Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17557

Click on a sentence to show its analysis
Keep the mouse pointer over a lemma to show its meanings.

tato 'hani pare prāptaḥ sotkāṃ ratnaprabhāṃ priyām / (1.1) Par.?

śīghraṃ pratyāgamiṣyāmīty āśvāsyākheṭakāya saḥ // (1.2) Par.?

vatseśena samaṃ pitrā vayasyaiścāṭavīṃ yayau / (2.1) Par.?

naravāhanadatto 'śvairgajaiś ca parivāritaḥ // (2.2) Par.?

tatra bhinnebhakumbhānāṃ nakhodaraparicyutaiḥ / (3.1) Par.?

siṃhānāṃ hatasuptānāmuptabījeva mauktikaiḥ // (3.2) Par.?

vyāghrāṇāṃ bhallalūnānāṃ daṃṣṭrābhiḥ sāṅkureva ca / (4.1) Par.?

sapallaveva kṣatajair hariṇānāṃ parisrutaiḥ // (4.2) Par.?

nimagnakaṅkapatrāṅkaiḥ kroḍaiḥ stabakiteva ca / (5.1) Par.?

śarīraiḥ śarabhāṇāṃ ca patitaiḥ phaliteva ca // (5.2) Par.?

babhūva tasya nipataddhanaśabdaśilīmukhā / (6.1) Par.?

prītaye mṛgayālīlālatā śobhitakānanā // (6.2) Par.?

śanaiḥ śrāntaḥ sa viśramya praviveśa vanāntaram / (7.1) Par.?

hayārūḍhaḥ sahaikena gomukhenāśvasādinā // (7.2) Par.?

tatrārebhe ca gulikākrīḍāṃ kām api tatkṣaṇam / (8.1) Par.?

tāvac ca tāpasī kāpi pathā tena kilāyayau // (8.2) Par.?

tasyās tasya karādbhraṣṭā gulikā mūrdhni cāpatat / (9.1) Par.?

tato vihasya kiṃcitsā tāpasī tam abhāṣata // (9.2) Par.?

evam eva mado 'yaṃ cettava tadyadyavāpsyasi / (10.1) Par.?

jātu karpūrikāṃ bhāryāṃ tataḥ kīdṛgbhaviṣyati // (10.2) Par.?

etac chrutvāvaruhyaiva turagāccaraṇānataḥ / (11.1) Par.?

naravāhanadattastāṃ tāpasīṃ nijagāda saḥ // (11.2) Par.?

tvaṃ na dṛṣṭā mayā daivādgulikā cātra me gatā / (12.1) Par.?

prasīda tadbhagavati kṣamasva skhalitaṃ mama // (12.2) Par.?

tac chrutvā nāsti me putra kopa ityabhidhāya ca / (13.1) Par.?

tāpasī sā jitakrodhā tamāśīrbhirasāntvayat // (13.2) Par.?

tataś ca vaśinīṃ matvā prabuddhāṃ satyatāpasīm / (14.1) Par.?

naravāhanadattastāṃ papraccha vinayena saḥ // (14.2) Par.?

kaiṣā karpūrikā nāma bhagavaty uditā tvayā / (15.1) Par.?

etad ādiśa tuṣṭāsi mayi cetkautukaṃ hi me // (15.2) Par.?

ity uktavantaṃ praṇataṃ tāpasī taṃ jagāda sā / (16.1) Par.?

asti pārembudhi puraṃ nāmnā karpūrasaṃbhavam // (16.2) Par.?

anvarthas tatra rājāsti karpūraka iti śrutaḥ / (17.1) Par.?

tasya karpūrikā nāma sutāsti varakanyakā // (17.2) Par.?

ekāṃ vilokya kamalāṃ nirmathyāpahṛtāṃ suraiḥ / (18.1) Par.?

yā dvitīyeva nikṣipya tatra gopāyitābdhinā // (18.2) Par.?

puruṣadveṣinī sā ca vivāhaṃ nābhivāñchati / (19.1) Par.?

tvayy upete yadi paraṃ bhaviṣyati tadarthinī // (19.2) Par.?

tattatra gaccha putra tvaṃ tāṃ ca prāpsyasi sundarīm / (20.1) Par.?

gacchataś cātra te 'ṭavyāṃ mahākleśo bhaviṣyati // (20.2) Par.?

mohas tatra na kāryas te sarvaṃ svantaṃ hi bhāvi tat / (21.1) Par.?

ity uktvaiva kham utpatya tāpasī sā tirodadhe // (21.2) Par.?

naravāhanadatto 'tha tadvāṇīmadanājñayā / (22.1) Par.?

ākṛṣṭaḥ sa tamāha sma gomukhaṃ pārśvavartinam // (22.2) Par.?

ehi karpūrikāpārśvaṃ puraṃ karpūrasaṃbhavam / (23.1) Par.?

gacchāvas tām adṛṣṭvā hi na kṣaṇaṃ sthātumutsahe // (23.2) Par.?

tac chrutvā gomukho 'vādīddevālaṃ sāhasena te / (24.1) Par.?

kva tvaṃ kvābdhiḥ puraṃ tatkva kva so 'dhvā kanyakā kva sā // (24.2) Par.?

nāmni śrute kim ekākī tyaktadivyāṅganājanaḥ / (25.1) Par.?

nirabhiprāyasaṃdigdhāmabhidhāvasi mānuṣīm // (25.2) Par.?

evaṃ sa gomukhenokto vatsarājasutastadā / (26.1) Par.?

abravītsiddhatāpasyā na tasyā vacanaṃ mṛṣā // (26.2) Par.?

tan mayāvaśyagantavyaṃ prāptuṃ tāṃ rājakanyakām / (27.1) Par.?

ity uktvā sa hayārūḍhaḥ pratasthe tatkṣaṇaṃ tataḥ // (27.2) Par.?

anvagāt sa ca taṃ tūṣṇīm anicchann api gomukhaḥ / (28.1) Par.?

akurvan vacanaṃ bhṛtyairanugamyaḥ paraṃ prabhuḥ // (28.2) Par.?

tāvad vatseśvaro 'py āgāt kṛtākheṭo nijāṃ purīm / (29.1) Par.?

manvānaḥ sa tamāyāntaṃ sutaṃ svabalamadhyagam // (29.2) Par.?

svabalaṃ tac ca tasyāgān marubhūtyādibhiḥ saha / (30.1) Par.?

purīṃ tām eva matvā taṃ sainyamadhyasthitaṃ prabhum // (30.2) Par.?

tatra prāptā vicinvantaste buddhvā tam anāgatam / (31.1) Par.?

vatseśvarādayo jagmuḥ sarve ratnaprabhāntikam // (31.2) Par.?

sā cādau tac chrutenārtā dhyātayā nijavidyayā / (32.1) Par.?

