Texts
Select a text:
Bibliography
Bibliography
Select a chapter:
(no revisions)
Show parallels Show headlines
Use dependency labeler
(no revisions)
Show parallels Show headlines
Use dependency labeler
Chapter id: 17468
- Click on a sentence to show its analysis
- Keep the mouse pointer over a lemma to show its meanings.
nijavarṣāhitasnehā bahubhaktajanānvitāḥ / (1.1) Par.?
sukālā iva jāyante prajāpuṇyena bhūbhujaḥ // (1.2) Par.?
sādhūnām upakartuṃ lakṣmīṃ draṣṭuṃ vihāyasā gantum / (2.1) Par.?
na kutūhali kasya manaścaritaṃ ca mahātmanāṃ śrotum // (2.2) Par.?
atha kadācid viralitabalāhake cātakātaṅkakāriṇi kvaṇatkādambe darduradviṣi mayūramadamuṣi haṃsapathikasārthasarvātithau dhautāsinibhanabhasi bhāsvarabhāsvati śuciśaśini taruṇatārāgaṇe galatsunāsīraśarāsane sīdatsaudāmanīdāmni dāmodaranidrādruhi drutavaidūryavarṇārṇasi ghūrṇamānamihikālaghumeghamoghamaghavati nimīlannīpe niṣkusumakuṭaje nirmukulakandale komalakamale madhusyandīndīvare kahlārāhlādini śephālikāśītalīkṛtaniśe yūthikāmodini modamānakumudāvadātadaśadiśi saptacchadadhūlidhūsaritasamīre stabakitabandhurabandhūkābadhyamānākāṇḍasaṃdhye nīrājitavājini uddāmadantini darpakṣībaukṣake kṣīyamāṇapaṅkacakravāle bālapulinapallavitasindhurodhasi pariṇāmāśyānaśyāmāke janitapriyaṅgumañjarīrajasi kaṭhoritatrapusatvaci kusumasmeraśare śaratsamayārambhe rājñaḥ samīpād bāṇo bandhūn draṣṭuṃ punar api taṃ brāhmaṇādhivāsam agāt // (3.1) Par.?
samupalabdhabhūpālasaṃmānātiśayaparituṣṭās tv asya jñātayaḥ ślāghamānā niryayuḥ // (4.1) Par.?
krameṇa ca kāṃścid abhivādayamānaḥ kaiścid abhivādyamānaḥ kaiścic chirasi cumbyamānaḥ kāṃścin mūrdhni samājighran kaiścid āliṅgyamānaḥ kāṃścid āliṅgan anyair āśiṣānugṛhyamāṇaḥ parān anugṛhṇan bahubandhumadhyavartī paraṃ mumude // (5.1) Par.?
saṃbhrāntaparijanopanītaṃ cāsanam āsīneṣu guruṣu bheje // (6.1) Par.?
bhajamānaś cārcādisatkāraṃ nitarāṃ nananda // (7.1) Par.?
prīyamāṇena ca manasā sarvāṃs tān paryapṛcchat kaccid etāvato divasān sukhino yūyam / (8.1) Par.?
apratyūhā vā samyakkaraṇaparitoṣitadvijacakrā krātavī kriyate kriyā / (8.2) Par.?
yathāvad avikalamantrabhāñji bhuñjate havīṃṣi hutabhujaḥ / (8.3) Par.?
yathākālam adhīyate vā baṭavaḥ / (8.4) Par.?
pratidinam avicchinno vā vedābhyāsaḥ / (8.5) Par.?
kaccit sa eva ciraṃtano yajñavidyākarmaṇy abhiyogaḥ tāny eva vyākaraṇe parasparaspardhānubandhāvandhyadivasadarśitādarāṇi vyākhyānamaṇḍalāni saiva vā purātanī parityaktānyakartavyā pramāṇagoṣṭhī sa eva vā mandīkṛtetaraśāstraraso mīmāṃsāyām atirasaḥ / (8.6) Par.?
kaccit ta evābhinavasubhāṣitasudhāvarṣiṇaḥ kāvyālāpāḥ iti // (8.7) Par.?
atha te tam ūcuḥ tāta saṃtoṣajuṣāṃ satatasaṃnihitavidyāvinodānāṃ vaitānavahnimātrasahāyānāṃ kiyanmātraṃ na kṛtyaṃ sukhitayā sakalabhuvanabhuji bhujaṅgarājadehadīrghe rakṣati kṣitiṃ kṣitibhujo bhuje // (9.1) Par.?
sarvathā sukhina eva vayaṃ viśeṣeṇa tu tvayi vimuktakausīdye parameśvarapārśvavartini vetrāsanam adhitiṣṭhati // (10.1) Par.?
sarve ca yathāśakti yathāvibhavaṃ yathākālaṃ ca saṃpādyante viprajanocitāḥ kriyākalāpāḥ ity evamādibhir ālāpaiḥ skandhāvāravārtābhiś ca śaiśavātikrāntakrīḍānusmaraṇaiḥ pūrvajakathābhiś ca vinoditamanās taiḥ saha suciram atiṣṭhat // (11.1) Par.?
utthāya ca madhyaṃdine yathākriyamāṇāḥ sthitīr akarot // (12.1) Par.?
bhuktavantaṃ ca taṃ sarve jñātayaḥ paryavārayan // (13.1) Par.?
atrāntare dugūlapaṭṭaprabhave śikhaṇḍyapāṅgapāṇḍunī pauṇḍre vāsasī vasānaḥ snānāvasānasamaye banditayā tīrthamṛdā gorocanayā ca racitatilakaḥ tailāmalakamasṛṇitamauliḥ anuccacūḍācumbinā nibiḍena kusumāpīḍakena samudbhāsamānaḥ asakṛdupayuktatāmbūlaviralādhararāgakāntiḥ ekaśalākāñjanajanitalocanaruciḥ acirabhuktaḥ vinītam āryaṃ ca veṣaṃ dadhānaḥ pustakavācakaḥ sudṛṣṭir ājagāma // (14.1) Par.?
nātidūravartinyāṃ cāsandyāṃ niṣasāda // (15.1) Par.?
sthitvā ca muhūrtam iva tatkālāpanītasūtraveṣṭanam api nakhakiraṇair mṛdumṛṇālasūtrair ivāveṣṭitaṃ pustakaṃ puronihitaśaraśalākāyantrake nidhāya pṛṣṭhataḥ sanīḍasaṃniviṣṭābhyāṃ madhukarapārāvatābhyāṃ vaṃśikābhyāṃ datte sthānake prābhātikaprapāṭhakacchedacihnīkṛtam antaraṃ patram utkṣipya gṛhītvā ca katipayapatralaghvīṃ kapāṭikām kṣālayann iva maṣīmalināny akṣarāṇi dantakāntibhiḥ arcayann iva sitakusumamuktibhir grantham mukhasaṃnihitasarasvatīnūpuraravair iva gamakair madhurair ākṣipan manāṃsi śrotṝṇāṃ gītyā pavamānaproktaṃ purāṇaṃ papāṭha // (16.1) Par.?
tasmiṃś ca tathā śrutisubhagagītigarbhaṃ paṭhati sudṛṣṭau nātidūravartī bandī sūcībāṇas tāramadhureṇa gītidhvanim anuvartamānaḥ svareṇedam āryāyugalam agāyat // (17.1) Par.?
tad api munigītam atipṛthu tad api jagadvyāpi pāvanaṃ tad api / (18.1) Par.?
harṣacaritād abhinnaṃ pratibhāti hi me purāṇam idam // (18.2) Par.?
vaṃśānugamavivādi sphuṭakaraṇaṃ bharatamārgabhajanaguru / (19.1) Par.?
śrīkaṇṭhaviniryātaṃ gītam idaṃ harṣarājyam iva // (19.2) Par.?
tacchrutvā bāṇasya catvāraḥ pitāmahamukhapadmā iva vedābhyāsapavitritamūrtayaḥ upāyā iva sāmaprayogalalitamukhāḥ gaṇapatiḥ adhipatiḥ tārāpatiḥ śyāmala iti pitṛvyaputrā bhrātaraḥ prasannavṛttayaḥ gṛhītavākyāḥ kṛtagurupadanyāsāḥ nyāyavādinaḥ sukṛtasaṃgrahābhyāsaguravo labdhasādhuśabdā loka iva vyākaraṇe 'pi sakalapurāṇarājarṣicaritābhijñāḥ mahābhāratabhāvitātmānaḥ viditasakaletihāsāḥ mahāvidvāṃsaḥ mahākavayaḥ mahāpuruṣavṛttāntakutūhalinaḥ subhāṣitaśravaṇarasarasāyanāḥ vitṛṣṇāḥ vayasi vacasi yaśasi tapasi sadasi mahasi vapuṣi yajuṣi ca prathamāḥ pūrvam eva kṛtasaṃgarāḥ vivakṣavaḥ smitasudhādhavalitakapolodarāḥ parasparasya mukhāni vyalokayan // (20.1) Par.?
atha teṣāṃ kanīyān kamaladaladīrghalocanaḥ śyāmalo nāma bāṇasya preyān prāṇānām api vaśayitā dattasaṃjñas taiḥ sapraṇayaṃ daśanajyotsnāsnapitakakubhā mukhendunā babhāṣe tāta bāṇa dvijānāṃ rājā gurudāragrahaṇam akārṣīt // (21.1) Par.?
purūravā brāhmaṇadhanatṛṣṇayā dayitenāyuṣā vyayujyata // (22.1) Par.?
nahuṣaḥ parakalatrābhilāṣī mahābhujaṅga āsīt // (23.1) Par.?
yayātir āhitabrāhmaṇīpāṇigrahaṇaḥ papāta // (24.1) Par.?
sudyumnaḥ strīmaya evābhavat // (25.1) Par.?
somakasya prakhyātā jagati jantuvadhanirghṛṇatā // (26.1) Par.?
māṃdhātā mārgaṇavyasanena saputrapautro rasātalam agāt // (27.1) Par.?
purukutsaḥ kutsitaṃ karma tapasyann api mekalakanyakāyām akarot // (28.1) Par.?
kuvalayāśvo bhujaṅgalokaparigrahād aśvatarakanyām api na parijahāra // (29.1) Par.?
pṛthuḥ prathamapuruṣakaḥ paribhūtavān pṛthivīm // (30.1) Par.?
nṛgasya kṛkalāsabhāve 'pi varṇasaṃkaraḥ samadṛśyata // (31.1) Par.?
saudāsena narakṣitā paryākulīkṛtā kṣitiḥ // (32.1) Par.?
nalam avaśākṣahṛdayaṃ kalir abhibhūtavān // (33.1) Par.?
saṃvaraṇo mitraduhitari viklavatām agāt // (34.1) Par.?
daśaratha iṣṭarāmonmādena mṛtyum avāpa // (35.1) Par.?
kārtavīryo gobrāhmaṇātipīḍanena nidhanam ayāsīt // (36.1) Par.?
marutta iṣṭabahusuvarṇako 'pi devadvijabahumato na babhūva // (37.1) Par.?
