Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17507

Click on a sentence to show its analysis
Keep the mouse pointer over a lemma to show its meanings.

tataḥ kaliṅgasenāyāḥ smarannanupamaṃ vapuḥ / (1.1) Par.?

ekadā manmathāviṣṭo niśi vatseśvaro 'bhavat // (1.2) Par.?

utthāya khaḍgahastaḥ san gatvaiva praviveśa saḥ / (2.1) Par.?

ekākī mandiraṃ tasyāḥ kṛtātithyādarastayā // (2.2) Par.?

tatra prārthayamānas tāṃ bhāryārthe sa mahīpatiḥ / (3.1) Par.?

parapatnyahamasmīti pratyākhyātas tayābravīt // (3.2) Par.?

tṛtīyaṃ puruṣaṃ prāptā yatastvamasi bandhakī / (4.1) Par.?

paradāragato doṣo na me tvadgamane tataḥ // (4.2) Par.?

evaṃ kaliṅgasenā sā rājñoktā pratyuvāca tam / (5.1) Par.?

tvadartham āgatā rājannahaṃ vidyādhareṇa hi // (5.2) Par.?

vyūḍhā madanavegena svairaṃ tvadrūpadhāriṇā / (6.1) Par.?

sa evaikaś ca bhartā me tatkasmādasmi bandhakī // (6.2) Par.?

kiṃ vātikrāntabandhūnāṃ svecchācārahatātmanām / (7.1) Par.?

imāstā vipadaḥ strīṇāṃ kumārīṇāṃ kathaiva kā // (7.2) Par.?

dṛṣṭāśakunayā sakhyā niṣiddhāpi vyasarjayam / (8.1) Par.?

tvatpārśvaṃ yadahaṃ dūtaṃ tasya cedaṃ phalaṃ mama // (8.2) Par.?

tat sprakṣyasi balānmāṃ cet prāṇāṃstyakṣyāmy ahaṃ tataḥ / (9.1) Par.?

kā nāma kulajā hi strī bhartṛdrohaṃ kariṣyati // (9.2) Par.?

tathā ca kathayāmy atra tava rājan kathāṃ śṛṇu / (10.1) Par.?

purābhūd indradattākhyaś cedideśamahīpatiḥ // (10.2) Par.?

sa pāpaśodhane tīrthe kīrtyai devakulaṃ mahat / (11.1) Par.?

cakre yaśaḥśarīrārthī śarīraṃ vīkṣya bhaṅguram // (11.2) Par.?

tac ca bhaktirasācchaśvadīkṣituṃ sa yayau nṛpaḥ / (12.1) Par.?

sarvaś ca tīrthasnānāya sadā tatrāyayau janaḥ // (12.2) Par.?

ekadā ca dadarśaikāṃ tīrthasnānārtham āgatām / (13.1) Par.?

sa rājātra vaṇigbhāryāṃ pravāsasthitabhartṛkām // (13.2) Par.?

svacchakāntisudhāsiktāṃ citrarūpavibhūṣaṇām / (14.1) Par.?

jaṅgamām iva kaṃdarparājadhānīṃ manoramām // (14.2) Par.?

tvayāhaṃ vijaye viśvamiti prītyeva pādayoḥ / (15.1) Par.?

āśliṣṭāṃ pañcabāṇasya tūṇīradvayaśobhayā // (15.2) Par.?

sā dṛṣṭaiva manas tasya jahāra nṛpatestathā / (16.1) Par.?

yathānviṣya gṛhaṃ tasyāḥ sa yayau vivaśo niśi // (16.2) Par.?

tāṃ ca prārthayamānaḥ sañjagade sa tayā nṛpaḥ / (17.1) Par.?

rakṣitā tvaṃ na yuktaṃ te paradārābhimarśanam // (17.2) Par.?

haṭhāt spṛśasi vā māṃ ced adharmas te mahān bhavet / (18.1) Par.?

mariṣyāmi ca sadyo 'haṃ na sahiṣye ca dūṣaṇam // (18.2) Par.?

ity ukte 'pi tayā tasmin balaṃ rājñi cikīrṣati / (19.1) Par.?

śīlabhraṃśabhayāttasyāḥ sadyo hṛdayamasphuṭat // (19.2) Par.?

tad dṛṣṭvā sapadi hrītaḥ sa gatvaiva yathāgatam / (20.1) Par.?

dinaistenānutāpena rājā pañcatvamāyayau // (20.2) Par.?

ity ākhyāya kathāmetāṃ sabhayapraśrayānatā / (21.1) Par.?

bhūyaḥ kaliṅgasenā sā vatseśvaramabhāṣata // (21.2) Par.?

tasmādadharme matprāṇaharaṇe mā matiṃ kṛthāḥ / (22.1) Par.?

ihāśritāyā vastuṃ me dehi yāmyanyato 'nyathā // (22.2) Par.?

etatkaliṅgasenātaḥ śrutvā vatseśvaro 'tha saḥ / (23.1) Par.?

vicārya virato bhūtvā dharmajñastām abhāṣata // (23.2) Par.?

rājaputri vasa svecchaṃ bhartrā samam ihādhunā / (24.1) Par.?

nāhaṃ vakṣyāmi te kiṃcididānīṃ mā bhayaṃ kṛthāḥ // (24.2) Par.?

ity uktvaiva gate tasmin svairaṃ rājñi svamandiram / (25.1) Par.?

śrutvā madanavegastannabhaso 'vatatāra saḥ // (25.2) Par.?

priye sādhu kṛtaṃ naivamakariṣyaḥ śubhe yadi / (26.1) Par.?

nābhaviṣyacchubhaṃ yasmānnāsahiṣyata tanmayā // (26.2) Par.?

ity uktvā sāntvayitvā tāṃ niśāṃ nītvā tayā saha / (27.1) Par.?

tatraiva gacchann āgacchann āsīd vidyādharo 'tha saḥ // (27.2) Par.?

kaliṅgasenāpi ca sā patyau vidyādhareśvare / (28.1) Par.?

tatrāsta martyabhāve 'pi divyabhogasukhānvitā // (28.2) Par.?

vatsarājo 'pi taccintāṃ muktvā mantrivacaḥ smaran / (29.1) Par.?

nananda labdhaṃ manvāno devīṃ rājyaṃ sutaṃ tathā // (29.2) Par.?

devī vāsavadattā ca mantrī yaugandharāyaṇaḥ / (30.1) Par.?

abhūtāṃ nirvṛtau siddhe nītikalpalatāphale // (30.2) Par.?

atha gacchatsu divaseṣv āpāṇḍumukhapaṅkajā / (31.1) Par.?

dadhre kaliṅgasenā sā garbhamutpannadohadā // (31.2) Par.?

tuṅgau virejatus tasyāḥ stanāv āśyāmacūcukau / (32.1) Par.?

nidhānakumbhau kāmasya madamudrāṅkitāviva // (32.2) Par.?

tato madanavegastāmupetya patirabhyadhāt / (33.1) Par.?

kaliṅgasene divyānāmasmākaṃ samayo 'sty ayam // (33.2) Par.?

jātaṃ mānuṣagarbhaṃ yan muktvā yāmo vidūrataḥ / (34.1) Par.?

kaṇvāśrame na tatyāja menakā kiṃ śakuntalām // (34.2) Par.?

tvaṃ yadyapyapsarāḥ pūrvaṃ tad apy avinayān nijāt / (35.1) Par.?

