Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17496

Click on a sentence to show its analysis
Keep the mouse pointer over a lemma to show its meanings.

yogaṃ svapne 'pi necchanti kurvate na karagraham / (1.1) Par.?

mahanto nāmamātreṇa bhavanti patayo bhuvaḥ // (1.2) Par.?

sakalamahībhṛtkampakṛd utpadyata eka eva nṛpavaṃśe / (2.1) Par.?

vipule 'pi pṛthupratimo danta iva gaṇādhipasya mukhe // (2.2) Par.?

atha tasmāt puṣpabhūter dvijavarasvecchāgṛhītakoṣo nābhipadma iva puṇḍarīkekṣaṇāt lakṣmīpuraḥsaro ratnasaṃcaya iva ratnākarāt gurubudhakavikalābhṛttejasvibhūnandanaprāyo grahagaṇa ivodayasthānāt mahābhāravāhanayogyaḥ sāgara iva sagaraprabhāvāt durjayabalasanātho harivaṃśa iva śūrān nirjagāma rājavaṃśaḥ // (3.1) Par.?

yasmād avinaṣṭadharmadhavalāḥ prajāsargā iva kṛtamukhāt pratāpākrāntabhuvanāḥ kiraṇā iva tejonidheḥ vigrahavyāptidiṅmukhā giraya iva bhūbhṛtpravarāt dharaṇidhāraṇakṣamā diggajā iva brahmakarāt udadhīn pātum udyatā jaladharā iva ghanāgamāt icchāphaladāyinaḥ kalpatarava iva nandanāt sarvabhūtāśrayā viśvarūpaprakārā iva śrīdharād ajāyanta rājānaḥ // (4.1) Par.?

teṣu caivam utpadyamāneṣu krameṇodapādi hūṇahariṇakesarī sindhurājajvaro gurjaraprajāgaro gāndhārādhipagandhadvipakūṭapākalo lāṭapāṭavapāṭaccaro mālavalakṣmīlatāparaśuḥ pratāpaśīla iti prathitāparanāmā prabhākaravardhano nāma rājādhirājaḥ // (5.1) Par.?

yo rājyāṅgasaṅgīny abhiṣicyamāna eva malānīva mumoca dhanāni // (6.1) Par.?

yaḥ parakīyenāpi kātaravallabhena raṇamukhe tṛṇeneva dhṛtenālajjata jīvitena // (7.1) Par.?

yaḥ karadhṛtadhautāsipratibimbitenātmanāpy adūyata samitiṣu sahāyena ripūṇāṃ puraḥ pradhaneṣu dhanuṣāpi namatā / (8.1) Par.?

yo mānī mānasenākhidyata // (8.2) Par.?

yaś cāntargatāparimitaripuśastraśalyaśaṅkukīlitām iva niścalām uvāha rājalakṣmīm // (9.1) Par.?

yaś ca sarvāsu dikṣu samīkṛtataṭāvaṭaviṭapāṭavītarutṛṇagulmavalmīkagirigahanair daṇḍayātrāpathaiḥ pṛthubhir bhṛtyopayogāya vyabhajateva vasudhāṃ bahudhā // (10.1) Par.?

yaṃ cālabdhayuddhadohadam ātmīyo 'pi sakalaripusamutsārakaḥ parakīya iva tatāpa pratāpaḥ // (11.1) Par.?

yasya ca vahnimayo hṛdayeṣu jalamayo locanapuṭeṣu mārutamayo niḥśvasiteṣu kṣamāmayo 'ṅgeṣu ākāśamayaḥ śūnyatāyāṃ pañcamahābhūtamayo mūrta ivādṛśyata nihatapratisāmantāntaḥpureṣu pratāpaḥ // (12.1) Par.?

yasya cāsanneṣu bhṛtyaratneṣu pratibimbiteva tulyarūpā samalakṣyata lakṣmīḥ // (13.1) Par.?

tathā ca yasya pratāpāgninā bhūtiḥ śauryoṣmaṇā siddhiḥ asidhārājalena vaṃśavṛddhiḥ śastravraṇamukhaiḥ puruṣakāroktiḥ dhanurguṇakiṇena karagṛhītir abhavat // (14.1) Par.?

yaś ca vairam upāyanaṃ vigraham anugrahaṃ samarāgamaṃ mahotsavaṃ śatruṃ nidhidarśanam aribāhulyam abhyudayam āhavāhvānaṃ varapradānam avaskandapātaṃ diṣṭavṛddhiṃ śastraprahārapatanaṃ vasudhārārasam amanyata // (15.1) Par.?

yasmiṃś ca rājani nirantarair yūpanikarair aṅkuritam iva kṛtayugena diṅmukhavisarpibhir adhvaradhūmaiḥ palāyitam iva kalinā sasudhaiḥ surālayair avatīrṇam iva svargeṇa surālayaśikharoddhūyamānair dhavaladhvajaiḥ pallavitam iva dharmeṇa bahiruparacitavikaṭasabhāsatraprapāprāgvaṃśamaṇḍapaiḥ prasūtam iva grāmaiḥ kāñcanamayasarvopakaraṇair vibhavair viśīrṇam iva meruṇā dvijadīyamānair arthakalaśaiḥ phalitam iva bhāgyasaṃpadā // (16.1) Par.?

tasya ca janmāntare 'pi satī pārvatīva śaṅkarasya gṛhītaparahṛdayā lakṣmīr iva lokaguroḥ sphurattaralatārakā rohiṇīva kalāvataḥ sarvajanajananī buddhir iva prajāpateḥ mahābhūbhṛtkulodgatā gaṅgeva vāhinīnāyakasya mānasānuvartanacaturā haṃsīva rājahaṃsasya sakalalokārcitacaraṇā trayīva dharmasya divāniśam amuktapārśvasthitir arundhatīva mahāmuner haṃsamayīva gatiṣu parapuṣṭamayīvālāpeṣu cakravākamayīva patipremṇi prāvṛṇmayīva payodharonnatau madirāmayīva vilāseṣu nidhimayīvārthasaṃcayeṣu vasudhārāmayīva prasādeṣu kamalamayīva kośasaṃgraheṣu kusumamayīva phaladāneṣu saṃdhyāmayīva vandyatve candramayīva nirūṣmatve darpaṇamayīva pratiprāṇigrahaṇeṣu sāmudramayīva paracittajñāneṣu paramātmamayīva vyāptiṣu smṛtimayīva puṇyavṛttiṣu madhumayīva saṃbhāṣaṇeṣu amṛtamayīva tṛṣyatsu vṛṣṭimayīva bhṛtyeṣu nirvṛtimayīva sakhīṣu vetasamayīva guruṣu gotravṛddhir iva vilāsānām prāyaścittaśuddhir iva strītvasya ājñāsiddhir iva makaradhvajasya vyutthānabuddhir iva rūpasya diṣṭavṛddhir iva rateḥ manorathasiddhir iva rāmaṇīyakasya daivasaṃpattir iva lāvaṇyasya vaṃśotpattir ivānurāgasya varaprāptir iva saubhāgyasya utpattibhūmir iva kānteḥ sargasamāptir iva saundaryasya āyatir iva yauvanasya anabhravṛṣṭir iva vaidagdhyasya ayaśaḥpramṛṣṭir iva lakṣmyāḥ yaśaḥpuṣṭir iva cāritrasya hṛdayatuṣṭir iva dharmasya saubhāgyaparamāṇusṛṣṭir iva prajāpateḥ śamasyāpi śāntir iva vinayasyāpi vinītir iva ābhijātyasyāpy abhijātir iva saṃyamasyāpi saṃyatir iva dhairyasyāpi dhṛtir iva vibhramasyāpi vibhrāntir iva yaśomatī nāma mahādevī prāṇānāṃ praṇayasya visrambhasya dharmasya sukhasya ca bhūmir abhūt // (17.1) Par.?

yāsya vakṣasi narakajito lakṣmīr iva lalāsa // (18.1) Par.?

nisargata eva ca sa nṛpatir ādityabhakto babhūva // (19.1) Par.?

pratidinam udaye dinakṛtaḥ snātaḥ sitadukūladhārī dhavalakarpaṭaprāvṛtaśirāḥ prāṅmukhaḥ kṣitau jānubhyāṃ sthitvā kuṅkumapaṅkānulipte maṇḍalake pavitrapadmarāgapātrīnihitena svahṛdayeneva sūryānuraktena raktakamalaṣaṇḍenārghaṃ dadau // (20.1) Par.?

ajapac ca japyaṃ sucaritaḥ pratyuṣasi madhyandine dinānte cāpatyahetoḥ prādhvaṃ prayatena manasā jañjapūko mantram ādityahṛdayam // (21.1) Par.?

bhaktajanānurodhavidheyāni tu bhavanti devatānāṃ manāṃsi // (22.1) Par.?

yataḥ sa rājā kadācid grīṣmasamaye yadṛcchayā sitakarakarasitasudhādhavalasya harmyasya pṛṣṭhe suṣvāpa // (23.1) Par.?

vāmapārśve cāsya dvitīyaśayane devī yaśomatī śiśye // (24.1) Par.?

pariṇataprāyāyāṃ tu śyāmāyām āsannaprabhātavelāvilupyamānalāvaṇye lilambiṣamāṇe sīdattejasi tārakeśvare karāgraspṛṣṭakumudinīpramodajanmani śaśadharasveda iva galaty atiśītale 'vaśyāyapayasi madhumadamattaprasuptasīmantinīniḥśvāsāhateṣu saṃkrāntamadeṣv iva ghūrṇamāneṣv antaḥpurapradīpeṣu rājani ca vimalanakhapratibimbitābhiḥ saṃvāhyamānacaraṇa iva tārakābhiḥ visrabdhaprasāritair digaṅganānām ivārpitair aṅgair madhusugandhibhiḥ svahastakamalatālavṛntavātair iva śvasitair mukhaśriyā vījyamāne vimalakapolasthalasthitena sitakusumaśekhareṇeva ratikelikacagrahalambitena pratimāśaśibimbena virājite svapati devī yaśomatī sahasaiva āryaputra paritrāyasva paritrāyasva iti bhāṣamāṇā bhūṣaṇaraveṇa vyāharantīva parijanam utkampamānāṅgayaṣṭir udatiṣṭhat // (25.1) Par.?

atha tena sarvasyām api pṛthivyām aśrutapūrveṇa kim uta devīmukhe paritrāyasveti dhvaninā dagdha iva śravaṇayor ekapada eva nidrāṃ tatyāja rājā // (26.1) Par.?