śantanur ativyasanād ekākī viyukto vāhinyā vipine vilalāpa // (38.1) Par.?
pāṇḍur vanamadhyagato matsya iva madanarasāviṣṭaḥ prāṇān mumoca // (39.1) Par.?
yudhiṣṭhiro gurubhayaviṣaṇṇahṛdayaḥ samaraśirasi satyam utsṛṣṭavān // (40.1) Par.?
itthaṃ nāsti rājatvam apakalaṅkam ṛte devadevād amutaḥ sarvadvīpabhujo harṣāt // (41.1) Par.?
asya hi bahūny āścaryāṇi śrūyante // (42.1) Par.?
tathā hy atra balajitā niścalīkṛtāś calantaḥ kṛtapakṣāḥ kṣitibhṛtaḥ // (43.1) Par.?
atra prajāpatinā śeṣabhogimaṇḍalasyopari kṣamā kṛtā // (44.1) Par.?
atra puruṣottamena sindhurājaṃ pramathya lakṣmīr ātmīkṛtā // (45.1) Par.?
atra balinā mocitabhūbhṛdveṣṭano mukto mahānāgaḥ // (46.1) Par.?
atra devenābhiṣiktaḥ kumāraḥ // (47.1) Par.?
atra svāminaikaprahāraprapatitārātinā prakhyāpitā śaktiḥ // (48.1) Par.?
atra narasiṃhena svahastaviśasitārātinā prakaṭīkṛto vikramaḥ // (49.1) Par.?
atra parameśvareṇa tuṣāraśailabhuvo durgāyā gṛhītaḥ karaḥ // (50.1) Par.?
atra lokanāthena diśāṃ mukheṣu parikalpitā lokapālāḥ sakalabhuvanakośaś cāgrajanmanāṃ vibhaktaḥ ity evamādayaḥ prathamakṛtayugasyeva dṛśyante mahāsamārambhāḥ // (51.1) Par.?
ato 'sya sugṛhītanāmnaḥ puṇyarāśeḥ pūrvapuruṣavaṃśānukrameṇāditaḥ prabhṛti caritam icchāmaḥ śrotum // (52.1) Par.?
sumahān kālo naḥ śuśrūṣamāṇānām // (53.1) Par.?
ayaskāntamaṇaya iva lohāni nīrasaniṣṭhurāṇi kṣullakānām apy ākarṣanti manāṃsi mahatāṃ guṇāḥ kimuta svabhāvasarasamṛdūnītareṣām // (54.1) Par.?
kasya na dvitīyamahābhārate bhaved asya carite kutūhalam ācaṣṭāṃ bhavān // (55.1) Par.?
bhavatu bhārgavo 'yaṃ vaṃśaḥ śucinānena puṇyarājarṣicaritaśravaṇena sutarāṃ śucitara ity evam abhidhāya tūṣṇīm abhūt // (56.1) Par.?
bāṇas tu vihasyābravīd ārya na yuktyanurūpam abhihitam // (57.1) Par.?
aghaṭamānamanoratham iva bhavatāṃ kutūhalam avakalpayāmi // (58.1) Par.?
śakyāśakyaparisaṃkhyānaśūnyāḥ prāyeṇa svārthatṛṣaḥ // (59.1) Par.?
paraguṇānurāgiṇī priyajanakathāśravaṇarasarabhasamohitā ca manye mahatām api matir apaharati pravivekam // (60.1) Par.?
paśyatv āryaḥ kva paramāṇuparimāṇaṃ baṭuhṛdayaṃ kva samastabrahmastambhavyāpi devasya caritam / (61.1) Par.?
kva parimitavarṇavṛttayaḥ katipaye śabdāḥ kva saṃkhyātigās tadguṇāḥ / (61.2) Par.?
sarvajñasyāpy ayam aviṣayaḥ vācaspater apy agocaraḥ sarasvatyā apy atibhāraḥ kim utāsmadvidhasya / (61.3) Par.?
kaḥ khalu puruṣāyuṣaśatenāpi śaknuyād avikalam asya caritaṃ varṇayitum / (61.4) Par.?
ekadeśe tu yadi kutūhalaṃ vaḥ sajjā vayam // (61.5) Par.?
iyam adhigatakatipayākṣaralavalaghīyasī jihvā kvopayogaṃ gamiṣyati / (62.1) Par.?
bhavantaḥ śrotāraḥ // (62.2) Par.?
varṇyate harṣacaritam // (63.1) Par.?
kim anyat // (64.1) Par.?
adya tu pariṇataprāyo divasaḥ // (65.1) Par.?
paścāl lambamānakapilakiraṇajaṭābhārabhāsvaro bhagavān bhārgavo rāma iva samantapañcakarudhiramahāhrade nimajjati saṃdhyārāgapaṭale pūṣā // (66.1) Par.?
śvo nivedayitāsmi iti // (67.1) Par.?
sarve ca te tatheti pratyapadyanta // (68.1) Par.?
nāticirād utthāya saṃdhyām upāsituṃ śoṇam ayāsīt // (69.1) Par.?
atha madhumadapallavitamālavīkapolakomalātape mukulite 'hni kamalinīmīlanād iva lohitatame tamolihi ravau lambamāne ravirathaturagamārgānusāreṇa yamamahiṣa iva dhāvati nabhasi tamasi krameṇa ca gṛhatāpasakuṭīrakapaṭalāvalambiṣu raktātapacchedaiḥ saha saṃhṛteṣu valkaleṣu kalikalmaṣamuṣi muṣṇati gaganam agnihotradhāmadhūme saniyame yajamānajane maunavratini vihāravelāvilole paryaṭati patnījane vikīryamāṇaharitaśyāmākaśālipūlikāsu dugdhāsu homakapilāsu hūyamāne vaitānatanūnapāti pūtaviṣṭaropaviṣṭe kṛṣṇājinajaṭile jaṭini japati baṭujane brahmāsanādhyāsini dhyāyati yogigaṇe tāladhvanidhāvamānānantāntevāsini alasavṛddhaśrotriyānumatena galadgranthadaṇḍakodgāriṇi sandhyāṃ samavadhārayati vaṭharaviṭabaṭusamāje samunmajjati ca jyotiṣi tārakākhye khe prāpte pradoṣārambhe bhavanam āgatyopaviṣṭaḥ snigdhair bandhubhiś ca sārdhaṃ tayaiva goṣṭhyā tasthau // (70.1) Par.?
nītaprathamayāmaś ca gaṇapater bhavane parikalpitaṃ śayanīyam asevata // (71.1) Par.?
itareṣāṃ tu sarveṣāṃ nimīlitadṛśām apy anupajātanidrāṇāṃ kamalavanānām iva sūryodayaṃ pratipālayatāṃ kutūhalena katham api sā kṣapā kṣayam agacchat // (72.1) Par.?
atha yāminyās turye yāme pratibuddhaḥ sa eva bandī ślokadvayam agāyat // (73.1) Par.?
paścādaṅghriṃ prasārya trikanativitataṃ drāghayitvāṅgam uccair āsajyābhugnakaṇṭho mukham urasi saṭā dhūlidhūmrā vidhūya / (74.1) Par.?
ghāsagrāsābhilāṣād anavaratacalatprothatuṇḍas turaṅgo mandaṃ śabdāyamāno vilikhati śayanād utthitaḥ kṣmāṃ khureṇa // (74.2) Par.?
kurvann ābhugnapṛṣṭho mukhanikaṭakaṭiḥ kaṃdharām ātiraścīṃ lolenāhanyamānaṃ tuhinakaṇamucā cañcatā kesareṇa / (75.1) Par.?
nidrākaṇḍūkaṣāyaṃ kaṣati nibiḍitaśrotraśuktis turaṅgas tvaṅgatpakṣmāgralagnapratanubusakaṇaṃ koṇam akṣṇaḥ khureṇa // (75.2) Par.?
bāṇas tu tac chrutvā samutsṛjya nidrām utthāya prakṣālya vadanam upāsya ca bhagavatīṃ saṃdhyāmudite ca bhagavati savitari gṛhītatāmbūlas tatraivātiṣṭhat // (76.1) Par.?
atrāntare sarve 'sya jñātayaḥ samājagmuḥ parivārya cāsāṃcakrire // (77.1) Par.?
asāv api pūrvodghātena viditābhiprāyas teṣāṃ puro harṣacaritaṃ kathayitum ārebhe // (78.1) Par.?