śakraśāpena samprāptā mānuṣyaṃ devi sāṃpratam // (35.2) Par.?

tenaiva bandhakīśabdo jātaḥ sādhvyā apīha te / (36.1) Par.?

tasmādapatyaṃ rakṣestvaṃ sthānaṃ yāsyāmy ahaṃ nijam // (36.2) Par.?

smariṣyasi yadā māṃ ca saṃnidhāsye tadā tava / (37.1) Par.?

evaṃ kaliṅgasenāṃ tāmuktvā sāśruvilocanām // (37.2) Par.?

samāśvāsyātha dattvā ca tasyai tadratnasaṃcayam / (38.1) Par.?

taccittaḥ samayākṛṣṭo yayau vidyādhareśvaraḥ // (38.2) Par.?

kaliṅgasenāpy atrāsīd apatyāśāṃ sakhīm iva / (39.1) Par.?

ālambya vatsarājasya bhujacchāyāmapāśritā // (39.2) Par.?

atrāntare kṛtavatīṃ sāṅgabhartrāptaye tapaḥ / (40.1) Par.?

ādideśa ratiṃ bhāryām anaṅgasyāmbikāpatiḥ // (40.2) Par.?

vatsarājagṛhe jāto dagdhapūrvaḥ sa te patiḥ / (41.1) Par.?

naravāhanadattākhyo 'yonijo madvilaṅghanāt // (41.2) Par.?

madārādhanatastvaṃ tu martyaloke 'py ayonijā / (42.1) Par.?

janiṣyase tatas tena bhartrā sāṅgena yokṣyase // (42.2) Par.?

evam uktvā ratiṃ śaṃbhuḥ prajāpatimathādiśat / (43.1) Par.?

kaliṅgasenā tanayaṃ soṣyate divyasaṃbhavam // (43.2) Par.?

taṃ hṛtvā māyayā tasyās tatsthāne tvamimāṃ ratim / (44.1) Par.?

nirmāya mānuṣīṃ kanyāṃ tyaktadivyatanuṃ kṣipeḥ // (44.2) Par.?

itīśvarājñām ādāya mūrdhni vedhasy atho gate / (45.1) Par.?

kaliṅgasenā prasavaṃ prāpte kāle cakāra sā // (45.2) Par.?

jātamātraṃ sutaṃ tasyā hṛtvaivātra svamāyayā / (46.1) Par.?

ratiṃ tāṃ kanyakāṃ kṛtvā nyadhād vidhir alakṣitam // (46.2) Par.?

sarvaś ca tatra tām eva kanyāṃ jātām alakṣata / (47.1) Par.?

divāpy akāṇḍapratipac candralekhām ivoditām // (47.2) Par.?

kāntidyotitatadvāsagṛhāṃ nirjitya kurvatīm / (48.1) Par.?

ratnadīpaśikhāśreṇīrlajjitā iva niṣprabhāḥ // (48.2) Par.?

kaliṅgasenā tāṃ dṛṣṭvā jātām asadṛśīṃ sutām / (49.1) Par.?

putrajanmādhikaṃ toṣādutsavaṃ vitatāna sā // (49.2) Par.?

atha vatseśvaro rājā sadevīkaḥ samantrikaḥ / (50.1) Par.?

kanyāṃ kaliṅgasenāyā jātāṃ śuśrāva tādṛśīm // (50.2) Par.?

śrutvā ca sa nṛpo 'kasmāduvāceśvaracoditaḥ / (51.1) Par.?

devīṃ vāsavadattāṃ tāṃ sthite yaugandharāyaṇe // (51.2) Par.?

jāne kaliṅgasenaiṣā divyā strī śāpataścyutā / (52.1) Par.?

asyāṃ jātā ca kanyeyaṃ divyaivāścaryarūpadhṛk // (52.2) Par.?

tadasau kanyakā tulyā rūpeṇa tanayasya me / (53.1) Par.?

naravāhanadattasya mahādevītvamarhati // (53.2) Par.?

tac chrutvā jagade rājā devyā vāsavadattayā / (54.1) Par.?

mahārāja kim evaṃ tvamakasmādadya bhāṣase // (54.2) Par.?

kuladvayaviśuddho 'yaṃ kva putraste bata kva sā / (55.1) Par.?

kaliṅgasenātanayā bandhakīgarbhasaṃbhavā // (55.2) Par.?

śrutvaitad vimṛśan rājā so 'bravīn na hy ahaṃ svataḥ / (56.1) Par.?

vadāmy etat praviśyāntaḥ ko'pi jalpayatīva mām // (56.2) Par.?

naravāhanadattasya kanyeyaṃ pūrvanirmitā / (57.1) Par.?

bhāryety evaṃ vadantīṃ ca śṛṇomīva giraṃ divaḥ // (57.2) Par.?

kaliṅgasenā kiṃ cāsāv ekapatnī kulodgatā / (58.1) Par.?

pūrvakarmavaśāt tv asyā bandhakīśabdasaṃbhavaḥ // (58.2) Par.?

iti rājñodite prāha mantrī yaugandharāyaṇaḥ / (59.1) Par.?

śrūyate deva yaccakre ratirdagdhe smare tapaḥ // (59.2) Par.?

martyalokāvatīrṇena saśarīreṇa saṃgamaḥ / (60.1) Par.?

martyabhāvagatāyāste svena bhartrā bhaviṣyati // (60.2) Par.?

iti cādādvaraṃ śarvo ratyai svapatimīpsave / (61.1) Par.?

kāmāvatāraś coktaḥ prāg divyavācā sutas tava // (61.2) Par.?

ratyāvataraṇīyaṃ ca martyabhāve harājñayā / (62.1) Par.?

garbhagrāhikayā cādya mamaivaṃ varṇitaṃ rahaḥ // (62.2) Par.?

mayā kaliṅgasenāyā garbhaḥ prāggarbhaśayyayā / (63.1) Par.?

yukto dṛṣṭastadaivānyadapaśyaṃ tadvivarjitam // (63.2) Par.?

tadāścaryaṃ vilokyāhaṃ tavākhyātum ihāgatā / (64.1) Par.?

iti striyā tayoktaṃ me jātaiṣā pratibhāpi te // (64.2) Par.?

tajjāne māyayā devaiḥ saiṣā ratir ayonijā / (65.1) Par.?

kaliṅgasenātanayā garbhacauryeṇa nirmitā // (65.2) Par.?

bhāryā kāmāvatārasya putrasya tava bhūpate / (66.1) Par.?

tathā cātra kathāmetāṃ yakṣasaṃbandhinīṃ śṛṇu // (66.2) Par.?

bhṛtyo vaiśravaṇasyābhūd virūpākṣa iti śrutaḥ / (67.1) Par.?

yakṣo nidhānalakṣāṇāṃ pradhānādhyakṣatāṃ gataḥ // (67.2) Par.?