śirobhāgāc ca kopakampamānadakṣiṇakarākṛṣṭena karṇotpaleneva nirgacchatācchadhāreṇa dhautāsinā sīmantayann iva niśām antarālavyavadhāyakam ākāśam ivottarīyāṃśukaṃ vikṣipan vāmakarapallavena karavikṣepavegagalitena hṛdayeneva bhayanimittānveṣiṇā bhramatā dikṣu kanakavalayena virājamānaḥ satvarāvatāritavāmacaraṇākrāntikampitaprāsādaḥ puraḥpatitenāsidhārāgocaragatena śaśimayūkhakhaṇḍeneva khaṇḍitena hāreṇa rājamānaḥ lakṣmīcumbanalagnatāmbūlarasarañjitābhyām iva nidrayā kopena cātilohitābhyāṃ locanābhyāṃ pāṭalayan paryantān āśānām baddhāndhakārayā tripatākayā bhrukuṭyā punar iva triyāmāṃ parivartayan devi na bhetavyaṃ na bhetavyam ity abhidadhāno vegenotpapāta // (27.1) Par.?

sarvāsu ca dikṣu vikṣiptacakṣur yadā nādrākṣīt kiṃcid api tadā papraccha tāṃ bhayakāraṇam // (28.1) Par.?

atha gṛhadevatāsv iva pradhāvitāsu yāmikinīṣu prabuddhe ca samīpaśāyini parijane śānte ca hṛdayotkampakāriṇi sādhvase sā samabhāṣata āryaputra jānāmi svapne bhagavataḥ savitur maṇḍalān nirgatya dvau kumārakau tejomayau bālātapenevāpūrayantau digbhāgān vaidyutam iva jīvalokaṃ kurvāṇau mukuṭinau kuṇḍalinau aṅgadinau kavacinau gṛhītaśastrau indragopakarucā rudhireṇa snātau unmukhenottamāṅgaghaṭamānāñjalinā jagatā nikhilena praṇamyamānau kanyayaikayā ca candramūrtyeva suṣumṇaraśminirgatayānugamyamānau kṣititalam avatīrṇau // (29.1) Par.?

tau ca me vilapantyāḥ śastreṇodaraṃ vidārya praveṣṭum ārabdhau // (30.1) Par.?

pratibuddhāsmi cāryaputra vikrośayantī vepamānahṛdayā iti // (31.1) Par.?

etasminn eva ca kālakrame rājalakṣmyāḥ prathamālāpaḥ prathayann iva svapnaphalam upatoraṇaṃ rarāṇa prabhātaśaṅkhaḥ // (32.1) Par.?

bhāvinīṃ bhūtim ivābhidadhānā dadhvanur amandaṃ dundubhayaḥ // (33.1) Par.?

cakāṇa koṇāhatānandād iva pratyūṣanāndī // (34.1) Par.?

jaya jayeti prabodhamaṅgalaparipāṭhakānām uccair vāco 'śrūyanta // (35.1) Par.?

puruṣaś ca vallabhaturaṅgamandurāmandire mandamandaṃ suptotthitaḥ saptīnāṃ kṛtamadhuraheṣāravāṇāṃ puraścyotattuṣārasalilaśīkaraṃ kiranmarakataharitaṃ yavasaṃ vaktrāparavaktre papāṭha / (36.1) Par.?

nidhis taruvikāreṇa sanmaṇiḥ sphuratā dhāmnā / (36.2) Par.?

śubhāgamo nimittena spaṣṭam ākhyāyate loke // (36.3) Par.?

aruṇa iva puraḥsaro raviṃ pavana ivātijavo jalāgamam / (37.1) Par.?

śubham aśubham athāpi vā nṛṇāṃ kathayati pūrvanidarśanodayaḥ // (37.2) Par.?

narapatis tu tac chrutvā prīyamāṇenāntaḥkaraṇena tām avādīt devi // (38.1) Par.?

mudo 'vasare viṣīdasi // (39.1) Par.?

samṛddhās te gurujanāśiṣaḥ // (40.1) Par.?

pūrṇā no manorathāḥ // (41.1) Par.?

parigṛhītāsi kuladevatābhiḥ // (42.1) Par.?

prasannas te bhagavān aṃśumālī // (43.1) Par.?

na cireṇaivātiguṇavadapatyatrayalābhenānandayiṣyati bhavatīm iti // (44.1) Par.?

avatīrya ca yathākriyamāṇāḥ kriyāś cakāra // (45.1) Par.?

yaśomaty api tutoṣa tena patyur bhāṣitena // (46.1) Par.?

tataḥ samatikrānte kasmiṃścit kālāṃśe devyāṃ ca yaśomatyāṃ devo rājyavardhanaḥ prathamam eva saṃbabhūva garbhe // (47.1) Par.?

garbhasthitasyaiva ca yasya yaśaseva pāṇḍutām ādatta jananī // (48.1) Par.?

guṇagauravaklānteva gātram udvoḍhuṃ na śaśāka // (49.1) Par.?

kāntivisarāmṛtarasatṛptevāhāraṃ prati parāṅmukhī babhūva // (50.1) Par.?

śanaiḥ śanair upacīyamānagarbhabharālasā ca gurubhir vāritāpi vandanāya katham api sakhībhir hastāvalambenānīyata // (51.1) Par.?

viśrāmyantī sālabhañjikeva samīpagatastambhabhittiṣv alakṣyata // (52.1) Par.?

kamalalobhanilīnair alibhir iva vṛtāv uddhartuṃ nāśakac caraṇau // (53.1) Par.?

mṛṇālalobhena ca caraṇanakhamayūkhalagnair bhavanahaṃsair iva saṃcāryamāṇā mandamandaṃ babhrāma // (54.1) Par.?

maṇibhittipātinīṣu nijapratimāsv api hastāvalambanalobhena prasārayāmāsa karakamalam kimuta sakhīṣu // (55.1) Par.?

māṇikyastambhadīdhitīr apy ālambitum ācakāṅkṣa kiṃ punar bhavanalatāḥ // (56.1) Par.?

samādeṣṭum apy asamarthāsīd gṛhakāryāṇi kaiva kathā kartum // (57.1) Par.?

āstāṃ nūpurabhārakheditaṃ caraṇayugalaṃ manasāpi nodasahata saudham āroḍhum // (58.1) Par.?

aṅgāny api nāśaknod dhārayituṃ dūre bhūṣaṇāni // (59.1) Par.?

cintayitvāpi krīḍāparvatādhirohaṇam utkampitastanī tastāna // (60.1) Par.?

pratyutthāneṣūbhayajānuśikharavinihatakarakisalayāpi garvād iva garbheṇādhāryata // (61.1) Par.?

divasaṃ cādhomukhī stanapṛṣṭhasaṃkrāntenāpatyadarśanautsukyād antaḥpraviṣṭeneva mukhakamalenaivaṃ prīyamāṇā dadarśa garbham // (62.1) Par.?

udare tanayena hṛdaye ca bhartrā tiṣṭhatā dviguṇitām iva lakṣmīm uvāha // (63.1) Par.?

sakhyutsaṅgamuktaśarīrā ca śarīraparicārikāṇām aṅkeṣu sapatnīnāṃ tu śiraḥsu pādau cakāra // (64.1) Par.?

avatīrṇe ca daśame māsi sarvorvībhṛtpakṣapātāya vajraparamāṇubhir iva nirmitam tribhuvanabhāradhāraṇasamarthaṃ śeṣaphaṇāmaṇḍalopakaraṇair iva kalpitam sakalabhūbhṛtkampakāriṇaṃ diggajāvayavair iva vihitam asūta devaṃ rājyavardhanam // (65.1) Par.?

yasmiñ jāte jātapramodā nṛtyamayya ivājāyanta prajāḥ // (66.1) Par.?

pūritāsaṃkhyaśaṅkhaśabdamukharaṃ prahatapaṭahaśatapaṭuravaṃ gambhīrabherīninādanirbharabharitabhuvanaṃ pramodonmattamartyalokamanoharaṃ māsam ekaṃ divasam iva mahotsavam akaron narapatiḥ // (67.1) Par.?

athānyasminn atikrānte kasmiṃścit kāle kandalini kuḍmalitakadambatarau rūḍhatokmatṛṇastambe stambhitatāmarase vikasitacātakacetasi mūkamānasaukasi nabhasi māsi devyā devakyā iva cakrapāṇir yaśomatyā hṛdaye garbhe ca samam eva saṃbabhūva harṣaḥ // (68.1) Par.?