ākhyātadayitodantā vignaṃ śvaśuram abravīt // (32.2) Par.?

karpūrikāṃ rājasutāṃ tāpasyā kathitāṃ vane / (33.1) Par.?

āryaputro gataḥ prāptuṃ puraṃ karpūrasaṃbhavam // (33.2) Par.?

śīghraṃ ca kṛtakāryaḥ sann ihaiṣyati sagomukhaḥ / (34.1) Par.?

tad alaṃ cintayaitaddhi vidyāto 'dhigataṃ mayā // (34.2) Par.?

ity uktvāśvāsayatsā taṃ vatseśaṃ saparicchadam / (35.1) Par.?

ratnaprabhānyāṃ vidyāṃ ca bhartuḥ prāyuṅkta tasya sā // (35.2) Par.?

naravāhanadattasya pathi kleśopaśāntaye / (36.1) Par.?

nerṣyāṃ bhartṛhitaiṣiṇyo gaṇayanti hi sustriyaḥ // (36.2) Par.?

tāvac ca dūramadhvānaṃ sa yayau vājipṛṣṭhagaḥ / (37.1) Par.?

naravāhanadatto 'syām aṭavyāṃ gomukhānvitaḥ // (37.2) Par.?

athākasmād upetyātra kumārī pathyuvāca tam / (38.1) Par.?

ahaṃ māyāvatī nāma vidyā ratnaprabheritā // (38.2) Par.?

rakṣāmy adṛśyā mārge tvāṃ niścintastadvrajādhunā / (39.1) Par.?

ity uktvā rūpiṇī vidyā tiro 'bhūtsāsya paśyataḥ // (39.2) Par.?

tatprabhāvāt tataḥ śāntakṣuttṛṣṇaḥ pathi sa vrajan / (40.1) Par.?

naravāhanadattastāṃ stuvanratnaprabhāṃ priyām // (40.2) Par.?

sāyaṃ svacchasaraḥ prāpya vanaṃ svādutaraiḥ phalaiḥ / (41.1) Par.?

jalaiścāhārapānādi snātaścakre sagomukhaḥ // (41.2) Par.?

naktaṃ ca tatra saṃyamya dattaghāsau hayāvadhaḥ / (42.1) Par.?

mantridvitīyo vāsārthamāruroha mahātarum // (42.2) Par.?

tasyoruśākhāsaṃviṣṭo vitrastahayaheṣitaiḥ / (43.1) Par.?

prabuddhaḥ so 'ntarādhastādapaśyatsiṃham āgatam // (43.2) Par.?

dṛṣṭvā cāvatitīrṣuṃ tam aśvārthe gomukho 'bravīt / (44.1) Par.?

aho dehānapekṣaḥ sann amantreṇaiva ceṣṭase // (44.2) Par.?

śarīramūlā hi nṛpā mantramūlā ca rājatā / (45.1) Par.?

yuyutsase tat tiryagbhir nakhadaṃṣṭrāyudhaiḥ katham // (45.2) Par.?

etadrakṣārthamevāvām ihārūḍhau hi saṃprati / (46.1) Par.?

iti gomukhavāgruddho yuvarājaḥ sa tatkṣaṇam // (46.2) Par.?

siṃhaṃ taṃ turagaṃ ghnantaṃ dṛṣṭvā churikayā drutam / (47.1) Par.?

ājaghāna taroḥ pṛṣṭhātkṣiptayā sa nimagnayā // (47.2) Par.?

sa tathā tena viddho 'pi taṃ hatvaiva hayaṃ balī / (48.1) Par.?

siṃho vyāpādayāmāsa dvitīyam api vājinam // (48.2) Par.?

tato vatseśvarasutaḥ khaḍgamādāya gomukhāt / (49.1) Par.?

tena kṣiptena madhye taṃ siṃhaṃ dvedhā cakāra saḥ // (49.2) Par.?

avatīrya ca saṃgṛhya kṛpāṇīṃ siṃhadehataḥ / (50.1) Par.?

khaḍgaṃ cāruhya so 'traiva vṛkṣe rātrimuvāsa tām // (50.2) Par.?

prātastato 'vatīrṇaś ca pratasthe gomukhānvitaḥ / (51.1) Par.?

naravāhanadatto 'tastāṃ sa karpūrikāṃ prati // (51.2) Par.?

atha padbhyāṃ prayāntaṃ taṃ siṃhena hatavāhanam / (52.1) Par.?

dṛṣṭvā vinodayannevamuvāca pathi gomukhaḥ // (52.2) Par.?

deva prāsaṅgikīmetāṃ kathāmākhyāmi te śṛṇu / (53.1) Par.?

astīhairāvatī nāma nagarī vijitālakā // (53.2) Par.?

tasyām abhūt parityāgaseno nāma mahīpatiḥ / (54.1) Par.?

babhūvatuś ca tasya dve devyau prāṇasame priye // (54.2) Par.?

ekā svamantritanayā nāmato 'dhikasaṃgamā / (55.1) Par.?

nāmnā tu kāvyālaṃkārā dvitīyā rājavaṃśajā // (55.2) Par.?

tābhyāṃ samaṃ ca so 'putro rājā putrārthamambikām / (56.1) Par.?