śrūyatām asti puṇyakṛtām adhivāso vāsavāvāsa iva vasudhām avatīrṇaḥ satatam asaṃkīrṇavarṇavyavahārasthitiḥ kṛtayugavyavasthaḥ sthalakamalabahalatayā potronmūlyamānamṛṇālair udgītamedinīsāraguṇair iva kṛtamadhukarakolāhalair halair ullikhyamānakṣetraḥ kṣīrodapayaḥpāyipayodasiktābhir iva puṇḍrekṣuvāṭasaṃtatibhir nirantaraḥ pratidiśam apūrvaparvatakair iva khaladhānadhāmabhir vibhajyamānaiḥ sasyakūṭaiḥ saṃkaṭasakalasīmāntaḥ samantād udghātaghaṭīsicyamānair jīrakajūṭair jaṭilitabhūmiḥ urvarāvarīyobhiḥ śāleyair alaṃkṛtaḥ pākaviśarārurājamāṣanikarakirmīritaiś ca sphuṭitamudgaphalakośīkapiśitair godhūmadhāmabhiḥ sthalīpṛṣṭhair adhiṣṭhitaḥ mahiṣapṛṣṭhapratiṣṭhitagāyadgopālapālitaiś ca kīṭapaṭalalampaṭacaṭakānusṛtair avaṭughaṭitaghaṇṭāghaṭīraṭitaramaṇīyair aṭadbhir aṭavīṃ haravṛṣabhapītam āmayāśaṅkayā bahudhāvibhaktaṃ kṣīrodam iva kṣīraṃ kṣaradbhir bāṣpacchedyatṛṇatṛptair godhanair dhavalitavipinaḥ vividhamakhahomadhūmāndhaśatamanyumuktair locanair iva sahasrasaṃkhyaiḥ kṛṣṇaśāraiḥ śārīkṛtoddeśaḥ dhavaladhūlimucā ketakīvanānāṃ rajobhiḥ pāṇḍurīkṛtaiḥ prathamoddhūlanabhasmadhūsaraiḥ śivapurasyeva praveśaiḥ pradeśair upaśobhitaḥ śākakandalaśyāmalitagrāmopakaṇṭhakāśyapīpṛṣṭhaḥ pade pade karabhapālībhiḥ pīlupallavaprasphoṭitaiḥ karapuṭapīḍitakomalamātuluṅgīdalarasopaliptaiḥ svecchāvicitakuṅkumakesarakṛtapuṣpaprakaraiḥ pratyagraphalarasapānasukhasuptapathikair vanadevatādīyamānāmṛtarasaprapāgṛhair iva drākṣālatāmaṇḍapaiḥ sphuratphalānāṃ ca bījalagnaśukacañcurāgāṇām iva samārūḍhakapikulakapolasaṃdihyamānakusumānāṃ dāḍimīnāṃ vanair vilobhanīyopanirgamaḥ vanapālapīyamānanārikelarasāsavaiś ca pathikalokalupyamānapiṇḍakharjūrair golāṅgūlalihyamānamadhurāmodapiṇḍīrasaiś cakoracañcujarjaritārukair upavanair abhirāmaḥ tuṅgārjunapālīparivṛtaiś ca gokulāvatārakaluṣitakūlakīlālair adhvagaśataśaraṇyair araṇyadharābandhair avandhyavanarandhraḥ karabhīyakumārakapālyamānair auṣṭrakair aurabhrakaiś ca kṛtasaṃbādhaḥ diśi diśi ravirathaturagavilobhanāyaiva viloṭhanamṛditakuṅkumasthalīrasasamālabdhānām utprothapuṭair unmukhair udaraśāyikiśorakajavajananāya prabhañjanam iva cāpibantīnāṃ vātahariṇīnām iva svacchandacāriṇīnāṃ vaḍavānāṃ vṛndair vicaradbhir ācitaḥ anavaratakratudhūmāndhakārapravṛttair haṃsayūthair iva guṇair dhavalitabhuvanaḥ saṃgītagatamurajaravamattair mayūrair iva vibhavair mukharitajīvalokaḥ śaśikarāvadātavṛttair muktāphalair iva guṇibhiḥ prasādhitaḥ pathikaśatavilupyamānasphītaphalair mahātarubhir iva sarvātithibhir abhigamanīyaḥ mṛgamadaparimalavāhimṛgaromācchāditair himavatpādair iva mahattaraiḥ sthirīkṛtaḥ proddaṇḍasahasrapatropaviṣṭadvijottamair nārāyaṇanābhimaṇḍalair iva toyāśayair maṇḍitaḥ mathitapayaḥpravāhaprakṣālitakṣitibhiḥ kṣīrodamathanārambhair iva mahāghoṣaiḥ pūritāśaḥ śrīkaṇṭho nāma janapadaḥ // (79.1) Par.?
yatra tretāgnidhūmāśrupātajalakṣālitā ivākṣīyanta kudṛṣṭayaḥ // (80.1) Par.?
pacyamānacayaneṣṭakādahanadagdhānīva nādṛśyanta duritāni // (81.1) Par.?
chidyamānayūpadāruparaśupāṭita iva vyadīryatādharmaḥ // (82.1) Par.?
makhaśikhidhūmajaladharadhārādhauta iva nanāśa varṇasaṃkaraḥ // (83.1) Par.?
dīyamānānekagosahasraśṛṅgakhaṇḍyamāna ivāpalāyata kaliḥ // (84.1) Par.?
surālayaśilāghaṭṭanaṭaṅkanikaranikṛtā iva vyadīryanta vipadaḥ // (85.1) Par.?
mahādānavidhānakalakalābhidrutā iva prādravann upadravāḥ // (86.1) Par.?
dīpyamānasatramahānasasahasrānalasaṃtāpitā iva vyalīyanta vyādhayaḥ // (87.1) Par.?
vṛṣavivāhaprahatapuṇyapaṭahapaṭuravatrāsitā iva nopāsarpann apamṛtyavaḥ // (88.1) Par.?
saṃtatabrahmaghoṣabadhirīkṛtā ivāpajagmur ītayaḥ // (89.1) Par.?
dharmādhikāraparibhūtam iva na prābhavad durdaivam // (90.1) Par.?
tatra caivaṃvidhe nānārāmābhirāmakusumagandhaparimalasubhago yauvanārambha iva bhuvanasya kuṅkumamalanapiñjaritabahumahiṣīsahasraśobhito 'ntaḥpuraniveśa iva dharmasya marududdhūyamānacamarībālavyajanaśatadhavalitaprānta ekadeśa iva surarājyasya jvalanmakhaśikhisahasradīpyamānadaśadigantaḥ śibirasaṃniveśa iva kṛtayugasya padmāsanasthitabrahmarṣidhyānādhīyamānasakalākuśalapraśamaḥ prathamo 'vatāra iva brahmalokasya kalakalamukharamahāvāhinīśatasaṃkulo vipakṣa ivottarakurūṇām īśvaramārgaṇasaṃtāpānabhijñasakalajano vijigīṣur iva tripurasya sudhārasasiktadhavalagṛhapaṅktipāṇḍuraḥ pratinidhir iva candralokasya madhumadamattakāśinībhūṣaṇaravabharitabhuvano nāmābhihāra iva kuberanagarasya sthāṇvīśvarākhyo janapadaviśeṣaḥ // (91.1) Par.?
yas tapovanam iti munibhiḥ kāmāyatanam iti veśyābhiḥ saṃgītaśāleti lāsakaiḥ yamanagaram iti śatrubhiḥ cintāmaṇibhūmir ity arthibhiḥ vīrakṣetram iti śastropajīvibhiḥ gurukulam iti vidyārthibhiḥ gandharvanagaram iti gāyanaiḥ viśvakarmamandiram iti vijñānibhiḥ lābhabhūmir iti vaidehakaiḥ dyūtasthānam iti bandibhiḥ sādhusamāgama iti sadbhiḥ vajrapañjaram iti śaraṇāgataiḥ viṭagoṣṭhīti vidagdhaiḥ sukṛtapariṇāma iti pathikaiḥ asuravivaram iti vātikaiḥ śākyāśrama iti śamibhiḥ apsaraḥpuram iti kāmibhiḥ mahotsavasamāja iti cāraṇaiḥ vasudhāreti ca viprair agṛhyata // (92.1) Par.?
yatra ca mātaṅgagāminyaḥ śīlavatyaś ca gauryo vibhavaratāś ca śyāmāḥ padmarāgiṇyaś ca dhavaladvijaśucivadanā madirāmodiśvasanāś ca candrakāntavapuṣaḥ śirīṣakomalāṅgyaś ca abhujaṅgagamyāḥ kañcukinyaś ca pṛthukalatraśriyo daridramadhyakalitāś ca lāvaṇyavatyo madhurabhāṣiṇyaś ca apramattāḥ prasannojjvalamukharāgāś ca akautukāḥ prauḍhāś ca pramadāḥ // (93.1) Par.?
yatra ca pramadānāṃ cakṣur eva sahajaṃ muṇḍamālāmaṇḍanaṃ bhāraḥ kuvalayadaladāmāni / (94.1) Par.?
alakapratibimbāny eva kapolatalagatāny akliṣṭāḥ śravaṇāvataṃsāḥ punaruktāni tamālakisalayāni / (94.2) Par.?
priyakathā eva subhagāḥ karṇālaṃkārā āḍambaraḥ kuṇḍalādiḥ / (94.3) Par.?
kapolā eva satatam ālokakārakā vibhavo niśāsu maṇipradīpāḥ / (94.4) Par.?
niḥśvāsākṛṣṭamadhukarakulāny eva ramaṇīyaṃ mukhāvaraṇaṃ kulastrījanācāro jālikā / (94.5) Par.?
vāṇy eva madhurā vīṇā bāhyavijñānaṃ tantrītāḍanam / (94.6) Par.?
hāsā evātiśayasurabhayaḥ paṭavāsā nirarthakāḥ karpūrapāṃsavaḥ / (94.7) Par.?
adharakāntivisara evojjvalataro 'ṅgarāgo nirguṇo lāvaṇyakalaṅkaḥ kuṅkumapaṅkaḥ / (94.8) Par.?
bāhava eva komalatamāḥ parihāsaprahāravetralatā niṣprayojanāni mṛṇālāni / (94.9) Par.?
yauvanoṣmasvedabindava eva vidagdhāḥ kucālaṃkṛtayo hārās tu bhārāḥ / (94.10) Par.?
