṃ yayau // (4.2) Par.?

tatra sā taṃ patiṃ devī nirvikārā viśeṣataḥ / (5.1) Par.?

upācarat svopacāraiḥ prāṅmantrivaraśikṣitā // (5.2) Par.?

kaliṅgasenāvṛttānte khyāte 'py avikṛtā katham / (6.1) Par.?

devīyamiti sa dhyātvā rājā jijñāsurāha tām // (6.2) Par.?

kaccid devi tvayā jñātaṃ svayaṃvarakṛte mama / (7.1) Par.?

kaliṅgasenānāmaiṣā rājaputrī yad āgatā // (7.2) Par.?

tac chrutvaivāvibhinnena mukharāgeṇa sābravīt / (8.1) Par.?

jñātaṃ mayātiharṣo me lakṣmīḥ sā hy āgateha naḥ // (8.2) Par.?

vaśage hi mahārāje tatprāptyā tatpitary api / (9.1) Par.?

kaliṅgadatte pṛthvī te sutarāṃ vartate vaśe // (9.2) Par.?

ahaṃ ca tvadvibhūtyaiva sukhitā tvatsukhena ca / (10.1) Par.?

āryaputra tavaitac ca viditaṃ prāgapi sthitam // (10.2) Par.?

tanna dhanyāsmi kiṃ yasyā mama bhartā tvamīdṛśaḥ / (11.1) Par.?

yaṃ rājakanyā vāñchanti vāñchyamānā nṛpāntaraiḥ // (11.2) Par.?

evaṃ vatseśvaraḥ prokto devyā vāsavadattayā / (12.1) Par.?

yaugandharāyaṇaprattaśikṣayāntastutoṣa saḥ // (12.2) Par.?

tayaiva ca sahāsevya pānaṃ tadvāsake niśi / (13.1) Par.?

tasyāṃ suṣvāpa madhye ca prabuddhaḥ samacintayat // (13.2) Par.?

kiṃ svin mahānubhāvetthaṃ devī māmanuvartate / (14.1) Par.?

kaliṅgasenām api yatsapatnīmanumanyate // (14.2) Par.?

kathaṃ vā śaknuyādetāṃ soḍhuṃ saiṣā tapasvinī / (15.1) Par.?

padmāvatīvivāhe 'pi yā daivānna jahāvasūn // (15.2) Par.?

tad asyāś ced aniṣṭaṃ syātsarvanāśastato bhavet / (16.1) Par.?

etadālambanāḥ putraśvaśuryaśvaśurāś ca me // (16.2) Par.?

padmāvatī ca rājyaṃ ca kimabhyadhikamucyate / (17.1) Par.?

ataḥ kaliṅgasenaiṣā pariṇeyā kathaṃ mayā // (17.2) Par.?

evamālocya vatseśo niśānte nirgatas tataḥ / (18.1) Par.?

aparāhṇe yayau devyāḥ padmāvatyāḥ sa mandiram // (18.2) Par.?

sāpyenam āgataṃ dattaśikṣā vāsavadattayā / (19.1) Par.?

tathaivopācarattadvatpṛṣṭāvocattathaiva ca // (19.2) Par.?

tato 'nyedyustayordevyorekaṃ cittaṃ vacaś ca tat / (20.1) Par.?

yaugandharāyaṇāyāsau śaśaṃsa vimṛśannṛpaḥ // (20.2) Par.?

so 'pi taṃ vīkṣya rājānaṃ vicārapatitaṃ śanaiḥ / (21.1) Par.?

kālavedī jagādaivaṃ mantrī yaugandharāyaṇaḥ // (21.2) Par.?

jāne 'haṃ naitadetāvadabhiprāyo 'tra dāruṇaḥ / (22.1) Par.?

devībhyāṃ jīvitatyāgadārḍhyāduktaṃ hi tattathā // (22.2) Par.?

anyāsakte gate ca dyāṃ striyo maraṇaniścitāḥ / (23.1) Par.?

bhavanty adainyagambhīrāḥ sādhvyaḥ sarvatra niḥspṛhāḥ // (23.2) Par.?

asahyaṃ hi puraṃdhrīṇāṃ premṇo gāḍhasya khaṇḍanam / (24.1) Par.?

tathā ca rājaṃs tatraitāṃ śrutasenakathāṃ śṛṇu // (24.2) Par.?

abhūd dakṣiṇabhūmau prāggokarṇākhye pure nṛpaḥ / (25.1) Par.?

śrutasena iti khyātaḥ kulabhūṣāśrutānvitaḥ // (25.2) Par.?

tasya caikābhavac cintā rājñaḥ sampūrṇasaṃpadaḥ / (26.1) Par.?

ātmānurūpāṃ bhāryāṃ yat sa na tāvad avāptavān // (26.2) Par.?

ekadā ca nṛpaḥ kurvaṃś cintāṃ tāṃ tatkathāntare / (27.1) Par.?

agniśarmābhidhānena jagade so 'grajanmanā // (27.2) Par.?

