Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17522

Click on a sentence to show its analysis
Keep the mouse pointer over a lemma to show its meanings.

evaṃ ratnaprabhākhyātakathākramavaśād atha / (1.1) Par.?

naravāhanadattaṃ taṃ sacivo gomukho 'bravīt // (1.2) Par.?

satyaṃ sādhvyaḥ praviralāś capalāstu sadā striyaḥ / (2.1) Par.?

aviśvāsyās tathā caitām api deva kathāṃ śṛṇu // (2.2) Par.?

ihāsty ujjayinī nāma nagarī viśvaviśrutā / (3.1) Par.?

tasyāṃ niścayadattākhyo vaṇikputro 'bhavatpurā // (3.2) Par.?

sa dyūtakāro dyūtena dhanaṃ jitvā dine dine / (4.1) Par.?

snātvā siprājale 'bhyarcya mahākālam udāradhīḥ // (4.2) Par.?

dattvā dānaṃ dvijātibhyo dīnānāthebhya eva ca / (5.1) Par.?

vyadhād vilepanāhāratāmbūlādy aviśeṣataḥ // (5.2) Par.?

sadā snānārcanādyante mahākālālayāntike / (6.1) Par.?

gatvā vyalimpadātmānaṃ śmaśāne candanādinā // (6.2) Par.?

tatrasthe ca śilāstambhe sa vinyasya vilepanam / (7.1) Par.?

vililepa kaṣan pṛṣṭhaṃ yuvā pratyaham ekakaḥ // (7.2) Par.?

tena stambhaḥ sa suślakṣṇaḥ kālenābhavadekataḥ / (8.1) Par.?

athāgāc citrakṛt tena pathā rūpakṛtā saha // (8.2) Par.?

sa stambhaṃ vīkṣya suślakṣṇaṃ tatra gaurīṃ samālikhat / (9.1) Par.?

rūpakāro 'pi śastreṇa krīḍayaivollilekha tām // (9.2) Par.?

tatas tayor gatavator mahākālārcanāgatā / (10.1) Par.?

vidyādharasutaikātra stambhe devīṃ dadarśa tām // (10.2) Par.?

sulakṣaṇatvāt sāṃnidhyaṃ tasyāṃ matvā kṛtārcanā / (11.1) Par.?

adṛśyā viśramāyaitaṃ śilāstambhaṃ viveśa sā // (11.2) Par.?

tāvan niścayadattaḥ sa tatrāgatya vaṇiksutaḥ / (12.1) Par.?

sāścaryaḥ stambhamadhye tāṃ dadarśollikhitāmumām // (12.2) Par.?

vilipyāṅgāni tatstambhabhāge 'nyatrānulepanam / (13.1) Par.?

nyasya pṛṣṭhaṃ samālabdhuṃ prārebhe nikaṣaṃś ca saḥ // (13.2) Par.?

tadvilokya vilolākṣī sā vidyādharakanyakā / (14.1) Par.?

stambhāntarasthā tadrūpahṛtacittā vyacintayat // (14.2) Par.?

īdṛśasyāpi ko 'py asya nāsti pṛṣṭhānulepakaḥ / (15.1) Par.?

tadahaṃ tāvadadyāsya pṛṣṭhameṣā samālabhe // (15.2) Par.?

ity ālocya prasāryaiva karaṃ stambhāntarāt tataḥ / (16.1) Par.?

vyalipat tasya sā pṛṣṭhaṃ snehādvidyādharī tadā // (16.2) Par.?

tatkṣaṇaṃ labdhasaṃsparśaḥ śrutakaṅkaṇaniḥsvanaḥ / (17.1) Par.?

jagrāha hastaṃ hastena sa tasyāstaṃ vaṇiksutaḥ // (17.2) Par.?

mahābhāgāparāddhaṃ te kiṃ mayā muñca me karam / (18.1) Par.?

ity adṛśyaiva taṃ vidyādharī stambhād uvāca sā // (18.2) Par.?

pratyakṣā brūhi me kā tvaṃ tato mokṣyāmi te karam / (19.1) Par.?

iti niścayadatto 'pi pratyuvāca sa tāṃ tataḥ // (19.2) Par.?

pratyakṣadṛśyā sarvaṃ te vacmīti śapathottaram / (20.1) Par.?

vidyādharyā tayokto 'tha karaṃ tasyā mumoca saḥ // (20.2) Par.?

atha stambhādvinirgatya sākṣātsarvāṅgasundarī / (21.1) Par.?

tanmukhāsaktanayanā taṃ jagādopaviśya sā // (21.2) Par.?

asti prāleyaśailāgre nagarī puṣkarāvatī / (22.1) Par.?

nāmnā vindhyaparas tasyāmāste vidyādharādhipaḥ // (22.2) Par.?

anurāgaparā nāma tasyāhaṃ kanyakā sutā / (23.1) Par.?

mahākālārcanāyātā viśrāntāsmīha saṃprati // (23.2) Par.?

tāvac ca tvam ihāgatya kurvan pṛṣṭhavilepanam / (24.1) Par.?

dṛṣṭaḥ stambhe 'tra mārīyamohanāstropamo mayā // (24.2) Par.?

tataḥ prāganurāgeṇa rañjitaḥ svāntavānmama / (25.1) Par.?

paścātpṛṣṭhavilepinyā aṅgarāgeṇa te karaḥ // (25.2) Par.?

ataḥ paraṃ te viditaṃ tatpiturdhāma saṃprati / (26.1) Par.?

gacchāmīti tayokto 'tha vaṇikputro jagāda saḥ // (26.2) Par.?

svīkṛtaṃ tanmayā caṇḍi na svāntaṃ bhavatīhṛtam / (27.1) Par.?

amuktasvīkṛtasvāntā katham evaṃ tu gacchasi // (27.2) Par.?

iti tenoditā sā ca laghurāgavaśīkṛtā / (28.1) Par.?

saṃgamiṣye tvayā kāmam eṣyasy asmatpurīṃ yadi // (28.2) Par.?

durgamā sā na te nātha setsyate te samīhitam / (29.1) Par.?

na hi duṣkaramastīha kiṃcidadhyavasāyinām // (29.2) Par.?

ity udīrya khamutpatya sānurāgaparā yayau / (30.1) Par.?

agān niścayadatto 'pi sa tadgatamanā gṛham // (30.2) Par.?

smarandrumādiva stambhādudbhinnaṃ karapallavam / (31.1) Par.?

hā dhiktasyā gṛhītvāpi nāptaḥ pāṇigraho mayā // (31.2) Par.?