śanaiḥ śanaiś cāsyāḥ sarvaprajāpuṇyair iva parigṛhītā bhūyo 'py āpāṇḍutām aṅgayaṣṭir jagāma // (69.1) Par.?

garbhārambheṇa śyāmāyamānacārucūcukacūlikau cakravartinaḥ pātuṃ mudritāv iva payodharakalaśau babhāroraḥsthaleva // (70.1) Par.?

stanyārthamānananihitā dugdhanadīva dīrghasnigdhadhavalā mādhuryam adhatta dṛṣṭiḥ // (71.1) Par.?

sakalamaṅgalagaṇādhiṣṭhitagātragarimṇeva gatir amandāyata // (72.1) Par.?

mandaṃ mandaṃ saṃcarantyā nirmalamaṇikuṭṭimanimagnapratibimbanibhena gṛhītapādapallavā pūrvasevām ivārebhe pṛthivy asyāḥ // (73.1) Par.?

divasam adhiśayānāyāḥ śayanīyam apāśrayapatrabhaṅgaputrikāpratimā vimalakapolodaragatā prasavasamayaṃ pratipālayantī lakṣmīr ivālakṣyata // (74.1) Par.?

kṣapāsu saudhaśikharāgragatāyā garbhonmāthamuktāṃśuke stanamaṇḍale saṃkrāntam uḍupatimaṇḍalam upari garbhasya śvetātapatram iva kenāpi dhāryamāṇam adṛśyata // (75.1) Par.?

suptāyā vāsabhavane citrabhitticāmaragrāhiṇyo 'pi cāmarāṇi cālayāṃcakruḥ // (76.1) Par.?

svapneṣu karavidhṛtakamalinīpalāśapuṭasalilaiś caturbhir api dikkaribhir akriyatābhiṣekaḥ // (77.1) Par.?

pratibudhyamānāyāś ca candraśālikāsālabhañjikāparijano 'pi jayaśabdam asakṛd ajanayat // (78.1) Par.?

parijanāhvāneṣv ādiśety aśarīrā vāco niśceruḥ // (79.1) Par.?

krīḍāyām api nāsahatājñābhaṅgam // (80.1) Par.?

api ca caturṇām api mahārṇavānām ekīkṛtenāmbhasā snātuṃ vāñchā babhūva // (81.1) Par.?

velālatāgṛhodarapulinaparisareṣu paryaṭituṃ hṛdayam abhilalāṣa // (82.1) Par.?

ātyayikeṣv api kāryeṣu savibhramaṃ bhrūlatā cacāla // (83.1) Par.?

saṃnihiteṣv api maṇidarpaṇeṣu mukham utkhāte khaḍgapaṭṭe vīkṣituṃ vyasanam āsīt // (84.1) Par.?

utsāritavīṇāḥ strījanaviruddhā dhanurdhvanayaḥ śrutāv asukhāyanta // (85.1) Par.?

pañjarakesariṣu cakṣur aramata // (86.1) Par.?

gurupraṇāmeṣv api stambhitam iva śiraḥ katham api nanāma // (87.1) Par.?

sakhyaś cāsyāḥ pramodavisphāritair locanapuṭair āsannaprasavamahotsavadhiyeva dhavalayantyo bhavanaṃ vikacakumudakamalakuvalayapalāśavṛṣṭimayaṃ rakṣābalinidhim ivānavarataṃ vidadhānā dikṣu kṣaṇam api na mumucuḥ pārśvam // (88.1) Par.?

ātmocitasthānaniṣaṇṇāś ca mahānto vividhauṣadhidharā bhiṣajo bhūdharā iva bhuvo dhṛtiṃ cakruḥ // (89.1) Par.?

payonidhīnāṃ hṛdayānīva lakṣmyā sahāgatāni grīvāsūtragranthiṣu praśastaratnāny abadhyanta // (90.1) Par.?

tataś ca prāpte jyeṣṭhāmūlīye māsi bahulāsu bahulapakṣadvādaśyāṃ vyatīte pradoṣasamaye samārurukṣati kṣapāyauvane sahasaivāntaḥpure samudapādi kolāhalaḥ strījanasya // (91.1) Par.?

nirgatya ca sasaṃbhramaṃ yaśovatyāḥ svayam eva hṛdayanirviśeṣā dhātryāḥ sutā supātreti nāmnā rājñaḥ pādayor nipatya deva diṣṭyā vardhase dvitīyasutajanmanā iti vyāharantī pūrṇapātraṃ jahāra // (92.1) Par.?

asminn eva ca kāle rājñaḥ paramasaṃmataḥ śataśaḥ saṃvāditātīndriyādeśaḥ darśitaprabhāvaḥ saṃkalitī jyotiṣi sarvāsāṃ grahasaṃhitānāṃ pāradṛśvā sakalagaṇakamadhye mahito hitaś ca trikālajñānabhāg bhojakas tārako nāma gaṇakaḥ samupasṛtya vijñāpitavān deva śrūyatāṃ māṃdhātā kilaivaṃvidhe vyatīpātādisarvadoṣābhiṣaṅgarahite 'hani sarveṣūccasthānasthiteṣv evaṃ graheṣv īdṛśi lagne bheje janma // (93.1) Par.?

arvāk tato 'sminn antarāle punar evaṃvidhe yoge cakravartijanane nājani jagati kaścid aparaḥ // (94.1) Par.?

saptānāṃ cakravartinām agraṇīś cakravarticihnānāṃ mahāratnānāṃ ca bhājanaṃ saptānāṃ sāgarāṇāṃ pālayitā saptatantūnāṃ sarveṣāṃ pravartayitā saptasaptisamaḥ suto 'yaṃ devasya jātaḥ iti // (95.1) Par.?

atrāntare svayam evānādhmātā api tāramadhuraṃ śaṅkhā viresuḥ // (96.1) Par.?

atāḍito 'pi kṣubhitajalanidhijaladhvanidhīraṃ juguñjābhiṣekadundubhiḥ // (97.1) Par.?

anāhatāny api maṅgalatūryāṇi reṇuḥ // (98.1) Par.?

sarvabhuvanābhayaghoṣaṇāpaṭaha iva digantareṣu babhrāma tūryapratiśabdaḥ // (99.1) Par.?

vidhutakesarasaṭāśca sāṭopagṛhītaharitadūrvāpallavakavalapraśastair mukhapuṭaiḥ samaheṣanta hṛṣṭā vājinaḥ // (100.1) Par.?

salīlam utkṣiptair hastapallavair nṛtyanta iva śravaṇasubhagaṃ jagarjur gajāḥ // (101.1) Par.?

vavau cācirāc cakrāyudham utsṛjantyā lakṣmyā niḥśvāsa iva surāmodasurabhir divyānilaḥ // (102.1) Par.?

yajvanāṃ mandireṣu pradakṣiṇaśikhākalāpakathitakalyāṇāgamāḥ prajajvalur anindhanā vaitānavahnayaḥ // (103.1) Par.?

bhuvastalāt tapanīyaśṛṅkhalābandhabandhurakalaśīkośāḥ samudagur mahānidhayaḥ // (104.1) Par.?

prahatamaṅgalatūryapratiśabdanibhena dikṣu dikpālair api pramodād akriyateva diṣṭavṛddhikalakalaḥ // (105.1) Par.?

tatkṣaṇa eva ca śuklavāsaso brahmamukhāḥ kṛtayugaprajāpataya iva prajāvṛddhaye samupatasthire dvijātayaḥ // (106.1) Par.?

sākṣāddharma iva śāntyudakaphalahastas tasthau puraḥ purodhāḥ // (107.1) Par.?

purātanyaḥ sthitaya ivādṛśyantāgatā bāndhavavṛddhāḥ // (108.1) Par.?

pralambaśmaśrujālajaṭilānanāni bahalamalapaṅkakalaṅkakālakāyāni naśyataḥ kalikālasya bāndhavakulānīvākulāny adhāvanta muktāni bandhanavṛndāni // (109.1) Par.?

tatkālāpakrāntasyādharmasya śibiraśreṇaya ivālakṣyanta lokaviluṇṭhitā vipaṇivīthyaḥ // (110.1) Par.?

vilasadunmukhavāmanakabadhiravṛndaveṣṭitāḥ sākṣājjātamātṛdevatā iva bahubālakavyākulā nanṛtur vṛddhadhātryaḥ // (111.1) Par.?

prāvartata ca vigatarājakulasthitir adhaḥkṛtapratīhārākṛtir apanītavetrivetro nirdoṣāntaḥpurapraveśaḥ samasvāmiparijano nirviśeṣabālavṛddhaḥ samānaśiṣṭāśiṣṭajano durjñeyamattāmattapravibhāgas tulyakulayuvativeśyālāpavilāsaḥ pranṛttasakalakaṭakalokaḥ putrajanmotsavo mahān // (112.1) Par.?

aparedyur ārabhya sarvābhyo digbhyaḥ strīrājyānīvāvarjitāni asuravivarāṇīvāpāvṛtāni nārāyaṇāvarodhānīva praskhalitāni apsarasām iva mahīm avatīrṇāni kulāni parijanena pṛthukaraṇḍaparigṛhītāḥ snānīyacūrṇāvakīrṇakusumāḥ sumanaḥsrajaḥ sphaṭikaśilāśakalaśuklakarpūrakhaṇḍapūritāḥ pātrīḥ kuṅkumādhivāsabhāñji bhājanāni ca maṇimayāni sahakāratailatimyattanukhadirakesarajālajaṭilāni candanadhavalapūgaphalaphālīdanturadantaśapharukāṇi guñjanmadhukarakulapīyamānapārijātaparimalāni pāṭalāni pāṭalakāni ca sindūrapātrāṇi ca piṣṭātakapātrāṇi ca bālalatālambamānaviṭakavīṭakāṃś ca tāmbūlavṛkṣakān bibhrāṇenānugamyamānāni caraṇanikuṭṭanaraṇitamaṇinūpuramukharitadiṅmukhāni nṛtyanti rājakulam āgacchanti samantāt sāmantāntaḥpurasahasrāṇy adṛśyanta // (113.1) Par.?