āścarye dve mayā dṛṣṭe te rājanvarṇaye śṛṇu / (28.1) Par.?

tīrthayātrāgataḥ pañcatīrthīṃ tām ahamāptavān // (28.2) Par.?

yasyāmapsarasaḥ pañca grāhatvamṛṣiśāpataḥ / (29.1) Par.?

prāptāḥ satīr udaharat tīrthayātrāgato 'rjunaḥ // (29.2) Par.?

tatra tīrthavare snātvā pañcarātropavāsinām / (30.1) Par.?

nārāyaṇānucaratādāyini snāyināṃ nṛṇām // (30.2) Par.?

yāvadvrajāmi tāvac ca lāṅgalollikhitāvanim / (31.1) Par.?

gāyantaṃ kaṃcidadrākṣaṃ kārṣikaṃ kṣetramadhyagam // (31.2) Par.?

sa pṛṣṭaḥ kārṣiko mārgaṃ mārgāyātena kenacit / (32.1) Par.?

pravrājakena sadvākyaṃ nāśṛṇodgītatatparaḥ // (32.2) Par.?

tataḥ sa tasmai cukrodha parivrāḍ vidhuraṃ bruvan / (33.1) Par.?

so 'pi gītaṃ vimucyātha kārṣikas tam abhāṣata // (33.2) Par.?

aho pravrājako 'si tvaṃ dharmasyāṃśaṃ na vetsyasi / (34.1) Par.?

mūrkheṇāpi mayā jñātaṃ sāraṃ dharmasya yatpunaḥ // (34.2) Par.?

tac chrutvā kiṃ tvayā jñātam iti tena ca kautukāt / (35.1) Par.?

pravrājakena pṛṣṭaḥ san kārṣikaḥ sa jagāda tam // (35.2) Par.?

ihopaviśa pracchāye śṛṇu yāvad vadāmi te / (36.1) Par.?

asmin pradeśe vidyante brāhmaṇā bhrātaras trayaḥ // (36.2) Par.?

brahmadattaḥ somadatto viśvadattaś ca puṇyakṛt / (37.1) Par.?

teṣāṃ jyeṣṭhau dāravantau kaniṣṭhas tv aparigrahaḥ // (37.2) Par.?

sa tayor jyeṣṭhayor ājñāṃ kurvan karmakaro yathā / (38.1) Par.?

mayā sahāsīd akrudhyann ahaṃ teṣāṃ hi kārṣikaḥ // (38.2) Par.?

tau ca jyeṣṭhāvabudhyetāṃ mṛduṃ taṃ buddhivarjitam / (39.1) Par.?

sādhum atyaktasanmārgam ṛjum āyāsavarjitam // (39.2) Par.?

ekadā bhrātṛjāyābhyāṃ sakāmābhyāṃ raho 'rthitaḥ / (40.1) Par.?

kaniṣṭho viśvadatto 'tha mātṛvatte nirākarot // (40.2) Par.?

tatas te nijayorbhartrorubhe gatvā mṛṣocatuḥ / (41.1) Par.?

vāñchatyāvāṃ rahasyeṣa kanīyānyuvayoriti // (41.2) Par.?

tena taṃ prati tau jyeṣṭhau sāntaḥkopau babhūvatuḥ / (42.1) Par.?

sad asad vā na vidatuḥ kustrīvacanamohitau // (42.2) Par.?

athaitau bhrātarau jātu viśvadattaṃ tamūcatuḥ / (43.1) Par.?

gaccha tvaṃ kṣetramadhyasthaṃ valmīkaṃ taṃ samīkuru // (43.2) Par.?

tathety āgatya valmīkaṃ kuddālenākhanatsa tam / (44.1) Par.?

mā maivaṃ kṛṣṇasarpo 'tra vasatītyudito mayā // (44.2) Par.?

tac chrutvāpi sa valmīkam akhanad yad bhavatv iti / (45.1) Par.?

pāpaiṣiṇor apy ādeśaṃ jyeṣṭhabhrātror alaṅghayan // (45.2) Par.?

khanyamānāt tataḥ prāpa kalaśaṃ hemapūritam / (46.1) Par.?

na kṛṣṇasarpaṃ dharmo hi sāṃnidhyaṃ kurute satām // (46.2) Par.?

taṃ ca nītvā sa kalaśaṃ bhrātṛbhyāṃ sarvam arpayat / (47.1) Par.?

nivāryamāṇo 'pi mayā jyeṣṭhābhyāṃ dṛḍhabhaktitaḥ // (47.2) Par.?

tau punastata evāṃśaṃ dattvā prerya ca ghātakān / (48.1) Par.?

tasyācchedayatāṃ pāṇipādaṃ dhanajihīrṣayā // (48.2) Par.?

tathāpi na sa cukrodha nirmanyurbhrātarau prati / (49.1) Par.?

tena satyena tasyātra hastapādamajāyata // (49.2) Par.?

tadāprabhṛti tad dṛṣṭvā tyaktaḥ krodho 'khilo mayā / (50.1) Par.?

tvayā tu tāpasenāpi krodho 'dyāpi na mucyate // (50.2) Par.?

akrodhena jitaḥ svargaḥ paśyaitadadhunaiva bhoḥ / (51.1) Par.?

ity uktvaiva tanuṃ tyaktvā kārṣikaḥ sa divaṃ gataḥ // (51.2) Par.?

ity āścaryaṃ mayā dṛṣṭaṃ dvitīyaṃ śṛṇu bhūpate / (52.1) Par.?

ity uktvā śrutasenaṃ sa nṛpaṃ vipro 'bravītpunaḥ // (52.2) Par.?

tato 'pi tīrthayātrārthaṃ paryaṭannambudhestaṭe / (53.1) Par.?

ahaṃ vasantasenasya rājño rāṣṭramavāptavān // (53.2) Par.?

tatra bhoktuṃ praviṣṭaṃ māṃ rājasattre 'bruvan dvijāḥ / (54.1) Par.?

brahman pathāmunā mā gāḥ sthitā hy atra nṛpātmajā // (54.2) Par.?

vidyuddyotābhidhānā tāṃ paśyedapi muniryadi / (55.1) Par.?

sa kāmaśaranirbhinnaḥ prāpyonmādaṃ na jīvati // (55.2) Par.?

tato 'haṃ pratyavocaṃ tānnaitaccitraṃ sadā hy aham / (56.1) Par.?

paśyāmyaparakandarpaṃ śrutasenamahīpatim // (56.2) Par.?

yātrādau nirgate yasmin rakṣibhir dṛṣṭigocarāt / (57.1) Par.?