tadvrajāmyantikaṃ tasyāḥ purīṃ tāṃ puṣkarāvatīm / (32.1) Par.?

prāṇāṃstyakṣyāmi daivaṃ vā sāhāyyaṃ me kariṣyati // (32.2) Par.?

iti saṃcintayannītvā smarārtaḥ so 'tra taddinam / (33.1) Par.?

prātiṣṭhata tataḥ prātaravalambyottarāṃ diśam // (33.2) Par.?

tataḥ prakrāmatas tasya trayo 'nye sahayāyinaḥ / (34.1) Par.?

milanti sma vaṇikputrā uttarāpathagāminaḥ // (34.2) Par.?

taiḥ samaṃ samatikrāman puragrāmāṭavīnadīḥ / (35.1) Par.?

kramād uttaradigbhūmiṃ prāpa sa mlecchabhūyasīm // (35.2) Par.?

tatra tair eva sahitaḥ pathi prāpyaiva tājikaiḥ / (36.1) Par.?

nītvāparasmai mūlyena datto 'bhūttājikāya saḥ // (36.2) Par.?

tenāpi tāvad bhṛtyānāṃ haste kośalikākṛte / (37.1) Par.?

muravārābhidhānasya turuṣkasya vyasṛjyata // (37.2) Par.?

tatra nītaḥ sa tadbhṛtyairyuktastairaparaistribhiḥ / (38.1) Par.?

muravāraṃ mṛtaṃ buddhvā tatputrāya nyavedyata // (38.2) Par.?

pituḥ kośalikā hy eṣā mittreṇa preṣitā mama / (39.1) Par.?

tattasyaivāntike prātaḥ khāte kṣepyā ime mayā // (39.2) Par.?

ity ātmanā caturthaṃ taṃ tatputro 'pi sa tāṃ niśām / (40.1) Par.?

saṃyamya sthāpayāmāsa turuṣko nigaḍairdṛḍham // (40.2) Par.?

tato 'tra bandhane rātrau maraṇatrāsakātarān / (41.1) Par.?

sakhīn niścayadattas tān sa jagāda vaṇiksutān // (41.2) Par.?

kā viṣādena vaḥ siddhirdhairyamālambya tiṣṭhata / (42.1) Par.?

bhītā iva hi dhīrāṇāṃ yānti dūre vipattayaḥ // (42.2) Par.?

smarataikāṃ bhagavatīṃ durgāmāpadvimocinīm / (43.1) Par.?

iti tān dhīrayan bhaktyā devīṃ tuṣṭāva so 'tha tām // (43.2) Par.?

namastubhyaṃ mahādevi pādau te yāvakāṅkitau / (44.1) Par.?

mṛditāsuralagnāsrapaṅkāviva namāmy aham // (44.2) Par.?

jitaṃ śaktyā śivasyāpi viśvaiśvaryakṛtā tvayā / (45.1) Par.?

tvadanuprāṇitaṃ cedaṃ ceṣṭate bhuvanatrayam // (45.2) Par.?

paritrātāstvayā lokā mahiṣāsurasūdini / (46.1) Par.?

paritrāyasva māṃ bhaktavatsale śaraṇāgatam // (46.2) Par.?

ityādi samyag devīṃ tāṃ stutvā sahacaraiḥ saha / (47.1) Par.?

so 'tha niścayadatto 'tra śrānto nidrāmagāddrutam // (47.2) Par.?

uttiṣṭhata sutā yāta vigataṃ bandhanaṃ hi vaḥ / (48.1) Par.?

ity ādideśa sā svapne devī taṃ cāparāṃś ca tān // (48.2) Par.?

prabudhya ca tadā rātrau dṛṣṭvā bandhān svataś cyutān / (49.1) Par.?

anyonyaṃ svapnam ākhyāya hṛṣṭās te niryayus tataḥ // (49.2) Par.?

gatvā dūramathādhvānaṃ kṣīṇāyāṃ niśi te 'pare / (50.1) Par.?

ūcurniścayadattaṃ taṃ dṛṣṭatrāsā vaṇiksutāḥ // (50.2) Par.?

āstāṃ bahumlecchatayā digeṣā dakṣiṇāpatham / (51.1) Par.?

vayaṃ yāmaḥ sakhe tvaṃ tu yathābhimatamācara // (51.2) Par.?

ity uktastairanujñāya yatheṣṭāgamanāya tān / (52.1) Par.?

udīcīm eva tāmāśāmavalambya punaś ca saḥ // (52.2) Par.?

eko niścayadatto 'tha pratasthe prasabhaṃ pathi / (53.1) Par.?

anurāgaparāpremapāśakṛṣṭo nirastadhīḥ // (53.2) Par.?

krameṇa gacchanmilitaḥ sa mahāvratikaiḥ saha / (54.1) Par.?

caturbhiḥ prāpya saritaṃ vitastāmuttatāra saḥ // (54.2) Par.?

uttīrya ca kṛtāhāraḥ sūrye 'stācalacumbini / (55.1) Par.?

viveśa tair eva samaṃ vanaṃ mārgavaśāgatam // (55.2) Par.?

tatra cāgrāgatāḥ kecittamūcuḥ kāṣṭhabhārikāḥ / (56.1) Par.?

kva gacchatha dine yāte grāmaḥ ko 'py asti nāgrataḥ // (56.2) Par.?

ekastu vipine 'muṣminnasti śūnyaḥ śivālayaḥ / (57.1) Par.?

tatra tiṣṭhati yo rātrāvantarvā bahir eva vā // (57.2) Par.?

taṃ śṛṅgotpādinī nāma śṛṅgotpādanapūrvakam / (58.1) Par.?

mohayitvā paśūkṛtya bhakṣayatyeva yakṣiṇī // (58.2) Par.?

etac chrutvāpi sāvajñāste mahāvratinastadā / (59.1) Par.?

ūcurniścayadattaṃ te catvāraḥ sahayāyinaḥ // (59.2) Par.?

ehi kiṃ kurute 'smākaṃ varākī sātra yakṣiṇī / (60.1) Par.?

teṣu teṣu śmaśāneṣu niśāsu hi vayaṃ sthitāḥ // (60.2) Par.?

ity uktavadbhis taiḥ sākaṃ gatvā prāpya śivālayam / (61.1) Par.?