śanaiḥ śanair vyajṛmbhata ca kvacin nṛttānucitacirantanaśālīnakulaputrakalokalāsyaprathitapārthivānurāgaḥ kvacid antaḥsmitakṣitipālāpekṣitakṣībakṣudradāsīsamākṛṣyamāṇarājavallabhaḥ kvacin mattakaṭakakuṭṭanīkaṇṭhalagnavṛddhāryasāmantanṛttanirbharahasitanarapatiḥ kvacit kṣitipākṣisaṃjñādiṣṭaduṣṭadāserakagītasūcyamānasacivacauryarataprapañcaḥ kvacin madotkaṭakuṭahārikāpariṣvajyamānajaratpravrajitajanitajanahāsaḥ kvacid anyonyanirbharaspardhoddhuraviṭakaceṭakārabdhāvācyavacanayuddhaḥ kvacin nṛpābalābalātkārakṛṣṭanartyamānanṛttānabhijñāntaḥpurapālabhāvitabhujiṣyaḥ saparvata iva kusumarāśibhiḥ sadhārāgṛha iva sīdhuprapābhiḥ sanandanavana iva pārijātakāmodaiḥ sanīhāra iva karpūrareṇubhiḥ sāṭṭahāsa iva paṭaharavaiḥ sāmṛtamathana iva mahākalakalaiḥ sāvarta iva rāsakamaṇḍalaiḥ saromāñca iva bhūṣaṇamaṇikiraṇaiḥ sapaṭṭabandha iva candanalalāṭikābhiḥ saprasava iva pratiśabdakaiḥ sapraroha iva prasādadānair utsavāmodaḥ // (114.1) Par.?

skandhāvalambamānakesaramālāḥ kāmbojavājina ivāskandantaḥ taralatārakā hariṇā ivoḍḍīyamānāḥ sagarasutā iva khanitrair nirdayaiś caraṇābhighātair dārayanto bhuvam anekasahasrasaṃkhyāś cikrīḍur yuvānaḥ // (115.1) Par.?

katham api tālāvacaracāraṇacaraṇakṣobhaṃ cakṣame kṣamā // (116.1) Par.?

kṣitipālakumārakāṇāṃ ca khelatām anyonyāsphālair ābharaṇeṣu muktāphalāni pheluḥ // (117.1) Par.?

sindūrareṇunā punar utpannahiraṇyagarbhagarbhaśoṇitaśoṇāśam iva brahmāṇḍakapālam abhavat // (118.1) Par.?

paṭavāsapāṃsupaṭalena prakaṭitamandākinīsaikatasahasram iva śuśubhe nabhastalam // (119.1) Par.?

viprakīryamāṇapiṣṭātakaparāgapiñjaritātapā bhuvanakṣobhaviśīrṇapitāmahakamalakiñjalkarajorājirañjitā iva rejur divasāḥ // (120.1) Par.?

saṃghaṭṭavighaṭitahārapatitamuktāphalapaṭaleṣu caskhāla lokaḥ // (121.1) Par.?

sthānasthāneṣu ca mandamandam āsphālyamānāliṅgyakena śiñjānamañjuveṇunā jhaṇajhaṇāyamānajhallarīkeṇa tāḍyamānatantrīpaṭahikena vādyamānānuttānālābuvīṇena kalakāṃsyakośīkvaṇitakāhalena samakāladīyamānānuttālatālikenātodyavādyenānugamyamānāḥ pade pade jhaṇajhaṇitabhūṣaṇaravair api sahṛdayair ivānuvartamānatālalayāḥ kokilā iva madakalakākalīkomalālāpinyaḥ viṭānāṃ karṇāmṛtāny aślīlarāsakapadāni gāyantyaḥ samuṇḍamālikāḥ sakarṇapallavāḥ sacandanatilakāḥ samucchritābhir valayāvalīvācālābhir bāhulatikābhiḥ savitāram ivāliṅgayantyaḥ kuṅkumapramṛṣṭirucirakāyāḥ kāśmīrakiśorya iva valgantyaḥ nitambabimbalambivikaṭakuraṇṭakaśekharāḥ pradīptā iva rāgāgninā sindūracchaṭācchuritamukhamudrāḥ śāsanapaṭṭapaṅktaya ivāpratihataśāsanasya kaṃdarpasya muṣṭiprakīryamāṇakarpūrapaṭavāsapāṃsulā manorathasaṃcaraṇarathyā iva yauvanasya uddāmakusumadāmatāḍitataruṇajanāḥ pratīhārya iva taruṇamahotsavasya pracalatpatrakuṇḍalā lasantyo latā iva madanacandanadrumasya lalitapadahaṃsakaravamukharāḥ samullasantyo vīcaya iva śṛṅgārarasasāgarasya vācyāvācyavivekaśūnyā bālakrīḍā iva saubhāgyasya ghanapaṭaharavotkaṇṭakitagātrayaṣṭayaḥ ketakya iva kusumadhūlim udgirantyaḥ kamalinya iva divasam utphullānanāḥ kumudinya iva rātrāv anupajātanidrāḥ āviṣṭā iva narendravṛndaparivṛtāḥ prītaya iva hṛdayam apaharantyaḥ gītaya iva rāgam uddīpayantyaḥ puṣṭaya ivānandam utpādayantyaḥ madam api madayantya iva rāgam api rañjayantya iva ānandam api ānandayantya iva nṛtyam api nartayamānā iva utsavam apy utsavayantya iva kaṭākṣekṣiteṣu pibantya ivāpāṅgaśuktibhiḥ tarjaneṣu saṃyamayantya iva nakhamayūkhapāśaiḥ kopābhinayeṣu tāḍayantya iva bhrūlatāvibhāgaiḥ praṇayasaṃbhāṣaṇeṣu varṣantya iva sarvarasān caturacaṅkramaṇeṣu vikirantya iva vikārān paṇyavilāsinyaḥ prānṛtyan // (122.1) Par.?

anyatra vetrivetravitrāsitajanadattāntarālāḥ dhriyamāṇadhavalātapatravanā vanadevatā iva kalpatarutalavicāriṇyaḥ kāścit skandhobhayapālīlambamānalambottarīyalagnahastā līlādolādhirūḍhā iva preṅkhantyaḥ kāścit kanakakeyūrakoṭivipāṭyamānapaṭṭāṃśukottaraṅgās taraṅgiṇya iva taraccakravākasīmantyamānasrotasaḥ kāścid uddhūyamānadhavalacāmarasaṭālagnatrikaṇṭakavalitavikaṭakaṭākṣāḥ sarasya iva haṃsākṛṣyamāṇanīlotpalavanāḥ kāścic calaccaraṇacyutālaktakāruṇasvedaśīkarasicyamānabhavanahaṃsāḥ saṃdhyārāgarajyamānendubimbā iva kaumudīrajanyaḥ kāścit kaṇṭhanihitakāñcanakāñcīguṇāñcitakañcukivikārākuñcitabhruvaḥ kāmavāgurā iva prasāritabāhupāśā rājamahiṣyaḥ prārabdhanṛttā vilesuḥ // (123.1) Par.?

sarvataś ca nṛtyataḥ straiṇasya galadbhiḥ pādālaktakair aruṇitā rāgamayīva śuśoṇa kṣoṇī // (124.1) Par.?

samullasadbhiḥ stanamaṇḍalair maṅgalakalaśamaya iva babhūva mahotsavaḥ // (125.1) Par.?

bhujalatāvikṣepair mṛṇālavalayamaya iva rarāja jīvalokaḥ // (126.1) Par.?

samullasadbhir vilāsasmitais taḍinmaya ivākriyata kālaḥ // (127.1) Par.?

cañcalānāṃ cakṣuṣām aṃśubhiḥ kṛṣṇasāramayā ivāsan vāsarāḥ // (128.1) Par.?

samullasadbhiḥ śirīṣakusumastabakakarṇapūraiḥ śukapicchamaya iva haritacchāyo 'bhūd ātapaḥ // (129.1) Par.?

visraṃsamānair dhammillatamālapallavaiḥ kajjalamayam ivālakṣyatāntarikṣam // (130.1) Par.?

utkṣiptair hastakisalayaiḥ kamalinīmayya iva babhāsire sṛṣṭayaḥ māṇikyendrāyudhānām arciṣā cāṣapatramayā iva cakāśire ravimarīcayaḥ // (131.1) Par.?

raṇatām ābharaṇagaṇānāṃ pratiśabdakaiḥ kiṅkiṇīmayya iva śiśiñjire diśaḥ // (132.1) Par.?

jaratyo 'py unmādinya iva ramaṇyo reṇuḥ // (133.1) Par.?

varṣīyāṃso 'pi grahagṛhītā iva nāpatrepire // (134.1) Par.?

vidvāṃso 'pi mattā ivātmānaṃ visasmaruḥ // (135.1) Par.?

ninartiṣayā munīnām api manāṃsi vipusphuluḥ // (136.1) Par.?