utsāryante satīvṛttabhaṅgabhītyā kulāṅganāḥ // (57.2) Par.?

ity uktavantaṃ vijñāya bhāvatkaṃ bhojanāya mām / (58.1) Par.?

nṛpāntikaṃ nītavantau sattrādhipapurohitau // (58.2) Par.?

tatra sā rājatanayā vidyuddyotā mayekṣitā / (59.1) Par.?

kāmasyeva jaganmohamantravidyā śarīriṇī // (59.2) Par.?

cirāttaddarśanakṣobhaṃ niyamyāhamacintayam / (60.1) Par.?

asmatprabhoś ced bhāryeyaṃ bhaved rājyaṃ sa vismaret // (60.2) Par.?

tathāpi kathanīyo 'yamudantaḥ svāmine mayā / (61.1) Par.?

unmādinīdevasenavṛttānto hy anyathā bhavet // (61.2) Par.?

devasenasya nṛpateḥ purā rāṣṭre vaṇiksutā / (62.1) Par.?

unmādinītyabhūtkanyā jagadunmādakāriṇī // (62.2) Par.?

āveditāpi sā pitrā na tenāttā mahībhṛtā / (63.1) Par.?

vipraiḥ kulakṣaṇety uktā tasya vyasanarakṣibhiḥ // (63.2) Par.?

pariṇītā tadīyena mantrimukhyena sā tataḥ / (64.1) Par.?

vātāyanāgrād ātmānaṃ rājñe 'smai jātv adarśayat // (64.2) Par.?

tayā bhujaṃgyā rājendro dūrād dṛṣṭiviṣāhataḥ / (65.1) Par.?

muhur mumūrcha na ratiṃ lebhe nāhāramāharat // (65.2) Par.?

prārthito 'pi ca tadbhartṛpramukhaiḥ so 'tha mantribhiḥ / (66.1) Par.?

dhārmikastāṃ na jagrāha tatsaktaś ca jahāvasūn // (66.2) Par.?

tadīdṛśe pramāde 'tra vṛtte drohaḥ kṛto bhavet / (67.1) Par.?

ity ālocya mayoktaṃ te citrametya tato 'dya tat // (67.2) Par.?

śrutvaitatsa dvijāttasmānmadanājñānibhaṃ vacaḥ / (68.1) Par.?

vidyuddyotāhṛtamanāḥ śrutasenanṛpo 'bhavat // (68.2) Par.?

tatkṣaṇaṃ ca visṛjyaiva tatra vipraṃ tam eva saḥ / (69.1) Par.?

tathākarodyathānīya śīghraṃ tāṃ pariṇītavān // (69.2) Par.?

tataḥ sā nṛpates tasya vidyuddyotā nṛpātmajā / (70.1) Par.?

śarīrāvyatiriktāsīdbhāskarasya prabhā yathā // (70.2) Par.?

atha svayaṃvarāyāgāt taṃ nṛpaṃ rūpagarvitā / (71.1) Par.?

kanyakā mātṛdattākhyā mahādhanavaṇiksutā // (71.2) Par.?

adharmabhītyā jagrāha sa rājā tāṃ vaṇiksutām / (72.1) Par.?

vidyuddyotātha tad buddhvā hṛtsphoṭena vyapadyata // (72.2) Par.?

rājāpy āgatya tāṃ kāntāṃ paśyann eva tathā gatām / (73.1) Par.?

aṅke kṛtvā sa vilapan sadyaḥ prāṇair vyayujyata // (73.2) Par.?

tato vaṇiksutā vahniṃ mātṛdattā viveśa sā / (74.1) Par.?

itthaṃ praṇaṣṭaṃ sarvaṃ tad api rāṣṭraṃ sarājakam // (74.2) Par.?

ato rājan prakṛṣṭasya bhaṅgaḥ premṇaḥ suduḥsahaḥ / (75.1) Par.?

viśeṣeṇa manasvinyā devyā vāsavadattayā // (75.2) Par.?

tasmāt kaliṅgasenaiṣā pariṇītā yadi tvayā / (76.1) Par.?

devī vāsavadattā tatprāṇāñjahyānna saṃśayaḥ // (76.2) Par.?

devī padmāvatī tadvattayorekaṃ hi jīvitam / (77.1) Par.?

naravāhanadattaś ca putraste syātkathaṃ tataḥ // (77.2) Par.?

tacca devasya hṛdayaṃ soḍhuṃ jāne na śaknuyāt / (78.1) Par.?

evam ekapade sarvamidaṃ naśyenmahīpate // (78.2) Par.?

devyoryaccoktigāmbhīryaṃ tadeva kathayatyalam / (79.1) Par.?

hṛdayaṃ jīvitatyāgagāḍhaniścitaniḥspṛham // (79.2) Par.?

tatsvārtho rakṣaṇīyaste tiryañco 'pi hi jānate / (80.1) Par.?

svarakṣāṃ kiṃ punardeva buddhimanto bhavādṛśāḥ // (80.2) Par.?

iti mantrivarāc chrutvā svairaṃ yaugandharāyaṇāt / (81.1) Par.?

samyagvivekapadavīṃ prāpya vatseśvaro 'bravīt // (81.2) Par.?

evametanna saṃdeho naśyetsarvamidaṃ mama / (82.1) Par.?

tasmātkaliṅgasenāyāḥ ko 'rthaḥ pariṇayena me // (82.2) Par.?

ukto lagnaś ca dūre yat tad yuktaṃ gaṇakaiḥ kṛtam / (83.1) Par.?

svayaṃvarāgatātyāgād adharmo vā kiyān bhavet // (83.2) Par.?

ity ukto vatsarājena hṛṣṭo yaugandharāyaṇaḥ / (84.1) Par.?