śūnyaṃ niścayadattastāṃ rātriṃ netuṃ viveśa saḥ // (61.2) Par.?

tatrāṅgaṇe vidhāyāśu bhasmanā maṇḍalaṃ mahat / (62.1) Par.?

praviśya cāntare tasya prajvālyāgniṃ sahendhanaiḥ // (62.2) Par.?

dhīro niścayadattaḥ sa te mahāvratinastathā / (63.1) Par.?

mantraṃ japanto rakṣārthaṃ sarva evāvatasthire // (63.2) Par.?

athāyayau vādayantī dūrātkaṅkālakiṃnarīm / (64.1) Par.?

nṛtyantī yakṣiṇī tatra sā śṛṅgotpādinī niśi // (64.2) Par.?

etya teṣu caturṣvekaṃ sā mahāvratinaṃ prati / (65.1) Par.?

dattadṛṅ mantram apaṭhat sanṛttaṃ maṇḍalād bahiḥ // (65.2) Par.?

tena mantreṇa saṃjātaśṛṅgo mohita utthitaḥ / (66.1) Par.?

nṛtyaṃstasmiñjvalatyagnau sa mahāvratiko 'patat // (66.2) Par.?

patitaṃ cārdhadagdhaṃ tamākṛṣyaivāgnimadhyataḥ / (67.1) Par.?

sā śṛṅgotpādinī hṛṣṭā bhakṣayāmāsa yakṣiṇī // (67.2) Par.?

tato dvitīye vratini nyastadṛṣṭistathaiva sā / (68.1) Par.?

taṃ śṛṅgotpādanaṃ mantraṃ papāṭha ca nanarta ca // (68.2) Par.?

so 'pi dvitīyas tanmantrajātaśṛṅgaḥ pranartitaḥ / (69.1) Par.?

patito 'gnau tayākṛṣya paśyatsvanyeṣv abhakṣyata // (69.2) Par.?

evaṃ krameṇa saṃmohya tānmahāvratino niśi / (70.1) Par.?

tayābhakṣyanta yakṣiṇyā catvāro 'pi saśṛṅgakāḥ // (70.2) Par.?

caturthaṃ bhakṣayantyā ca tayā māṃsāsramattayā / (71.1) Par.?

svayaṃ kiṃnarikātodyaṃ daivādbhūmau nyadhīyata // (71.2) Par.?

tāvac ca kṣipram utthāya tadgṛhītvaiva vādayan / (72.1) Par.?

dhīro niścayadatto 'pi pranṛtyan vihasan bhraman // (72.2) Par.?

taṃ śṛṅgotpādanaṃ mantram asakṛcchrutaśikṣitam / (73.1) Par.?

pāpaṭhyate sma yakṣiṇyās tasyā nyastekṣaṇo mukhe // (73.2) Par.?

tatprayogaprabhāveṇa vivaśā mṛtyuśaṅkinī / (74.1) Par.?

utthātukāmaśṛṅgī sā prahvā taṃ prāha yakṣiṇī // (74.2) Par.?

mā vadhīstvaṃ mahāsattva striyaṃ māṃ kṛpaṇāmimām / (75.1) Par.?

idānīṃ śaraṇaṃ tvaṃ me mantrapāṭhādi saṃhara // (75.2) Par.?

rakṣa māṃ vedmy ahaṃ sarvamīpsitaṃ sādhayāmi te / (76.1) Par.?

anurāgaparā yatra tatra tvāṃ prāpayāmy aham // (76.2) Par.?

iti sapratyayaṃ proktastayā dhīrastatheti saḥ / (77.1) Par.?

cakre niścayadatto 'tra mantrapāṭhādisaṃhṛtim // (77.2) Par.?

tataḥ sa tasyā yakṣiṇyāḥ skandhamāruhya tadgirā / (78.1) Par.?

nīyamānastayā vyomnā pratasthe tāṃ priyāṃ prati // (78.2) Par.?

prabhātāyāṃ ca rajanau prāpyaikaṃ girikānanam / (79.1) Par.?

namrā niścayadattaṃ taṃ guhyakī sā vyajijñapat // (79.2) Par.?

sūryodaye 'dhunā gantuṃ śaktir nāsti mamopari / (80.1) Par.?

tad asmin kānane kānte gamayedaṃ dinaṃ prabho // (80.2) Par.?

phalāni bhuṅkṣva svādūni nirjharāmbhaḥ śubhaṃ piba / (81.1) Par.?

ahaṃ yāmi nijaṃ sthānameṣyāmi ca niśāgame // (81.2) Par.?

neṣyāmi ca tadaiva tvāmanurāgaparāntikam / (82.1) Par.?

maulimālāṃ himagirernagarīṃ puṣkarāvatīm // (82.2) Par.?

ity uktvā tadanujñātā skandhāttatrāvatārya tam / (83.1) Par.?

yakṣiṇī punarāgantuṃ satyasaṃdhā jagāma sā // (83.2) Par.?

tato niścayadatto 'syāṃ gatāyāmaikṣatātra saḥ / (84.1) Par.?

agādham antaḥ saviṣaṃ svacchaśītaṃ bahiḥ saraḥ // (84.2) Par.?

rāgin strīcittam etādṛg ity arkeṇa nidarśanam / (85.1) Par.?

prasāritakareṇeva prakaṭīkṛtya darśitam // (85.2) Par.?

sa tadviṣāktaṃ gandhena buddhvā mānuṣakṛtyataḥ / (86.1) Par.?

tyaktvāmbho'rthī tṛṣārtaḥ san divye tatrābhramadgirau // (86.2) Par.?

bhramannunnatabhūbhāge padmarāgamaṇī iva / (87.1) Par.?

sphurantau dvāv apaśyac ca bhuvaṃ tāṃ nicakhāna ca // (87.2) Par.?

apāstamṛttikaścāsya jīvato markaṭasya saḥ / (88.1) Par.?