mathurāyāṃ bahiḥsaṃsthaṃ nidhānaṃ sa ca rakṣitum / (68.1) Par.?

yakṣaṃ niyuktavānekaṃ śilāstambhamivācalam // (68.2) Par.?

tatra taṃ nagarīvāsī kaścitpāśupato dvijaḥ / (69.1) Par.?

nidhānānveṣaṇāyāgāt khanyavādī kadācana // (69.2) Par.?

sa mānuṣavasādīpahasto yāvatparīkṣate / (70.1) Par.?

sthānaṃ tat tāvad asyātra karāddīpaḥ papāta saḥ // (70.2) Par.?

lakṣaṇena ca tenātra sthitaṃ nidhimavetya saḥ / (71.1) Par.?

udghāṭayitumārebhe sahānyaiḥ sakhibhirdvijaiḥ // (71.2) Par.?

atha yo 'sau niyukto 'bhūd yakṣo rakṣāvidhau sa tat / (72.1) Par.?

dṛṣṭvā gatvā yathāvastu virūpākṣaṃ vyajijñapat // (72.2) Par.?

gaccha vyāpādaya kṣipraṃ kṣudrāṃs tān khanyavādinaḥ / (73.1) Par.?

ity ādideśa taṃ yakṣaṃ virūpākṣaḥ sa kopanaḥ // (73.2) Par.?

tataḥ sa yakṣo gatvaiva svayuktyā nijaghāna tān / (74.1) Par.?

nidhānavādino viprān asaṃprāptamanorathān // (74.2) Par.?

tad buddhvā dhanadaḥ kruddho virūpākṣam uvāca tam / (75.1) Par.?

brahmahatyā kathaṃ pāpa kāritā sahasā tvayā // (75.2) Par.?

durgato vārtikajano lobhāt kiṃ nāma nācaret / (76.1) Par.?

nivāryate sa vitrāsya vighnaistaistair na hanyate // (76.2) Par.?

ity uktvātha śaśāpainaṃ virūpākṣaṃ dhanādhipaḥ / (77.1) Par.?

martyayonau prajāyasva duṣkṛtācaraṇād iti // (77.2) Par.?

prāptaśāpo 'tha kasyāpi bhūtale brāhmaṇasya saḥ / (78.1) Par.?

virūpākṣaḥ suto jāto brāhmaṇasyāgrahāriṇaḥ // (78.2) Par.?

tato 'sya yakṣiṇī patnī dhanādhyakṣaṃ vyajijñapat / (79.1) Par.?

deva yatra sa bhartā me kṣiptas tatraiva māṃ kṣipa // (79.2) Par.?

prasīda na hi śaknomi viyuktā tena jīvitum / (80.1) Par.?

evaṃ tayā sa vijñaptaḥ sādhvyā vaiśravaṇo 'bhyadhāt // (80.2) Par.?

tasya viprasya sadane jāto bhartā sa te 'naghe / (81.1) Par.?

tasyaiva dāsyā gehe tvaṃ nipatiṣyasy ayonijā // (81.2) Par.?

tatra tena samaṃ bhartrā saṃgamaste bhaviṣyati / (82.1) Par.?

tvatprasādātsa śāpaṃ ca tīrtvā matpārśvameṣyati // (82.2) Par.?

iti vaiśravaṇādeśāt sādhvī sā patitā tataḥ / (83.1) Par.?

dāsyās tasyā gṛhadvāri kanyā bhūtvaiva mānuṣī // (83.2) Par.?

akasmāc ca tayā dāsyā kanyā dṛṣṭādbhutākṛtiḥ / (84.1) Par.?

gṛhītvā darśitā cāsya svāmino 'tra dvijanmanaḥ // (84.2) Par.?

divyeyaṃ kanyakā kāpi niḥsaṃdeham ayonijā / (85.1) Par.?

ity ātmā mama vaktīhānaya tāṃ tvamaśaṅkitam // (85.2) Par.?

iyaṃ hi mama putrasya manye bhāryātvamarhati / (86.1) Par.?

iti so 'pi dvijo dāsīṃ tāmuvāca nananda ca // (86.2) Par.?

kramādatra vivṛddhā sā kanyā viprātmajaś ca saḥ / (87.1) Par.?

anyonyadarśanābaddhagāḍhasnehau babhūvatuḥ // (87.2) Par.?

tataḥ kṛtavivāhau tau tena vipreṇa daṃpatī / (88.1) Par.?

ajātismaraṇe 'py āstāmuttīrṇavirahāviva // (88.2) Par.?

atha kālena dehānte tayā so 'nugataḥ patiḥ / (89.1) Par.?

tattapaḥkṣatapāpaḥ sanyakṣaḥ svaṃ prāptavān padam // (89.2) Par.?

itīhāvatarantyeva nirāgastvād ayonijāḥ / (90.1) Par.?

bhūtale kāraṇavaśāddivyā daivatanirmitāḥ // (90.2) Par.?

kulaṃ kiṃ nṛpate te 'syās tasmād bhāryā sutasya te / (91.1) Par.?

kaliṅgasenāputrīyaṃ yathoktaṃ daivanirmitā // (91.2) Par.?

yaugandharāyaṇenaivam ukte vatseśvaraś ca tat / (92.1) Par.?

devī vāsavadattā ca tatheti hṛdi cakratuḥ // (92.2) Par.?

tatas tasmin gṛhaṃ yāte mantrimukhye sa bhūpatiḥ / (93.1) Par.?

pānādikrīḍayā ninye sabhāryastaddinaṃ sukhī // (93.2) Par.?

tato dineṣu gacchatsu mohabhraṣṭasvakasmṛtiḥ / (94.1) Par.?

kaliṅgasenātanayā sā samaṃ rūpasaṃpadā // (94.2) Par.?

krameṇa vavṛdhe nāmnā kṛtā madanamañcukā / (95.1) Par.?

sutā madanavegasyetyato mātrā janena ca // (95.2) Par.?

nūnaṃ sā śiśriye rūpaṃ sarvānyavarayoṣitām / (96.1) Par.?

anyathā tāḥ puras tasyā virūpā jajñire katham // (96.2) Par.?