cintayāmāsa kāryaṃ naḥ siddhaprāyaṃ yathepsitam // (84.2) Par.?

upāyarasasaṃsiktā deśakālopabṛṃhitā / (85.1) Par.?

seyaṃ nītimahāvallī kiṃ nāma na phaletphalam // (85.2) Par.?

iti saṃcintya sa dhyāyandeśakālau praṇamya tam / (86.1) Par.?

rājānaṃ prayayau mantrī gṛhaṃ yaugandharāyaṇaḥ // (86.2) Par.?

rājāpi racitātithyagūḍhākārām upetya saḥ / (87.1) Par.?

devīṃ vāsavadattāṃ tāṃ sāntvayannevam abravīt // (87.2) Par.?

kimarthaṃ vacmi jānāsi tvam eva hariṇākṣi yat / (88.1) Par.?

vāri vāriruhasyeva tvatprema mama jīvitam // (88.2) Par.?

nāmāpi hi kimanyasyā grahītumahamutsahe / (89.1) Par.?

kaliṅgasenā tu haṭhādupāyātā gṛhaṃ mama // (89.2) Par.?

prasiddhaṃ cātra yadrambhā tapaḥsthena nirākṛtā / (90.1) Par.?

pārthena ṣaṇḍhatāśāpaṃ dadau tasyai haṭhāgatā // (90.2) Par.?

sa śāpastiṣṭhatā tena varṣaṃ vairāṭaveśmani / (91.1) Par.?

strīveṣeṇa mahāścaryarūpeṇāpyativāhitaḥ // (91.2) Par.?

ataḥ kaliṅgasenaiṣā niṣiddhā na tadā mayā / (92.1) Par.?

vinā tvadicchayāhaṃ tu na kiṃcidvaktumutsahe // (92.2) Par.?

ity āśvāsyopalabhyātha hṛdayeneva rāgiṇā / (93.1) Par.?

mukhārpitena madyena satyaṃ krūraṃ tadāśayam // (93.2) Par.?

tayaiva saha rātriṃ tāṃ rājñā vāsavadattayā / (94.1) Par.?

mantrimukhyamatiprauḍhituṣṭo vatseśvaro 'vasat // (94.2) Par.?

atrāntare ca yaṃ pūrvaṃ divārātrau prayuktavān / (95.1) Par.?

kaliṅgasenāvṛttāntajñaptyai yaugandharāyaṇaḥ // (95.2) Par.?

sa brahmarākṣaso 'bhyetya suhṛd yogeśvarābhidhaḥ / (96.1) Par.?

tasyām eva niśi svairaṃ taṃ mantrivaramabhyadhāt // (96.2) Par.?

kaliṅgasenāsadane sthito 'smy antarbahiḥ sadā / (97.1) Par.?

divyānāṃ mānuṣāṇāṃ vā paśyāmi na tathāgamam // (97.2) Par.?

adyāvyakto mayā śabdaḥ śruto 'kasmānnabhastale / (98.1) Par.?

pracchannenātra harmyāgrasaṃnikarṣe niśāmukhe // (98.2) Par.?

prabhavaṃ tasya vijñātuṃ prayuktāpi tato mama / (99.1) Par.?

vidyā na prābhavattena vimṛśyāhamacintayam // (99.2) Par.?

ayaṃ divyaprabhāvasya śabdaḥ kasyāpi niścitam / (100.1) Par.?

kaliṅgasenālāvaṇyalubdhasya bhramato 'mbare // (100.2) Par.?

yena na kramate vidyā tadvīkṣe kiṃcidantaram / (101.1) Par.?

na duṣprāpaṃ paracchidraṃ jāgradbhirnipuṇairyataḥ // (101.2) Par.?

divyānāṃ vāñchitaiṣeti proktaṃ mantrivareṇa ca / (102.1) Par.?

somaprabhā sakhī cāsyā vadantyetan mayā śrutā // (102.2) Par.?

iti niścitya tat tubhyam ihāhaṃ vaktum āgataḥ / (103.1) Par.?

idaṃ prasaṅgāt pṛcchāmi tan me tāvat tvayocyatām // (103.2) Par.?

tiryañco 'pi hi rakṣanti svātmānam iti yat tvayā / (104.1) Par.?

ukto rājā tad aśrauṣaṃ yogād aham alakṣitaḥ // (104.2) Par.?

nidarśanaṃ ced atrāsti tan me kathaya sanmate / (105.1) Par.?

iti yogeśvareṇoktaḥ smāha yaugandharāyaṇaḥ // (105.2) Par.?

asti mitra tathā cātra kathāmākhyāmi te śṛṇu / (106.1) Par.?

vidiśānagarībāhye nyagrodho 'bhūtpurā mahān // (106.2) Par.?

catvāraḥ prāṇinas tatra vasanti sma mahātarau / (107.1) Par.?

nakulolūkamārjāramūṣakāḥ pṛthagālayāḥ // (107.2) Par.?

bhinne bhinne bile mūla āstāṃ nakulamūṣakau / (108.1) Par.?

mārjāro madhyabhāgasthe tarormahati koṭare // (108.2) Par.?

ulūkastu śirobhāge 'nanyalabhye latālaye / (109.1) Par.?

mūṣako 'tra tribhirvadhyo mārjāreṇa trayo 'pare // (109.2) Par.?

annāya mārjārabhayānmūṣako nakulastathā / (110.1) Par.?

svabhāvenāpyulūkaś ca paribhremur niśi trayaḥ // (110.2) Par.?

mārjāraś ca divārātrau nirbhayaḥ prabhramaty asau / (111.1) Par.?

tatrāsanne yavakṣetre sadā mūṣakalipsayā // (111.2) Par.?

ye 'nye 'pi yuktyā jagmustatsvakāle 'nnābhivāñchayā / (112.1) Par.?