sarvasvaṃ ca dadau narapatiḥ // (137.1) Par.?

diśi diśi kuberakoṣā ivālupyanta lokena draviṇarāśayaḥ // (138.1) Par.?

evaṃ ca vṛtte tasmin mahotsave śanaiḥ śanaiḥ punar apy atikrāmati kāle deve cottamāṅganihitarakṣāsarṣape samunmiṣatpratāpāgnisphuliṅga iva gorocanāpiñjaritavapuṣi samabhivyajyamānasahajakṣātratejasīva hāṭakabaddhavikaṭavyāghranakhapaṅktimaṇḍitagrīvake hṛdayodbhidyamānadarpāṅkura iva prathamāvyaktajalpitena satyasya śanaiḥśanairoṃkāram iva kurvāṇe mugdhasmitaiḥ kusumair iva madhukarakulāni bandhuhṛdayāny ākarṣati jananīpayodharakalaśapayaḥsīkarasekād iva jāyamānair vilāsahasitāṅkurair daśanakair alaṃkriyamāṇamukhakamalake cāritra ivāntaḥpurastrīkadambakena pālyamāne mantra iva sacivamaṇḍalena rakṣyamāṇe vṛtta iva kulaputrakalokenāmucyamāne yaśasīvātmavaśena saṃvardhyamāne mṛgapatipota iva rakṣipuruṣaśastrapañjaramadhyagate dhātrīkarāṅgulilagne pañcaṣāṇi padāni prayacchati harṣe ṣaṣṭhaṃ varṣam avatarati ca rājyavardhane devī yaśomatī garbheṇādhatta nārāyaṇamūrtir iva vasudhāṃ devīṃ rājyaśriyam // (139.1) Par.?

pūrṇeṣu ca prasavadivaseṣu dīrgharaktanālanetrām utpalinīm iva sarasī haṃsamadhurasvarāṃ śaradam iva prāvṛṭ kusumasukumārāvayavāṃ vanarājim iva madhuśrīḥ mahākanakāvadātāṃ vasudhārām iva dyauḥ prabhāvarṣiṇīṃ ratnajātim iva velā sakalajananayanānandakāriṇīṃ candralekhām iva pratipat sahasranetradarśanayogyāṃ jayantīm iva śacī sarvabhūbhṛdabhyarthitāṃ gaurīm iva menā prasūtavatī duhitaram // (140.1) Par.?

yayā dvayoḥ sutayor upari stanayor ivaikāvalīlatayā nitarām arājata jananī // (141.1) Par.?

asminn eva tu kāle devyā yaśomatyā bhrātā sutam aṣṭavarṣadeśīyam uddhūyamānakuṭilakākapakṣakaśikhaṇḍaṃ khaṇḍaparaśuhuṃkārāgnidhūmalekhānubaddhamūrdhānaṃ makaradhvajam iva punar jātam ekenendranīlakuṇḍalāṃśuśyāmalitena śarīrārdhenetareṇa ca trikaṇṭakamuktāphalālokadhavalitena saṃpṛktāvatāram iva hariharayor darśayantam pīnaprakoṣṭhapratiṣṭhitapuṣpalohavalayaṃ paraśurāmam iva kṣatrakṣapaṇakṣīṇaparaśupāśacihnitaṃ bālatāṃ gatam kaṇṭhasūtragrathitabhaṅgurapravālāṅkuraṃ hiraṇyakaśipum ivoraḥkāṭhinyakhaṇḍitanarasiṃhanakharakhaṇḍaṃ gṛhītajanmāntaram śaiśave 'pi sāvaṣṭambhaṃ bījam iva vīryadrumasya bhaṇḍināmānam anucaraṃ kumārayor arpitavān // (142.1) Par.?

avanipates tu tasyopari putrayos tṛtīyasya netrayor iveśvarasya tulyaṃ darśanam āsīt // (143.1) Par.?

rājaputrāv api sakalajīvalokahṛdayānandadāyinau tena prakṛtidakṣiṇena madhumādhavāv iva malayamārutenopetau nitarāṃ rejatuḥ // (144.1) Par.?

krameṇa cāpareṇeva bhrātrā prajānandena saha vardhamānau yauvanam avateratuḥ // (145.1) Par.?

sthirorustambhau ca pṛthuprakoṣṭhau dīrghabhujārgalau vikaṭoraḥkavāṭau prāṃśusālābhirāmau mahānagarasaṃniveśāv iva sarvalokāśrayakṣamau babhūvatuḥ // (146.1) Par.?

atha candrasūryāv iva sphurajjyotsnāyaśaḥpratāpākrāntabhuvanāv abhirāmadurnirīkṣyau agnimārutāv iva samabhivyaktatejobalāv ekībhūtau śilākaṭhinakāyabandhau himavadvindhyāv ivācalau mahāvṛṣāv iva kṛtayugayogyau aruṇagaruḍāv iva harivāhanavibhaktaśarīrau indropendrāv iva nāgendragatau karṇārjunāv iva kuṇḍalakirīṭadharau pūrvāparadigbhāgāv iva sarvatejasvinām udayāstamayasaṃpādanasamarthau amāntāv ivātimānenāsannavelārgalanirodhasaṃkaṭe kukuṭīrake tejaḥ parāṅmukhīṃ chāyām api jugupsamānau svātmapratibimbenāpi pādanakhalagnena lajjamānau śiroruhāṇām api bhaṅgena duḥkham avatiṣṭhamānau cūḍāmaṇisaṃkrāntenāpi dvitīyenātapatreṇāpatrapamāṇau bhagavati ṣaṇmukhe 'pi svāmiśabdenāsukhāyamānaśravaṇau darpaṇadṛṣṭenāpi pratipuruṣeṇa dūyamānanayanau saṃdhyāñjalighaṭaneṣv api śūlāyamānottamāṅgau jaladharadhṛtenāpi dhanuṣā dodhūyamānahṛdayau ālekhyakṣitipatibhir apy apraṇamadbhiḥ saṃtapyamānacaraṇau parimitamaṇḍalasaṃtuṣṭaṃ tejaḥ savitur apy abahumanyamānau bhūbhṛdapahṛtalakṣmīkaṃ sāgaram apy upahasantau balavantam akṛtavigrahaṃ mārutam api nindantau himavato 'pi camarīvālavyajanavījitena dahyamānau jaladhīnām api śaṅkhaiḥ khidyamānau catuḥsamudrādhipatim aparaṃ pracetasam apy asahamānau anapahṛtacchatrān api vicchāyān avanipālān kurvāṇau sādhuṣv apy asevitaprasannau mukhena madhu kṣarantau duṣṭarājavaṃśān ūṣmaṇā dūrasthitān api mlānim ānayantau anudivasaṃ śastrābhyāsaśyāmikākalaṅkitam aśeṣarājakapratāpāgninirvapaṇamalinam iva karatalam udvahantau yogyākāleṣu dhīrair dhanurdhvanibhir abhyarṇopabhogād digvadhūbhir ivālapantau rājyavardhana iti harṣa iti sarvasyām eva pṛthivyām āvirbhūtaśabdaprādurbhāvau svalpīyasaiva kālena dvīpāntareṣv api prakāśatāṃ jagmatuḥ // (147.1) Par.?

ekadā ca tāv āhūya bhuktavān abhyantaragataḥ pitā sasneham avādīt vatsau prathamaṃ rājyāṅgaṃ durlabhāḥ sadbhṛtyāḥ // (148.1) Par.?

prāyeṇa paramāṇava iva samavāyeṣv anuguṇībhūya dravyaṃ kurvanti pārthivaṃ kṣudrāḥ // (149.1) Par.?

krīḍārasena nartayanto mayūratāṃ nayanti bāliśāḥ // (150.1) Par.?

darpaṇam ivānupraviśyātmīyāṃ prakṛtiṃ saṃkrāmayanti pallavikāḥ // (151.1) Par.?

svapnā iva mithyādarśanair asadbuddhiṃ janayanti vipralambhakāḥ // (152.1) Par.?

gītanṛtyahasitair unmattatām āvahanty apekṣitā vikārā iva vātikāḥ // (153.1) Par.?

cātakā iva tṛṣṇāvanto na śakyante grahītum akulīnāḥ // (154.1) Par.?

mānase mīnam iva sphurantam evābhiprāyaṃ gṛhṇanti jālikāḥ // (155.1) Par.?

yamapaṭṭikā ivāmbare citram ālikhanty udgītakāḥ // (156.1) Par.?