śrutvā rūpavatīṃ tāṃ ca kautukātsvayam ekadā / (97.1) Par.?

devī vāsavadattā tāmānināyātmano 'ntikam // (97.2) Par.?

tatra dhātryā mukhāsaktāṃ vatsarājo dadarśa tām / (98.1) Par.?

yaugandharāyaṇādyāś ca varterdīpaśikhām iva // (98.2) Par.?

dṛṣṭvā cādṛṣṭapūrvaṃ tat tasyā netrāmṛtaṃ vapuḥ / (99.1) Par.?

ratir evāvatīrṇeyam iti mene na tatra kaḥ // (99.2) Par.?

tataś cānāyayāṃcakre devyā vāsavadattayā / (100.1) Par.?

naravāhanadatto 'tra jagannetrotsavaḥ sutaḥ // (100.2) Par.?

so 'tra phullamukhāmbhojo dīprāṃ madanamañcukām / (101.1) Par.?

tām apaśyannavāṃ saurīm iva padmākaraḥ prabhām // (101.2) Par.?

sāpi taṃ locanānandaṃ paśyantī vikacānanā / (102.1) Par.?

na tṛptimāyayau bālā cakorīvāmṛtatviṣam // (102.2) Par.?

tataḥprabhṛti tau bālāvapi sthātuṃ na śekatuḥ / (103.1) Par.?

dṛṣṭipāśair ivābaddhau pṛthagbhūtāvapi kṣaṇam // (103.2) Par.?

dinairniścitya saṃbandhaṃ devanirmitam eva tu / (104.1) Par.?

vivāhavidhaye buddhiṃ vyadhād vatseśvarastayoḥ // (104.2) Par.?

kaliṅgasenā tad buddhvā nananda ca babandha ca / (105.1) Par.?

naravāhanadatte 'smiñ jāmātṛprītito dhṛtim // (105.2) Par.?

saṃmantrya mantribhiḥ sārdhaṃ tataś cākārayatpṛthak / (106.1) Par.?

vatsarājaḥ svaputrasya tasya svam iva mandiram // (106.2) Par.?

tataḥ saṃbhṛtya saṃbhārān putraṃ rājā sa kālavit / (107.1) Par.?

yauvarājye 'bhyaṣiñcat taṃ dṛṣṭaślāghyaguṇagraham // (107.2) Par.?

pūrvaṃ tasyāpatanmūrdhni pitrorānandabāṣpajam / (108.1) Par.?

tataḥ śrautamahāmantrapūtaṃ sattīrthajaṃ payaḥ // (108.2) Par.?

abhiṣekāmbubhis tasya dhaute vadanapaṅkaje / (109.1) Par.?

citraṃ nirmalatāṃ prāpurmukhāni kakubhām api // (109.2) Par.?

maṅgalyamālyapuṣpeṣu tasya kṣipteṣu mātṛbhiḥ / (110.1) Par.?

mumoca divyamālyaughavarṣaṃ dyaur api tatkṣaṇam // (110.2) Par.?

devadundubhinirhrādaspardhayeva jajṛmbhire / (111.1) Par.?

ānandatūryanirghoṣapratiśabdā nabhastale // (111.2) Par.?

praṇanāmābhiṣiktaṃ taṃ yuvarājaṃ na tatra kaḥ / (112.1) Par.?

svaprabhāvād ṛte tenaivonnanāma tadā hi saḥ // (112.2) Par.?

tato vatseśvaras tasya sūnorbālasakhīnsataḥ / (113.1) Par.?

svamantriputrān āhūya sacivatve samādiśat // (113.2) Par.?

yaugandharāyaṇasutaṃ mantritve marubhūtikam / (114.1) Par.?

senāpatye hariśikhaṃ rumaṇvattanayaṃ tataḥ // (114.2) Par.?

vasantakasutaṃ krīḍāsakhitve tu tapantakam / (115.1) Par.?

gomukhaṃ ca pratīhāradhurāyām ityakātmajam // (115.2) Par.?

paurohitye ca pūrvoktāvubhau piṅgalikāsutau / (116.1) Par.?

vaiśvānaraṃ śāntisomaṃ bhrātuḥ putrau purodhasaḥ // (116.2) Par.?

ity ājñapteṣu putrasya sācivye teṣu bhūbhṛtā / (117.1) Par.?

gaganād udabhūd vāṇī puṣpavṛṣṭipuraḥsarā // (117.2) Par.?

sarvārthasādhakā ete bhaviṣyantyasya mantriṇaḥ / (118.1) Par.?

śarīrād avibhinno 'sya gomukhastu bhaviṣyati // (118.2) Par.?

ity ukto divyayā vācā hṛṣṭo vatseśvaraś ca saḥ / (119.1) Par.?

sarvān saṃmānayāmāsa vastrair ābharaṇaiś ca tān // (119.2) Par.?

anujīviṣu tasmiṃś ca vasu varṣati rājani / (120.1) Par.?

daridraśabdasyaikasya nāsīt tatrārthasaṃgatiḥ // (120.2) Par.?

pavanollāsitākṣiptapatākāpaṭapaṅktibhiḥ / (121.1) Par.?

āhūtair iva sāpūri nartakīcāraṇaiḥ purī // (121.2) Par.?

āgādvaidyādharī sākṣāllakṣmīs tasyaiva bhāvinī / (122.1) Par.?

kaliṅgasenājāmātur utsave 'tra bhaviṣyataḥ // (122.2) Par.?

tato vāsavadattā ca sā ca padmāvatī tathā / (123.1) Par.?

harṣeṇa nanṛtustisro militā iva śaktayaḥ // (123.2) Par.?

mārutāndolitalatāḥ pranṛtyanniva sarvataḥ / (124.1) Par.?

udyānataravo 'py atra cetaneṣu kathaiva kā // (124.2) Par.?

tataḥ kṛtābhiṣekaḥ sannāruhya jayakuñjaram / (125.1) Par.?

naravāhanadattaḥ sa yuvarājo viniryayau // (125.2) Par.?

avākīryata cotkṣiptairnetrairnīlasitāruṇaiḥ / (126.1) Par.?

paurastrībhiḥ sa nīlābjalājapadmāñjaliprabhaiḥ // (126.2) Par.?

dṛṣṭvā ca tatpurīpūjyadevatā bandimāgadhaiḥ / (127.1) Par.?

stūyamānaḥ sasacivaḥ sa viveśa svamandiram // (127.2) Par.?

tatra divyāni bhojyāni tathā pānānyupāharat / (128.1) Par.?

kaliṅgasenā tasyādau svavibhūtyadhikāni sā // (128.2) Par.?

dadau tasmai suvastrāṇi divyānyābharaṇāni ca / (129.1) Par.?

samantrisakhibhṛtyāya jāmātṛsnehakātarā // (129.2) Par.?

evaṃ mahotsavenāsāv amṛtāsvādasundaraḥ / (130.1) Par.?

eṣāṃ vatseśvarādīnāṃ sarveṣāṃ vāsaro yayau // (130.2) Par.?

tato niśāyāṃ prāptāyāṃ sutodvāhavimarśinī / (131.1) Par.?

kaliṅgasenā sasmāra tāṃ sā somaprabhāṃ sakhīm // (131.2) Par.?

etayā smṛtamātrāṃ tāṃ mayāsurasutāṃ tadā / (132.1) Par.?

bhavyāṃ bhartā mahājñānī jagāda nalakūbaraḥ // (132.2) Par.?

kaliṅgasenā tvāmadya sotsukā smarati priye / (133.1) Par.?

tadgaccha divyamudyānaṃ kuru caitatsutākṛte // (133.2) Par.?

ity uktvā bhāvi bhūtaṃ ca kathayitvā catadgatam / (134.1) Par.?

tadaiva preṣayāmāsa patnīṃ somaprabhāṃ patiḥ // (134.2) Par.?

sā cāgatya cirotkaṇṭhākṛtakaṇṭhagrahāṃ sakhīm / (135.1) Par.?

kaliṅgasenāṃ kuśalaṃ pṛṣṭvā somaprabhābravīt // (135.2) Par.?