śiro dadarśa te cāsya padmarāgāvivākṣiṇī // (88.2) Par.?

tato vismayate yāvatkimetad iti cintayan / (89.1) Par.?

tāvanmanuṣyavācāsau markaṭastam abhāṣata // (89.2) Par.?

mānuṣo markaṭībhūto vipro 'haṃ māṃ samuddhara / (90.1) Par.?

kathayiṣyāmi te sādho svavṛttāntaṃ tato 'khilam // (90.2) Par.?

etac chrutvaiva sāścaryo mṛttikāmapanīya saḥ / (91.1) Par.?

bhūmerniścayadattastamujjahārātha markaṭam // (91.2) Par.?

uddhṛtaḥ pādapatitastaṃ bhūyo 'pi sa markaṭaḥ / (92.1) Par.?

uvāca dattāḥ prāṇā me kṛcchrāduddharatā tvayā // (92.2) Par.?

tad ehi yāvac chrāntas tvam upayuṅkṣva phalāmbunī / (93.1) Par.?

tvatprasādādahaṃ cāpi kariṣye pāraṇaṃ cirāt // (93.2) Par.?

ity uktvā tamanaiṣītsa dūraṃ girinadītaṭam / (94.1) Par.?

kapiḥ svādhīnasusvāduphalasachāyapādapam // (94.2) Par.?

tatra snātvopabhuktāmbuphalaḥ sa kṛtapāraṇam / (95.1) Par.?

kapiṃ niścayadattastaṃ pratyāgatya tato 'bravīt // (95.2) Par.?

kathaṃ tvaṃ markaṭībhūto mānuṣo 'py ucyatāmiti / (96.1) Par.?

tataḥ sa markaṭo 'vādīcchṛṇvidānīṃ vadāmyadaḥ // (96.2) Par.?

candrasvāmīti nāmnāsti vārāṇasyāṃ dvijottamaḥ / (97.1) Par.?

tasya patnyāṃ suvṛttāyāṃ jāto 'smyeṣa sutaḥ sakhe // (97.2) Par.?

somasvāmīti pitrā ca kṛtanāmā kramādaham / (98.1) Par.?

ārūḍho madanavyālagajaṃ madaniraṅkuśam // (98.2) Par.?

taṃ māṃ kadācid adrākṣīd dūrād vātāyanāgragā / (99.1) Par.?

śrīgarbhākhyasya vaṇijastatpurīvāsinaḥ sutā // (99.2) Par.?

taruṇī bandhudattākhyā māthurasya vaṇikpateḥ / (100.1) Par.?

bhāryā varāhadattasya piturveśmanyavasthitā // (100.2) Par.?

sā madālokasaṃjātamanmathānviṣya nāma me / (101.1) Par.?

vayasyāṃ prāhiṇodāptāṃ mahyaṃ matsaṃgamārthinī // (101.2) Par.?

sā tadvayasyā kāmāndhāmupagamya janāntikam / (102.1) Par.?

ākhyātatadabhiprāyā māmanaiṣīnnijaṃ gṛham // (102.2) Par.?

tatra māṃ sthāpayitvā ca gatvā guptaṃ tadaiva sā / (103.1) Par.?

tāṃ bandhudattām ānaiṣīd autsukyāgaṇitatrapām // (103.2) Par.?

ānītaiva ca sā me 'tra kaṇṭhāśleṣam upāgamat / (104.1) Par.?

ekavīro hi nārīṇāmatibhūmiṃ gataḥ smaraḥ // (104.2) Par.?

evaṃ dine dine svairam āgatyātra piturgṛhāt / (105.1) Par.?

araṃsta bandhudattā sā mayā saha sakhīgṛhe // (105.2) Par.?

ekadā tāṃ nijagṛhaṃ netuṃ tatra cirasthitām / (106.1) Par.?

āgataḥ sa patis tasyā mathurāto mahāvaṇik // (106.2) Par.?

tataḥ pitrābhyanujñātā patyā tena ninīṣitā / (107.1) Par.?

rahasyajñāṃ dvitīyāṃ sā bandhudattābravīt sakhīm // (107.2) Par.?

niścitaṃ sakhi netavyā bhartrāhaṃ mathurāṃ purīm / (108.1) Par.?

na ca jīvāmy ahaṃ tatra somasvāmivinākṛtā // (108.2) Par.?

tadatra ko 'bhyupāyo me kathayetyuditā tayā / (109.1) Par.?

sakhī sukhaśayā nāma yoginī tāṃ jagāda sā // (109.2) Par.?

dvau sto mantraprayogau me yayorekena sūtrake / (110.1) Par.?

kaṇṭhabaddhe jhagityeva mānuṣo markaṭo bhavet // (110.2) Par.?

dvitīyena ca mukte 'smin sūtrake saiṣa mānuṣaḥ / (111.1) Par.?

punarbhavetkapitve ca nāsya prajñā vilupyate // (111.2) Par.?

tadyadīcchati suśroṇi somasvāmī priyaḥ sa te / (112.1) Par.?

tadetaṃ markaṭaśiśuṃ saṃpratyeva karomy aham // (112.2) Par.?

tataḥ krīḍānibhādetaṃ gṛhītvā mathurāṃ vraja / (113.1) Par.?

mantrayuktidvayaṃ caitad bhavatīṃ śikṣayāmy aham // (113.2) Par.?

saṃvidhāsyasi yenainaṃ pārśvasthaṃ markaṭākṛtim / (114.1) Par.?

rahaḥsthāne ca puruṣaṃ priyaṃ saṃpādayiṣyasi // (114.2) Par.?

evam uktā tayā sakhyā bandhudattā tathaiva sā / (115.1) Par.?

rahasyānāyya sasnehaṃ tadarthaṃ māmabodhayat // (115.2) Par.?

kṛtānujñaṃ ca māṃ baddhamantrasūtraṃ gale kṣaṇāt / (116.1) Par.?

tatsakhī sā sukhaśayā vyadhānmarkaṭapotakam // (116.2) Par.?

tadrūpeṇa svabhartre sā bandhudattopanīya mām / (117.1) Par.?

sakhyā mahyaṃ vinodāya datto 'sāv ity adarśayat // (117.2) Par.?

atuṣyatsa ca māṃ dṛṣṭvā krīḍanīyaṃ tadaṅkagam / (118.1) Par.?

ahaṃ ca kapirevāsaṃ prājño 'pi vyaktavāgapi // (118.2) Par.?

aho strīcaritaṃ citramityantaś ca hasannapi / (119.1) Par.?

tathātiṣṭhamahaṃ ko hi kāmena na viḍambyate // (119.2) Par.?

sakhyā śikṣitatanmantrā bandhudattāhnyathāpare / (120.1) Par.?

mathurāṃ prati sā prāyādbhartrā saha piturgṛhāt // (120.2) Par.?

māṃ cāpy ekasya bhṛtyasya skandhamāropayattadā / (121.1) Par.?

sa bhartā bandhudattāyāḥ pathi tatpriyakāmyayā // (121.2) Par.?

tato vayaṃ te sarve 'pi yānto madhye pathi sthitam / (122.1) Par.?

dinairdvitrair vanaṃ prāptā bahumarkaṭabhīṣaṇam // (122.2) Par.?

tato 'bhyadhāvan dṛṣṭvā māṃ markaṭā gaṇaśo 'bhitaḥ / (123.1) Par.?

kṣiptaṃ kilakilārāvairāhvayantaḥ parasparam // (123.2) Par.?