śalyaṃ hṛdaye nikṣipanty atimārgaṇāḥ // (157.1) Par.?

yataḥ sarvair ebhir doṣābhiṣaṅgair asaṃgatau bahudhopadhābhiḥ parīkṣitau śucī vinītau vikrāntāv abhirūpau mālavarājaputrau bhrātarau bhujāv iva me śarīrād avyatiriktau kumāraguptamādhavaguptanāmānāv asmābhir bhavator anucaratvārtham imau nirdiṣṭau // (158.1) Par.?

anayor upari bhavadbhyām api nānyaparijanasamavṛttibhyāṃ bhavitavyam ity uktvā tayor āhvānāya pratīhāram ādideśa // (159.1) Par.?

nacirād dvārād dvāradeśanihitalocanau rājyavardhanaharṣau pratīhāreṇa saha praviśantam agrato jyeṣṭham aṣṭādaśavarṣavayasaṃ nātyuccaṃ nātikharvam atigurubhiḥ padanyāsair anekanarapatisaṃcaraṇacalāṃ niścalīkurvāṇam ivorvīm anavaratābhyastalaṅghanaghanopacayakaṭhinamāṃsamedurād ūrudvayān niṣpatatevānulbaṇajānugranthiprasūtena tanutarajaṅghākāṇḍayugalena bhāsamānam ullikhitapārśvaprakāśitakraśimnā mandaram iva surāsurarabhasabhramitavāsukikaṣaṇakṣīṇena madhyena lakṣyamāṇam ativistīrṇenorasā svāmisaṃbhāvanānām aparimitānām avakāśam iva prayacchantam pralambamānasya bhujayugalasya nibhṛtalalitair vikṣepair atidustaraṃ tarantam iva yauvanodadhim vāmakarakaṭakamāṇikyamarīcimañjarījālinyā samudbhidyamānapratāpānalaśikhāpallavayeva cāpaguṇakiṇalekhayāṅkitapīvaraprakoṣṭham ālohinīm uccāṃsataṭāvalambinīm astragrahaṇavratavidhṛtāṃ rauravīm iva tvacaṃ karṇābharaṇamaṇeḥ prabhāṃ bibhrāṇam utkoṭikeyūrapatrabhaṅgaputrikāpratibimbagarbhakapolaṃ mukhaṃ candramasam iva hṛdayasthitarohiṇīkam udvahantam acapalāstamitatārakeṇādhomukhena cakṣuṣā śikṣayantam iva lakṣmīlābhottānitamukhāni paṅkajavanāni vinayam svāmyanurāgam ivāmlātakam uttaṃsīkṛtaṃ śirasā dhārayantam nirdayayā kaṅkaṇabhaṅgabhītasakalakārmukārpitām iva namratāṃ prakāśayantam śaiśava eva nirjitair indriyair aribhir iva saṃyataiḥ śobhamānam praṇayinīm iva viśvāsabhūmiṃ kulaputratām anuvartamānam tejasvinam api śīlenāhlādakena savitāram iva śaśināntargatena virājamānam acalānām api kāyakārkaśyena gandhanam ivācarantam darśanakrītam ānandahaste vikrīṇānam iva janaṃ saubhāgyena kumāraguptam pṛṣṭhatas tasya kanīyāṃsam atiprāṃśutayā gauratayā ca manaḥśilāśailam iva saṃcarantam anulbaṇamālatīkusumaśekharanibhena nirjigamiṣatā guruṇā śirasi cumbitam iva yaśasā parasparaviruddhayor vinayayauvanayoś cirāt prathamasaṃgamacihnam iva bhrūsaṃgatakena kathayantam atidhīratayā hṛdayanihitāṃ svāmibhaktim iva niścalāṃ dṛṣṭiṃ dhārayantam acchācchacandanarasānulepanaśītalaṃ saṃnihitahāropadhānaṃ vakṣaḥsthalam anantasāmantasaṃkrāntiśrāntāyāḥ śriyo viśālaṃ śaśimaṇiśilāpaṭṭaśayanam iva bibhrāṇam cakṣuḥ kuraṅgakair ghoṇāvaṃśaṃ varāhaiḥ skandhapīṭhaṃ mahiṣaiḥ prakoṣṭhabandhaṃ vyāghraiḥ parākramaṃ kesaribhir gamanaṃ mataṅgajair mṛgayākṣapitaśeṣair bhītair utkocam iva dattaṃ darśayantaṃ mādhavaguptaṃ dadṛśatuḥ // (160.1) Par.?

praviśya ca tau dūrād eva caturbhir aṅgair uttamāṅgena ca gāṃ spṛśantau namaś cakratuḥ // (161.1) Par.?

snigdhanarendradṛṣṭinirdiṣṭām ucitāṃ bhūmiṃ bhejāte // (162.1) Par.?

muhūrtaṃ ca sthitvā bhūpatir ādideśa tau adyaprabhṛti bhavadbhyāṃ kumārāv anuvartanīyau iti // (163.1) Par.?

yathājñāpayati devaḥ iti medinīdolāyamānamaulibhyām utthāya rājyavardhanaharṣau praṇematuḥ // (164.1) Par.?

tau ca pitaram // (165.1) Par.?

tataś cārabhya kṣaṇam api nimeṣonmeṣāv iva cakṣurgocarād anapayāntāv ucchvāsaniḥśvāsāv iva naktaṃdivam abhimukhasthitau bhujāv iva satatapārśvavartinau kumārayos tau babhūvatuḥ // (166.1) Par.?

atha rājyaśrīr api nṛttagītādiṣu vidagdhāsu sakhīṣu sakalāsu kalāsu ca pratidivasam upacīyamānaparicayā śanaiḥ śanair avardhata // (167.1) Par.?

parimitair eva divasair yauvanam āruroha // (168.1) Par.?

nipetur ekasyāṃ tasyāṃ śarā iva lakṣyabhuvi bhūbhujāṃ sarveṣāṃ dṛṣṭayaḥ // (169.1) Par.?

dūtasaṃpreṣaṇādibhiś ca tāṃ yayācire rājānaḥ // (170.1) Par.?

kadācit tu rājāntaḥpuraprāsādasthito bāhyakakṣyāvasthitena puruṣeṇa svaprastāvāgatāṃ gīyamānām āryām aśṛṇot // (171.1) Par.?

udvegamahāvarte pātayati payodharonnamanakāle / (172.1) Par.?

sarid iva taṭam anuvarṣaṃ vivardhamānā sutā pitaram // (172.2) Par.?

tāṃ ca śrutvā pārśvasthitāṃ mahādevīm utsāritaparijano jagāda devi taruṇībhūtā vatsā rājyaśrīḥ // (173.1) Par.?

etadīyā guṇavatteva kṣaṇam api hṛdayān nāpayāti me cintā // (174.1) Par.?

yauvanārambha eva ca kanyakānām indhanībhavanti pitaraḥ saṃtāpānalasya // (175.1) Par.?

hṛdayam andhakārayati me divasam iva payodharonnatir asyāḥ // (176.1) Par.?

kenāpi kṛtā dharmyā nābhimatā me sthitir iyaṃ yad aṅgasambhūtāny aṅkalālitāny aparityājyāny apatyakāny akāṇḍa evāgatyāsaṃstutair nīyante // (177.1) Par.?

etāni tāni khalv aṅkanasthānāni saṃsārasya // (178.1) Par.?

seyaṃ sarvābhibhāvinī śokāgner dāhaśaktir yad apatyatve samāne 'pi jātāyāṃ duhitari dūyante santaḥ // (179.1) Par.?

etadarthaṃ janmakāla eva kanyakābhyaḥ prayacchanti salilam aśrubhiḥ sādhavaḥ // (180.1) Par.?

etadbhayād akṛtadāraparigrahāḥ parihṛtagṛhavasatayaḥ śūnyāny araṇyāny adhiśerate munayaḥ // (181.1) Par.?

ko hi nāma saheta sacetano viraham apatyānām // (182.1) Par.?

yathā yathā samāpatanti dūtā varāṇāṃ varākī lajjamāneva cintā tathā tathā nitarāṃ praviśati me hṛdayam // (183.1) Par.?

kiṃ kriyate // (184.1) Par.?

tathāpi gṛhagatair anugantavyā eva lokavṛttayaḥ // (185.1) Par.?

prāyeṇa ca satsv apy anyeṣu varaguṇeṣv abhijanam evānurudhyante dhīmantaḥ // (186.1) Par.?

dharaṇīdharāṇāṃ ca mūrdhni sthito māheśvaraḥ pādanyāsa iva sakalabhuvananamaskṛto maukharī vaṃśaḥ // (187.1) Par.?

tatrāpi tilakabhūtasyāvantivarmaṇaḥ sūnur agrajo grahavarmā nāma grahapatir iva gāṃ gataḥ pitur anyūno guṇair enāṃ prārthayate // (188.1) Par.?

yadi bhavatyā api matir anumanyate tatas tasmai dātum icchāmi ity uktavati bhartari duhitṛsnehakātaratarahṛdayā sāśrulocanā mahādevī pratyuvāca āryaputra saṃvardhanamātropayoginyo dhātrīnirviśeṣā bhavanti khalu mātaraḥ kanyakānām // (189.1) Par.?

dāne tu pramāṇam āsāṃ pitaraḥ // (190.1) Par.?

kevalaṃ kṛpākṛtaviśeṣaḥ sudūreṇa tanayasnehād atiricyate duhitṛsnehaḥ // (191.1) Par.?

yathā neyaṃ yāvajjīvam āvayor ārtitāṃ pratipadyate tathāryaputra eva jānāti iti // (192.1) Par.?

rājā tu jātaniścayo duhitṛdānaṃ prati samāhūya sutāv api viditārthāv akārṣīt // (193.1) Par.?