vidyādhareṇa tāvattvaṃ pariṇītā maharddhinā / (136.1) Par.?

avatīrṇā ratiste ca sutā śārvādanugrahāt // (136.2) Par.?

kāmāvatārasyaiṣā ca vatseśāl labdhajanmanaḥ / (137.1) Par.?

naravāhanadattasya pūrvabhāryā vinirmitā // (137.2) Par.?

vidyādharādhirājyaṃ sa divyaṃ kalpaṃ kariṣyati / (138.1) Par.?

tasyaiṣānyāvarodhānāṃ mūrdhni mānyā bhaviṣyati // (138.2) Par.?

tvaṃ cāvatīrṇā bhūloke śakraśāpacyutāpsarāḥ / (139.1) Par.?

niṣpannakāryaśeṣā ca śāpamuktimavāpsyasi // (139.2) Par.?

etan me sarvamākhyātaṃ bhartrā jñānavatā sakhi / (140.1) Par.?

tasmāc cintā na te kāryā bhāvi sarvaṃ śubhaṃ tava // (140.2) Par.?

ahaṃ ceha karomyeṣā divyaṃ tvattanayākṛte / (141.1) Par.?

udyānaṃ nāsti pātāle na bhūmau yanna vā divi // (141.2) Par.?

ity uktvā divyamudyānaṃ sā nirmāya svamāyayā / (142.1) Par.?

kaliṅgasenām āmantrya sotkāṃ somaprabhā yayau // (142.2) Par.?

tato niśi prabhātāyāmakasmānnandanaṃ divaḥ / (143.1) Par.?

bhūmāviva cyutaṃ loko dadarśodyānamatra tat // (143.2) Par.?

buddhvātha rājā vatseśaḥ sabhāryaḥ sacivaiḥ saha / (144.1) Par.?

naravāhanadattaś ca sānugo 'tra samāyayau // (144.2) Par.?

dadṛśuste tamudyānaṃ sadā puṣpaphaladrumam / (145.1) Par.?

nānāmaṇimayastambhabhittibhūbhāgavāpikam // (145.2) Par.?

suvarṇavarṇavihagaṃ divyasaurabhamārutam / (146.1) Par.?

devādeśāvatīrṇaṃ tatsvargāntaram iva kṣitau // (146.2) Par.?

dṛṣṭvā tadadbhutaṃ rājā kimetad iti pṛṣṭavān / (147.1) Par.?

kaliṅgasenām ātithyavyagrāṃ vatseśvarastadā // (147.2) Par.?

sā pratyuvāca sarveṣu śṛṇvatsu nṛpatiṃ ca tam / (148.1) Par.?

viśvakarmāvatāro 'sti mayo nāma mahāsuraḥ // (148.2) Par.?

yudhiṣṭhirasya yaś cakre puraṃ ramyaṃ ca vajriṇaḥ / (149.1) Par.?

tasya somaprabhā nāma tanayāsti sakhī mama // (149.2) Par.?

tayā rātrāvihāgatya matsamīpaṃ svamāyayā / (150.1) Par.?

prītyā kṛtamidaṃ divyamudyānaṃ matsutākṛte // (150.2) Par.?

ity uktvā yac ca sakhyāsyā bhūtaṃ bhāvyuditaṃ tayā / (151.1) Par.?

tattayaivoktamity uktvā tadā sarvaṃ śaśaṃsa sā // (151.2) Par.?

tataḥ kaliṅgasenoktiṃ sasaṃvādāmavekṣya tām / (152.1) Par.?

nirastasaṃśayāḥ sarve toṣaṃ tatrātulaṃ yayuḥ // (152.2) Par.?

kaliṅgasenātithyena nināya divasaṃ ca tam / (153.1) Par.?

udyāne 'traiva vatseśo bhāryāputrādibhiḥ saha // (153.2) Par.?

anyedyurnirgato draṣṭuṃ devaṃ devakule ca saḥ / (154.1) Par.?

dadarśa nṛpatir bahvīḥ suvastrābharaṇāḥ striyaḥ // (154.2) Par.?

kā yūyamiti pṛṣṭāś ca tena tāstaṃ babhāṣire / (155.1) Par.?

vayaṃ vidyāḥ kalāścaitāstvatputrārtham ihāgatāḥ // (155.2) Par.?

gatvā viśāmas tasyāntar ity uktvā tāstiro 'bhavan / (156.1) Par.?

savismayaḥ sa rājāpi vatseśo 'bhyantaraṃ yayau // (156.2) Par.?

tatra vāsavadattāyai devyai mantrigaṇāya ca / (157.1) Par.?

tacchaśaṃsābhyanandaṃste devatānugrahaṃ ca tam // (157.2) Par.?

tato rājanideśena vīṇā vāsavadattayā / (158.1) Par.?

naravāhanadatte 'tra praviṣṭe jagṛhe kṣaṇāt // (158.2) Par.?

vādayantīṃ tatas tāṃ ca mātaraṃ vinayena saḥ / (159.1) Par.?

rājaputro 'bravīdvīṇā cyutā sthānādasāviti // (159.2) Par.?

tvaṃ vādaya gṛhāṇaitām iti pitrodite 'tha saḥ / (160.1) Par.?

vīṇām avādayat kurvan gandharvān api vismitān // (160.2) Par.?

evaṃ sarvāsu vidyāsu kalāsu ca parīkṣitaḥ / (161.1) Par.?

pitrā yāvadvṛtastābhiḥ svayaṃ sarvaṃ viveda saḥ // (161.2) Par.?

vīkṣya taṃ saguṇaṃ putraṃ vatseśastām aśikṣayat / (162.1) Par.?

kaliṅgasenātanayāṃ nṛttaṃ madanamañcukām // (162.2) Par.?

yathā yathā pūrṇakalā sābhūt tanur ivaindavī / (163.1) Par.?

naravāhanadattābdhiś cukṣubhe sa tathā tathā // (163.2) Par.?

araṃsta tāṃ ca gāyantīṃ nṛtyantīṃ ca vilokayan / (164.1) Par.?

paṭhantīm iva kāmājñām aṅgādyabhinayair vṛtām // (164.2) Par.?

sāpi kṣaṇam apaśyantī tamudaśruḥ sudhāmayam / (165.1) Par.?

kāntamāsīduṣaḥkāle jalārdreva kumudvatī // (165.2) Par.?

satataṃ cāsahaḥ sthātuṃ tanmukhālokanaṃ vinā / (166.1) Par.?

naravāhanadatto 'sau tattadudyānamāyayau // (166.2) Par.?

tatra pārśvaṃ tayānīya sutāṃ madanamañcukām / (167.1) Par.?

kaliṅgasenayā prītyā rajyamānaḥ sa tasthivān // (167.2) Par.?

gomukhaś cāsya cittajñaḥ svāmino 'tra cirasthitim / (168.1) Par.?

icchan kaliṅgasenāyai tāṃ tām akathayat kathām // (168.2) Par.?

cittagraheṇa tenāsyā rājaputrastutoṣa saḥ / (169.1) Par.?

hṛdayānupraveśo hi prabhoḥ saṃvananaṃ param // (169.2) Par.?