āgatya khādituṃ te ca prārabhanta plavaṃgamāḥ / (124.1) Par.?

durvārāstaṃ vaṇigbhṛtyaṃ yasya skandhe 'hamāsitaḥ // (124.2) Par.?

sa tena vihvalaḥ skandhāttyaktvaiva bhuvi māṃ bhayāt / (125.1) Par.?

palāyito 'bhūd atha mām agṛhṇaṃs te 'tra markaṭāḥ // (125.2) Par.?

matsnehād bandhudattā ca tadbhartā tasya cānugāḥ / (126.1) Par.?

pāṣāṇair laguḍair ghnanto jetuṃ tān nāśakan kapīn // (126.2) Par.?

tatas te markaṭā mūḍhasyāṅge 'ṅge loma loma me / (127.1) Par.?

nakhair vyalumpan dantaiś ca kukarmakupitā iva // (127.2) Par.?

kaṇṭhasūtrasya māhātmyācchaṃbhoś ca smaraṇāt tataḥ / (128.1) Par.?

ahaṃ labdhabalastebhyo bandhamunmucya vidrutaḥ // (128.2) Par.?

praviśya gahane teṣāṃ vyatīto dṛṣṭigocarāt / (129.1) Par.?

kramādvanādvanaṃ gacchannidaṃ prāpto 'smi kānanam // (129.2) Par.?

bhraṣṭasya bandhudattāyā janmanyatraiva te katham / (130.1) Par.?

markaṭatvaphalo jātaḥ paradārasamāgamaḥ // (130.2) Par.?

iti duḥkhatamo'ndhasya bhramataḥ prāvṛṣīha me / (131.1) Par.?

duḥkhāntaram api prattam asaṃtuṣṭena vedhasā // (131.2) Par.?

yanmāmakasmād āgatya karākrāntaṃ kareṇukā / (132.1) Par.?

meghāmbhaḥplutavalmīkakardamāntarnyaveśayat // (132.2) Par.?

bhavitavyaniyuktā ca jāne sā kāpi devatā / (133.1) Par.?

yadyatnānnāśakaṃ tasmāt paṅkāc calitum apy alam // (133.2) Par.?

āśvāsyamāne caitasmin na mṛto 'smi na kevalam / (134.1) Par.?

yāvajjñānaṃ mamotpannamaniśaṃ dhyāyato haram // (134.2) Par.?

tāvatkālaṃ ca naivāsītkṣuttṛṣṇā ca sakhe mama / (135.1) Par.?

yāvadadyoddhṛtaḥ śuṣkapaṅkakūṭādahaṃ tvayā // (135.2) Par.?

jñāne prāpte 'pi śaktirme tāvatī naiva vidyate / (136.1) Par.?

mocayeyaṃ yayātmānamito markaṭabhāvataḥ // (136.2) Par.?

kaṇṭhasūtraṃ yadā kāpi tanmantreṇaiva mokṣyati / (137.1) Par.?

yoginī me tadā bhūyo bhavitāsmīha mānuṣaḥ // (137.2) Par.?

ity eṣa mama vṛttāntas tvaṃ tv agamyam idaṃ vanam / (138.1) Par.?

kim āgataḥ kathaṃ ceti brūhīdānīṃ vayasya me // (138.2) Par.?

evaṃ markaṭarūpeṇa somasvāmidvijena saḥ / (139.1) Par.?

ukto niścayadattaḥ svaṃ tasmai vṛttāntam abravīt // (139.2) Par.?

yathā vidyādharīhetor ujjayinyāḥ samāgataḥ / (140.1) Par.?

ānīto dhairyajitayā yakṣiṇyā ca tayā niśi // (140.2) Par.?

tataḥ śrutatadāścaryavṛttāntaḥ kapirūpadhṛt / (141.1) Par.?

dhīmānniścayadattaṃ taṃ somasvāmī jagāda saḥ // (141.2) Par.?

anubhūtaṃ tvayā duḥkhaṃ mayaiva strīkṛte mahat / (142.1) Par.?

na ca śriyaḥ striyaśceha kadācitkasyacitsthirāḥ // (142.2) Par.?

saṃdhyāvat kṣaṇarāgiṇyo nadīvatkuṭilāśayāḥ / (143.1) Par.?

bhujagīvad aviśvāsyā vidyudvaccapalāḥ striyaḥ // (143.2) Par.?

tatsā vidyādharī raktāpyanurāgaparā kṣaṇāt / (144.1) Par.?

prāpya kaṃcitsvajātīyaṃ virajyettvayi mānuṣe // (144.2) Par.?

tadalaṃ strīnimittena prayāsenāmunādhunā / (145.1) Par.?

kiṃpākaphalatulyena vipākavirasena te // (145.2) Par.?

mā gā vidyādharapurīṃ tāṃ sakhe puṣkarāvatīm / (146.1) Par.?

yakṣiṇīskandhamāruhya tām evojjayinīṃ vraja // (146.2) Par.?

kuru madvacanaṃ mittraṃ pūrvaṃ mittravaco mayā / (147.1) Par.?

na kṛtaṃ rāgiṇā tena paritapye 'dhunāpyaham // (147.2) Par.?

bandhudattānuraktaṃ hi susnigdho brāhmaṇas tadā / (148.1) Par.?

vārayan bhavaśarmākhyaḥ suhṛn mām evam abravīt // (148.2) Par.?

striyāḥ sakhe vaśaṃ mā gāḥ strīcittaṃ hy atidurgamam / (149.1) Par.?

tathā ca mama yadvṛttaṃ tad idaṃ vacmi te śṛṇu // (149.2) Par.?

vārāṇasyām ihaivāsīt taruṇī rūpaśālinī / (150.1) Par.?

brāhmaṇī somadā nāma capalā guptayoginī // (150.2) Par.?

tayā ca saha me daivātsamabhūtsaṃgamo rahaḥ / (151.1) Par.?

tatsaṃgamakramāttasyāṃ mama prītiravardhata // (151.2) Par.?

ekadā tām ahaṃ svairamīrṣyākopādatāḍayam / (152.1) Par.?

taccāsahiṣṭa sā krūrā kopaṃ pracchādya tatkṣaṇam // (152.2) Par.?

anyedyuḥ praṇayakrīḍāvyājāc ca mama sūtrakam / (153.1) Par.?