ārādhayannirāhāro darbhaśāyī vyadhāttapaḥ // (56.2) Par.?

tataḥ sā taṃ tapastuṣṭā svapne dattvā phaladvayam / (57.1) Par.?

divyaṃ samādiśatsākṣādbhavānī bhaktavatsalā // (57.2) Par.?

uttiṣṭha dehi dārebhyo bhakṣyam etat phaladvayam / (58.1) Par.?

tato rājan pravīrau te janiṣyete sutāv ubhau // (58.2) Par.?

ity uktvāntardadhe gaurī prabuddhaḥ sa ca bhūpatiḥ / (59.1) Par.?

nananda prātar utthāya haste paśyannubhe phale // (59.2) Par.?

svapnena tena cānandya varṇitena parigraham / (60.1) Par.?

snāto mṛḍānīm abhyarcya cakāra vratapāraṇam // (60.2) Par.?

naktaṃ copetya tāṃ pūrvaṃ rājñīm adhikasaṃgamām / (61.1) Par.?

phalam ekaṃ dadau tasyai sā ca tadbubhuje tadā // (61.2) Par.?

tatas tanmandire tasyām uvāsa sa nṛpo niśi / (62.1) Par.?

tatpiturmantrimukhyasya nijasya kila gauravāt // (62.2) Par.?

tac cātra nidadhe saṃpraty ātmaśayyāśiro'ntike / (63.1) Par.?

dvitīyasyāḥ kṛte devyā dvitīyaṃ kalpitaṃ phalam // (63.2) Par.?

suptasyātra nṛpasyātha rājñī sādhikasaṃgamā / (64.1) Par.?

utthāyātmana eva dvāvicchantī sadṛśau sutau // (64.2) Par.?

śīrṣāntād bhakṣayāmāsa dvitīyam api tatphalam / (65.1) Par.?

nisargasiddho nārīṇāṃ sapatnīṣu hi matsaraḥ // (65.2) Par.?

prātaś cotthāya cinvānaṃ tatphalaṃ taṃ mahīpatim / (66.1) Par.?

mayaiva tatphalaṃ bhuktaṃ dvitīyamiti sābravīt // (66.2) Par.?

tataḥ sa rājā vimanā nirgatyātītya vāsaram / (67.1) Par.?

naktaṃ tasyā dvitīyasyā devyā vāsagṛhaṃ yayau // (67.2) Par.?

tatra tatphalam ekaṃ tāṃ yācamānāṃ ca so 'bravīt / (68.1) Par.?

suptasya me tad apy aśnāt sapatnī te chalād iti // (68.2) Par.?

tataḥ sā tanayotpattihetum aprāpya tatphalam / (69.1) Par.?

babhūva kāvyālaṃkārā rājñī tūṣṇīṃ suduḥkhitā // (69.2) Par.?

gacchatsv atha dineṣv atra rājñī sādhikasaṃgamā / (70.1) Par.?

sagarbhābhūd asūtātha kāle dvau yugapatsutau // (70.2) Par.?

rājāpi sa tadutpattiphalitasvamanorathaḥ / (71.1) Par.?

nandati sma parityāgasenaḥ kṛtamahotsavaḥ // (71.2) Par.?

tayoś ca sutayor jyeṣṭham indīvaranibhekṣaṇam / (72.1) Par.?

nāmnendīvarasenaṃ sa nṛpaścakre 'dbhutākṛtim // (72.2) Par.?

vidadhe ca kanīyāṃsam anicchāsenam ākhyayā / (73.1) Par.?

tajjananyā yato bhuktaṃ phalaṃ tattadanicchayā // (73.2) Par.?

athātra tasya rājñī sā dvitīyā bhūmipasya tat / (74.1) Par.?

ālokya kāvyālaṃkārā sāmarṣā samacintayat // (74.2) Par.?

aho ahaṃ sutaprāpteḥ sapatnyā vañcitaitayā / (75.1) Par.?

tadetasyā mayāvaśyaṃ kāryā manyupratikriyā // (75.2) Par.?

vināśyau tanayāvetāvetadīyau svayuktitaḥ / (76.1) Par.?

iti saṃcintya sā tasthau tadupāyaṃ vicinvatī // (76.2) Par.?

yathā yathā ca tau tatra vavṛdhāte nṛpātmajau / (77.1) Par.?

tathā tathāsyā vavṛdhe hṛdaye vairapādapaḥ // (77.2) Par.?

krameṇa yauvanasthau ca tau vijñāpayataḥ sma tam / (78.1) Par.?

rājaputrau svapitaraṃ jigīṣū bhujaśālinau // (78.2) Par.?

astreṣu śikṣitau tāvad āvāṃ samprāptayauvanau / (79.1) Par.?

tadbhujān viphalān etān bibhratau katham āsvahe // (79.2) Par.?

kṣatriyasyājigīṣasya dhigbāhū dhik ca yauvanam / (80.1) Par.?

ato 'nujānīhy adhunā tāta digvijayāya nau // (80.2) Par.?

iti sūnvor vacaḥ śrutvā rājā hṛṣṭo 'numanya saḥ / (81.1) Par.?

yātrārambhaṃ parityāgasenaḥ saṃvidadhe tayoḥ // (81.2) Par.?

yady atra saṃkaṭaṃ jātu yuvayoḥ syāt tadāmbikā / (82.1) Par.?

smartavyārtiharā devī tayā dattau hi me yuvām // (82.2) Par.?

ity uktvā ca sa tau rājā yātrāyai prāhiṇot sutau / (83.1) Par.?

yuktau sainyaiḥ sasāmantair jananyā kṛtamaṅgalau // (83.2) Par.?

nijaṃ mantripradhānaṃ ca paścān mātāmahaṃ tayoḥ / (84.1) Par.?

prajñāsahāyaṃ vyasṛjannāmnā prathamasaṃgamam // (84.2) Par.?

atha tau rājaputrau dvau sabalau bhrātarau kramāt / (85.1) Par.?

gatvā prācīṃ diśaṃ pūrvaṃ jigyatuḥ prājyavikramau // (85.2) Par.?