nṛttādiyogyāṃ kurute tasmin madanamañcukām / (170.1) Par.?

tatra svayaṃ ca saṃgītaveśmanyudyānavartini // (170.2) Par.?

naravāhanadattaḥ sa hrepayanvaracāraṇān / (171.1) Par.?

tasyāṃ priyāyāṃ nṛtyantyāṃ sarvātodyāny avādayat // (171.2) Par.?

jigāya cāgatān digbhyo vividhān paṇḍitāṃs tathā / (172.1) Par.?

gajāśvarathaśastrāstracitrapustādikovidaḥ // (172.2) Par.?

evaṃ viharato vidyāsvayaṃvaravṛtasya te / (173.1) Par.?

naravāhanadattasya śaiśave vāsarā yayuḥ // (173.2) Par.?

ekadā cātra yātrāyām udyānaṃ sa priyāsakhaḥ / (174.1) Par.?

yayau nāgavanaṃ nāma rājaputraḥ samantrikaḥ // (174.2) Par.?

tatrābhilāṣiṇī kācidvaṇigbhāryā nirākṛtā / (175.1) Par.?

iyeṣa gomukhaṃ hantuṃ saviṣāhṛtapānakā // (175.2) Par.?

tadviveda ca tatsakhyā mukhādatra sa gomukhaḥ / (176.1) Par.?

nādade pānakaṃ tac ca striya evaṃ nininda ca // (176.2) Par.?

aho dhātrā purā sṛṣṭaṃ sāhasaṃ tadanu striyaḥ / (177.1) Par.?

naitāsāṃ duṣkaraṃ kiṃcin nisargād iha vidyate // (177.2) Par.?

nūnaṃ strī nāma sṛṣṭeyamamṛtena viṣeṇa ca / (178.1) Par.?

anuraktāmṛtaṃ sā hi viraktā viṣam eva ca // (178.2) Par.?

jñāyate kāntavadanā kena pracchannapātakā / (179.1) Par.?

kustrī praphullakamalā gūḍhanakreva padminī // (179.2) Par.?

divaḥ patati kācittu guṇacakrapracodinī / (180.1) Par.?

bhartṛślāghāsahā sustrī prabhā bhānorivāmalā // (180.2) Par.?

hantyevāśu gṛhītānyā pararaktā gataspṛhā / (181.1) Par.?

pāpā virāgaviṣabhṛdbhartāraṃ bhujagīva sā // (181.2) Par.?

tathā hi kutracidgrāme śatrughna iti ko 'py abhūt / (182.1) Par.?

puruṣas tasya bhāryā ca babhūva vyabhicāriṇī // (182.2) Par.?

sa dadarśaikadā sāyaṃ bhāryāṃ tāṃ jārasaṃgatām / (183.1) Par.?

jaghāna taṃ ca tajjāraṃ khaḍgenāntargṛhasthitam // (183.2) Par.?

rātryapekṣī ca tasthau sa dvāri bhāryāṃ nirudhya tām / (184.1) Par.?

tatkālaṃ ca nivāsārthī tamatra pathiko 'bhyagāt // (184.2) Par.?

dattvā tasyāśrayaṃ yuktyā tenaiva saha taṃ hatam / (185.1) Par.?

pāradārikamādāya rātrau tatrāṭavīṃ yayau // (185.2) Par.?

tatrāndhakūpe yāvatsa śavaṃ kṣipati taṃ tayā / (186.1) Par.?

tāvadāgatayā paścātkṣiptaḥ so 'py atra bhāryayā // (186.2) Par.?

evaṃ kuyoṣitkurute kiṃ kiṃ nāma na sāhasam / (187.1) Par.?

iti strīcaritaṃ bālo 'py anindatso 'tra gomukhaḥ // (187.2) Par.?

tato nāgavane tatra nāgānabhyarcya sa svayam / (188.1) Par.?

naravāhanadatto 'gāt svāvāsaṃ saparicchadaḥ // (188.2) Par.?

tatra jijñāsur anyedyuḥ sacivān gomukhādikān / (189.1) Par.?

jānann api sa papraccha rājanīteḥ samuccayam // (189.2) Par.?

sarvajñastvaṃ tathāpyetadbrūmaḥ pṛṣṭā vayaṃ tvayā / (190.1) Par.?

ity uktvā sāramanyonyaṃ te niścityaivamabruvan // (190.2) Par.?

āruhya nṛpatiḥ pūrvamindriyāśvānvaśīkṛtān / (191.1) Par.?

kāmakrodhādikāñjitvā ripūnābhyantarāṃś ca tān // (191.2) Par.?

jayedātmānamevādau vijayāyānyavidviṣām / (192.1) Par.?

ajitātmā hi vivaśo vaśīkuryātkathaṃ param // (192.2) Par.?

tato jānapadatvādiguṇayuktāṃś ca mantriṇaḥ / (193.1) Par.?

purohitaṃ cātharvajñaṃ kuryād dakṣaṃ tapo'nvitam // (193.2) Par.?

upādhibhirbhaye lobhe dharme kāme parīkṣitān / (194.1) Par.?

yogyeṣv amātyān kāryeṣu yuñjītāntaravittamaḥ // (194.2) Par.?

satyaṃ dveṣaprayuktaṃ vā snehoktaṃ svarthasaṃhatam / (195.1) Par.?

vacasteṣāṃ parīkṣeta mithaḥ kāryeṣu jalpatām // (195.2) Par.?

satye tuṣyed asatye tu yathārhaṃ daṇḍam ācaret / (196.1) Par.?

jijñāseta pṛthak caiṣāṃ cārair ācaritaṃ sadā // (196.2) Par.?

ity anāvṛtadṛk paśyan kāryāṇy utkhāya kaṇṭakān / (197.1) Par.?

upārjya koṣadaṇḍādi sādhayed baddhamūlatām // (197.2) Par.?

utsāhaprabhutāmantraśaktitrayayutas tataḥ / (198.1) Par.?

paradeśajigīṣuḥ syādvicārya svaparāntaram // (198.2) Par.?

āptaiḥ śrutānvitaiḥ prājñairmantraṃ kuryād anāyatam / (199.1) Par.?

tairniścitaṃ svabuddhyā tatsarvāṅgaṃ pariśodhayet // (199.2) Par.?

sāmadānādyupāyajño yogakṣemaṃ prasādhayet / (200.1) Par.?

prayuñjīta tataḥ saṃdhivigrahādīn guṇāṃś ca ṣaṭ // (200.2) Par.?

evaṃ vitandro vidadhatsvadeśaparadeśayoḥ / (201.1) Par.?

cintāṃ rājā jayatyeva na punarjātu jīyate // (201.2) Par.?

ajñas tu kāmalobhāndho vṛthā mārgapradarśibhiḥ / (202.1) Par.?

nītvā śvabhreṣu nikṣipya muṣyate dhūrtaceṭakaiḥ // (202.2) Par.?

naivāvakāśaṃ labhate rājñas tasyāntike 'paraḥ / (203.1) Par.?

dhūrtair nibaddhavāṭasya śāler iva kṛṣīvalaiḥ // (203.2) Par.?