gale 'badhnādahaṃ dāntastatkṣaṇaṃ balado 'bhavam // (153.2) Par.?

tato 'haṃ baladībhūtas tayā dāntoṣṭrajīvinaḥ / (154.1) Par.?

ekasya puṃso vikrīto gṛhītābhīṣṭamūlyayā // (154.2) Par.?

tenāropitabhāraṃ māṃ kliśyamānamavaikṣata / (155.1) Par.?

bandhamocanikā nāma yoginyatra kṛpānvitā // (155.2) Par.?

sā jñānataḥ somadayā viditvā māṃ paśūkṛtam / (156.1) Par.?

mumoca kaṇṭhāt sūtraṃ me madgosvāminy apaśyati // (156.2) Par.?

tato 'haṃ mānuṣībhūtaḥ sa ca kṣiprādvilokayan / (157.1) Par.?

palāyitaṃ māṃ manvāno matsvāmī prābhramad diśaḥ // (157.2) Par.?

ahaṃ ca bandhamocinyā tayā saha tato vrajan / (158.1) Par.?

daivādāgatayā dūrāddṛṣṭaḥ somadayā tayā // (158.2) Par.?

sā krodhena jvalantī tāṃ jñāninīṃ bandhamocinīm / (159.1) Par.?

avādītkimayaṃ pāpastiryaktvānmocitastvayā // (159.2) Par.?

dhikprāpsyasi durācāre phalamasya kukarmaṇaḥ / (160.1) Par.?

prātastvāṃ nihaniṣyāmi sahitāṃ pāpmanāmunā // (160.2) Par.?

ity uktvaiva gatāyāṃ ca tasyāṃ sā siddhayoginī / (161.1) Par.?

tatpratīghātahetor mām avocad bandhamocinī // (161.2) Par.?

hantuṃ māṃ kṛṣṇaturagīrūpeṇaiṣābhyupaiṣyati / (162.1) Par.?

mayā ca śoṇavaḍavārūpamatrāśrayiṣyate // (162.2) Par.?

tato yuddhe pravṛtte nau pṛṣṭhataḥ khaḍgapāṇinā / (163.1) Par.?

somadāyāṃ prahartavyaṃ tvayāsyām apramādinā // (163.2) Par.?

evametāṃ haniṣyāvastatprātastvaṃ gṛhe mama / (164.1) Par.?

āgaccherityuditvā sā gṛhaṃ me svamadarśayat // (164.2) Par.?

tatra tasyāṃ praviṣṭāyāmahaṃ nijagṛhānagām / (165.1) Par.?

anubhūtādbhutānekajanmāmutraiva janmani // (165.2) Par.?

prātaḥ kṛpāṇapāṇiś ca gatavānasmi tadgṛham / (166.1) Par.?

athāgāt somadā sātra kṛṣṇāśvārūpadhāriṇī // (166.2) Par.?

sāpi śoṇahayārūpam akarod bandhamocinī / (167.1) Par.?

khuradantaprahāraiś ca tato yuddhamabhūttayoḥ // (167.2) Par.?

mayā pradattanistriṃśaprahārā kṣudraśākinī / (168.1) Par.?

nihatā bandhamocinyā tayā sā somadā tataḥ // (168.2) Par.?

athāhaṃ nirbhayībhūtas tīrṇatiryaktvadurgatiḥ / (169.1) Par.?

na kustrīsaṃgamaṃ bhūyo manasā samacintayam // (169.2) Par.?

cāpalaṃ sāhasikatā śākinīśambarādayaḥ / (170.1) Par.?

doṣāḥ strīṇāṃ trayaḥ prāyo lokatrayabhayāvahāḥ // (170.2) Par.?

tacchākinīsakhīṃ bandhudattāṃ kimanudhāvasi / (171.1) Par.?

sneho yasyā na patyau sve tasyāstu tvayy asau kutaḥ // (171.2) Par.?

evam ukto 'py ahaṃ tena mitreṇa bhavaśarmaṇā / (172.1) Par.?

nākārṣaṃ vacanaṃ tasya prāpto 'smīmāṃ gatiṃ tataḥ // (172.2) Par.?

atastvāṃ vacmi mā kārṣīr anurāgaparāṃ prati / (173.1) Par.?

kleśaṃ sā hi svajātīye prāpte tvāṃ tyakṣyati dhruvam // (173.2) Par.?

bhṛṅgīva puṣpaṃ puruṣaṃ strī vāñchati navaṃ navam / (174.1) Par.?

ato 'nutāpo bhavitā mameva bhavataḥ sakhe // (174.2) Par.?

ity etat kapirūpasthasomasvāmivaco hṛdi / (175.1) Par.?

tasya niścayadattasya nāviśadrāganirbhare // (175.2) Par.?

uvāca sa kapiṃ taṃ hi na sā vyabhicarenmayi / (176.1) Par.?

vidyādharādhipakule śuddhe jātā hy asāviti // (176.2) Par.?

evaṃ tayorālapatoḥ saṃdhyārakto 'stabhūdharam / (177.1) Par.?

yayau niścayadattasya priyecchur iva bhāskaraḥ // (177.2) Par.?

athāgatāyāṃ rajanāv agradūtyām ivāyayau / (178.1) Par.?

sā śṛṅgotpādinī tasya nikaṭaṃ tatra yakṣiṇī // (178.2) Par.?

yayau niścayadattas tatskandhārūḍhaḥ priyāṃ prati / (179.1) Par.?

prayātum āpṛcchya kapiṃ smartavyo 'smīti vādinam // (179.2) Par.?

niśīthe ca himādrau tām anurāgaparā pituḥ / (180.1) Par.?

purīṃ vidyādharapateḥ prāptavān puṣkarāvatīm // (180.2) Par.?

tāvatprabhāvato buddhvā tadabhyāgamanāya sā / (181.1) Par.?

tato nagaryā niragādanurāgaparā bahiḥ // (181.2) Par.?

iyamāyāti te kāntā niśi netrotsavapradā / (182.1) Par.?

indumūrtirdvitīyeva tadidānīṃ vrajāmy aham // (182.2) Par.?

ity uktvā darśayitvā tāmaṃsāgrādavatāritam / (183.1) Par.?

natvā niścayadattaṃ tamatha sā yakṣiṇī yayau // (183.2) Par.?

tataḥ sāpi cirautsukyasaṃrambhāliṅganādibhiḥ / (184.1) Par.?

upagamyābhyanandattamanurāgaparā priyam // (184.2) Par.?