śobhane ca divase grahavarmaṇā kanyāṃ prārthayituṃ preṣitasya pūrvāgatasyaiva pradhānadūtapuruṣasya kare sarvarājakulasamakṣaṃ duhitṛdānajalam apātayat // (194.1) Par.?

jātamudi kṛtārthe gate ca tasminn āsanneṣu ca vivāhadivaseṣūddāmadīyamānatāmbūlapaṭavāsakusumaprasādhitasarvalokam sakaladeśādiśyamānaśilpisārthāgamanam avanipālapuruṣagṛhītasamagragrāmīṇānīyamānopakaraṇasaṃbhāram rājadauvārikopanīyamānānekanṛpopāyanam upanimantritāgatabandhuvargasaṃvargaṇavyagrarājavallabham labdhamadhumadapracaṇḍacarmakārakarapuṭollālitakoṇapaṭuvighaṭṭanaraṇanmaṅgalapaṭaham piṣṭapañcāṅgulamaṇḍyamānolūkhalamusalaśilādyupakaraṇam aśeṣāśāmukhāvirbhūtacāraṇaparamparāpūryamāṇaprakoṣṭhapratiṣṭhāpyamānendrāṇīdaivatam sitakusumavilepanavasanasatkṛtaiḥ sūtradhārair ādīyamānavivāhavedīsūtrapātam utkūrcakakaraiś ca sudhākarpūraskandhair adhirohiṇīsamārūḍhair dhavair dhavalīkriyamāṇaprāsādapratolīprākāraśikharam kṣuṇṇakṣālyamānakusumbhasaṃbhārāmbhaḥplavapūrarajyamānajanapādapallavam nirūpyamāṇayautakayogyamātaṅgaturaṅgataraṅgitāṅganam gaṇanābhiyuktagaṇakagaṇagṛhyamāṇalagnaguṇam gandhodakavāhimakaramukhapraṇālīpūryamāṇakrīḍāvāpīsamūham hemakāracakraprakrāntahāṭakaghaṭanaṭāṅkāravācālitālindakam utthāpitābhinavabhittipātyamānabahalavālukākaṇṭhakālepākulālepakalokam caturacitrakaracakravālalikhyamānamāṅgalyālekhyam lepyakārakadambakakriyamāṇamṛnmayamīnakūrmamakaranārikelakadalīpūgavṛkṣakam kṣitipālaiś ca svayam ābaddhakakṣyaiḥ svāmyarpitakarmaśobhāsaṃpādanākulaiḥ sindūrakuṭṭim abhūmīś ca masṛṇayadbhir vinihitasarasātarpaṇahastān vinyastālaktakapāṭalāṃś ca cūtāśokapallavalāñchitaśikharān udvāhavitardikāstambhān uttambhayadbhiḥ prārabdhavividhavyāpāram āsūryodayāc ca praviṣṭābhiḥ satībhiḥ subhagābhiḥ surūpābhiḥ suveśābhir avidhavābhiḥ sindūrarajorājirājitalalāṭābhir vadhūvaragotragrahaṇagarbhāṇi śrutisubhagāni maṅgalāni gāyantībhir bahuvidhavarṇakādigdhāṅgulībhir grīvāsūtrāṇi ca citrayantībhiś citrapattralatālekhyakuśalābhiḥ kalaśāṃś ca dhavalitāñ śītalaśārājiraśreṇīś ca maṇḍayantībhir abhinnapuṭakarpāsatūlapallavāṃś ca vaivāhikakaṅkaṇorṇāsūtrasaṃnāhāṃś ca rañjayantībhir balāśanāghṛtaghanīkṛtakuṅkumakalkamiśritāṃś cāṅgarāgāṃl lāvaṇyaviśeṣakṛnti ca mukhālepanāni kalpayantībhiḥ kakkolamiśrāḥ sajātīphalāḥ sphuratsphītasphāṭikakarpūraśakalakhacitāntarālā lavaṅgamālā racayantībhiḥ samantāt sāmantasīmantinībhir vyāptam bahuvidhabhaktinirmāṇanipuṇapurāṇapaurapuraṃdhribadhyamānair baddhaiś cācāracaturāntaḥpurajaratījanitapūjārājamānarajakarajyamānai raktaiś cobhayapaṭāntalagnaparijanapreṅkholitaiś chāyāsu śoṣyamāṇaiḥ śuṣkaiś ca kuṭilakramarūpakriyamāṇapallavaparabhāgair aparair ārabdhakuṅkumapaṅkasthāsakacchuraṇair aparair udbhujabhujiṣyabhajyamānabhaṅgurottarīyaiḥ kṣaumaiś ca bādaraiś ca dukūlaiś ca lālātantujaiś cāṃśukaiś ca netraiś ca nirmokanibhair akaṭhorarambhāgarbhakomalair niḥśvāsahāryaiḥ sparśānumeyair vāsobhiḥ sarvataḥ sphuradbhir indrāyudhasahasrair iva saṃchāditam ujjvalanicolakāvaguṇṭhyamānahaṃsakulaiś ca śayanīyais tārāmuktāphalopacīyamānaiś ca kañcukair anekopayogapāṭyamānaiś cāparimitaiḥ paṭṭapaṭīsahasrair abhinavarāgakomaladukūlarājamānaiś ca paṭavitānaiḥ stavarakanivahanirantarachādyamānasamastapaṭalaiś ca maṇḍapair uccitranetrapaṭaveṣṭyamānaiś ca stambhair ujjvalaṃ ramaṇīyaṃ cautsukyadaṃ ca maṅgalyaṃ cāsīdrājakulam // (195) Par.?

devī tu yaśomatī vivāhotsavaparyākulahṛdayā hṛdayena bhartari kutūhalena jāmātari snehena duhitari upacāreṇa nimantritastrīṣu ādeśena parijane śarīreṇa saṃcaraṇe cakṣuṣā kṛtākṛtapratyavekṣaṇeṣu ānandena mahotsave ekāpi bahudhā vibhaktevābhavat // (196.1) Par.?

bhūpatir apy upary upari visarjitoṣṭravāmījanitajāmātṛjoṣaḥ saty apy ājñāsaṃpādanadakṣe mukhekṣaṇapare parijane samaṃ putrābhyāṃ duhitṛsnehaviklavaḥ sarvaṃ svayam akarot // (197.1) Par.?

evaṃ ca tasminn avidhavāmaya iva bhavati rājakule maṅgalamaya iva jāyamāne jīvaloke cāraṇamayeṣv iva lakṣyamāṇeṣu diṅmukheṣu paṭaharavamaya iva kṛte 'ntarikṣe bhūṣaṇamaya iva bhramati parijane bāndhavamaya iva dṛśyamāne sarge nirvṛtimaya ivopalakṣyamāṇe kāle lakṣmīmaya iva vijṛmbhamāṇe mahotsave nidhāna iva sukhasya phala iva janmanaḥ pariṇāma iva puṇyasya yauvana iva vibhūteḥ yauvarājya iva prīteḥ siddhikāla iva manorathasya vartamāne gaṇyamāna iva janāṅgulībhiḥ ālokyamāna iva mārgadhvajaiḥ pratyudgamyamāna iva maṅgalyavādyapratiśabdakaiḥ āhūyamāna iva mauhūrtikaiḥ ākṛṣyamāṇa iva manorathaiḥ pariṣvajyamāna iva vadhūsakhīhṛdayair ājagāma vivāhadivasaḥ // (198.1) Par.?

prātar eva pratīhāraiḥ samutsāritanikhilānibaddhalokaṃ viviktam akriyata rājakulam // (199.1) Par.?

atha mahāpratīhāraḥ praviśya nṛpasamīpam deva jāmātur antikāt tāmbūladāyakaḥ pārijātakanāmā samprāptaḥ ity abhidhāya svākāraṃ yuvānam adarśayat // (200.1) Par.?

rājā tu taṃ dūrād eva jāmātṛbahumānād darśitādaraḥ bālaka kaccit kuśalī grahavarmā iti papraccha // (201.1) Par.?

asau tu samākarṇitanarādhipadhvanir dhāvamānaḥ katicit padāny upasṛtya prasārya ca bāhū sevācaturaś ciraṃ vasuṃdharāyāṃ nidhāya mūrdhānam utthāya deva kuśalī yathājñāpayasy arcayati ca devaṃ namaskāreṇa iti vyajñāpayat // (202.1) Par.?

āgatajāmātṛnivedanāgataṃ ca taṃ jñātvā kṛtasatkāraṃ rājā yāminyāḥ prathame yāme vivāhakālātyayakṛto yathā na bhavati doṣaḥ iti saṃdiśya pratīpaṃ prāhiṇot // (203.1) Par.?

atha sakalakamalavanalakṣmīṃ vadhūmukha iva saṃcārya samavasite vāsare vivāhadivasaśriyaḥ pādapallava iva rajyamāne savitari vadhūvarānurāgalaghūkṛtapremalajjiteṣv iva vighaṭamāneṣu cakravākamithuneṣu saubhāgyadhvaja iva raktāṃśukasukumāravapuṣi nabhasi sphurati saṃdhyārāge kapotakaṇṭhakarbure varayātrāgamanarajasīva kaluṣayati diṅmukhāni timire lagnasaṃpādanasajja ivojjihāne jyotirgaṇe vivāhamaṅgalakalaśa ivodayaśikhariṇā samutkṣipyamāṇe vardhamānadhavalacchāye tārādhipamaṇḍale vadhūvadanalāvaṇyajyotsnāparipītatamasi pradoṣe vṛthoditam upahasatsv iva rajanikaram uttānitamukheṣu kumudavaneṣv ājagāma muhur muhur ullāsitasphārasphuritāruṇacāmarair manorathair ivotthitarāgāgrapallavaiḥ purodhāvamānaiḥ pādātair utkarṇakaṭakahayapratiheṣitadīyamānasvāgatair iva vājināṃ vṛndair āpūritadigvibhāgaḥ calakarṇacāmarāṇāṃ cāmīkaramayasarvopakaraṇānāṃ varṇakalambināṃ balināṃ ghaṇṭāṭāṅkāriṇāṃ kariṇāṃ ghaṭābhiḥ ghaṭayann iva punar indūdayavilīnam andhakāram nakṣatramālāmaṇḍitamukhīṃ kariṇīṃ niśākara iva pauraṃdarīṃ diśam ārūḍhaḥ prakaṭitavividhavihagavirutais tālāvacaracāraṇaiḥ puraḥsarair bālo vasanta ivopavanaiḥ kriyamāṇakolāhalo gandhatailāvasekasugandhinā dīpikācakravālālokena kuṅkumapaṭavāsadhūlipaṭaleneva piñjarīkurvan sakalaṃ lokam utphullamallikāmuṇḍamālāmadhyādhyāsitakusumaśekhareṇa śirasā hasann iva sapariveṣakṣapākaraṃ kaumudīpradoṣam ātmarūpanirjitamakaraketukarāpahṛtena kārmukeṇeva kausumena dāmnā viracitavaikakṣakavilāsaḥ kusumasaurabhagarvabhrāntabhramarakulakalakalapralāpasubhagaḥ pārijāta iva jātaḥ śriyā saha punar avatārito medinīm navavadhūvadanāvalokanakutūhaleneva kṛṣyamāṇahṛdayaḥ patann iva mukhena pratyāsannalagno grahavarmā tvaritam ājagāma // (204.1) Par.?