antarbhūya rahasyeṣu tair vaśīkriyate hi saḥ / (204.1) Par.?

tataḥ śrīr aviśeṣajñāt khinnā tasmātpalāyate // (204.2) Par.?

tasmājjitātmā rājā syādyuktadaṇḍo viśeṣavit / (205.1) Par.?

prajānurāgād evaṃ hi sa bhavedbhājanaṃ śriyaḥ // (205.2) Par.?

pūrvaṃ ca śūrasenākhyo bhṛtyaikapratyayo nṛpaḥ / (206.1) Par.?

sacivaiḥ peṭakaṃ kṛtvā bhujyate sma vaśīkṛtaḥ // (206.2) Par.?

yas tasya sevako rājñastasmai tanmantriṇo 'tra te / (207.1) Par.?

dātuṃ naicchaṃstṛṇam api ditsatyapi ca bhūpatau // (207.2) Par.?

teṣāṃ tu sevako yo 'tra dadustasmai svayaṃ ca te / (208.1) Par.?

te ca vijñapya rājānam anarhāyāpy adāpayan // (208.2) Par.?

tad dṛṣṭvā sa nṛpo buddhvā śanaistaddhūrtapeṭakam / (209.1) Par.?

anyonyaṃ prajñayā yuktyā sacivāṃstānabhedayat // (209.2) Par.?

bhinneṣu teṣu naṣṭeṣu mithaḥ paiśunyakāriṣu / (210.1) Par.?

samyak chaśāsa rājyaṃ tat sa rājānyair avañcitaḥ // (210.2) Par.?

harisiṃhaś ca rājābhūtsāmātyo nītitattvavit / (211.1) Par.?

kṛtabhaktabudhāmātyaḥ sadurgaḥ sārthasaṃcayaḥ // (211.2) Par.?

anuraktāḥ prajāḥ kṛtvā ceṣṭate sma yathā tathā / (212.1) Par.?

cakravartyabhiyukto 'pi na jagāma parābhavam // (212.2) Par.?

evaṃ vicāraś cintā ca sāraṃ rājye 'dhikaṃ nu kim / (213.1) Par.?

ityādy uktvā yathāsvaṃ te viremurgomukhādayaḥ // (213.2) Par.?

naravāhanadattaśca teṣāṃ śraddhāya tadvacaḥ / (214.1) Par.?

cintye puruṣakartavye 'py acintyaṃ daivam abhyadhāt // (214.2) Par.?

tataś cotthāya tair eva sākaṃ tāṃ prekṣituṃ yayau / (215.1) Par.?

sa vilambakṛtotkaṇṭhāṃ priyāṃ madanamañcukām // (215.2) Par.?

prāpte tanmandiraṃ tasminn āsanasthe kṛtādarā / (216.1) Par.?

kṣaṇaṃ kaliṅgasenātra gomukhaṃ vismitābravīt // (216.2) Par.?

naravāhanadatte 'tra rājasūnāv anāgate / (217.1) Par.?

utsukā padavīmasya draṣṭuṃ madanamañcukā // (217.2) Par.?

harmyāgrabhūmim ārūḍhā gomukhānugatā mayā / (218.1) Par.?

yāvattāvatpumāneko nabhaso 'trāvatīrṇavān // (218.2) Par.?

sa kirīṭī ca khaḍgī ca māṃ divyākṛtirabravīt / (219.1) Par.?

ahaṃ mānasavegākhyo rājā vidyādhareśvaraḥ // (219.2) Par.?

svaḥstrī surabhidattākhyā tvaṃ ca śāpacyutā bhuvi / (220.1) Par.?

sutā ca tava divyeyametan me viditaṃ kila // (220.2) Par.?

taddehi me sutāmetāṃ saṃbandhaḥ sadṛśo hy ayam / (221.1) Par.?

ity ukte tena sahasā vihasyāhaṃ tam abravam // (221.2) Par.?

naravāhanadatto 'syā bhartā devair vinirmitaḥ / (222.1) Par.?

sarveṣāṃ yo 'tra yuṣmākaṃ cakravartī bhaviṣyati // (222.2) Par.?

ity uktaḥ sa mayotpatya vyoma vidyādharo gataḥ / (223.1) Par.?

matputrīnayanodvegākāṇḍavidyullatopamaḥ // (223.2) Par.?

tac chrutvā gomukho 'vādījjāte 'smin svāminīha naḥ / (224.1) Par.?

rājaputre 'ntarikṣokterbuddhvāmuṃ bhāvinaṃ prabhum // (224.2) Par.?

pāpaṃ vidhātum apy aicchansadyo vidyādharā hi te / (225.1) Par.?

ucchṛṅkhalo niyantāraṃ ka icchedbalinaṃ prabhum // (225.2) Par.?

tato 'yaṃ rakṣitaḥ sākṣādgaṇānādiśya śaṃbhunā / (226.1) Par.?

nāradoktiriyaṃ tātenocyamānā śrutā mayā // (226.2) Par.?

ato vidyādharāḥ saṃpratyete 'smākaṃ virodhinaḥ / (227.1) Par.?

śrutvā kaliṅgasenaitat svavṛttāntabhiyābravīt // (227.2) Par.?

māyayā tarhi no yāvan madvan madanamañcukā / (228.1) Par.?

vañcyate rājaputreṇa kiṃ na tāvad vivāhyate // (228.2) Par.?

etatkaliṅgasenātaḥ śrutvā tāṃ gomukhādayaḥ / (229.1) Par.?

ūcus tvayaiva kārye 'smin vatseśaḥ preryatāmiti // (229.2) Par.?

tatas tadgatadhīstasminn udyāne vyāharaddinam / (230.1) Par.?

naravāhanadattastāṃ paśyanmadanamañcukām // (230.2) Par.?

utphullapadmavadanāṃ dalatkuvalayekṣaṇām / (231.1) Par.?

bandhūkakamanīyauṣṭhīṃ mandārastabakastanīm // (231.2) Par.?

śirīṣasukumārāṅgīṃ pañcapuṣpamayīm iva / (232.1) Par.?

ekām eva jagajjetrīṃ smareṇa vihitāmiṣum // (232.2) Par.?

kaliṅgasenāpy anyedyur gatvā vatseśvaraṃ svayam / (233.1) Par.?

sutāvivāhahetostadyathābhīṣṭaṃ vyajijñapat // (233.2) Par.?

vatseśo 'pi visṛjyaitāmāhūya nijamantriṇaḥ / (234.1) Par.?

devyāṃ vāsavadattāyāṃ sthitāyāṃ nijagāda tān // (234.2) Par.?

kaliṅgasenā tvarate sutodvāhāya tatkatham / (235.1) Par.?

kurmo yad bandhakīty etāṃ loko vaktyuttamāmiti // (235.2) Par.?

lokaś ca sarvadā rakṣyastatpravādena kiṃ purā / (236.1) Par.?

rāmabhadreṇa śuddhāpi tyaktā devī na jānakī // (236.2) Par.?

ambā hṛtāpi bhīṣmeṇa yatnādbhrātuḥ kṛte tathā / (237.1) Par.?