tato 'pratihatau vīrau militānekapārthivau / (86.1) Par.?

jetuṃ siddhapratāpau tau jagmaturdakṣiṇāṃ diśam // (86.2) Par.?

tāṃ ca vārtāṃ tayoḥ śrutvā pitarau tau nanandatuḥ / (87.1) Par.?

jajvālāparamātā tu sāntarvidveṣavahninā // (87.2) Par.?

etābhyāṃ bhujadarpeṇa pṛthvīṃ jitvā nihatya mām / (88.1) Par.?

rājyaṃ madīyaṃ svīkartuṃ matputrābhyāṃ vicintitam // (88.2) Par.?

tadyūyaṃ mayi bhaktāś cet tad etāv atra matsutau / (89.1) Par.?

avicāryaiva yuṣmābhir nihantavyāv ubhāv api // (89.2) Par.?

iti tatkaṭakasthebhyaḥ sāmantebhyas tataḥ śaṭhā / (90.1) Par.?

rājādeśaṃ tadā rājñī tannāmnaivābhilikhya sā // (90.2) Par.?

saṃdhivigrahakāyasthenāhṛtenārthasaṃcayaiḥ / (91.1) Par.?

upāṃśu kāvyālaṃkārā vyasṛjallekhahārakam // (91.2) Par.?

sa ca guptaṃ tayorgatvā kaṭakaṃ rājaputrayoḥ / (92.1) Par.?

sāmantebhyo dadau tebhyastāṃllekhāṃllekhahārakaḥ // (92.2) Par.?

te vācayitvā tānsarve rājanītiṃ sukarkaśām / (93.1) Par.?

vicintya tāṃ prabhor ājñām anullaṅghyām avetya ca // (93.2) Par.?

rātrau militvā saṃmantrya nihantuṃ tau nṛpātmajau / (94.1) Par.?

vivaśā niścayaṃ cakrus tadguṇāvarjitā api // (94.2) Par.?

tac ca buddhvaiva tanmadhyādekasya suhṛdo mukhāt / (95.1) Par.?

tau sa mātāmaho mantrī rājaputrau saha sthitaḥ // (95.2) Par.?

bodhayitvā yathātattvam āropya varavājinoḥ / (96.1) Par.?

apasāritavān guptaṃ tatkālaṃ kaṭakāt tataḥ // (96.2) Par.?

tenāpasāritau tau ca vrajantau niśi tadyutau / (97.1) Par.?

vindhyāṭavīṃ viviśaturmārgājñānānnṛpātmajau // (97.2) Par.?

tatra rātrāvatītāyāṃ kramāt prakrāmyatos tayoḥ / (98.1) Par.?

madhyāhne 'titṛṣākrāntau hayau pañcatvamāpatuḥ // (98.2) Par.?

sa ca mātāmaho vṛddhaḥ kṣuttṛṣṇāśuṣkatālukaḥ / (99.1) Par.?

vyapadyatātapaklāntaḥ śrāntayoḥ paśyatostayoḥ // (99.2) Par.?

anāgasau kathaṃ pitrā gamitau svo daśāmimām / (100.1) Par.?

sakāmāṃ kurvatā tāṃ nau duṣṭāmaparamātaram // (100.2) Par.?

iti tau tatra śocantau duḥkhitau bhrātarau tataḥ / (101.1) Par.?

prākpitraivopadiṣṭāṃ tāṃ devīṃ dadhyaturambikām // (101.2) Par.?

tasyā dhyānaprabhāveṇa śaraṇyāyās tadaiva tau / (102.1) Par.?

vigatakṣutklamatṛṣau balinau ca babhūvatuḥ // (102.2) Par.?

tatas tatpratyayāśvastāv avijñātapathaśramau / (103.1) Par.?

tām eva yayaturdraṣṭuṃ vindhyakāntāravāsinīm // (103.2) Par.?

tatra prāptau tadagre ca bhrātarau tāvubhāvapi / (104.1) Par.?

prārabhetāṃ nirāhārau tāmārādhayituṃ tapaḥ // (104.2) Par.?

atrāntare ca te tatra sāmantāḥ kaṭake sthitāḥ / (105.1) Par.?

sambhūya yāvadāyānti tayoḥ pāpaṃ cikīrṣavaḥ // (105.2) Par.?

tāvatkvacinna dadṛśurvicinvanto 'pi sarvataḥ / (106.1) Par.?

tau samātāmahau kvāpi rājaputrau palāyitau // (106.2) Par.?

tataś cāśaṅkya taṃ mantrabhedaṃ sarve 'pi te bhayāt / (107.1) Par.?

rājñas tasya parityāgasenasyāntikamāyayuḥ // (107.2) Par.?

pradarśya tasmai lekhāṃś ca yathāvṛttaṃ tamabruvan / (108.1) Par.?

so 'tha buddhvā tadudbhrāntaḥ kruddhastānevam abravīt // (108.2) Par.?

naite matprahitā lekhā indrajālaṃ kim apy adaḥ / (109.1) Par.?

yūyaṃ ca na kimetāvadapi jānītha bāliśāḥ // (109.2) Par.?

yad analpatapaḥprāptāv ahaṃ hanmi kathaṃ sutau / (110.1) Par.?

yuṣmābhistau hatāveva sukṛtaiḥ svaistu rakṣitau // (110.2) Par.?

mātāmahena ca tayor darśitaṃ mantritāphalam / (111.1) Par.?

ity uktvā tān sa sāmantān kāyasthaṃ kūṭalekhakam // (111.2) Par.?

taṃ palāyitam apy āśu svaśaktyānāyya bhūpatiḥ / (112.1) Par.?

samyakpṛṣṭvā yathāvṛttaṃ yathāvannigṛhītavān // (112.2) Par.?

bhāryāṃ ca kāvyālaṃkārāṃ tādṛkkāryavidhāyinīm / (113.1) Par.?

bhūgṛhe sa nicikṣepa pāpāṃ tāṃ putraghātinīm // (113.2) Par.?

avicārya tu paryantam atidveṣāndhayā dhiyā / (114.1) Par.?