śroṇya eva viśālasphaṭikaśilātalacaturasrā rāgiṇāṃ viśramakāraṇam animittaṃ bhavanamaṇivedikāḥ // (94.11) Par.?
kamalalobhanilīnāny alikulāny eva mukharāṇi padābharaṇakāni niṣphalānīndranīlamaṇinūpurāṇi // (95.1) Par.?
nūpuraravāhūtā bhavanakalahaṃsā eva samucitāḥ saṃcaraṇasahāyā aiśvaryaprapañcāḥ parijanāḥ // (96.1) Par.?
tatra ca sākṣātsahasrākṣa iva sarvavarṇadharaṃ dhanur dadhānaḥ merumaya iva kalyāṇaprakṛtitve mandaramaya iva lakṣmīsamākarṣaṇe jalanidhimaya iva maryādāyām ākāśamaya iva śabdaprādurbhāve śaśimaya iva kalāsaṃgrahe vedamaya ivākṛtrimālāpatve dharaṇimaya iva lokadhṛtikaraṇe pavanamaya iva sarvapārthivarajovikāraharaṇe gurur vacasi pṛthur urasi viśālo manasi janakas tapasi suyātras tejasi sumantro rahasi budhaḥ sadasi arjuno yaśasi bhīṣmo dhanuṣi niṣadho vapuṣi śatrughnaḥ samare śūraḥ śūrasenākramaṇe dakṣaḥ prajākarmaṇi sarvādirājatejaḥpuñjanirmita iva rājā puṣpabhūtir iti nāmnā babhūva // (97.1) Par.?
pṛthunā gaur iveyaṃ kṛteti yaḥ spardhamāna iva mahīṃ mahiṣīṃ cakāra // (98.1) Par.?
nisargasvairiṇī svarucyanurodhinī ca bhavati hi mahatāṃ matiḥ // (99.1) Par.?
yatas tasya kenacid anupadiṣṭā sahajaiva śaiśavād ārabhyānyadevatāvimukhī bhagavati bhaktisulabhe bhuvanabhṛti bhūtabhāvane bhavacchidi bhave bhūyasī bhaktir abhūt // (100.1) Par.?
akṛtavṛṣabhadhvajapūjāvidhir na svapne 'py āhāram akarot // (101.1) Par.?
ajam ajaram amaragurum asurapuraripum aparimitagaṇapatim acaladuhitṛpatim akhilabhuvanakṛtacaraṇanatim paśupatiṃ prapanno 'nyadevatāśūnyam amanyata trailokyam // (102.1) Par.?
bhartṛcittānuvartinyaś cānujīvināṃ prakṛtayaḥ // (103.1) Par.?
tathā hi gṛhe gṛhe bhagavān apūjyata khaṇḍaparaśuḥ // (104.1) Par.?
vavur asya homālavālānalavilīyamānabahalaguggulugandhagarbhāḥ snapanakṣīraśīkarakṣodakṣāriṇo bilvapallavadāmadalodvāhinaḥ puṇyaviṣayeṣu vāyavaḥ // (105.1) Par.?
śivasaparyāsamucitair upāyanaiḥ prābhṛtaiś ca paurāḥ pādopajīvinaḥ sacivāḥ svabhujabalanirjitāś ca karadīkṛtā mahāsāmantās taṃ siṣevire // (106.1) Par.?
tathā hi kailāsakūṭadhavalaiḥ kanakapatralatālaṃkṛtaviṣāṇakoṭibhir mahāpramāṇaiḥ saṃdhyābalivṛṣaiḥ sauvarṇaiś ca snapanakalaśair arghabhājanaiś ca dhūpapātraiś ca puṣpapaṭṭaiś ca maṇiyaṣṭipradīpaiś ca brahmasūtraiś ca mahārhamāṇikyakhaṇḍakhacitaiś ca mukhakoṣaiḥ paritoṣam asya manasi cakruḥ // (107.1) Par.?
antaḥpurāṇy api svayamārabdhabāleyataṇḍulakaṇḍanāni devagṛhopalepanalohitatarakarakisalayāni kusumagrathanavyagrasamastaparijanāni tasyābhilaṣitam anvavartanta // (108.1) Par.?
tathā ca paramamāheśvaraḥ sa bhūpālo lokataḥ śuśrāva bhuvi bhagavantam aparam iva sākṣād dakṣamakhamathanaṃ dākṣiṇātyaṃ bahuvidhavidyāprabhāvaprakhyātair guṇaiḥ śiṣyair ivānekasahasrasaṃkhyair vyāptamartyalokaṃ bhairavācāryanāmānaṃ mahāśaivam // (109.1) Par.?
upanayanti hi hṛdayam adṛṣṭam api janaṃ śīlasaṃvādāḥ // (110.1) Par.?
yataḥ sa rājā śravaṇasamakālam eva tasmin bhairavācārye bhagavati dvitīya iva kapardini dūragate 'pi garīyasīṃ babandha bhaktim // (111.1) Par.?
ācakāṅkṣa ca manorathair apy asya sarvathā darśanam // (112.1) Par.?
atha kadācit paryaste 'stācalacumbini vāsare 'ntaḥpuravartinaṃ rājānam upasṛtya pratīhārī vijñāpitavatī deva dvāri parivrāḍ āste kathayati ca bhairavācāryavacanād devam anuprāpto 'smi iti // (113.1) Par.?
rājā tu tac chrutvā sādaraṃ kvāsau / (114.1) Par.?
ānayātraiva praveśayainam iti cābravīt // (114.2) Par.?
tathā cākarot pratīhārī // (115.1) Par.?
na cirāc ca praviśantaṃ prāṃśum ājānubhujam bhaikṣakṣāmam api sthūlāsthibhir avayavaiḥ pīvaram ivopalakṣyamāṇam pṛthūttamāṅgam uttuṅgavalibhaṅgasthapuṭalalāṭam nirmāṃsagaṇḍakūpakam madhubindupiṅgalaparimaṇḍalākṣam īṣadāvakraghoṇam atipralambaikakarṇapāśam alābubījavikaṭonnatadantapaṅktim turagānūkaślathādharalekham lambacibukāyatataralapanam aṃsāvalambinā kāṣāyeṇa yogapaṭṭakena viracitavaikakṣakam hṛdayamadhyanibaddhagranthinā ca rāgeṇeva khaṇḍaśaḥ kṛtena dhāturasāruṇena karpaṭena kṛtottarāsaṅgam // (116.1) Par.?
punaruktabālapragrahaveṣṭananiścalamūlena baddhamṛtpariśodhanavaṃśatvaktitaunā kaupīnasanāthaśikhareṇa kharjūrapuṭasamudgakagarbhīkṛtabhikṣākapālakena dāravaphalakatrayatrikoṇatriyaṣṭiniviṣṭakamaṇḍalunā bahirupapāditapādukāvasthānena sthūladaśāsūtraniyantritapustikāpūlakena vāmakaradhṛtena yogabhārakeṇādhyāsitaskandham itarakaragṛhītavetrāsanaṃ maskariṇam adrākṣīt // (117.1) Par.?
kṣitipatir apy upagatam ucitena cainam ādareṇānvagrahīt // (118.1) Par.?
āsīnaṃ ca papraccha kva bhairavācāryaḥ iti // (119.1) Par.?
sādaranarapativacanamuditamatis tu parivrāṭ tam upanagaraṃ sarasvatītaṭavanāvalambini śūnyāyatane sthitam ācacakṣe // (120.1) Par.?
bhūyaś cābabhāṣe arcayati hi mahābhāgaṃ bhagavān āśīrvacasā ity uktvā copaninye yogabhārakād ākṛṣya bhairavācāryaprahitāni ratnavanti bahalālokaliptāntaḥpurāṇi pañca rājatāni puṇḍarīkāṇi // (121.1) Par.?
narapatis tu priyajanapraṇayabhaṅgakātaro dākṣiṇyam anurudhyamāno grahaṇalāghavaṃ ca laṅghayitum asamartho dolāyamānena manasā sthitvā ciraṃ kathaṃ katham apy atisaujanyanighnas tāni jagrāha // (122.1) Par.?
jagāda ca sarvaphalaprasavahetuḥ śivabhaktir iyaṃ no manorathadurlabhāni phalati phalāni // (123.1) Par.?
yenaivam asmāsu prīyate bhagavān bhuvanagurur bhairavācāryaḥ // (124.1) Par.?