ekadā lubdhakas tatra caṇḍālaḥ kaścidāyayau // (112.2) Par.?

sa mārjārapadaśreṇiṃ dṛṣṭvā tatkṣetragāminīm / (113.1) Par.?

tadvadhāyābhitaḥ kṣetraṃ pāśāndattvā tato yayau // (113.2) Par.?

tatra rātrau ca mārjāraḥ sa mūṣakajighāṃsayā / (114.1) Par.?

etya praviṣṭas tatpāśaiḥ kṣetre tasminn abadhyata // (114.2) Par.?

mūṣako 'pi tato 'nnārthī sa tatra nibhṛtāgataḥ / (115.1) Par.?

baddhaṃ taṃ vīkṣya mārjāraṃ jaharṣa ca nanarta ca // (115.2) Par.?

yāvadviśati tatkṣetraṃ dūrādekena vartmanā / (116.1) Par.?

tatra tau tāvad āyātāv ulūkanakulāvapi // (116.2) Par.?

dṛṣṭamārjārabandhau ca mūṣakaṃ labdhumaicchatām / (117.1) Par.?

mūṣako 'pi ca tad dṛṣṭvā dūrādvigno vyacintayat // (117.2) Par.?

nakulolūkabhayadaṃ mārjāraṃ saṃśraye yadi / (118.1) Par.?

baddho 'py ekaprahāreṇa śatrur mām eṣa mārayet // (118.2) Par.?

mārjārāddūragaṃ hanyādulūko nakulaś ca mām / (119.1) Par.?

tacchatrusaṃkaṭagataḥ kva gacchāmi karomi kim // (119.2) Par.?

hanta mārjāram eveha śrayāmy āpadgato hy ayam / (120.1) Par.?

ātmatrāṇāya māṃ rakṣetpāśacchedopayoginam // (120.2) Par.?

ity ālocya śanairgatvā mārjāraṃ mūṣako 'bravīt / (121.1) Par.?

baddhe tvayyatiduḥkhaṃ me tatte pāśaṃ chinadmy aham // (121.2) Par.?

ṛjūnāṃ jāyate snehaḥ sahavāsādripuṣvapi / (122.1) Par.?

kiṃ tu me nāsti viśvāsastava cittam ajānataḥ // (122.2) Par.?

tac chrutvovāca mārjāro bhadra viśvasyatāṃ tvayā / (123.1) Par.?

adya prabhṛti me mittraṃ bhavān prāṇapradāyakaḥ // (123.2) Par.?

iti śrutvaiva mārjārāttasyotsaṅgaṃ sa śiśriye / (124.1) Par.?

tad dṛṣṭvā nakulolūkau nirāśau yayatus tataḥ // (124.2) Par.?

tato jagāda mārjāro mūṣakaṃ pāśapīḍitaḥ / (125.1) Par.?

gataprāyā niśā mittra tat pāśāṃś chinddhi me drutam // (125.2) Par.?

mūṣako 'pi śanaiś chindaṃl lubdhakāgamanonmukhaḥ / (126.1) Par.?

mṛṣā kaṭakaṭāyadbhir daśanair akaroc ciram // (126.2) Par.?

kṣaṇādrātrau prabhātāyāṃ lubdhake nikaṭāgate / (127.1) Par.?

mārjāre 'rthayamāne drāk pāśāṃś cicheda mūṣakaḥ // (127.2) Par.?

chinnapāśe 'tha mārjāre lubdhakatrāsavidrute / (128.1) Par.?

mūṣako mṛtyumuktaḥ san palāyya prāviśad bilam // (128.2) Par.?

nāśvasatpunarāhūto mārjāreṇa jagāda ca / (129.1) Par.?

kālayuktyā hy arirmittraṃ jāyate na ca sarvadā // (129.2) Par.?

evaṃ bahubhyaḥ śatrubhyaḥ prajñayātmābhirakṣitaḥ / (130.1) Par.?

mūṣakena tiraścāpi kiṃ punarmānuṣeṣu yat // (130.2) Par.?

etaduktastadā rājā mayā yattattvayā śrutam / (131.1) Par.?

buddhyā kāryaṃ nijaṃ rakṣeddevi saṃrakṣaṇād iti // (131.2) Par.?

buddhirnāma ca sarvatra mukhyaṃ mittraṃ na pauruṣam / (132.1) Par.?

yogeśvara tathā caitām atrāpi tvaṃ kathāṃ śṛṇu // (132.2) Par.?

śrāvastītyasti nagarī tasyāṃ pūrvaṃ prasenajit / (133.1) Par.?

rājābhūttatra cābhyāgāt ko 'py apūrvo dvijaḥ puri // (133.2) Par.?

so 'śūdrānnabhug ekena vaṇijā guṇavāniti / (134.1) Par.?

brāhmaṇasya gṛhe tatra kasyacitsthāpito dvijaḥ // (134.2) Par.?

tatraiva tena śuṣkānnadakṣiṇādibhiranvaham / (135.1) Par.?

āpūryata tato 'nyaiśca śanairbuddhvā vaṇigvaraiḥ // (135.2) Par.?

tenāsau hemadīnārasahasraṃ kṛpaṇaḥ kramāt / (136.1) Par.?

saṃcitya gatvāraṇye tan nihatya kṣiptavān bhuvi // (136.2) Par.?

ekākī pratyahaṃ gatvā tac ca sthānamavaikṣata / (137.1) Par.?

ekadā hemaśūnyaṃ tatkhātaṃ vyāttaṃ ca dṛṣṭavān // (137.2) Par.?