sahasā hi kṛtaṃ pāpaṃ kathaṃ mā bhūd vipattaye // (114.2) Par.?

ye ca te rājaputrābhyāṃ saha gatvābhyupāgatāḥ / (115.1) Par.?

sāmantāstānnivāryānyāṃstatpade sa nṛpo vyadhāt // (115.2) Par.?

tasthau ca vārtām anviṣyan satataṃ putrayos tayoḥ / (116.1) Par.?

tanmātrā saha duḥkhārto dharmāsakto 'mbikāṃ smaran // (116.2) Par.?

tāvac ca rājaputrasya tapasā sānujasya sā / (117.1) Par.?

tasyendīvarasenasya tuṣṭābhūd vindhyavāsinī // (117.2) Par.?

dattvā ca khaḍgaṃ svapne sā sākṣādevaṃ tamādiśat / (118.1) Par.?

asya prabhāvāt khaḍgasya śatrūñjeṣyasi durjayān // (118.2) Par.?

cintayiṣyasi yat kiṃcit tac ca sampatsyate tava / (119.1) Par.?

dvāvapyetena ca yuvāmiṣṭasiddhimavāpsyathaḥ // (119.2) Par.?

ity uktvāntarhitāyāṃ ca devyāṃ tasyāṃ prabudhya saḥ / (120.1) Par.?

tatrendīvarasenastaṃ hastasthaṃ khaḍgamaikṣata // (120.2) Par.?

atha khaḍgena tatsvapnavarṇanena ca so 'nujam / (121.1) Par.?

āśvāsya cakre tadyuktaḥ prātarvanyena pāraṇam // (121.2) Par.?

tataḥ praṇamya devīṃ tāṃ tatprasādahṛtaklamaḥ / (122.1) Par.?

hṛṣṭastatkhaḍgahastaś ca samaṃ bhrātrā yayau tataḥ // (122.2) Par.?

gatvā ca dūraṃ sa prāpadekaṃ puravaraṃ mahat / (123.1) Par.?

kurvāṇaṃ meruśikharabhrāntiṃ hemamayairgṛhaiḥ // (123.2) Par.?

tatra raudraṃ dadarśaikaṃ pratolīdvāri rākṣasam / (124.1) Par.?

papraccha taṃ ca vīro 'sya purasyākhyāṃ patiṃ ca saḥ // (124.2) Par.?

idaṃ śailapuraṃ nāma nagaraṃ rākṣasādhipaḥ / (125.1) Par.?

adhyāste yamadaṃṣṭrākhyaḥ svāmī naḥ śatrumardanaḥ // (125.2) Par.?

ity ukte rakṣasā tena yamadaṃṣṭrajighāṃsayā / (126.1) Par.?

tatrendīvaraseno 'tha sa praveṣṭuṃ pravṛttavān // (126.2) Par.?

nirundhantaṃ ca taṃ dvāḥsthaṃ rākṣasaṃ sa mahābhujaḥ / (127.1) Par.?

ekakhaḍgaprahāreṇa śiraśchittvā nyapātayat // (127.2) Par.?

taṃ hatvā rājabhavanaṃ praviśyāntardadarśa saḥ / (128.1) Par.?

śūraḥ siṃhāsanasthaṃ taṃ yamadaṃṣṭraṃ niśācaram // (128.2) Par.?

daṃṣṭrāghoramukhaṃ vāmapārśvasthitavarāṅganam / (129.1) Par.?

āśritetarapārśvaṃ ca kumāryā divyarūpayā // (129.2) Par.?

dṛṣṭvā ca so 'mbikādattakhaḍgahasto raṇāya tam / (130.1) Par.?

āhūtavānsa cottasthau khaḍgamākṛṣya rākṣasaḥ // (130.2) Par.?

pravṛtte ca tayoryuddhe chinnaśchinno 'tha rakṣasaḥ / (131.1) Par.?

tasyendīvarasenena mūrdhā muhurajāyata // (131.2) Par.?

tāṃ tasya māyām ālokya tatpārśvasthitayā tayā / (132.1) Par.?

kumāryā kṛtasaṃjñaḥ saṃdarśanenānuraktayā // (132.2) Par.?

sa rājaputraś chittvaiva rakṣasas tasya tacchiraḥ / (133.1) Par.?

bhūyaḥ khaḍgaprahāreṇa laghuhasto dvidhākarot // (133.2) Par.?

tayāsya naṣṭamāyasya rakṣasaḥ pratimāyayā / (134.1) Par.?

nājāyata punarmūrdhā tena rakṣo vyapādi tat // (134.2) Par.?

hate tasmin prahṛṣṭe te tadvarastrīkumārike / (135.1) Par.?

sānujo rājaputro 'sāv upaviśyātha pṛṣṭavān // (135.2) Par.?

āsīt kim īdṛśe 'muṣmin pure dvāḥsthaikarakṣitaḥ / (136.1) Par.?

rākṣaso 'yaṃ yuvāṃ ke ca hate 'smin kiṃ ca hṛṣyathaḥ // (136.2) Par.?

etac chrutvā tayor madhyāt kumārī sā jagāda tam / (137.1) Par.?

asmiñ śailapure vīrabhujo nāmābhavan nṛpaḥ // (137.2) Par.?

eṣā madanadaṃṣṭreti bhāryā tasya sa cāmunā / (138.1) Par.?

māyayā rākṣasenaitya yamadaṃṣṭreṇa bhakṣitaḥ // (138.2) Par.?

grastaḥ paricchadaścāsya surūpeti na bhakṣitā / (139.1) Par.?

ekā madanadaṃṣṭraiṣā bhāryā ca vihitātmanaḥ // (139.2) Par.?

tato vivikte ramye 'smin pure nirmāya kāñcanān / (140.1) Par.?

gṛhān eṣo 'nayā krīḍann āstāpāstaparicchadaḥ // (140.2) Par.?

ahaṃ ca khaḍgadaṃṣṭrākhyā kanīyasyasya rakṣasaḥ / (141.1) Par.?