śvo draṣṭāsmi bhagavantam ity uktvā ca maskariṇaṃ vyasarjayat // (125.1) Par.?
anayā ca vārtayā parāṃ mudam avāpa // (126.1) Par.?
aparedyuś ca prātar evotthāya vājinam adhiruhya samucchritaśvetātapatraḥ samuddhūyamānadhavalacāmarayugalaḥ katipayair eva rājaputraiḥ parivṛto bhairavācāryaṃ savitāram iva śaśī draṣṭuṃ pratasthe // (127.1) Par.?
gatvā ca kiṃcid antaraṃ tadīyam evābhimukham āpatantam anyatamaṃ śiṣyam adrākṣīt // (128.1) Par.?
aprākṣīc ca kva bhagavān āste iti // (129.1) Par.?
so 'kathayad asya jīrṇamātṛgṛhasyottareṇa bilvavāṭikām adhyāste iti // (130.1) Par.?
gatvā ca taṃ pradeśam avatatāra turagāt // (131.1) Par.?
praviveśa ca bilvavāṭikām // (132.1) Par.?
atha mahataḥ kārpaṭikavṛndasya madhye prātar eva snātam dattāṣṭapuṣpikam anuṣṭhitāgnikāryam kṛtabhasmarekhāparihāraparikare haritagomayopaliptakṣititalavitate vyāghracarmaṇy upaviṣṭam kṛṣṇakambalaprāvaraṇanibhenāsuravivarapraveśāśaṅkayā pātālāndhakārāvāsam ivābhyasyantam unmiṣatā vidyutkapilenātmatejasā mahāmāṃsavikrayakrītena manaḥśilāpaṅkeneva śiṣyalokaṃ limpantam jaṭīkṛtaikadeśalambamānarudrākṣaśaṅkhaguṭikenordhvabaddhena śikhāpāśena badhnantam iva vidyāvalepadurvidagdhān upari saṃcarataḥ siddhān dhavalakatipayaśiroruheṇa vayasā pañcapañcāśataṃ varṣāṇy atikrāmantam khālityakṣīyamāṇaśaṅkhalomalekham lomaśakarṇaśaṣkulīpradeśam pṛthulalāṭataṭam tiraścyā bhasmalalāṭikayā bahuśaḥ śirordhadhṛtadagdhaguggulusaṃtāpasphuṭitakapālāsthipāṇḍurarājiśaṅkām iva janayantam sahajalalāṭavalibhaṅgasaṃkocitakūrcabhāgāṃ babhrubhāsaṃ bhrūsaṃgatyā nirantarām āyāminīm ekām iva bhrūlekhāṃ bibhrāṇam īṣatkācarakanīnikena raktāpāṅganirgatāṃśupratānena madhyadhavalabhāsīndrāyudhenevātidīrgheṇa locanayugalena parito mahāmaṇḍalam ivānekavarṇarāgam ālikhantam sitapītalohitapatākāvalīśabalam śivabalim iva dikṣu vikṣipantam tārkṣyatuṇḍakoṭikubjāgraghoṇam dūravidīrṇasṛkkasaṃkṣiptakapolam kiṃcid danturatayā sadāhṛdayasaṃnihitaharamaulicandrātapeneva nirgacchatā dantālokena dhavalayantaṃ diśāṃ jālam jihvāgrasthitasarvaśaivasaṃhitātibhāreṇeva manākpralambitauṣṭham pralambaśravaṇapālīpreṅkhitābhyāṃ sphāṭikakuṇḍalābhyāṃ śukrabṛhaspatibhyām iva surāsuravijayavidyāsiddhiśraddhayānubadhyamānam baddhavividhauṣadhimantrasūtrapaṅktinā salohavalayenaikaprakoṣṭhena śaṅkhakhaṇḍaṃ pūṣṇo dantam iva bhagavatā bhavena bhagnaṃ bhaktyā bhūṣaṇīkṛtaṃ kalayantam akhilarasakūpodañcanaghaṭīyantramālām iva rudrākṣamālāṃ dakṣiṇena pāṇinā bhramayantam urasi dolāyamānenāpiṅgalāgreṇa kūrcakalāpena saṃmārjayantam ivāntargataṃ nijarajonikaram atinibiḍanīlalomamaṇḍalavicitaṃ ca dhyānalabdhena jyotiṣā dagdham iva hṛdayadeśe dadhānam īṣatpraśithilavalivalayabadhyamānatundam upacīyamānasphiṅmāṃsapiṇḍakam pāṇḍurapavitrakṣaumāvṛtakaupīnam sāvaṣṭambhaparyaṅkabandhamaṇḍalitenāmṛtaphenaśvetarucā yogapaṭṭakena vāsukinevāpratihatānekamantraprabhāvāvirbhūtena pradakṣiṇīkriyamāṇam aruṇatāmarasasukumārataratalasya pādayugalasya nirmalair nakhamayūkhajālakair jarjarayantam iva mahānidhānoddharaṇarasena rasātalam toyakṣālitaśucinā dhautapādukāyugalena haṃsamithuneneva bhāgīrathītīrthayātrāparicayāgatenāmucyamānacaraṇāntikam śikharanikhātakubjakālāyasakaṇṭakena vaiṇavena viśākhikādaṇḍena sarvavidyāsiddhivighnavināyakāpanayanāṅkuśeneva satatapārśvavartinā virājamānam abahubhāṣiṇaṃ mandahāsinaṃ sarvopakāriṇaṃ kumārabrahmacāriṇam atitapasvinam mahāmanasvinaṃ kṛśakrodham akṛśānurodham mahānagaram ivādīnaprakṛtiśobhitam merum iva kalpatarupallavarāśisukumāracchāyam kailāsam iva paśupaticaraṇarajaḥpavitritaśirasam śivalokam iva māheśvaragaṇānuyātam jalanidhim ivānekanadanadīsahasraprakṣālitaśarīram jāhnavīpravāham iva bahupuṇyatīrthasthānaśucim dhāma dharmasya tīrthaṃ tathyasya kośaṃ kuśalasya pattanaṃ pūtatāyāḥ śālāṃ śīlasya kṣetraṃ kṣamāyāḥ śāleyaṃ śālīnatāyāḥ sthānaṃ sthiteḥ ādhāraṃ dhṛteḥ ākaraṃ karuṇāyāḥ niketanaṃ kautukasya ārāmaṃ rāmaṇīyakasya prāsādaṃ prasādasya agāraṃ gauravasya samājaṃ saujanyasya saṃbhavaṃ sadbhāvasya kālaṃ kaleḥ bhagavantaṃ sākṣād iva virūpākṣaṃ bhairavācāryaṃ dadarśa // (133) Par.?
bhairavācāryas tu dūrād eva rājānaṃ dṛṣṭvā śaśinam iva jalanidhiś cacāla // (134.1) Par.?
prathamatarotthitaśiṣyalokaś cotthāya pratyujjagāma // (135.1) Par.?
samarpitaśrīphalopāyanaś ca jahnukarṇasamudgīryamāṇagaṅgāpravāhahrādagambhīrayā girā svastiśabdam akarot // (136.1) Par.?
narapatir api prītivistāryamāṇadhavalimnā cakṣuṣā pratyarpayann iva bahutarāṇi puṇḍarīkavanāni lalāṭapaṭṭaparyastena codaṃśunā śikhāmaṇinā maheśvaraprasādam iva tṛtīyanayanodgamena prakāśayann āvarjitakarṇapallavapalāyamānamadhukaraḥ śivasevāsamunmūlitāśeṣapāpalavamucyamāna iva dūrād avanataḥ praṇāmam abhinavaṃ cakāra // (137.1) Par.?
ācāryo 'pi āgaccha // (138.1) Par.?
atropaviśa iti śārdūlacarmātmīyam adarśayat // (139.1) Par.?
upadarśitapraśrayas tu rājā mattahaṃsakalagadgadasvarasubhagāṃ madhurasamayīṃ mahānadīm iva pravartayan vācaṃ vyājahāra bhagavan nārhasi mām anyanṛpaskhalitaiḥ khalīkartum // (140.1) Par.?
aśeṣarājakopekṣitāyā hatalakṣmyāḥ khalv ayaṃ śīlāparādho draviṇadaurātmyaṃ vā yad evam ācarati mayi guruḥ // (141.1) Par.?
abhūmir ayam upacārāṇām // (142.1) Par.?
alam atiyantraṇayā // (143.1) Par.?
dūrasthito 'pi manorathaśiṣyo 'yaṃ jano bhavatām // (144.1) Par.?
mānanīyaṃ ca guruvan nollaṅghanam arhati guror āsanam // (145.1) Par.?
āsatāṃ ca bhavanta evātra iti vyāhṛtya parijanopanīte vāsasi niṣasāda // (146.1) Par.?
bhairavācāryo 'pi prītyānatikramaṇīyaṃ nṛpavacanam anuvartamānaḥ pūrvavat tad eva vyāghrājinam abhajata // (147.1) Par.?
āsīne ca sarājake parijane śiṣyajane ca samucitam arghyādikaṃ cakre // (148.1) Par.?
krameṇa ca nṛpamādhuryahṛtāntaḥkaraṇaḥ śaśikaranikaravimalā daśanadīdhitīḥ sphurantīḥ śivabhaktīr iva sākṣād darśayann uvāca tāta atinamrataiva te kathayati guṇānāṃ gauravam // (149.1) Par.?
sakalasaṃpatpātram asi // (150.1) Par.?
vibhavānurūpās tu pratipattayaḥ // (151.1) Par.?
janmanaḥ prabhṛty adattadṛṣṭir evāsmi svāpateyeṣu // (152.1) Par.?
yataḥ sakaladoṣakalāpānalendhanair dhanair avikrītaṃ kvacic charīrakam asti // (153.1) Par.?
bhaikṣarakṣitāḥ santi prāṇāḥ // (154.1) Par.?
durgṛhītāni katicid vidyante vidyākṣarāṇi // (155.1) Par.?
bhagavacchivabhaṭṭārakapādasevayā samupārjitāḥ kiyatyo 'pi saṃnihitāḥ puṇyakaṇikāḥ // (156.1) Par.?
svīkriyatāṃ yad atropayogārham // (157.1) Par.?
pratanuguṇagrāhyāṇi kusumānīva hi bhavanti satāṃ manāṃsi // (158.1) Par.?
api ca vidvatsaṃmatāḥ śrūyamāṇā api sādhavaḥ śabdā iva sudhīre 'pi hi manasi yaśāṃsi kurvanti // (159.1) Par.?
vivaraṃ viśataḥ kutūhalasya phenadhavalaiḥ srotobhir ivāpahriyamāṇo guṇagaṇair ānīto 'smi kalyāṇinā iti // (160.1) Par.?
rājā tu taṃ pratyavādīd bhagavan anurakteṣv api śarīrādiṣu sādhūnāṃ svāmina eva praṇayinaḥ // (161.1) Par.?
yuṣmaddarśanād upārjitam eva cāparimitaṃ kuśalajātam // (162.1) Par.?