śūnyaṃ tatkhātakaṃ tasya paśyato hatacetasaḥ / (138.1) Par.?

na paraṃ hṛdi saṃkrāntā citraṃ dikṣv api śūnyatā // (138.2) Par.?

athopāgāc ca vilapaṃstaṃ vipraṃ yadgṛhe sthitaḥ / (139.1) Par.?

pṛṣṭastaṃ ca svavṛttāntaṃ tasmai sarvaṃ nyavedayat // (139.2) Par.?

gatvā tīrtham abhuñjānaḥ prāṇāṃstyaktumiyeṣa ca / (140.1) Par.?

buddhvā ca so 'nnadātāsya vaṇiganyaiḥ sahāyayau // (140.2) Par.?

sa taṃ jagāda kiṃ brahman vittahetor mumūrṣasi / (141.1) Par.?

akālameghavadvittamakasmād eti yāti ca // (141.2) Par.?

ityādyukto 'pi tenāsau na jahau maraṇagraham / (142.1) Par.?

prāṇebhyo 'py arthamātrā hi kṛpaṇasya garīyasī // (142.2) Par.?

tataś ca mṛtaye tīrthaṃ gacchato 'sya dvijanmanaḥ / (143.1) Par.?

svayaṃ prasenajidrājā tad buddhvāntikamāyayau // (143.2) Par.?

papraccha cainaṃ kiṃ kiṃcid asti tatropalakṣaṇam / (144.1) Par.?

yatra bhūmau nikhātāste dīnārā brāhmaṇa tvayā // (144.2) Par.?

tacchrutvā sa dvijo 'vādīdasti kṣudro 'tra pādapaḥ / (145.1) Par.?

aṭavyāṃ deva tanmūle nikhātaṃ tanmayā dhanam // (145.2) Par.?

ity ākarṇyābravīdrājā dāsyāmyanviṣya tattava / (146.1) Par.?

dhanaṃ svakoṣādathavā mā tyākṣīrjīvitaṃ dvija // (146.2) Par.?

ity uktvā maraṇodyogānnivārya vinidhāya ca / (147.1) Par.?

dvijaṃ taṃ vaṇijo haste sa rājābhyantaraṃ gataḥ // (147.2) Par.?

tatrādiśya pratīhāraṃ śirortivyapadeśataḥ / (148.1) Par.?

vaidyān ānāyayat sarvān dattvā paṭahaghoṣaṇām // (148.2) Par.?

āturāste kiyanto 'tra kasyādāḥ kiṃ tvamauṣadham / (149.1) Par.?

ity upānīya papraccha tānekaikaṃ viviktagaḥ // (149.2) Par.?

te 'pi tasmai tadaikaikaḥ sarvamūcurmahīpateḥ / (150.1) Par.?

eko 'tha vaidyas tanmadhyāt kramapṛṣṭo 'bravīd idam // (150.2) Par.?

vaṇijo mātṛdattasya deva nāgabalā mayā / (151.1) Par.?

asvasthasyopadiṣṭādya dvitīyaṃ dinamoṣadhiḥ // (151.2) Par.?

tac chrutvā sa tamāhūya rājā vaṇijamabhyadhāt / (152.1) Par.?

nanu nāgabalā kena tavānītocyatāmiti // (152.2) Par.?

deva karmakareṇeti tenokte vaṇijā tadā / (153.1) Par.?

kṣipramānāyya taṃ rājā sa karmakaram abravīt // (153.2) Par.?

tvayā nāgabalāhetoḥ khanatā śākhinastalam / (154.1) Par.?

dīnārajātaṃ yallabdhaṃ brahmasvaṃ tatsamarpaya // (154.2) Par.?

ity ukto bhūbhṛtā bhītaḥ pratipadyaiva tatkṣaṇam / (155.1) Par.?

sa tānānīya dīnārāṃs tatra karmakaro jahau // (155.2) Par.?

rājāpy upoṣitāyāsmai dvijāyāhūya tān dadau / (156.1) Par.?

dīnārān hāritaprāptān prāṇān iva bahiścarān // (156.2) Par.?

evaṃ sa labdhavān buddhyā nītaṃ mūlatalāttaroḥ / (157.1) Par.?

dvijārthaṃ bhūpatir jānann oṣadhiṃ tāṃ tadudbhavām // (157.2) Par.?

tadevaṃ sarvadā buddheḥ prādhānyaṃ jitapauruṣam / (158.1) Par.?

īdṛśeṣu ca kāryeṣu kiṃ vidadhyātparākramaḥ // (158.2) Par.?

tadyogeśvara kurvīthāstvam api prajñayā tathā / (159.1) Par.?

yathā kaliṅgasenāyā doṣo jñāyeta kaścana // (159.2) Par.?

asti caitadyathā tasyāṃ lubhyantīha surāsurāḥ / (160.1) Par.?

tathā ca divi kasyāpi niśi śabdaḥ śrutastvayā // (160.2) Par.?

labdhe 'tha doṣe tasyāś ca bhaved akuśalaṃ na naḥ / (161.1) Par.?

nopayaccheta tāṃ rājā na cādharmaḥ kṛto bhavet // (161.2) Par.?

ity udāradhiyaḥ śrutvā sarvaṃ yaugandharāyaṇāt / (162.1) Par.?

yogeśvarastaṃ saṃtuṣya jagāda brahmarākṣasaḥ // (162.2) Par.?

kastvayā sadṛśo nītāvanyo devādbṛhaspateḥ / (163.1) Par.?

ayaṃ tvamṛtaseko 'sya tvanmantro rājyaśākhinaḥ // (163.2) Par.?

so 'haṃ kaliṅgasenāyā jijñāsiṣye gatiṃ sadā / (164.1) Par.?

buddhyā śaktyāpi cety uktvā tato yogeśvaro yayau // (164.2) Par.?

tatkālaṃ sā ca harmyādau paryaṭantaṃ svaharmyagā / (165.1) Par.?