rājā tu tam upadvāram āgataṃ caraṇābhyām eva rājacakrānugamyamānaḥ sasutaḥ pratyujjagāma // (205.1) Par.?

avatīrṇaṃ ca taṃ kṛtanamaskāraṃ manmatham iva mādhavaḥ prasāritabhujo gāḍham āliliṅga // (206.1) Par.?

yathākramaṃ pariṣvaktarājyavardhanaharṣaṃ ca haste gṛhītvābhyantaraṃ ninye // (207.1) Par.?

svanirviśeṣāsanadānādinā cainam upacāreṇopacacāra // (208.1) Par.?

na cirāc ca gambhīranāmā nṛpateḥ praṇayī vidvān dvijanamā grahavarmāṇam uvāca tāta tvāṃ prāpya cirāt khalu rājaśriyā ghaṭitau tejomayau sakalajagadgīyamānabudhakarṇānandakāriguṇagaṇau somasūryavaṃśāv iva puṣpabhūtimukharavaṃśau // (209.1) Par.?

prathamam eva kaustubhamaṇir iva guṇaiḥ sthito 'si hṛdaye devasya // (210.1) Par.?

idānīṃ tu śaśīva śirasā parameśvareṇāsi voḍhavyo jātaḥ iti // (211.1) Par.?

evaṃ vadaty eva tasmin nṛpam upasṛtya mauhūrtikāḥ deva samāsīdati lagnavelā // (212.1) Par.?

vrajatu jāmātā kautukagṛham ity ūcuḥ // (213.1) Par.?

atha narendreṇa uttiṣṭha gaccha iti gadito grahavarmā praviśyāntaḥpuraṃ jāmātṛdarśanakutūhalinīnāṃ strīṇāṃ patitāni locanasahasrāṇi vikacanīlakuvalayavanānīva laṅghayann āsasāda kautukagṛhadvāram // (214.1) Par.?

nivāritaparijanaś ca praviveśa // (215.1) Par.?

atha tatra katipayāptapriyasakhīsvajanapramadāprāyaparivārām aruṇāṃśukāvaguṇṭhitamukhīṃ prabhātasaṃdhyām iva svaprabhayā niṣprabhān pradīpakān kurvāṇām atisaukumāryaśaṅkiteneva yauvanena nātinirbharam upagūḍhām sādhvasanirudhyamānahṛdayadeśaduḥkhamuktair nibhṛtāyataiḥ śvasitair apayāntaṃ kumārabhāvam ivānuśocantīm atyutkampinīṃ patanabhiyeva trapayā niṣpandaṃ dhāryamāṇām hastaṃ tāmarasapratipakṣam āsannagrahaṇaṃ śaśinam iva rohiṇīṃ bhayavepamānamānasām avalokayantīm candanadhavalatanulatām jyotsnādānasaṃcitalāvaṇyāt kumudinīgarbhād iva prasūtām kusumāmodanirhāriṇīṃ vasantahṛdayād iva nirgatām niḥśvāsaparimalākṛṣṭamadhukarakulāṃ malayamārutād ivotpannām kṛtakaṃdarpānusaraṇāṃ ratim iva punarjātām prabhālāvaṇyamadasaurabhamādhuryaiḥ kaustubhaśaśimadirāpārijātāmṛtaprabhavaiḥ sarvaratnaguṇair aparām iva surāsuraruṣā ratnākareṇa kalpitāṃ śriyam snigdhena bālikālokena sitasindhuvārakusumamañjarībhir iva muktādīdhitibhiḥ kalpitakarṇāvataṃsām karṇābharaṇamarakataprabhāharitaśādvalena kapolasthalītalena vinodayantīm iva hāriṇīṃ locanacchāyām adhomukhaṃ varakautukālokanākulaṃ muhurmuhuḥ kṛtamukhonnamanaprayatnaṃ sakhījanaṃ hṛdayaṃ ca nirbhartsayantīṃ vadhūm apaśyat // (216.1) Par.?

praviśantam eva taṃ hṛdayacauraṃ vadhvā samarpitaṃ jagrāha kaṃdarpaḥ // (217.1) Par.?

parihāsasmeramukhībhiś ca nārībhiḥ kautukagṛhe yad yat kāryate jāmātā tat tat sarvam atipeśalaṃ cakāra // (218.1) Par.?

kṛtapariṇayānurūpaveśaparigrahāṃ gṛhītvā kare vadhūṃ nirjagāma // (219.1) Par.?

jagāma ca navasudhādhavalāṃ nimantritāgatais tuṣāraśailopatyakām iva tryambakāmbikāvivāhāhūtair bhūbhṛdbhiḥ parivṛtām sekasukumārayavāṅkuradanturaiḥ pañcāsyaiḥ kalaśaiḥ komalavarṇikāvicitrair amitramukhaiś ca maṅgalyaphalahastābhir añjalikārikābhir udbhāsitaparyantām upādhyāyopadhīyamānendhanadhūmāyamānāgnisaṃdhukṣaṇākṣaṇikopadraṣṭṛdvijām upakṛśānunihitānupahataharitakuśām saṃnihitadṛṣadajinājyasruksamitpūlīnivahām nūtanaśūrpārpitaśyāmalaśamīpalāśamiśralājahāsinīṃ vedīm // (220.1) Par.?

āruroha ca tāṃ divam iva sajyotsnaḥ śaśī // (221.1) Par.?

samutsasarpa ca vellitāruṇaśikhāpallavasya śikhinaḥ kusumāyudha iva ratidvitīyo raktāśokasya samīpam // (222.1) Par.?

hute ca hutabhuji pradakṣiṇāvartapravṛttābhir vadhūvadanavilokanakutūhalinībhir iva jvālābhir eva saha pradakṣiṇaṃ babhrāma // (223.1) Par.?

pātyamāne ca lājāñjalau nakhamayūkhadhavalitatanur adṛṣṭapūrvavadhūvararūpavismayasmera ivādṛśyata vibhāvasuḥ // (224.1) Par.?

atrāntare svacchakapolodarasaṃkrāntam analapratibimbam iva nirvāpayantī sthūlamuktāphalavimalabāṣpabindusaṃdohadarśitadurdinā nirvadanavikāraṃ ruroda vadhūḥ // (225.1) Par.?

udaśruvilocanānāṃ ca bāndhavavadhūnām udapādi mahān ākrandaḥ // (226.1) Par.?

parisamāpitavaivāhikakriyākalāpas tu jāmātā vadhvā samaṃ praṇanāma śvaśurau // (227.1) Par.?

praviveśa ca dvārapakṣalikhitaratiprītidaivataṃ praṇayibhir iva prathamapraviṣṭair alikulaiḥ kṛtakolāhalam alikulapakṣapavanapreṅkholitaiḥ karṇotpalaprahārabhayaprakampitair iva maṅgalapradīpaiḥ prakāśitam ekadeśalikhitastabakitaraktāśokatarutalabhājādhijyacāpena tiryakkūṇitanetratribhāgeṇa śaram ṛjūkurvatā kāmadevenādhiṣṭhitam ekapārśvanyastena kāñcanācāmarukeṇetarapārśvavartinyā ca dāntaśapharukadhāriṇyā kanakaputrikayā sākṣāl lakṣmyevoddaṇḍapuṇḍarīkahastayā sanāthena sopadhānena svāstīrṇena śayanena śobhamānam śayanaśirobhāgasthitena ca kṛtakumudaśobhena kusumāyudhasāhāyakāyāgatena śaśineva nidrākalaśena rājatena virājamānaṃ vāsagṛham // (228.1) Par.?

tatra ca hrītāyā navavadhūkāyāḥ parāṅmukhaprasuptāyā maṇibhittidarpaṇeṣu mukhapratibimbāni prathamālāpākarṇanakautukāgatagṛhadevatānanānīva maṇigavākṣakeṣu vīkṣamāṇaḥ kṣaṇadāṃ ninye // (229.1) Par.?

sthitvā ca śvaśurakule śīlenāmṛtam iva śvaśrūhṛdaye varṣann abhinavābhinavopacārair apunaruktāny ānandamayāni daśa dināni dattvā ca rājadauvārikam iva rājakule raṇaraṇakaṃ yautakaniveditānīva śambalāny ādāya hṛdayāni sarvalokasya kathaṃ katham api visarjito nṛpeṇa vadhvā saha svadeśam agamad iti // (230.1) Par.?

Duration=1.0504589080811 secs.