anenaivāgamanena spṛhaṇīyaṃ padam āropito 'smi guruṇā iti vividhābhiś ca kathābhiś ciraṃ sthitvā gṛham agāt // (163.1) Par.?
anyasmin divase bhairavācāryo 'pi rājānaṃ draṣṭuṃ yayau // (164.1) Par.?
tasmai ca rājā sāntaḥpuraṃ saparijanaṃ sakoṣam ātmānaṃ niveditavān // (165.1) Par.?
sa ca vihasyovāca tāta kva vibhavaḥ kva ca vayaṃ vanavardhitāḥ // (166) Par.?
dhanoṣmaṇā mlāyaty alaṃ lateva manasvitā // (167) Par.?
khadyotānām ivāsmākam iyam aparopatāpinī rājate tejasvitā // (168.1) Par.?
bhavādṛśā eva bhājanaṃ bhūter iti sthitvā ca kaṃcit kālaṃ jagāma // (169.1) Par.?
parivrāṭ tenaiva krameṇa pañca pañca rājatāni puṇḍarīkāṇy upāyanīcakāra // (170.1) Par.?
ekadā tu śvetakarpaṭāvṛtaṃ kim apy ādāya prāviśat // (171.1) Par.?
upaviśya ca pūrvavat sthitvā muhūrtam abravīn mahābhāga bhavantam āha bhagavān yathāsmacchiṣyaḥ pātālasvāmināmā brāhmaṇaḥ // (172.1) Par.?
tena brahmarākṣasahastād apahṛto mahāsir aṭṭahāsanāmā // (173.1) Par.?
so 'yaṃ bhavadbhujayogyo gṛhyatām ity abhidhāyāpahṛtakarpaṭāvacchādanāt parivārād ācakarṣa śaradgaganatalam iva piṇḍatāṃ nītam kālindīpravāham iva stambhitajalam nandakajigīṣayā kṛṣṇakopitaṃ kāliyam iva kṛpāṇatāṃ gatam lokavināśāya prakāśitadhārāsāraṃ pralayakālameghakhaṇḍam iva nabhastalāt patitam dṛśyamānavikaṭadantamaṇḍalaṃ hāsam iva hiṃsāyāḥ haribāhudaṇḍam iva kṛtadṛḍhamuṣṭigraham sakalabhuvanajīvitāpaharaṇakṣameṇa kālakūṭeneva nirmitam kṛtāntakopānalataptenevāyasā ghaṭitam atitīkṣṇatayā pavanasparśenāpi ruṣeva kvaṇantam maṇisabhākuṭṭimapatatpratibimbacchadmanātmānam api dvidheva pāṭayantam ariśiraśchedalagnaiḥ kacair iva kiraṇaiḥ karālitadhāram muhurmuhus taḍidunmeṣataralaiḥ prabhācakracchuritair jarjaritātapam khaṇḍaśaś chindantam iva divasam kaṭākṣam iva kālarātreḥ karṇotpalam iva kālasya oṃkāram iva krauryasya alaṃkāram ahaṃkārasya kulamitraṃ kopasya dehaṃ darpasya susahāyaṃ sāhasasya apatyaṃ mṛtyoḥ āgamanamārgaṃ lakṣmyāḥ nirgamanamārgaṃ kīrteḥ kṛpāṇam // (174.1) Par.?
avanipatis tu taṃ gṛhītvā kareṇāyudhaprītyā pratimānibhenāliṅgann iva suciraṃ dadarśa // (175.1) Par.?
saṃdideśa ca vaktavyo bhagavān paradravyagrahaṇāvajñādurvidagdham api hi me mano yuṣmadviṣaye na śaknoti vacanavyatikramavyabhicāram ācaritum iti // (176.1) Par.?
parivrāṭ tu gṛhīte tasmin parituṣṭaḥ svasti bhavate // (177.1) Par.?
sādhayāmaḥ ity uktvā nirayāsīt // (178.1) Par.?
nṛpaś ca prakṛtyā vīrarasānurāgī tena kṛpāṇenāmanyata karatalavartinīṃ medinīm // (179.1) Par.?
atha vrajatsu divaseṣv ekadā bhairavācāryo rājānam upahvare sopagraham avādīt tāta svārthālasāḥ paropakāradakṣāś ca prakṛtayo bhavanti bhavyānām // (180.1) Par.?
bhavādṛśāṃ cārthidarśanaṃ mahotsavaḥ praṇayanam ārādhanam arthagrahaṇam upakāraḥ // (181.1) Par.?
bhūmir asi sarvalokamanorathānām // (182.1) Par.?
yenābhidhīyase // (183.1) Par.?
śrūyatām // (184.1) Par.?
bhagavato mahākālahṛdayanāmno mahāmantrasya kṛṣṇasragambarānulepanenākalpena kalpakathitena mahāśmaśāne japakoṭyā kṛtapūrvasevo 'smi // (185.1) Par.?
tasya ca vetālasādhanāvasānā siddhiḥ // (186.1) Par.?
asahāyaiś ca sā duravāpā // (187.1) Par.?
tvaṃ cālam asmai karmaṇe // (188.1) Par.?
tvayi ca gṛhītabhare bhaviṣyanty apare sahāyās trayaḥ ekaḥ sa evāsmākaṃ ṭīṭibhanāmā bālamitraṃ maskarī yo bhavantam upatiṣṭhate // (189.1) Par.?
dvitīyaḥ sa pātālasvāmī // (190.1) Par.?
aparo macchiṣya eva karṇatālanāmā drāviḍaḥ // (191.1) Par.?
yadi sādhu manyase tato nīyatām ayaṃ diṅnāgahastadīrgho gṛhītāṭṭahāso niśām ekām ekadiṅmukhārgalatāṃ bāhur iti kṛtavacasi ca tasminn andhakārapraviṣṭa iva dṛṣṭaprakāśaḥ prāptopakārāvakāśaḥ pramuditenāntarātmanā narendraḥ samabhāṣata bhagavan param anugṛhīto 'smy anena śiṣyajanasāmānyena nideśena kṛtaparigraham ivātmānam evaimi iti // (192.1) Par.?
nananda ca tena narendravyāhṛtena bhairavācāryaḥ // (193.1) Par.?
cakāra ca saṃketam asyām evāgāminyām asitapakṣacaturdaśīkṣapāyām iyatyāṃ velāyām amuṣmin mahāśmaśānasamīpabhāji śūnyāyatane śastradvitīyenāyuṣmatā draṣṭavyā vayam iti // (194.1) Par.?
athātikrānteṣv ahaḥsu prāptāyāṃ ca tasyām eva kṛṣṇacaturdaśyāṃ śaivena vidhinā dīkṣitaḥ kṣitipo niyamavān abhūt // (195.1) Par.?
kṛtādhivāsaṃ ca sampāditagandhadhūpamālyādipūjaṃ khaḍgam aṭṭahāsam akarot // (196.1) Par.?
tataḥ pariṇate divase kenāpi karmasādhanāya kṛtarudhirabalividhānāsv iva lohitāyamānāsu dikṣu rudhirabalilampaṭāsu ca vetālajihvāsv iva lambamānāsu ca ravidīdhitiṣu narendrānurāgeṇa gṛhītāparadiśi svayam iva dikpālatāṃ cikīrṣati savitari yātudhānīṣv iva vardhamānāsu tarucchāyāsu pātālatalavāsiṣu vighnāya dānaveṣv ivottiṣṭhatsu tamomaṇḍaleṣu nabhasi puñjībhavati raudraṃ karma didṛkṣamāṇa iva nakṣatragaṇe vigāḍhāyāṃ śarvaryām suptajananiḥśabdastimite niśīthe rājā sāntaḥpuraṃ parijanaṃ vañcayitvā vāmakarasphuratsarur dakṣiṇakareṇotkhātaṃ khaḍgam aṭṭahāsam ādāya visarpatā ca khaḍgaprabhāpaṭalena nīlāṃśukapaṭeneva darśanabhayād avaguṇṭhitanikhilagātrayaṣṭir anādiṣṭayāpy anugamyamāno rājalakṣmyā pṛṣṭhataḥ parimalalagnamadhukaraveṇivyājena keśeṣv iva karmasiddhim ākarṣann ekākī nagarān niragāt // (197.1) Par.?
agāc ca tam uddeśam // (198.1) Par.?
atha pratyupajagmus te trayo 'pi drauṇikṛpakṛtavarmāṇa iva sauptike saṃnaddhāḥ snātāḥ sragviṇo gṛhītavikaṭaveṣāḥ kusumaśekharasaṃcāribhiḥ kriyamāṇamantraśikhābandhā iva guñjadbhiḥ ṣaṭcaraṇair uṣṇīṣapaṭṭakāṃl lalāṭamadhyaghaṭitavikaṭasvastikāgranthīn mahāmudrābandhān iva dhārayanto mūrdhabhiḥ ekaśravaṇavivaravitatavimaladantapatraprabhālokalepadhavalitakapolair mukhair āpibanta iva niśācarāpacayacikīrṣayā śārvaram andhakāram itarakarṇāvalambināṃ ratnakuṇḍalānām acchācchayā rucā gorocanayeva mantraparijaptayā samālabdhāḥ svapratibimbagarbhān karmasiddhaye dattapuruṣopahārān ivollāsayanto niśitān nistriṃśān nistriṃśāṃśusaṃtānasīmantitatimirām ātmīyātmīyadigvibhāgasaṃrakṣaṇāya tridheva triyāmāṃ pāṭayantaḥ sārdhacandraiḥ kaladhautabudbudāvalitaralatārāgaṇair niśāyā iva paruṣāsidhārānikṛttaiḥ khaṇḍair gṛhītaiś carmaphalakair akāṇḍaśarvarīm aparāṃ ghaṭayantaḥ kāñcanaśṛṅkhalākalāpaniyamitanibiḍaniṣpravāṇayaḥ baddhāsidhenavaḥ ṭīṭibhakarṇatālapātālasvāmino niveditavantaścātmānam // (199.1) Par.?
avanipatis tu ko 'tra kaḥ iti trīn apṛcchat // (200.1) Par.?