kaliṅgasenā vatseśaṃ dṛṣṭvā dṛṣṭvā sma tāmyati // (165.2) Par.?

tanmanāḥ smarasaṃtaptā mṛṇālāṅgadahāriṇī / (166.1) Par.?

sā śrīkhaṇḍāṅgarāgā ca na lebhe nirvṛtiṃ kvacit // (166.2) Par.?

atrāntare sa tāṃ pūrvaṃ dṛṣṭvā vidyādharādhipaḥ / (167.1) Par.?

tasthau madanavegākhyo gāḍhānaṅgaśarārditaḥ // (167.2) Par.?

tatprāptaye tapaḥ kṛtvā vare labdhe 'pi śaṃkarāt / (168.1) Par.?

sānyāsaktānyadeśasthā sukhaprāpyāsya nābhavat // (168.2) Par.?

yatastenāntaraṃ labdhumasau vidyādhareśvaraḥ / (169.1) Par.?

rajanīṣu divi bhrāmyannāsīttanmandiropari // (169.2) Par.?

saṃsmṛtya tu tamādeśaṃ tapastuṣṭasya dhūrjaṭeḥ / (170.1) Par.?

ekasyāṃ niśi vatseśarūpaṃ cakre svavidyayā // (170.2) Par.?

tadrūpaś ca viveśāsya mandiraṃ dvāḥsthavanditaḥ / (171.1) Par.?

kālakṣepākṣamo guptaṃ mantriṇāṃ sa ivāgataḥ // (171.2) Par.?

kaliṅgasenāpy uttasthau taṃ dṛṣṭvotkampaviklavā / (172.1) Par.?

na so 'yamiti sā rāvair vāryamāṇeva bhūṣaṇaiḥ // (172.2) Par.?

tato vatseśarūpeṇa kramādviśvāsya tena sā / (173.1) Par.?

bhāryā madanavegena gāndharvavidhinā kṛtā // (173.2) Par.?

tatkālaṃ ca praviṣṭastad dṛṣṭvā yogād alakṣitaḥ / (174.1) Par.?

yogeśvaro viṣaṇṇo 'bhūd vatseśālokanabhramāt // (174.2) Par.?

yaugandharāyaṇāyaitadgatvoktvā tannideśataḥ / (175.1) Par.?

yuktyā vāsavadattāyā vatseśaṃ vīkṣya pārśvagam // (175.2) Par.?

hṛṣṭo mantrivaroktyaiva rūpaṃ suptasya veditum / (176.1) Par.?

kaliṅgasenāpracchannakāminaḥ so 'gamatpunaḥ // (176.2) Par.?

gatvā kaliṅgasenāyāḥ suptāyāḥ śayanīyake / (177.1) Par.?

suptaṃ madanavegaṃ taṃ svarūpe sthitamaikṣata // (177.2) Par.?

chatradhvajāṅkanirdhūlipādābjaṃ divyamānuṣam / (178.1) Par.?

svāpāntarhitatadvidyāvītarūpavivartanam // (178.2) Par.?

tatra gatvā yathādṛṣṭaṃ nivedya paritoṣavān / (179.1) Par.?

yogeśvaro jagādāsau hṛṣṭo yaugandharāyaṇam // (179.2) Par.?

na vetti mādṛśaḥ kiṃcidvetsi tvaṃ nīticakṣuṣā / (180.1) Par.?

tava mantreṇa duḥsādhyaṃ siddhaṃ kāryamidaṃ prabhoḥ // (180.2) Par.?

kiṃ vā vyoma vinārkeṇa kiṃ toyena vinā saraḥ / (181.1) Par.?

kiṃ mantreṇa vinā rājyaṃ kiṃ satyena vinā vacaḥ // (181.2) Par.?

ity uktavantam āmantrya prīto yogeśvaraṃ tataḥ / (182.1) Par.?

prātar vatseśvaraṃ draṣṭumāgādyaugandharāyaṇaḥ // (182.2) Par.?

tamupetya yathāvac ca kathāprastāvato 'bravīt / (183.1) Par.?

nṛpaṃ kaliṅgasenārthe pṛṣṭakāryaviniścayam // (183.2) Par.?

svacchandāsau na te rājan pāṇisparśam ihārhati / (184.1) Par.?

eṣā hi svecchayā draṣṭuṃ prasenajitam āgatā // (184.2) Par.?

viraktā vīkṣya taṃ vṛddhaṃ tvāṃ prāptā rūpalobhataḥ / (185.1) Par.?

tadanyapuruṣāsaṅgam api svecchaṃ karoty asau // (185.2) Par.?

tac chrutvā kulakanyeyaṃ katham evaṃ samācaret / (186.1) Par.?

śaktiḥ kasya praveṣṭuṃ vā madīyāntaḥpurāntare // (186.2) Par.?

iti rājñodite 'vādīddhīmānyaugandharāyaṇaḥ / (187.1) Par.?

adyaiva darśayāmyetatpratyakṣaṃ niśi deva te // (187.2) Par.?

divyās tām abhivāñchanti siddhādyā mānuṣo 'tra kaḥ / (188.1) Par.?

divyānāṃ ca gatī roddhuṃ rājan keneha śakyate // (188.2) Par.?

tadehi sākṣāt paśyeti vādinā tena mantriṇā / (189.1) Par.?

saha gantuṃ matiṃ cakre tatra rātrau sa bhūpatiḥ // (189.2) Par.?

padmāvatyā ṛte rājñyā na vivāhyāpareti yat / (190.1) Par.?

proktaṃ devi pratijñātaṃ mayā nirvyūḍham adya tat // (190.2) Par.?

ity athābhyetya tāṃ devīm uktvā yaugandharāyaṇaḥ / (191.1) Par.?