bhaginī kanyakā dṛṣṭe tvayi sadyo 'nurāgiṇī // (141.2) Par.?

ato hate 'smin hṛṣṭeyam ahaṃ ca tadihādhunā / (142.1) Par.?

upayacchasva māmāryaputra premasamarpitām // (142.2) Par.?

evam uktavatīṃ khaḍgadaṃṣṭrāṃ sa pariṇītavān / (143.1) Par.?

tāmindīvaraseno 'tha gāndharvavidhinā tadā // (143.2) Par.?

tasthau cātraiva nagare devīkhaḍgaprabhāvataḥ / (144.1) Par.?

cintitopanamadbhogaḥ kṛtadāro 'nujānvitaḥ // (144.2) Par.?

ekadā ca kanīyāṃsaṃ bhrātaraṃ vyomagāmini / (145.1) Par.?

svakhaḍgacintāratnasya prabhāvāddhyānanirmite // (145.2) Par.?

vimāne vīramāropya so 'nicchāsenam aśramāt / (146.1) Par.?

prāhiṇodantikaṃ pitroḥ svodantāvedanāya tam // (146.2) Par.?

so 'pi gatvā vimānena tena kṣiprādvihāyasā / (147.1) Par.?

purīm anicchāsenas tāṃ pituḥ prāpadirāvatīm // (147.2) Par.?

tatra tau nandayāmāsa pitarau darśanena saḥ / (148.1) Par.?

tīvraduḥkhātapaklāntau cakorāv iva candramāḥ // (148.2) Par.?

upetya cāṅghripatitaḥ paryāyāliṅgitastayoḥ / (149.1) Par.?

nirāsa pṛcchatoḥ śaṅkāṃ bhrātṛkalyāṇavārtayā // (149.2) Par.?

śaśaṃsa taṃ ca vṛttāntametayoḥ purato 'khilam / (150.1) Par.?

āpātaduḥkhaṃ saukhyāntaṃ bhrātur ātmana eva ca // (150.2) Par.?

śuśrāva cātra vihitaṃ tādṛśaṃ pāpayā tayā / (151.1) Par.?

dveṣeṇāparamātrā tadātmanāśāya kaitavam // (151.2) Par.?

tataḥ pitrotsavavatā yukto mātrā ca nirvṛtaḥ / (152.1) Par.?

tasthāv anicchāseno 'tra pūjyamāno janena sa // (152.2) Par.?

yāte katipayāhe ca dṛṣṭaduḥsvapnaśaṅkitaḥ / (153.1) Par.?

bhrātaraṃ prati sotkaś ca pitaraṃ sa vyajijñapat // (153.2) Par.?

gacchāmi yuṣmadutkaṇṭhām abhidhāyānayāmy aham / (154.1) Par.?

āryendīvarasenaṃ tamanujānīhi tāta mām // (154.2) Par.?

tac chrutvānumatas tena pitrā putrotsukena saḥ / (155.1) Par.?

jananyā ca vimānaṃ svaṃ tadevāruhya satvaraḥ // (155.2) Par.?

prāyād anicchāsenas tadvyomnā śailapuraṃ puram / (156.1) Par.?

prātaś ca tatra prāvikṣatsvabhrātus tasya mandiram // (156.2) Par.?

dadarśa tatra niḥsaṃjñaṃ patitasthitamagrajam / (157.1) Par.?

rudatyorantike khaḍgadaṃṣṭrāmadanadaṃṣṭrayoḥ // (157.2) Par.?

kimetad iti saṃbhrāntaṃ pṛcchantaṃ tamadhomukhī / (158.1) Par.?

jagāda khaḍgadaṃṣṭrā sā ninditāparayā tayā // (158.2) Par.?

tvayy asthite mayi snātuṃ gatāyām ekadānayā / (159.1) Par.?

tvadbhrātāyaṃ sahāraṃsta raho madanadaṃṣṭrayā // (159.2) Par.?

kṣaṇātsnātvāgatā cāhaṃ sākṣādenaṃ tathā sthitam / (160.1) Par.?

etayā yuktamadrākṣaṃ vācā ca nirabhartsayam // (160.2) Par.?

tato 'nunītāpy etena niyatyevāvilaṅghyayā / (161.1) Par.?

īrṣyayā mohitātyarthamaham evam acintayam // (161.2) Par.?

aho agaṇayitvaiva māmayaṃ bhajate 'parām / (162.1) Par.?

jāne 'sya khaḍgamāhātmyakṛtto darpo 'yamīdṛśaḥ // (162.2) Par.?

tad asya gopayāmy enam iti saṃcintya mūḍhayā / (163.1) Par.?

etatkhaḍgo niśi kṣiptaḥ supte 'smin dahane mayā // (163.2) Par.?

kalaṅkitaś ca khaḍgo 'sau gataś caiṣa daśām imām / (164.1) Par.?

anutaptāsmi cākruṣṭā tato madanadaṃṣṭrayā // (164.2) Par.?

athaitasyāṃ ca mayi ca dvayoḥ śokāndhacetasoḥ / (165.1) Par.?

maraṇādhyavasāyinyorāgatastvam ihādhunā // (165.2) Par.?

tadgṛhāṇa tvam evaitatkhaḍgaṃ nistriṃśakarmikām / (166.1) Par.?

atyaktajātidharmāṃ māmetenaiva nipātaya // (166.2) Par.?

ity uktaḥ sa tayānicchāseno 'tra bhrātṛjāyayā / (167.1) Par.?

tāpād avadhyāṃ matvā tāṃ chettum aicchan nijaṃ śiraḥ // (167.2) Par.?

maivaṃ kārṣīrmṛto nāyaṃ rājaputra tavāgrajaḥ / (168.1) Par.?

khaḍgapramādakopena devyā tveṣa vimohitaḥ // (168.2) Par.?

asyāṃ ca khaḍgadaṃṣṭrāyāṃ mantavyā nāparādhitā / (169.1) Par.?

yataḥ śāpāvatīrṇānāmetaddhastavijṛmbhitam // (169.2) Par.?

ete cāsya tava bhrātuḥ pūrvabhārye ubhe api / (170.1) Par.?

tatprasādaya tām eva devīmabhimatāptaye // (170.2) Par.?

iti tatkālamudbhūtām antarikṣātsarasvatīm / (171.1) Par.?