ācacakṣire ca svaṃ svaṃ nāma trayo 'pi te // (201.1) Par.?
tair eva cānugamyamāno jagāma tāṃ balidīpālokajarjaritagugguludhūpadhūmagṛhyamāṇadigvibhāgatayā vikṣipyamāṇarakṣāsarṣapārdhadagdhāndhakārapalāyamānaniśām iva samupakalpitasarvopakaraṇāṃ niḥśabdāṃ ca gambhīrāṃ ca bhīṣaṇāṃ ca sādhanabhūmim // (202.1) Par.?
tasyāṃ ca kumudadhūlidhavalena bhasmanā likhitasya mahato maṇḍalasya madhye sthitaṃ dīptataratejaḥprasaram pṛthupariveṣaparikṣiptam iva śaratsavitāram mathyamānakṣīrodāvartavartinam iva mandaram raktacandanānulepino raktasragambarābharaṇasyottānaśayasya śavasyorasy upaviśya jātajātavedasi mukhakuhare prārabdhāgnikāryam kṛṣṇoṣṇīṣam kṛṣṇāṅgarāgam kṛṣṇapratisaram kṛṣṇavāsasam kṛṣṇatilāhutinibhena vidyādharatvatṛṣṇayā mānuṣanirmāṇakāraṇakāluṣyaparamāṇūn iva kṣayam upanayantam āhutidānaparyastābhiḥ pretamukhasparśadūṣitaṃ prakṣālayantam ivāśuśukṣaṇiṃ karanakhadīdhitibhiḥ dhūmālohitena cakṣuṣā kṣatajāhutim iva hutabhuji pātayantam īṣadvivṛtādharapuṭaprakaṭitasitadaśanaśikhareṇa dṛśyamānamūrtamantrākṣarapaṅktineva mukhena kim api japantam homaśramasvedasalilapratibimbitābhir āsannadīpikābhir dahantam iva karmasiddhaye sarvāvayavān aṃsāvalambinā bahuguṇena vidyārājeneva brahmasūtreṇa parigṛhītaṃ bhairavācāryam apaśyat // (203.1) Par.?
upasṛtya cākaron namaskāram // (204.1) Par.?
abhinanditaś ca tena svavyāpāram anvatiṣṭhat // (205.1) Par.?
atrāntare pātālasvāmī śātakratavīm āśām aṅgīcakāra karṇatālaḥ kauberīṃ parivrāṭ prācetasīm // (206.1) Par.?
rājā tu traiśaṅkavena jyotiṣāṅkitāṃ kakubham alaṃkṛtavān // (207.1) Par.?
evaṃ cāvasthiteṣu dikpāleṣu dikpālabhujapañjarapraviṣṭe visrabdhaṃ karma sādhayati bhairavaṃ bhairavācārye 'ticiraṃ ca kṛtakolāhaleṣu niṣphalaprayatneṣu pratyūhakāriṣu śānteṣu kauṇapeṣu galaty ardharātrasamaye maṇḍalasya nātidavīyasy uttareṇākasmād eva pralayamahāvarāhadaṃṣṭrāvivaram iva darśayantī kṣitir adīryata // (208.1) Par.?
sahasaiva ca tasmād vivarād āśāvāraṇotkṣipta ivālānalohastambhaḥ mahāvarāhapīvaraskandhapīṭho narakāsura iva bhuvo garbhād udbhūto balidānava iva bhittvotthitaḥ pātālam indranīlaprāsāda ivoparijvalitaratnapradīpaḥ snigdhanīlaghananibiḍakuṭilakuntalakāntamaulir unmīlan mālatīmuṇḍamālaḥ gadgadatayā svarasya svabhāvapāṭalatayā ca cakṣuṣaḥ kṣība iva yauvanamadena valgadgaladāmakaḥ karasaṃpuṭamṛditayā mṛdā diṅnāgakumbhābhāv aṃsakūṭau punaḥ punaḥ paṅkayan sāndracandanakardamadattair avyavasthāsthāsakair atisitajaladharaśakalaśārita iva śāradākāśaikadeśaḥ ketakīgarbhapatrapāṇḍurasya caṇḍātakasyopari kṣāmatarīkṛtakukṣiḥ kakṣyābandhaṃ vidhāya vilāsavikṣiptena dhavalavyāyāmaphālīpaṭāntena dharaṇitalagatena dhāryamāṇa iva pṛṣṭhataḥ śeṣeṇa sthirasthūloccadaṇḍaḥ bhūmibhaṅgabhayeneva mantharāṇi sthāpayan padāni nirbharagarvaguru katham api śailam iva gātram udvahan darpeṇa muhurmuhur urasi dviguṇite doṣṇi vāme tiryagutkṣipte ca dakṣiṇe jaṅghākāṇḍe kuṇḍalite ca caṇḍasphoṭanaṭāṃkāraiḥ karmavighnanirghātān iva pātayann ekendriyavikalam iva jīvalokaṃ kurvan kuvalayaśyāmalaḥ puruṣa ujjagāma // (209.1) Par.?
jagāda ca vihasya narasiṃhanādanirghoṣaghorayā bhāratyā bho vidyādharīśraddhākāmuka kim ayaṃ vidyāvalepaḥ sahāyamado vā yad asmai janāyāvidhāya baliṃ bāliśa iva siddhim abhilaṣasi / (210.1) Par.?
kā te durbuddhir iyam / (210.2) Par.?
etāvatā kālena kṣetrādhipatir asya mannāmnaiva labdhavyapadeśasya deśasya nāgatas te śrotropakaṇṭhaṃ śrīkaṇṭhanāmā nāgo 'ham / (210.3) Par.?
anicchati mayi kā śaktir grahagaṇasyāpi gantuṃ gagane // (210.4) Par.?
bhūnātho 'py ayam anāthas tapasvī yas tvādṛśaiḥ śaivāpasadair upakaraṇīkriyate // (211.1) Par.?
sahasvedānīṃ sahāmunā durnarendreṇa durnayasya phalam ity abhidhāya ca niṣṭhuraiḥ prakoṣṭhaprahārais trīn api ṭīṭibhaprabhṛtīn abhimukhaṃ pradhāvitān saśarīrāvaraṇakṛpāṇān apātayat // (212.1) Par.?
athāpūrvādhikṣepaśravaṇād aśastravraṇair apy amarṣasvedacchalenānekasamarapītam asidhārājalam iva vamadbhir avayavair api romāñcanibhena muktaśaraśataśalyanikarabharalaghum ivātmānaṃ raṇāya kurvadbhir aṭṭahāsenāpi pratibimbitatārāgaṇena spaṣṭadṛṣṭadhavaladantamālam avajñayā hasateva kathyamānasattvāvaṣṭambhaḥ parikarabandhavibhramabhramitakaranakhakiraṇacakravālena vyapagamanāśaṅkayā nāgadamanamantramaṇḍalabandheneva rundhan daśa diśo naranāthaḥ sāvajñam avādīd are kākodara kāka mayi sthite rājahaṃse na jihreṣi baliṃ yācitum amībhiḥ kiṃ vā paruṣabhāṣitaiḥ bhuje vīryaṃ nivasati na vāci // (213.1) Par.?
pratipadyasva śastram // (214.1) Par.?
ayaṃ na bhavasi // (215.1) Par.?
agṛhītahetiṣv aśikṣito me bhujaḥ prahartum iti // (216.1) Par.?
nāgas tv anādṛtataram ehi kiṃ śastreṇa bhujābhyām eva bhanajmi bhavato darpam ity abhidhāyāsphoṭayāmāsa // (217.1) Par.?
narapatir api nirāyudham āyudhena yudhi lajjamāno jetum utsṛjya sacarmaphalakam aṭṭahāsam asim ardhorukasyopari babandha bāhuyuddhāya kakṣyām // (218.1) Par.?
yuyudhāte ca nirdayāsphoṭanasphuṭitabhujarudhiraśīkarasicyamānau śilāstambhair iva patadbhir bāhudaṇḍaiḥ śabdamayam iva kurvāṇau bhuvanaṃ tau // (219.1) Par.?
na cirāc ca pātayāmāsa bhūtale bhujaṅgamaṃ bhūpatiḥ // (220.1) Par.?
jagrāha ca keśeṣu // (221.1) Par.?
uccakhāna ca śiraś chettum aṭṭahāsam // (222.1) Par.?
apaśyac ca vaikakṣakamālāntareṇāsya yajñopavītam // (223.1) Par.?
upasaṃhṛtaśastravyāpāraś cāvādīt durvinīta asti te durnayanirvāhabījam idam // (224.1) Par.?
yato viśrabdham evācarasi cāpalāni ity uktvotsasarja ca tam // (225.1) Par.?
anantaraṃ ca sahasaivātibahalāṃ jyotsnāṃ dadarśa // (226.1) Par.?