kaliṅgasenāvṛttāntaṃ taṃ tasyai sarvam uktavān // (191.2) Par.?

tvadīyaśikṣānuṣṭhānaphalam etan mameti sā / (192.1) Par.?

devī vāsavadattāpi praṇatābhinananda tam // (192.2) Par.?

tato niśīthe saṃsupte jane vatseśvaro yayau / (193.1) Par.?

gṛhaṃ kaliṅgasenāyāḥ sa ca yaugandharāyaṇaḥ // (193.2) Par.?

adṛṣṭaś ca praviṣṭo 'tra tasyā nidrājuṣo 'ntike / (194.1) Par.?

suptaṃ madanavegaṃ taṃ svarūpasthaṃ dadarśa saḥ // (194.2) Par.?

hantumicchati yāvac ca sa taṃ sāhasikaṃ nṛpaḥ / (195.1) Par.?

tāvatsa vidyayā vidyādharo 'bhūtpratibodhitaḥ // (195.2) Par.?

prabuddhaś ca sa nirgatya jhagityudapatannabhaḥ / (196.1) Par.?

kṣaṇātkaliṅgasenāpi sā prabuddhābhavat tataḥ // (196.2) Par.?

śūnyaṃ śayanamālokya jagāda ca kathaṃ hi mām / (197.1) Par.?

pūrvaṃ prabudhya vatseśaḥ suptāṃ muktvaiva gacchati // (197.2) Par.?

tadākarṇya sa vatseśamāha yaugandharāyaṇaḥ / (198.1) Par.?

eṣā vidhvaṃsitānena śṛṇu tvadrūpadhāriṇā // (198.2) Par.?

saiṣa yogabalājjñātvā sākṣātte darśito mayā / (199.1) Par.?

kiṃ tu divyaprabhāvatvādasau hantuṃ na śakyate // (199.2) Par.?

ity uktvā sa ca rājā ca saha tāmupajagmatuḥ / (200.1) Par.?

kaliṅgasenā sāpyetau dṛṣṭvā tasthau kṛtādarā // (200.2) Par.?

adhunaiva kva gatvā tvaṃ rājan prāptaḥ samantrikaḥ / (201.1) Par.?

iti bruvāṇām avadattāṃ sa yaugandharāyaṇaḥ // (201.2) Par.?

kaliṅgasene kenāpi māyā vatseśarūpiṇā / (202.1) Par.?

saṃmohya pariṇītāsi na tvaṃ matsvāmināmunā // (202.2) Par.?

tac chrutvā sātisaṃbhrāntā viddheva hṛdi pattriṇā / (203.1) Par.?

kaliṅgasenā vatseśaṃ jagādodaśrulocanā // (203.2) Par.?

gāndharvavidhināhaṃ te pariṇītāpi vismṛtā / (204.1) Par.?

kiṃ svid rājan yathā pūrvaṃ duṣyantasya śakuntalā // (204.2) Par.?

ity uktaḥ sa tayā rājā tāmuvācānatānanaḥ / (205.1) Par.?

satyaṃ na pariṇītāsi mayādyaivāgato hy aham // (205.2) Par.?

ity uktavantaṃ vatseśaṃ mantrī yaugandharāyaṇaḥ / (206.1) Par.?

ehīty uktvā tataḥ svairamanaiṣīdrājamandiram // (206.2) Par.?

tataḥ samantrike rājñi gate sātra videśagā / (207.1) Par.?

mṛgīva yūthavibhraṣṭā parityaktasvabāndhavā // (207.2) Par.?

saṃbhogavidalatpatramukhābjā gajapīḍitā / (208.1) Par.?

padminīva parikṣiptakabarībhramarāvaliḥ // (208.2) Par.?

vinaṣṭakanyakābhāvā nirupāyakramā satī / (209.1) Par.?

kaliṅgasenā gaganaṃ vīkṣamāṇedam abravīt // (209.2) Par.?

vatseśarūpiṇā yena pariṇītāsmi kenacit / (210.1) Par.?

prakāśaḥ so 'stu kaumāraḥ sa eva hi patir mama // (210.2) Par.?

evaṃ tayokte gaganāt so 'tra vidyādharādhipaḥ / (211.1) Par.?

avātarad divyarūpo hārakeyūrarājitaḥ // (211.2) Par.?

ko bhavāniti pṛṣṭaś ca tayaivaṃ sa jagāda tām / (212.1) Par.?

ahaṃ madanavegākhyas tanvi vidyādharādhipaḥ // (212.2) Par.?

mayā ca prāgvilokya tvāṃ purā pitṛgṛhe sthitām / (213.1) Par.?

tvatprāptidastapaḥ kṛtvā varaḥ prāpto maheśvarāt // (213.2) Par.?

vatseśvarānuraktā ca tadrūpeṇa mayā drutam / (214.1) Par.?

avṛttatadvivāhaiva pariṇītāsi yuktitaḥ // (214.2) Par.?

iti vāksudhayā tasya śrutimārgapraviṣṭayā / (215.1) Par.?

kiṃcitkaliṅgasenābhūd ucchvāsitahṛdambujā // (215.2) Par.?

atha sa madanavegastāṃ samāśvāsya kāntāṃ vihitadhṛtivitīrṇasvarṇarāśiḥ sa tasyai / (216.1) Par.?

ucita iti tayāntarbaddhasadbhartṛbhaktiḥ punarupagamanāya dyāṃ tadaivotpapāta // (216.2) Par.?

divyāspadaṃ svapatisadma na martyagamyaṃ kāmāt pitur bhavanam ujjhitam ity avekṣya / (217.1) Par.?

tatraiva vastumatha sāpi kaliṅgasenā cakre dhṛtiṃ madanavegakṛtābhyanujñā // (217.2) Par.?

Duration=3.0343341827393 secs.