śrutvā nivavṛte 'nicchāsenaḥ sa maraṇodyamāt // (171.2) Par.?

āruhyaiva vimānaṃ tadgṛhītvāgnikalaṅkitam / (172.1) Par.?

khaḍgaṃ taṃ vindhyavāsinyāḥ pādamūlaṃ jagāma saḥ // (172.2) Par.?

tatra mūrdhopahāreṇa toṣayiṣyannupoṣitaḥ / (173.1) Par.?

devīṃ tāmudgatāmetāṃ gaganādaśṛṇodgiram // (173.2) Par.?

mā putra sāhasaṃ kārṣīrgaccha jīvatu te 'grajaḥ / (174.1) Par.?

jāyatāṃ nirmalaḥ khaḍgo bhaktyā tuṣṭā hy ahaṃ tava // (174.2) Par.?

etaddivyaṃ vacaḥ śrutvā tatkṣaṇaṃ niṣkalaṅkatām / (175.1) Par.?

prāptaṃ dṛṣṭvā kare khaḍgaṃ kṛtvā tasyāḥ pradakṣiṇam // (175.2) Par.?

manorathamivāruhya vimānaṃ siddham āśugam / (176.1) Par.?

ājagāmotsuko 'nicchāsenaḥ śailapuraṃ sa tat // (176.2) Par.?

tatra dṛṣṭvotthitaṃ sadyo labdhasaṃjñaṃ tamagrajam / (177.1) Par.?

jagrāha pādayoḥ sāśruḥ kaṇṭhe so 'py enamagrahīt // (177.2) Par.?

tvayā nau rakṣito bhartetyubhe te pādayos tataḥ / (178.1) Par.?

nipatya bhrātṛjāye tamanicchāsenamūcatuḥ // (178.2) Par.?

athendīvarasenāya pṛcchate so 'grajāya tat // (179) Par.?

nākrudhyat khaḍgadaṃṣṭrāyai bhrātary asmiṃs tutoṣa ca // (180) Par.?

śuśrāva caitasya mukhātpitarau darśanotsukau / (181.1) Par.?

māyām aparamātrā ca kṛtāṃ tāṃ tadviyogadām // (181.2) Par.?

tato bhrātrārpitaṃ khaḍgaṃ gṛhītvā tatprabhāvataḥ / (182.1) Par.?

dhyātopanatamāruhya vimānaṃ sumahac ca saḥ // (182.2) Par.?

sahemamandiro bhāryādvayena saha sānujaḥ / (183.1) Par.?

tāmindīvarasenaḥ svāṃ purīmāgādirāvatīm // (183.2) Par.?

tatrāvatīrya nabhaso vismayālokito janaiḥ / (184.1) Par.?

rājaveśma pituḥ pārśvaṃ viveśa saparicchadaḥ // (184.2) Par.?

tathābhūtaś ca pitaraṃ taṃ dṛṣṭvā mātaraṃ ca saḥ / (185.1) Par.?

papāta pādayoś cāśrudhārādhautamukhas tayoḥ // (185.2) Par.?

tau ca taṃ sahasā dṛṣṭaṃ putramāśliṣya sānujam / (186.1) Par.?

amṛteneva siktāṅgau tāpanirvāṇamīyatuḥ // (186.2) Par.?

divyarūpe ca tadbhārye kṛtapādābhivandane / (187.1) Par.?

snuṣe ubhe te paśyantau hṛṣṭāv abhinanandatuḥ // (187.2) Par.?

kathāprasaṅgād buddhvā ca tasya te pūrvanirmite / (188.1) Par.?

divyavākkathite bhārye yayatustau parāṃ mudam // (188.2) Par.?

vimānagatisauvarṇamandirānayanādinā / (189.1) Par.?

prabhāveṇa sutasyāsya vismayena nanandatuḥ // (189.2) Par.?

tatas tābhyāṃ sa sahitaḥ pitṛbhyāṃ saparigrahaḥ / (190.1) Par.?

āstendīvaraseno 'tra pradattajanatotsavaḥ // (190.2) Par.?

ekadā ca parityāgasenaṃ taṃ janakaṃ nṛpam / (191.1) Par.?

vijñapya sānujaḥ prāyātpunardigvijayāya saḥ // (191.2) Par.?

khaḍgaprabhāvāj jitvā ca pṛthvīṃ kṛtsnāṃ mahābhujaḥ / (192.1) Par.?

āyayau hemahastyaśvaratnānyāhṛtya bhūbhujām // (192.2) Par.?

avāpa nagarīṃ tāṃ ca nijāṃ vijitayā bhayāt / (193.1) Par.?

anuyāta ivodbhūtasainyadhūlinibhādbhuvā // (193.2) Par.?

praviśya rājadhānīṃ ca pitrā pratyudgato 'tha saḥ / (194.1) Par.?

jananīṃ nandayāmāsa sānujo 'dhikasaṃgamām // (194.2) Par.?

saṃmānya rājalokaṃ ca svabhāryāsvajanānvitaḥ / (195.1) Par.?

tatrendīvarasenastatpramodenānayaddinam // (195.2) Par.?

anyedyus tat karadvāreṇārpayitvā ca medinīm / (196.1) Par.?

pitre sa rājaputraḥ svāmakasmājjātimasmarat // (196.2) Par.?

tataḥ suptaprabuddhābho janakaṃ tam uvāca ca / (197.1) Par.?

mayā jātiḥ smṛtā tāta tadidaṃ śṛṇu vacmi te // (197.2) Par.?

asti muktāpuraṃ nāma sānau himavataḥ puram / (198.1) Par.?

tatrāsti muktāsenākhyo rājā vidyādhareśvaraḥ // (198.2) Par.?

kambuvatyabhidhānāyāṃ devyāṃ tasya sutau kramāt / (199.1) Par.?

jātau dvau padmasenaś ca rūpasenaś ca sadguṇau // (199.2) Par.?

padmasenaṃ tayoḥ premṇā svayaṃ vṛtavatī patim / (200.1) Par.?

kanyādityaprabhā nāma vidyādharavarātmajā // (200.2) Par.?

tad buddhvā tadvayasyāpi nāmnā candravatī svayam / (201.1) Par.?

etyāvṛṇīta kāmārtā taṃ vidyādharakanyakā // (201.2) Par.?

dvibhāryaḥ sa tadā padmaseno nityamakhidyata / (202.1) Par.?

sapatnīserṣyayādityaprabhayā bhāryayā tayā // (202.2) Par.?