śaradi vikasatāṃ kamalavanānām iva ca ghrāṇāvalepinam āmodam ajighrat // (227.1) Par.?
jhaṭiti ca nūpuraśabdam aśṛṇot // (228.1) Par.?
vyāpārayāmāsa ca śabdānusāreṇa dṛṣṭim // (229.1) Par.?
atha karatalasthitasyāṭṭahāsasya madhye taḍitam iva nīlajaladharodare sphurantīṃ prabhayā pibantīm iva triyāmām tāmarasahastām komalāṅgulirāgarājijālakāni ca caraṇalagnāni velābālavidrumalatāvanānīvākarṣantīm karapaṅkajasaṃkocāśaṅkayā śaśāṅkamaṇḍalam iva khaṇḍaśaḥ kṛtaṃ nirmalacaraṇanakhanivahanibhena bibhratīm gulphāvalambinūpurapuṭatayā sthitanibiḍakaṭakāvalibandhanād iva paribhraśyāgatām bahuvidhakusumaśakuniśataśobhitāt pavanacalitatanutaraṅgād atisvacchād aṃśukād udadhisalilād ivottarantīm udadhijanmapremṇā trivalicchalena tripathagayeva pariṣvaktamadhyām atyunnatastanamaṇḍalām dṛśyamānadiṅnāgakumbhām iva kakubham madalagnair āvatakaraśīkaranikaram iva śarattārāgaṇatāraṃ hāram urasā dadhānām dhavalacāmarair iva ca mandamandaniḥśvāsadolāyitair hārakiraṇair upavījyamānām svabhāvalohitena madāndhagandhebhakumbhāsphālanasaṃkrāntasindūreṇeva karadvayena dyotamānām haraśikhaṇḍendudvitīyakhaṇḍeneva kuṇḍalīkṛtena jyotsnāmucā dantapatreṇa vibhrājamānām kaustubhagabhastistabakeneva ca śravaṇalagnenāśokakisalayenālaṃkṛtām mahatā mattamātaṅgamadamayena tilakenādṛśyacchatracchāyāmaṇḍalenevāvirahitalalāṭām ā pādatalād ā sīmantāc ca candrātapadhavalena candanenādirājayaśaseva dhavalīkṛtām dharaṇitalacumbinībhiḥ kaṇṭhakusumamālābhiḥ saridbhir iva sāgarādhiṣṭhātrībhir adhiṣṭhitām mṛṇālakomalair avayavaiḥ kamalasaṃbhavatvam anakṣaram ācakṣāṇāṃ striyam apaśyat // (230.1) Par.?
asaṃbhrāntaś ca papraccha bhadre kāsi kimarthaṃ vā darśanapatham āgatāsi iti // (231.1) Par.?
sā tu strījanaviruddhenāvaṣṭambhenābhibhavantīvābhāṣata tam vīra viddhi māṃ nārāyaṇoraḥsthalīlīlāvihārahariṇīm pṛthubharatabhagīrathādirājavaṃśapatākām subhaṭabhujajayastambhavilāsaśālabhañjikām raṇarudhirataraṅgiṇītaraṅgakrīḍādohadadurlalitarājahaṃsīm sitanṛpacchatraṣaṇḍaśikhaṇḍinīm atiniśitaśastradhārāvanabhramaṇavibhramasiṃhīm asidhārājalakamalinīṃ śriyam // (232.1) Par.?
apahṛtāsmi tavāmunā śauryarasena // (233.1) Par.?
yācasva // (234.1) Par.?
dadāmi te varam abhilaṣitam iti // (235.1) Par.?
vīrāṇāṃ tv apunaruktāḥ paropakārāḥ // (236.1) Par.?
yato rājā tāṃ praṇamya svārthavimukho bhairavācāryasya siddhiṃ yayāce // (237.1) Par.?
lakṣmīs tu devī prītatarahṛdayā vistīryamāṇena cakṣuṣā kṣīrodenevopari paryastenābhiṣiñcantī bhūpālam evam astu ity abravīt // (238.1) Par.?
avādīc ca punaḥ anena sattvotkarṣeṇa bhagavacchivabhaṭṭārakabhaktyā cāsādhāraṇayā bhavān bhuvi sūryācandramasos tṛtīya ivāvicchinnasya pratidinam upacīyamānavṛddheḥ śucisubhagasatyatyāgaśauryaśauṇḍapuruṣaprakāṇḍaprāyasya mahato rājavaṃśasya kartā bhaviṣyati // (239.1) Par.?
yasminn utpatsyate sarvadvīpānāṃ bhoktā hariścandra iva harṣanāmā cakravartī tribhuvanavijigīṣur dvitīyo māndhāteva yasyāyaṃ karaḥ svayam eva kamalam apahāya grahīṣyati cāmaram iti vacaso 'nte tirobabhūva // (240.1) Par.?
bhūmipālas tu tad ākarṇya hṛdayenātimātram aprīyata // (241.1) Par.?
bhairavācāryo 'pi tasyā devyās tena vacasā karmaṇā ca samyagupapāditena sadya eva kuntalī kirīṭī kuṇḍalī hārī keyūrī mekhalī mudgarī khaḍgī ca bhūtvāvāpa vidyādharatvam // (242.1) Par.?
provāca ca rājan adūravyāpinaḥ phalgucetasām alasānāṃ manorathāḥ // (243.1) Par.?
satāṃ tu bhuvi vistāravatyaḥ svabhāvenaivopakṛtayaḥ // (244.1) Par.?
svapne 'py asaṃbhāvitāṃ dātum imāṃ dakṣiṇāṃ kṣamaḥ ko 'nyo bhavantam apahāya // (245.1) Par.?
saṃpatkaṇikām api prāpya tuleva laghuprakṛtir unnatim āyāti // (246.1) Par.?
tvadīyair guṇair upakaraṇīkṛtasya tvatta eva ca labdhātmalābhasya nirlajjateyam asya mūḍhahṛdayasya // (247.1) Par.?
tad icchāmi yena kenacit kāryalavopapādanopayogena smarayitum ātmānam iti // (248.1) Par.?
pratyupakāraduṣpraveśās tu bhavanti dhīrāṇāṃ hṛdayāvaṣṭambhāḥ // (249.1) Par.?
yatas taṃ rājā bhavatsiddhyaiva parisamāptakṛtyo 'smi // (250.1) Par.?
sādhayatu mānyo yathāsamīhitaṃ sthānam iti pratyācacakṣe // (251.1) Par.?
tathoktaś ca bhūbhujā jigamiṣuḥ sudṛḍhaṃ samāliṅgya ṭīṭibhādīn kuvalayavanenevāvaśyāyaśīkarasrāviṇā sāsreṇa cakṣuṣā vīkṣamāṇaḥ kṣitipatiṃ punaruvāca tāta bravīmi yāmīti na snehasadṛśam // (252.1) Par.?
tvadīyāḥ prāṇā iti punaruktam // (253.1) Par.?
gṛhyatām idaṃ śarīrakam iti vyatirekeṇārthakaraṇam // (254.1) Par.?
tilaśaḥ krītā vayam iti nopakārānurūpam // (255.1) Par.?
bāndhavo 'sīti dūrīkaraṇam iva // (256.1) Par.?
tvayi sthitaṃ hṛdayam ity apratyakṣam // (257.1) Par.?
tvadvirahakāriṇī kāraṇeyaṃ na siddhir ity aśraddheyam // (258.1) Par.?
niṣkāraṇas tavopakāra ity anuvādaḥ // (259.1) Par.?
smartavyā vayam ity ājñā // (260.1) Par.?
sarvathā kṛtaghnālāpeṣv asajjanakathāsu ca cetasi kartavyo 'yaṃ svārthaniṣṭhuro janaḥ ity abhidhāya vegachinnahārocchalitamuktāphalanikaratāḍitatārāgaṇaṃ gaganatalamutpapāta // (261.1) Par.?
yayau ca sīmantitagrahagrāmaḥ siddhyucitaṃ dhāma // (262.1) Par.?
śrīkaṇṭho 'pi rājan parākramakrītaḥ kartavyeṣu niyogenānugrāhyo grāhitavinayo 'yaṃ janaḥ ity abhidhāya rājānumoditas tad eva bhūyo bhūvivaraṃ viveśa // (263.1) Par.?
narapatis tu kṣīṇabhūyiṣṭhāyāṃ kṣapāyāṃ pravātum ārabdhe prabudhyamānakamalinīniḥśvāsasurabhau vanadevatākucāṃśukāpaharaṇaparihāsasvedinīva sāvaśyāyaśīkare parimalākṛṣṭamadhukṛti kumudanidrāvāhini niśāpariṇatijaḍe tuṣāraleśini vanānile virahavidhuracakravākacakraniḥśvasitasaṃtāpitāyām ivāparajalanidhim avatarantyāṃ triyāmāyāṃ sākṣādāgatalakṣmīvilokanakutūhalinīṣv iva samunmīlantīṣu nalinīṣu unnidrapakṣiṇi kṣarati kusumavisaram iva tuhinakaṇanikaraṃ mṛdupavanalāsitalate kānane kamalalakṣmīprabodhamaṅgalaśaṅkheṣv iva rasatsv antarbaddhadhvananmadhukareṣu mukulāyamāneṣu kumudeṣu ujjihānaravirathavājivisṛṣṭaiḥ prothapaṭupavanaiḥ protsāryamāṇāsv iva vāruṇyāṃ kakubhi puñjībhavantīṣu śyāmālatākalikāsu tārakāsu mandaraśikharāśrayiṇi mandānilalulitakalpalatāvanakusumadhūlivicchurita iva dhūsarībhavati saptarṣimaṇḍale suravāraṇāṅkuśa iva cyute galati tārāmaye mṛge trīn api ṭīṭibhādīn gṛhītvā nāgayuddhavyatikaramalīmasāni śucini vanavāpīpayasi prakṣālyāṅgāni nagaraṃ viveśa // (264.1) Par.?
anyasminn ahani teṣām ātmaśarīrānantarasnānabhojanācchādanādinā prītim akarot // (265.1) Par.?
katipayadivasāpagame ca parivrāḍ bhūbhujā vāryamāṇo 'pi vanaṃ yayau // (266.1) Par.?
pātālasvāmikarṇatālau tu śauryānuraktau tam eva siṣevāte // (267.1) Par.?
sampāditamanorathātiriktavibhavau ca subhaṭamaṇḍalamadhye niṣkṛṣṭamaṇḍalāgrau samaramukheṣu prathamam upayujyamānau kathāntareṣu cāntarāntarā samādiṣṭau vicitrāṇi bhairavācāryacaritāni śaiśavavṛttāntāṃś ca kathayantau tenaiva sārdhaṃ jarām ājagmatur iti // (268.1) Par.?
Duration=1.258232831955 secs.