so 'py āśliṣya bahukleśalabdhatatsaṃgamotsavaḥ / (185.1) Par.?

avartamānaḥ sve dehe tanuṃ tasyā ivāviśat // (185.2) Par.?

tena gāndharvavidhinā bhāryā bhūtvātha tasya sā / (186.1) Par.?

anurāgaparā sadyo vidyayā nirmame puram // (186.2) Par.?

tasmin niścayadatto 'sau bāhye tasthau tayā saha / (187.1) Par.?

tadvidyācchannadṛṣṭibhyāṃ tatpitṛbhyām atarkitaḥ // (187.2) Par.?

pṛṣṭas tāṃs tādṛśāṃs tasyai mārgakleśāñ śaśaṃsa yat / (188.1) Par.?

tena sā bahu mene taṃ bhogaiś ceṣṭair upācarat // (188.2) Par.?

atha tan markaṭībhūtasomasvāmikathādbhutam / (189.1) Par.?

so 'tra niścayadatto 'syai vidyādharyai nyavedayat // (189.2) Par.?

jagāda caitan mittraṃ me tvatprayatnena kenacit / (190.1) Par.?

tiryaktvādyadi mucyeta tatpriye sukṛtaṃ bhavet // (190.2) Par.?

ity uktā tena sāvocad anurāgaparāpi tam / (191.1) Par.?

yoginyā mantramārgo 'yaṃ nāsmākaṃ viṣayaḥ punaḥ // (191.2) Par.?

tathāpi sādhayiṣyāmi priyametadahaṃ tava / (192.1) Par.?

abhyarthya bhadrarūpākhyāṃ vayasyāṃ siddhayoginīm // (192.2) Par.?

tac chrutvā sa vaṇikputro hṛṣṭastām avadatpriyām / (193.1) Par.?

tarhi taṃ paśya manmittramehi yāva tadantikam // (193.2) Par.?

tathety ukte tayānyedyustadutsaṅgasthitaś ca saḥ / (194.1) Par.?

vyomnā niścayadatto 'gāt sakhyus tasyāspadaṃ vanam // (194.2) Par.?

tatra taṃ suhṛdaṃ dṛṣṭvā kapirūpamupetya saḥ / (195.1) Par.?

praṇamatpriyayā sākamapṛcchatkuśalaṃ tadā // (195.2) Par.?

adya me kuśalaṃ yat tvam anurāgaparāyutaḥ / (196.1) Par.?

dṛṣṭo mayeti so 'py uktvā somasvāmikapiḥ kila // (196.2) Par.?

tam abhyanandatpradadau tatpriyāyai tathāśiṣam / (197.1) Par.?

tataḥ sarve 'py upāvikṣaṃs tatra ramye śilātale // (197.2) Par.?

cakruś ca tatkathālāpaṃ tattattasya kapeḥ kṛte / (198.1) Par.?

ādau niścayadattena cintitaṃ kāntayā saha // (198.2) Par.?

tatas taṃ kapimāpṛcchya preyasīsadanaṃ ca tat / (199.1) Par.?

yayau niścayadatto dyāmutpatyāṅke dhṛtastayā // (199.2) Par.?

anyedyustām avādīc ca so 'nurāgaparāṃ punaḥ / (200.1) Par.?

ehi tasyāntikaṃ sakhyuḥ kṣaṇaṃ yāva kaperiti // (200.2) Par.?

tataḥ sāpi tamāha sma tvamevādya vraja svayam / (201.1) Par.?

gṛhāṇotpatanīṃ vidyāṃ matto 'vataraṇīṃ tathā // (201.2) Par.?

ity uktaḥ sa tadādāya tadvidyādvitayaṃ tataḥ / (202.1) Par.?

vyomnā niścayadatto 'gāt sakhyus tasyāntikaṃ kapeḥ // (202.2) Par.?

tatra yāvatsa kurute tena sākaṃ ciraṃ kathāḥ / (203.1) Par.?

sānurāgaparā tāvadudyānaṃ niryayau gṛhāt // (203.2) Par.?

tatra tasyāṃ niṣaṇṇāyāṃ vidyādharakumārakaḥ / (204.1) Par.?

ko 'py ājagāma nabhasā paribhrāmyanyadṛcchayā // (204.2) Par.?

sa dṛṣṭvaiva smarāveśavivaśastāmupāyayau / (205.1) Par.?

vidyādharīṃ sa tāṃ buddhvā vidyayā martyabhartṛkām // (205.2) Par.?

sāpy upetaṃ tam ālokya subhagaṃ vinatānanā / (206.1) Par.?

kastvaṃ kim āgato 'sīti śanaiḥ papraccha kautukāt // (206.2) Par.?

tataḥ sa pratyavocattāṃ svavidyājñānaśālinam / (207.1) Par.?

viddhi vidyādharaṃ mugdhe nāmnā māṃ rāgabhañjanam // (207.2) Par.?

so 'haṃ saṃdarśanādeva sahasā hariṇekṣaṇe / (208.1) Par.?

manobhuvā vaśīkṛtya tubhyam eva samarpitaḥ // (208.2) Par.?

tadalaṃ devi sevitvā martyaṃ dharaṇigocaram / (209.1) Par.?

pitā vetti na yāvatte tāvattulyaṃ bhajasva mām // (209.2) Par.?

iti tasmin bruvāṇe sā kaṭākṣārdhavilokinī / (210.1) Par.?

acintayadayaṃ yukto mameti capalāśayā // (210.2) Par.?

tato labdhvāśayaṃ cakre bhāryā tenaiva tatra sā / (211.1) Par.?

apekṣate dvayor aikacittye kiṃ rahasi smaraḥ // (211.2) Par.?

atha vidyādhare tasmin saṃpratyapasṛte tataḥ / (212.1) Par.?

āgānniścayadatto 'tra somasvāmisamīpataḥ // (212.2) Par.?