īrṣyāndhabhāryākalahaṃ soḍhuṃ śaknomi nānvaham / (203.1) Par.?

tapovanāya gacchāmi nirvedasyāsya śāntaye // (203.2) Par.?

tattāta dehi me 'nujñāmiti nirbandhato muhuḥ / (204.1) Par.?

janakaṃ padmasenaḥ svaṃ muktāsenaṃ jagāda saḥ // (204.2) Par.?

so 'pi taṃ tadgrahakruddhaḥ sabhāryamaśapatpitā / (205.1) Par.?

kiṃ te tapovanaṃ gatvā martyalokamavāpnuhi // (205.2) Par.?

tatraiṣā kalahāsaktā bhāryādityaprabhā tava / (206.1) Par.?

rākṣasīṃ yonimāsādya tvadbhāryaiva bhaviṣyati // (206.2) Par.?

dvitīyā candravatyeṣā tvayi raktātivallabhā / (207.1) Par.?

rājastrī rākṣasī bhūtvā bhūmau tvāṃ prāpsyati priyam // (207.2) Par.?

sābhilāṣo 'nusartuṃ tvāṃ jyeṣṭhaṃ yallakṣito mayā / (208.1) Par.?

tadeṣa rūpaseno 'pi bhāvī bhrātaiva tatra te // (208.2) Par.?

dvibhāryatvakṛtaṃ kiṃcidduḥkhaṃ tatrāpyavāpsyasi / (209.1) Par.?

evam uktvā viramyetthaṃ śāpāntamakarotsa naḥ // (209.2) Par.?

rājaputro bhuvaṃ jitvā pṛthvīṃ pitroḥ pradāsyasi / (210.1) Par.?

yadā tadā sahāmībhirjātiṃ smṛtvā vimokṣyase // (210.2) Par.?

iti pitroditas tena padmaseno nijena saḥ / (211.1) Par.?

tatkālaṃ saha tair anyair martyalokam avātarat // (211.2) Par.?

sa padmasenas tātāyam ahaṃ jātaḥ sutastava / (212.1) Par.?

nāmnendīvaraseno 'tra kartavyaṃ ca kṛtaṃ mayā // (212.2) Par.?

yo 'paro rūpasenaś ca vidyādharakumārakaḥ / (213.1) Par.?

anicchāsena ityeva jātaḥ so 'nuja eva me // (213.2) Par.?

yā sādityaprabhā bhāryā yā ca candrāvatīti me / (214.1) Par.?

viddhi te dve ime khaḍgadaṃṣṭrāmadanadaṃṣṭrike // (214.2) Par.?

idānīṃ cāyamavadhiḥ prāptaḥ śāpasya so 'sya naḥ / (215.1) Par.?

tadvrajāmo vayaṃ tāta nijaṃ vaidyādharaṃ padam // (215.2) Par.?

ity uktvā sa samaṃ bhāryābhrātṛbhiḥ smṛtajātibhiḥ / (216.1) Par.?

tyaktvaiva mānuṣīṃ mūrtiṃ bhūtvā vidyādharākṛtiḥ // (216.2) Par.?

praṇamya pitroścaraṇau kṛtvāṅke dayitādvayam / (217.1) Par.?

sānujaḥ prayayau vyomnā nijaṃ vaidyādharaṃ puram // (217.2) Par.?

tatrābhinanditaḥ pitrā muktāsenena sanmatiḥ / (218.1) Par.?

mātṛnetrotsavo bhrātrā rūpasenena saṃgataḥ // (218.2) Par.?

uvāsa padmaseno 'sau bhūyo 'nāviṣkṛterṣyayā / (219.1) Par.?

ādityaprabhayā candravatyā ca saha nirvṛtaḥ // (219.2) Par.?

ity etāṃ gomukho ramyāṃ kathayitvā kathāṃ pathi / (220.1) Par.?

naravāhanadattaṃ tam uvāca sacivaḥ punaḥ // (220.2) Par.?

itthaṃ syānmahatām eva mahākleśastathodayaḥ / (221.1) Par.?

anyeṣāṃ tu kiyāndeva kleśo vāpyudayo 'pi vā // (221.2) Par.?

tvaṃ tu ratnaprabhādevīvidyāśaktyānupālitaḥ / (222.1) Par.?

karpūrikāṃ rājasutām akleśāt tām avāpsyasi // (222.2) Par.?

iti naravāhanadattaḥ śrutvā sumukhasya gomukhasya mukhāt / (223.1) Par.?

prākrāmatpathi tasminn ajñātapariśramaḥ sa tatsahitaḥ // (223.2) Par.?

gacchaṃś ca tatra kalakūjitarājahaṃsam acchaṃ sudhāsarasaśītalabhūrivāri / (224.1) Par.?

āmrāvalīpanasadāḍimaramyarodhaḥ sāyaṃ saro vikacavārijamāsasāda // (224.2) Par.?

tasmin snātvā himagirisutākāntam abhyarcya bhaktyā kṛtvāhāraṃ surabhimadhurāsvādahṛdyaiḥ phalais taiḥ / (225.1) Par.?

sakhyā sārdhaṃ mṛdukisalayāstīrṇaśayyāprasuptas tattīre tāṃ rajanim anayat so 'tra vatseśasūnuḥ // (225.2) Par.?

Duration=2.7195060253143 secs.