pratīpaṃ kiṃ na vā tyaktā vṛtapūrvānyabhartṛkā // (237.2) Par.?

evaṃ kaliṅgasenaiṣā svayaṃvaravṛte mayi / (238.1) Par.?

vyūḍhā madanavegena tenaitāṃ garhate janaḥ // (238.2) Par.?

ato 'syāstanayāmetāṃ gāndharvavidhinā svayam / (239.1) Par.?

naravāhanadatto 'sāv udvahatv anurūpikām // (239.2) Par.?

ity ukte vatsarājena smāha yaugandharāyaṇaḥ / (240.1) Par.?

icchet kaliṅgasenaitad anaucityaṃ kathaṃ prabho // (240.2) Par.?

divyaiṣā hi na sāmānyā sasutety asakṛd gatam / (241.1) Par.?

mittreṇa caitaduktaṃ me jñāninā brahmarakṣasā // (241.2) Par.?

ityādi tatra te yāvadvimṛśanti parasparam / (242.1) Par.?

evaṃ māheśvarī tāvadvāṇī prādurabhūd divaḥ // (242.2) Par.?

mannetrānaladagdhasya sṛṣṭasyātra manobhuvaḥ / (243.1) Par.?

naravāhanadattasya mayaivaiṣā vinirmitā // (243.2) Par.?

tapastuṣṭena bhāryāsya ratirmadanamañcukā / (244.1) Par.?

etayā sahitaścāyaṃ sarvāntaḥpuramukhyayā // (244.2) Par.?

vidyādharādhirājyaṃ sa divyaṃ kalpaṃ kariṣyati / (245.1) Par.?

matprasādādvijityārīnity uktvā virarāma vāk // (245.2) Par.?

śrutvaitāṃ bhagavadvāṇīṃ vatseśaḥ saparicchadaḥ / (246.1) Par.?

taṃ praṇamya sutodvāhe sānando niścayaṃ vyadhāt // (246.2) Par.?

atha sa sacivamukhyaṃ pūrvavijñātatattvaṃ narapatirabhinandyāhūya mauhūrtikāṃśca / (247.1) Par.?

śubhaphaladam apṛcchal lagnam ūcus tu te taṃ katipayadinamadhye bhāvinaṃ prāptapūjāḥ // (247.2) Par.?

kālaṃ manāganubhaviṣyati kaṃcidatra putro viyogamanayā saha bhāryayā te / (248.1) Par.?

jānīmahe vayamidaṃ nijaśāstradṛṣṭyā vatseśvareti jagadurgaṇakāḥ punaste // (248.2) Par.?

tataḥ sa sūnor nijavaibhavocitaṃ vivāhasaṃbhāravidhiṃ vyadhān nṛpaḥ / (249.1) Par.?

tathā yathāsya svapurī na kevalaṃ pṛthivyapi kṣobhamagāt tadudyamāt // (249.2) Par.?

prāpte vivāhadivase 'tha kaliṅgasenā pitrā nisṛṣṭanijadivyavibhūṣaṇāyāḥ / (250.1) Par.?

tasyāḥ prasādhanavidhiṃ duhituścakāra somaprabhā patinideśavaśāgatā ca // (250.2) Par.?

kṛtadivyakautukā sā sutarāmatha madanamañcukā vibabhau / (251.1) Par.?

nanvevam eva kāntā candratanuḥ kārtikānugatā // (251.2) Par.?

divyāṅganāś ca tasyā harājñayā śrūyamāṇagītaravāḥ / (252.1) Par.?

tadrūpajitācchannā hrītā iva maṅgalaṃ vidadhuḥ // (252.2) Par.?

bhaktānukampini jayādrisute tvayādya ratyās tapaḥ svayamupetya kṛtaṃ kṛtārtham / (253.1) Par.?

ityādi divyavaracāraṇavādyamiśravākyānumeyam api saṃdadhate 'tra gauryāḥ // (253.2) Par.?

atha naravāhanadattaḥ praviveśa sa madanamañcukādhyuṣitam / (254.1) Par.?

kṛtavarakautukaśobhī vividhamahātodyabhṛd vivāhagṛham // (254.2) Par.?

nirvartya tatra bahalodyatavipramattavīvāhamaṅgalavidhiṃ ca vadhūvarau tau / (255.1) Par.?

vedīṃ samāruruhaturjvalitāgnimuccai rājñāṃ śirobhuvam ivāmalaratnadīpām // (255.2) Par.?

yadi yugapad ihendumūrtibhānū kanakagiriṃ bhramato 'bhitaḥ kadācit / (256.1) Par.?

bhavati tadupamā tayostadānīṃ jagati vadhūvarayoḥ pradakṣiṇe 'gneḥ // (256.2) Par.?

yathā vivāhotsavatūryanādān apothayan dundubhayo 'ntarikṣe / (257.1) Par.?

tathā vadhūtsāritahomalājāḥ surojjhitāḥ kausumavṛṣṭayo 'tra // (257.2) Par.?

tataḥ kanakarāśibhirmaṇimayaiś ca jāmātaraṃ samarcayad udāradhīḥ kila kaliṅgasenā tathā / (258.1) Par.?

yathātra bubudhe janair api sudurgato 'syāḥ puraḥ sa kāmamalakāpatiḥ kṛpaṇabhūbhṛto 'nye tu ke // (258.2) Par.?

niṣpannatādṛśacirābhimatānurūpapāṇigrahotsavavidhī ca vadhūvarau tau / (259.1) Par.?

abhyantaraṃ viviśatuḥ pramadoparuddhaṃ lokasya mānasam ivāmalacitrabhakti // (259.2) Par.?

sadvāhinīparigatair api viśvavandyaśauryāśritair api jitāvanatairnarendraiḥ / (260.1) Par.?

sā vārirāśibhirivāśu purī pupūre vatseśvarasya sadupāyanaratnahastaiḥ // (260.2) Par.?

anujīvijanāya so 'pi rājā vyakiraddhema tathā mahotsave 'smin / (261.1) Par.?

yadi param abhavan na jātarūpā jananīgarbhagatā yathāsya rāṣṭre // (261.2) Par.?

varacāraṇanartakīsamūhair vividhadigantasamāgatais tadātra / (262.1) Par.?

paritaḥ stavanṛttagītavādyair bubudhe tanmaya eva jīvalokaḥ // (262.2) Par.?

vātoddhūtapatākābāhulatā cotsave 'tra kauśāmbī / (263.1) Par.?

sāpi nanarteva purī paurastrīracitamaṇḍanābharaṇā // (263.2) Par.?

evaṃ ca sa pratidinaṃ parivardhamāno nirvartyate sma sucireṇa mahotsavo 'tra / (264.1) Par.?

sarvaḥ sadaiva ca suhṛtsvajano janaś ca hṛṣṭas tataḥ kim api pūrṇamanoratho 'bhūt // (264.2) Par.?

sa ca naravāhanadatto yuvarājo madanamañcukāsahitaḥ / (265.1) Par.?

bhajate sma sucirakāṅkṣitam udayaiṣī jīvalokasukham // (265.2) Par.?

Duration=1.9126379489899 secs.