āgatasya na sā cakre viraktāliṅganādikam / (213.1) Par.?

anurāgaparā tasya vyapadiśya śirorujam // (213.2) Par.?

sa tu tadvyājam avidann ṛjuḥ snehavimohitaḥ / (214.1) Par.?

asvāsthyam eva matvāsyā duḥkhaṃ tadanayaddinam // (214.2) Par.?

prātaś ca durmanā bhūyastaṃ kapiṃ suhṛdaṃ prati / (215.1) Par.?

sa somasvāminaṃ prāyānnabhasā vidyayorbalāt // (215.2) Par.?

yāte tasminn upāgāt tāṃ so 'nurāgaparāṃ punaḥ / (216.1) Par.?

kāmī vidyādharo rātrikṛtonnidrastayā vinā // (216.2) Par.?

niśāvirahasotkaṇṭhāṃ kaṇṭhe tām avalambya ca / (217.1) Par.?

suratāntapariśrānto nidrākrānto babhūva saḥ // (217.2) Par.?

sāpyaṅkasuptaṃ pracchādya priyaṃ vidyābalena tam / (218.1) Par.?

rātrijāgaraṇān nidrām anurāgaparā yayau // (218.2) Par.?

tāvanniścayadatto 'pi prāpa tasyāntikaṃ kapeḥ / (219.1) Par.?

so 'pi papraccha taṃ kṛtvā svāgataṃ vānaraḥ suhṛt // (219.2) Par.?

durmanaskamivādya tvāṃ kiṃ paśyāmyucyatāmiti / (220.1) Par.?

tato niścayadatto 'pi sa taṃ vānaram abravīt // (220.2) Par.?

anurāgaparātyartham asvasthā mittra vartate / (221.1) Par.?

tenāsmi duḥsthitaḥ sā hi prāṇebhyo 'pi priyā mama // (221.2) Par.?

ity uktas tena sa jñānī markaṭastam abhāṣata / (222.1) Par.?

gaccha suptāmidānīṃ tāṃ sthitāṃ kṛtvāṅkavartinīm // (222.2) Par.?

taddattavidyayā vyomnā tāmānaya madantikam / (223.1) Par.?

yāvanmahadihāścaryaṃ darśayāmyadhunaiva te // (223.2) Par.?

tac chrutvā khena gatvaiva so 'nurāgaparāṃ tataḥ / (224.1) Par.?

dṛṣṭvā niścayadattastāṃ suptām aṅke 'grahīllaghu // (224.2) Par.?

taṃ tu vidyādharaṃ tasyā nāṅge lagnaṃ dadarśa saḥ / (225.1) Par.?

suptaṃ vidyābalenādāv adṛśyaṃ vihitaṃ tayā // (225.2) Par.?

utpatya cāntarikṣaṃ tām anurāgaparāṃ kṣaṇāt / (226.1) Par.?

ānināya kapes tasya sa somasvāmino 'ntikam // (226.2) Par.?

sa kapirdivyadṛktasmai tadā yogamupādiśat / (227.1) Par.?

yena vidyādharaṃ tasyāḥ kaṇṭhe lagnaṃ dadarśa saḥ // (227.2) Par.?

dṛṣṭvā ca hā dhigetatkimiti taṃ vādinaṃ kapiḥ / (228.1) Par.?

sa eva tattvadarśī tadyathāvṛttam abodhayat // (228.2) Par.?

kruddhe niścayadatte 'tha tasmin vidyādharo 'tra saḥ / (229.1) Par.?

prabuddhastatpriyākāmī khamutpatya tirodadhe // (229.2) Par.?

sāpi prabuddhā tatkālam anurāgaparātmanaḥ / (230.1) Par.?

rahasyabhedaṃ taṃ dṛṣṭvā hriyā tasthāv adhomukhī // (230.2) Par.?

tato niścayadattas tām uvācodaśrulocanaḥ / (231.1) Par.?

viśvasto 'haṃ kathaṃ pāpe tvayaivaṃ bata vañcitaḥ // (231.2) Par.?

atyantacañcalasyeha pāradasya nibandhane / (232.1) Par.?

kāmaṃ vijñāyate yuktir na strīcittasya kācana // (232.2) Par.?

iti bruvati tasmin sānuttarā rudatī śanaiḥ / (233.1) Par.?

anurāgaparotpatya divaṃ dhāma nijaṃ yayau // (233.2) Par.?

tato niścayadattaṃ taṃ suhṛnmarkaṭako 'bravīt / (234.1) Par.?

etāṃ yad anvadhāvas tvaṃ vārito 'pi mayā priyām // (234.2) Par.?

tasyedaṃ tīvrarāgāgneḥ phalaṃ yadanutapyase / (235.1) Par.?

ko hi saṃpatsu capalāsvāśvāso vanitāsu ca // (235.2) Par.?

tadalaṃ paritāpena tavedānīṃ śamaṃ kuru / (236.1) Par.?

bhavitavyaṃ hi dhātrāpi na śakyamativartitum // (236.2) Par.?

iti tasmātkapeḥ śrutvā śokamohaṃ vihāya tam / (237.1) Par.?

yayau niścayadatto 'tra viraktaḥ śaraṇaṃ śivam // (237.2) Par.?

atha tatra vane suhṛdā kapinā saha tiṣṭhatastato nikaṭam / (238.1) Par.?

tasyājagāma daivāttapasvinī mokṣadā nāma // (238.2) Par.?

sā taṃ krameṇa dṛṣṭvā praṇataṃ papraccha mānuṣasya sataḥ / (239.1) Par.?

citraṃ katham iha jāto mittraṃ te markaṭo 'yamiti // (239.2) Par.?

tataḥ svaṃ vṛttāntaṃ tadanu ca sa mittrasya caritaṃ samācakhyau tasyai kṛpaṇamatha tām evam avadat / (240.1) Par.?

prayogaṃ mantraṃ vā yadi bhagavatī vetti tad imaṃ kapitvātsanmittraṃ suhṛdamadhunā mocayatu me // (240.2) Par.?

tac chrutvā sā tasya bāḍhaṃ kapes tat sūtraṃ kaṇṭhān mantrayuktyā mumoca / (241.1) Par.?

so 'tha tyaktvā mārkaṭīmākṛtiṃ tāṃ somasvāmī pūrvavanmānuṣo 'bhūt // (241.2) Par.?

tasyāṃ tataś ca taḍitīva tirohitāyāṃ divyaprabhāvabhṛti bhūri tapo vidhāya / (242.1) Par.?

kālena tatra kila niścayadattasomasvāmidvijau prayayatuḥ paramāṃ gatiṃ tau // (242.2) Par.?

evaṃ nisargacapalā lalanā vivekavairāgyadāyibahuduścaritaprabandhāḥ / (243.1) Par.?

sādhvī tu kācidapi tāsu kulaṃ viśālaṃ yālaṃkarotyabhinavā khamivendulekhā // (243.2) Par.?

ity etāṃ naravāhanadattaḥ sacivasya gomukhasya mukhāt / (244.1) Par.?

citrāmākarṇya kathāṃ tutoṣa ratnaprabhāsahitaḥ // (244.2) Par.?

Duration=1.447986125946 secs.